บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ |
ThaiVersion PaliThai PaliRoman |
[128] |128.251| Padumuttaro nāma jino sabbalokavidū muni ito satasahasassamhi kappe uppajji cakkhumā. |128.252| Ovādako viññāpako tārako sabbapāṇinaṃ desanākusalo buddho tāresi janataṃ bahuṃ. |128.253| Anukampako kāruṇiko hitesī sabbapāṇinaṃ sampatte titthiye sabbe pañcasīle patiṭṭhahi. |128.254| Evaṃ nirākulaṃ āsi suññataṃ titthiyehi ca vicittaṃ arahantehi vasībhūtehi tādibhi. |128.255| Ratanānaṭṭhapaññāsaṃ uggato so mahāmuni kañcanagghiyasaṅkāso battiṃsavaralakkhaṇo . |128.256| Vassasatasahassāni āyu vijjati tāvade tāvatā tiṭṭhamāno so tāresi janataṃ bahuṃ. |128.257| Tadāhaṃ haṃsavatiyā brāhmaṇo sādhusammato upecca lokapajjotaṃ assosiṃ dhammadesanaṃ. |128.258| Tadā mahāparisati mahāpurisasāvakaṃ ṭhapentaṃ etadaggamhi sutvāna mudito ahaṃ. |128.259| Mahatā parivārena nimantetvā mahājinaṃ brāhmaṇānaṃ sahassena saha dānamadāsahaṃ. |128.260| Mahādānaṃ daditvāna abhivādiya nāyakaṃ ekamantaṃ ṭhito haṭṭho idaṃ vacanamabraviṃ. |128.261| Tayi saddhāya me vīra adhikāraguṇena ca parisā mahatī hotu nibbattassa tahiṃ tahiṃ. |128.262| Tadā avoca parisaṃ gajagajjitasussaro karavikarudo 1- satthā etaṃ passatha brāhmaṇaṃ. |128.263| Hemavaṇṇaṃ mahābāhuṃ kamalānanalocanaṃ uddhaggatanujaṃ haṭṭhaṃ saddhāvantaṃ guṇe mama. |128.264| Esa patthayi 2- taṃ ṭhānaṃ sīhasarassa 3- bhikkhuno anāgatamhi addhāne lacchasetaṃ manorathaṃ. |128.265| Satasahasse ito kappe okkākakulasambhavo gotamo nāma nāmena satthā loke bhavissati. |128.266| Tassa dhammesu dāyādo oraso dhammanimmito kassapo nāma nāmena hessati satthusāvako. |128.267| Ito dvenavute kappe ahu satthā anuttaro anūpamo asadiso phusso lokagganāyako. @Footnote: 1 Ma. karavīkaruto. 2 Ma. patthayate. ito paraṃ īdisameva. 3 Ma. Yu. sīhaghosassa. |128.268| So ve 1- sabbatamaṃ hantvā vijaṭetvā mahājaṭaṃ vassate amataṃ vuṭṭhiṃ tappayanto sadevakaṃ. |128.269| Tadā mayaṃ 2- bārāṇasiyaṃ rājāmaccā 3- āhumhase bhātaromha tayo sabbe saṃvissaṭṭhāva rājino. |128.270| Vīraṅgarūpā balino saṅgāme aparājitā tadā kupitapaccanto amhe āha mahīpati. |128.271| Etha gantvāna paccantaṃ sādhetvā avanibalaṃ 4- khemaṃ me vijitaṃ katvā punarethāti sāsatha 5-. |128.272| Tato mayaṃ avocumha yadi deyyāsi nāyakaṃ upaṭṭhānāya amhākaṃ sādhayissāma te 6- tato. |128.273| Tato mayaṃ laddhavarā bhūmipālena pesitā nikkhittasatthaṃ paccantaṃ katvā punarupecca 7- taṃ. |128.274| Yācitvā satthupaṭṭhānaṃ rājānaṃ lokanāyakaṃ munivaraṃ 8- labhitvāna yāvajīvaṃ yajimha 9- taṃ. |128.275| Mahagghāni ca vatthāni paṇītāni rasāni ca senāsanāni rammāni bhesajjāni hitāni ca. |128.276| Datvā sasaṅghamunino dhammenuppāditāni no sīlavanto kāruṇikā bhāvanāyuttamānasā. |128.277| Sadā paricaritvāna mettacittena nāyakaṃ nibbute tamhi lokagge pūjaṃ katvā yathābalaṃ. @Footnote: 1 Ma. ca. 2 Ma. Yu. hi. 3 Ma. rājāpaccā. 4 Po. avadhibalaṃ. @Ma. aṭavībalaṃ. Yu. sodhetvā avidhībalaṃ. 5 Ma. Yu. bhāsatha. 6 Ma. vo. Yu. @sodhayissāma. 7 Ma. punarupacca. 8 Po. Ma. munivīraṃ. 