[139] Tena kho pana samayena āyasmato mahākassapassa
upasampadāpekkho hoti . athakho āyasmā mahākassapo āyasmato
ānandassa santike dūtaṃ pāhesi āgacchatu ānando imaṃ
Anussāvessatīti 1- . āyasmā ānando evamāha nāhaṃ ussahāmi
therassa nāmaṃ gahetuṃ garu me theroti. Bhagavato etamatthaṃ ārocesuṃ.
Anujānāmi bhikkhave gottenapi anussāvetunti.
[140] Tena kho pana samayena āyasmato mahākassapassa dve
upasampadāpekkhā honti . te vivadanti ahaṃ paṭhamaṃ upasampajjissāmi
ahaṃ paṭhamaṃ upasampajjissāmīti . bhagavato etamatthaṃ ārocesuṃ .
Anujānāmi bhikkhave dve ekānussāvane kātunti . tena kho pana
samayena sambahulānaṃ therānaṃ upasampadāpekkhā honti . te
vivadanti ahaṃ paṭhamaṃ upasampajjissāmi ahaṃ paṭhamaṃ upasampajjissāmīti .
Therā evamāhaṃsu handa mayaṃ āvuso sabbe va ekānussāvane karomāti.
Bhagavato etamatthaṃ ārocesuṃ . anujānāmi bhikkhave dve tayo
ekānussāvane kātuṃ tañca kho ekena upajjhāyena na tveva
nānupajjhāyenāti.
[141] Tena kho pana samayena āyasmā kumārakassapo gabbhavīso
upasampanno hoti . athakho āyasmato kumārakassapassa etadahosi
bhagavatā paññattaṃ na ūnavīsativasso puggalo upasampādetabboti
ahañcamhi gabbhavīso upasampanno upasampanno nu khomhi
na nu kho upasampannoti . bhagavato etamatthaṃ ārocesuṃ . yaṃ
bhikkhave mātu kucchismiṃ paṭhamaṃ cittaṃ uppannaṃ paṭhamaṃ viññāṇaṃ
@Footnote: 1 Sī. Ma. anusāvessatūti.
Pātubhūtaṃ tadupādāya sāvassa jāti anujānāmi bhikkhave gabbhavīsaṃ
upasampādetunti.
[142] Tena kho pana samayena [1]- upasampannā dissanti kuṭṭhikāpi
gaṇḍikāpi kilāsikāpi sosikāpi apamārikāpi . bhagavato etamatthaṃ
ārocesuṃ . anujānāmi bhikkhave upasampādentena terasa 2-
antarāyike dhamme pucchituṃ . evañca pana bhikkhave pucchitabbo
santi te evarūpā ābādhā kuṭṭhaṃ gaṇḍo kilāso soso
apamāro manussosi purisosi bhujissosi anaṇosi nasi rājabhaṭo
anuññātosi mātāpitūhi paripuṇṇavīsativassosi paripuṇṇante
pattacīvaraṃ kinnāmosi 3- konāmo 4- te upajjhāyoti.
{142.1} Tena kho pana samayena bhikkhū ananusiṭṭhe upasampadāpekkhe
antarāyike dhamme pucchanti . upasampadāpekkhā vitthāyanti maṅkū
honti na sakkonti vissajjetuṃ. Bhagavato etamatthaṃ ārocesuṃ.
{142.2} Anujānāmi bhikkhave paṭhamaṃ anusāsitvā pacchā
antarāyike dhamme pucchitunti . tattheva saṅghamajjhe anusāsanti .
Upasampadāpekkhā tatheva vitthāyanti maṅkū honti na sakkonti
vissajjetuṃ. Bhagavato etamatthaṃ ārocesuṃ.
{142.3} Anujānāmi bhikkhave ekamantaṃ anusāsitvā
saṅghamajjhe antarāyike dhamme pucchituṃ . evañca pana
bhikkhave anusāsitabbo . paṭhamaṃ upajjhaṃ gāhāpetabbo . upajjhaṃ
@Footnote: 1 Po. bhikkhū. 2 Yu. tassa. 3 Ma. Yu. kiṃnāmo so. 4 ko nāmāti amhākaṃ ruci.
