paliTIPITAKA Volume 4 - Vinaya Pitaka 4

[174] Tena kho pana samayena chabbaggiyā bhikkhū saṅghamajjhe anajjhiṭṭhā pātimokkhaṃ uddisanti . bhagavato etamatthaṃ ārocesuṃ . Na bhikkhave saṅghamajjhe anajjhiṭṭhena pātimokkhaṃ uddisitabbaṃ yo uddiseyya āpatti dukkaṭassa . anujānāmi bhikkhave therādhikaṃ ^1- pātimokkhanti. @Footnote: ¹ Sī. therādheyyaṃ. therādhikanti therādhīnaṃ therāyattaṃ bhavitunti attho. @therādheyyantipi pāṭhoti tabbaṇṇanā. Aññatitthiyabhāṇavāraṃ niṭṭhitaṃ ekādasamaṃ ^1- [175] Athakho bhagavā rājagahe yathābhirantaṃ viharitvā yena codanāvatthu ^2- tena cārikaṃ pakkāmi anupubbena cārikaṃ caramāno yena codanāvatthu tadavasari . tena kho pana samayena aññatarasmiṃ āvāse sambahulā bhikkhū viharanti . tattha thero bhikkhu bālo hoti abyatto . so na jānāti uposathaṃ vā uposathakammaṃ vā pātimokkhaṃ vā pātimokkhuddesaṃ vā . athakho tesaṃ bhikkhūnaṃ etadahosi bhagavatā paññattaṃ therādhikaṃ pātimokkhanti ayañca amhākaṃ thero bālo abyatto na jānāti uposathaṃ vā uposathakammaṃ vā pātimokkhaṃ vā pātimokkhuddesaṃ vā kathaṃ nu kho amhehi paṭipajjitabbanti . Bhagavato etamatthaṃ ārocesuṃ . anujānāmi bhikkhave yo tattha bhikkhu byatto paṭibalo tassādheyyaṃ pātimokkhanti. [176] Tena kho pana samayena aññatarasmiṃ āvāse tadahuposathe sambahulā bhikkhū viharanti bālā abyattā . te na jānanti uposathaṃ vā uposathakammaṃ vā pātimokkhaṃ vā pātimokkhuddesaṃ vā . te theraṃ ajjhesiṃsu uddisatu bhante thero pātimokkhanti . So evamāha na me āvuso vattatīti . dutiyaṃ theraṃ ^3- ajjhesiṃsu @Footnote: ¹ Ma. Yu. aññatitthiyabhāṇavāraṃ niṭṭhitaṃ . Sī. aññatitthiyabhāṇavāraṃ ekādasamaṃ. @² codanāvatthu nāma ekaṃ nagaranti taṭṭīkā . ³ Ma. Yu. dutiyatheraṃ. Uddisatu bhante thero pātimokkhanti . sopi evamāha na me āvuso vattatīti . tatiyaṃ theraṃ ^1- ajjhesiṃsu uddisatu bhante thero pātimokkhanti . sopi evamāha na me āvuso vattatīti. Eteneva upāyena yāvasaṅghanavakaṃ ajjhesiṃsu uddisatu āyasmā pātimokkhanti . sopi evamāha na me bhante vattatīti . Bhagavato etamatthaṃ ārocesuṃ. {176.1} Idha pana bhikkhave aññatarasmiṃ āvāse tadahuposathe sambahulā bhikkhū viharanti bālā abyattā . te na jānanti uposathaṃ vā uposathakammaṃ vā pātimokkhaṃ vā pātimokkhuddesaṃ vā. Te theraṃ ajjhesanti uddisatu bhante thero pātimokkhanti . so evaṃ vadeti na me āvuso vattatīti . dutiyaṃ theraṃ ajjhesanti uddisatu bhante thero pātimokkhanti . sopi evaṃ vadeti na me āvuso vattatīti. Tatiyaṃ theraṃ ajjhesanti uddisatu bhante thero pātimokkhanti . Sopi evaṃ vadeti na me āvuso vattatīti . eteneva upāyena yāvasaṅghanavakaṃ ajjhesanti uddisatu āyasmā pātimokkhanti . Sopi evaṃ vadeti na me bhante vattatīti . tehi bhikkhave bhikkhūhi eko bhikkhu sāmantā āvāsā sajjukaṃ pāhetabbo gacchāvuso saṅkhittena vā vitthārena vā pātimokkhaṃ pariyāpuṇitvā āgacchāti. {176.2} Athakho bhikkhūnaṃ etadahosi ko ^2- nu kho pāhetabboti. @Footnote: ¹ Ma. Yu. tatiyatharaṃ . ² Ma. Yu. kena nukho. Bhagavato etamatthaṃ ārocesuṃ . anujānāmi bhikkhave therena bhikkhunā navakaṃ bhikkhuṃ āṇāpetunti . therena āṇattā navā bhikkhū na gacchanti . bhagavato etamatthaṃ ārocesuṃ . na bhikkhave therena āṇattena agilānena na gantabbaṃ yo na gaccheyya āpatti dukkaṭassāti. [177] Athakho bhagavā codanāvatthusmiṃ yathābhirantaṃ viharitvā punadeva rājagahaṃ paccāgacchi . tena kho pana samayena manussā bhikkhū piṇḍāya carante pucchanti katimī ^1- bhante pakkhassāti . Bhikkhū evamāhaṃsu na kho mayaṃ āvuso jānāmāti . manussā ujjhāyanti khīyanti vipācenti pakkhagaṇanamattampime samaṇā sakyaputtiyā na jānanti kimpanime aññaṃ kiñci kalyāṇaṃ jānissantīti . bhagavato etamatthaṃ ārocesuṃ . anujānāmi bhikkhave pakkhagaṇanaṃ uggahetunti . athakho bhikkhūnaṃ etadahosi kena nu kho pakkhagaṇanā uggahetabbāti . bhagavato etamatthaṃ ārocesuṃ . Anujānāmi bhikkhave sabbeheva pakkhagaṇanaṃ uggahetunti. {177.1} Tena kho pana samayena manussā bhikkhū piṇḍāya carante pucchanti kīvatikā bhante bhikkhūti . bhikkhū evamāhaṃsu na kho mayaṃ āvuso jānāmāti . manussā ujjhāyanti khīyanti vipācenti aññamaññampime samaṇā sakyaputtiyā na jānanti kimpanime aññaṃ @Footnote: ¹ Sī. katamī. Kiñci kalyāṇaṃ jānissantīti . bhagavato etamatthaṃ ārocesuṃ . Anujānāmi bhikkhave bhikkhū gaṇetunti . athakho bhikkhūnaṃ etadahosi kadā nu kho bhikkhū gaṇetabbāti . bhagavato etamatthaṃ ārocesuṃ . Anujānāmi bhikkhave tadahuposathe nāmamattena ^1- vā gaṇetuṃ salākaṃ vā gahetunti ^2-. [178] Tena kho pana samayena bhikkhū ajānantā ajjuposathoti dūraṃ gāmaṃ piṇḍāya gacchanti ^3- . te uddissamānepi pātimokkhe āgacchanti uddiṭṭhamattepi āgacchanti . bhagavato etamatthaṃ ārocesuṃ. Anujānāmi bhikkhave ārocetuṃ ajjuposathoti . Athakho bhikkhūnaṃ etadahosi kena nu kho ārocetabboti. Bhagavato etamatthaṃ ārocesuṃ. Anujānāmi bhikkhave therena bhikkhunā kālavato ārocetunti. Tena kho pana samayena aññataro thero kālavato nassari ^4-. Bhagavato etamatthaṃ ārocesuṃ. Anujānāmi bhikkhave bhattakālepi ārocetunti . bhattakālepi nassari. Bhagavato etamatthaṃ ārocesuṃ . anujānāmi bhikkhave yaṃ kālaṃ sarati taṃ kālaṃ ārocetunti. [179] Tena kho pana samayena aññatarasmiṃ āvāse uposathāgāraṃ uklāpaṃ hoti . āgantukā bhikkhū ujjhāyanti khīyanti vipācenti @Footnote: ¹ Ma. nāmaggena . Yu. gaṇamaggena Sī. nāmattena . ² gāhetuntipi pāṭho. @³ Ma. Yu. caranti . ⁴ Ma. Yu. nassarati. Kathaṃ hi nāma bhikkhū uposathāgāraṃ na sammajjissantīti . bhagavato etamatthaṃ ārocesuṃ . anujānāmi bhikkhave uposathāgāraṃ sammajjitunti. Athakho bhikkhūnaṃ etadahosi kena nu kho uposathāgāraṃ sammajjitabbanti. Bhagavato etamatthaṃ ārocesuṃ . anujānāmi bhikkhave therena bhikkhunā navaṃ bhikkhuṃ āṇāpetunti . therena āṇattā navā bhikkhū na sammajjanti. Bhagavato etamatthaṃ ārocesuṃ . Na bhikkhave therena āṇattena agilānena na sammajjitabbaṃ yo na sammajjeyya āpatti dukkaṭassāti. {179.1} Tena kho pana samayena uposathāgāre āsanaṃ appaññattaṃ hoti . bhikkhū chamāyaṃ nisīdanti . Gattānipi cīvarānipi paṃsukitāni honti. Bhagavato etamatthaṃ ārocesuṃ . Anujānāmi bhikkhave uposathāgāre āsanaṃ paññāpetunti . athakho bhikkhūnaṃ etadahosi kena nu kho uposathāgāre āsanaṃ paññāpetabbanti . bhagavato etamatthaṃ ārocesuṃ . Anujānāmi bhikkhave therena bhikkhunā navaṃ bhikkhuṃ āṇāpetunti . Therena āṇattā navā bhikkhū āsanaṃ ^1- na paññāpenti. Bhagavato etamatthaṃ ārocesuṃ. Na bhikkhave therena āṇattena agilānena āsanaṃ ^1- na paññāpetabbaṃ yo na paññāpeyya āpatti dukkaṭassāti. {179.2} Tena kho pana samayena uposathāgāre padīpo na hoti. Bhikkhu andhakāre kāyampi cīvarampi akkamanti . bhagavato etamatthaṃ ārocesuṃ . anujānāmi bhikkhave uposathāgāre @Footnote: ¹ Ma. Yu. ayaṃ pāṭho natthi. Padīpaṃ kātunti . athakho bhikkhūnaṃ etadahosi kena nu kho uposathāgāre padīpo kātabboti . bhagavato etamatthaṃ ārocesuṃ . anujānāmi bhikkhave therena bhikkhunā navaṃ bhikkhuṃ āṇāpetunti . Therena āṇattā navā bhikkhū na padīpenti . bhagavato etamatthaṃ ārocesuṃ. Na bhikkhave therena āṇattena agilānena nappadīpetabbo ^1- yo nappadīpeyya āpatti dukkaṭassāti ^2-.

The Pali Tipitaka in Roman Character Volume 4 page 226-232. https://84000.org/tipitaka/read/roman_item.php?book=4&item=174&items=6 Classified by [Item Number] :- http://84000.org/tipitaka/read/roman_item.php?book=4&item=174&items=6&mode=bracket Compare with The Pali Tipitaka in Thai Character :- https://84000.org/tipitaka/read/pali_item.php?book=4&item=174&items=6 Compare with The Royal Version of Thai Tipitaka :- https://84000.org/tipitaka/read/byitem.php?book=4&item=174&items=6 Study Atthakatha :- https://84000.org/tipitaka/attha/attha.php?b=4&i=174 Contents of The Tipitaka Volume 4 https://84000.org/tipitaka/read/?index_4 https://84000.org/tipitaka/english/?index_4