[959] Ete vitakke paridevaneyyeti ete vitakketi dve
@Footnote: 1 Ma. sabbattha asissaṃ kuva vā. 2 Ma. aniketacārī. 3 Ma. sayittha
@4 Yu. saphalake. 5 Ma. āgāmirattiṃ.
Piṇḍapātapaṭisaññutte vitakke dve senāsanapaṭisaññutte
vitakke paridevaneyye 1- ādevaneyya paridevaneyyāti ete
vitakke paridevaneyye.
[960] Vinayetha sekkho aniketasārīti sekkhoti kiṃkāraṇā
vuccati sekkho . sikkhatīti sekkho . kiñca sikkhati . adhisīlampi
sikkhati adhicittampi sikkhati adhipaññampi sikkhati . katamā
adhisīlasikkhā .pe. ayaṃ adhipaññāsikkhā . imā tisso sikkhā
āvajjento sikkhati jānanto sikkhati passanto sikkhati
paccavekkhanto sikkhati cittaṃ adhiṭṭhahanto sikkhati saddhāya
adhimuccanto sikkhati viriyaṃ paggaṇhanto sikkhati satiṃ upaṭṭhahanto
sikkhati cittaṃ samādahanto sikkhati paññāya pajānanto sikkhati
abhiññeyyaṃ abhijānanto sikkhati pariññeyyaṃ parijānanto sikkhati
pahātabbaṃ pajahanto sikkhati sacchikātabbaṃ sacchikaronto sikkhati
bhāvetabbaṃ bhāvento sikkhati ācarati samācarati samādāya sikkhati .
Taṃkāraṇā vuccati sekkho . sekkho vinayāya paṭivinayāya pahānāya
vūpasamāya paṭinissaggāya paṭippassaddhiyā adhisīlampi sikkheyya
adhicittampi sikkheyya adhipaññampi sikkheyya imā tisso sikkhā
āvajjanto sikkheyya jānanto .pe. sacchikātabbaṃ sacchikaronto
sikkheyya ācareyya samācareyya samādāya vatteyyāti vinayetha
sekkho.
@Footnote: 1 Ma. paridevaneyyeti.
[961] Aniketasārīti kathaṃ niketasārī hoti . idhekacco
kulapalibodhena samannāgato hoti gaṇapalibodhena āvāsapalibodhena
cīvarapalibodhena piṇḍapātapalibodhena senāsanapalibodhena gilānapaccaya-
bhesajjaparikkhārapalibodhena samannāgato hoti evaṃ niketasārī
hoti.
{961.1} Kathaṃ aniketasārī hoti . idha bhikkhu na kulapalibodhena
samannāgato hoti na gaṇa āvāsa cīvarapiṇḍapātasenāsanagilāna-
paccayabhesajjaparikkhārapalibodhena samannāgato hoti evaṃ aniketasārī
hoti.
Magadhaṃ gatā kosalaṃ gatā
ekacciyā [1]- vajjibhūmiyā
māgadhā 2- visaṅghacārino
aniketā viharanti bhikkhavo
sādhu caritaṃ 3- sādhu sucaritaṃ
sādhu sadā aniketavihāro
atthapucchanaṃ dakkhakammaṃ 4-
etaṃ sāmaññaṃ ākiñcanassāti.
Vinayetha sekkho aniketasārī. Tenāha bhagavā
kiṃsū asissāmi kuvaṃ vā asissaṃ
dukkhaṃ vata settha kuvajja sessaṃ
@Footnote: 1 Po. Ma. panasaddo dissati. 2 Ma. migā viya asaṅghacārino. 3 Ma. caritakaṃ.
@4 Ma. padakkhiṇaṃ kammaṃ.
Ete vitakke paridevaneyye
vinayetha sekkho aniketasārīti.
[962] Annañca laddhā vasanañca kāle
mattaṃ so jaññā 1- idha tosanatthaṃ
so tesu gutto yatacāri gāme
rusitopi vācaṃ pharusaṃ na vajjā.
[963] Annañca laddhā vasanañca kāleti annanti odano
kummāso sattu maccho maṃsaṃ . vasananti cha cīvarāni khomaṃ
kappāsikaṃ koseyyaṃ kambalaṃ sāṇaṃ bhaṅgaṃ . annañca laddhā
vasanañca kāleti cīvaraṃ labhitvā piṇḍapātaṃ labhitvā na kuhanāya
na lapanāya na nemittikatāya na nippesikatāya na lābhena lābhaṃ
nijigiṃsanatāya na dārudānena na veḷudānena na pattadānena na
pupphadānena na phaladānena na sinānadānena na cuṇṇadānena na
mattikadānena na dantakaṭṭhadānena na mukhodakadānena na pātukamyatāya 2-
na muggasūpatāya na pāribhaṭyatāya na pīṭhamaddikatāya na vatthuvijjāya
na tiracchānavijjāya na aṅgavijjāya na nakkhattavijjāya na dūtagamanena
na pahīnagamanena na jaṅghapesanena 3- na vejjakammena na piṇḍakena 4-
na dānānuppadānena dhammena samena laddhā labhitvā abhivinditvā 5-
paṭilabhitvāti annañca laddhā vasanañca kāle.
[964] Mattaṃ so jaññā idha tosanatthanti mattaṃ so
@Footnote: 1 Ma. mattaṃ sa jaññā. 2 Ma. cātu ... 3 Ma. jaṅghapesanikena.
@4 Ma. piṇḍapaṭipiṇḍakena. 5 Ma. adhigantvā vinditvā.