Gāhāpetvā pattacīvaraṃ ācikkhitabbaṃ ayante patto ayaṃ saṅghāṭi
ayaṃ uttarāsaṅgo ayaṃ antaravāsako gaccha amumhi okāse tiṭṭhāhīti.
Bālā abyattā anusāsanti duranusiṭṭhā upasampadāpekkhā
vitthāyanti maṅkū honti na sakkonti vissajjetuṃ . bhagavato
etamatthaṃ ārocesuṃ . na bhikkhave bālena abyattena anusāsitabbo
yo anusāseyya āpatti dukkaṭassa.
{142.4} Anujānāmi bhikkhave byattena bhikkhunā paṭibalena
anusāsitunti . asammatā anusāsanti . bhagavato etamatthaṃ
ārocesuṃ . na bhikkhave asammatena anusāsitabbo yo anusāseyya
āpatti dukkaṭassa.
{142.5} Anujānāmi bhikkhave sammatena anusāsituṃ . evañca
pana bhikkhave sammannitabbo . attanā va attānaṃ sammannitabbaṃ
parena vā paro sammannitabbo . kathañca attanā va attānaṃ
sammannitabbaṃ. Byattena bhikkhunā paṭibalena saṅgho ñāpetabbo
{142.6} suṇātu me bhante saṅgho itthannāmo itthannāmassa
āyasmato upasampadāpekkho . yadi saṅghassa pattakallaṃ ahaṃ itthannāmaṃ
anusāseyyanti . evaṃ attanā va attānaṃ sammannitabbaṃ . kathañca
parena paro sammannitabbo . byattena bhikkhunā paṭibalena saṅgho
ñāpetabbo
{142.7} suṇātu me bhante saṅgho itthannāmo itthannāmassa āyasmato
upasampadāpekkho 1- yadi saṅghassa pattakallaṃ itthannāmo itthannāmaṃ
@Footnote: 1 upasampadāpekhoti vā pāṭho.
Anusāseyyāti . evaṃ parena paro sammannitabbo . tena sammatena
bhikkhunā upasampadāpekkho upasaṅkamitvā evamassa vacanīyo
suṇasi itthannāma ayante saccakālo bhūtakālo yaṃ jātaṃ taṃ
saṅghamajjhe pucchante santaṃ atthīti vattabbaṃ asantaṃ natthīti
vattabbaṃ mā kho vitthāsi mā kho maṅku ahosi evantaṃ
pucchissanti santi te evarūpā ābādhā kuṭṭhaṃ gaṇḍo
kilāso soso apamāro manussosi purisosi bhujissosi anaṇosi
nasi rājabhaṭo anuññātosi mātāpitūhi paripuṇṇavīsativassosi
paripuṇṇante pattacīvaraṃ kinnāmosi konāmo te upajjhāyoti .
Ekato āgacchanti 1-. Na [2]- ekato āgantabbaṃ.
{142.8} Anusāsakena paṭhamataraṃ āgantvā saṅgho ñāpetabbo
suṇātu me bhante saṅgho itthannāmo itthannāmassa āyasmato
upasampadāpekkho . anusiṭṭho so mayā . yadi saṅghassa pattakallaṃ
itthannāmo āgaccheyyāti . Āgacchāhīti vattabbo. Ekaṃsaṃ uttarāsaṅgaṃ
kārāpetvā bhikkhūnaṃ pāde vandāpetvā ukkuṭikaṃ nisīdāpetvā
añjaliṃ paggaṇhāpetvā upasampadaṃ yācāpetabbo saṅghambhante
upasampadaṃ yācāmi ullumpatu maṃ bhante saṅgho anukampaṃ upādāya .
Dutiyampi bhante saṅghaṃ upasampadaṃ yācāmi ullumpatu maṃ bhante saṅgho
anukampaṃ upādāya . tatiyampi bhante saṅghaṃ upasampadaṃ yācāmi ullumpatu
@Footnote: 1 idaṃ pāṭhadvayaṃ antarā pakkhittaṃ viya khāyati . 2 Ma. bhikkhave.
