พระไตรปิฎกเล่มที่ ๓๗ ภาษาบาลี อักษรไทย
พระอภิธรรมปิฎกเล่มที่ ๔ อภิ. กถาวตฺถุ

                                        ปฏิสมฺภิทากถา
     [๑๐๕๙]   สพฺพํ  ญาณํ  ปฏิสมฺภิทาติ  ฯ  อามนฺตา  ฯ  สมฺมติญาณํ
ปฏิสมฺภิทาติ  ฯ  น  เหวํ  วตฺตพฺเพ  ฯเปฯ  สมฺมติญาณํ  ปฏิสมฺภิทาติ  ฯ
อามนฺตา  ฯ  เย  เกจิ  สมฺมตึ  ชานนฺติ  สพฺเพ เต ปฏิสมฺภิทปฺปตฺตาติ ฯ
น   เหวํ  วตฺตพฺเพ  ฯเปฯ  สพฺพํ  ญาณํ  ปฏิสมฺภิทาติ  ฯ  อามนฺตา  ฯ
เจโตปริยาเย   ญาณํ   ปฏิสมฺภิทาติ   ฯ   น   เหวํ  วตฺตพฺเพ  ฯเปฯ
เจโตปริยาเย  ญาณํ  ปฏิสมฺภิทาติ  ฯ  อามนฺตา  ฯ  เย  เกจิ  ปรจิตฺตํ
ชานนฺติ สพฺเพ เต ปฏิสมฺภิทปฺปตฺตาติ ฯ น เหวํ วตฺตพฺเพ ฯเปฯ
     [๑๐๖๐]   สพฺพํ   ญาณํ   ปฏิสมฺภิทาติ   ฯ  อามนฺตา  ฯ  สพฺพา
ปญฺญา   ปฏิสมฺภิทาติ   ฯ   น   เหวํ  วตฺตพฺเพ  ฯเปฯ  สพฺพา  ปญฺญา
ปฏิสมฺภิทาติ    ฯ   อามนฺตา   ฯ   ปฐวีกสิณํ   สมาปตฺตึ   สมาปนฺนสฺส
อตฺถิ   ปญฺญา   สา   ปญฺญา   ปฏิสมฺภิทาติ   ฯ   น   เหวํ  วตฺตพฺเพ
ฯเปฯ   อาโปกสิณํ   ฯเปฯ   เตโชกสิณํ   ฯเปฯ   วาโยกสิณํ   ฯเปฯ
นีลกสิณํ   ฯเปฯ   ปีตกสิณํ   ฯเปฯ   โลหิตกสิณํ   ฯเปฯ   โอทาตกสิณํ
ฯเปฯ     อากาสานญฺจายตนํ     ฯเปฯ     วิญฺญาณญฺจายตนํ    ฯเปฯ
อากิญฺจญฺญายตนํ      ฯเปฯ     เนวสญฺญานาสญฺญายตนํ     สมาปนฺนสฺส
ฯเปฯ   ทานํ   ททนฺตสฺส   ฯเปฯ   จีวรํ   ททนฺตสฺส  ฯเปฯ  ปิณฺฑปาตํ
ททนฺตสฺส  ฯเปฯ  เสนาสนํ  ททนฺตสฺส  ฯเปฯ  คิลานปจฺจยเภสชฺชปริกฺขารํ
ททนฺตสฺส     อตฺถิ     ปญฺญา     สา    ปญฺญา    ปฏิสมฺภิทาติ    ฯ
น เหวํ วตฺตพฺเพ ฯเปฯ
     [๑๐๖๑]   น  วตฺตพฺพํ  สพฺพํ  ญาณํ  ปฏิสมฺภิทาติ  ฯ  อามนฺตา  ฯ
อตฺถิ   โลกุตฺตรา   ปญฺญา   สา   ปญฺญา   น   ปฏิสมฺภิทาติ   ฯ   น
เหวํ วตฺตพฺเพ ฯเปฯ เตน หิ สพฺพํ ญาณํ ปฏิสมฺภิทาติ ฯ
                                       ปฏิสมฺภิทากถา
                                           ----------
                                         สมฺมติญาณกถา
