[415] Tena kho pana samayena aññatarā itthī kammaṃ karoti.
Aññataro bhikkhu sāratto taṃ itthiṃ etadavoca tiṭṭha bhagini ahaṃ
karissāmīti . sā na paṭivijānāti . tassa kukkuccaṃ ahosi .pe.
Anāpatti bhikkhu saṅghādisesassa āpatti dukkaṭassāti.
{415.1} Tena kho pana samayena aññatarā itthī kammaṃ karoti.
Aññataro bhikkhu sāratto taṃ itthiṃ etadavoca nisīda bhagini ahaṃ karissāmīti.
Sā na paṭivijānāti . tassa kukkuccaṃ ahosi .pe. anāpatti bhikkhu
saṅghādisesassa āpatti dukkaṭassāti.
{415.2} Tena kho pana samayena aññatarā itthī kammaṃ karoti. Aññataro bhikkhu
Sāratto taṃ itthiṃ etadavoca nipajja bhagini ahaṃ karissāmīti . Sā na
paṭivijānāti . tassa kukkuccaṃ ahosi .pe. anāpatti bhikkhu
saṅghādisesassa āpatti dukkaṭassāti.
Tatiyasaṅghādisesaṃ niṭṭhitaṃ.
Catutthasaṅghādisesaṃ
[416] Tena samayena buddho bhagavā sāvatthiyaṃ viharati jetavane
anāthapiṇḍikassa ārāme . tena kho pana samayena āyasmā udāyi
sāvatthiyaṃ kulūpako hoti bahukāni kulāni upasaṅkamati . tena kho
pana samayena aññatarā itthī matapatikā abhirūpā hoti dassanīyā
pāsādikā . athakho āyasmā udāyi pubbaṇhasamayaṃ nivāsetvā
pattacīvaramādāya yena tassā itthiyā nivesanaṃ tenupasaṅkami
upasaṅkamitvā paññatte āsane nisīdi . athakho sā itthī yenāyasmā
udāyi tenupasaṅkami upasaṅkamitvā āyasmantaṃ udāyiṃ abhivādetvā
ekamantaṃ nisīdi.
{416.1} Ekamantaṃ nisinnaṃ kho taṃ itthiṃ āyasmā udāyi
dhammiyā kathāya sandassesi samādapesi samuttejesi sampahaṃsesi .
Athakho sā itthī āyasmatā udāyinā dhammiyā kathāya sandassitā
samādapitā samuttejitā sampahaṃsitā āyasmantaṃ udāyiṃ etadavoca
vadeyyātha bhante yena attho paṭibalā mayaṃ ayyassa dātuṃ yadidaṃ
cīvarapiṇḍapātasenāsanagilānapaccayabhesajjaparikkhāranti 1-.
{416.2} Na kho te bhagini amhākaṃ dullabhā yadidaṃ cīvarapiṇḍapāta-
senāsanagilānapaccayabhesajjaparikkhārā apica kho 2- yo amhākaṃ
dullabho taṃ amhākaṃ dehīti . kiṃ bhanteti . methunadhammanti .
@Footnote: 1 Yu. parikkhārānanti. 2 Yu. Ma. potthakesu ayaṃ pāṭho natthi.
Attho bhanteti . attho bhaginīti . ehi bhanteti ovarakaṃ
pavisitvā sāṭakaṃ nikkhipitvā mañcake uttānā nipajji . athakho
āyasmā udāyi yena sā itthī tenupasaṅkami upasaṅkamitvā
ko imaṃ vasalaṃ duggandhaṃ āmasissatīti nuṭṭhuhitvā pakkāmi.
{416.3} Athakho sā itthī ujjhāyati khīyati vipāceti alajjino
ime samaṇā sakyaputtiyā dussīlā musāvādino ime hi nāma samacārino
dhammacārino brahmacārino saccavādino sīlavanto kalyāṇadhammā
paṭijānissanti natthi imesaṃ sāmaññaṃ natthi imesaṃ brahmaññaṃ
naṭṭhaṃ imesaṃ sāmaññaṃ naṭṭhaṃ imesaṃ brahmaññaṃ kuto imesaṃ
sāmaññaṃ kuto imesaṃ brahmaññaṃ apagatā ime sāmaññā
apagatā ime brahmaññā kathaṃ hi nāma samaṇo udāyi maṃ
sāmaṃ methunadhammaṃ yācitvā ko imaṃ vasalaṃ duggandhaṃ āmasissatīti
nuṭṭhuhitvā pakkamissati kiṃ me pāpakaṃ kiṃ me duggandhaṃ kissāhaṃ
kena hāyāmīti.