Maṃ bhante saṅgho anukampaṃ upādāyāti . byattena bhikkhunā
paṭibalena saṅgho ñāpetabbo
{142.9} suṇātu me bhante saṅgho ayaṃ itthannāmo itthannāmassa
āyasmato upasampadāpekkho . yadi saṅghassa pattakallaṃ ahaṃ itthannāmaṃ
antarāyike dhamme puccheyyanti . suṇasi itthannāma ayante saccakālo
bhūtakālo yaṃ jātaṃ taṃ pucchāmi santaṃ atthīti vattabbaṃ asantaṃ natthīti
vattabbaṃ santi te evarūpā ābādhā kuṭṭhaṃ gaṇḍo kilāso soso
apamāro manussosi purisosi bhujissosi anaṇosi nasi rājabhaṭo
anuññātosi mātāpitūhi paripuṇṇavīsativassosi paripuṇṇante
pattacīvaraṃ kinnāmosi konāmo te upajjhāyoti . byattena
bhikkhunā paṭibalena saṅgho ñāpetabbo
{142.10} suṇātu me bhante saṅgho ayaṃ itthannāmo
itthannāmassa āyasmato upasampadāpekkho parisuddho
antarāyikehi dhammehi . paripuṇṇassa pattacīvaraṃ . itthannāmo
saṅghaṃ upasampadaṃ yācati itthannāmena upajjhāyena . yadi
saṅghassa pattakallaṃ saṅgho itthannāmaṃ upasampādeyya
itthannāmena upajjhāyena. Esā ñatti.
{142.11} Suṇātu me bhante saṅgho ayaṃ itthannāmo
itthannāmassa āyasmato upasampadāpekkho parisuddho
antarāyikehi dhammehi . paripuṇṇassa pattacīvaraṃ . itthannāmo
saṅghaṃ upasampadaṃ yācati itthannāmena upajjhāyena . saṅgho
itthannāmaṃ upasampādeti itthannāmena
Upajjhāyena . yassāyasmato khamati itthannāmassa upasampadā
itthannāmena upajjhāyena so tuṇhassa yassa nakkhamati so
bhāseyya. Dutiyampi etamatthaṃ vadāmi.
{142.12} Suṇātu me bhante saṅgho ayaṃ itthannāmo
itthannāmassa āyasmato upasampadāpekkho parisuddho
antarāyikehi dhammehi . paripuṇṇassa pattacīvaraṃ . itthannāmo
saṅghaṃ upasampadaṃ yācati itthannāmena upajjhāyena . saṅgho
itthannāmaṃ upasampādeti itthannāmena upajjhāyena .
Yassāyasmato khamati itthannāmassa upasampadā itthannāmena
upajjhāyena so tuṇhassa yassa nakkhamati so bhāseyya . tatiyampi
etamatthaṃ vadāmi.
{142.13} Suṇātu me bhante saṅgho ayaṃ itthannāmo
itthannāmassa āyasmato upasampadāpekkho parisuddho antarāyikehi
dhammehi . paripuṇṇassa pattacīvaraṃ . itthannāmo saṅghaṃ upasampadaṃ
yācati itthannāmena upajjhāyena . saṅgho itthannāmaṃ upasampādeti
itthannāmena upajjhāyena . yassāyasmato khamati itthannāmassa
upasampadā itthannāmena upajjhāyena so tuṇhassa yassa nakkhamati
so bhāseyya.
{142.14} Upasampanno saṅghena itthannāmo itthannāmena
upajjhāyena. Khamati saṅghassa tasmā tuṇhī. Evametaṃ dhārayāmīti.
Upasampadākammaṃ niṭṭhitaṃ.
[143] Tāvadeva chāyā metabbā utuppamāṇaṃ ācikkhitabbaṃ
Divasabhāgo ācikkhitabbo saṅgīti ācikkhitabbā cattāro nissayā
ācikkhitabbā piṇḍiyālopabhojanaṃ nissāya pabbajjā tattha
te yāvajīvaṃ ussāho karaṇīyo . atirekalābho saṅghabhattaṃ
uddesabhattaṃ nimantanaṃ salākabhattaṃ pakkhikaṃ uposathikaṃ pāṭipadikaṃ.