Jaññāti dvīhi kāraṇehi mattaṃ jānāti 1- paṭiggahaṇato vā
paribhogato vā.
{964.1} Kathaṃ paṭiggahaṇato mattaṃ jānāti . Thokepi diyamāne
kulānudayāya kulānurakkhāya kulānukampāya paṭiggaṇhāti bahukepi
diyamāne kāyaparihārikaṃ cīvaraṃ paṭiggaṇhāti kucchiparihārikaṃ
piṇḍapātaṃ paṭiggaṇhāti evaṃ paṭiggahaṇato mattaṃ jānāti.
{964.2} Kathaṃ paribhogato mattaṃ jānāti. Paṭisaṅkhā yoniso cīvaraṃ
paṭisevati yāvadeva sītassa paṭighātāya uṇhassa paṭighātāya
ḍaṃsamakasavātātapasiriṃsapasamphassānaṃ paṭighātāya yāvadeva
hirikopinapaṭicchādanatthaṃ . paṭisaṅkhā yoniso piṇḍapātaṃ paṭisevati
neva davāya na madāya na maṇḍanāya na vibhūsanāya yāvadeva imassa
kāyassa ṭhitiyā yāpanāya vihiṃsuparatiyā brahmacariyānuggahāya
iti purāṇañca vedanaṃ paṭihaṅkhāmi navañca vedanaṃ na uppādessāmi
yātrā ca me bhavissati anavajjatā ca phāsuvihāro cāti. Paṭisaṅkhā
yoniso senāsanaṃ paṭisevati yāvadeva sītassa paṭighātāya uṇhassa
paṭighātāya ḍaṃsamakasavātātapasiriṃsapasamphassānaṃ paṭighātāya yāvadeva
utuparissayavinodanaṃ paṭisallānārāmatthaṃ . paṭisaṅkhā yoniso gilāna-
paccayabhesajjaparikkhāraṃ paṭisevati yāvadeva uppannānaṃ veyyābādhikānaṃ 2-
vedanānaṃ paṭighātāya abyāpajjhaparamatāya . evaṃ paribhogato mattaṃ
jānāti.
@Footnote: 1 Ma. jāneyya. 2 Ma. byābādhikānaṃ.
{964.3} Mattaṃ so jaññāti imehi dvīhi kāraṇehi mattaṃ
jāneyya ājāneyya vijāneyya paṭivijāneyya paṭivijjheyyāti
mattaṃ so jaññā.
[965] Idha tosanatthanti idha bhikkhu santuṭṭho hoti
itarītarena cīvarena itarītaracīvarasantuṭṭhiyā ca vaṇṇavādī na ca
cīvarahetu anesanaṃ appaṭirūpaṃ āpajjati aladdhā ca cīvaraṃ na
paritassati laddhā ca cīvaraṃ agadhito amucchito anajjhāpanno
ādīnavadassāvī nissaraṇapañño paribhuñjati tāya ca pana
itarītaracīvarasantuṭṭhiyā nevattānukkaṃseti na paraṃ vambheti yo
hi tattha dakkho analaso sampajāno paṭissato ayaṃ vuccati
bhikkhu porāṇe aggaññe ariyavaṃse ṭhito.
{965.1} Punacaparaṃ bhikkhu santuṭṭho hoti itarītarena piṇḍapātena
itarītarapiṇḍapātasantuṭṭhiyā ca vaṇṇavādī na ca piṇḍapātahetu
anesanaṃ appaṭirūpaṃ āpajjati aladdhā ca piṇḍapātaṃ na paritassati
laddhā ca piṇḍapātaṃ agadhito amucchito anajjhāpanno
ādīnavadassāvī nissaraṇapañño paribhuñjati tāya ca pana
itarītarapiṇḍapātasantuṭṭhiyā nevattānukkaṃseti na paraṃ
vambheti yo hi tattha dakkho analaso sampajāno paṭissato ayaṃ
vuccati bhikkhu porāṇe aggaññe ariyavaṃse ṭhito . punacaparaṃ bhikkhu
santuṭṭho hoti itarītarena senāsanena itarītarasenāsanasantuṭṭhiyā
ca vaṇṇavādī na ca senāsanahetu anesanaṃ appaṭirūpaṃ
Āpajjati aladdhā ca senāsanaṃ na paritassati laddhā ca senāsanaṃ
agadhito amucchito anajjhāpanno ādīnavadassāvī nissaraṇapañño
paribhuñjati tāya ca pana itarītarasenāsanasantuṭṭhiyā nevattānukkaṃseti
na paraṃ vambheti yo hi tattha dakkho analaso sampajāno
paṭissato ayaṃ vuccati bhikkhu porāṇe aggaññe ariyavaṃse ṭhito.
{965.2} Punacaparaṃ bhikkhu santuṭṭho hoti itarītarena gilānapaccaya-
bhesajjaparikkhārena itarītaragilānapaccayabhesajjaparikkhārasantuṭṭhiyā
ca vaṇṇavādī na ca gilānapaccayabhesajjaparikkhārahetu anesanaṃ appaṭirūpaṃ
āpajjati aladdhā ca gilānapaccayabhesajjaparikkhāraṃ na paritassati
laddhā ca gilānapaccayabhesajjaparikkhāraṃ agadhito amucchito anajjhāpanno
ādīnavadassāvī nissaraṇapañño paribhuñjati tāya ca pana itarītaragilāna-
paccayabhesajjaparikkhārasantuṭṭhiyā nevattānukkaṃseti na paraṃ vambheti
yo hi tattha dakkho analaso sampajāno paṭissato ayaṃ vuccati bhikkhu
porāṇe aggaññe ariyavaṃse ṭhitoti mattaṃ so jaññā idha tosanatthaṃ.