{416.4} Aññāpi itthiyo ujjhāyanti khīyanti vipācenti
alajjino ime samaṇā sakyaputtiyā dussīlā musāvādino ime hi
nāma samacārino brahmacārino saccavādino sīlavanto kalyāṇadhammā
paṭijānissanti natthi imesaṃ sāmaññaṃ natthi imesaṃ brahmaññaṃ
naṭṭhaṃ imesaṃ sāmaññaṃ naṭṭhaṃ imesaṃ brahmaññaṃ kuto imesaṃ
sāmaññaṃ kuto imesaṃ brahmaññaṃ apagatā ime sāmaññā apagatā
ime brahmaññā kathaṃ hi nāma samaṇo udāyi imissā sāmaṃ
Methunadhammaṃ yācitvā ko imaṃ vasalaṃ duggandhaṃ āmasissatīti nuṭṭhuhitvā
pakkamissati kiṃ imissā pāpakaṃ kiṃ imissā duggandhaṃ kissāyaṃ
kena hāyatīti . assosuṃ kho bhikkhū tāsaṃ itthīnaṃ ujjhāyantīnaṃ
khīyantīnaṃ vipācentīnaṃ . ye te bhikkhū appicchā santuṭṭhā lajjino
kukkuccakā sikkhākāmā te ujjhāyanti khīyanti vipācenti kathaṃ
hi nāma āyasmā udāyi mātugāmassa santike attakāmapāricariyāya
vaṇṇaṃ bhāsissatīti.
{416.5} Athakho te bhikkhū bhagavato etamatthaṃ ārocesuṃ. Athakho
bhagavā etasmiṃ nidāne etasmiṃ pakaraṇe bhikkhusaṅghaṃ sannipātāpetvā
āyasmantaṃ udāyiṃ paṭipucchi saccaṃ kira tvaṃ udāyi mātugāmassa santike
attakāmapāricariyāya vaṇṇaṃ bhāsasīti . saccaṃ bhagavāti . vigarahi buddho
bhagavā ananucchavikaṃ moghapurisa ananulomikaṃ appaṭirūpaṃ assāmaṇakaṃ
akappiyaṃ akaraṇīyaṃ kathaṃ hi nāma tvaṃ moghapurisa mātugāmassa santike
attakāmapāricariyāya vaṇṇaṃ bhāsissasi nanu mayā moghapurisa anekapariyāyena
virāgāya dhammo desito no sarāgāya .pe. kāmapariḷāhānaṃ vūpasamo
akkhāto netaṃ moghapurisa appasannānaṃ vā pasādāya .pe. evañca
pana bhikkhave imaṃ sikkhāpadaṃ uddiseyyātha
{416.6} yo pana bhikkhu otiṇṇo vipariṇatena cittena mātugāmassa
santike attakāmapāricariyāya vaṇṇaṃ bhāseyya etadaggaṃ
bhagini pāricariyānaṃ yā mādisaṃ sīlavantaṃ kalyāṇadhammaṃ brahmacāriṃ
etena dhammena paricareyyāti methunūpasañhitena saṅghādisesoti.
[417] Yo panāti yo yādiso .pe. bhikkhūti .pe. ayaṃ
imasmiṃ atthe adhippeto bhikkhūti . otiṇṇo nāma sāratto
apekkhavā paṭibaddhacitto . vipariṇatanti rattaṃpi cittaṃ vipariṇataṃ
duṭṭhaṃpi cittaṃ vipariṇataṃ mūḷhaṃpi cittaṃ vipariṇataṃ apica rattaṃ cittaṃ
imasmiṃ atthe adhippetaṃ vipariṇatanti . mātugāmo nāma manussitthī
na yakkhī na petī na tiracchānagatā viññū paṭibalā subhāsitadubbhāsitaṃ
duṭṭhullāduṭṭhullaṃ ājānituṃ . mātugāmassa santiketi mātugāmassa
sāmantā mātugāmassa avidūre . attakāmanti attano kāmaṃ attano
hetuṃ attano adhippāyaṃ attano pāricariyaṃ.
