บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ |
ThaiVersion PaliThai PaliRoman |
[77] Ekaṃ samayaṃ bhagavā āyasmā ca sārīputto āyasmā ca upaseno rājagahe viharanti sītavane sappasoṇḍikapabbhāre . Tena kho pana samayena āyasmato upasenassa kāye āsīviso Patito hoti . atha kho āyasmā upaseno bhikkhū āmantesi etha me āvuso imaṃ kāyaṃ mañcakaṃ āropetvā bahiddhā nīharatha purāyaṃ kāyo idheva vikirati seyyathāpi bhusamuṭṭhīti. {77.1} Evaṃ vutte āyasmā sārīputto āyasmantaṃ upasenaṃ etadavoca na kho pana mayaṃ passāma āyasmato upasenassa kāyassa vā aññathattaṃ indriyānaṃ vā vipariṇāmo . atha panāyasmā upaseno evamāha etha me āvuso imaṃ kāyaṃ mañcakaṃ āropetvā bahiddhā nīharatha purāyaṃ kāyo idheva vikirati seyyathāpi bhusamuṭṭhīti . Yassa nūna āvuso sārīputta evamassa ahaṃ cakkhunti vā mama cakkhunti vā .pe. Ahaṃ jivhāti vā .pe. ahaṃ manoti vā mama manoti vā tassa āvuso sārīputta siyā kāyassa vā aññathattaṃ indriyānaṃ vā vipariṇāmo . Mayhañca kho āvuso sārīputta na evaṃ hoti ahaṃ cakkhunti vā mama cakkhunti vā .pe. ahaṃ jivhāti vā mama jivhāti vā .pe. Ahaṃ manoti vā mama manoti vā tassa mayhañca kho āvuso sārīputta kiṃ kāyassa vā aññathattaṃ bhavissati indriyānaṃ vā vipariṇāmoti. {77.2} Tathā hi panāyasmato upasenassa dīgharattaṃ ahaṅkāramamaṅkāramānānusayā susamūhatā 1- tasmā āyasmato upasenassa na evaṃ hoti ahaṃ cakkhunti vā mama cakkhunti vā .pe. Ahaṃ jivhāti vā mama jivhāti vā .pe. Ahaṃ manoti vā mama manoti vāti. @Footnote: 1 Ma. -mānānusayo susamūhato. Atha kho te bhikkhū āyasmato upasenassa kāyaṃ mañcakaṃ āropetvā bahiddhā nīhariṃsu . atha kho āyasmato upasenassa kāyo tattheva vikiri seyyathāpi bhusamuṭṭhīti. Sattamaṃ. [78] Atha kho āyasmā upavāṇo yena bhagavā tenupasaṅkami .pe. Ekamantaṃ nisinno kho āyasmā upavāṇo bhagavantaṃ etadavoca sandiṭṭhiko dhammo sandiṭṭhiko dhammoti bhante vuccati kittāvatā nu kho bhante sandiṭṭhiko dhammo hoti akāliko ehipassiko opanayiko paccattaṃ veditabbo viññūhīti.The Pali Tipitaka in Roman Character Volume 18 page 48-50. https://84000.org/tipitaka/read/roman_item.php?book=18&item=77&items=2&mode=bracket Classified by content :- https://84000.org/tipitaka/read/roman_item.php?book=18&item=77&items=2 Compare with The Pali Tipitaka in Thai Character :- https://84000.org/tipitaka/read/pali_item.php?book=18&item=77&items=2&mode=bracket Compare with The Royal Version of Thai Tipitaka :- https://84000.org/tipitaka/read/byitem.php?book=18&item=77&items=2&mode=bracket Study Atthakatha :- https://84000.org/tipitaka/attha/attha.php?b=18&i=77 Contents of The Tipitaka Volume 18 https://84000.org/tipitaka/read/?index_18 https://84000.org/tipitaka/english/?index_18
|
บันทึก ๑๔ พฤศจิกายน พ.ศ. ๒๕๖๐. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน. หากพบข้อผิดพลาด กรุณาแจ้งได้ที่ [email protected]