[966] So tesu gutto yatacāri gāmeti so tesu guttoti
cīvare piṇḍapāte senāsane gilānapaccayabhesajjaparikkhāre gutto
gopito rakkhito saṃvutoti evampi so tesu gutto . athavā
āyatanesu gutto gopito rakkhito saṃvutoti evampi so tesu
gutto . yatacāri gāmeti gāme yato yatto paṭiyatto gutto
Gopito rakkhito saṃvutoti so tesu gutto yatacāri gāme.
[967] Rusitopi vācaṃ pharusaṃ na vajjāti rusito 1- khuṃsito vambhito
ghaṭṭito garahito upavadito pharusena kakkhaḷena [2]- bhaṇantaṃ
nappaṭibhaṇeyya akkosantaṃ na paccakkoseyya rosantaṃ nappaṭiroseyya
bhaṇḍantaṃ nappaṭibhaṇḍeyya na kalahaṃ kareyya na bhaṇḍanaṃ kareyya
na viggahaṃ kareyya na vivādaṃ kareyya na medhagaṃ kareyya kalahabhaṇḍana-
viggahavivādamedhagaṃ pajaheyya vinodeyya byantīkareyya anabhāvaṅgameyya
kalahabhaṇḍanaviggahavivādamedhagā ārato assa virato paṭivirato nikkhanto
nissaṭṭho vippamutto visaññutto vimariyādikatena cetasā vihareyyāti
rusitopi vācaṃ pharusaṃ na vajjā.
{967.1} Tenāha bhagavā
annañca laddhā vasanañca kāle
mattaṃ so jaññā idha tosanatthaṃ
so tesu gutto yatacāri gāme
rusitopi vācaṃ pharusaṃ na vajjāti.
[968] Okkhittacakkhu na ca pādalolo
jhānānuyutto bahujāgarassa
upekkhamārabbha samāhitatto
takkāsayaṃ kukkucciyūpacchinde 3-.
[969] Okkhittacakkhu na ca pādaloloti kathaṃ khittacakkhu
@Footnote: 1 Ma. dūsito. 2 Ma. nappaṭivajjā Yu. paṭibhaṇantaṃ. 3 Ma. kukkuccañcupacchinde.
Hoti . idhekacco [1]- cakkhulolo cakkhuloliyena samannāgato hoti
adiṭṭhaṃ dakkhitabbaṃ diṭṭhaṃ samatikkamitabbanti ārāmena ārāmaṃ
uyyānena uyyānaṃ gāmena gāmaṃ nigamena nigamaṃ nagarena nagaraṃ
raṭṭhena raṭṭhaṃ janapadena janapadaṃ dīghacārikaṃ anvatthitacārikaṃ anuyutto ca
hoti rūpadassanāya evampi khittacakkhu hoti . athavā bhikkhu antaragharaṃ
paviṭṭho vīthiṃ paṭipanno asaṃvuto gacchati hatthiṃ olokento
assaṃ olokento rathaṃ olokento pattiṃ olokento itthiyo
olokento purise olokento kumārake olokento
kumārikāyo olokento antarāpaṇaṃ olokento gharamukhāni
olokento 2- uddhaṃ olokento adho olokento disāvidisaṃ
pekkhamāno gacchati evampi khittacakkhu hoti.
{969.1} Athavā bhikkhu cakkhunā rūpaṃ disvā nimittaggāhī hoti
anubyañjanaggāhī yatvādhikaraṇamenaṃ cakkhundriyaṃ asaṃvutaṃ viharantaṃ
abhijjhādomanassā pāpakā akusalā dhammā anvāssaveyyuṃ
tassa saṃvarāya na paṭipajjati na rakkhati cakkhundriyaṃ cakkhundriye
na saṃvaraṃ āpajjati evampi khittacakkhu hoti . yathā vā paneke
bhonto samaṇabrāhmaṇā saddhādeyyāni bhojanāni
bhuñjitvā te evarūpaṃ visūkadassanaṃ anuyuttā viharanti
seyyathīdaṃ naccaṃ gītaṃ vāditaṃ pekkhaṃ akkhānaṃ pāṇissaraṃ vetāḷaṃ
kumbhathūnaṃ sobhanagarakaṃ caṇḍālaṃ vaṃsaṃ dhovanaṃ hatthiyuddhaṃ assayuddhaṃ
mahisayuddhaṃ usabhayuddhaṃ ajayuddhaṃ meṇḍayuddhaṃ kukkuṭayuddhaṃ vaṭṭakayuddhaṃ
@Footnote: 1 Ma. Yu. bhikkhu. 2 Po. Ma. vipekkhamāno.
Daṇḍayuddhaṃ muṭṭhiyuddhaṃ nibbuddhaṃ uyyodhikaṃ balaggaṃ senābyūhaṃ
aṇīkadassanaṃ iti vā evampi khittacakkhu hoti.