     [๑๐๖๒]   น    วตฺตพฺพํ    สมฺมติญาณํ   สจฺจารมฺมณญฺเญว   น
อญฺญารมฺมณนฺติ    ฯ    อามนฺตา    ฯ    นนุ    ปฐวีกสิณํ   สมาปตฺตึ
สมาปนฺนสฺส     อตฺถิ     ญาณํ    ปฐวีกสิณญฺจ    สมฺมติสจฺจมฺหีติ    ฯ
อามนฺตา    ฯ    หญฺจิ    ปฐวีกสิณํ    สมาปตฺตึ   สมาปนฺนสฺส   อตฺถิ
ญาณํ    ปฐวีกสิณญฺจ    สมฺมติสจฺจมฺหิ    เตน    วต   เร   วตฺตพฺเพ
สมฺมติญาณํ สจฺจารมฺมณญฺเญว น อญฺญารมฺมณนฺติ ฯ
     [๑๐๖๓]   น    วตฺตพฺพํ    สมฺมติญาณํ   สจฺจารมฺมณญฺเญว   น
อญฺญารมฺมณนฺติ   ฯ   อามนฺตา   ฯ  นนุ  อาโปกสิณํ  ฯเปฯ  เตโชกสิณํ
ฯเปฯ     คิลานปจฺจยเภสชฺชปริกฺขารํ     ททนฺตสฺส     อตฺถิ     ญาณํ
คิลานปจฺจยเภสชฺชปริกฺขาโร    จ   สมฺมติสจฺจมฺหีติ   ฯ   อามนฺตา   ฯ
หญฺจิ      คิลานปจฺจยเภสชฺชปริกฺขารํ     ททนฺตสฺส     อตฺถิ     ญาณํ
คิลานปจฺจยเภสชฺชปริกฺขาโร  จ  สมฺมติสจฺจมฺหิ  เตน  วต  เร  วตฺตพฺเพ
สมฺมติญาณํ สจฺจารมฺมณญฺเญว น อญฺญารมฺมณนฺติ ฯ
     [๑๐๖๔]   สมฺมติญาณํ   สจฺจารมฺมณญฺเญว   น  อญฺญารมฺมณนฺติ  ฯ
อามนฺตา    ฯ   เตน   ญาเณน   ทุกฺขํ   ปริชานาติ   สมุทยํ   ปชหติ
นิโรธํ สจฺฉิกโรติ มคฺคํ ภาเวตีติ ฯ น เหวํ วตฺตพฺเพ ฯเปฯ
                                          สมฺมติญาณกถา ฯ
                                           ----------
                                        จิตฺตารมฺมณกถา
     [๑๐๖๕]   เจโตปริยาเย     ญาณํ    จิตฺตารมฺมณญฺเญว    น
อญฺญารมฺมณนฺติ  ฯ  อามนฺตา  ฯ  นนุ  อตฺถิ  โกจิ  สราคํ  จิตฺตํ  สราคํ
จิตฺตนฺติ   ปชานาตีติ   ฯ   อามนฺตา   ฯ   หญฺจิ   อตฺถิ  โกจิ  สราคํ
จิตฺตํ  สราคํ  จิตฺตนฺติ  ปชานาติ  โน  วต  เร  วตฺตพฺเพ เจโตปริยาเย
ญาณํ    จิตฺตารมฺมณญฺเญว    น    อญฺญารมฺมณนฺติ    ฯ    นนุ   อตฺถิ
โกจิ    วีตราคํ    จิตฺตํ   วีตราคํ   จิตฺตนฺติ   ฯเปฯ   สโทสํ   จิตฺตํ
ฯเปฯ   วีตโทสํ   จิตฺตํ   สโมหํ   จิตฺตํ  วีตโมหํ  จิตฺตํ  สงฺขิตฺตํ  จิตฺตํ
วิกฺขิตฺตํ    จิตฺตํ   มหคฺคตํ   จิตฺตํ   อมหคฺคตํ   จิตฺตํ   สอุตฺตรํ   จิตฺตํ
