บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ |
พระไตรปิฎกเล่มที่ ๓๒ ภาษาบาลี อักษรไทย พระสุตตันตปิฎกเล่มที่ ๒๔ สุตฺต. ขุ. อปทานํ (๑)
อฏฺฐตฺตึโส โพธิวนฺทนวคฺโค ปฐมํ โพธิวนฺทกตฺเถราปทานํ (๓๗๑) [๓๗๓] |๓๗๓.๑| ปาฏลึ ชลิตํ ๑- ทิสฺวา ปาทปํ ธรณีรุหํ เอกํสํ อญฺชลึ กตฺวา อวนฺทึ ปาฏลึ อหํ ฯ |๓๗๓.๒| อญฺชลึ ปคฺคเหตฺวาน ครุํ กตฺวาน มานสํ อนฺโตสุทฺธํ พหิสุทฺธํ สุวิมุตฺตํ อนาสวํ ฯ |๓๗๓.๓| วิปสฺสึ โลกมหิตํ กรุณาญาณสาครํ สมฺมุขา วิย สมฺพุทฺธํ อวนฺทึ ปาฏลึ อหํ ฯ |๓๗๓.๔| เอกนวุเต อิโต กปฺเป ยํ โพธิมภิวนฺทิหํ ทุคฺคตึ นาภิชานามิ วนฺทนาย อิทํ ผลํ ฯ |๓๗๓.๕| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา โพธิวนฺทโก เถโร อิมา คาถาโย อภาสิตฺถาติ ฯ โพธิวนฺทกตฺเถรสฺส อปทานํ สมตฺตํ ฯ @เชิงอรรถ: ๑ ม. ยุ. หริตํ ฯ ทุติยํ ปาฏลิปุปฺผิยตฺเถราปทานํ (๓๗๒) [๓๗๔] |๓๗๔.๖| วิปสฺสี นาม ภควา สยมฺภู อคฺคปุคฺคโล ปุรกฺขโต สสิสฺเสหิ พนฺธุมํ ปาวิสี ชิโน ฯ |๓๗๔.๗| ตีณิ ปาฏลิปุปฺผานิ อุจฺฉงฺเค ฐปิตานิ เม สีสํ นฺหายิตุกาโมหํ ๑- นทีตีรํ ๒- อคจฺฉหํ ฯ |๓๗๔.๘| นิกฺขมฺม พนฺธุมติยา อทฺทสํ โลกนายกํ อินฺทีวรํว ชลิตํ อาทิตฺตํว หุตาสนํ ฯ |๓๗๔.๙| พฺยคฺฆูสภํว ปวรํ อภิชาตํว เกสรึ คจฺฉนฺตํ สมณานคฺคํ ภิกฺขุสงฺฆปุรกฺขตํ ฯ |๓๗๔.๑๐| ตสฺมึ ปสนฺโน สุคเต กิเลสมลโธวเน คเหตฺวา ตีณิ ปุปฺผานิ พุทฺธเสฏฺฐํ อปูชยึ ฯ |๓๗๔.๑๑| เอกนวุเต อิโต กปฺเป ยํ ปุปฺผมภิปูชยึ ทุคฺคตึ นาภิชานามิ พุทฺธปูชายิทํ ผลํ ฯ |๓๗๔.๑๒| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา ปาฏลิปุปฺผิโย เถโร อิมา คาถาโย อภาสิตฺถาติ ฯ ปาฏลิปุปฺผิยตฺเถรสฺส อปทานํ สมตฺตํ ฯ @เชิงอรรถ: ๑ ม. ... นฺหายิตุกาโม ว ฯ ๒ ม. ยุ. นทีติตฺถํ ฯ ตติยํ ตีณุปฺปลมาลิยตฺเถราปทานํ (๓๗๓) [๓๗๕] |๓๗๕.๑๓| จนฺทภาคานทีตีเร อโหสึ วานโร ตทา อทฺทสํ วิรชํ พุทฺธํ นิสินฺนํ ปพฺพตนฺตเร ฯ |๓๗๕.๑๔| โอภาเสนฺตํ ทิสา สพฺพา สาลราชํว ผุลฺลิตํ ลกฺขณพฺยญฺชนูเปตํ ทิสฺวา อตฺตมโน อหํ ฯ |๓๗๕.๑๕| อุทคฺคจิตฺโต สุมโน ปีติยา หฏฺฐมานโส ตีณิ อุปฺปลปุปฺผานิ มตฺถเก อภิโรปยึ ฯ |๓๗๕.๑๖| ปูชยิตฺวาน ปุปฺผานิ ผุสฺสสฺสาปิ ๑- มเหสิโน สคารโว ภวิตฺวาน ปกฺกามึ อุตฺตรามุโข ฯ |๓๗๕.