{417.1} Etadagganti etaṃ aggaṃ etaṃ seṭṭhaṃ etaṃ mokkhaṃ etaṃ
uttamaṃ etaṃ pavaraṃ . yāti khattiyā 1- vā brāhmaṇī vā vesī vā
suddī vā . mādisanti khattiyaṃ vā brāhmaṇaṃ vā vesaṃ vā suddaṃ vā.
Sīlavantanti pāṇātipātā paṭivirataṃ adinnādānā paṭivirataṃ musāvādā
paṭivirataṃ . brahmacārinti methunadhammā paṭivirataṃ . kalyāṇadhammo
nāma tena ca sīlena tena ca brahmacariyena kalyāṇadhammo hoti .
Etena dhammenāti methunadhammena . paricareyyāti abhirameyya .
Methunūpasañhitenāti methunadhammapaṭisaṃyuttena . saṅghādisesoti
.pe. Tenapi vuccati saṅghādisesoti.
[418] Itthī ca hoti itthīsaññī sāratto ca bhikkhu ca naṃ
itthiyā santike attakāmapāricariyāya vaṇṇaṃ bhāsati āpatti
@Footnote: 1 Yu. Ma. khattiyī.
Saṅghādisesassa . itthī ca hoti vematiko paṇḍakasaññī purisasaññī
tiracchānagatasaññī sāratto ca bhikkhu ca naṃ itthiyā santike
attakāmapāricariyāya vaṇṇaṃ bhāsati āpatti thullaccayassa.
{418.1} Paṇḍako ca hoti paṇḍakasaññī sāratto ca bhikkhu ca naṃ
paṇḍakassa santike attakāmapāricariyāya vaṇṇaṃ bhāsati āpatti
thullaccayassa . paṇḍako ca hoti vematiko purisasaññī tiracchānagatasaññī
itthīsaññī sāratto ca bhikkhu ca naṃ paṇḍakassa santike attakāmapāricariyāya
vaṇṇaṃ bhāsati āpatti dukkaṭassa.
{418.2} Puriso ca hoti purisasaññī vematiko tiracchānagatasaññī
itthīsaññī paṇḍakasaññī sāratto ca bhikkhu ca naṃ purisassa santike
attakāmapāricariyāya vaṇṇaṃ bhāsati āpatti dukkaṭassa.
{418.3} Tiracchānagato ca hoti tiracchānagatasaññī vematiko
itthīsaññī paṇḍakasaññī purisasaññī sāratto ca bhikkhu ca naṃ
tiracchānagatassa santike attakāmapāricariyāya vaṇṇaṃ bhāsati
āpatti dukkaṭassa.
[419] Dve itthiyo dvinnaṃ itthīnaṃ itthīsaññī sāratto ca
bhikkhu ca naṃ dvinnaṃ itthīnaṃ santike attakāmapāricariyāya vaṇṇaṃ
bhāsati āpatti dvinnaṃ saṅghādisesānaṃ . dve itthiyo dvinnaṃ
itthīnaṃ vematiko paṇḍakasaññī purisasaññī tiracchānagatasaññī
sāratto ca bhikkhu ca naṃ dvinnaṃ itthīnaṃ santike attakāmapāricariyāya
vaṇṇaṃ bhāsati āpatti dvinnaṃ thullaccayānaṃ . dve paṇḍakā
Dvinnaṃ paṇḍakānaṃ paṇḍakasaññī sāratto ca bhikkhu ca naṃ dvinnaṃ
paṇḍakānaṃ santike attakāmapāricariyāya vaṇṇaṃ bhāsati āpatti
dvinnaṃ thullaccayānaṃ.
{419.1} Dve paṇḍakā dvinnaṃ paṇḍakānaṃ vematiko purisasaññī
tiracchānagatasaññī itthīsaññī sāratto ca bhikkhu ca naṃ dvinnaṃ paṇḍakānaṃ
santike attakāmapāricariyāya vaṇṇaṃ bhāsati āpatti dvinnaṃ dukkaṭānaṃ.
{419.2} Dve purisā dvinnaṃ purisānaṃ .pe. Dve tiracchānagatā dvinnaṃ
tiracchānagatānaṃ tiracchānagatasaññī vematiko itthīsaññī paṇḍakasaññī
purisasaññī sāratto ca bhikkhu ca naṃ dvinnaṃ tiracchānagatānaṃ santike
attakāmapāricariyāya vaṇṇaṃ bhāsati āpatti dvinnaṃ dukkaṭānaṃ.