อนุตฺตรํ    จิตฺตํ    สมาหิตํ   จิตฺตํ   อสมาหิตํ   จิตฺตํ   วิมุตฺตํ   จิตฺตํ
ฯเปฯ   อวิมุตฺตํ   จิตฺตํ  อวิมุตฺตํ  จิตฺตนฺติ  ปชานาตีติ  ฯ  อามนฺตา  ฯ
หญฺจิ    อตฺถิ   โกจิ   อวิมุตฺตํ   จิตฺตํ   อวิมุตฺตํ   จิตฺตนฺติ   ปชานาติ
โน   วต   เร   วตฺตพฺเพ   เจโตปริยาเย   ญาณํ   จิตฺตารมฺมณญฺเญว
นํ อญฺญารมฺมณนฺติ ฯ
     [๑๐๖๖]   ผสฺสารมฺมเณ  ญาณํ  วตฺตพฺพํ  เจโตปริยาเย  ญาณนฺติ ฯ
อามนฺตา   ฯ   หญฺจิ   ผสฺสารมฺมเณ   ญาณํ   วตฺตพฺพํ   เจโตปริยาเย
ญาณํ   โน  วต  เร  วตฺตพฺเพ  เจโตปริยาเย  ญาณํ  จิตฺตารมฺมณญฺเญว
น      อญฺญารมฺมณนฺติ     ฯ     เวทนารมฺมเณ     ญาณํ     ฯเปฯ
สญฺญารมฺมเณ    ญาณํ    เจตนารมฺมเณ    ญาณํ   จิตฺตารมฺมเณ   ญาณํ
สทฺธารมฺมเณ    ญาณํ    วิริยารมฺมเณ    ญาณํ    สตารมฺมเณ    ญาณํ
สมาธารมฺมเณ    ญาณํ    ปญฺญารมฺมเณ   ญาณํ   ฯเปฯ   ราคารมฺมเณ
ญาณํ    ฯเปฯ    โทสารมฺมเณ    ญาณํ    ฯเปฯ   อโนตฺตปฺปารมฺมเณ
ญาณํ   วตฺตพฺพํ   เจโตปริยาเย   ญาณนฺติ   ฯ   อามนฺตา   ฯ   หญฺจิ
อโนตฺตปฺปารมฺมเณ    ญาณํ    วตฺตพฺพํ    เจโตปริยาเย    ญาณํ   โน
วต    เร   วตฺตพฺเพ   เจโตปริยาเย   ญาณํ   จิตฺตารมฺมณญฺเญว   น
อญฺญารมฺมณนฺติ ฯ
     [๑๐๖๗]   ผสฺสารมฺมเณ   ญาณํ   น   วตฺตพฺพํ   เจโตปริยาเย
ญาณนฺติ   ฯ   อามนฺตา   ฯ   ผสฺสปริยาเย   ญาณนฺติ   ฯ   น  เหวํ
วตฺตพฺเพ    ฯเปฯ    เวทนารมฺมเณ    ญาณํ    ฯเปฯ   สญฺญารมฺมเณ
ญาณํ   ฯเปฯ   อโนตฺตปฺปารมฺมเณ   ญาณํ  น  วตฺตพฺพํ   เจโตปริยาเย
ญาณนฺติ   ฯ   อามนฺตา   ฯ  อโนตฺตปฺปปริยาเย  ญาณนฺติ  ฯ  น  เหวํ
วตฺตพฺเพ ฯเปฯ
     [๑๐๖๘]   น   วตฺตพฺพํ   เจโตปริยาเย  ญาณํ  จิตฺตารมฺมณญฺเญว
น   อญฺญารมฺมณนฺติ   ฯ  อามนฺตา  ฯ  นนุ  เจโตปริยาเย  ญาณนฺติ  ฯ
อามนฺตา   ฯ   หญฺจิ   เจโตปริยาเย  ญาณํ  เตน  วต  เร  วตฺตพฺเพ
เจโตปริยาเย ญาณํ จิตฺตารมฺมณญฺเญว น อญฺญารมฺมณนฺติ ฯ
                                     จิตฺตารมฺมณกถา ฯ
                                             ------
