บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ |
พระไตรปิฎกเล่มที่ ๓๒ ภาษาบาลี อักษรไทย พระสุตตันตปิฎกเล่มที่ ๒๔ สุตฺต. ขุ. อปทานํ (๑)
[๑๘๓] |๑๘๓.๑| สุวณฺณวณฺณํ สมฺพุทฺธํ สตรํสีว อุตฺตมํ ๑- ทิสํ อนุวิโลเกนฺตํ คจฺฉนฺตํ อนิลญฺชเส ฯ |๑๘๓.๒| กุฏชํ ปุปฺผิตํ ทิสฺวา สํวิตฺถกสโมตฺถกํ ๒- รุกฺขโต โอจินิตฺวาน ผุสฺสสฺส อภิโรปยึ ฯ |๑๘๓.๓| เทฺวนวุเต อิโต กปฺเป ยํ ปุปฺผํ อภิโรปยึ ทุคฺคตึ นาภิชานามิ พุทฺธปูชายิทํ ผลํ ฯ |๑๘๓.๔| อิโต สตฺตรเส กปฺเป ตโย อาสึสุ ๓- ปุปฺผิตา สตฺตรตนสมฺปนฺนา จกฺกวตฺตี มหพฺพลา ฯ |๑๘๓.๕| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา กุฏชปุปฺผิโย เถโร อิมา คาถาโย อภาสิตฺถาติ ฯ กุฏชปุปฺผิยตฺเถรสฺส อปทานํ สมตฺตํ ฯ ทุติยํ พนฺธุชีวกตฺเถราปทานํ (๑๘๒) [๑๘๔] |๑๘๔.๖| โสภิโต ๔- นาม สมฺพุทฺโธ สยมฺภู สพฺภิวณฺณิโต สมาธึ โส สมาปนฺโน นิสีทิ ปพฺพตนฺตเร ฯ @เชิงอรรถ: ๑ ม. ยุ. อุคฺคตํ ฯ ๒ ม. สํวิตถตสโมตฺถตํ ฯ ยุ. หํ วิตฺถตสโมตฺถฏํ ฯ @๓ ม. ตโย อาสุํ สุปุปฺผิตา ฯ ๔ ม. ยุ. สิทฺธตฺโถ ฯ |๑๘๔.๗| ชาตสฺสเร คเวสนฺโต ทกชํ ปุปฺผมุตฺตมํ พนฺธุชีวกปุปฺผานิ อทฺทสํ สมนนฺตรํ ฯ |๑๘๔.๘| อุโภหตฺเถหิ ปคฺคยฺห อุปคจฺฉึ มหามุนึ ปสนฺนจิตฺโต สุมโน โสภิตสฺสาภิโรปยึ ๑- ฯ |๑๘๔.๙| จตุนวุเต อิโต กปฺเป ยํ ปุปฺผมภิโรปยึ ทุคฺคตึ นาภิชานามิ พุทฺธปูชายิทํ ผลํ ฯ |๑๘๔.๑๐| อิโต จตุทฺทเส กปฺเป เอโก อาสึ ชนาธิโป สมุทฺทกปฺโป นาเมน จกฺกวตฺติ มหพฺพโล ฯ |๑๘๔.๑๑| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา พนฺธุชีวโก เถโร อิมา คาถาโย อภาสิตฺถาติ ฯ พนฺธุชีวกตฺเถรสฺส อปทานํ สมตฺตํ ฯ ตติยํ โกตุมฺพริยตฺเถราปทานํ (๑๘๓) [๑๘๕] |๑๘๕.๑๒| กณิการํว โชตนฺตํ นิสินฺนํ ปพฺพตนฺตเร อปฺปเมยฺยํว อุทธึ อุทฺธตํ ๒- ธรณึ ยถา ฯ |๑๘๕.๑๓| ปุเรตํ ๓- เทวสงฺเฆน นิสภาชานิยํ ยถา ฯ หฏฺโฐ หฏฺเฐน จิตฺเตน อุปคญฺฉึ นรุตฺตมํ ฯ @เชิงอรรถ: ๑ ม. ยุ. สิทฺธตฺถสฺสาภิโรปยึ ฯ ๒ ม. วิตฺถตํ ฯ ๓ ม. ปูชิตํ ฯ ยุ. ปเรตํ ฯ |๑๘๕.๑๔| สตฺต ปุปฺผานิ ปคฺคยฺห โกตุมฺพรํ สมากุลํ พุทฺธสฺส อภิโรเปสึ สิขิโน โลกพนฺธุโน ฯ |๑๘๕.