{419.3} Itthī ca paṇḍako ca ubhinnaṃ itthīsaññī sāratto ca
bhikkhu ca naṃ ubhinnaṃ santike attakāmapāricariyāya vaṇṇaṃ bhāsati
āpatti saṅghādisesena dukkaṭassa . itthī ca paṇḍako ca ubhinnaṃ
vematiko .pe. āpatti thullaccayena dukkaṭassa .pe. paṇḍakasaññī
.pe. āpatti dvinnaṃ thullaccayānaṃ .pe. Purisasaññī .pe. Tiracchānagata-
saññī sāratto ca bhikkhu ca naṃ ubhinnaṃ santike attakāmapāricariyāya
vaṇṇaṃ bhāsati āpatti thullaccayena dukkaṭassa.
{419.4} Itthī ca puriso ca ubhinnaṃ itthīsaññī sāratto
ca bhikkhu ca naṃ ubhinnaṃ santike attakāmapāricariyāya vaṇṇaṃ
bhāsati āpatti saṅghādisesena dukkaṭassa . itthī ca puriso ca
ubhinnaṃ vematiko paṇḍakasaññī purisasaññī tiracchānagatasaññī
Sāratto ca bhikkhu ca naṃ ubhinnaṃ santike attakāmapāricariyāya
vaṇṇaṃ bhāsati āpatti thullaccayena dukkaṭassa.
{419.5} Itthī ca tiracchānagato ca ubhinnaṃ itthīsaññī sāratto
ca bhikkhu ca naṃ ubhinnaṃ santike attakāmapāricariyāya vaṇṇaṃ bhāsati
āpatti saṅghādisesena dukkaṭassa . itthī ca tiracchānagato ca ubhinnaṃ
vematiko paṇḍakasaññī purisasaññī tiracchānagatasaññī sāratto ca
bhikkhu ca naṃ ubhinnaṃ santike attakāmapāricariyāya vaṇṇaṃ bhāsati āpatti
thullaccayena dukkaṭassa.
{419.6} Paṇḍako ca puriso ca ubhinnaṃ paṇḍakasaññī sāratto ca
bhikkhu ca naṃ ubhinnaṃ santike attakāmapāricariyāya vaṇṇaṃ bhāsati āpatti
thullaccayena dukkaṭassa . paṇḍako ca puriso ca ubhinnaṃ vematiko purisasaññī
tiracchānagatasaññī sāratto ca bhikkhu ca naṃ ubhinnaṃ santike attakāma-
pāricariyāya vaṇṇaṃ bhāsati āpatti dvinnaṃ dukkaṭānaṃ.
{419.7} Paṇḍako ca tiracchānagato ca ubhinnaṃ paṇḍakasaññī
sāratto ca bhikkhu ca naṃ ubhinnaṃ santike attakāmapāricariyāya vaṇṇaṃ
bhāsati āpatti thullaccayena dukkaṭassa . paṇḍako ca tiracchānagato
ca ubhinnaṃ vematiko purisasaññī tiracchānagatasaññī itthīsaññī sāratto
ca bhikkhu ca naṃ ubhinnaṃ santike attakāmapāricariyāya vaṇṇaṃ bhāsati
āpatti dvinnaṃ dukkaṭānaṃ.
{419.8} Puriso ca tiracchānagato ca ubhinnaṃ purisasaññī
vematiko tiracchānagatasaññī itthīsaññī paṇḍakasaññī
sāratto ca bhikkhu ca naṃ ubhinnaṃ santike
Attakāmapāricariyāya vaṇṇaṃ bhāsati āpatti dvinnaṃ dukkaṭānaṃ.
[420] Anāpatti cīvarapiṇḍapātasenāsanagilānapaccayabhesajjaparikkhārena
upaṭṭhahāti bhaṇati ummattakassa ādikammikassāti.
[421] Kathaṃ vañjhā labhe puttaṃ piyā ca subhagā siyaṃ
kiṃ dajjaṃ kenupaṭṭheyyaṃ kathaṃ gaccheyya suggatinti.