                                       อนาคตญาณกถา
     [๑๐๖๙]   อนาคเต   ญาณํ   อตฺถีติ   ฯ  อามนฺตา  ฯ  อนาคตํ
มูลโต    ชานาติ   เหตุโต   ชานาติ   นิทานโต   ชานาติ   สมฺภวโต
ชานาติ    ปภวโต    ชานาติ    สมุฏฺฐานโต    ชานาติ    อาหารโต
ชานาติ    อารมฺมณโต    ชานาติ    ปจฺจยโต    ชานาติ    สมุทยโต
ชานาตีติ ฯ น เหวํ วตฺตพฺเพ ฯเปฯ
     [๑๐๗๐]   อนาคเต   ญาณํ   อตฺถีติ   ฯ  อามนฺตา  ฯ  อนาคตํ
เหตุปจฺจยตํ     ชานาติ    อารมฺมณปจฺจยตํ    ชานาติ    อธิปติปจฺจยตํ
ชานาติ    อนนฺตรปจฺจยตํ    ชานาติ   สมนนฺตรปจฺจยตํ   ชานาตีติ   ฯ
น เหวํ วตฺตพฺเพ ฯเปฯ
     [๑๐๗๑]   อนาคเต   ญาณํ  อตฺถีติ  ฯ  อามนฺตา  ฯ  โคตฺรภุโน
ปุคฺคลสฺส  โสตาปตฺติมคฺเค  ญาณํ  อตฺถีติ  ฯ  น  เหวํ  วตฺตพฺเพ  ฯเปฯ
โสตาปตฺติผลสจฺฉิกิริยาย     ปฏิปนฺนสฺส     ปุคฺคลสฺส     โสตาปตฺติผเล
ญาณํ   อตฺถีติ   ฯ  น  เหวํ  วตฺตพฺเพ  ฯเปฯ  สกทาคามิผลสจฺฉิกิริยาย
ฯเปฯ   อนาคามิผลสจฺฉิกิริยาย   ฯเปฯ   อรหตฺตสจฺฉิกิริยาย  ปฏิปนฺนสฺส
ปุคฺคลสฺส อรหตฺเต ญาณํ อตฺถีติ ฯ น เหวํ วตฺตพฺเพ ฯเปฯ

             เนื้อความพระไตรปิฎกฉบับภาษาบาลีอักษรไทย เล่มที่ ๓๗ หน้าที่ ๓๓๖-๓๔๑.
https://84000.org/tipitaka/read/pali_item.php?book=37&item=1059&items=13
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
https://84000.org/tipitaka/read/pali_item.php?book=37&item=1059&items=13&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
https://84000.org/tipitaka/read/roman_item.php?book=37&item=1059&items=13
             อ่านเทียบพระไตรปิฎกภาษาไทยฉบับหลวง :-
https://84000.org/tipitaka/read/byitem.php?book=37&item=1059&items=13
             ศึกษาอรรถกถานี้ได้ที่ :-
https://84000.org/tipitaka/attha/attha.php?b=37&i=1059
             สารบัญพระไตรปิฎกเล่มที่ ๓๗
https://84000.org/tipitaka/read/?index_37
https://84000.org/tipitaka/english/?index_37