๑๗| คจฺฉนฺโต ปฏิกุฏิโก วิปฺปสนฺเนน เจตสา เสลนฺตเร ปติตฺวาน ปาปุณึ ชีวิตกฺขยํ ฯ |๓๗๕.๑๘| เตน กมฺเมน สุกเตน เจตนาปณิธีหิ จ ชหิตฺวา ปุริมํ ชาตึ ตาวตึสํ อคจฺฉหํ ฯ |๓๗๕.๑๙| สตานํ ตีณิกฺขตฺตุญฺจ เทวรชฺชมการยึ สตานํ ปญฺจกฺขตฺตุํ จ จกฺกวตฺติ อโหสหํ ฯ |๓๗๕.๒๐| เทฺวนวุเต อิโต กปฺเป ยํ ปุปฺผมภิปูชยึ ทุคฺคตึ นาภิชานามิ พุทฺธปูชายิทํ ผลํ ฯ |๓๗๕.๒๑| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ @เชิงอรรถ: ๑ ม. ผุสฺสสฺสาหํ ฯ ยุ. ผุสฺสสฺสาถ ฯ อิตฺถํ สุทํ อายสฺมา ตีณุปฺปลมาลิโย เถโร อิมา คาถาโย อภาสิตฺถาติ ฯ ตีณุปฺปลมาลิยตฺเถรสฺส อปทานํ สมตฺตํ ฯ จตุตฺถํ ปตฺติปุปฺผิยตฺเถราปทานํ (๓๗๔) [๓๗๖] |๓๗๖.๒๒| ยทา นิพฺพายิ สมฺพุทฺโธ มเหสี ปทุมุตฺตโร สมาคมฺม ชนา สพฺเพ สรีรํ นีหรนฺติ เต ฯ |๓๗๖.๒๓| นีหรนฺเต สรีรมฺหิ วิชฺชมานาสุ เภริสุ ปสนฺนจิตฺโต สุมโน ปตฺติปุปฺผมภิปูชยึ ฯ |๓๗๖.๒๔| สตสหสฺเส อิโต กปฺเป ยํ ปุปฺผมภิปูชยึ ทุคฺคตึ นาภิชานามิ สรีเร ปูชิเต ผลํ ฯ |๓๗๖.๒๕| สฺวาคตํ วต เม อาสิ มม พุทฺธสฺส สนฺติเก ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ |๓๗๖.๒๖| กิเลสา ฌาปิตา มยฺหํ ภวา สพฺเพ สมูหตา นาโคว พนฺธนํ เฉตฺวา วิหรามิ อนาสโว ฯ |๓๗๖.๒๗| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา ปตฺติปุปฺผิโย เถโร อิมา คาถาโย อภาสิตฺถาติ ฯ ปตฺติปุปฺผิยตฺเถรสฺส อปทานํ สมตฺตํ ฯ ปญฺจมํ สตฺตปณฺณิยตฺเถราปทานํ (๓๗๕) [๓๗๗] |๓๗๗.๒๘| สุมโน นาม สมฺพุทฺโธ อุปฺปชฺชิ โลกนายโก ปสนฺนจิตฺโต สุมโน สตฺตปณฺณิมปูชยึ ฯ |๓๗๗.๒๙| สตสหสฺเส อิโต กปฺเป สตฺตปณฺณิมปูชยึ ทุคฺคตึ นาภิชานามิ สตฺตปณฺณิปูชายิทํ ผลํ ฯ |๓๗๗.๓๐| สฺวาคตํ วต เม อาสิ มม พุทฺธสฺส สนฺติเก ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ |๓๗๗.๓๑| กิเลสา ฌาปิตา มยฺหํ ภวา สพฺเพ สมูหตา นาโคว พนฺธนํ เฉตฺวา วิหรามิ อนาสโว ฯ |๓๗๗.๓๒| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา สตฺตปณฺณิโย เถโร อิมา คาถาโย อภาสิตฺถาติ ฯ สตฺตปณฺณิยตฺเถรสฺส อปทานํ สมตฺตํ ฯ ฉฏฺฐํ คนฺธมุฏฺฐิยตฺเถราปทานํ (๓๗๖) [๓๗๘] |๓๗๘.๓๓| จิตเก กยิรมาเน นานาคนฺเธ สมาคเต ๑- ปสนฺนจิตฺโต สุมโน คนฺธมุฏฺฐึ อปูชยึ ฯ @เชิงอรรถ: ๑ ม. สมาหเต ฯ |๓๗๘.