[295] Tena 2- samayena buddho bhagavā rājagahe viharati veḷuvane
kalandakanivāpe . tena kho pana samayena āyasmā ca lakkhaṇo
āyasmā ca mahāmoggallāno gijjhakūṭe pabbate viharanti .
Athakho āyasmā mahāmoggallāno pubbaṇhasamayaṃ nivāsetvā
pattacīvaramādāya yenāyasmā lakkhaṇo tenupasaṅkami upasaṅkamitvā
āyasmantaṃ lakkhaṇaṃ etadavoca āyāmāvuso lakkhaṇa rājagahaṃ
piṇḍāya pavisissāmāti . evamāvusoti kho āyasmā lakkhaṇo
āyasmato mahāmoggallānassa paccassosi . athakho āyasmā
mahāmoggallāno gijjhakūṭā pabbatā orohanto aññatarasmiṃ
padese sitaṃ pātvākāsi . athakho āyasmā lakkhaṇo āyasmantaṃ
mahāmoggallānaṃ etadavoca ko nu kho āvuso mahāmoggallāna
hetu ko paccayo sitassa pātukammāyāti . akālo kho āvuso
lakkhaṇa etassa paṇhassa byākaraṇāya 3- bhagavato maṃ santike etaṃ
paṇhaṃ pucchāti . athakho āyasmā ca lakkhaṇo āyasmā ca
@Footnote: 1 Yu. Ma. pakkami. 2 Yu. Rā. tena kho pana. 3 Yu. Ma. potthakesu
@ayaṃ pāṭho na dissati.
Mahāmoggallāno rājagahe piṇḍāya caritvā pacchābhattaṃ
piṇḍapātapaṭikkantā yena bhagavā tenupasaṅkamiṃsu upasaṅkamitvā bhagavantaṃ
abhivādetvā ekamantaṃ nisīdiṃsu . ekamantaṃ nisinno kho āyasmā
lakkhaṇo āyasmantaṃ mahāmoggallānaṃ etadavoca idhāyasmā
mahāmoggallāno gijjhakūṭā pabbatā orohanto aññatarasmiṃ
padese sitaṃ pātvākāsi ko nu kho āvuso moggallāna hetu ko
paccayo sitassa pātukammāyāti . idhāhaṃ āvuso gijjhakūṭā
pabbatā orohanto addasaṃ aṭṭhikasaṅkhalikaṃ vehāsaṃ gacchantaṃ tamenaṃ
gijjhāpi kaṅkāpi 1- kulalāpi anupatitvā anupatitvā phāsuḷantarikāhi 2-
vitudenti vitacchenti 3- virājenti 4- svāssudaṃ 5- aṭṭassaraṃ karoti
tassa mayhaṃ āvuso etadahosi acchariyaṃ vata bho abbhūtaṃ vata bho
evarūpopi nāma satto bhavissati evarūpopi nāma yakkho bhavissati
evarūpopi nāma peto bhavissati 6- evarūpopi nāma attabhāvapaṭilābho
bhavissatīti . bhikkhū ujjhāyanti khīyanti vipācenti uttarimanussadhammaṃ
āyasmā mahāmoggallāno ullapatīti . athakho bhagavā bhikkhū
@Footnote: 1 Yu. Ma. kākāpi. 2 Ma. phāsuḷantarikādīhi. 3-4 Yu. Ma. potthakesu
@idaṃ pāṭhadvayaṃ na dissati. 5 tabbaṇṇanāyaṃ sāsudanti āgataṃ. tattha hi
@vuttaṃ sāsudaṃ aṭṭassaraṃ karotīti ettha sudanti nipāto. sā
@aṭṭhikasaṅkhalikā aṭṭassaraṃ āturassaraṃ karotīti attho. 6 evarūpopi
@nāma peto bhavissatīti Yu. Ma. potthakesu na dissati.
Āmantesi cakkhubhūtā vata bhikkhave sāvakā viharanti ñāṇabhūtā
vata bhikkhave sāvakā viharanti yatra hi nāma sāvako evarūpaṃ
ñassati vā dakkhati vā sakkhiṃ vā karissati pubbe va me so
bhikkhave satto diṭṭho ahosi apicāhaṃ na byākāsiṃ ahañcetaṃ
byākareyyaṃ pare ca me na saddaheyyuṃ ye me na saddaheyyuṃ
tesantaṃ assa dīgharattaṃ ahitāya dukkhāya eso bhikkhave satto
imasmiṃyeva rājagahe goghātako ahosi so tassa kammassa vipākena
bahūni vassāni bahūni vassasatāni bahūni vassasahassāni bahūni
vassasatasahassāni niraye pacitvā tasseva kammassa vipākāvasesena
evarūpaṃ attabhāvapaṭilābhaṃ paṭisaṃvedeti saccaṃ bhikkhave moggallāno
āha anāpatti bhikkhave moggallānassāti .pe.
