Paññāvagge satipaṭṭhānakathā
sāvatthīparipuṇṇanidānaṃ
[726] [2]- Cattārome bhikkhave satipaṭṭhānā katame cattāro
idha bhikkhave bhikkhu kāye kāyānupassī viharati ātāpī sampajāno
satimā vineyya loke abhijjhādomanassaṃ vedanāsu .pe. citte
dhammesu dhammānupassī viharati ātāpī sampajāno satimā vineyya
loke abhijjhādomanassaṃ ime kho bhikkhave cattāro satipaṭṭhānāti.
[727] Kathaṃ kāye kāyānupassī viharati . idhekacco paṭhavīkāyaṃ
aniccato anupassati no niccato dukkhato anupassati no
sukhato anattato anupassati no attato nibbindati no nandati
virajjati no rajjati nirodheti no samudeti paṭinissajjati no
@Footnote: 1 Ma. saṅkilesasīsañca. 2 Ma. sāvatthinidānaṃ.
Ādiyati aniccato anupassanto niccasaññaṃ pajahati dukkhato
anupassanto sukhasaññaṃ pajahati anattato anupassanto attasaññaṃ
pajahati nibbindanto nandiṃ pajahati virajjanto rāgaṃ pajahati
nirodhento samudayaṃ pajahati paṭinissajjanto ādānaṃ pajahati
imehi sattahākārehi kāyaṃ anupassati kāyo upaṭṭhānaṃ
no sati sati upaṭṭhānaṃ ceva sati ca tāya satiyā tena ñāṇena
taṃ kāyaṃ anupassatīti tena vuccati kāye kāyānupassanā
satipaṭṭhānabhāvanā 1-.
{727.1} Bhāvanāti catasso bhāvanā tattha jātānaṃ dhammānaṃ
anativattanaṭṭhena bhāvanā indriyānaṃ ekarasaṭṭhena bhāvanā
tadupagaviriyavāhanaṭṭhena bhāvanā āsevanaṭṭhena bhāvanā idhekacco
āpokāyaṃ tejokāyaṃ vāyokāyaṃ kesakāyaṃ lomakāyaṃ chavikāyaṃ
cammakāyaṃ maṃsakāyaṃ [2]- nahārukāyaṃ aṭṭhikāyaṃ aṭṭhimiñjakāyaṃ
aniccato anupassati no niccato dukkhato anupassati no sukhato
anattato anupassati no attato nibbindati no nandati
virajjati no rajjati nirodheti no samudeti paṭinissajjati no
ādiyati aniccato anupassanto niccasaññaṃ pajahati dukkhato
anupassanto sukhasaññaṃ pajahati anattato anupassanto
attasaññaṃ pajahati nibbindanto nandiṃ pajahati virajjanto
rāgaṃ pajahati nirodhento samudayaṃ pajahati paṭinissajjanto ādānaṃ
@Footnote: 1 Ma. kāyānupassanāsatipaṭṭhānā. evamīdisesu ṭhānesu. 2 Ma. Yu. rūdhirakāyaṃ.
Pajahati imehi sattahi ākārehi kāyaṃ anupassati kāyo upaṭṭhānaṃ
no sati sati upaṭṭhānaṃ ceva sati ca tāya satiyā tena ñāṇena taṃ
kāyaṃ anupassatīti 1- tena vuccati kāye kāyānupassanā
satipaṭṭhānabhāvanā.
{727.2} Bhāvanāti catasso bhāvanā .pe. Āsevanaṭṭhena bhāvanā
.pe. Evaṃ kāye kāyānupassī viharati.
[728] Kathaṃ vedanāsu vedanānupassī viharati . idhekacco sukhaṃ
vedanaṃ aniccato anupassati no niccato .pe. paṭinissajjati
no ādiyati aniccato anupassanto niccasaññaṃ pajahati .pe.
Paṭinissajjanto ādānaṃ pajahati imehi sattahākārehi vedanaṃ
anupassati vedanā upaṭṭhānaṃ no sati sati upaṭṭhānaṃ ceva
sati ca tāya satiyā tena ñāṇena taṃ vedanaṃ anupassatīti tena
vuccati vedanāsu vedanānupassanā satipaṭṭhānabhāvanā.
{728.1} Bhāvanāti catasso bhāvanā .pe. Āsevanaṭṭhena bhāvanā
.pe. idhekacco dukkhaṃ vedanaṃ .pe. adukkhamasukhaṃ vedanaṃ cakkhusamphassajaṃ
vedanaṃ sotasamphassajaṃ vedanaṃ ghānasamphassajaṃ vedanaṃ
.pe. paṭinissajjanto ādānaṃ pajahati imehi sattahākārehi
vedanaṃ anupassati vedanā upaṭṭhānaṃ no sati sati upaṭṭhānaṃ
ceva sati ca tāya satiyā tena ñāṇena taṃ vedanaṃ anupassatīti
tena vuccati vedanāsu vedanānupassanā satipaṭṭhānabhāvanā.
