บาลี ข้อ 146-150 พระไตรปิฎกเล่มที่ 5

     [๑๔๖]   เตน   โข   ปน  สมเยน  สงฺฆสฺส  ภณฺฑาคาเร  จีวรํ
อุสฺสนฺนํ   โหติ   ฯ   ภควโต   เอตมตฺถํ   อาโรเจสุํ   ฯ  อนุชานามิ
ภิกฺขเว   สมฺมุขีภูเตน  สงฺเฆน  ภาเชตุนฺติ  ฯ  เตน  โข  ปน  สมเยน
สพฺโพ   ^๑-   สงฺโฆ   จีวรํ  ภาเชนฺโต  โกลาหลํ  อกาสิ  ฯ  ภควโต
เอตมตฺถํ   อาโรเจสุํ   ฯ  อนุชานามิ  ภิกฺขเว  ปญฺจหงฺเคหิ  สมนฺนาคตํ
ภิกฺขุํ    จีวรภาชกํ    สมฺมนฺนิตุํ   โย   น   ฉนฺทาคตึ   คจฺเฉยฺย   น
โทสาคตึ   คจฺเฉยฺย   น   โมหาคตึ   คจฺเฉยฺย  น  ภยาคตึ  คจฺเฉยฺย
ภาชิตาภาชิตญฺจ   ชาเนยฺย  ฯ  เอวญฺจ  ปน  ภิกฺขเว  สมฺมนฺนิตพฺโพ  ฯ
ปฐมํ    ภิกฺขุ   ยาจิตพฺโพ   ยาจิตฺวา   พฺยตฺเตน   ภิกฺขุนา   ปฏิพเลน
สงฺโฆ ญาเปตพฺโพ
     {๑๔๖.๑}   สุณาตุ   เม  ภนฺเต  สงฺโฆ  ยทิ  สงฺฆสฺส  ปตฺตกลฺลํ
สงฺโฆ อิตฺถนฺนามํ ภิกฺขุํ จีวรภาชกํ สมฺมนฺเนยฺย ฯ เอสา ญตฺติ ฯ
     {๑๔๖.๒}   สุณาตุ  เม  ภนฺเต  สงฺโฆ  สงฺโฆ  อิตฺถนฺนามํ  ภิกฺขุํ
จีวรภาชกํ    สมฺมนฺนติ    ฯ    ยสฺสายสฺมโต    ขมติ    อิตฺถนฺนามสฺส
ภิกฺขุโน    จีวรภาชกสฺส    สมฺมติ    โส    ตุณฺหสฺส   ยสฺส   นกฺขมติ
โส ภาเสยฺย ฯ
     {๑๔๖.๓}   สมฺมโต  สงฺเฆน  อิตฺถนฺนาโม  ภิกฺขุ  จีวรภาชโก  ฯ
ขมติ สงฺฆสฺส ตสฺมา ตุณฺหี ฯ เอวเมตํ ธารยามีติ ฯ
     {๑๔๖.๔}   อถโข  จีวรภาชกานํ  ภิกฺขูนํ เอตทโหสิ กถํ นุ โข จีวรํ
ภาเชตพฺพนฺติ  ฯ  ภควโต  เอตมตฺถํ  อาโรเจสุํ  ฯ  อนุชานามิ  ภิกฺขเว
ปฐมํ    อุจฺจินิตฺวา   ตุลยิตฺวา   วณฺณาวณฺณํ   กตฺวา   ภิกฺขู   คเณตฺวา
วคฺคํ  พนฺธิตฺวา  จีวรปฏิวิสํ  ฐเปตุนฺติ  ฯ  อถโข  จีวรภาชกานํ   ภิกฺขูนํ
เอตทโหสิ  กถํ  นุ  โข  สามเณรานํ  จีวรปฏิวิโส ทาตพฺโพติ ฯ  ภควโต
เอตมตฺถํ   อาโรเจสุํ  ฯ  อนุชานามิ  ภิกฺขเว  สามเณรานํ  อุปฑฺฒปฏิวิสํ
@เชิงอรรถ: ^๑ ม. อยํ ปาโฐ น ทิสฺสติ ฯ
ทาตุนฺติ ฯ
     {๑๔๖.๕}   เตน  โข  ปน  สมเยน  อญฺญตโร ภิกฺขุ สเกน ภาเคน
