Tassuddānaṃ
[204] Titthiyā bimbisāro ca sannipatitu 1- tuṇhikā
dhammaṃ raho pātimokkhaṃ devasikaṃ tadā sakiṃ
yathā parisāya samaggaṃ sāmaggī maddakucchi ca
sīmā mahatī nadiyā anu dve khuddakāni ca
navā rājagahe ceva sīmā avippavāsanā
sammanne paṭhamaṃ sīmaṃ pacchā sīmaṃ samūhane
asammatā gāmasīmā nadiyā samudde sare
udakukkhepo bhindanti tathevajjhottharanti ca
@Footnote: 1 Sī. sannipatituṃ. Yu. sannipatanti.
Kati kammāni uddeso sañcarā 1- asatīpi ca
dhammaṃ vinayaṃ tajjenti puna vinayatajjanā
codanā kate okāse adhammapaṭikkosanā
catupañcaparāāvi sañciccāpica 2- vāyame
sagahaṭṭhā anajjhiṭṭhā codanamhi na jānati
sambahulā na jānanti sajjukaṃ na ca gacchare
katimī kīvatikā dūre ārocetuñca nassari
uklāpaṃ āsanaṃ dīpo 3- disā añño bahussuto
sajjukaṃ vassuposatho suddhikammañca ñātakā
gaggo catutayo dveko āpatti sabhāgā sari
sabbo saṅgho vematiko na jānanti bahussuto
bahū samasamā thokā parisāvuṭṭhitāya ca 4-
ekaccā vuṭṭhitā sabbā jānanti ca vimatikā 5-
kappate vāti kukkuccā jānaṃ passaṃ suṇanti ca
āvāsikena āgantukā 6- cātupaṇṇaraso puna
pāṭipado paṇṇaraso liṅgasaṃvāsakā ubho
pārivāsānuposatho aññatra saṅghasamaggiyā 7-
ete vibhattā uddānā vatthuvibhūtakāraṇāti.
@Footnote: 1 Sī. Ma. Yu. savarā. Rā. saṃvarā . 2 Ma. Yu. Rā. sañciccacepi
@vāyame. 3 Yu. padīpo. 4 Ma. parisāavuṭṭhitāya ca. Yu. parisāya
@avuṭṭhitāya ca . 5 Ma. Yu. vematikā. 6 Ma. Yu. āgantu.
@7 Ma. Yu. saṅghasāmaggiyā.
Vassūpanāyikakkhandhakaṃ
[205] Tena samayena buddho bhagavā rājagahe viharati veḷuvane
kalandakanivāpe . tena kho pana samayena bhagavatā bhikkhūnaṃ vassāvāso
appaññatto hoti . tedha 1- bhikkhū hemantampi gimhampi vassampi
cārikaṃ caranti . manussā ujjhāyanti khīyanti vipācenti kathaṃ
hi nāma samaṇā sakyaputtiyā hemantampi gimhampi vassampi
cārikaṃ carissanti haritāni tiṇāni sammaddantā ekindriyaṃ jīvaṃ
viheṭhentā bahū khuddake pāṇe saṅghātaṃ āpādentā ime
hi nāma aññatitthiyā paribbājakā 2- durakkhātadhammā vassāvāsaṃ
alliyissanti saṅkāsayissanti 3- ime hi nāma sakuntakā rukkhaggesu
kulāvakāni karitvā vassāvāsaṃ alliyissanti saṅkāsayissanti ime
pana samaṇā sakyaputtiyā hemantampi gimhampi vassampi cārikaṃ
caranti haritāni tiṇāni sammaddantā ekindriyaṃ jīvaṃ viheṭhentā
bahū khuddake pāṇe saṅghātaṃ āpādentāti . assosuṃ kho bhikkhū
tesaṃ manussānaṃ ujjhāyantānaṃ khīyantānaṃ vipācentānaṃ . athakho
te bhikkhū bhagavato etamatthaṃ ārocesuṃ . athakho bhagavā etasmiṃ
nidāne etasmiṃ pakaraṇe dhammiṃ kathaṃ katvā bhikkhū āmantesi
anujānāmi bhikkhave vassaṃ upagantunti.
