paliTIPITAKA Volume 14 - Sutta Pitaka 6

Channovādasuttaṃ [741] Evamme sutaṃ ekaṃ samayaṃ bhagavā rājagahe viharati veḷuvane kalandakanivāpe . tena kho pana samayena āyasmā ca sārīputto āyasmā ca mahācundo āyasmā ca channo gijjhakūṭe pabbate viharanti . tena kho pana samayena āyasmā channo ābādhiko hoti dukkhito bāḷhagilāno. [742] Atha kho āyasmā sārīputto sāyaṇhasamayaṃ paṭisallānā vuṭṭhito yenāyasmā mahācundo tenupasaṅkami upasaṅkamitvā āyasmantaṃ mahācundaṃ etadavoca āyāmāvuso cunda yenāyasmā channo tenupasaṅkamissāma gilānapucchakāti . evamāvusoti kho āyasmā mahācundo āyasmato sārīputtassa paccassosi . Atha kho āyasmā ca sārīputto āyasmā ca mahācundo yenāyasmā channo tenupasaṅkamiṃsu upasaṅkamitvā āyasmatā channena saddhiṃ sammodiṃsu sammodanīyaṃ kathaṃ sārāṇīyaṃ vītisāretvā ekamantaṃ nisīdiṃsu . ekamantaṃ nisinno kho āyasmā sārīputto āyasmantaṃ channaṃ etadavoca kacci te āvuso channa khamanīyaṃ kacci yāpanīyaṃ kacci dukkhā vedanā paṭikkamanti no abhikkamanti paṭikkamo sānaṃ paññāyati no abhikkamoti . na me āvuso sārīputta khamanīyaṃ na yāpanīyaṃ bāḷhā me dukkhā vedanā abhikkamanti no paṭikkamanti abhikkamo sānaṃ paññāyati no paṭikkamoti. [743] Seyyathāpi āvuso sārīputta ^[1]- puriso tiṇhena sikharena sīsaṃ ^2- abhimattheyya evameva kho me āvuso sārīputta adhimattā vātā muddhānaṃ ^3- ohananti ^4- na me āvuso sārīputta khamanīyaṃ na yāpanīyaṃ bāḷhā me dukkhā vedanā abhikkamanti no paṭikkamanti abhikkamo sānaṃ paññāyati no paṭikkamoti. [744] Seyyathāpi āvuso sārīputta balavā puriso daḷhena varattakkhaṇḍena sīse sīsaveṭṭhanaṃ dadeyya evameva kho me āvuso sārīputta adhimattā vātā sīsaṃ parikantanti na me āvuso sārīputta khamanīyaṃ na yāpanīyaṃ bāḷhā me dukkhā vedanā abhikkamanti no paṭikkamanti abhikkamo sānaṃ paññāyati no paṭikkamoti. [745] Seyyathāpi āvuso sārīputta dakkho goghātako vā goghātakantevāsī vā tiṇhena govikantanena kucchiṃ parikanteyya evameva kho me āvuso sārīputta adhimattā vātā kucchiṃ parikantanti na me āvuso sārīputta khamanīyaṃ na yāpanīyaṃ bāḷhā me dukkhā vedanā abhikkamanti no paṭikkamanti abhikkamo sānaṃ paññāyati no paṭikkamoti. [746] Seyyathāpi āvuso sārīputta dve balavanto purisā dubbalataraṃ purisaṃ nānābāhāsu gahetvā aṅgārakāsuyā santāpeyyuṃ samparitāpeyyuṃ evameva kho me āvuso sārīputta @Footnote: ¹ Po. Ma. etthantare balavāti dissati . 2-3 Ma. muddhani . ⁴ Ma. ūhananti. Adhimattā kāyasmiṃ ḍāho na me āvuso sārīputta khamanīyaṃ na yāpanīyaṃ bāḷhā me dukkhā vedanā abhikkamanti no paṭikkamanti abhikkamo sānaṃ paññāyati no paṭikkamo satthaṃ āvuso sārīputta āharissāmi nāvakaṅkhāmi jīvitanti. [747] Māyasmā channo satthaṃ āharesi yāpetāyasmā channo yāpentaṃ mayaṃ āyasmantaṃ channaṃ icchāma sace āyasmato channassa natthi sappāyāni bhojanāni ahaṃ āyasmato channassa sappāyāni bhojanāni pariyesissāmi sace āyasmato channassa natthi sappāyāni bhesajjāni ahaṃ āyasmato channassa sappāyāni bhesajjāni pariyesissāmi sace āyasmato channassa natthi paṭirūpo upaṭṭhāko ^1- ahaṃ āyasmantaṃ channaṃ upaṭṭhahissāmi māyasmā channo satthaṃ āharesi