[422] Tena kho pana samayena aññatarā vañjhā itthī kulūpakaṃ
bhikkhuṃ etadavoca kathāhaṃ bhante vijāyeyyanti . tenahi bhagini aggadānaṃ
dehīti . kiṃ bhante aggadānanti . methunadhammanti . tassa kukkuccaṃ
ahosi .pe. bhagavato etamatthaṃ ārocesi . āpattiṃ tvaṃ
bhikkhu āpanno saṅghādisesanti.
{422.1} Tena kho pana samayena aññatarā vijāyinī itthī kulūpakaṃ
bhikkhuṃ etadavoca kathāhaṃ bhante puttaṃ na 1- labheyyanti . tenahi
bhagini aggadānaṃ dehīti . kiṃ bhante aggadānanti . methunadhammanti.
Tassa kukkuccaṃ ahosi .pe. Āpattiṃ tvaṃ bhikkhu āpanno saṅghādisesanti.
{422.2} Tena kho pana samayena aññatarā itthī kulūpakaṃ bhikkhuṃ
etadavoca kathāhaṃ bhante sāmikassa piyā assanti . tenahi bhagini
aggadānaṃ dehīti . kiṃ bhante aggadānanti . methunadhammanti . Tassa
kukkuccaṃ ahosi .pe. Āpattiṃ tvaṃ bhikkhu āpanno saṅghādisesanti.
{422.3} Tena kho pana samayena aññatarā itthī kulūpakaṃ
bhikkhuṃ etadavoca kathāhaṃ bhante subhagā assanti .
@Footnote: 1 Yu. Ma. potthakesu ayaṃ pāṭho na hoti.
Tenahi bhagini aggadānaṃ dehīti. Kiṃ bhante aggadānanti. Methunadhammanti.
Tassa kukkuccaṃ ahosi .pe. Āpattiṃ tvaṃ bhikkhu āpanno saṅghādisesanti.
{422.4} Tena kho pana samayena aññatarā itthī kulūpakaṃ bhikkhuṃ etadavoca
kyāhaṃ bhante ayyassa dajjāmīti. Aggadānaṃ bhaginīti. Kiṃ bhante aggadānanti.
Methunadhammanti . tassa kukkuccaṃ ahosi .pe. Āpattiṃ tvaṃ bhikkhu āpanno
saṅghādisesanti.
{422.5} Tena kho pana samayena aññatarā itthī kulūpakaṃ bhikkhuṃ etadavoca
kenāhaṃ bhante ayyaṃ upaṭṭhāmīti 1- . Aggadānena bhaginīti. Kiṃ bhante
aggadānanti . methunadhammanti . tassa kukkuccaṃ ahosi .pe. Āpattiṃ tvaṃ
bhikkhu āpanno saṅghādisesanti.
{422.6} Tena kho pana samayena aññatarā itthī kulūpakaṃ bhikkhuṃ etadavoca
kathāhaṃ bhante sugatiṃ gaccheyyanti . tenahi bhagini aggadānaṃ dehīti.
Kiṃ bhante aggadānanti . methunadhammanti . tassa kukkuccaṃ ahosi kacci
nu kho ahaṃ saṅghādisesaṃ āpattiṃ āpannoti . bhagavato etamatthaṃ
ārocesi. Āpattiṃ tvaṃ bhikkhu āpanno saṅghādisesanti.
Catutthasaṅghādisesaṃ niṭṭhitaṃ.
-----------
@Footnote: 1 Yu. Ma. upaṭṭhemīti.
Pañcamasaṅghādisesaṃ
[423] Tena samayena buddho bhagavā sāvatthiyaṃ viharati jetavane
anāthapiṇḍikassa ārāme . tena kho pana samayena āyasmā
udāyi sāvatthiyaṃ kulūpako hoti bahukāni kulāni upasaṅkamati yattha
passati kumārakaṃ vā apajāpatikaṃ kumārikaṃ vā apatikaṃ kumārakassa
mātāpitūnaṃ santike kumārikāya vaṇṇaṃ bhaṇati amukassa kulassa
kumārikā abhirūpā dassanīyā pāsādikā paṇḍitā byattā medhāvinī
dakkhā analasā channā sā kumārikā imassa kumārakassāti.