@Footnote: 1 idhasaddo nipātamattoti tabbaṇṇanā . 2 Ma. Yu. ayaṃ pāṭho natthi.
@3 Ma. saṅkasāyissanti. Yu. Rā. saṅkāpayissanti.
[206] Athakho bhikkhūnaṃ etadahosi kadā nu kho vassaṃ
upagantabbanti . bhagavato etamatthaṃ ārocesuṃ . anujānāmi
bhikkhave vassāne vassaṃ upagantunti . athakho bhikkhūnaṃ etadahosi
kati nu kho vassūpanāyikāti . bhagavato etamatthaṃ ārocesuṃ .
Dvemā bhikkhave vassūpanāyikā purimikā pacchimikā 1- aparajjugatāya
āsāḷhiyā purimikā upagantabbā māsagatāya āsāḷhiyā
pacchimikā upagantabbā imā kho bhikkhave dve vassūpanāyikāti.
[207] Tena kho pana samayena chabbaggiyā bhikkhū vassaṃ upagantvā
antarāvassaṃ cārikaṃ caranti . manussā tatheva ujjhāyanti khīyanti
vipācenti kathaṃ hi nāma samaṇā sakyaputtiyā hemantampi gimhampi
vassampi cārikaṃ carissanti haritāni tiṇāni sammaddantā ekindriyaṃ
jīvaṃ viheṭhentā bahū khuddake pāṇe saṅghātaṃ āpādentā ime hi nāma
aññatitthiyā durakkhātadhammā vassāvāsaṃ alliyissanti saṅkāsayissanti
ime hi nāma sakuntakā rukkhaggesu kulāvakāni karitvā vassāvāsaṃ
alliyissanti saṅkāsayissanti ime pana samaṇā sakyaputtiyā
hemantampi gimhampi vassampi cārikaṃ caranti haritāni tiṇāni
sammaddantā ekindriyaṃ jīvaṃ viheṭhentā bahū khuddake pāṇe
saṅghātaṃ āpādentāti . assosuṃ kho bhikkhū tesaṃ manussānaṃ
ujjhāyantānaṃ khīyantānaṃ vipācentānaṃ . ye te bhikkhū appicchā
te ujjhāyanti khīyanti vipācenti kathaṃ hi nāma chabbaggiyā
@Footnote: 1 Ma. Yu. pacchimikāti.
Bhikkhū vassaṃ upagantvā antarāvassaṃ cārikaṃ carissantīti . athakho
te bhikkhū bhagavato etamatthaṃ ārocesuṃ . athakho bhagavā etasmiṃ
nidāne etasmiṃ pakaraṇe dhammiṃ kathaṃ katvā bhikkhū āmantesi na
bhikkhave vassaṃ upagantvā purimaṃ vā temāsaṃ pacchimaṃ vā temāsaṃ
avasitvā cārikā pakkamitabbā yo pakkameyya āpatti
dukkaṭassāti.
[208] Tena kho pana samayena chabbaggiyā bhikkhū na icchanti
vassaṃ upagantuṃ . bhagavato etamatthaṃ ārocesuṃ . na bhikkhave
vassaṃ na upagantabbaṃ yo na upagaccheyya āpatti dukkaṭassāti .
Tena kho pana samayena chabbaggiyā bhikkhū tadahuvassūpanāyikāya vassaṃ
anupagantukāmā sañcicca āvāsaṃ atikkamanti . bhagavato etamatthaṃ
ārocesuṃ . na bhikkhave tadahuvassūpanāyikāya vassaṃ anupagantukāmena
sañcicca āvāso atikkamitabbo yo atikkameyya āpatti
dukkaṭassāti.
[209] Tena kho pana samayena rājā māgadho seniyo bimbisāro
vassaṃ ukkaḍḍhitukāmo bhikkhūnaṃ santike dūtaṃ pāhesi yadi panayyā 1-
āgame juṇhe vassaṃ upagaccheyyunti . bhagavato etamatthaṃ
ārocesuṃ. Anujānāmi bhikkhave rājūnaṃ anuvattitunti.
[210] Athakho bhagavā rājagahe yathābhirantaṃ viharitvā yena
sāvatthī tena cārikaṃ pakkāmi anupubbena cārikaṃ caramāno yena
@Footnote: 1 Ma. panāyyā.