{969.2} Kathaṃ na khittacakkhu hoti. Idha 1- bhikkhu na cakkhulolo
cakkhuloliyena samannāgato hoti adiṭṭhaṃ dakkhitabbaṃ diṭṭhaṃ samatikkamitabbanti
ārāmena ārāmaṃ uyyānena uyyānaṃ gāmena gāmaṃ nigamena
nigamaṃ nagarena nagaraṃ raṭṭhena raṭṭhaṃ janapadena janapadaṃ dīghacārikaṃ
anvatthitacārikaṃ ananuyutto hoti rūpadassanāya evampi na
khittacakkhu hoti . athavā bhikkhu antaragharaṃ paviṭṭho vīthiṃ paṭipanno
saṃvuto gacchati na hatthiṃ olokento .pe. na disāvidisaṃ
pekkhamāno gacchati evampi na khittacakkhu hoti . athavā bhikkhu
cakkhunā rūpaṃ disvā na nimittaggāhī hoti .pe. cakkhundriye
saṃvaraṃ āpajjati evampi na khittacakkhu hoti . yathā vā paneke
bhonto samaṇabrāhmaṇā saddhādeyyāni bhojanāni bhuñjitvā
.pe. aṇīkadassanaṃ iti vā evarūpā visūkadassanānuyogā paṭivirato
hoti evampi na khittacakkhu hotīti okkhittacakkhu.
[970] Na ca pādaloloti kathaṃ pādalolo hoti . Idhekacco
pādalolo pādaloliyena samannāgato hoti ārāmena ārāmaṃ .pe.
Dīghacārikaṃ anvatthitacārikaṃ anuyutto hoti [2]- evampi
pādalolo hoti . athavā bhikkhu antosaṅghārāme 3- pādalolo
pādaloliyena samannāgato hoti na atthahetu na kāraṇahetu
@Footnote: 1 Ma. Yu. idhekacco. 2 Ma. Yu. rūpadassanāya. 3 Po. Ma. antopi.
Uddhato avūpasantacitto pariveṇato pariveṇaṃ gacchati .pe.
Itibhavābhavakathaṃ kathesi 1- evampi pādalolo hoti . na ca
pādaloloti pādaloliyaṃ pajaheyya vinodeyya byantīkareyya
anabhāvaṅgameyya pādaloliyā ārato assa virato paṭivirato nikkhanto
nissaṭṭho vippamutto visaññutto vimariyādikatena cetasā vihareyya
paṭisallānārāmo assa paṭisallānarato ajjhattaṃ cetosamathamanuyutto
anirākatajjhāno vipassanāya samannāgato brūhetā suññāgāraṃ
jhāyī jhānarato ekattamanuyutto sadatthagarukoti okkhittacakkhu
na ca pādalolo.
[971] Jhānānuyutto bahujāgarassāti jhānānuyuttoti dvīhi
kāraṇehi jhānānuyutto anuppannassa vā paṭhamassa jhānassa
uppādāya yutto payutto āyutto samāyutto anuppannassa
vā dutiyassa jhānassa tatiyassa jhānassa catutthassa jhānassa
uppādāya yutto payutto āyutto samāyuttoti evampi
jhānānuyutto . athavā uppannaṃ vā paṭhamaṃ jhānaṃ āsevati
bhāveti bahulīkaroti uppannaṃ vā dutiyaṃ jhānaṃ tatiyaṃ jhānaṃ catutthaṃ
jhānaṃ āsevati bhāveti bahulīkarotīti evampi jhānānuyutto .
Bahujāgarassāti idha bhikkhu divasaṃ caṅkamena nisajjāya āvaraṇīyehi
dhammehi cittaṃ parisodheti rattiyā paṭhamaṃ yāmaṃ cakkamena
nisajjāya āvaraṇīyehi dhammehi cittaṃ parisodheti rattiyā
@Footnote: 1 Po. Ma. katheti.
Majjhimaṃ yāmaṃ dakkhiṇena passena sīhaseyyaṃ kappeti pāde pādaṃ
accādhāya sato sampajāno uṭṭhānasaññaṃ manasikaritvā rattiyā
pacchimaṃ yāmaṃ paccuṭṭhāya caṅkamena nisajjāya āvaraṇīyehi dhammehi
cittaṃ parisodhetīti jhānānuyutto bahujāgarassa.
[972] Upekkhamārabbha samāhitattoti upekkhāti yā catutthe
jhāne upekkhā upekkhanā ajjhupekkhanā cittasamatā cittappassaddhatā
majjhattatā cittassa . samāhitattoti yā cittassa ṭhiti saṇṭhiti
avaṭṭhiti avisāhāro avikkhepo avisāhaṭamānasatā samatho
samādhindriyaṃ samādhibalaṃ sammāsamādhīti . upekkhamārabbha
samāhitattoti catutthe jhāne upekkhamārabbha ekaggacitto
avikkhittacitto avisāhaṭamānasoti upekkhamārabbha samāhitatto.
[973] Takkāsayaṃ kukkucciyūpacchindeti takkāti nava vitakkā
kāmavitakko byāpādavitakko vihiṃsāvitakko ñātivitakko
janapadavitakko amaravitakko parānuddayatāpaṭisaññutto vitakko
lābhasakkārasilokapaṭisaññutto vitakko anavaññattipaṭisaññutto
vitakko ime vuccanti nava vitakkā . kāmavitakkānaṃ kāmasaññāsayo
byāpādavitakkānaṃ byāpādasaññāsayo vihiṃsāvitakkānaṃ
vihiṃsāsaññāsayo . athavā takkānaṃ [1]- saṅkappānaṃ avijjāsayo
ayoniso manasikāro āsayo asmimāno āsayo anottappaṃ āsayo
uddhaccaṃ āsayo . Kukkuccanti hatthakukkuccampi kukkuccaṃ pādakukkuccampi
@Footnote: 1 Ma. vitakkānaṃ.