{423.1} Te evaṃ vadenti 1- ete kho bhante amhe na jānanti ke vā
ime kassa vāti sace bhante ayyo dāpeyya āneyyāma 2- mayaṃ
taṃ kumārikaṃ imassa kumārakassāti . kumārikāya mātāpitūnaṃ santike
kumārakassa vaṇṇaṃ bhaṇati amukassa kulassa kumārako abhirūpo
dassanīyo pāsādiko paṇḍito byatto medhāvī dakkho analaso
channo so kumārako imissā kumārikāyāti 3- . te evaṃ vadenti
ete kho bhante amhe na jānanti ke vā ime kassa vāti kasmiṃ
viya kumārikāya vatthuṃ sace bhante ayyo yācāpeyya dajjeyyāma mayaṃ
imaṃ kumārikaṃ tassa kumārakassāti . eteneva upāyena āvāhānipi
@Footnote: 1 Yu. Ma. vadanti. 2 Yu. Ma. ānema. 3 Yu. Ma. channāyaṃ
@kumārikā tassa kumārakassāti.
Kārāpeti vivāhānipi kārāpeti vāreyyānipi vattāpeti.
[424] Tena kho pana samayena aññatarissā purāṇagaṇakiyā
dhītā abhirūpā hoti dassanīyā pāsādikā . tīrogāmakā ca
ājīvakasāvakā āgantvā taṃ gaṇakiṃ etadavocuṃ dehayye imaṃ
kumārikaṃ amhākaṃ kumārakassāti . sā evamāha ahaṃ khvayyā
tumhe na jānāmi ke vā ime kassa vāti ayañca me ekadhītikā
tīrogāmo ca gantabbo nāhaṃ dassāmīti . manussā te ājīvakasāvake
etadavocuṃ kissa tumhe ayyā āgatatthāti . idha mayaṃ ayyā
amukaṃ nāma gaṇakiṃ dhītaraṃ yācimhā amhākaṃ kumārakassa sā evamāha
ahaṃ khvayyā tumhe na jānāmi ke vā ime kassa vāti ayañca
me ekadhītikā tīrogāmo ca gantabbo nāhaṃ dassāmīti . kissa
tumhe ayyā taṃ gaṇakiṃ dhītaraṃ yācittha nanu ayyo udāyi
vattabbo ayyo udāyi dāpessatīti.
{424.1} Athakho te ājīvakasāvakā yenāyasmā udāyi tenupasaṅkamiṃsu
upasaṅkamitvā āyasmantaṃ udāyiṃ etadavocuṃ idha mayaṃ bhante amukaṃ nāma
gaṇakiṃ dhītaraṃ yācimhā amhākaṃ kumārakassa sā evamāha ahaṃ khvayyā
tumhe na jānāmi ke vā ime kassa vāti ayañca me ekadhītikā tīrogāmo
ca gantabbo nāhaṃ dassāmīti sādhu bhante ayyo taṃ gaṇakiṃ dhītaraṃ dāpetu
amhākaṃ kumārakassāti . athakho āyasmā udāyi yena sā gaṇakī
tenupasaṅkami upasaṅkamitvā taṃ gaṇakiṃ etadavoca kissa imesaṃ dhītaraṃ
Na desīti . ahaṃ khvayya ime na jānāmi ke vā ime kassa vāti
ayañca me ekadhītikā tīrogāmo ca gantabbo nāhaṃ dassāmīti .
Dehi imesaṃ ahaṃ ime jānāmīti . sace bhante ayyo jānāti
dassāmīti . athakho sā gaṇakiṃ tesaṃ ājīvakasāvakānaṃ dhītaraṃ adāsi.
Athakho te ājīvakasāvakā taṃ kumārikaṃ netvā māsaṃyeva suṇisābhogena
bhuñjiṃsu tato aparena dāsībhogena bhuñjanti.
