[81] |81.892| 7 Puṇṇamāye 1- yathā cando nakkhattaparivārito
samantā anupariyāti tārakādhipati sasī
|81.893| tathūpamaṃ idaṃ byamhaṃ dibbaṃ devapuramhi ca
atirocati vaṇṇena udayantova raṃsimā
|81.894| veḷuriyasuvaṇṇassa phalikārūpiyassa ca
masāragallamuttāhi lohitaṅgamaṇīhi ca
|81.895| citrā manoramā bhūmi veḷuriyassa santhatā 2-
@Footnote: 1 Po. puṇṇamāyo. Ma. puṇṇamāse . 2 Po. Yu. santhitā.
Kūṭāgārā subhā rammā pāsādo te sumāpito
|81.896| rammā ca te pokkharaṇī puthulā macchasevitā 1-
acchodakā vippasannā sovaṇṇavālukasanthatā
|81.897| nānāpadumasañchannā puṇḍarīkasamogatā
surabhi sampavāyanti manuññā māluteritā
|81.898| tassā te ubhato passe vanagumbā sumāpitā
upetā puppharukkhehi phalarukkhehi cūbhayaṃ
|81.899| sovaṇṇapāde pallaṅke muduke goṇasanthate
nisinnaṃ devarājaṃva upatiṭṭhanti accharā
|81.900| sabbābharaṇasañchannā nānāmālāvibhūsitā
ramenti taṃ mahiddhikaṃ vasavattīva modasi
|81.901| bherisaṅkhamudiṅgāhi vīṇāhi paṇavehi ca
ramasi ratisampanno naccagītesu vādite
|81.902| dibbā te vividhā rūpā dibbā saddā atho rasā
gandhā ca te adhippetā phoṭṭhabbā ca manoramā
|81.903| tasmiṃ vimāne pavare devaputtā mahappabhā
abhirocasi vaṇṇena udayantova bhāṇumā
|81.904| dānassa te idaṃ phalaṃ atho sīlassa vā pana
atho añjalikammassa taṃ me akkhāhi pucchitoti.
@Footnote: 1 Yu. puthulomanisevitātipi dissati.
|81.905| So devaputto attamano moggallānena pucchito
... Pe ... yassa kammassidaṃ phalaṃ
|81.906| ahaṃ kapilavatthusmiṃ sākiyānaṃ puruttame
suddhodanassa puttassa kaṇṭhako sahajo ahuṃ
|81.907| yadā so aḍḍharattāyaṃ sambodhāya abhinikkhami
so maṃ mudūhi pāṇīhi jālitambanakhehi ca
|81.908| saṭṭhiṃ ākoṭayitvāna vaha sammātimabravi
ahaṃ lokaṃ tārayissaṃ patto sambodhimuttamaṃ
|81.909| taṃ me giraṃ suṇantassa hāso me vipulo ahu
udaggacitto sumano abhisiṃsiṃ tadā ahaṃ
|81.910| abhirūḷhañca maṃ ñatvā sākyaputtaṃ mahāyasaṃ
udaggacitto mudito vāhissaṃ purisuttamaṃ
|81.911| paresaṃ vijitaṃ gantvā uggatasmiṃ divaṅkare 1-
mamaṃ channañca ohāya anāpekkho apakkami
|81.912| tassa tambanakhe pāde jivhāya parilehisaṃ 2-
gacchantañca mahāvīraṃ rudamāno udikkhissaṃ
|81.913| adassanenahaṃ tassa sākyaputtassa sirīmato
alatthaṃ garukābādhaṃ khippaṃ me maraṇaṃ ahu
|81.914| tasseva ānubhāvena vimānaṃ āvasāmidaṃ 3-
@Footnote: 1 Po. Ma. Yu. divākare . 2 Po. Ma. parilehasiṃ . 3 Po. āvasamihaṃ. Ma. āvasāmahaṃ.
Sabbakāmaguṇūpetaṃ dibbaṃ devapuramhi ca
|81.915| yañca me ahu vāhāso saddaṃ sutvāna bodhiyā
teneva kusalamūlena phusissaṃ āsavakkhayaṃ
|81.916| sace hi bhante gaccheyyāsi satthu buddhassa santike
mamāpi taṃ vacanena sirasā vajjāsi vandanaṃ
|81.917| ahampi daṭṭhuṃ gacchissaṃ jinaṃ appaṭipuggalaṃ
dullabhaṃ dassanaṃ hoti lokanāthāna tādinanti.
|81.918| So ca kataññū katavedī satthāraṃ upasaṅkami
sutvā giraṃ cakkhumato dhammacakkhuṃ visodhayi
|81.919| visodhayitvā diṭṭhigataṃ vicikicchā vatāni ca
vanditvā satthuno pāde tatthevantaradhāyathāti.