Kukkuccaṃ hatthapādakukkuccampi kukkuccaṃ akappiye kappiyasaññitā
kappiye akappiyasaññitā avajje vajjasaññitā vajje
avajjasaññitā yaṃ evarūpaṃ kukkuccaṃ kukkuccāyanā kukkuccāyitattaṃ
cetaso vippaṭisāro manovilekho idaṃ vuccati kukkuccaṃ . apica dvīhi
kāraṇehi uppajjati kukkuccaṃ cetaso vippaṭisāro manovilekho
katattā ca akatattā ca.
{973.1} Kathaṃ katattā ca akatattā ca uppajjati kukkuccaṃ
cetaso vippaṭisāro manovilekho . kataṃ me kāyaduccaritaṃ akataṃ me
kāyasucaritanti uppajjati kukkuccaṃ cetaso vippaṭisāro manovilekho .
Kataṃ me vacīduccaritaṃ . kataṃ me manoduccaritaṃ. Kato me pāṇātipāto
akatā me pāṇātipātā veramaṇīti uppajjati kukkuccaṃ cetaso
vippaṭisāro manovilekho . kataṃ me adinnādānaṃ . Kato me kāmesu
micchācāro . kato me musāvādo . Katā me pisuṇā vācā. Katā
me pharusā vācā . Kato me samphappalāpo. Katā me abhijjhā. Kato
me byāpādo . katā me micchādiṭṭhi akatā me sammādiṭṭhīti
uppajjati kukkuccaṃ cetaso vippaṭisāro manovilekho . evaṃ katattā
ca akatattā ca uppajjati kukkuccaṃ cetaso vippaṭisāro manovilekho.
Athavā sīlesumhi na paripūrikārīti uppajjati kukkuccaṃ cetaso vippaṭisāro
manovilekho . indriyesumhi aguttadvāroti . Bhojane amattaññumhīti.
Jāgariyaṃ ananuyuttomhīti . na satisampajaññena samannāgatomhīti .
Abhāvitā me cattāro satipaṭṭhānāti . abhāvitā me cattāro
sammappadhānāti . abhāvitā me cattāro iddhippādāti .
Abhāvitāni me pañcindriyānīti . abhāvitāni me pañca balānīti .
Abhāvitā me satta bojjhaṅgāti . abhāvito me ariyo aṭṭhaṅgiko
maggoti . dukkhaṃ me apariññātanti . dukkhasamudayo me appahīnoti.
Maggo me abhāvitoti . nirodho me asacchikatoti uppajjati kukkuccaṃ
cetaso vippaṭisāro manovilekho . takkāsayaṃ kukkucciyūpacchindeti
takkañca takkāsayañca kukkuccañca upacchindeyya [1]- samucchindeyya
pajaheyya vinodeyya byantīkareyya anabhāvaṅgameyyāti
takkāsayaṃ kukkucciyūpacchinde. Tenāha bhagavā
okkhittacakkhu na ca pādalolo
jhānānuyutto bahujāgarassa
upekkhamārabbha samāhitatto
takkāsayaṃ kukkucciyūpacchindeti.
[974] Cudito vacībhi satimābhinande
sabrahmacārīsu khilaṃ pabhinde
vācaṃ pamuñce kusalaṃ nātivelaṃ
janavādadhammāya na cetayeyya.
[975] Cudito vacībhi satimābhinandeti cuditoti upajjhāyā
@Footnote: 1 Ma. chindeyya ucchindeyya.
Vā ācariyā vā samānupajjhāyakā vā samānācariyakā vā mittā
vā sandiṭṭhā vā sambhattā vā sahāyā vā codenti idante āvuso
ayuttaṃ idante appattaṃ idante asāruppaṃ idante asīlaṭṭhanti 1-
satiṃ upaṭṭhāpetvā taṃ codanaṃ nandeyya abhinandeyya modeyya
anumodeyya iccheyya sādiyeyya pattheyya 2- pihayeyya abhijappeyya.
Yathā itthī vā puriso vā daharo yuvā maṇḍanakajātiko sīsanhāto
uppalamālaṃ vā vassikamālaṃ vā adhimuttakamālaṃ vā labhitvā ubhohi
hatthehi paṭiggahetvā uttamaṅge sirasmiṃ patiṭṭhāpetvā nandeyya
abhinandeyya modeyya anumodeyya iccheyya sādiyeyya pattheyya 3-
pihayeyya abhijappeyya evameva satiṃ upaṭṭhāpetvā taṃ codanaṃ nandeyya
abhinandeyya modeyya anumodeyya iccheyya sādiyeyya pattheyya 4-
pihayeyya abhijappeyya.
Nidhīnaṃva pavattāraṃ yaṃ passe vajjadassinaṃ
niggayhavādiṃ medhāviṃ tādisaṃ paṇḍitaṃ bhaje
tādisaṃ bhajamānassa seyyo hoti na pāpiyo
ovadeyyānusāseyya asabbhā ca nivāraye
satañhi so piyo hoti asataṃ hoti appiyoti.
Cudito vacībhi satimābhinande.
[976] Sabrahmacārīsu khilaṃ pabhindeti sabrahmacārīti ekakammaṃ
@Footnote: 1 asiliṭṭhantipi pāṭho. 2-3-4 Po. Ma. patthayeyya.
Ekuddeso samasikkhātā . sabrahmacārīsu khilaṃ pabhindeti sabrahmacārīsu
āhatacittataṃ khilajātataṃ pabhindeyya pañcapi cetokhile pabhindeyya 1-
tayopi cetokhile pabhindeyya rāgakhilaṃ dosakhilaṃ mohakhilaṃ bhindeyya
pabhindeyya sambhindeyyāti sabrahmacārīsu khilaṃ pabhinde.