๑๕| เอกตฺตึเส อิโต กปฺเป ยํ ปุปฺผมภิโรปยึ ทุคฺคตึ นาภิชานามิ พุทฺธปูชายิทํ ผลํ ฯ |๑๘๕.๑๖| อิโต วีสติกปฺปมฺหิ มหาเนลสนามโก เอโก อาสึ มหาเตโช จกฺกวตฺติ มหพฺพโล ฯ |๑๘๕.๑๗| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา โกตุมฺพริโย เถโร อิมา คาถาโย อภาสิตฺถาติ ฯ โกตุมฺพริยตฺเถรสฺส อปทานํ สมตฺตํ ฯ จตุตฺถํ ปญฺจหตฺถิยตฺเถราปทานํ (๑๘๔) [๑๘๖] |๑๘๖.๑๘| ติสฺโส นามาสิ ภควา โลกเชฏฺโฐ นราสโภ ปุรกฺขโต สาวเกหิ รถิยํ ปฏิปชฺชถ ฯ |๑๘๖.๑๙| ปญฺจ อุปฺปลหตฺถา จ จตุโอฏฺฐปิตา ๑- มยา อาหุตึ ทาตุกาโมหํ ปุตฺโตมฺหิ ๒- หิตสิทฺธิยา ฯ |๑๘๖.๒๐| สุวณฺณวณฺณํ สมฺพุทฺธํ คจฺฉนฺตํ อนฺตราปเณ พุทฺธรํสีหิ ๓- ผุฏฺโฐมฺหิ ๔- ปูเชสึ ทิปทุตฺตมํ ฯ @เชิงอรรถ: ๑ ม. จาตุรา ฐปิตา มยา ฯ ยุ. จตุโรฏฺฐปิตา มยา ฯ ๒ ม. ปคฺคณฺหึ วตสิทฺธิยา ฯ @ยุ. มูโคมฺหิ ... ฯ ๓ ยุ. พุทฺธรํสาภิ ฆุฏฺโฐมฺหิ ฯ ๔ ม. ผุฏฺโฐสฺมิ ฯ |๑๘๖.๒๑| เทฺวนวุเต อิโต กปฺเป ยํ ปุปฺผมภิโรปยึ ทุคฺคตึ นาภิชานามิ พุทฺธปูชายิทํ ผลํ ฯ |๑๘๖.๒๒| อิโต เตรสกปฺปมฺหิ ปญฺจ สุลภสมฺมตา ๑- สตฺตรตนสมฺปนฺนา จกฺกวตฺตี มหพฺพลา ฯ |๑๘๖.๒๓| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา ปญฺจหตฺถิโย เถโร อิมา คาถาโย อภาสิตฺถาติ ฯ ปญฺจหตฺถิยตฺเถรสฺส อปทานํ สมตฺตํ ฯ ปญฺจมํ อิสิมุคฺคทายกตฺเถราปทานํ (๑๘๕) [๑๘๗] |๑๘๗.๒๔| อุเทนฺตํ สตรํสีว ปีตรํสีว ๒- ภาณุมํ กกุธํ วิลสนฺตํว ปทุมุตฺตรนายกํ ฯ |๑๘๗.๒๕| อิสิมุคฺคํ ๓- นิมนฺเตตฺวา มธุขุทฺเท อนีลเก ปาสาเทปิ ๔- ฐิโต สนฺโต อทาสึ โลกพนฺธุโน ฯ |๑๘๗.๒๖| อฏฺฐสตสหสฺสานิ อเหสุํ พุทฺธสาวกา สพฺเพสํ ปตฺต ปูเรนฺตํ ตโต วาปิ ๕- พหูตรํ ฯ |๑๘๗.๒๗| เตน จิตฺตปฺปสาเทน สุกฺกมูเลน โจทิโต กปฺปานํ สตสหสฺสํ ทุคฺคตึ นูปปชฺชหํ ฯ @เชิงอรรถ: ๑ ม. ปญฺจ สุสภสมฺมตา ฯ ยุ. ปญฺจาสุ สภาสมฺมตา ฯ ๒ ยุ. อุคฺคตํ อิว ... ฯ @๓ ม. อิสิมุคฺคานิ ปิสิตฺวา ฯ ยุ. อิสิมุคฺคา นิสนฺเทตฺวา ฯ ๔ ม. ยุ. ... ว ฯ @๕ ม. ยุ. จาปิ ฯ |๑๘๗.๒๘| จตฺตาฬีสมฺหิ สหสฺเส กปฺปานํ อฏฺฐตึสเต มหิสมนฺตนามา ๑- เต จกฺกวตฺตี มหพฺพลา ฯ |๑๘๗.