@Footnote: 1 Ma. itisaddo na dissati. evamīdisesu padesu.
{728.2} Bhāvanāti catasso bhāvanā .pe. āsevanaṭṭhena
bhāvanā .pe. Evaṃ vedanāsu vedanānupassī viharati.
[729] Kathaṃ citte cittānupassī viharati . idhekacco sarāgaṃ
cittaṃ aniccato anupassati no niccato .pe. paṭinissajjati
no ādiyati aniccato anupassanto niccasaññaṃ pajahati .pe.
Paṭinissajjanto ādānaṃ pajahati imehi sattahākārehi cittaṃ
anupassati cittaṃ upaṭṭhānaṃ no sati sati upaṭṭhānaṃ ceva sati
ca tāya satiyā tena ñāṇena taṃ cittaṃ anupassatīti tena
vuccati citte cittānupassanā satipaṭṭhānabhāvanā.
{729.1} Bhāvanāti catasso bhāvanā .pe. āsevanaṭṭhena
bhāvanā .pe. idhekacco vītarāgaṃ cittaṃ sadosaṃ cittaṃ vītadosaṃ cittaṃ
samohaṃ cittaṃ vītamohaṃ cittaṃ saṅkhittaṃ cittaṃ vikkhittaṃ cittaṃ
mahaggataṃ cittaṃ amahaggataṃ cittaṃ sauttaraṃ cittaṃ anuttaraṃ
cittaṃ samāhitaṃ cittaṃ asamāhitaṃ cittaṃ vimuttaṃ cittaṃ avimuttaṃ
cittaṃ cakkhuviññāṇaṃ sotaviññāṇaṃ ghānaviññāṇaṃ jivhāviññāṇaṃ
kāyaviññāṇaṃ manoviññāṇaṃ aniccato anupassati
no niccato .pe. paṭinissajjati no ādiyati aniccato
anupassanto niccasaññaṃ pajahati .pe. paṭinissajjanto
ādānaṃ pajahati imehi sattahākārehi cittaṃ anupassati cittaṃ
upaṭṭhānaṃ no sati sati upaṭṭhānaṃ ceva sati ca tāya satiyā
Tena ñāṇena taṃ cittaṃ anupassatīti tena vuccati citte cittānupassanā
satipaṭṭhānabhāvanā.
{729.2} Bhāvanāti catasso bhāvanā .pe. āsevanaṭṭhena
bhāvanā .pe. Evaṃ citte cittānupassī viharati.
[730] Kathaṃ dhammesu dhammānupassī viharati . Idhekacco ṭhapetvā
kāyaṃ ṭhapetvā vedanaṃ ṭhapetvā cittaṃ tadavasese dhamme aniccato
anupassati no niccato dukkhato anupassati no sukhato
anattato anupassati no attato nibbindati no nandati
virajjati no rajjati nirodheti no samudeti paṭinissajjati no
ādiyati aniccato anupassanto niccasaññaṃ pajahati dukkhato
anupassanto sukhasaññaṃ pajahati anattato anupassanto attasaññaṃ
pajahati nibbindanto nandiṃ pajahati virajjanto rāgaṃ pajahati
nirodhento samudayaṃ pajahati paṭinissajjanto ādānaṃ pajahati
imehi sattahākārehi dhamme anupassati dhammā upaṭṭhānaṃ no
sati sati upaṭṭhānaṃ ceva sati ca tāya satiyā tena ñāṇena
te dhamme anupassatīti tena vuccati dhammesu dhammānupassanā
satipaṭṭhānabhāvanā.
{730.1} Bhāvanāti catasso bhāvanā tattha jātānaṃ dhammānaṃ
anativattanaṭṭhena bhāvanā indriyānaṃ ekarasaṭṭhena bhāvanā
tadupagaviriyavāhanaṭṭhena bhāvanā āsevanaṭṭhena bhāvanā .pe.
Evaṃ dhammesu dhammānupassī viharatīti.
Satipaṭṭhānakathā niṭṭhitā.
---------------
Paññāvagge vipassanākathā
sāvatthīparipuṇṇanidānaṃ
[731] .pe. So vata bhikkhave bhikkhu kañci saṅkhāraṃ niccato
samanupassanto anulomikāya khantiyā samannāgato bhavissatīti netaṃ
ṭhānaṃ vijjati anulomikāya khantiyā asamannāgato sammattaniyāmaṃ
okkamissatīti netaṃ ṭhānaṃ vijjati sammattaniyāmaṃ anokkamamāno
sotāpattiphalaṃ vā sakadāgāmiphalaṃ vā anāgāmiphalaṃ vā arahattaphalaṃ 1-
vā sacchikarissatīti netaṃ ṭhānaṃ vijjati so vata bhikkhave bhikkhu sabbasaṅkhāre
aniccato samanupassanto anulomikāya khantiyā samannāgato
bhavissatīti ṭhānametaṃ vijjati anulomikāya khantiyā samannāgato
sammattaniyāmaṃ okkamissatīti ṭhānametaṃ vijjati sammattaniyāmaṃ
okkamamāno sotāpattiphalaṃ vā sakadāgāmiphalaṃ vā anāgāmiphalaṃ
vā arahattaphalaṃ vā sacchikarissatīti ṭhānametaṃ vijjati.