[977] Vācaṃ pamuñce kusalaṃ nātivelanti ñāṇasamuṭṭhitaṃ vācaṃ
muñceyya atthūpasaṃhitaṃ dhammūpasaṃhitaṃ kālena sāpadesaṃ pariyantavatiṃ
atthasaṃhitaṃ vācaṃ muñceyya pamuñceyya sampamuñceyyāti vācaṃ
pamuñce kusalaṃ . nātivelanti velāti dve velā kālavelā ca
sīlavelā ca.
{977.1} Katamā kālavelā . Kālātikkantaṃ vācaṃ na bhāseyya
velātikkantaṃ vācaṃ na bhāseyya kālavelātikkantaṃ vācaṃ na bhāseyya
kālaṃ asampattaṃ vācaṃ na bhāseyya velaṃ asampattaṃ vācaṃ na bhāseyya
kālavelaṃ asampattaṃ vācaṃ na bhāseyya.
Yo ca 2- kāle asampatte ativelaṃ ca 3- bhāsati
evaṃ so nihato seti kokiliyāva 4- atrajoti.
Ayaṃ kālavelā.
{977.2} Katamā sīlavelā. Ratto vācaṃ na bhāseyya duṭṭho vācaṃ
na bhāseyya mūḷho vācaṃ na bhāseyya musāvādaṃ na bhāseyya
pisuṇavācaṃ na bhāseyya pharusavācaṃ na bhāseyya samphappalāpaṃ na
bhāseyya na katheyya na bhaṇeyya na dīpeyya na vohareyya ayaṃ
@Footnote: 1 Ma. bhindeyya. 2 Ma. Yu. ve. 3 Po. Ma. pabhāsati. 4 Ma. kokilāyeva.
Sīlavelāti vācaṃ pamuñce kusalaṃ nātivelaṃ.
[978] Janavādadhammāya na cetayeyyāti janāti khattiyā ca
brāhmaṇā ca vessā ca suddā ca gahaṭṭhā ca pabbajitā ca devā
ca manussā ca . janassa vādāya upavādāya nindāya garahāya
akittiyā avaṇṇahārikāya sīlavipattiyā vā ācāravipattiyā
vā diṭṭhivipattiyā vā ājīvavipattiyā vā na cetayeyya cetanaṃ na
uppādeyya cittasaṅkappaṃ na uppādeyya manasikāraṃ na
uppādeyyāti janavādadhammāya na cetayeyya. Tenāha bhagavā
cudito vacībhi satimābhinande
sabrahmacārīsu khilaṃ pabhinde
vācaṃ pamuñce kusalaṃ nātivelaṃ
janavādadhammāya na cetayeyyāti.
[979] Athāparaṃ pañca rajāni loke
yesaṃ satīmā vinayāya sikkhe
rūpesu saddesu atho rasesu
gandhesu phassesu sahetha rāgaṃ.
[980] Athāparaṃ pañca rajāni loketi athāti padasandhi padasaṃsaggo
padapāripūri 1- akkharasamavāyo byañjanasiliṭṭhatā padānupubbatāmetaṃ
athāti . pañca rajānīti rūparāgo 2- saddarāgo gandharāgo rasarāgo
phoṭṭhabbarāgo. Athavā
@Footnote: 1 ma .. pūrī. 2 Ma. rūpa .. phoṭṭhabbarajo.
Rāgo rajo na ca pana reṇū 1- vuccati
rāgassetaṃ adhivacanaṃ rajoti
etaṃ rajaṃ vippajahitva 2- paṇḍitā
viharanti te vigatarajassa sāsane.
Doso rajo na ca pana reṇū vuccati
dosassetaṃ adhivacanaṃ rajoti
etaṃ rajaṃ vippajahitva paṇḍitā
viharanti te vigatarajassa sāsane.
Moho rajo na ca pana reṇū vuccati
mohassetaṃ adhivacanaṃ rajoti
etaṃ rajaṃ vippajahitva paṇḍitā
viharanti te vigatarajassa sāsane.
Loketi apāyaloke manussaloke devaloke khandhaloke dhātuloke
āyatanaloketi athāparaṃ pañca rajāni loke.
[981] Yesaṃ satīmā vinayāya sikkheti yesanti rūparāgassa
saddarāgassa gandharāgassa rasarāgassa phoṭṭhabbarāgassa . satīmāti
yā sati anussati paṭissati sati saraṇatā dhāraṇatā apilāpanatā
assammussanatā sati satindriyaṃ satibalaṃ sammāsati satisambojjhaṅgo
ekāyanamaggo ayaṃ vuccati sati . imāya satiyā upeto samupeto
upagato samupagato upapanno samupapanno samannāgato so vuccati
@Footnote: 1 Ma. reṇu. 2 Po. paṭivinodayitvā.
Satimā . sikkheti tisso sikkhā adhisīlasikkhā adhicittasikkhā
adhipaññāsikkhā . katamā adhisīlasikkhā .pe. ayaṃ adhipaññāsikkhā .
Yesaṃ satīmā vinayāya sikkheti satimā puggalo yesaṃ rūparāgassa
saddarāgassa gandharāgassa rasarāgassa phoṭṭhabbarāgassa vinayāya
paṭivinayāya pahānāya vūpasamāya paṭinissaggāya paṭippassaddhiyā
adhisīlampi sikkheyya adhicittampi sikkheyya adhipaññampi
sikkheyya imā tisso sikkhā āvajjento sikkheyya jānanto
sikkheyya .pe. sacchikātabbaṃ sacchikaronto sikkheyya ācareyya
samācareyya samādāya vatteyyāti yesaṃ satīmā vinayāya sikkhe.