[425] Athakho sā kumārikā mātuyā santike dūtaṃ pāhesi
ahaṃ hi duggatā dukkhitā na sukhaṃ labhāmi māsaṃyeva maṃ suṇisābhogena
bhuñjiṃsu tato aparena dāsībhogena bhuñjanti āgacchatu me mātā
maṃ 1- nessatūti . athakho sā gaṇakī yena te ājīvakasāvakā
tenupasaṅkami upasaṅkamitvā te ājīvakasāvake etadavoca mā ayyā
imaṃ kumārikaṃ dāsībhogena bhuñjittha suṇisābhogena imaṃ kumārikaṃ
bhuñjathāti . te evamāhaṃsu natthamhākaṃ tayā saddhiṃ āhārūpahāro
samaṇena saddhiṃ amhākaṃ āhārūpahāro gaccha tvaṃ na mayantaṃ
jānāmāti . athakho sā gaṇakī tehi ājīvakasāvakehi apasāditā
punadeva sāvatthiṃ paccāgañchi . dutiyampi kho sā kumārikā mātuyā
santike dūtaṃ pāhesi ahaṃ hi duggatā dukkhitā na sukhaṃ labhāmi
māsaṃyeva maṃ suṇisābhogena bhuñjiṃsu tato aparena dāsībhogena
bhuñjanti āgacchatu me mātā maṃ nessatūti . athakho sā gaṇakī
@Footnote: 1 Yu. Ma. potthakesu ayaṃ pāṭho na hoti.
Yenāyasmā udāyi tenupasaṅkami upasaṅkamitvā āyasmantaṃ udāyiṃ
etadavoca sā kira bhante kumārikā duggatā dukkhitā na sukhaṃ
labhati māsaṃyeva naṃ suṇisābhogena bhuñjiṃsu tato aparena dāsībhogena
bhuñjanti vadeyyātha bhante mā ayyā imaṃ kumārikaṃ dāsībhogena
bhuñjittha suṇisābhogena imaṃ kumārikaṃ bhuñjathāti.
{425.1} Athakho āyasmā udāyi yena te ājīvakasāvakā tenupasaṅkami
upasaṅkamitvā te ājīvakasāvake etadavoca mā ayyā imaṃ kumārikaṃ
dāsībhogena bhuñjittha suṇisābhogena imaṃ kumārikaṃ bhuñjathāti . te
evamāhaṃsu natthamhākaṃ tayā saddhiṃ āhārūpahāro gaṇakiyā saddhiṃ
amhākaṃ āhārūpahāro samaṇena bhavitabbaṃ abyāvaṭena samaṇo
assa sussamaṇo gaccha tvaṃ na mayantaṃ jānāmāti.
{425.2} Athakho āyasmā udāyi tehi ājīvakasāvakehi apasādito
punadeva sāvatthiṃ paccāgañchi . Tatiyampi kho sā kumārikā mātuyā santike
dūtaṃ pāhesi ahaṃ hi duggatā dukkhitā na sukhaṃ labhāmi māsaṃyeva maṃ suṇisābhogena
bhuñjiṃsu tato aparena dāsībhogena bhuñjanti āgacchatu me mātā maṃ
nessatūti . dutiyampi kho sā gaṇakī yenāyasmā udāyi tenupasaṅkami
upasaṅkamitvā āyasmantaṃ udāyiṃ etadavoca sā kira bhante kumārikā
duggatā dukkhitā na sukhaṃ labhati māsaṃyeva naṃ suṇisābhogena
bhuñjiṃsu tato aparena dāsībhogena bhuñjanti vadeyyātha
bhante mā ayyā imaṃ kumārikaṃ dāsībhogena bhuñjittha suṇisābhogena
Imaṃ kumārikaṃ bhuñjathāti . paṭhamaṃ cāhaṃ tehi ājīvakasāvakehi
apasādito gaccha tvaṃ nāhaṃ gamissāmīti.
The Pali Tipitaka in Roman Character Volume 1 page 284-299.
http://84000.org/tipitaka/read/roman_item_s.php?book=1&item=415&items=11
Classified by [Item Number] :-
http://84000.org/tipitaka/read/roman_item_s.php?book=1&item=415&items=11&mode=bracket
Compare with The Pali Tipitaka in Thai Character :-
http://84000.org/tipitaka/read/pali_item_s.php?book=1&item=413&items=11
Compare with The Royal Version of Thai Tipitaka :-
http://84000.org/tipitaka/read/byitem_s.php?book=1&item=413&items=11
Study Atthakatha :-
http://84000.org/tipitaka/attha/attha.php?b=1&i=413
The Pali Atthakatha in Thai :-
http://84000.org/tipitaka/atthapali/read_th.php?B=2&A=910
The Pali Atthakatha in Roman :-
http://84000.org/tipitaka/atthapali/read_rm.php?B=2&A=910
Contents of The Tipitaka Volume 1
http://84000.org/tipitaka/read/?index_1
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