9 Po. ajimha. Yu. adimha. |128.278| Tato cutā tāvatiṃsaṃ 1- gatā tattha mahāsukhaṃ anubhūtā mayaṃ sabbe buddhapūjāyidaṃ phalaṃ. |128.279| Mālākāro 2- yathāladdho dasseti vikatiṃ bahuṃ tathā bhave bhavantohaṃ videhādhipatī ahu. |128.280| Guṇācelassa vākyena micchādiṭṭhihatāsayo 3- narakamaggamāruḷho rucāya mama dhītuyā. |128.281| Ovādaṃ nādayitvāna brahmunā nāradenahaṃ bahudhā sāsito 4- santo diṭṭhiṃ hitvāna pāpikaṃ. |128.282| Pūrayitvā visesena dasakammapathe ahaṃ hitvāna dehamagamiṃ saggaṃ sabhavanaṃ yathā. |128.283| Pacchime bhavasampatte brahmabandhu ahosahaṃ bārāṇasiyaṃ phītāya jāto vippakule 5- ahaṃ. |128.284| Maccubyādhijarābhīto ogāhetvā mahāvanaṃ nibbānaṃ padamesanto jaṭilesu paribbajiṃ. |128.285| Tadā dve bhātaro mayhaṃ pabbajiṃsu mayā saha uruvelāya māpetvā assamaṃ nīvasiṃ ahaṃ. |128.286| Kassapo nāma gottena uruvelāya 6- nīvasiṃ tato me āsi paññatti uruvelāsu 7- kassapo. |128.287| Nadīsakāse bhātā me nadīkassapasavhayo āsippakāso nāmena gayāyaṃ gayakassapo. @Footnote: 1 Ma. Yu. santusitaṃ. 2 Ma. Yu. māyākāro yathā raṅge. 3 Ma. micchādiṭṭhigatāsayo. @4 Po. bahuṃ vā sāsite sante. Ma. ...saṃsito. Yu. bahuṃ va. 5 Ma. Yu. ... @vippamahākule. 6 Ma. uruvelanivāsiko. Yu. uruvelānivāsitā. 7 Ma. @uruvelakassapoiti. |128.288| Dve satāni kaniṭṭhassa 1- tīṇi majjhassa bhātuno mama pañcasatānūnā sissā sabbe mamānugā. |128.289| Tadā upecca maṃ buddho katvāna 2- vividhāni me pāṭihirāni lokaggo vinesi narasārathi. |128.290| Sahassaparivārena ahosiṃ ehibhikkhuko teheva saha sabbehi arahattaṃ apāpuṇiṃ. |128.291| Te ca 3- aññeva bahavo yasasā 4- maṃ parivārayuṃ sāsituñca samatthohaṃ tato maṃ isi sattamo. |128.292| Mahāparisabhāvasmiṃ etadagge ṭhapesi maṃ aho buddhe kataṃ kāraṃ saphalaṃ me ajāyatha. |128.293| Kilesā jhāpitā mayhaṃ bhavā sabbe samūhatā nāgova bandhanaṃ chetvā viharāmi anāsavo. |128.294| Svāgataṃ vata me āsi mama buddhassa santike tisso vijjā anuppattā kataṃ buddhassa sāsanaṃ. |128.295| Paṭisambhidā catasso vimokkhāpica aṭṭhime chaḷabhiññā sacchikatā kataṃ buddhassa sāsananti. Itthaṃ sudaṃ āyasmā uruvelakassapo thero imā gāthāyo abhāsitthāti. Uruvelakassapattherassa apadānaṃ samattaṃ. @Footnote: 1 Yu. nadīkassa. 2 Yu. katvā nānāvidhāni. 3 Ma. te cevaññe ca bahavo. @4 Ma. Yu. sissā. Navamaṃ rādhattherāpadānaṃ (539)The Pali Tipitaka in Roman Character Volume 33 page 206-211. https://84000.org/tipitaka/read/roman_item.php?book=33.1&item=128&items=1&mode=bracket Classified by content :- https://84000.org/tipitaka/read/roman_item.php?book=33.1&item=128&items=1 Compare with The Pali Tipitaka in Thai Character :- https://84000.org/tipitaka/read/pali_item.php?book=33.1&item=128&items=1&mode=bracket Compare with The Royal Version of Thai Tipitaka :- https://84000.org/tipitaka/read/byitem.php?book=33.1&item=128&items=1&mode=bracket Study Atthakatha :- https://84000.org/tipitaka/attha/attha.php?b=33.1&i=128 Contents of The Tipitaka Volume 33 https://84000.org/tipitaka/read/?index_33 https://84000.org/tipitaka/english/?index_33
|
บันทึก ๑๔ พฤศจิกายน พ.ศ. ๒๕๖๐. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน. หากพบข้อผิดพลาด กรุณาแจ้งได้ที่ [email protected]