yāpetāyasmā channo yāpentaṃ mayaṃ āyasmantaṃ channaṃ icchāmāti. [748] Napi me āvuso sārīputta natthi sappāyāni bhojanāni napi me natthi sappāyāni bhesajjāni napi me natthi paṭirūpo ^2- upaṭṭhāko apicāvuso sārīputta pariciṇṇo ^[3]- satthā dīgharattaṃ manāpeneva no amanāpena etaṃ hi āvuso sārīputta sāvakassa paṭirūpaṃ yaṃ satthāraṃ paricareyya manāpeneva no amanāpena anupavajjaṃ channo bhikkhu satthaṃ āharissatīti evametaṃ āvuso sārīputta dhārehīti . puccheyyāma mayaṃ āyasmantaṃ channaṃ kiñcideva desaṃ sace @Footnote: ^1-2 Ma. paṭirūpā upaṭṭhākā . ³ Ma. Yu. mesaddo atthi. Āyasmā channo okāsaṃ karoti pañhassa veyyākaraṇāyāti . Pucchāvuso sārīputta sutvā vedissāmīti. [749] Cakkhuṃ āvuso channa cakkhuviññāṇaṃ cakkhuviññāṇa- viññātabbe dhamme etaṃ mama esohamasmi eso me attāti samanupassasi sotaṃ āvuso channa sotaviññāṇaṃ .pe. ghānaṃ āvuso channa ghānaviññāṇaṃ ... jivhaṃ āvuso channa jivhāviññāṇaṃ ... kāyaṃ āvuso channa kāyaviññāṇaṃ ... manaṃ āvuso channa manoviññāṇaṃ manoviññāṇaviññātabbe dhamme etaṃ mama esohamasmi eso me attāti samanupassasīti . Cakkhuṃ āvuso sārīputta cakkhuviññāṇaṃ cakkhuviññāṇaviññātabbe dhamme netaṃ mama nesohamasmi na meso attāti samanupassāmi sotaṃ āvuso sārīputta sotaviññāṇaṃ ... ghānaṃ āvuso sārīputta ghānaviññāṇaṃ ... jivhaṃ āvuso sārīputta jivhāviññāṇaṃ ... kāyaṃ āvuso sārīputta kāyaviññāṇaṃ ... manaṃ āvuso sārīputta manoviññāṇaṃ manoviññāṇaviññātabbe dhamme netaṃ mama nesohamasmi na meso attāti samanupassāmīti. [750] Cakkhusmiṃ āvuso channa cakkhuviññāṇe cakkhuviññāṇa- viññātabbesu dhammesu kiṃ disvā kiṃ abhiññāya cakkhuṃ cakkhuviññāṇaṃ cakkhuviññāṇaviññātabbe dhamme netaṃ mama nesohamasmi na meso attāti samanupassasi sotasmiṃ āvuso channa Sotaviññāṇe ... ghānasmiṃ āvuso channa ghānaviññāṇe ... Jivhāya āvuso channa jivhāviññāṇe ... kāyasmiṃ āvuso channa kāyaviññāṇe ... manasmiṃ āvuso channa manoviññāṇe manoviññāṇa- viññātabbesu dhammesu kiṃ disvā kiṃ abhiññāya manaṃ manoviññāṇaṃ manoviññāṇaviññātabbe dhamme netaṃ mama nesohamasmi na meso attāti samanupassasīti. {750.1} Cakkhusmiṃ āvuso sārīputta cakkhuviññāṇe cakkhuviññāṇaviññātabbesu dhammesu nirodhaṃ disvā nirodhaṃ abhiññāya cakkhuṃ cakkhuviññāṇaṃ cakkhuviññāṇaviññātabbe dhamme netaṃ mama nesohamasmi na meso attāti samanupassāmi sotasmiṃ āvuso sārīputta sotaviññāṇe ... ghānasmiṃ āvuso sārīputta ghānaviññāṇe ... jivhāya āvuso sārīputta jivhāviññāṇe ... kāyasmiṃ āvuso sārīputta kāyaviññāṇe ... Manasmiṃ āvuso sārīputta manoviññāṇe manoviññāṇaviññātabbesu dhammesu nirodhaṃ disvā nirodhaṃ abhiññāya manaṃ manoviññāṇaṃ manoviññāṇaviññātabbe dhamme netaṃ mama nesohamasmi na meso attāti samanupassāmīti. [751] Evaṃ vutte āyasmā mahācundo āyasmantaṃ channaṃ etadavoca tasmātiha āvuso channa idampi tassa bhagavato sāsanaṃ niccakappaṃ manasmiṃ ^1- kātabbaṃ nissitassa calitaṃ anissitassa @Footnote: ¹ Po. Ma. Yu. manasīti dissati. Calitaṃ natthi calite asati passaddhi passaddhiyā sati nati na hoti natiyā asati āgati gati na hoti āgatigatiyā asati cutūpapāto na hoti cutūpapāte asati