บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ |
ThaiVersion PaliThai PaliRoman |
[1870] Supinantena adinnaṃ ādiyeyya .pe. musā bhaṇeyya pisuṇaṃ bhaṇeyya pharusaṃ bhaṇeyya samphaṃ palapeyya sandhiṃ chindeyya nillopaṃ hareyya ekāgārikaṃ kareyya paripanke tiṭṭheyya paradāraṃ gaccheyya gāmaghātakaṃ kareyya nigamaghātakaṃ kareyya supinantena methunaṃ dhammaṃ paṭiseveyya supinagatassa asuci mucceyya supinantena dānaṃ dadeyya cīvaraṃ dadeyya piṇḍapātaṃ dadeyya senāsanaṃ dadeyya gilānapaccayabhesajjaparikkhāraṃ dadeyya khādanīyaṃ dadeyya bhojanīyaṃ dadeyya pānīyaṃ dadeyya cetiyaṃ vandeyya cetiye mālaṃ āropeyya gandhaṃ Āropeyya vilepanaṃ āropeyya .pe. cetiyaṃ abhidakkhiṇaṃ kareyyāti. Āmantā . hañci supinantena cetiyaṃ abhidakkhiṇaṃ kareyya no vata re vattabbe sabbaṃ supinagatassa cittaṃ abyākatanti. [1871] Na vattabbaṃ sabbaṃ supinagatassa cittaṃ abyākatanti . Āmantā . nanu supinagatassa cittaṃ abbohāriyaṃ vuttaṃ bhagavatāti . Āmantā . hañci supinagatassa cittaṃ abbohāriyaṃ vuttaṃ bhagavatā tena vata re vattabbe sabbaṃ supinagatassa cittaṃ abyākatanti. Abyākatakathā. ------------ Āsevanapaccayatākathā [1872] Natthi kāci āsevanapaccayatāti . āmantā . nanu vuttaṃ bhagavatā pāṇātipāto bhikkhave āsevito bhāvito bahulīkato nirayasaṃvattaniko tiracchānayonisaṃvattaniko pittivisayasaṃvattaniko yo sabbalahuso pāṇātipātassa vipāko manussabhūtassa appāyukasaṃvattaniko hotīti 1- attheva suttantoti . āmantā . tena hi atthi kāci āsevanapaccayatāti. [1873] Natthi kāci āsevanapaccayatāti. Āmantā. Nanu vuttaṃ bhagavatā adinnādānaṃ bhikkhave āsevitaṃ bhāvitaṃ bahulīkataṃ nirayasaṃvattanikaṃ @Footnote: 1 aṃ. aṭṭhaka. 104. Tiracchānayonisaṃvattanikaṃ pittivisayasaṃvattanikaṃ yo sabbalahuso adinnādānassa vipāko manussabhūtassa bhogabyasanasaṃvattaniko hoti .pe. yo sabbalahuso kāmesumicchācārassa vipāko manussabhūtassa sapattaverasaṃvattaniko hoti .pe. yo sabbalahuso musāvādassa vipāko manussabhūtassa abbhūtabbhakkhānasaṃvattaniko hoti .pe. yo sabbalahuso pisuṇāya vācāya vipāko manussabhūtassa mittehi bhedanasaṃvattaniko hoti .pe. yo sabbalahuso pharusāya vācāya vipāko manussabhūtassa amanāpasaddasaṃvattaniko hoti .pe. yo sabbalahuso samphappalāpassa vipāko manussabhūtassa anādeyyavācasaṃvattaniko hoti .pe. Surāmerayapānaṃ bhikkhave āsevitaṃ .pe. Yo sabbalahuso surāmerayapānassa vipāko manussabhūtassa ummattakasaṃvattaniko hotīti 1- attheva suttantoti. Āmantā. Tena hi atthi kāci āsevanapaccayatāti. [1874] Natthi kāci āsevanapaccayatāti. Āmantā. Nanu vuttaṃ bhagavatā micchādiṭṭhi bhikkhave āsevitā bhāvitā bahulīkatā nirayasaṃvattanikā tiracchānayonisaṃvattanikā pittivisayasaṃvattanikāti attheva suttantoti . Āmantā. Tena hi atthi kāci āsevanapaccayatāti. [1875] Natthi kāci āsevanapaccayatāti. Āmantā. Nanu vuttaṃ bhagavatā micchāsaṅkappo .pe. micchāsamādhi bhikkhave āsevito bhāvito bahulīkato .pe. pittivisayasaṃvattanikoti attheva suttantoti . @Footnote: 1 aṃ. aṭṭhaka. 