paliTIPITAKA Volume 2 - Vinaya Pitaka 2

[586] Tena samayena buddho bhagavā sāvatthiyaṃ viharati jetavane anāthapiṇḍikassa ārāme . tena kho pana samayena sattarasavaggiyā bhikkhū aciravatiyā nadiyā udake kīḷanti . tena kho pana samayena rājā pasenadi kosalo mallikāya deviyā saddhiṃ uparipāsādavaragato hoti . Addasā kho rājā pasenadi kosalo sattarasavaggiye bhikkhū aciravatiyā nadiyā udake kīḷante disvāna mallikaṃ deviṃ etadavoca ete he ^1- mallike arahanto udake kīḷantīti . nissaṃsayaṃ kho mahārāja bhagavatā sikkhāpadaṃ appaññattaṃ te vā bhikkhū appakataññunoti. {586.1} Athakho rañño pasenadissa kosalassa etadahosi kena nu kho ahaṃ upāyena bhagavato ca na āroceyyaṃ bhagavā ca jāneyya ime bhikkhū udake kīḷantīti ^2- . athakho rājā pasenadi kosalo sattarasavaggiye bhikkhū pakkosāpetvā tesaṃ mahantaṃ guḷapiṇḍaṃ adāsi imaṃ bhante guḷapiṇḍaṃ bhagavato dethāti . Sattarasavaggiyā bhikkhū taṃ guḷapiṇḍaṃ ādāya yena bhagavā tenupasaṅkamiṃsu upasaṅkamitvā bhagavantaṃ etadavocuṃ imaṃ bhante guḷapiṇḍaṃ rājā ^[3]- bhagavato detīti . Kahaṃ pana tumhe bhikkhave rājā addasāti . aciravatiyā nadiyā bhagavā udake kīḷanteti . vigarahi buddho bhagavā kathaṃ hi nāma tumhe moghapurisā udake kīḷissatha @Footnote: ¹ Ma. te . ² Ma. kīḷitāti . ³ Ma. pasenadi kosalo. Netaṃ moghapurisā appasannānaṃ vā pasādāya pasannānaṃ vā bhiyyobhāvāya .pe. evañca pana bhikkhave imaṃ sikkhāpadaṃ uddiseyyātha udake hassadhamme ^1- pācittiyanti. [587] Udake hassadhammo nāma uparigopphake udake hassādhippāyo nimujjati vā ummujjati vā palavati vā āpatti pācittiyassa. [588] Udake hassadhamme hassadhammasaññī āpatti pācittiyassa . udake hassadhamme vematiko āpatti pācittiyassa . Udake hassadhamme ahassadhammasaññī āpatti pācittiyassa. [589] Heṭṭhāgopphake udake kīḷati āpatti dukkaṭassa . [2]- Nāvāya kīḷati āpatti dukkaṭassa . hatthena vā pādena vā kaṭṭhena vā kaṭhalāya vā udake hanati ^3- āpatti dukkaṭassa . Bhājanagataṃ udakaṃ vā kañjikaṃ vā khīraṃ vā takkaṃ vā rajanaṃ vā passāvaṃ vā cikkhallaṃ vā kīḷati āpatti dukkaṭassa. [590] Udake ahassadhamme hassadhammasaññī āpatti dukkaṭassa . udake ahassadhamme vematiko āpatti dukkaṭassa . Udake ahassadhamme ahassadhammasaññī anāpatti. [591] Anāpatti na hassādhippāyo sati karaṇīye udakaṃ otaritvā nimujjati vā ummujjati vā palavati vā pāraṃ gacchanto @Footnote: ¹ Ma. hasadhamme. Yu. hāsadhamme. evamuparipi . ² Ma. udake. @³ Ma. Yu. udakaṃ paharati. Nimujjati vā ummujjati vā palavati vā āpadāsu ummattakassa ādikammikassāti. Tatiyasikkhāpadaṃ niṭṭhitaṃ. --------- Catutthasikkhāpadaṃ [592] Tena samayena buddho bhagavā kosambiyaṃ viharati ghositārāme . tena kho pana samayena āyasmā channo anācāraṃ ācarati . bhikkhū evamāhaṃsu mā āvuso channa evarūpaṃ akāsi netaṃ kappatīti . so anādariyaṃ paṭicca karotiyeva . ye te bhikkhū appicchā .pe. te ujjhāyanti khīyanti vipācenti kathaṃ hi nāma āyasmā channo anādariyaṃ karissatīti .pe. saccaṃ kira tvaṃ channa anādariyaṃ karosīti . saccaṃ bhagavāti . vigarahi buddho bhagavā kathaṃ hi nāma tvaṃ moghapurisa anādariyaṃ karissasi netaṃ moghapurisa appasannānaṃ vā pasādāya pasannānaṃ vā bhiyyobhāvāya .pe. evañca pana bhikkhave imaṃ sikkhāpadaṃ uddiseyyātha {592.1} anādariye pācittiyanti.

The Pali Tipitaka in Roman Character Volume 2 page 388-391. https://84000.org/tipitaka/read/roman_item.php?book=2&item=586&items=7&mode=bracket Classified by content :- https://84000.org/tipitaka/read/roman_item.php?book=2&item=586&items=7 Compare with The Pali Tipitaka in Thai Character :- https://84000.org/tipitaka/read/pali_item.php?book=2&item=586&items=7&mode=bracket Compare with The Royal Version of Thai Tipitaka :- https://84000.org/tipitaka/read/byitem.php?book=2&item=586&items=7&mode=bracket Study Atthakatha :- https://84000.org/tipitaka/attha/attha.php?b=2&i=586 Contents of The Tipitaka Volume 2 https://84000.org/tipitaka/read/?index_2 https://84000.org/tipitaka/english/?index_2