nevidha na huraṃ na ubhayamantarena esevanto dukkhassāti . atha kho āyasmā ca sārīputto āyasmā ca mahācundo āyasmantaṃ channaṃ iminā ovādena ovaditvā uṭṭhāyāsanā pakkamiṃsu. [752] Atha kho āyasmā channo acirapakkante āyasmante ca sārīputte āyasmante ca mahācunde satthaṃ āharesi . atha kho āyasmā sārīputto yena bhagavā tenupasaṅkami upasaṅkamitvā bhagavantaṃ abhivādetvā ekamantaṃ nisīdi . ekamantaṃ nisinno kho āyasmā sārīputto bhagavantaṃ etadavoca āyasmatā bhante channena satthaṃ āharitaṃ tassa kā gati ko abhisamparāyoti . Nanu te sārīputta channena bhikkhunā sammukhāyeva anupavajjatā byākatāti . atthi bhante pubbajiraṃ nāma vajjigāmo tatthāyasmato channassa mittakulāni suhajjakulāni upavajjakulānīti. [753] Honti hetāni ^1- sārīputta channassa bhikkhuno mittakulāni suhajjakulāni upavajjakulāni nāhaṃ sārīputta ettāvatā upavajjoti ^2- vadāmi yo kho sārīputta imañca kāyaṃ nikkhipati aññañca kāyaṃ upādiyati tamahaṃ upavajjoti ^3- vadāmi taṃ channassa bhikkhuno natthi anupavajjaṃ channo bhikkhu satthaṃ āharesīti. ^[4]- @Footnote: ¹ Po. Ma. Yu. hete . 2-3 Ma. Yu. saupavajjo ⁴ Po. Ma. etthantare evametaṃ @sārīputta dhārehīti dissanti. Idamavoca bhagavā attamano āyasmā sārīputto bhagavato bhāsitaṃ abhinandīti. Channovādasuttaṃ niṭṭhitaṃ dutiyaṃ. ---------- Puṇṇovādasuttaṃ [754] Evamme sutaṃ ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme . atha kho āyasmā puṇṇo sāyaṇhasamayaṃ paṭisallānā vuṭṭhito yena bhagavā tenupasaṅkami upasaṅkamitvā bhagavantaṃ abhivādetvā ekamantaṃ nisīdi . ekamantaṃ nisinno kho āyasmā puṇṇo bhagavantaṃ etadavoca sādhu maṃ bhante bhagavā saṅkhittena ovādena ovadatu yamahaṃ bhagavato dhammaṃ sutvā eko vūpakaṭṭho appamatto ātāpī pahitatto vihareyyanti . Tenahi puṇṇa suṇāhi sādhukaṃ manasikarohi bhāsissāmīti . Evambhanteti kho so ^1- āyasmā puṇṇo bhagavato paccassosi. [755] Bhagavā etadavoca santi kho puṇṇa cakkhuviññeyyā rūpā iṭṭhā kantā manāpā piyarūpā kāmūpasañhitā rajanīyā tañce bhikkhu abhinandati abhivadati ajjhosāya tiṭṭhati tassa taṃ abhinandato abhivadato ajjhosāya tiṭṭhato uppajjati nandi nandisamudayā dukkhasamudayo puṇṇāti vadāmi . santi kho puṇṇa sotaviññeyyā saddā ... ghānaviññeyyā gandhā ... Jivhāviññeyyā rasā ... kāyaviññeyyā phoṭṭhabbā ... Manoviññeyyā dhammā iṭṭhā kantā manāpā piyarūpā kāmūpasañhitā rajanīyā tañce bhikkhu abhinandati abhivadati ajjhosāya tiṭṭhati tassa taṃ abhinandato @Footnote: ¹ Ma. Yu. ayaṃ pāṭho natthi. Abhivadato ajjhosāya tiṭṭhato uppajjati nandi nandisamudayā dukkhasamudayo puṇṇāti vadāmi. [756] Santi ca kho puṇṇa cakkhuviññeyyā rūpā iṭṭhā kantā manāpā piyarūpā kāmūpasañhitā rajanīyā tañce bhikkhu nābhinandati nābhivadati nājjhosāya tiṭṭhati tassa taṃ anabhinandato anabhivadato anajjhosāya tiṭṭhato nandi nirujjhati nandinirodhā dukkhanirodho puṇṇāti vadāmi . santi kho puṇṇa sotaviññeyyā saddā ... Ghānaviññeyyā gandhā ... jivhāviññeyyā rasā ... Kāyaviññeyyā phoṭṭhabbā ... manoviññeyyā dhammā iṭṭhā kantā manāpā piyarūpā kāmūpasañhitā rajanīyā tañce bhikkhu nābhinandati nābhivadati nājjhosāya