{143.1} Paṃsukūlacīvaraṃ nissāya pabbajjā tattha te yāvajīvaṃ
ussāho karaṇīyo . atirekalābho khomaṃ kappāsikaṃ koseyyaṃ kambalaṃ
sāṇaṃ bhaṅgaṃ . rukkhamūlasenāsanaṃ nissāya pabbajjā tattha te
yāvajīvaṃ ussāho karaṇīyo . atirekalābho vihāro aḍḍhayogo
pāsādo hammiyaṃ guhā . pūtimuttabhesajjaṃ nissāya pabbajjā
tattha te yāvajīvaṃ ussāho karaṇīyo . atirekalābho sappi
navanītaṃ telaṃ madhu phāṇitanti.
Cattāro nissayā niṭṭhitā.
[144] Tena kho pana samayena bhikkhū aññataraṃ bhikkhuṃ
upasampādetvā ekakaṃ ohāya pakkamiṃsu . so pacchā ekako va
āgacchanto antarāmagge purāṇadutiyikāya samāgacchi . sā
evamāha kindāni pabbajitosīti . āma pabbajitomhīti . dullabho
kho pabbajitānaṃ methuno dhammo ehi methunaṃ dhammaṃ paṭisevāti .
So tassā methunaṃ dhammaṃ paṭisevitvā pacchā 1- cirena agamāsi .
Bhikkhū evamāhaṃsu kissa tvaṃ āvuso evaṃ ciraṃ akāsīti . athakho
so [2]- bhikkhūnaṃ etamatthaṃ ārocesi . bhikkhū bhagavato etamatthaṃ
@Footnote: 1 Ma. Yu. ayaṃ pāṭho natthi . 2 Ma. Yu. bhikkhu.
Ārocesuṃ . athakho bhagavā etasmiṃ nidāne etasmiṃ pakaraṇe
dhammiṃ kathaṃ katvā bhikkhū āmantesi anujānāmi bhikkhave
upasampādetvā dutiyaṃ dātuṃ cattāri ca akaraṇīyāni ācikkhituṃ
upasampannena bhikkhunā methuno dhammo na paṭisevitabbo antamaso
tiracchānagatāyapi . yo bhikkhu methunaṃ dhammaṃ paṭisevati assamaṇo
hoti asakyaputtiyo . seyyathāpi nāma puriso sīsacchinno abhabbo
tena sarīrabandhanena jīvituṃ evameva bhikkhu methunaṃ dhammaṃ paṭisevitvā
assamaṇo hoti asakyaputtiyo. Tante yāvajīvaṃ akaraṇīyaṃ.
{144.1} Upasampannena bhikkhunā adinnaṃ theyyasaṅkhātaṃ na
ādātabbaṃ antamaso tiṇasalākaṃ upādāya . yo bhikkhu pādaṃ vā
pādārahaṃ vā atirekapādaṃ vā adinnaṃ theyyasaṅkhātaṃ ādiyati
assamaṇo hoti asakyaputtiyo . seyyathāpi nāma paṇḍupalāso
bandhanā pamutto abhabbo haritattāya evameva bhikkhu pādaṃ vā
pādārahaṃ vā atirekapādaṃ vā adinnaṃ theyyasaṅkhātaṃ ādiyitvā
assamaṇo hoti asakyaputtiyo. Tante yāvajīvaṃ akaraṇīyaṃ.
{144.2} Upasampannena bhikkhunā sañcicca pāṇo jīvitā na 1-
voropetabbo antamaso kunthakipillikaṃ upādāya . yo bhikkhu
sañcicca manussaviggahaṃ jīvitā voropeti antamaso gabbhapātanaṃ
upādāya assamaṇo hoti asakyaputtiyo . seyyathāpi nāma
puthusilā dvedhā bhinnā appaṭisandhikā hoti evameva bhikkhu
sañcicca manussaviggahaṃ jīvitā voropetvā assamaṇo hoti
@Footnote: 1 Yu. no.