๒๙| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา อิสิมุคฺคทายโก เถโร อิมา คาถาโย อภาสิตฺถาติ ฯ อิสิมุคฺคทายกตฺเถรสฺส อปทานํ สมตฺตํ ฯ ฉฏฺฐํ โพธิอุปฏฺฐายกตฺเถราปทานํ (๑๘๖) [๑๘๘] |๑๘๘.๓๐| นคเร รมฺมวติยา อาสึ มุรชวาทโก ๒- นิจฺจุปฏฺฐานยุตฺโตมฺหิ คโตหํ โพธิมุตฺตมํ ฯ |๑๘๘.๓๑| สายํ ปาตํ อุปฏฺฐิตฺวา สุกฺกมูเลน โจทิโต อฏฺฐารเส กปฺปสเต ทุคฺคตึ นูปปชฺชหํ ฯ |๑๘๘.๓๒| ปญฺจทเส กปฺปสเต อิโตโหสึ ๓- ชนาธิโป ทมโถ ๔- นาม นาเมน จกฺกวตฺติ มหพฺพโล ฯ |๑๘๘.๓๓| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา โพธิอุปฏฺฐายโก ๕- เถโร อิมา คาถาโย อภาสิตฺถาติ ฯ โพธิอุปฏฺฐายกตฺเถรสฺส อปทานํ สมตฺตํ ฯ @เชิงอรรถ: ๑ ม. อิสิมุคฺคสนามา เต ฯ ๒ ยุ. มุรชนามโก ฯ ๓ ยุ. ราชาโหสึ ฯ @๔ ม. มุรโช ... ฯ ๕ ม. โพธิอุปฏฺฐาโก ฯ สตฺตมํ เอกจินฺติกตฺเถราปทานํ (๑๘๗) [๑๘๙] |๑๘๙.๓๔| ยทา เทโว เทวกายา จวเต อายุสงฺขยา ตโย สทฺทา นิจฺฉรนฺติ เทวานํ อนุโมทตํ ฯ |๑๘๙.๓๕| อิโต โภ สุคตึ คจฺฉ มนุสฺสานํ สหพฺยตํ มนุสฺสภูโต สทฺธมฺเม ลภ สทฺธํ อนุตฺตรํ ฯ |๑๘๙.๓๖| สา เต สทฺธา นิวิฏฺฐสฺส ๑- มูลชาตา ปติฏฺฐิตา ยาวชีวํ อสํหิรา สทฺธมฺเม สุปเวทิเต ฯ |๑๘๙.๓๗| กาเยน กุสลํ กตฺวา วาจาย กุสลํ พหุํ มนสา กุสลํ กตฺวา อพฺยาปชฺฌํ นิรูปธึ ฯ |๑๘๙.๓๘| ตโต อุปจิตํ ปุญฺญํ กตฺวา ทาเนน ตํ พหุํ อญฺเญปิ มจฺเจ สทฺธมฺเม พฺรหฺมจริเย นิเวสย ฯ |๑๘๙.๓๙| อิมาย อนุกมฺปาย เทวเทวํ ๒- ยถาวิทู ภวนฺตํ อนุโมทนฺติ เอหิ เทว ปุนปฺปุนํ ฯ |๑๘๙.๔๐| สํวิคฺโคหํ ๓- ตทา อาสึ เทวสงฺเฆ สมาคเต กํสุ นาม อหํ โยนึ คมิสฺสามิ อิโต จุโต ฯ |๑๘๙.๔๑| มม สํเวคมญฺญาย สมโณ ภาวิตินฺทฺริโย มมุทฺธริตุกาโม โส อาคจฺฉิ มม สนฺติเก ฯ |๑๘๙.๔๒| สุมโน นาม นาเมน ปทุมุตฺตรสาวโก อตฺถธมฺมานุสาสิตฺวา สํเวเชสิ มมํ ตทา ฯ @เชิงอรรถ: ๑ ม. นิวิฏฺฐาสฺส ฯ ยุ. นวิฏฺฐาย ฯ ๒ ม. เทวาเทวํ ฯ ๓ ม. สํเวโค เม ตทา อาสิ ฯ @ยุ. สํวิคฺโคมฺหิ ตทา อาสึ ฯ |๑๘๙.๔๓| ตสฺสาหํ วจนํ สุตฺวา พุทฺเธ จิตฺตํ ปสาทยึ อภิวาเทตฺวาปิ ๑- สมฺพุทฺธํ ตตฺถ กาลํ กโต อหํ ฯ |๑๘๙.