[982] Rūpesu saddesu atho rasesu gandhesu phassesu sahetha
rāganti rūpesu saddesu gandhesu rasesu phoṭṭhabbesu rāgaṃ saheyya
parisaheyya abhibhaveyya ajjhotthareyya pariyādiyeyya maddeyyāti
rūpesu saddesu atho rasesu gandhesu phassesu sahetha rāgaṃ .
Tenāha bhagavā
athāparaṃ pañca rajāni loke
yesaṃ satīmā vinayāya sikkhe
rūpesu saddesu atho rasesu
gandhesu phassesu sahetha rāganti.
[983] Etesu dhammesu vineyya chandaṃ
bhikkhu satīmā suvimuttacitto
Kālena so sammā dhammaṃ parivīmaṃsamāno
ekodibhūto vihane tamaṃ soti bhagavā.
[984] Etesu dhammesu vineyya chandanti etesūti rūpesu saddesu
gandhesu rasesu phoṭṭhabbesu . chandoti yo kāmesu kāmacchando
kāmarāgo kāmanandi kāmataṇhā kāmasneho 1- kāmapariḷāho
kāmamucchā kāmajjhosānaṃ kāmogho kāmayogo kāmūpādānaṃ
kāmacchandanīvaraṇaṃ . etesu dhammesu vineyya chandanti etesu
dhammesu chandaṃ vineyya paṭivineyya pajaheyya vinodeyya byantīkareyya
anabhāvaṅgameyyāti etesu dhammesu vineyya chandaṃ.
[985] Bhikkhu satīmā suvimuttacittoti bhikkhūti kalyāṇaputhujjano
vā bhikkhu sekkho vā bhikkhu . satīmāti yā sati anussati .pe.
Sammāsati satisambojjhaṅgo ekāyanamaggo ayaṃ vuccati sati .
Imāya satiyā upeto .pe. so vuccati satimāti bhikkhu satīmā .
Suvimuttacittoti paṭhamaṃ jhānaṃ samāpannassa nīvaraṇehi cittaṃ muttaṃ
vimuttaṃ suvimuttaṃ dutiyaṃ jhānaṃ samāpannassa vitakkavicārehi cittaṃ
muttaṃ vimuttaṃ suvimuttaṃ tatiyaṃ jhānaṃ samāpannassa pītiyā [2]-
cittaṃ muttaṃ vimuttaṃ suvimuttaṃ catutthaṃ jhānaṃ samāpannassa
sukhadukkhehi cittaṃ muttaṃ vimuttaṃ suvimuttaṃ ākāsānañcāyatanaṃ
samāpannassa rūpasaññāya paṭighasaññāya nānattasaññāya
cittaṃ muttaṃ vimuttaṃ suvimuttaṃ viññāṇañcāyatanaṃ
@Footnote: 1 Po. Yu. kāmasineho. 2 Ma. casaddo dissati.
Samāpannassa ākāsānañcāyatanasaññāya cittaṃ
ākiñcaññāyatanaṃ samāpannassa viññāṇañcāyatana-
saññāya cittaṃ nevasaññānāsaññāyatanaṃ samāpannassa
ākiñcaññāyatanasaññāya cittaṃ muttaṃ vimuttaṃ suvimuttaṃ
sotāpannassa sakkāyadiṭṭhiyā vicikicchāya sīlabbattaparāmāsā
diṭṭhānusayā vicikicchānusayā tadekaṭṭhehi ca kilesehi cittaṃ
muttaṃ vimuttaṃ suvimuttaṃ sakadāgāmissa oḷārikā kāmarāgānusayā
paṭighānusayā tadekaṭṭhehi ca kilesehi cittaṃ muttaṃ vimuttaṃ
suvimuttaṃ anāgāmissa aṇusahagatā kāmarāgasaññojanā
paṭighasaññojanā aṇusahagatā kāmarāgānusayā paṭighānusayā
tadekaṭṭhehi ca kilesehi cittaṃ muttaṃ vimuttaṃ suvimuttaṃ arahato
rūparāgā arūparāgā mānā uddhaccā avijjāya mānānusayā
bhavarāgānusayā avijjānusayā tadekaṭṭhehi ca kilesehi bahiddhā ca
sabbanimittehi cittaṃ muttaṃ vimuttaṃ suvimuttanti bhikkhu satīmā
suvimuttacitto.
[986] Kālena so sammā dhammaṃ parivīmaṃsamānoti kālenāti
uddhate citte samathassa kālo samāhite citte vipassanāya kālo.
Kāle paggaṇhati cittaṃ niggaṇhāti athāpare 1-
sampahaṃsati kālena kāle cittaṃ samādahati
ajjhupekkhati kālena so yogī kālakovido
kimhi kālamhi paggāho kimhi kāle viniggaho
@Footnote: 1 Ma. punāpare.
Kimhi pahaṃsanākālo samathakālo ca kīdiso
upekkhākālaṃ cittassa kathaṃ dasseti yogino
līne cittamhi paggāho uddhatasmiṃ viniggaho
nirassādagataṃ cittaṃ sampahaṃseyya tāvade
sampahaṭṭhaṃ yadā cittaṃ alīnaṃ bhavatinuddhataṃ
samathassa ca so kālo ajjhattaṃ ramaye mano
etena mevupāyena yadā hoti samāhitaṃ
samāhitaṃ citta paññāya ajjhupekkheyya tāvade
evaṃ kālavidū dhīro kālaññū kālakovido
kālena kālaṃ cittassa nimittamupalakkhayeti 1-.
Kālena so . sammā dhammaṃ parivīmaṃsamānoti sabbe saṅkhārā
aniccāti sammā dhammaṃ parivīmaṃsamāno sabbe saṅkhārā dukkhāti
sammā dhammaṃ parivīmaṃsamāno sabbe dhammā anattāti sammā
dhammaṃ parivīmaṃsamāno .pe. yaṅkiñci samudayadhammaṃ sabbantaṃ nirodhadhammanti
sammā dhammaṃ parivīmaṃsamāno.
[987] Ekodibhūto vihane tamaṃ soti bhagavāti ekodīti
ekaggacitto avikkhittacitto avisāhaṭamānasoti ekodibhūto .
Vihane tamaṃ soti rāgatamaṃ dosatamaṃ mohatamaṃ mānatamaṃ diṭṭhitamaṃ kilesatamaṃ
duccaritatamaṃ andhakaraṇaṃ acakkhukaraṇaṃ añāṇakaraṇaṃ paññānirodhikaṃ
vighātapakkhikaṃ anibbānasaṃvattanikaṃ haneyya vihaneyya pajaheyya
@Footnote: 1 Yu. nimittamupalakkhiye.
Vinodeyya byantīkareyya anabhāvaṅgameyya . bhagavāti gāravādhivacanaṃ .
Apica bhaggarāgoti bhagavā . bhaggadosoti bhagavā . bhaggamohoti
bhagavā . bhaggamānoti bhagavā . bhaggadiṭṭhīti bhagavā . bhaggakaṇṭakoti
bhagavā . bhaggakilesoti bhagavā . bhaji vibhaji paṭivibhaji 1- dhammaratananti
bhagavā . bhavānaṃ antakaroti bhagavā . bhāvitakāyoti bhagavā .
Bhāvitasīloti bhāvitacittoti bhāvitapaññoti bhagavā . bhaji vā
bhagavā araññavanapatthāni pantāni senāsanāni appasaddāni
appanigghosāni vijanavātāni manussarāhaseyyakāni paṭisallāna-
sārūpānīti bhagavā . bhāgī vā bhagavā cīvarapiṇḍapātasenāsana-
gilānapaccayabhesajjaparikkhārānanti bhagavā.
{987.1} Bhāgī vā bhagavā attharasassa dhammarasassa vimuttirasassa
adhisīlassa adhicittassa adhipaññāyāti bhagavā . bhāgī vā bhagavā
catunnaṃ jhānānaṃ catunnaṃ appamaññānaṃ catunnaṃ arūpasamāpattīnanti
bhagavā . bhāgī vā bhagavā aṭṭhannaṃ vimokkhānaṃ aṭṭhannaṃ abhibhāyatanānaṃ
navannaṃ anupubbavihārasamāpattīnanti bhagavā . bhāgī vā bhagavā dasannaṃ
saññābhāvanānaṃ dasannaṃ kasiṇasamāpattīnaṃ ānāpānassatisamādhissa
asubhasamāpattiyāti bhagavā . bhāgī vā bhagavā catunnaṃ satipaṭṭhānānaṃ
catunnaṃ sammappadhānānaṃ catunnaṃ iddhippādānaṃ pañcannaṃ indriyānaṃ
pañcannaṃ balānaṃ sattannaṃ bojjhaṅgānaṃ ariyassa aṭṭhaṅgikassa
maggassāti bhagavā . bhāgī vā bhagavā dasannaṃ tathāgatabalānaṃ
@Footnote: 1 Po. Ma. pavibhaji.
Catunnaṃ vesārajjānaṃ catunnaṃ paṭisambhidānaṃ channaṃ abhiññānaṃ channaṃ
buddhadhammānanti bhagavā . bhagavāti netaṃ nāmaṃ mātarā kataṃ na
pitarā kataṃ na bhātarā kataṃ na bhaginiyā kataṃ na mittāmaccehi kataṃ
na ñātisālohitehi kataṃ na samaṇabrāhmaṇehi kataṃ na devatāhi
kataṃ vimokkhantikametaṃ buddhānaṃ bhagavantānaṃ bodhiyā mūle saha
sabbaññutañāṇassa paṭilābhā sacchikā paññatti yadidaṃ bhagavāti
ekodibhūto vihane tamaṃ soti bhagavā. Tenāha bhagavā
etesu dhammesu vineyya chandaṃ
bhikkhu satīmā suvimuttacitto
kālena so sammā dhammaṃ parivīmaṃsamāno
ekodibhūto vihane tamaṃ soti bhagavāti.
Soḷasamo sārīputtasuttaniddeso.
Aṭṭhakavaggikamhi 1- soḷasa suttaniddesā
samattā.
---------------
@Footnote: 1 Po. Ma. aṭṭhakavaggamhi.
The Pali Tipitaka in Roman Character Volume 29 page 607-630.
https://84000.org/tipitaka/read/roman_item.php?book=29&item=959&items=29
Classified by [Item Number] :-
http://84000.org/tipitaka/read/roman_item.php?book=29&item=959&items=29&mode=bracket
Compare with The Pali Tipitaka in Thai Character :-
https://84000.org/tipitaka/read/pali_item.php?book=29&item=959&items=29
Compare with The Royal Version of Thai Tipitaka :-
https://84000.org/tipitaka/read/byitem.php?book=29&item=959&items=29
Study Atthakatha :-
https://84000.org/tipitaka/attha/attha.php?b=29&i=959
Contents of The Tipitaka Volume 29
https://84000.org/tipitaka/read/?index_29
https://84000.org/tipitaka/english/?index_29
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