[732] So vata bhikkhave bhikkhu kañci saṅkhāraṃ sukhato samanupassanto
anulomikāya khantiyā samannāgato bhavissatīti netaṃ ṭhānaṃ vijjati
anulomikāya khantiyā asamannāgato sammattaniyāmaṃ
@Footnote: 1 Ma. arahattaṃ. evamuparipi.
Okkamissatīti netaṃ ṭhānaṃ vijjati sammattaniyāmaṃ anokkamamāno
sotāpattiphalaṃ vā sakadāgāmiphalaṃ vā anāgāmiphalaṃ vā arahattaphalaṃ
vā sacchikarissatīti netaṃ ṭhānaṃ vijjati so vata bhikkhave bhikkhu sabbasaṅkhāre
dukkhato samanupassanto anulomikāya khantiyā samannāgato
bhavissatīti ṭhānametaṃ vijjati anulomikāya khantiyā samannāgato
sammattaniyāmaṃ okkamissatīti ṭhānametaṃ vijjati sammattaniyāmaṃ
okkamamāno sotāpattiphalaṃ vā sakadāgāmiphalaṃ vā anāgāmiphalaṃ
vā arahattaphalaṃ vā sacchikarissatīti ṭhānametaṃ vijjati.
[733] So vata bhikkhave bhikkhu kañci dhammaṃ attato samanupassanto
anulomikāya khantiyā samannāgato bhavissatīti netaṃ ṭhānaṃ vijjati
anulomikāya khantiyā asamannāgato sammattaniyāmaṃ okkamissatīti
netaṃ ṭhānaṃ vijjati sammattaniyāmaṃ anokkamamāno sotāpattiphalaṃ
vā sakadāgāmiphalaṃ vā anāgāmiphalaṃ vā arahattaphalaṃ vā sacchikarissatīti
netaṃ ṭhānaṃ vijjati so vata bhikkhave bhikkhu kañci dhammaṃ 1- anattato
samanupassanto anulomikāya khantiyā samannāgato bhavissatīti
ṭhānametaṃ vijjati anulomikāya khantiyā samannāgato sammattaniyāmaṃ
okkamissatīti ṭhānametaṃ vijjati sammattaniyāmaṃ okkamamāno
sotāpattiphalaṃ vā sakadāgāmiphalaṃ vā anāgāmiphalaṃ vā
arahattaphalaṃ vā sacchikarissatīti ṭhānametaṃ vijjati.
[734] So vata bhikkhave bhikkhu nibbānaṃ dukkhato samanupassanto
@Footnote: 1 Ma. sabbadhamme.
Anulomikāya khantiyā samannāgato bhavissatīti netaṃ ṭhānaṃ
vijjati anulomikāya khantiyā asamannāgato sammattaniyāmaṃ
okkamissatīti netaṃ ṭhānaṃ vijjati sammattaniyāmaṃ anokkamamāno
sotāpattiphalaṃ vā sakadāgāmiphalaṃ vā anāgāmiphalaṃ vā arahattaphalaṃ
vā sacchikarissatīti netaṃ ṭhānaṃ vijjati so vata bhikkhave bhikkhu nibbānaṃ
sukhato samanupassanto anulomikāya khantiyā samannāgato
bhavissatīti ṭhānametaṃ vijjati anulomikāya khantiyā samannāgato
sammattaniyāmaṃ okkamissatīti ṭhānametaṃ vijjati sammattaniyāmaṃ
okkamamāno sotāpattiphalaṃ vā sakadāgāmiphalaṃ vā anāgāmiphalaṃ
vā arahattaphalaṃ vā sacchikarissatīti ṭhānametaṃ vijjati.
[735] Katihākārehi anulomikaṃ khantiṃ paṭilabhati katihākārehi
sammattaniyāmaṃ okkamati . cattārīsāya ākārehi anulomikaṃ
khantiṃ paṭilabhati cattārīsāya ākārehi sammattaniyāmaṃ okkamati.
{735.1} Katamehi cattārīsāya ākārehi anulomikaṃ khantiṃ
paṭilabhati katamehi cattārīsāya ākārehi sammattaniyāmaṃ okkamati .
Pañcakkhandhe aniccato dukkhato rogato gaṇḍato sallato aghato
ābādhato parato palokato ītito upaddavato bhayato upasaggato
calato pabhaṅgato 1- addhuvato attāṇato 2- aleṇato asaraṇato
@Footnote: 1 Sī. Ma. pabhaṅgutoti vā pabhaṅgatoti vā likhitaṃ. 2 Ma. Yu. atāṇato. evamuparipi.
