[262] Seyyathāpi bhikkhave phalabhaṇḍassa 1- vā phalabhaṇḍantevāsissa
vā vāsijaṭe dissante vā aṅgulipadāni dissanti aṅguṭṭhapadā no
ca khvassa evamassa ñāṇaṃ hoti ettakaṃ vā 2- me ajja vāsijaṭassa
khīṇaṃ ettakaṃ hiyyo ettakaṃ pareti atha khvassa khīṇākhīṇanteva 3-
ñāṇaṃ hoti . evameva kho bhikkhave bhāvanānuyogamanuyuttassa
bhikkhuno viharato kiñcāpi na evaṃ ñāṇaṃ hoti ettakaṃ vā me
ajja āsavānaṃ khīṇaṃ ettakaṃ hiyyo ettakaṃ pareti atha khvassa khīṇe
khīṇanteva ñāṇaṃ hoti . seyyathāpi bhikkhave sāmuddikāya nāvāya
vettabandhanabandhāya chammāsāni udake pariyādāya hemantikena
thalaṃ ukkhittāya vātātapaparetāni vettabandhanāni
tāni pavussakena meghena abhippavuṭṭhāni 4- appakasireneva
@Footnote: 1 Ma. palagaṇḍassa palagaṇḍantevāsissa. 2 Ma. vata.
@3 Ma. khīṇaṃ khīṇanteva. 4 Yu. abhippavattāni.
Paṭippassambhanti pūtikāni bhavanti . evameva kho bhikkhave
bhāvanānuyogamanuyuttassa bhikkhuno viharato appakasireneva
saññojanāni paṭippassambhanti pūtikāni bhavantīti.
[263] Sāvatthī . aniccasaññā bhikkhave bhāvitā bahulīkatā
sabbaṃ kāmarāgaṃ pariyādiyati sabbaṃ rūparāgaṃ pariyādiyati sabbaṃ
bhavarāgaṃ pariyādiyati sabbaṃ avijjaṃ pariyādiyati sabbaṃ asmimānaṃ
samūhanati . seyyathāpi bhikkhave saradasamaye kassako 1- mahānaṅgalena
kassanto 2- sabbāni mūlasantānakāni sampadālento kassati. Evameva
kho bhikkhave aniccasaññā bhāvitā bahulīkatā sabbaṃ kāmarāgaṃ
pariyādiyati sabbaṃ rūparāgaṃ pariyādiyati sabbaṃ bhavarāgaṃ pariyādiyati
sabbaṃ avijjaṃ pariyādiyati sabbaṃ asmimānaṃ samūhanati.
[264] Seyyathāpi bhikkhave pabbajalāyako 3- pabbajaṃ lāyitvā
agge gahetvā odhunāti nidhunāti nipphoṭeti 4- . evameva kho
bhikkhave aniccasaññā bhāvitā .pe.
[265] Seyyathāpi bhikkhave ambapiṇḍiyā vaṇḍacchinnāya 5- yāni
tatra ambāni vaṇḍappaṭibaddhāni sabbāni tāni tanvayāni 6- bhavanti.
Evameva kho bhikkhave aniccasaññā bhāvitā bahulīkatā .pe.
[266] Seyyathāpi bhikkhave kūṭāgārassa yā kāci gopānasiyo
sabbā tā kūṭaṅgamā kūṭaninnā kūṭasamosaraṇā kūṭaṃ tāsaṃ
@Footnote: 1 Yu. kasako. 2 Po. kassantoti natthi. sabbāni mūle santānakāni
@sapadāvento. 3 Po. sabbaphalayako sabbaphalāyitvā aggiṃ gahetvā.
@4 Po. nicchedeti. Ma. Yu. nicchodeti. 5 Po. vaṇṭacchinnāya vaṇḍacchinnāni.
@6 Sī. Ma. tadanvayāni.
Aggamakkhāyati. Evameva kho bhikkhave aniccasaññā bhāvitā .pe.
[267] Seyyathāpi bhikkhave ye keci mūlagandhā kāḷānusārī 1- tesaṃ
aggamakkhāyati. Evameva kho bhikkhave aniccasaññā bhāvitā .pe.
[268] Seyyathāpi bhikkhave ye keci sāragandhā lohitacandanaṃ tesaṃ
aggamakkhāyati. Evameva kho bhikkhave aniccasaññā bhāvitā .pe.
[269] Seyyathāpi bhikkhave ye keci pupphagandhā vassikaṃ tesaṃ
aggamakkhāyati. Evameva kho bhikkhave aniccasaññā bhāvitā .pe.
[270] Seyyathāpi bhikkhave ye keci kuṭṭharājāno 2- sabbe te
rañño cakkavattissa anuyantā 3- bhavanti rājā tesaṃ cakkavatti
aggamakkhāyati. Evameva kho bhikkhave aniccasaññā bhāvitā .pe.
[271] Seyyathāpi bhikkhave yā kāci tārakarūpānaṃ pabhā sabbā
tā candimappabhāya kalaṃ nāgghanti soḷasiṃ candappabhā tāsaṃ
aggamakkhāyati. Evameva kho bhikkhave aniccasaññā bhāvitā .pe.
[272] Seyyathāpi bhikkhave saradasamaye visuddhe 4- vigatabalāhake
deve ādicco nabhaṃ abbhussakkamāno 5- sabbaṃ ākāsagataṃ tamagataṃ 6-
abhivihacca bhāsate ca tapate ca virocate ca . Evameva kho bhikkhave
aniccasaññā bhāvitā bahulīkatā sabbaṃ kāmarāgaṃ pariyādiyati
sabbaṃ rūparāgaṃ pariyādiyati sabbaṃ bhavarāgaṃ pariyādiyati sabbaṃ
avijjaṃ pariyādiyati sabbaṃ asmimānaṃ samūhanati 7-.
@Footnote: 1 Ma. kālānusārigandho. 2 Po. Yu. maddarājāno kuḍḍarājāno. 3 anuyuttātipi
@pāṭho. 4 Ma. Yu. viddhe. 5 Yu. abbhussukkamāno. 6 Po. avitabbaṃ.
@7 Po. Yu. sabbavāresu samūhantīti dissati.
The Pali Tipitaka in Roman Character Volume 17 page 188-190.
https://84000.org/tipitaka/read/roman_item.php?book=17&item=262&items=11
Classified by [Item Number] :-
http://84000.org/tipitaka/read/roman_item.php?book=17&item=262&items=11&mode=bracket
Compare with The Pali Tipitaka in Thai Character :-
https://84000.org/tipitaka/read/pali_item.php?book=17&item=262&items=11
Compare with The Royal Version of Thai Tipitaka :-
https://84000.org/tipitaka/read/byitem.php?book=17&item=262&items=11
Study Atthakatha :-
https://84000.org/tipitaka/attha/attha.php?b=17&i=262
Contents of The Tipitaka Volume 17
https://84000.org/tipitaka/read/?index_17
https://84000.org/tipitaka/english/?index_17
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