อุตฺตริตุกาโม   โหติ   ฯ  ภควโต  เอตมตฺถํ  อาโรเจสุํ  ฯ  อนุชานามิ
ภิกฺขเว   อุตฺตรนฺตสฺส  สกํ  ภาคํ  ทาตุนฺติ  ฯ  เตน  โข  ปน  สมเยน
อญฺญตโร   ภิกฺขุ   อติเรกภาเคน   อุตฺตริตุกาโม   โหติ   ฯ   ภควโต
เอตมตฺถํ   อาโรเจสุํ   ฯ   อนุชานามิ   ภิกฺขเว   อนุกฺเขเป   ทินฺเน
อติเรกภาคํ   ทาตุนฺติ   ฯ   อถโข   จีวรภาชกานํ   ภิกฺขูนํ  เอตทโหสิ
กถํ    นุ   โข   จีวรปฏิวิโส   ทาตพฺโพ   อาคตปฏิปาฏิยา   นุ   โข
อุทาหุ    ยถาวุฑฺฒนฺติ    ฯ    ภควโต    เอตมตฺถํ    อาโรเจสุํ   ฯ
อนุชานามิ ภิกฺขเว วิกลเก โตเสตฺวา กุสปาตํ กาตุนฺติ ฯ
     [๑๔๗]   เตน  โข  ปน  สมเยน  ภิกฺขู  ฉกเณนปิ  ปณฺฑุมตฺติกายปิ
จีวรํ   รเชนฺติ   ^๑-   ฯ  จีวรํ  ทุพฺพณฺณํ  โหติ  ฯ  ภควโต  เอตมตฺถํ
อาโรเจสุํ   ฯ   อนุชานามิ   ภิกฺขเว   ฉ  รชนานิ  มูลรชนํ  ขนฺธรชนํ
ตจรชนํ ปตฺตรชนํ ปุปฺผรชนํ ผลรชนนฺติ ฯ
     {๑๔๗.๑}   เตน โข ปน สมเยน ภิกฺขู สีตูทกาย ^๒- จีวรํ รเชนฺติ ฯ
จีวรํ   ทุคฺคนฺธํ  โหติ  ฯ  ภควโต  เอตมตฺถํ  อาโรเจสุํ  ฯ  อนุชานามิ
ภิกฺขเว  รชนํ  ปจิตุํ  จูฬรชนกุมฺภินฺติ  ^๓-  ฯ  รชนํ  อุตฺตริยติ ฯ ภควโต
เอตมตฺถํ  อาโรเจสุํ  ฯ  อนุชานามิ  ภิกฺขเว  อุตฺตราฬุวํ ^๔- พนฺธิตุนฺติ ฯ
เตน  โข ปน สมเยน ภิกฺขู น ชานนฺติ รชนํ ปกฺกํ วา อปกฺกํ วา ฯ ภควโต
เอตมตฺถํ  อาโรเจสุํ  ฯ  อนุชานามิ  ภิกฺขเว  อุทเก วา นขปิฏฺฐิกาย วา
@เชิงอรรถ: ^๑ ม. ยุ. รชนฺติ ฯ ^๒ สี. สีตุนฺทกาย ฯ ม. สีตุทกาย ฯ ยุ. สิตุนฺนกาย ฯ
@^๓ โป. ยุ. จุลฺล- ฯ ม. จุลฺลํ ฯ ^๔ ม. ยุ. อุตฺตราฬุมฺปํ ฯ
เถวกํ ทาตุนฺติ ฯ
     {๑๔๗.๒}   เตน   โข  ปน  สมเยน  ภิกฺขู  รชนํ  โอโรเปนฺตา
กุมฺภึ  อาวฏฺฏนฺติ  ^๑-  กุมฺภี  ภิชฺชติ  ฯ  ภควโต  เอตมตฺถํ อาโรเจสุํ ฯ
อนุชานามิ   ภิกฺขเว  รชนุฬุงฺกํ  ทณฺฑกถาลิกนฺติ  ^๒-  ฯ  เตน  โข  ปน
สมเยน   ภิกฺขูนํ   รชนภาชนํ   น   สํวิชฺชติ   ฯ   ภควโต   เอตมตฺถํ
อาโรเจสุํ    ฯ   อนุชานามิ   ภิกฺขเว   รชนโกลมฺพํ   รชนฆฏนฺติ   ฯ