Asakyaputtiyo. Tante yāvajīvaṃ akaraṇīyaṃ.
{144.3} Upasampannena bhikkhunā uttarimanussadhammo na
ullapitabbo antamaso suññāgāre abhiramāmīti . yo bhikkhu
pāpiccho icchāpakato asantaṃ abhūtaṃ uttarimanussadhammaṃ ullapati
jhānaṃ vā vimokkhaṃ vā samādhiṃ vā samāpattiṃ vā maggaṃ vā phalaṃ vā
assamaṇo hoti asakyaputtiyo . seyyathāpi nāma tālo
matthakacchinno abhabbo puna viruḷhiyā evameva bhikkhu pāpiccho
icchāpakato asantaṃ abhūtaṃ uttarimanussadhammaṃ ullapitvā
assamaṇo hoti asakyaputtiyo. Tante yāvajīvaṃ akaraṇīyanti.
Cattāri akaraṇīyāni niṭṭhitāni.
[145] Tena kho pana samayena aññataro bhikkhu āpattiyā
adassane ukkhittako vibbhami . so puna paccāgantvā bhikkhū
upasampadaṃ yāci. Bhagavato etamatthaṃ ārocesuṃ.
{145.1} Idha pana bhikkhave bhikkhu āpattiyā adassane
ukkhittako vibbhamati . so puna paccāgantvā bhikkhū upasampadaṃ
yācati . so evamassa vacanīyo passissasi taṃ āpattinti .
Sacāhaṃ passissāmīti pabbājetabbo sacāhaṃ na passissāmīti
na pabbājetabbo . pabbājetvā vattabbo passissasi taṃ
āpattinti . sacāhaṃ passissāmīti upasampādetabbo sacāhaṃ
na passissāmīti na upasampādetabbo . upasampādetvā
vattabbo passissasi taṃ āpattinti . sacāhaṃ
Passissāmīti osāretabbo sacāhaṃ na passissāmīti na osāretabbo.
Osāretvā vattabbo passasi taṃ 1- āpattinti. Sace passati iccetaṃ
kusalaṃ no ce passati labbhamānāya sāmaggiyā puna ukkhipitabbo
alabbhamānāya sāmaggiyā anāpatti sambhoge saṃvāse.
{145.2} Idha pana bhikkhave bhikkhu āpattiyā appaṭikamme
ukkhittako vibbhamati . so puna paccāgantvā bhikkhū upasampadaṃ
yācati . so evamassa vacanīyo paṭikarissasi taṃ āpattinti .
Sacāhaṃ paṭikarissāmīti pabbājetabbo sacāhaṃ na paṭikarissāmīti
na pabbājetabbo . pabbājetvā vattabbo paṭikarissasi taṃ
āpattinti . sacāhaṃ paṭikarissāmīti upasampādetabbo sacāhaṃ
na paṭikarissāmīti na upasampādetabbo . upasampādetvā
vattabbo paṭikarissasi taṃ āpattinti . sacāhaṃ paṭikarissāmīti
osāretabbo sacāhaṃ na paṭikarissāmīti na osāretabbo .
Osāretvā vattabbo paṭikarohi taṃ āpattinti . sace paṭikaroti
iccetaṃ kusalaṃ no ce paṭikaroti labbhamānāya sāmaggiyā puna
ukkhipitabbo alabbhamānāya sāmaggiyā anāpatti sambhoge
saṃvāse.
{145.3} Idha pana bhikkhave bhikkhu pāpikāya diṭṭhiyā appaṭinissagge
ukkhittako vibbhamati . so puna paccāgantvā bhikkhū
upasampadaṃ yācati . so evamassa vacanīyo paṭinissajjissasi
@Footnote: 1 Sī. passetaṃ.