Kaṇṭhakavimānaṃ sattamaṃ.
[82] |82.920| 8 Anekavaṇṇaṃ darasokanāsanaṃ
vimānamāruyha anekacittaṃ
parivārito accharānaṃ 1- gaṇena
sunimmito bhūtapatīva modasi
|82.921| samassamo 2- natthi kutopanuttaro
yasena puññena ca iddhiyā ca
sabbe ca devā tidasā gaṇā samecca
@Footnote: 1 Po. Yu. accharāsaṃ . 2 Yu. samāsamo.
Taṃ taṃ namassanti sasiṃva devā
imā ca te accharāyo samantato
naccanti gāyanti pamodayanti
|82.922| deviddhipattosi mahānubhāvo
manussabhūto kimakāsi puññaṃ
kenāsi evañjalitānubhāvo
vaṇṇo ca te sabbadisā pabhāsatīti.
|82.923| So devaputto attamano moggallānena pucchito
... Pe ... yassa kammassidaṃ phalaṃ
|82.924| sohaṃpi bhante 1- ahuvāsi pubbe
sumedhanāmassa jinassa sāvako
puthujjano anubodhohamasmi
so sattavassāni pabbajissahaṃ
|82.925| sohaṃ sumedhassa jinassa satthuno
parinibbutassoghotiṇṇassa tādino
ratanuccayaṃ hemajālena channaṃ
vanditvā thūpasmiṃ manaṃ pasādayiṃ
|82.926| na māsi dānaṃ na ca pana matthi dātuṃ
pare ca kho tattha samādapesiṃ
pūjetha naṃ pūjaneyyassa dhātuṃ
@Footnote: 1 Ma. ahaṃ bhadante.
Evaṃ kira saggamito gamissatha
|82.927| tadeva kammaṃ kusalaṃ kataṃ mayā
sukhañca [1]- dibbaṃ anubhomi attanā 2-
modāmahaṃ tidasagaṇassa majjhe
na tassa puññassa khayamhi ajjhagāti.
Anekavaṇṇavimānaṃ aṭṭhamaṃ.
[83] |83.928| 9 Alaṅkato maṭṭhakuṇḍalī
mālādhārī 3- haricandanussado
bāhā paggayha kandasi
vanamajjhe kiṃ dukkhito tuvanti.
|83.929| Sovaṇṇamayo pabhassaro
uppanno rathapañjaro mama
tassa cakkayugaṃ na vindāmi
tena dukkhena jahissāmi 4- jīvitanti.
|83.930| Sovaṇṇamayaṃ maṇimayaṃ
lohitaṅgamayaṃ 5- atha rūpiyamayaṃ
ācikkha me tuvaṃ bhaddamāṇava
cakkayugaṃ paṭilābhayāmi teti.
@Footnote: 1 Po. Yu. kammaṃ . 2 Po. Yu. ayaṃ pāṭho natthi . 3 dhammapadaṭṭhakathāya mālābhārīti
@pāṭho dissati . 4 Ma. jahāmi . 5 Ma. lohitakamayaṃ.
|83.931| So māṇavo tassa pāvadi
candimasuriyā 1- ubhayettha dissare
sovaṇṇamayo ratho mama
tena cakkayugena sobhatīti.
|83.932| Bālo kho tvamasi māṇava
yo [2]- tvaṃ patthayasi apatthiyaṃ
maññāmi tuvaṃ marissasi
na hi tuvaṃ lacchasi candimasuriyeti 3-.
|83.933| Gamanāgamanaṃpi dissati
vaṇṇadhātu ubhayattha vīthiyā
peto pana 4- kālakato na dissati
ko nīdha kandataṃ bālyataroti.
|83.934| Saccaṃ kho vadesi māṇava
ahameva kandataṃ bālyataro
candaṃ viya dārako rudaṃ
petaṃ kālakatābhipatthayanti
|83.935| ādittaṃ vata maṃ santaṃ ghatasittaṃva pāvakaṃ
vārinā viya osiñcaṃ sabbaṃ nibbāpaye daraṃ
@Footnote: 1 dhammapadaṭṭhakathāya candasūriyā ubhayattha bhātaroti dissati . 2 Yu. khosaddo atthi.