{295.1} Idhāhaṃ āvuso gijjhakūṭā pabbatā orohanto addasaṃ
maṃsapesiṃ vehāsaṃ gacchantaṃ tamenaṃ gijjhāpi kaṅkāpi kulalāpi anupatitvā
anupatitvā vitudenti 1- vitacchenti virājenti 2- svāssudaṃ aṭṭassaraṃ
karoti .pe. Eso bhikkhave satto imasmiṃyeva rājagahe goghātako ahosi .pe.
{295.2} Idhāhaṃ āvuso gijjhakūṭā pabbatā orohanto addasaṃ
maṃsapiṇḍaṃ vehāsaṃ gacchantaṃ tamenaṃ gijjhāpi kaṅkāpi kulalāpi anupatitvā
anupatitvā vitudenti vitacchenti virājenti svāssudaṃ aṭṭassaraṃ
@Footnote: 1 Yu. Ma. potthakesu ayaṃ pāṭho natthi. 2 Yu. Ma. vibhajenti. ito
@paraṃ pacchimaṃ pāṭhadvayaññeva tattha dissati no purimo pāṭho.
Karoti .pe. eso bhikkhave satto imasmiṃyeva rājagahe sākuṇiko
ahosi .pe.
{295.3} Idhāhaṃ āvuso gijjhakūṭā pabbatā orohanto addasaṃ
nicchaviṃ purisaṃ vehāsaṃ gacchantaṃ tamenaṃ gijjhāpi kaṅkāpi kulalāpi
anupatitvā anupatitvā vitudenti vitacchenti virājenti svāssudaṃ
aṭṭassaraṃ karoti .pe. eso bhikkhave satto imasmiṃyeva rājagahe
orabbhiko ahosi .pe.
{295.4} Idhāhaṃ āvuso gijjhakūṭā pabbatā orohanto addasaṃ
asilomaṃ purisaṃ vehāsaṃ gacchantaṃ tassa te asī uppatitvā uppatitvā
tasseva kāye nipatanti svāssudaṃ aṭṭassaraṃ karoti .pe. eso
bhikkhave satto imasmiṃyeva rājagahe sūkariko ahosi .pe.
{295.5} Idhāhaṃ āvuso gijjhakūṭā pabbatā orohanto addasaṃ
sattilomaṃ purisaṃ vehāsaṃ gacchantaṃ tassa tā sattiyo uppatitvā uppatitvā
tasseva kāye nipatanti svāssudaṃ aṭṭassaraṃ karoti .pe. Eso bhikkhave
satto imasmiṃyeva rājagahe māgaviko ahosi .pe.
{295.6} Idhāhaṃ āvuso gijjhakūṭā pabbatā orohanto addasaṃ
usulomaṃ purisaṃ vehāsaṃ gacchantaṃ tassa te usū uppatitvā uppatitvā
tasseva kāye nipatanti svāssudaṃ aṭṭassaraṃ karoti .pe. eso
bhikkhave satto imasmiṃyeva rājagahe kāraṇiko ahosi .pe.
{295.7} Idhāhaṃ āvuso gijjhakūṭā pabbatā orohanto addasaṃ
sūcilomaṃ purisaṃ vehāsaṃ gacchantaṃ tassa tā sūciyo uppatitvā uppatitvā
Tasseva kāye nipatanti svāssudaṃ aṭṭassaraṃ karoti .pe.
Eso bhikkhave satto imasmiṃyeva rājagahe sārathi ahosi .pe.
{295.8} Idhāhaṃ āvuso gijjhakūṭā pabbatā orohanto addasaṃ
sūcilomaṃ purisaṃ vehāsaṃ gacchantaṃ tassa tā sūciyo sīse pavisitvā mukhato
nikkhamanti mukhe pavisitvā urato nikkhamanti ure pavisitvā udarato
nikkhamanti udare pavisitvā ūrūhi nikkhamanti ūrūsu pavisitvā jaṅghāhi
nikkhamanti jaṅghāsu pavisitvā pādehi nikkhamanti svāssudaṃ aṭṭassaraṃ
karoti .pe. eso bhikkhave satto imasmiṃyeva rājagahe
sūciko 1- ahosi .pe.