เตน   โข   ปน  สมเยน  ภิกฺขู  ปาติยาปิ  ปตฺเตปิ  จีวรํ  มทฺทนฺติ  ฯ
จีวรํ   ปริภิชฺชติ   ฯ   ภควโต   เอตมตฺถํ   อาโรเจสุํ  ฯ  อนุชานามิ
ภิกฺขเว รชนโทณิกนฺติ ฯ
     {๑๔๗.๓}   เตน  โข  ปน  สมเยน  ภิกฺขู  ฉมายํ  จีวรํ ปตฺถรนฺติ
จีวรํ   ปํสุกิตํ   โหติ  ฯ  ภควโต  เอตมตฺถํ  อาโรเจสุํ  ฯ  อนุชานามิ
ภิกฺขเว    ติณสนฺถารกนฺติ   ฯ   ติณสนฺถารโก   อุปจิกาหิ   ขชฺชติ   ฯ
ภควโต  เอตมตฺถํ  อาโรเจสุํ ฯ อนุชานามิ ภิกฺขเว จีวรวํสํ จีวรรชฺชุนฺติ ฯ
มชฺเฌน  ลคฺเคนฺติ  รชนํ  อุภโต  คลติ  ฯ ภควโต เอตมตฺถํ อาโรเจสุํ ฯ
อนุชานามิ   ภิกฺขเว   กณฺเณ   พนฺธิตุนฺติ  ฯ  กณฺโณ  ชีรติ  ฯ  ภควโต
เอตมตฺถํ   อาโรเจสุํ   ฯ  อนุชานามิ  ภิกฺขเว  กณฺณสุตฺตกนฺติ  ฯ  รชนํ
เอกโต  คลติ  ฯ  ภควโต  เอตมตฺถํ  อาโรเจสุํ  ฯ  อนุชานามิ ภิกฺขเว
สมฺปริวตฺตกํ สมฺปริวตฺตกํ รเชตุํ น จ อจฺฉินฺเน เถเว ปกฺกมิตุนฺติ ฯ
     {๑๔๗.๔}   เตน  โข  ปน  สมเยน  จีวรํ ปตฺถินฺนํ โหติ ฯ ภควโต
เอตมตฺถํ  อาโรเจสุํ  ฯ  อนุชานามิ  ภิกฺขเว  อุทเก โอสาเทตุนฺติ ^๓- ฯ
เตน  โข  ปน  สมเยน จีวรํ ผรุสํ โหติ ฯ ภควโต เอตมตฺถํ อาโรเจสุํ ฯ
@เชิงอรรถ: ^๑ โป. ยุ. อาวชฺชนฺติ ฯ สี. อาวิญฺชนฺติ ฯ ม. อาวิจฺฉนฺติ ฯ ^๒ ม. ถาลกนฺติ ฯ
@^๓ ม. ยุ. โอสาเรตุนฺติ ฯ
อนุชานามิ ภิกฺขเว ปาณินา อาโกเฏตุนฺติ ฯ
     [๑๔๘]   เตน  โข  ปน  สมเยน  ฉพฺพคฺคิยา ^๑- ภิกฺขู อจฺฉินฺนกานิ
จีวรานิ  ^๒-  ธาเรนฺติ  ทนฺตกสาวานิ  ^๓- ธาเรนฺติ ฯ มนุสฺสา อุชฺฌายนฺติ
ขียนฺติ  วิปาเจนฺติ  ^๔-  ฯ  ภิกฺขู  ^๕-  ภควโต เอตมตฺถํ อาโรเจสุํ ฯ น
ภิกฺขเว   อจฺฉินฺนกานิ   จีวรานิ   ธาเรตพฺพานิ  โย  ธาเรยฺย  อาปตฺติ
ทุกฺกฏสฺสาติ ฯ
     [๑๔๙]   อถโข ภควา ราชคเห ยถาภิรนฺตํ วิหริตฺวา เยน ทกฺขิณาคิริ
เตน  จาริกํ  ปกฺกามิ  ฯ  อทฺทสา  ^๖-  โข  ภควา  มาคธกฺเขตฺตํ  ^๗-
อจฺจิพทฺธํ    ปาลิพทฺธํ    มริยาทพทฺธํ    สิงฺฆาฏกพทฺธํ    ^๘-   ทิสฺวาน
