paliTIPITAKA Volume 19 - Sutta Pitaka 11

[793] Taṃyeva nidānaṃ . tena kho pana samayena mānadinno gahapati ābādhiko hoti dukkhito bāḷhagilāno . atha kho mānadinno gahapati aññataraṃ purisaṃ āmantesi ehi tvaṃ ambho purisa .pe. Na me bhante khamanīyaṃ na yāpanīyaṃ bāḷhā me dukkhā vedanā abhikkamanti no paṭikkamanti abhikkamosānaṃ paññāyati no abhikkamoti. [794] Evarūpāya cāhaṃ bhante dukkhāya vedanāya phuṭṭho samāno kāye kāyānupassī viharāmi ātāpī sampajāno satimā vineyya loke abhijjhādomanassaṃ . vedanāsu citte dhammesu dhammānupassī viharāmi ātāpī sampajāno satimā vineyya loke abhijjhādomanassaṃ. [795] Yāni cimāni bhante bhagavatā pañcorambhāgiyāni saññojanāni desitāni nāhaṃ bhante yaṅkiñci attani appahīnaṃ samanupassāmīti . lābhā te gahapati suladdhante gahapati anāgāmiphalaṃ tayā gahapati byākatanti. Sīlaṭṭhitivaggo tatiyo. Tassuddānaṃ sīlaṃ ṭhiti parihānaṃ suddhakaṃ brāhmaṇena ca padesaṃ samattaṃ loko ca sirivaḍḍho mānadinnena te dasāti. ------------- Ananussutavaggo catuttho [796] Sāvatthīnidānaṃ . ayaṃ kāye kāyānupassanāti me bhikkhave pubbe ananussutesu dhammesu cakkhuṃ udapādi ñāṇaṃ udapādi paññā udapādi vijjā udapādi āloko udapādi . sā kho panāyaṃ kāye kāyānupassanā bhāvetabbāti me bhikkhave . bhāvitāti me bhikkhave pubbe ananussutesu dhammesu cakkhuṃ udapādi ñāṇaṃ udapādi paññā udapādi vijjā udapādi āloko udapādi. [797] Ayaṃ vedanāsu vedanānupassanāti me bhikkhave pubbe ananussutesu dhammesu cakkhuṃ udapādi ñāṇaṃ udapādi paññā udapādi vijjā udapādi āloko udapādi . sā kho panāyaṃ vedanāsu vedanānupassanā bhāvetabbāti me bhikkhave . bhāvitāti me bhikkhave pubbe ananussutesu dhammesu cakkhuṃ udapādi ñāṇaṃ udapādi paññā udapādi vijjā udapādi āloko udapādi. [798] Ayaṃ citte cittānupassanāti me bhikkhave pubbe ananussutesu dhammesu cakkhuṃ udapādi ñāṇaṃ udapādi paññā udapādi vijjā udapādi āloko udapādi . sā kho panāyaṃ citte cittānupassanā bhāvetabbāti me bhikkhave . bhāvitāti me bhikkhave pubbe ananussutesu dhammesu cakkhuṃ udapādi ñāṇaṃ udapādi paññā udapādi vijjā udapādi āloko udapādi.

The Pali Tipitaka in Roman Character Volume 19 page 237-239. https://84000.org/tipitaka/read/roman_item.php?book=19&item=793&items=6 Classified by [Item Number] :- http://84000.org/tipitaka/read/roman_item.php?book=19&item=793&items=6&mode=bracket Compare with The Pali Tipitaka in Thai Character :- https://84000.org/tipitaka/read/pali_item.php?book=19&item=793&items=6 Compare with The Royal Version of Thai Tipitaka :- https://84000.org/tipitaka/read/byitem.php?book=19&item=793&items=6 Study Atthakatha :- https://84000.org/tipitaka/attha/attha.php?b=19&i=793 Contents of The Tipitaka Volume 19 https://84000.org/tipitaka/read/?index_19 https://84000.org/tipitaka/english/?index_19