paliTIPITAKA Volume 3 - Vinaya Pitaka 3

page23.

Sattarasakaṇḍaṃ ime kho panayyāyo sattarasa saṅghādisesā dhammā uddesaṃ āgacchanti. Paṭhamasaṅghādisesaṃ [31] Tena samayena buddho bhagavā sāvatthiyaṃ viharati jetavane anāthapiṇḍikassa ārāme . tena kho pana samayena aññataro upāsako bhikkhunīsaṅghassa uddositaṃ datvā kālakato hoti . tassa dve puttā honti eko assaddho appasanno eko saddho pasanno . te pettikaṃ sāpateyyaṃ vibhajiṃsu . athakho so assaddho appasanno taṃ saddhaṃ pasannaṃ etadavoca amhākaṃ uddosito taṃ bhājemāti ^1- . evaṃ vutte so saddho pasanno taṃ assaddhaṃ appasannaṃ etadavoca māyyo evaṃ avaca amhākaṃ pitunā bhikkhunīsaṅghassa dinnoti. Dutiyampi kho assaddho appasanno taṃ saddhaṃ pasannaṃ etadavoca amhākaṃ uddosito taṃ bhājemāti. {31.1} Athakho so saddho pasanno taṃ assaddhaṃ appasannaṃ etadavoca māyyo evaṃ avaca amhākaṃ pitunā bhikkhunīsaṅghassa dinnoti . Tatiyampi kho so assaddho appasanno taṃ saddhaṃ pasannaṃ etadavoca amhākaṃ uddosito taṃ bhājemāti . athakho so saddho pasanno sace @Footnote: ¹ Ma. Yu. bhājāmāti.

--------------------------------------------------------------------------------------------- page24.

Mayhaṃ bhavissati ahaṃpi bhikkhunīsaṅghassa dassāmīti taṃ assaddhaṃ appasannaṃ etadavoca bhājemāti . athakho so uddosito tehi bhājiyamāno tassa assaddhassa appasannassa pāpuṇi ^1-. {31.2} Athakho so assaddho appasanno bhikkhuniyo upasaṅkamitvā etadavoca nikkhamathayye amhākaṃ uddositoti . evaṃ vutte thullanandā bhikkhunī taṃ purisaṃ etadavoca māyyo evaṃ avaca tumhākaṃ pitunā bhikkhunīsaṅghassa dinnoti . dinno na dinnoti vohārike mahāmatte pucchiṃsu . mahāmattā evamāhaṃsu ko ayye jānāti bhikkhunīsaṅghassa dinnoti . evaṃ vutte thullanandā bhikkhunī te mahāmatte etadavoca apinvayyā ^2- tumhehi diṭṭhaṃ vā sutaṃ vā sakkhiṃ ṭhapayitvā dānaṃ dīyamānanti . athakho te mahāmattā saccaṃ kho ayyā āhāti taṃ uddositaṃ bhikkhunīsaṅghassa akaṃsu. {31.3} Athakho so puriso parājito ujjhāyati khīyati vipāceti assamaṇiyo imā muṇḍā bandhakiniyo kathaṃ hi nāma amhākaṃ uddositaṃ acchinnāpessantīti . thullanandā bhikkhunī mahāmattānaṃ etamatthaṃ ārocesi . mahāmattā taṃ purisaṃ daṇḍāpesuṃ . Athakho so puriso daṇḍito ^3- bhikkhunūpassayassa avidūre ājīvakaseyyaṃ kārāpetvā ājīvake uyyojesi etā bhikkhuniyo accāvadathāti. {31.4} Thullanandā bhikkhunī mahāmattānaṃ etamatthaṃ ārocesi . mahāmattā taṃ purisaṃ bandhāpesuṃ . manussā @Footnote: ¹ Ma. Yu. pāpuṇāti . ² Ma. Yu. apinayyo . ³ Ma. Yu. daṇḍiko.

--------------------------------------------------------------------------------------------- page25.

Ujjhāyanti khīyanti vipācenti paṭhamaṃ ^1- hi nāma bhikkhuniyo uddositaṃ acchindāpesuṃ dutiyampi daṇḍāpesuṃ tatiyampi bandhāpesuṃ idāni ghātāpessantīti . assosuṃ kho bhikkhuniyo tesaṃ manussānaṃ ujjhāyantānaṃ khīyantānaṃ vipācentānaṃ. {31.5} Yā tā bhikkhuniyo appicchā .pe. Tā ujjhāyanti khīyanti vipācenti kathaṃ hi nāma ayyā thullanandā usuyyavādikā viharissatīti. Athakho tā bhikkhuniyo bhikkhūnaṃ etamatthaṃ ārocesuṃ .pe. saccaṃ kira bhikkhave thullanandā bhikkhunī usuyyavādikā viharatīti . saccaṃ bhagavāti. Vigarahi buddho bhagavā kathaṃ hi nāma bhikkhave thullanandā bhikkhunī usuyyavādikā viharissati netaṃ bhikkhave appasannānaṃ vā pasādāya .pe. Evañca pana bhikkhave bhikkhuniyo imaṃ sikkhāpadaṃ uddisantu {31.6} yā pana bhikkhunī usuyyavādikā vihareyya gahapatinā vā gahapatiputtena vā dāsena vā kammakarena ^2- vā antamaso samaṇaparibbājakenāpi ayaṃ bhikkhunī paṭhamāpattikaṃ dhammaṃ āpannā nissāraṇīyaṃ saṅghādisesanti.

The Pali Tipitaka in Roman Character Volume 3 page 23-25. http://84000.org/tipitaka/read/roman_item_s.php?book=3&item=31&items=1&pagebreak=1 Classified by [Item Number] :- http://84000.org/tipitaka/read/roman_item_s.php?book=3&item=31&items=1&pagebreak=1&mode=bracket Compare with The Pali Tipitaka in Thai Character :- http://84000.org/tipitaka/read/pali_item_s.php?book=3&item=31&items=1&pagebreak=1 Compare with The Royal Version of Thai Tipitaka :- http://84000.org/tipitaka/read/byitem_s.php?book=3&item=31&items=1&pagebreak=1 Study Atthakatha :- http://84000.org/tipitaka/attha/attha.php?b=3&i=31 The Pali Atthakatha in Thai :- http://84000.org/tipitaka/atthapali/read_th.php?B=2&A=10864 The Pali Atthakatha in Roman :- http://84000.org/tipitaka/atthapali/read_rm.php?B=2&A=10864 Contents of The Tipitaka Volume 3 http://84000.org/tipitaka/read/?index_3