Rittato tucchato suññato anattato ādīnavato vipariṇāmadhammato
asārakato aghamūlato vadhakato vibhavato sāsavato saṅkhatato mārāmisato
jātidhammato jarādhammato byādhidhammato maraṇadhammato sokadhammato
paridevadhammato upāyāsadhammato saṅkilesikadhammato pañcakkhandhe
aniccato passanto anulomikaṃ khantiṃ paṭilabhati pañcannaṃ
khandhānaṃ nirodho niccaṃ nibbānanti passanto sammattaniyāmaṃ
okkamati pañcakkhandhe dukkhato passanto anulomikaṃ khantiṃ
paṭilabhati pañcannaṃ khandhānaṃ nirodho sukhaṃ nibbānanti passanto
sammattaniyāmaṃ okkamati
{735.2} pañcakkhandhe rogato passanto anulomikaṃ khantiṃ
paṭilabhati pañcannaṃ khandhānaṃ nirodho ārogyaṃ nibbānanti passanto
sammattaniyāmaṃ okkamati pañcakkhandhe gaṇḍato passanto anulomikaṃ
khantiṃ paṭilabhati pañcannaṃ khandhānaṃ nirodho nigaṇḍo 1- nibbānanti
passanto sammattaniyāmaṃ okkamati pañcakkhandhe sallato passanto
anulomikaṃ khantiṃ paṭilabhati pañcannaṃ khandhānaṃ nirodho nisallaṃ 2- nibbānanti
passanto sammattaniyāmaṃ okkamati pañcakkhandhe aghato passanto
anulomikaṃ khantiṃ paṭilabhati pañcannaṃ khandhānaṃ nirodho anagho nibbānanti
passanto sammattaniyāmaṃ okkamati pañcakkhandhe ābādhato passanto
anulomikaṃ khantiṃ paṭilabhati pañcannaṃ khandhānaṃ nirodho anābādho
@Footnote: 1 Sī. Ma. Yu. agaṇḍaṃ. 2 Ma. visallaṃ.
Nibbānanti passanto sammattaniyāmaṃ okkamati pañcakkhandhe
parato passanto anulomikaṃ khantiṃ paṭilabhati pañcannaṃ khandhānaṃ
nirodho aparappaccayaṃ nibbānanti passanto sammattaniyāmaṃ
okkamati pañcakkhandhe palokato passanto anulomikaṃ khantiṃ
paṭilabhati pañcannaṃ khandhānaṃ nirodho appalokadhammo nibbānanti
passanto sammattaniyāmaṃ okkamati pañcakkhandhe ītito passanto
anulomikaṃ khantiṃ paṭilabhati pañcannaṃ khandhānaṃ nirodho anītikaṃ
nibbānanti passanto sammattaniyāmaṃ okkamati pañcakkhandhe
upaddavato passanto anulomikaṃ khantiṃ paṭilabhati pañcannaṃ khandhānaṃ
nirodho anupaddavaṃ nibbānanti passanto sammattaniyāmaṃ okkamati
{735.3} pañcakkhandhe bhayato passanto anulomikaṃ khantiṃ paṭilabhati
pañcannaṃ khandhānaṃ nirodho abhayaṃ nibbānanti passanto sammattaniyāmaṃ
okkamati pañcakkhandhe upasaggato passanto anulomikaṃ khantiṃ paṭilabhati
pañcannaṃ khandhānaṃ nirodho anupasaggaṃ nibbānanti passanto
sammattaniyāmaṃ okkamati pañcakkhandhe calato passanto anulomikaṃ
khantiṃ paṭilabhati pañcannaṃ khandhānaṃ nirodho acalaṃ nibbānanti passanto
sammattaniyāmaṃ okkamati pañcakkhandhe pabhaṅgato passanto
anulomikaṃ khantiṃ paṭilabhati pañcannaṃ khandhānaṃ nirodho appabhaṅgaṃ
nibbānanti passanto sammattaniyāmaṃ okkamati pañcakkhandhe
addhuvato passanto anulomikaṃ khantiṃ paṭilabhati pañcannaṃ
Khandhānaṃ nirodho dhuvaṃ nibbānanti passanto sammattaniyāmaṃ
okkamati pañcakkhandhe attāṇato passanto anulomikaṃ khantiṃ
paṭilabhati pañcannaṃ khandhānaṃ nirodho tāṇaṃ nibbānanti passanto
sammattaniyāmaṃ okkamati pañcakkhandhe aleṇato passanto
anulomikaṃ khantiṃ paṭilabhati pañcannaṃ khandhānaṃ nirodho leṇaṃ
nibbānanti passanto sammattaniyāmaṃ okkamati pañcakkhandhe
asaraṇato passanto anulomikaṃ khantiṃ paṭilabhati pañcannaṃ khandhānaṃ
nirodho saraṇaṃ nibbānanti passanto sammattaniyāmaṃ okkamati
pañcakkhandhe rittato passanto anulomikaṃ khantiṃ paṭilabhati