Taṃ pāpikaṃ diṭṭhinti . sacāhaṃ paṭinissajjissāmīti pabbājetabbo
sacāhaṃ na paṭinissajjissāmīti na pabbājetabbo . pabbājetvā
vattabbo paṭinissajjissasi taṃ pāpikaṃ diṭṭhinti . sacāhaṃ
paṭinissajjissāmīti upasampādetabbo sacāhaṃ na paṭinissajjissāmīti
na upasampādetabbo . upasampādetvā vattabbo paṭinissajjissasi
taṃ pāpikaṃ diṭṭhinti . sacāhaṃ paṭinissajjissāmīti osāretabbo
sacāhaṃ na paṭinissajjissāmīti na osāretabbo . osāretvā
vattabbo paṭinissajjāhi taṃ 1- pāpikaṃ diṭṭhinti . sace paṭinissajjati
iccetaṃ kusalaṃ no ce paṭinissajjati labbhamānāya sāmaggiyā puna
ukkhipitabbo alabbhamānāya sāmaggiyā anāpatti sambhoge saṃvāseti.
Mahākhandhako paṭhamo.
[146] Vinayamhi mahatthesu pesalānaṃ sukhāvahe
niggahānañca 2- pāpicche lajjīnaṃ paggahesu ca
sāsanādhāraṇe ceva sabbaññujinagocare
anaññavisaye kheme supaññatte asaṃsaye
khandhake vinaye ceva parivāre ca mātike
yathātthakārī 3- kusalo paṭipajjati yoniso.
Yo gavaṃ na vijānāti na so rakkhati gogaṇaṃ
@Footnote: 1 Sī. paṭinissajetaṃ . 2 niggahānanti niggahakaraṇesūti vimativinodanī.
@Yu. niggahe ca pāpicchānaṃ . 3 Yu. yathatthakārī.
Evaṃ sīlaṃ ajānanto kiṃ so rakkheyya saṃvaraṃ.
Pamuṭṭhamhi ca suttante abhidhamme ca tāvade
vinaye avinaṭṭhamhi puna tiṭṭhati sāsanaṃ.
Tasmā saṅgāhanāhetu 1- uddānaṃ anupubbaso
pavakkhāmi yathāñāṇaṃ 2- suṇātha 3- mama bhāsato.
Vatthu nidānaṃ āpatti 4- nayā peyyālameva ca
dukkarantaṃ asesetuṃ nayato taṃ 5- vijānathāti.
Bodhi rājāyatanañca 6- ajapālo sahampati
brahmāḷāro uddako ca 7- bhikkhu ca upako isi.
Koṇḍañño bhaddiyo vappo 8- mahānāmo ca assaji
yaso cattāri paññāla 9- sabbe pesesi so disā
vatthu 10- mārehi tiṃsā ca uruvelantayo jaṭī
agyāgāraṃ mahārājā sakko brahmā ca kevalā 11-
paṃsukūlaṃ pokkharaṇī silā ca kakudho silā
@Footnote: 1 Ma. ...hetuṃ . 2 Sī. Ma. yathāñāyaṃ . 3 Sī. suṇotha.
@4 Sī. vatthuṃ nidānaṃ āpattiṃ. 5 Sī. naṃ . 6 Sī. bodhi rājāyatanaṃ.
@Yu. bodhi ca rājāyatanaṃ . 7 Sī. brahmā āḷāro
@uddo ca. Yu. brahmā āḷāro uddako. 8 Ma. Yu. Rā. koṇḍañño
@vappo bhaddiyo . 9 Sī. yaso cattārapaññāsa. Ma. Yu. yaso cattāro
@paññāsaṃ. 10 Ma. Yu. Rā. vatthuṃ . 11 Sī. Ma. Rā. kevalo.
Jambu ambo ca āmaṇḍo 1- pāripupphañca 2- āhari
phāliyantu ujjalantu vijjhāyantu ca kassapa
nimujjanti mukhī megho gayā laṭṭhī ca māgadho
upatisso kolito ca abhiññātā ca pabbajuṃ 3-
dunnivatthā paṇāmanā kiso lūkho ca brāhmaṇo
anācāraṃ ācarati udaraṃ māṇavo gaṇo
vassaṃ bālehi pakkanto dasa vassāni nissayo
na vattanti paṇāmetuṃ bālā passiddhi pañca cha
yo so añño ca naggo ca acchinnaṃ jaṭi sākiyo
magadhesu pañca ābādhā bhaṭo coro aṅguli 4-
māgadho ca anuññāsi kārā likhi kasāhato
lakkhaṇā iṇadāso 5- ca bhaṇḍuko upali 6- ahi
saddhaṃ kulaṃ kaṇṭako ca āhundrikameva ca
vatthusmiṃ dārako sikkhā viharanti ca kinnukho
sabbaṃ mukhaṃ upajjhāye apalāḷanakaṇṭako.