๔๔| อุปปชฺชึ ส ตตฺเถว สุกฺกมูเลน โจทิโต กปฺปานํ สตสหสฺสํ ทุคฺคตึ นูปปชฺชหํ ฯ |๑๘๙.๔๕| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา เอกจินฺติโก เถโร อิมา คาถาโย อภาสิตฺถาติ ฯ เอกจินฺติกตฺเถรสฺส อปทานํ สมตฺตํ ฯ อฏฺฐมํ ติกณฺณิปุปฺผิยตฺเถราปทานํ (๑๘๘) [๑๙๐] |๑๙๐.๔๖| เทวภูโต อหํ สนฺโต อจฺฉราหิ ปุรกฺขโต ปุพฺพกมฺมํ สริตฺวาน พุทฺธเสฏฺฐํ อนุสฺสรึ ฯ |๑๙๐.๔๗| ติกณฺณิปุปฺผํ ปคฺคยฺห สกํ จิตฺตํ ปสาทยึ พุทฺธมฺหิ ๒- อภิโรเปสึ วิปสฺสิมฺหิ นราสเภ ฯ |๑๙๐.๔๘| เอกนวุเต อิโต กปฺเป ยํ ปุปฺผํ อภิโรปยึ ทุคฺคตึ นาภิชานามิ พุทฺธปูชายิทํ ผลํ ฯ |๑๙๐.๔๙| เตสตฺตติมฺหิโต กปฺเป จตุโรสุํ ๓- รมุตฺตมา สตฺตรตนสมฺปนฺนา จกฺกวตฺตี มหพฺพลา ฯ @เชิงอรรถ: ๑ ม. ยุ. ตํ ธีรํ อภิวาเทตฺวา ฯ ๒ ยุ. พุทฺธสฺส ฯ ๓ ยุ. จตุราสุํ นรุตฺตมา ฯ @ม. จตุราสุํ รมุตฺตมา ฯ |๑๙๐.๕๐| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา ติกณฺณิปุปฺผิโย เถโร อิมา คาถาโย อภาสิตฺถาติ ฯ ติกณฺณิปุปฺผิยตฺเถรสฺส อปทานํ สมตฺตํ ฯ นวมํ เอกจาริยตฺเถราปทานํ (๑๘๙) [๑๙๑] |๑๙๑.๕๑| ตาวตึเสสุ เทเวสุ มหาโฆโส ตทา อหุ พุทฺโธ จ โลเก นิพฺพาติ มยญฺจมฺห สราคิโน ฯ |๑๙๑.๕๒| เตสํ สํเวคชาตานํ โสกสลฺลสมงฺคินํ สพเลน อุปตฺถทฺโธ อคมํ พุทฺธสนฺติเก ฯ |๑๙๑.๕๓| มนฺทารวํ คเหตฺวาน สงฺคีติ ๑- อภินิมฺมิตํ ปรินิพฺพานกาลมฺหิ ๒- พุทฺธสฺส อภิโรปยึ ฯ |๑๙๑.๕๔| สพฺเพ เทวานุโมทึสุ อจฺฉราโย จ เม ตทา กปฺปานํ สตสหสฺสํ ทุคฺคตึ นูปปชฺชหํ ฯ |๑๙๑.๕๕| สฏฺฐิกปฺปสหสฺสมฺหิ อิโต โสฬส เต ชนา มหามลฺลชนา นาม จกฺกวตฺตี มหพฺพลา ฯ |๑๙๑.๕๖| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ @เชิงอรรถ: ๑ ยุ. สํหิตํ ฯ ๒ ม. ปรินิพฺพุตกาลมฺหิ ฯ อิตฺถํ สุทํ อายสฺมา เอกจาริโย เถโร อิมา คาถาโย อภาสิตฺถาติ ฯ เอกจาริยตฺเถรสฺส อปทานํ สมตฺตํ ฯ ทสมํ ติวณฺฏิปุปฺผิยตฺเถราปทานํ (๑๙๐) [๑๙๒] |๑๙๒.๕๗| อภิภุํ ๑- เถรํ ปนิชฺฌาม สพฺเพ สงฺคมฺม เต มยํ ๒- เตสํ นิชฺฌายมานานํ ปริฬาโห อชายถ ฯ |๑๙๒.