{735.4} pañcannaṃ khandhānaṃ nirodho arittaṃ nibbānanti passanto
sammattaniyāmaṃ okkamati pañcakkhandhe tucchato passanto anulomikaṃ
khantiṃ paṭilabhati pañcannaṃ khandhānaṃ nirodho atucchaṃ nibbānanti
passanto sammattaniyāmaṃ okkamati pañcakkhandhe suññato
passanto anulomikaṃ khantiṃ paṭilabhati pañcannaṃ khandhānaṃ nirodho
paramaṃ suññaṃ nibbānanti passanto sammattaniyāmaṃ okkamati
pañcakkhandhe anattato passanto anulomikaṃ khantiṃ paṭilabhati
pañcannaṃ khandhānaṃ nirodho paramaṭṭhaṃ nibbānanti passanto
sammattaniyāmaṃ okkamati pañcakkhandhe ādīnavato passanto anulomikaṃ
khantiṃ paṭilabhati pañcannaṃ khandhānaṃ nirodho anādīnavaṃ nibbānanti
passanto sammattaniyāmaṃ okkamati pañcakkhandhe vipariṇāmadhammato
Passanto anulomikaṃ khantiṃ paṭilabhati pañcannaṃ khandhānaṃ
nirodho avipariṇāmadhammaṃ nibbānanti passanto sammattaniyāmaṃ
okkamati pañcakkhandhe asārakato passanto anulomikaṃ khantiṃ
paṭilabhati pañcannaṃ khandhānaṃ nirodho sāraṃ nibbānanti passanto
sammattaniyāmaṃ okkamati pañcakkhandhe aghamūlato passanto
anulomikaṃ khantiṃ paṭilabhati pañcannaṃ khandhānaṃ nirodho anaghamūlaṃ
nibbānanti passanto sammattaniyāmaṃ okkamati pañcakkhandhe
vadhakato passanto anulomikaṃ khantiṃ paṭilabhati pañcannaṃ khandhānaṃ
nirodho avadhakaṃ nibbānanti passanto sammattaniyāmaṃ okkamati
{735.5} pañcakkhandhe vibhavato passanto anulomikaṃ khantiṃ paṭilabhati
pañcannaṃ khandhānaṃ nirodho avibhavaṃ nibbānanti passanto sammattaniyāmaṃ
okkamati pañcakkhandhe sāsavato passanto anulomikaṃ khantiṃ paṭilabhati
pañcannaṃ khandhānaṃ nirodho anāsavaṃ nibbānanti passanto sammattaniyāmaṃ
okkamati pañcakkhandhe saṅkhatato passanto anulomikaṃ khantiṃ paṭilabhati
pañcannaṃ khandhānaṃ nirodho asaṅkhataṃ nibbānanti passanto sammattaniyāmaṃ
okkamati pañcakkhandhe mārāmisato passanto anulomikaṃ khantiṃ paṭilabhati
pañcannaṃ khandhānaṃ nirodho nirāmisaṃ nibbānanti passanto sammattaniyāmaṃ
okkamati pañcakkhandhe jātidhammato passanto anulomikaṃ khantiṃ
paṭilabhati pañcannaṃ khandhānaṃ nirodho ajātaṃ nibbānanti passanto
Sammattaniyāmaṃ okkamati pañcakkhandhe jarādhammato passanto
anulomikaṃ khantiṃ paṭilabhati pañcannaṃ khandhānaṃ nirodho ajaraṃ
nibbānanti passanto sammattaniyāmaṃ okkamati pañcakkhandhe
byādhidhammato passanto anulomikaṃ khantiṃ paṭilabhati pañcannaṃ
khandhānaṃ nirodho abyādhidhammaṃ 1- nibbānanti passanto
sammattaniyāmaṃ okkamati pañcakkhandhe maraṇadhammato passanto
anulomikaṃ khantiṃ paṭilabhati pañcannaṃ khandhānaṃ nirodho amataṃ
nibbānanti passanto sammattaniyāmaṃ okkamati
{735.6} pañcakkhandhe sokadhammato passanto anulomikaṃ khantiṃ
paṭilabhati pañcannaṃ khandhānaṃ nirodho asokaṃ nibbānanti passanto
sammattaniyāmaṃ okkamati pañcakkhandhe paridevadhammato passanto
anulomikaṃ khantiṃ paṭilabhati pañcannaṃ khandhānaṃ nirodho aparidevaṃ nibbānanti
passanto sammattaniyāmaṃ okkamati pañcakkhandhe upāyāsadhammato
passanto anulomikaṃ khantiṃ paṭilabhati pañcannaṃ khandhānaṃ nirodho anupāyāsaṃ
nibbānanti passanto sammattaniyāmaṃ okkamati pañcakkhandhe
saṅkilesikadhammato passanto anulomikaṃ khantiṃ paṭilabhati pañcannaṃ
khandhānaṃ nirodho asaṅkiliṭṭhaṃ nibbānanti passanto sammattaniyāmaṃ
okkamati.