@3 Ma. candasūriye . 4 Ma. panasaddo na dissati.
|83.936| Abbūḷhaṃ 1- vata me sallaṃ sokaṃ hadayanissitaṃ
yo me sokaparetassa puttasokaṃ apānudi
|83.937| svāhaṃ abbūḷhasallosmi sītabhūtosmi 2- nibbuto
na socāmi na rodāmi tava sutvāna māṇavāti
|83.938| devatā nusi gandhabbo ādū sakko purindado
ko vā tvaṃ kassa vā putto kathaṃ jānemu taṃ mayanti.
|83.939| Yañca kandasi yañca rodasi
puttaṃ āḷāhane sayaṃ ḍahitvā
svāhaṃ kusalaṃ karitvāna kammaṃ
tidasānaṃ sahabyataṃ pattoti.
|83.940| Appaṃ vā bahuṃ vā na addasāmi
dānaṃ dadantassa sake agāre
uposathakammaṃ vā tādisaṃ
kena kammena gatosi devalokanti.
|83.941| Ābādhikohaṃ dukkhito gilāno
ātūrarūpomhi saka nivesane
buddhaṃ vigatarajaṃ vitiṇṇakaṅkhaṃ
addakkhiṃ sugataṃ anomapaññaṃ
|83.942| svāhaṃ muditamano pasannacitto
@Footnote: 1 dhammapadaṭṭhakathāya abbuhīti dissati. Ma. abbahī . 2 Yu. sīti ....
Añjaliṃ akariṃ tathāgatassa
tāhaṃ kusalaṃ karitvāna kammaṃ
tidasānaṃ sahabyataṃ pattoti 1-.
|83.943| Acchariyaṃ vata abbhūtaṃ vata
añjalīkammassa ayamīdiso vipāko
ahaṃpi muditamano pasannacitto
ajjeva buddhaṃ saraṇaṃ vajāmīti.
|83.944| Ajjeva buddhaṃ saraṇaṃ vajāhi
dhammañca saṅghañca pasannacitto
tatheva sikkhāya padāni pañca
akhaṇḍaphullāni samādiyassu
|83.945| pāṇātipātā viramassu khippaṃ
loke adinnaṃ parivajjayassu
amajjapo no ca musā bhaṇāhi
sakena dārena na hohi tuṭṭhoti.
|83.946| Atthakāmosi me yakkha hitakāmosi devate
karomi tuyhaṃ vacanaṃ tvamasi ācariyo mama
|83.947| upemi saraṇaṃ buddhaṃ dhammañcāpi anuttaraṃ
saṅghañca naradevassa gacchāmi saraṇaṃ ahaṃ
|83.948| pāṇātipātā viramāmi khippaṃ
@Footnote: 1 Ma. gatoti.
Loke adinnaṃ parivajjayāmi
amajjapo no ca musā bhaṇāmi
sakena dārena ca homi tuṭṭhoti.
Maṭṭhakuṇḍalivimānaṃ navamaṃ.
The Pali Tipitaka in Roman Character Volume 26 page 134-143.
http://84000.org/tipitaka/read/roman_item_s.php?book=26&item=81&items=3
Classified by [Item Number] :-
http://84000.org/tipitaka/read/roman_item_s.php?book=26&item=81&items=3&mode=bracket
Compare with The Pali Tipitaka in Thai Character :-
http://84000.org/tipitaka/read/pali_item_s.php?book=26&item=81&items=3
Compare with The Royal Version of Thai Tipitaka :-
http://84000.org/tipitaka/read/byitem_s.php?book=26&item=81&items=3
Study Atthakatha :-
http://84000.org/tipitaka/attha/attha.php?b=26&i=81
The Pali Atthakatha in Thai :-
http://84000.org/tipitaka/atthapali/read_th.php?B=30&A=7732
The Pali Atthakatha in Roman :-
http://84000.org/tipitaka/atthapali/read_rm.php?B=30&A=7732
Contents of The Tipitaka Volume 26
http://84000.org/tipitaka/read/?index_26
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