Sāvatthī tadavasari . tatra sudaṃ bhagavā sāvatthiyaṃ viharati jetavane
anāthapiṇḍikassa ārāme . tena kho pana samayena kosalesu
janapadesu udenena upāsakena saṅghaṃ uddissa vihāro kārāpito
hoti . so bhikkhūnaṃ santike dūtaṃ pāheti 1- āgacchantu bhadantā
icchāmi dānañca dātuṃ dhammañca sotuṃ bhikkhū ca passitunti .
Bhikkhū evamāhaṃsu bhagavatā āvuso paññattaṃ na vassaṃ upagantvā
purimaṃ vā temāsaṃ pacchimaṃ vā temāsaṃ avasitvā cārikā
pakkamitabbāti āgametu udeno upāsako yāva bhikkhū vassaṃ vasanti
vassaṃ vutthā gamissanti sace panassa accāyikaṃ karaṇīyaṃ tattheva
āvāsikānaṃ bhikkhūnaṃ santike vihāraṃ patiṭṭhāpetūti . udeno
upāsako ujjhāyati khīyati vipāceti kathaṃ hi nāma bhadantā mayā
pahite na āgacchissanti ahaṃ hi dāyako kārako saṅghupaṭṭhākoti .
Assosuṃ kho bhikkhū udenassa upāsakassa ujjhāyantassa khīyantassa
vipācentassa.
{210.1} Athakho te bhikkhū bhagavato etamatthaṃ ārocesuṃ. Athakho
bhagavā etasmiṃ nidāne [2]- dhammiṃ kathaṃ katvā bhikkhū āmantesi
anujānāmi bhikkhave sattannaṃ sattāhakaraṇīyena pahite gantuṃ na
tveva appahite bhikkhussa bhikkhuniyā sikkhamānāya sāmaṇerassa
sāmaṇeriyā upāsakassa upāsikāya anujānāmi bhikkhave imesaṃ
sattannaṃ sattāhakaraṇīyena pahite gantuṃ na tveva appahite
sattāhaṃ sannivaṭṭo kātabbo.
@Footnote: 1 Ma. Yu. pāhesi . 2 Ma. etasmiṃ pakaraṇe.
{210.2} Idha pana bhikkhave upāsakena saṅghaṃ uddissa vihāro kārāpito
hoti . so ce bhikkhūnaṃ santike dūtaṃ pahiṇeyya āgacchantu bhadantā
icchāmi dānañca dātuṃ dhammañca sotuṃ bhikkhū ca passitunti . gantabbaṃ
bhikkhave sattāhakaraṇīyena pahite na tveva appahite sattāhaṃ
sannivaṭṭo kātabbo.
{210.3} Idha pana bhikkhave upāsakena saṅghaṃ uddissa aḍḍhayogo
kārāpito hoti .pe. pāsādo kārāpito hoti. Hammiyaṃ kārāpitaṃ
hoti . guhā kārāpitā hoti . pariveṇaṃ kārāpitaṃ hoti. Koṭṭhako
kārāpito hoti . upaṭṭhānasālā kārāpitā hoti . aggisālā
kārāpitā hoti . kappiyakuṭī kārāpitā hoti . vaccakuṭī kārāpitā
hoti . caṅkamo kārāpito hoti . caṅkamanasālā kārāpitā hoti.
Udapāno kārāpito hoti . udapānasālā kārāpitā hoti .
Jantāgharaṃ kārāpitaṃ hoti . jantāgharasālā kārāpitā hoti .
Pokkharaṇī kārāpitā hoti . maṇḍapo kārāpito hoti .
Ārāmo kārāpito hoti . ārāmavatthuṃ kārāpitaṃ hoti . so
ce bhikkhūnaṃ santike dūtaṃ pahiṇeyya āgacchantu bhadantā icchāmi
dānañca dātuṃ dhammañca sotuṃ bhikkhū ca passitunti . gantabbaṃ
bhikkhave sattāhakaraṇīyena pahite na tveva appahite sattāhaṃ
sannivaṭṭo kātabbo.