{295.9} Idhāhaṃ āvuso gijjhakūṭā pabbatā orohanto addasaṃ
kumbhaṇḍaṃ purisaṃ vehāsaṃ gacchantaṃ so 2- gacchantopi te va
aṇḍe khandhe oropetvā gacchanti nisīdantopi tesveva aṇḍesu
nisīdati tamenaṃ gijjhāpi kaṅkāpi kulalāpi anupatitvā anupatitvā
vitudenti vitacchenti virājenti svāssudaṃ aṭṭassaraṃ karoti .pe.
Eso bhikkhave satto imasmiṃyeva rājagahe gāmakūṭo ahosi .pe.
{295.10} Idhāhaṃ āvuso gijjhakūṭā pabbatā orohanto addasaṃ
purisaṃ gūthakūpe sasīsakaṃ nimuggaṃ .pe. eso bhikkhave satto imasmiṃyeva
rājagahe paradāriko ahosi .pe.
{295.11} Idhāhaṃ āvuso gijjhakūṭā pabbatā orohanto
addasaṃ purisaṃ gūthakūpe sasīsakaṃ nimuggaṃ ubhohi hatthehi gūthaṃ
khādantaṃ .pe. eso bhikkhave satto imasmiṃyeva rājagahe
@Footnote: 1 Yu. Ma. sūcako. 2 Yu. sa..
Duṭṭhabrāhmaṇo ahosi so kassapassa sammāsambuddhassa pāvacane
bhikkhusaṅghaṃ bhattena nimantetvā doṇiyā gūthassa pūrāpetvā kālaṃ
ārocāpetvā etadavoca ito 1- bhonto yāvadatthaṃ bhuñjantu ceva
harantu cāti so tassa kammassa vipākena bahūni vassāni bahūni
vassasatāni bahūni vassasahassāni bahūni vassasatasahassāni niraye
pacitvā tasseva kammassa vipākāvasesena evarūpaṃ attabhāvapaṭilābhaṃ
paṭisaṃvedeti saccaṃ bhikkhave moggallāno āha anāpatti bhikkhave
moggallānassāti .pe. idhāhaṃ āvuso gijjhakūṭā pabbatā
orohanto addasaṃ nicchaviṃ itthiṃ vehāsaṃ gacchantiṃ tamenaṃ gijjhāpi
kaṅkāpi kulalāpi anupatitvā anupatitvā vitudenti vitacchenti virājenti
sāssudaṃ aṭṭassaraṃ karoti esā bhikkhave itthī imasmiṃyeva rājagahe
aticārinī ahosi .pe. saccaṃ bhikkhave moggallāno āha anāpatti
bhikkhave moggallānassāti.
{295.12} Idhāhaṃ āvuso gijjhakūṭā pabbatā orohanto addasaṃ itthiṃ
duggandhaṃ maṅguliṃ vehāsaṃ gacchantiṃ tamenaṃ gijjhāpi kaṅkāpi kulalāpi
anupatitvā anupatitvā vitudenti vitacchenti virājenti sāssudaṃ aṭṭassaraṃ
karoti .pe. Esā bhikkhave itthī imasmiṃyeva rājagahe ikkhaṇikā ahosi .pe.
Idhāhaṃ āvuso gijjhakūṭā pabbatā orohanto addasaṃ itthiṃ uppakkaṃ
okiliniṃ okiraṇiṃ vehāsaṃ gacchantiṃ sāssudaṃ aṭṭassaraṃ karoti .pe. Esā
@Footnote: 1 Yu. Ma. aho.
Bhikkhave itthī kāliṅgassa rañño aggamahesī ahosi 1- sā
issāpakatā sapattiṃ aṅgārakaṭāhena okiri .pe.
{295.13} Idhāhaṃ āvuso gijjhakūṭā pabbatā orohanto addasaṃ
asīsakabandhaṃ vehāsaṃ gacchantaṃ tassa ure akkhīni ceva honti mukhañca tamenaṃ
gijjhāpi kaṅkāpi kulalāpi anupatitvā anupatitvā vitudenti vitacchenti
virājenti svāssudaṃ aṭṭassaraṃ karoti .pe. Eso bhikkhave satto imasmiṃyeva
rājagahe dāmariko 2- nāma coraghātako ahosi .pe.