๓๔| สตสหสฺเส อิโต กปฺเป จิตกํ ยํ อปูชยึ ทุคฺคตึ นาภิชานามิ จิตปูชายิทํ ผลํ ฯ |๓๗๘.๓๕| สฺวาคตํ วต เม อาสิ มม พุทฺธสฺส สนฺติเก ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ |๓๗๘.๓๖| กิเลสา ฌาปิตา มยฺหํ ภวา สพฺเพ สมูหตา นาโคว พนฺธนํ เฉตฺวา วิหรามิ อนาสโว ฯ |๓๗๘.๓๗| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา คนฺธมุฏฺฐิโย เถโร อิมา คาถาโย อภาสิตฺถาติ ฯ คนฺธมุฏฺฐิยตฺเถรสฺส อปทานํ สมตฺตํ ฯ สตฺตมํ จิตกปูชกตฺเถราปทานํ (๓๗๗) [๓๗๙] |๓๗๙.๓๘| ปรินิพฺพุเต ภควติ ชลชุตฺตมนามเก อาโรปิตมฺหิ จิตเก สาลปุปฺผํ อปูชยึ ฯ |๓๗๙.๓๙| สตสหสฺเส อิโต กปฺเป ยํ ปุปฺผํ อปูชยึ ๑- ทุคฺคตึ นาภิชานามิ จิตปูชายิทํ ผลํ ฯ |๓๗๙.๔๐| สฺวาคตํ วต เม อาสิ มม พุทฺธสฺส ๒- สนฺติเก ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ @เชิงอรรถ: ๑ อภิปูชยินฺติ ยุตฺตตรํ ฯ ๒ ยุ. พุทฺธเสฏฺฐสฺส ... ฯ |๓๗๙.๔๑| กิเลสา ฌาปิตา มยฺหํ ภวา สพฺเพ สมูหตา นาโคว พนฺธนํ เฉตฺวา วิหรามิ อนาสโว ฯ |๓๗๙.๔๒| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา จิตกปูชโก เถโร อิมา คาถาโย อภาสิตฺถาติ ฯ จิตกปูชกตฺเถรสฺส อปทานํ สมตฺตํ ฯ อฏฺฐมํ สุมนตาลวณฺฏิยตฺเถราปทานํ (๓๗๘) [๓๘๐] |๓๘๐.๔๓| สิทฺธตฺถสฺส ภควโต ตาลวณฺฏํ อทาสหํ สุเมนหิ ปฏิจฺฉนฺนํ ธารยามิ มหายสํ ๑- ฯ |๓๘๐.๔๔| จตุนวุเต อิโต กปฺเป ตาลวณฺฏํ อทาสหํ ทุคฺคตึ นาภิชานามิ ตาลวณฺฏสฺสิทํ ผลํ ฯ |๓๘๐.๔๕| สฺวาคตํ วต เม อาสิ มม พุทฺธสฺส สนฺติเก ติสฺโส วิชฺชา อนุปฺปตา กตํ พุทฺธสฺส สาสนํ ฯ |๓๘๐.๔๖| กิเลสา ฌาปิตา มยฺหํ ภวา สพฺเพ สมูหตา นาโคว พนฺธนํ เฉตฺวา วิหรามิ อนาสโว ฯ |๓๘๐.๔๗| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ @เชิงอรรถ: ๑ ม. มหารหํ ฯ อิตฺถํ สุทํ อายสฺมา สุมนตาลวณฺฏิโย เถโร อิมา คาถาโย อภาสิตฺถาติ ฯ สุมนตาลวณฺฏิยตฺเถรสฺส อปทานํ สมตฺตํ ฯ นวมํ สุมนทามิยตฺเถราปทานํ (๓๗๙) [๓๘๑] |๓๘๑.๔๘| สิทฺธตฺถสฺส ภควโต นฺหาตกสฺส ตปสฺสิโน กตฺวาน สุมนทามํ ธารยึ ปุรโต ฐิโต ฯ |๓๘๑.๔๙| จตุนวุเต อิโต กปฺเป ยํ ทามํ อภิปูชยึ ๑- ทุคฺคตึ นาภิชานามิ สุมนทามสฺสิทํ ๒- ผลํ ฯ |๓๘๑.๕๐| สฺวาคตํ วต เม อาสิ มม พุทฺธสฺส สนฺติเก ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ |๓๘๑.