๕๘| สุนนฺโท นาม นาเมน พุทฺธสฺส สาวโก ตทา ธมฺมทสฺสิสฺส มุนิโน อาคญฺฉิ มม สนฺติเก ฯ |๑๙๒.๕๙| เย เม ปฏฺฐจรา อาสุํ เต เม ปุปฺผํ อทุํ ตทา ตาหํ ปุปฺผํ คเหตฺวาน สาวเก อภิโรปยึ ฯ |๑๙๒.๖๐| โสหํ กาลํ กโต ตตฺถ ปุนาปิ อุปปชฺชหํ อฏฺฐารเส กปฺปสเต วินิปาตํ น คญฺฉหํ ฯ |๑๙๒.๖๑| เตรเสโต กปฺปสเต อฏฺฐาสุํ ธูมเกตุโน สตฺตรตนสมฺปนฺนา จกฺกวตฺตี มหพฺพลา ฯ |๑๙๒.๖๒| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา ติวณฺฏิปุปฺผิโย เถโร อิมา คาถาโย อภาสิตฺถาติ ฯ ติวณฺฏิปุปฺผิยตฺเถรสฺส อปทานํ สมตฺตํ ฯ @เชิงอรรถ: ๑ ม. อภิภูตํ ปนิชฺฌนฺติ ฯ ยุ. อภิภุํ โว ปนิชฺฌนฺติ ฯ ๒ ม. ... มมํ ฯ อุทฺทานํ กุฏชา ๑- พนฺธุชีวี จ โกตุมฺพริกหตฺถิโย อิสิมุคฺโค จ โพธิ จ เอกจินฺตี ติกณฺณิโก เอกจารี ติวณฺฏี จ คาถา สฏฺฐี ๒- ปกิตฺติตาติ ฯ กุฏชปุปฺผิยวคฺโค เอกูนวีสติโม ฯ ------------------ วีสติโม ตมาลปุปฺผิยวคฺโค ปฐมํ ตมาลปุปฺผิยตฺเถราปทานํ (๑๙๑)เนื้อความพระไตรปิฎกฉบับภาษาบาลีอักษรไทย เล่มที่ ๓๒ หน้าที่ ๒๘๒-๒๙๑. http://84000.org/tipitaka/read/pali_item_s.php?book=32&item=183&items=10&modeTY=2&mode=bracket อ่านโดยใช้เนื้อความเป็นเกณฑ์แบ่งข้อ :- http://84000.org/tipitaka/read/pali_item_s.php?book=32&item=183&items=10&modeTY=2 อ่านเทียบพระไตรปิฎกฉบับภาษาบาลีอักษรโรมัน :- http://84000.org/tipitaka/read/roman_item_s.php?book=32&item=183&items=10&modeTY=2&mode=bracket อ่านเทียบพระไตรปิฎกภาษาไทยฉบับหลวง :- http://84000.org/tipitaka/read/byitem_s.php?book=32&item=183&items=10&modeTY=2&mode=bracket ศึกษาอรรถกถานี้ได้ที่ :- http://84000.org/tipitaka/attha/attha.php?b=32&i=183 The Pali Atthakatha in Thai :- http://84000.org/tipitaka/atthapali/read_th.php?B=50&A=4829 The Pali Atthakatha in Roman :- http://84000.org/tipitaka/atthapali/read_rm.php?B=50&A=4829 สารบัญพระไตรปิฎกเล่มที่ ๓๒ http://84000.org/tipitaka/read/?index_32
|
บันทึก ๑๒ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]