tiṭṭhati tassa taṃ anabhinandato anabhivadato anajjhosāya tiṭṭhato nandi nirujjhati nandinirodhā dukkhanirodho puṇṇāti vadāmi . iminā ca tvaṃ puṇṇa mayā saṅkhittena ovādena ovadito katamasmiṃ janapade viharissasīti . imināhaṃ bhante bhagavatā saṅkhittena ovādena ovadito atthi sunāparanto nāma janapado tatthāhaṃ viharissāmīti. [757] Caṇḍā kho puṇṇa sunāparantakā manussā pharusā kho puṇṇa sunāparantakā manussā sace taṃ puṇṇa sunāparantakā manussā akkosissanti paribhāsissanti tattha te puṇṇa kinti bhavissatīti . sace maṃ bhante sunāparantakā manussā akkosissanti paribhāsissanti tattha me evaṃ bhavissati bhaddakā vatime Sunāparantakā manussā subhaddakā vatime sunāparantakā manussā yaṃ me nayime pāṇinā pahāraṃ dentīti evamettha bhagavā bhavissati evamettha sugata bhavissatīti. [758] Sace pana te puṇṇa sunāparantakā manussā pāṇinā pahāraṃ dassanti tattha pana te puṇṇa kinti bhavissatīti . Sace me bhante sunāparantakā manussā pāṇinā pahāraṃ dassanti tattha me evaṃ bhavissati bhaddakā vatime sunāparantakā manussā subhaddakā vatime sunāparantakā manussā yaṃ me nayime leḍḍunā pahāraṃ dentīti evamettha bhagavā bhavissati evamettha sugata bhavissatīti. [759] Sace pana te puṇṇa sunāparantakā manussā leḍḍunā pahāraṃ dassanti tattha pana te puṇṇa kinti bhavissatīti . sace me bhante sunāparantakā manussā leḍḍunā pahāraṃ dassanti tattha me evaṃ bhavissati bhaddakā vatime sunāparantakā manussā subhaddakā vatime sunāparantakā manussā yaṃ me nayime daṇḍena pahāraṃ dentīti evamettha bhagavā bhavissati evamettha sugata bhavissatīti. [760] Sace pana te puṇṇa sunāparantakā manussā daṇḍena pahāraṃ dassanti tattha pana te puṇṇa kinti bhavissatīti . sace me bhante sunāparantakā manussā daṇḍena pahāraṃ dassanti tattha me evaṃ bhavissati bhaddakā vatime sunāparantakā manussā subhaddakā Vatime sunāparantakā manussā yaṃ me nayime satthena pahāraṃ dentīti evamettha bhagavā bhavissati evamettha sugata bhavissatīti. [761] Sace pana te puṇṇa sunāparantakā manussā satthena pahāraṃ dassanti tattha pana te puṇṇa kinti bhavissatīti . sace me bhante sunāparantakā manussā satthena pahāraṃ dassanti tattha me evaṃ bhavissati bhaddakā vatime sunāparantakā manussā subhaddakā vatime sunāparantakā manussā yaṃ maṃ nayime tiṇhena satthena jīvitā voropentīti evamettha bhagavā bhavissati evamettha sugata bhavissatīti.

The Pali Tipitaka in Roman Character Volume 14 page 474-484. https://84000.org/tipitaka/read/roman_item.php?book=14&item=741&items=21 Classified by [Item Number] :- http://84000.org/tipitaka/read/roman_item.php?book=14&item=741&items=21&mode=bracket Compare with The Pali Tipitaka in Thai Character :- https://84000.org/tipitaka/read/pali_item.php?book=14&item=741&items=21 Compare with The Royal Version of Thai Tipitaka :- https://84000.org/tipitaka/read/byitem.php?book=14&item=741&items=21 Study Atthakatha :- https://84000.org/tipitaka/attha/attha.php?b=14&i=741 Contents of The Tipitaka Volume 14 https://84000.org/tipitaka/read/?index_14 https://84000.org/tipitaka/english/?index_14