[736] Aniccatoti aniccānupassanā.
Dukkhatoti dukkhānupassanā.
@Footnote: 1 Ma. Yu. abyādhi.
Rogatoti dukkhānupassanā.
Gaṇḍatoti dukkhānupassanā.
Sallatoti dukkhānupassanā.
Aghatoti dukkhānupassanā.
Ābādhatoti dukkhānupassanā.
Paratoti anattānupassanā.
Palokatoti anattānupassanā.
Ītitoti dukkhānupassanā.
Upaddavatoti dukkhānupassanā.
Bhayatoti dukkhānupassanā.
Upasaggatoti dukkhānupassanā.
Calatoti aniccānupassanā.
Pabhaṅgatoti aniccānupassanā.
Addhuvatoti aniccānupassanā.
Attāṇatoti dukkhānupassanā.
Aleṇatoti dukkhānupassanā.
Asaraṇatoti dukkhānupassanā.
Rittatoti dukkhānupassanā.
Tucchatoti anattānupassanā.
Suññatoti anattānupassanā.
Anattatoti anattānupassanā.
Ādīnavatoti dukkhānupassanā.
Vipariṇāmadhammatoti aniccānupassanā.
Asārakatoti anattānupassanā.
Aghamūlatoti dukkhānupassanā.
Vadhakatoti dukkhānupassanā.
Vibhavatoti aniccānupassanā.
Sāsavatoti dukkhānupassanā.
Saṅkhatatoti aniccānupassanā.
Mārāmisatoti dukkhānupassanā.
Jātidhammatoti dukkhānupassanā.
Jarādhammatoti dukkhānupassanā.
Byādhidhammatoti dukkhānupassanā.
Maraṇadhammatoti aniccānupassanā.
Sokadhammatoti dukkhānupassanā.
Paridevadhammatoti dukkhānupassanā.
Upāyāsadhammatoti dukkhānupassanā.
Saṅkilesadhammatoti dukkhānupassanā.
{736.1} Imehi cattārīsāya ākārehi anulomikaṃ khantiṃ paṭilabhati
imehi cattārīsāya ākārehi sammattaniyāmaṃ okkamati.
{736.2} Imehi cattārīsāya ākārehi anulomikaṃ khantiṃ paṭilabhantassa
imehi cattārīsāya ākārehi sammattaniyāmaṃ okkamantassa kati
aniccānupassanā kati dukkhānupassanā kati anattānupassanā.
Pañcavīsati anattānupassanā paññāsaṃ aniccānupassanā
sataṃ pañcavīsatiñceva yāni dukkhe pavuccareti.
Vipassanākathā niṭṭhitā.
-----------------
Paññāvagge mātikakathā
[737] Nicchāto muccatīti 1- vimokkho vijjāvimutti
adhisīlaṃ adhicittaṃ adhipaññā passaddhi ñāṇaṃ dassanaṃ suddhi 2-
nekkhammaṃ nissaraṇaṃ paviveko vossaggo cariyā jhānavimokkho
bhāvanādhiṭṭhānajīvitaṃ 3-.
{737.1} Nicchātoti nekkhammena kāmacchandato nicchāto
abyāpādena byāpādato nicchāto .pe. paṭhamajjhānena nīvaraṇehi
nicchāto .pe. Arahattamaggena sabbakilesehi nicchāto muccati 4-.
{737.2} Vimokkhoti nekkhammena kāmacchandato muccatīti vimokkho
abyāpādena byāpādato muccatīti vimokkho .pe. paṭhamajjhānena
nīvaraṇehi muccatīti vimokkho .pe. arahattamaggena
@Footnote: 1 Sī. Ma. - mokkho vimokkho. evamuparipi. niccato vimuttīti.
@2 Ma. Yu. visuddhi. 3 Ma. Yu. bhāvanā adhiṭṭhānaṃ jīvitaṃ. 4 Ma. ayaṃ pāṭho natthi.
Sabbakilesehi muccatīti vimokkho.
{737.3} Vijjāvimuttīti nekkhammaṃ vijjatīti vijjā kāmacchandato
muccatīti vimutti vijjanto muccati muccanto vijjatīti vijjāvimutti
abyāpādaṃ 1- vijjatīti vijjā byāpādato muccatīti
vimutti vijjanto muccati muccanto vijjatīti vijjāvimutti .pe.
Arahattamaggo vijjatīti vijjā sabbakilesehi muccatīti vimutti
vijjanto muccati muccanto vijjatīti vijjāvimutti.