อายสฺมนฺตํ  อานนฺทํ  อามนฺเตสิ  ปสฺสสิ  โน  ตฺวํ  อานนฺท  มาคธกฺเขตฺตํ
อจฺจิพทฺธํ  ปาลิพทฺธํ  มริยาทพทฺธํ  สิงฺฆาฏกพทฺธนฺติ  ฯ  เอวํ  ภนฺเตติ  ฯ
อุสฺสหสิ   ตฺวํ   อานนฺท   ภิกฺขูนํ   เอวรูปานิ   จีวรานิ  สํวิทหิตุนฺติ  ฯ
อุสฺสหามิ    ภควาติ   ฯ   อถโข   ภควา   ทกฺขิณาคิริสฺมึ   ยถาภิรนฺตํ
วิหริตฺวา ปุนเทว ราชคหํ ปจฺฉาคจฺฉิ ฯ
     {๑๔๙.๑}   อถโข   อายสฺมา   อานนฺโท   สมฺพหุลานํ   ภิกฺขูนํ
จีวรานิ    สํวิทหิตฺวา    เยน    ภควา    เตนุปสงฺกมิ   อุปสงฺกมิตฺวา
ภควนฺตํ    เอตทโวจ    ปสฺสตุ    เม    ภนฺเต    ภควา    จีวรานิ
สํวิทหิตานีติ    ฯ    อถโข    ภควา    เอตสฺมึ    นิทาเน   เอตสฺมึ
@เชิงอรรถ: ^๑ ม. ยุ. อยํ ปาโฐ น ทิสฺสติ ฯ ^๒ ยุ. อยํ ปาโฐ น ทิสฺสติ ฯ ^๓ ม. ยุ.
@ทนฺตกาสาวานิ ฯ ^๔ ม. อิโต ปรํ เสยฺยถาปิ นาม คิหี กามโภคิโนติ ทิสฺสติ ฯ
@^๕ ตตฺถายํ ปาโฐ น โหติ ฯ ^๖ ยุ. อทฺทส ฯ ^๗ ม. ยุ. มคธเขตฺตํ ฯ
@๘. ยุ. อจฺจิพนฺธํ ปาลิพนฺธํ มริยาทพนฺธํ สิงฺฆาฏกพนฺธํ ฯ โป. ม. อจฺฉิพนฺธํ ฯ
ปกรเณ   ธมฺมึ   กถํ   กตฺวา   ภิกฺขู   อามนฺเตสิ   ปณฺฑิโต   ภิกฺขเว
อานนฺโท   มหาปญฺโญ   ภิกฺขเว   อานนฺโท   ยตฺร   หิ   นาม   มยา
สงฺขิตฺเตน   ภาสิตสฺส   วิตฺถาเรน   อตฺถํ   อาชานิสฺสติ   กุสิมฺปิ  นาม
กริสฺสติ    อฑฺฒกุสิมฺปิ    นาม    กริสฺสติ   มณฺฑลมฺปิ   นาม   กริสฺสติ
อฑฺฒมณฺฑลมฺปิ     นาม     กริสฺสติ     วิวฏฺฏมฺปิ     นาม    กริสฺสติ
อนุวิวฏฺฏมฺปิ   นาม   กริสฺสติ  คีเวยฺยกมฺปิ  นาม  กริสฺสติ  ชงฺเฆยฺยกมฺปิ
นาม   กริสฺสติ   พาหนฺตมฺปิ   นาม   กริสฺสติ   ฉินฺนกญฺจ  ^๑-  ภวิสฺสติ
สตฺถลูขํ     สมณสารุปฺปํ     ปจฺจตฺถิกานญฺจ     อนภิชฺฌิตํ    อนุชานามิ
ภิกฺขเว ฉินฺนกํ สงฺฆาฏึ ฉินฺนกํ อุตฺตราสงฺคํ ฉินฺนกํ อนฺตรวาสกนฺติ ฯ
     [๑๕๐]   อถโข   ภควา   ราชคเห  ยถาภิรนฺตํ  วิหริตฺวา  เยน
เวสาลี  เตน  จาริกํ  ปกฺกามิ  ฯ  อทฺทสา  โข  ภควา  ^๒- อนฺตรา จ