๕๑| กิเลสา ฌาปิตา มยฺหํ ภวา สพฺเพ สมูหตา นาโคว พนฺธนํ เฉตฺวา วิหรามิ อนาสโว ฯ |๓๘๑.๕๒| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา สุมนทามิโย เถโร อิมา คาถาโย อภาสิตฺถาติ ฯ สุมนทามิยตฺเถรสฺส อปทานํ สมตฺตํ ฯ @เชิงอรรถ: ๑ ม. .. ธารยึ ตทา ฯ ๒ ม. ยุ. สุมนธารเณ ผลํ ฯ ทสมํ กาสุมาริผลทายกตฺเถราปทานํ (๓๘๐) [๓๘๒] |๓๘๒.๕๓| กณิการํว โชตนฺตํ นิสินฺนํ ปพฺพตนฺตเร อทฺทสํ วิรชํ พุทฺธํ โลกเชฏฺฐํ นราสภํ ฯ |๓๘๒.๕๔| ปสนฺนจิตฺโต สุมโน สิเร กตฺวาน อญฺชลึ กาสุมาริผลํ คยฺห พุทฺธเสฏฺฐสฺสทาสหํ ฯ |๓๘๒.๕๕| เอกตฺตึเส อิโต กปฺเป ยํ ผลํ อททึ ตทา ๑- ทุคฺคตึ นาภิชานามิ ผลทานสฺสิทํ ผลํ ฯ |๓๘๒.๕๖| สฺวาคตํ วต เม อาสิ มม พุทฺธสฺส สนฺติเก ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ |๓๘๒.๕๗| กิเลสา ฌาปิตา มยฺหํ ภวา สพฺเพ สมูหตา นาโคว พนฺธนํ เฉตฺวา วิหรามิ อนาสโว ฯ |๓๘๒.๕๘| ปฏิสมฺภิทา จตสฺโส วิโมกฺขาปิจ อฏฺฐิเม ฉฬภิญฺญา สจฺฉิกตา กตํ พุทฺธสฺส สาสนนฺติ ฯ อิตฺถํ สุทํ อายสฺมา กาสุมาริผลทายโก เถโร อิมา คาถาโย อภาสิตฺถาติ ฯ กาสุมาริผลทายกตฺเถรสฺส อปทานํ สมตฺตํ ฯ อุทฺทานํ โพธิปาฏลิอุปฺปลิ ปตฺติ จ สตฺตปณฺณิโย @เชิงอรรถ: ๑ ม. ยุ. อหํ ฯ คนฺธมุฏฺฐี จ จิตโก ตาลํ สุมนทามโก กาสุมาริผลีปิจ คาถา เอกูนสฏฺฐิโย ฯ โพธิวนฺทนวคฺโค อฏฺฐตฺตึโส ฯ ----------เนื้อความพระไตรปิฎกฉบับภาษาบาลีอักษรไทย เล่มที่ ๓๒ หน้าที่ ๔๕๓-๔๖๒. http://84000.org/tipitaka/read/pali_item_s.php?book=32&item=373&items=10&modeTY=2 อ่านโดยใช้เครื่องหมาย [เลขข้อ] เป็นเกณฑ์แบ่งข้อ :- http://84000.org/tipitaka/read/pali_item_s.php?book=32&item=373&items=10&modeTY=2&mode=bracket อ่านเทียบพระไตรปิฎกฉบับภาษาบาลีอักษรโรมัน :- http://84000.org/tipitaka/read/roman_item_s.php?book=32&item=373&items=10&modeTY=2 อ่านเทียบพระไตรปิฎกภาษาไทยฉบับหลวง :- http://84000.org/tipitaka/read/byitem_s.php?book=32&item=373&items=10&modeTY=2 ศึกษาอรรถกถานี้ได้ที่ :- http://84000.org/tipitaka/attha/attha.php?b=32&i=373 สารบัญพระไตรปิฎกเล่มที่ ๓๒ http://84000.org/tipitaka/read/?index_32
|
บันทึก ๑๒ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]