[738] Adhisīlaṃ adhicittaṃ adhipaññāti nekkhammena kāmacchandaṃ
saṃvaraṭṭhena sīlavisuddhi avikkhepaṭṭhena cittavisuddhi dassanaṭṭhena
diṭṭhivisuddhi yo tattha saṃvaraṭṭho ayaṃ adhisīlasikkhā yo tattha
avikkhepaṭṭho ayaṃ adhicittasikkhā yo tattha dassanaṭṭho ayaṃ
adhipaññāsikkhā abyāpādena byāpādaṃ saṃvaraṭṭhena sīlavisuddhi
.pe. arahattamaggena sabbakilese saṃvaraṭṭhena sīlavisuddhi
avikkhepaṭṭhena cittavisuddhi dassanaṭṭhena diṭṭhivisuddhi yo
tattha saṃvaraṭṭho ayaṃ adhisīlasikkhā yo tattha avikkhepaṭṭho
ayaṃ adhicittasikkhā yo tattha dassanaṭṭho ayaṃ adhipaññāsikkhā.
[739] Passaddhīti nekkhammena kāmacchandaṃ paṭippassambheti
abyāpādena byāpādaṃ paṭippassambheti .pe. arahattamaggena
sabbakilese paṭippassambheti.
{739.1} Ñāṇanti kāmacchandassa pahīnattā nekkhammaṃ ñātaṭṭhena
@Footnote: 1 Ma. Yu. abyāpādo.
Ñāṇaṃ byāpādassa pahīnattā abyāpādo ñātaṭṭhena ñāṇaṃ .pe.
Sabbakilesānaṃ pahīnattā arahattamaggo ñātaṭṭhena ñāṇaṃ.
{739.2} Dassananti kāmacchandassa pahīnattā nekkhammaṃ diṭṭhattā
dassanaṃ byāpādassa pahīnattā abyāpādo diṭṭhattā dassanaṃ .pe.
Sabbakilesānaṃ pahīnattā arahattamaggo diṭṭhattā dassanaṃ.
{739.3} Visuddhīti kāmacchandaṃ pajahanto nekkhammena visujjhati
byāpādaṃ pajahanto abyāpādena visujjhati .pe. sabbakilese
pajahanto arahattamaggena visujjhati.
[740] Nekkhammanti kāmānametaṃ nissaraṇaṃ yadidaṃ nekkhammaṃ
rūpānametaṃ nissaraṇaṃ yadidaṃ āruppaṃ yaṃ kho pana kiñci bhūtaṃ saṅkhataṃ
paṭiccasamuppannaṃ nirodho tassa nekkhammaṃ byāpādassa abyāpādo
nekkhammaṃ thīnamiddhassa ālokasaññā nekkhammaṃ .pe..
{740.1} Nissaraṇanti kāmānametaṃ nissaraṇaṃ yadidaṃ nekkhammaṃ
rūpānametaṃ nissaraṇaṃ yadidaṃ āruppaṃ yaṃ kho pana kiñci bhūtaṃ saṅkhataṃ
paṭiccasamuppannaṃ nirodho tassa nissaraṇaṃ kāmacchandassa
nekkhammaṃ nissaraṇaṃ byāpādassa abyāpādo nissaraṇaṃ .pe.
Sabbakilesānaṃ arahattamaggo nissaraṇaṃ.
{740.2} Pavivekoti kāmacchandassa nekkhammaṃ paviveko byāpādassa
abyāpādo paviveko .pe. sabbakilesānaṃ arahattamaggo
Paviveko.
{740.3} Vossaggoti nekkhammena kāmacchandaṃ vossajjati abyāpādena
byāpādaṃ vossajjati .pe. Arahattamaggena sabbakilese vossajjati.
{740.4} Cariyāti kāmacchandaṃ pajahanto nekkhammena carati byāpādaṃ
pajahanto abyāpādena carati .pe. Sabbakilese pajahanto arahattamaggena
carati.
{740.5} Jhānavimokkhoti nekkhammaṃ jāyatīti jhānaṃ kāmacchandaṃ
jhāpetīti jhānaṃ jāyanto muccatīti jhānavimokkho jhāpento
muccatīti jhānavimokkho jāyantīti dhammā jhāpentīti kilese
jāte ca jhāpe ca jānātīti jhānavimokkho abyāpādo jāyatīti
jhānaṃ byāpādaṃ jhāpetīti jhānaṃ ālokasaññā jāyatīti
jhānaṃ .pe. thīnamiddhaṃ jhāpetīti jhānaṃ .pe. arahattamaggo
jāyatīti jhānaṃ sabbakilese jhāpetīti jhānaṃ jāyanto
muccatīti jhānavimokkho jhāpento muccatīti jhānavimokkho
jāyantīti dhammā jhāpentīti kilese jāte ca jhāpe ca
jānātīti jhānavimokkho.