{210.4} Idha pana bhikkhave upāsakena sambahule bhikkhū
uddissa .pe. ekaṃ bhikkhuṃ uddissa vihāro kārāpito
hoti . aḍḍhayogo kārāpito hoti . pāsādo kārāpito
Hoti . hammiyaṃ kārāpitaṃ hoti . guhā kārāpitā hoti .
Pariveṇaṃ kārāpitaṃ hoti . koṭṭhako kārāpito hoti. Upaṭṭhānasālā
kārāpitā hoti . aggisālā kārāpitā hoti . kappiyakuṭī
kārāpitā hoti . vaccakuṭī kārāpitā hoti . caṅkamo kārāpito
hoti . caṅkamanasālā kārāpitā hoti . udapāno kārāpito
hoti . udapānasālā kārāpitā hoti . jantāgharaṃ kārāpitaṃ
hoti . jantāgharasālā kārāpitā hoti . pokkharaṇī kārāpitā
hoti . maṇḍapo kārāpito hoti . ārāmo kārāpito hoti .
Ārāmavatthuṃ kārāpitaṃ hoti . so ce bhikkhūnaṃ santike dūtaṃ
pahiṇeyya āgacchantu bhadantā icchāmi dānañca dātuṃ dhammañca
sotuṃ bhikkhū ca passitunti . gantabbaṃ bhikkhave sattāhakaraṇīyena
pahite na tveva appahite sattāhaṃ sannivaṭṭo kātabbo.
{210.5} Idha pana bhikkhave upāsakena bhikkhunīsaṅghaṃ uddissa
sambahulā bhikkhuniyo uddissa ekaṃ bhikkhuniṃ uddissa sambahulā
sikkhamānāyo uddissa ekaṃ sikkhamānaṃ uddissa sambahule
sāmaṇere uddissa ekaṃ sāmaṇeraṃ uddissa sambahulā
sāmaṇeriyo uddissa ekaṃ sāmaṇeriṃ uddissa vihāro
kārāpito hoti . aḍḍhayogo kārāpito hoti . pāsādo
kārāpito hoti . hammiyaṃ kārāpitaṃ hoti . guhā kārāpitā
hoti . pariveṇaṃ kārāpitaṃ hoti . koṭṭhako kārāpito hoti .
Upaṭṭhānasālā kārāpitā hoti . aggisālā kārāpitā
Hoti . kappiyakuṭī kārāpitā hoti . vaccakuṭī kārāpitā hoti 1-.
Caṅkamo kārāpito hoti . caṅkamanasālā kārāpitā hoti .
Udapāno kārāpito hoti . udapānasālā kārāpitā hoti .
Pokkharaṇī kārāpitā hoti . maṇḍapo kārāpito hoti .
Ārāmo kārāpito hoti . ārāmavatthuṃ kārāpitaṃ hoti . so
ce bhikkhūnaṃ santike dūtaṃ pahiṇeyya āgacchantu bhadantā icchāmi
dānañca dātuṃ dhammañca sotuṃ bhikkhū ca passitunti . gantabbaṃ
bhikkhave sattāhakaraṇīyena pahite na tveva appahite sattāhaṃ
sannivaṭṭo kātabbo.
{210.6} Idha pana bhikkhave upāsakena attano atthāya
nivesanaṃ kārāpitaṃ hoti . sayanigharaṃ kārāpitaṃ hoti . uddosito
kārāpito hoti . aṭṭo kārāpito hoti . māḷo kārāpito
hoti . āpaṇo kārāpito hoti . āpaṇasālā kārāpitā
hoti . pāsādo kārāpito hoti . hammiyaṃ kārāpitaṃ hoti .
Guhā kārāpitā hoti . pariveṇaṃ kārāpitaṃ hoti . koṭṭhako
kārāpito hoti . upaṭṭhānasālā kārāpitā hoti . aggisālā
kārāpitā hoti . rasavatī kārāpitā hoti . vaccakuṭī kārāpitā
hoti . caṅkamo kārāpito hoti . caṅkamanasālā kārāpitā hoti.
Udapāno kārāpito hoti . udapānasālā kārāpitā hoti. Jantāgharaṃ
kārāpitaṃ hoti . jantāgharasālā kārāpitā hoti . pokkharaṇī
kārāpitā hoti . maṇḍapo kārāpito hoti . ārāmo kārāpito
@Footnote: 1 Ma. Yu. ito paraṃ kiriyāpadaṃ na dissati.