{295.14} Idhāhaṃ āvuso gijjhakūṭā pabbatā orohanto addasaṃ
bhikkhuṃ vehāsaṃ gacchantaṃ tassa saṅghāṭipi ādittā sampajjalitā sañjotibhūtā 3-
pattopi āditto sampajjalito sañjotibhūto 4- kāyabandhanaṃpi ādittaṃ
sampajjalitaṃ sañjotibhūtaṃ 5- kāyopi āditto sampajjalito sañjotibhūto
svāssudaṃ aṭṭassaraṃ karoti .pe. eso bhikkhave bhikkhu kassapassa
sammāsambuddhassa pāvacane pāpabhikkhu ahosi .pe.
{295.15} Idhāhaṃ āvuso gijjhakūṭā pabbatā orohanto
addasaṃ bhikkhuniṃ .pe. addasaṃ sikkhamānaṃ addasaṃ sāmaṇeraṃ addasaṃ
sāmaṇeriṃ vehāsaṃ gacchantiṃ tassā saṅghāṭipi ādittā
sampajjalitā sañjotibhūtā pattopi āditto sampajjalito
sañjotibhūto kāyabandhanaṃpi ādittaṃ sampajjalitaṃ sañjotibhūtaṃ kāyopi
@Footnote: 1 Yu. Ma. potthakesu ayaṃ pāṭho natthi. 2 Yu. Ma. hāriko.
@3-4-5 yamidha sañjotibhūtā sañjotibhūto sañjotibhūtanti likhiyati
@taṃ katthaci sajjotibhūtā sajjotibhūto sajjotibhūtanti.
Āditto sampajjalito sañjotibhūto sāssudaṃ aṭṭassaraṃ karoti
tassa mayhaṃ āvuso etadahosi acchariyaṃ vata bho abbhūtaṃ vata bho
evarūpopi nāma satto bhavissati evarūpopi nāma yakkho bhavissati
evarūpopi nāma peto bhavissati evarūpopi nāma attabhāvapaṭilābho
bhavissatīti . bhikkhū ujjhāyanti khīyanti vipācenti uttarimanussadhammaṃ
āyasmā mahāmoggallāno ullapatīti.
{295.16} Athakho bhagavā bhikkhū āmantesi cakkhubhūtā vata bhikkhave
sāvakā viharanti ñāṇabhūtā vata bhikkhave sāvakā viharanti yatra hi nāma
sāvako evarūpaṃ ñassati vā dakkhati vā sakkhiṃ vā karissati pubbe va me
sā bhikkhave sāmaṇerī diṭṭhā ahosi apicāhaṃ na byākāsiṃ ahañcetaṃ
byākareyyaṃ pare ca me na saddaheyyuṃ ye me na saddaheyyuṃ tesantaṃ
assa dīgharattaṃ ahitāya dukkhāya esā bhikkhave sāmaṇerī kassapassa
sammāsambuddhassa pāvacane pāpasāmaṇerī ahosi sā tassa kammassa
vipākena bahūni vassāni bahūni vassasatāni bahūni vassasahassāni bahūni
vassasatasahassāni niraye pacitvā tasseva kammassa vipākāvasesena
evarūpaṃ attabhāvapaṭilābhaṃ paṭisaṃvedeti saccaṃ bhikkhave moggallāno
āha anāpatti bhikkhave moggallānassāti.
The Pali Tipitaka in Roman Character Volume 1 page 210-217.
http://84000.org/tipitaka/read/roman_item_s.php?book=1&item=295&items=1
Classified by [Item Number] :-
http://84000.org/tipitaka/read/roman_item_s.php?book=1&item=295&items=1&mode=bracket
Compare with The Pali Tipitaka in Thai Character :-
http://84000.org/tipitaka/read/pali_item_s.php?book=1&item=295&items=1
Compare with The Royal Version of Thai Tipitaka :-
http://84000.org/tipitaka/read/byitem_s.php?book=1&item=295&items=1
Study Atthakatha :-
http://84000.org/tipitaka/attha/attha.php?b=1&i=295
The Pali Atthakatha in Thai :-
http://84000.org/tipitaka/atthapali/read_th.php?B=1&A=12893
The Pali Atthakatha in Roman :-
http://84000.org/tipitaka/atthapali/read_rm.php?B=1&A=12893
Contents of The Tipitaka Volume 1
http://84000.org/tipitaka/read/?index_1
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