[741] Bhāvanādhiṭṭhānajīvitanti kāmacchandaṃ pajahanto nekkhammaṃ
bhāvetīti bhāvanāsampanno nekkhammavasena cittaṃ adhiṭṭhātīti
adhiṭṭhānasampanno svāyaṃ evaṃ bhāvanāsampanno adhiṭṭhānasampanno
Samaṃ jīvati no visamaṃ sammā jīvati no micchā visuddhaṃ jīvati no kiliṭṭhanti
ājīvasampanno svāyaṃ evaṃ bhāvanāsampanno adhiṭṭhānasampanno
ājīvasampanno yaññadeva parisaṃ upasaṅkamati yadi khattiyaparisaṃ yadi
brāhmaṇaparisaṃ yadi gahapatiparisaṃ yadi samaṇaparisaṃ visārado upasaṅkamati
amaṅkubhūto taṃ kissahetu tathā hi so bhāvanāsampanno adhiṭṭhānasampanno
ājīvasampanno byāpādaṃ pajahanto abyāpādaṃ bhāvetīti bhāvanāsampanno
thīnamiddhaṃ pajahanto ālokasaññaṃ bhāvetīti bhāvanāsampanno uddhaccaṃ
pajahanto avikkhepaṃ bhāvetīti bhāvanāsampanno vicikicchaṃ pajahanto
dhammavavatthānaṃ bhāvetīti bhāvanāsampanno
{741.1} avijjaṃ pajahanto ñāṇaṃ 1- bhāvetīti bhāvanāsampanno
aratiṃ pajahanto pāmujjaṃ bhāvetīti bhāvanāsampanno nīvaraṇaṃ 2- pajahanto
paṭhamajjhānaṃ bhāvetīti bhāvanāsampanno .pe. sabbakilese pajahanto
arahattamaggaṃ bhāvetīti bhāvanāsampanno arahattamaggavasena cittaṃ
adhiṭṭhātīti adhiṭṭhānasampanno svāyaṃ evaṃ bhāvanāsampanno
adhiṭṭhānasampanno samaṃ jīvati no visamaṃ sammā jīvati no micchā visuddhaṃ
jīvati no kiliṭṭhanti ājīvasampanno svāyaṃ evaṃ bhāvanāsampanno
adhiṭṭhānasampanno ājīvasampanno yaññadeva parisaṃ upasaṅkamati
yadi khattiyaparisaṃ yadi brāhmaṇaparisaṃ yadi gahapatiparisaṃ yadi
samaṇaparisaṃ visārado upasaṅkamati amaṅkubhūto taṃ kissahetu
@Footnote: 1 Ma. vijjaṃ. 2 Ma. nīvaraṇe.
Tathā hi so bhāvanāsampanno adhiṭṭhānasampanno ājīvasampannoti.
Mātikakathā niṭṭhitā.
Paṭisambhidāpakaraṇaṃ samattaṃ.
Tatruddānaṃ bhavati
ñāṇaṃ diṭṭhi ca assāsaṃ 1- indriyaṃ vimokkhena pañcamaṃ
gatikammaṃ vipallāso maggo maṇḍena 2- te dasa
yuganaddhaṃ saccabojjhaṅgā mettā virāgena pañcamaṃ
paṭisambhidā dhammacakkaṃ lokuttaraṃ balaṃ suññato te dasa 3-
paññā iddhi abhisamayo vivekaṃ cariyena 4- pañcamaṃ
pāṭihiriyañca samasīsañca 5- satipaṭṭhānaṃ vipassanā 6-
tatiye paññavaggamhi mātikāya ca te dasāti.
[7]-
Tivaggo yassa vikkhepo 8- paṭisambhidāpakaraṇe
anantanayamaggesu gambhīro sāgarūpamo
nabhaṃ ca tārakākiṇṇaṃ thūlo jātassaro yathā
kathikānaṃ vilāsāya yoginaṃ ñāṇajotananti.
Iti paṭisambhidā niṭṭhitā.
-------------
@Footnote: 1 Yu. ānāpānaṃ. 2 Yu. maṇḍoti. 3 Ma. ñāṇaṃ ... te dasāti ime pāṭhā
@natthi. Yu. te dasāti idaṃ pāṭhadvayaṃ natthi. 4 Ma. Yu. viveko cariyapañcamo.
@5 Ma. pāṭihāri samasīsi. Yu. paṭihāriyañca .... 6 Yu. sati vipassanamātikāti.
@7 Ma. mahāvaggo yuganaddho paññāvaggo ca nāmako. 8 Ma. tayova vaggo imamhi.
The Pali Tipitaka in Roman Character Volume 31 page 622-642.
https://84000.org/tipitaka/read/roman_item.php?book=31&item=726&items=16
Classified by [Item Number] :-
http://84000.org/tipitaka/read/roman_item.php?book=31&item=726&items=16&mode=bracket
Compare with The Pali Tipitaka in Thai Character :-
https://84000.org/tipitaka/read/pali_item.php?book=31&item=726&items=16
Compare with The Royal Version of Thai Tipitaka :-
https://84000.org/tipitaka/read/byitem.php?book=31&item=726&items=16
Study Atthakatha :-
https://84000.org/tipitaka/attha/attha.php?b=31&i=726
Contents of The Tipitaka Volume 31
https://84000.org/tipitaka/read/?index_31
https://84000.org/tipitaka/english/?index_31
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