Hoti . ārāmavatthuṃ kārāpitaṃ hoti . puttassa vā vāreyyaṃ
hoti dhītuyā vā vāreyyaṃ hoti gilāno vā hoti abhiññātaṃ
vā suttantaṃ bhaṇati . so ce bhikkhūnaṃ santike dūtaṃ pahiṇeyya
āgacchantu bhadantā imaṃ suttantaṃ pariyāpuṇissanti purāyaṃ
suttanto na 1- palujjatīti . aññataraṃ vā panassa kiccaṃ hoti
karaṇīyaṃ vā . so ce bhikkhūnaṃ santike dūtaṃ pahiṇeyya āgacchantu
bhadantā icchāmi dānañca dātuṃ dhammañca sotuṃ bhikkhū ca
passitunti . gantabbaṃ bhikkhave sattāhakaraṇīyena pahite na tveva
appahite sattāhaṃ sannivaṭṭo kātabbo.
{210.7} Idha pana bhikkhave upāsikāya saṅghaṃ uddissa vihāro
kārāpito hoti . sā ce bhikkhūnaṃ santike dūtaṃ pahiṇeyya āgacchantu
ayyā icchāmi dānañca dātuṃ dhammañca sotuṃ bhikkhū ca passitunti .
Gantabbaṃ bhikkhave sattāhakaraṇīyena pahite na tveva appahite
sattāhaṃ sannivaṭṭo kātabbo.
{210.8} Idha pana bhikkhave upāsikāya saṅghaṃ uddissa aḍḍhayogo
kārāpito hoti . pāsādo kārāpito hoti . hammiyaṃ kārāpitaṃ
hoti . guhā kārāpitā hoti . pariveṇaṃ kārāpitaṃ hoti. Koṭṭhako
kārāpito hoti . upaṭṭhānasālā kārāpitā hoti . aggisālā
kārāpitā hoti . kappiyakuṭī kārāpitā hoti . vaccakuṭī kārāpitā
hoti . caṅkamo kārāpito hoti . caṅkamanasālā kārāpitā
hoti . udapāno kārāpito hoti . udapānasālā
@Footnote: 1 Ma. Yu. nasaddo natthi.
Kārāpitā hoti . jantāgharaṃ kārāpitaṃ hoti . jantāgharasālā
kārāpitā hoti . pokkharaṇī kārāpitā hoti . maṇḍapo
kārāpito hoti . ārāmo kārāpito hoti . ārāmavatthuṃ
kārāpitaṃ hoti . sā ce bhikkhūnaṃ santike dūtaṃ pahiṇeyya āgacchantu
ayyā icchāmi dānañca dātuṃ dhammañca sotuṃ bhikkhū ca passitunti .
Gantabbaṃ bhikkhave sattāhakaraṇīyena pahite na tveva appahite
sattāhaṃ sannivaṭṭo kātabbo.
{210.9} Idha pana bhikkhave upāsikāya sambahule bhikkhū uddissa
.pe. ekaṃ bhikkhuṃ uddissa bhikkhunīsaṅghaṃ uddissa sambahulā bhikkhuniyo
uddissa ekaṃ bhikkhuniṃ uddissa sambahulā sikkhamānāyo uddissa
ekaṃ sikkhamānaṃ uddissa sambahule sāmaṇere uddissa ekaṃ
sāmaṇeraṃ uddissa sambahulā sāmaṇeriyo uddissa ekaṃ
sāmaṇeriṃ uddissa .pe. attano atthāya nivesanaṃ kārāpitaṃ
hoti . sayanigharaṃ kārāpitaṃ hoti . uddosito kārāpito hoti .
Aṭṭo kārāpito hoti . māḷo kārāpito hoti . āpaṇo
kārāpito hoti . āpaṇasālā kārāpitā hoti . pāsādo
kārāpito hoti . hammiyaṃ kārāpitaṃ hoti . guhā kārāpitā
hoti . pariveṇaṃ kārāpitaṃ hoti . koṭṭhako kārāpito hoti .
Upaṭṭhānasālā kārāpitā hoti . aggisālā kārāpitā hoti .