Paṇḍako theyyapakkanto ahi ca mātari pitā
arahantabhikkhunībhedā ruhirena ca byañjanaṃ
anupajjhāyasaṅghena gaṇapaṇḍakapattako
@Footnote: 1 Ma. āmalo. Yu. āmalako . 2 Yu. pārichattapupphaṃ. 3 Ma. Yu. Rā. pabbajjaṃ.
@4 Sī. eko rājā aṅguli. Ma. eko rājā ca aṅguli. Yu. Rā. eko coro
@ca aṅguli . 5 Ma. iṇā dāso ca . 6 Yu. upāli.
Acīvaraṃ tadubhayaṃ yācitenapi ye tayo
hatthā pādā hatthapādā kaṇṇā nāsā tadūbhayaṃ
aṅguli aḷakaṇḍaraṃ phaṇaṃ khujjañca vāmanaṃ
galagaṇḍī 1- lakkhaṇā ca 2- kasā likhitasīpadī
pāpaparisadūsī ca 3- kāṇakuṇī 4- tatheva ca
khañjapakkhahatañceva 5- sañchinnairiyāpathaṃ 6-
jarāndhamūgabadhiraṃ andhamūgañca yaṃ tahiṃ
andhabadhiraṃ yaṃ vuttaṃ mūgabadhirameva ca
andhamūgabadhirañca alajjīnañca nissayaṃ
vatthabbañca tathāddhānaṃ 7- yācamānena pekkhanā
āgacchatu 8- vivādenti ekupajjhena 9- kassapo
dissanti upasampannā ābādhehi ca pīḷitā
ananusiṭṭhā vitthanti tattheva anusāsanā
saṅghepica atho bālo 10- asammato 11- ca ekato
ullumpatupasampadā nissayo ekato tayoti
imasmiṃ khandhake vatthu ekasataṃ dvāsattati.
Mahākhandhake uddānaṃ niṭṭhitaṃ.
@Footnote: 1 Yu. galagaṇḍi . 2 Ma. ceva . 3 Yu. Rā. pāpaparisadūsañca.
@4 Yu. kāṇakuṇiṃ. 5 Sī. khañjaṃ pakkhahataṃ yaṃ hi . 6 Ma. Yu. sacchinna....
@7 Sī. kathāddhānaṃ. Yu. kataddhānaṃ . 8 Ma. Yu. āgacchantaṃ.
@9 Ma. Yu. ekupajjhāyena . 10 Ma. bālā. 11 Ma. asammatā.
The Pali Tipitaka in Roman Character Volume 4 page 186-200.
http://84000.org/tipitaka/read/roman_item_s.php?book=4&item=139&items=8
Classified by [Item Number] :-
http://84000.org/tipitaka/read/roman_item_s.php?book=4&item=139&items=8&mode=bracket
Compare with The Pali Tipitaka in Thai Character :-
http://84000.org/tipitaka/read/pali_item_s.php?book=4&item=139&items=8
Compare with The Royal Version of Thai Tipitaka :-
http://84000.org/tipitaka/read/byitem_s.php?book=4&item=139&items=8
Study Atthakatha :-
http://84000.org/tipitaka/attha/attha.php?b=4&i=139
The Pali Atthakatha in Thai :-
http://84000.org/tipitaka/atthapali/read_th.php?B=3&A=2313
The Pali Atthakatha in Roman :-
http://84000.org/tipitaka/atthapali/read_rm.php?B=3&A=2313
Contents of The Tipitaka Volume 4
http://84000.org/tipitaka/read/?index_4
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