ราชคหํ   อนฺตรา   จ   เวสาลึ   อทฺธานมคฺคปฏิปนฺโน  สมฺพหุเล  ภิกฺขู
จีวเรหิ   อุพฺภณฺฑีกเต   ^๓-  สีเสปิ  จีวรภิสึ  กริตฺวา  ขนฺเธปิ  จีวรภิสึ
กริตฺวา   กฏิยาปิ   จีวรภิสึ   กริตฺวา   อาคจฺฉนฺเต   ทิสฺวาน  ภควโต
เอตทโหสิ   อติลหุํ  โข  อิเม  โมฆปุริสา  จีวเร  พาหุลฺลาย  อาวฏฺฏา
ยนฺนูนาหํ   ภิกฺขูนํ   จีวเร   สีมํ   พนฺเธยฺย   มริยาทํ   ฐเปยฺยนฺติ  ฯ
อถโข  ภควา  อนุปุพฺเพน  จาริกํ  จรมาโน  เยน  เวสาลี  ตทวสริ  ฯ
ตตฺร   สุทํ  ภควา  เวสาลิยํ  วิหรติ  โคตมเก  เจติเย  ฯ  เตน  โข
ปน    สมเยน   ภควา   สีตาสุ   เหมนฺติกาสุ   รตฺตีสุ   อนฺตรฏฺฐกาสุ
หิมปาตสมเย     รตฺตึ     อชฺโฌกาเส     เอกจีวโร     นิสีทิ    น
@เชิงอรรถ: ^๑ โป. ม. ฉินฺนกํ ฯ ^๒ ม. อทฺทส ภควา ฯ ^๓ ม. ยุ. อุพฺภณฺฑิกเต ฯ
ภควนฺตํ   สีตํ   อโหสิ   ^๑-   นิกฺขนฺเต   ปฐเม  ยาเม  สีตํ  ภควนฺตํ
อโหสิ    ทุติยํ   ภควา   จีวรํ   ปารุปิ   น   ภควนฺตํ   สีตํ   อโหสิ
นิกฺขนฺเต   มชฺฌิเม   ยาเม   สีตํ  ภควนฺตํ  อโหสิ  ตติยํ  ภควา  จีวรํ
ปารุปิ  น  ภควนฺตํ  สีตํ  อโหสิ  นิกฺขนฺเต  ปจฺฉิเม  ยาเม  อุทฺธเต ^๒-
อรุเณ    นนฺทิมุขิยา    รตฺติยา    สีตํ    ภควนฺตํ    อโหสิ    จตุตฺถํ
ภควา   จีวรํ   ปารุปิ   น   ภควนฺตํ  สีตํ  อโหสิ  ฯ  อถโข  ภควโต
เอตทโหสิ   เยปิ   โข   เต   กุลปุตฺตา  อิมสฺมึ  ธมฺมวินเย  สีตาลุกา
สีตภีรุกา    เตปิ   สกฺโกนฺติ   ติจีวเรน   ยาเปตุํ   ยนฺนูนาหํ   ภิกฺขูนํ
จีวเร สีมํ พนฺเธยฺยํ มริยาทํ ฐเปยฺยํ ติจีวรํ อนุชาเนยฺยนฺติ ฯ
     {๑๕๐.๑}   อถโข   ภควา   เอตสฺมึ  นิทาเน  เอตสฺมึ  ปกรเณ
ธมฺมึ  กถํ  กตฺวา  ภิกฺขู  อามนฺเตสิ  อิธาหํ  ภิกฺขเว  อนฺตรา จ ราชคหํ
อนฺตรา   จ   เวสาลึ   อทฺธานมคฺคปฏิปนฺโน   อทฺทสํ   สมฺพหุเล  ภิกฺขู
จีวเรหิ  อุพฺภณฺฑีกเต  สีเสปิ  จีวรภิสึ  กริตฺวา  ขนฺเธปิ  จีวรภิสึ กริตฺวา
กฏิยาปิ   จีวรภิสึ   กริตฺวา   อาคจฺฉนฺเต   ทิสฺวาน   เม   เอตทโหสิ