Rasavatī kārāpitā hoti . vaccakuṭī kārāpitā hoti . caṅkamo
kārāpito hoti . caṅkamanasālā kārāpitā hoti. Udapāno kārāpito
Hoti . udapānasālā kārāpitā hoti . Pokkharaṇī kārāpitā hoti.
Maṇḍapo kārāpito hoti . ārāmo kārāpito hoti. Ārāmavatthuṃ
kārāpitaṃ hoti . puttassa vā vāreyyaṃ hoti dhītuyā vā vāreyyaṃ
hoti gilānā vā hoti abhiññātaṃ vā suttantaṃ bhaṇati . sā ce
bhikkhūnaṃ santike dūtaṃ pahiṇeyya āgacchantu ayyā imaṃ suttantaṃ
pariyāpuṇissanti purāyaṃ suttanto na 1- palujjatīti . aññataraṃ
vā panassā kiccaṃ hoti karaṇīyaṃ vā . sā ce bhikkhūnaṃ santike dūtaṃ
pahiṇeyya āgacchantu ayyā icchāmi dānañca dātuṃ dhammañca
sotuṃ bhikkhū ca passitunti . gantabbaṃ bhikkhave sattāhakaraṇīyena
pahite na tveva appahite sattāhaṃ sannivaṭṭo kātabbo.
{210.10} Idha pana bhikkhave bhikkhunā saṅghaṃ uddissa bhikkhuniyā
saṅghaṃ uddissa sikkhamānāya saṅghaṃ uddissa sāmaṇerena saṅghaṃ
uddissa sāmaṇeriyā saṅghaṃ uddissa sambahule bhikkhū uddissa
ekaṃ bhikkhuṃ uddissa bhikkhunīsaṅghaṃ uddissa sambahulā bhikkhuniyo
uddissa ekaṃ bhikkhuniṃ uddissa sambahulā sikkhamānāyo uddissa
ekaṃ sikkhamānaṃ uddissa sambahule sāmaṇere uddissa ekaṃ
sāmaṇeraṃ uddissa sambahulā sāmaṇeriyo uddissa ekaṃ sāmaṇeriṃ
uddissa .pe. attano atthāya vihāro kārāpito hoti .
Aḍḍhayogo kārāpito hoti . pāsādo kārāpito hoti .
Hammiyaṃ kārāpitaṃ hoti . guhā kārāpitā hoti . Pariveṇaṃ kārāpitaṃ
@Footnote: 1 Ma. Yu. nasaddo natthi.
Hoti . koṭṭhako kārāpito hoti . upaṭṭhānasālā kārāpitā
hoti . aggisālā kārāpitā hoti . kappiyakuṭī kārāpitā
hoti . vaccakuṭī kārāpitā hoti . caṅkamo kārāpito hoti .
Caṅkamanasālā kārāpitā hoti . udapāno kārāpito hoti .
Udapānasālā kārāpitā hoti . pokkharaṇī kārāpitā hoti .
Maṇḍapo kārāpito hoti . ārāmo kārāpito hoti .
Ārāmavatthuṃ kārāpitaṃ hoti . sā ce bhikkhūnaṃ santike dūtaṃ
pahiṇeyya āgacchantu ayyā icchāmi dānañca dātuṃ dhammañca
sotuṃ bhikkhū ca passitunti . gantabbaṃ bhikkhave sattāhakaraṇīyena
pahite na tveva appahite sattāhaṃ sannivaṭṭo kātabboti.
The Pali Tipitaka in Roman Character Volume 4 page 269-281.
https://84000.org/tipitaka/read/roman_item.php?book=4&item=204&items=7
Classified by [Item Number] :-
http://84000.org/tipitaka/read/roman_item.php?book=4&item=204&items=7&mode=bracket
Compare with The Pali Tipitaka in Thai Character :-
https://84000.org/tipitaka/read/pali_item.php?book=4&item=204&items=7
Compare with The Royal Version of Thai Tipitaka :-
https://84000.org/tipitaka/read/byitem.php?book=4&item=204&items=7
Study Atthakatha :-
https://84000.org/tipitaka/attha/attha.php?b=4&i=204
Contents of The Tipitaka Volume 4
https://84000.org/tipitaka/read/?index_4
https://84000.org/tipitaka/english/?index_4
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