อติลหุํ   โข   อิเม  โมฆปุริสา  จีวเร  พาหุลฺลาย  อาวฏฺฏา  ยนฺนูนาหํ
ภิกฺขูนํ   จีวเร  สีมํ  พนฺเธยฺยํ  มริยาทํ  ฐเปยฺยนฺติ  ฯ  อิธาหํ  ภิกฺขเว
สีตาสุ      เหมนฺติกาสุ     รตฺตีสุ     อนฺตรฏฺฐกาสุ     หิมปาตสมเย
รตฺตึ   อชฺโฌกาเส   เอกจีวโร   นิสีทึ   น  มํ  สีตํ  อโหสิ  นิกฺขนฺเต
ปฐเม   ยาเม   สีตํ   มํ   อโหสิ   ทุติยาหํ   จีวรํ   ปารุปึ   น  มํ
@เชิงอรรถ: ^๑ น ภควนฺตํ สีตํ อโหสีติ ภควโต สีตํ นาโหสีติ อฏฺฐกถา ฯ ^๒ โป. ม. อุทฺทสฺสเต ฯ
สีตํ   อโหสิ   นิกฺขนฺเต   มชฺฌิเม   ยาเม   สีตํ   มํ  อโหสิ  ตติยาหํ
จีวรํ   ปารุปึ   น  มํ  สีตํ  อโหสิ  นิกฺขนฺเต  ปจฺฉิเม  ยาเม  อุทฺธเต
อรุเณ    นนฺทิมุขิยา    รตฺติยา   สีตํ   มํ   อโหสิ   จตุตฺถาหํ   จีวรํ
ปารุปึ   น   มํ   สีตํ   อโหสิ  ตสฺส  มยฺหํ  ภิกฺขเว  เอตทโหสิ  เยปิ
โข   เต   กุลปุตฺตา   อิมสฺมึ   ธมฺมวินเย   สีตาลุกา  สีตภีรุกา  เตปิ
สกฺโกนฺติ   ติจีวเรน   ยาเปตุํ  ยนฺนูนาหํ  ภิกฺขูนํ  จีวเร  สีมํ  พนฺเธยฺยํ
มริยาทํ    ฐเปยฺยํ    ติจีวรํ    อนุชาเนยฺยนฺติ    อนุชานามิ   ภิกฺขเว
ติจีวรํ    ทฺวิคุณํ    ^๑-   สงฺฆาฏึ   เอกจฺจิยํ   อุตฺตราสงฺคํ   เอกจฺจิยํ
อนฺตรวาสกนฺติ ฯ
เนื้อความพระไตรปิฎกฉบับภาษาบาลีอักษรไทย เล่มที่ ๕ หน้าที่ ๑๙๘-๒๐๕. https://84000.org/tipitaka/read/pali_item.php?book=5&item=146&items=5 อ่านโดยใช้เครื่องหมาย [เลขข้อ] เป็นเกณฑ์แบ่งข้อ :- https://84000.org/tipitaka/read/pali_item.php?book=5&item=146&items=5&mode=bracket อ่านเทียบพระไตรปิฎกฉบับภาษาบาลีอักษรโรมัน :- https://84000.org/tipitaka/read/roman_item.php?book=5&item=146&items=5 อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=5&item=146&items=5 ศึกษาอรรถกถานี้ได้ที่ :- https://84000.org/tipitaka/attha/attha.php?b=5&i=146 สารบัญพระไตรปิฎกเล่มที่ ๕ https://84000.org/tipitaka/read/?index_5 https://84000.org/tipitaka/english/?index_5