104. Āmantā. Tena hi atthi kāci āsevanapaccayatāti. [1876] Natthi kāci āsevanapaccayatāti . āmantā . nanu vuttaṃ bhagavatā sammādiṭṭhi bhikkhave āsevitā bhāvitā bahulīkatā amatogadhā hoti amataparāyanā amatapariyosānāti attheva suttantoti. Āmantā. Tena hi atthi kāci āsevanapaccayatāti. [1877] Natthi kāci āsevanapaccayatāti . āmantā . nanu vuttaṃ bhagavatā sammāsaṅkappo bhikkhave āsevito bhāvito bahulīkato .pe. sammāsamādhi bhikkhave āsevito bhāvito bahulīkato amatogadho hoti amataparāyano amatapariyosānoti attheva suttantoti . Āmantā. Tena hi atthi kāci āsevanapaccayatāti. Āsevanapaccayatākathā. --------- Khaṇikakathā [1878] Ekacittakkhaṇikā sabbe dhammāti . āmantā . Citte mahāpaṭhavī saṇṭhāti mahāsamuddo saṇṭhāti sinerupabbatarājā saṇṭhāti āpo saṇṭhāti tejo saṇṭhāti vāyo saṇṭhāti tiṇakaṭṭhavanappatayo saṇṭhahantīti. Na hevaṃ vattabbe .pe. [1879] Ekacittakkhaṇikā sabbe dhammāti . āmantā . Cakkhāyatanaṃ cakkhuviññāṇena sahajātanti . na hevaṃ vattabbe .pe. Cakkhāyatanaṃ cakkhuviññāṇena sahajātanti . āmantā . Nanu āyasmā sārīputto etadavoca ajjhattikañceva āvuso cakkhuṃ aparibhinnaṃ hoti bāhirā ca rūpā na āpāthaṃ āgacchanti no ca tajjo samannāhāro hoti neva tāva tajjassa viññāṇabhāvassa pātubhāvo hoti ajjhattikañceva āvuso cakkhuṃ aparibhinnaṃ hoti bāhirā ca rūpā āpāthaṃ āgacchanti no ca tajjo samannāhāro hoti neva tāva tajjassa viññāṇabhāvassa pātubhāvo hoti yato ca kho āvuso ajjhattikañceva cakkhuṃ aparibhinnaṃ hoti bāhirā ca rūpā āpāthaṃ āgacchanti tajjo ca samannāhāro hoti evaṃ tajjassa viññāṇabhāvassa pātubhāvo hotīti 1- attheva suttantoti . āmantā . tena hi na vattabbaṃ cakkhāyatanaṃ cakkhuviññāṇena sahajātanti. [1880] Sotāyatanaṃ .pe. ghānāyatanaṃ .pe. Jivhāyatanaṃ .pe. Kāyāyatanaṃ kāyaviññāṇena sahajātanti . na hevaṃ vattabbe .pe. Kāyāyatanaṃ kāyaviññāṇena sahajātanti . āmantā . nanu āyasmā sārīputto etadavoca ajjhattiko ceva āvuso kāyo aparibhinno hoti bāhirā ca phoṭṭhabbā na āpāthaṃ āgacchanti no ca .pe. ajjhattiko ceva āvuso kāyo aparibhinno hoti bāhirā ca phoṭṭhabbā āpāthaṃ āgacchanti no ca .pe. yato ca kho āvuso @Footnote: 1 Ma. mū. 342. Ajjhattiko ceva kāyo aparibhinno hoti bāhirā ca phoṭṭhabbā āpāthaṃ āgacchanti tajjo ca samannāhāro hoti evaṃ tajjassa viññāṇabhāvassa pātubhāvo hotīti attheva suttantoti . āmantā . Tena hi na vattabbaṃ kāyāyatanaṃ kāyaviññāṇena sahajātanti. [1881] Na vattabbaṃ ekacittakkhaṇikā sabbe dhammāti . Āmantā . sabbe dhammā niccā dhuvā sassatā avipariṇāmadhammāti. Na hevaṃ vattabbe .pe. Tena hi ekacittakkhaṇikā sabbe dhammāti. Khaṇikakathā. Bāvīsatimo vaggo. Tassa uddānaṃ atthi kiñci saññojanaṃ appahāya parinibbānaṃ arahā kusalacitto parinibbāyati arahā āneñje ṭhito parinibbāyati atthi gabbhaseyyāya dhammābhisamayo atthi gabbhaseyyāya arahattappatti atthi supinagatassa dhammābhisamayo atthi supinagatassa arahattappatti sabbaṃ supinagatassa cittaṃ abyākataṃ natthi kāci āsevanapaccayatā ekacittakkhaṇikā sabbe dhammāti. --------- Ekādhippāyakathā [1882] Ekādhippāyena methuno dhammo paṭisevitabboti . Āmantā . ekādhippāyena assamaṇena hotabbaṃ abhikkhunā hotabbaṃ chinnamūlena hotabbaṃ pārājikena hotabbanti . na hevaṃ vattabbe .pe. [1883] Ekādhippāyena methuno dhammo paṭisevitabboti . Āmantā . ekādhippāyena pāṇo hantabbo adinnaṃ ādiyitabbaṃ musā bhaṇitabbaṃ pisuṇaṃ bhaṇitabbaṃ pharusaṃ bhaṇitabbaṃ samphaṃ palapitabbaṃ sandhi cheditabbo nillopaṃ hātabbaṃ ekāgāriyaṃ kātabbaṃ paripanthe ṭhātabbaṃ paradāro gantabbo gāmaghātako kātabbo nigamaghātako kātabboti. Na hevaṃ vattabbe .pe. Ekādhippāyakathā. ---------- Arahantavaṇṇakathā [1884] Arahantānaṃ vaṇṇena amanussā methunaṃ dhammaṃ paṭisevantīti. Āmantā . arahantānaṃ vaṇṇena manussā pāṇaṃ hananti .pe. Adinnaṃ ādiyanti musā bhaṇanti pisuṇaṃ bhaṇanti pharusaṃ bhaṇanti samphaṃ palapanti sandhiṃ chindanti nillopaṃ haranti ekāgāriyaṃ Karonti paripanthe tiṭṭhanti paradāraṃ gacchanti gāmaghātakaṃ karonti .pe. Nigamaghātakaṃ karontīti. Na hevaṃ vattabbe .pe. Arahantavaṇṇakathā. ------------ Issariyakāmakārikākathā [1885] Bodhisatto issariyakāmakārikāhetu vinipātaṃ gacchatīti. Āmantā . bodhisatto issariyakāmakārikāhetu nirayaṃ gacchati sañjīvaṃ gacchati kālasuttaṃ gacchati tāpanaṃ gacchati patāpanaṃ 1- gacchati saṅghāṭakaṃ gacchati roruvaṃ gacchati .pe. avīciṃ gacchatīti . na hevaṃ vattabbe .pe. [1886] Bodhisatto issariyakāmakārikāhetu vinipātaṃ gacchatīti. Āmantā . bodhisatto issariyakāmakārikāhetu vinipātaṃ gacchatīti attheva suttantoti . natthi . hañci bodhisatto issariyakāmakārikāhetu vinipātaṃ gacchatīti nattheva suttanto no vata re vattabbe bodhisatto issariyakāmakārikāhetu vinipātaṃ gacchatīti. [1887] Bodhisatto issariyakāmakārikāhetu gabbhaseyyaṃ okkamatīti . āmantā . bodhisatto issariyakāmakārikāhetu nirayaṃ upapajjeyya tiracchānayoniṃ upapajjeyyāti. Na hevaṃ vattabbe .pe. [1888] Bodhisatto issariyakāmakārikāhetu gabbhaseyyaṃ okkamatīti. @Footnote:1. Ma. mahātāpanaṃ. Āmantā . bodhisatto iddhimāti . Na hevaṃ vattabbe .pe. Bodhisatto iddhimāti . āmantā . bodhisattena chandiddhipādo bhāvito .pe. Viriyiddhipādo .pe. cittiddhipādo .pe. vīmaṃsiddhipādo bhāvitoti . Na hevaṃ vattabbe .pe. bodhisatto issariyakāmakārikāhetu gabbhaseyyaṃ okkamatīti . āmantā . bodhisatto issariyakāmakārikāhetu gabbhaseyyaṃ okkamatīti attheva suttantoti . natthi . Hañci bodhisatto issariyakāmakārikāhetu gabbhaseyyaṃ okkamatīti nattheva suttanto no vata re vattabbe bodhisatto issariyakāmakārikāhetu gabbhaseyyaṃ okkamatīti. [1889] Bodhisatto issariyakāmakārikāhetu dukkarakārikaṃ akāsīti . āmantā . bodhisatto issariyakāmakārikāhetu sassato lokoti paccāgacchi asassato lokoti paccāgacchi antavā lokoti .pe. anantavā lokoti taṃ jīvaṃ taṃ sarīranti aññaṃ jīvaṃ aññaṃ sarīranti hoti tathāgato parammaraṇāti na hoti tathāgato parammaraṇāti hoti ca na ca hoti tathāgato parammaraṇāti .pe. Neva hoti na na hoti tathāgato parammaraṇāti paccāgacchīti . Na hevaṃ vattabbe .pe. [1890] Bodhisatto issariyakāmakārikāhetu dukkarakārikaṃ akāsīti . āmantā . bodhisatto issariyakāmakārikāhetu dukkarakārikaṃ akāsīti attheva suttantoti . natthi . hañci bodhisatto Issariyakāmakārikāhetu dukkarakārikaṃ akāsīti nattheva suttanto no vata re vattabbe bodhisatto issariyakāmakārikāhetu dukkarakārikaṃ akāsīti. [1891] Bodhisatto issariyakāmakārikāhetu aparantapaṃ akāsi aññaṃ satthāraṃ uddisīti . āmantā. Bodhisatto issariyakāmakārikāhetu sassato lokoti paccāgacchi .pe. neva hoti na na hoti tathāgato parammaraṇāti paccāgacchīti . na hevaṃ vattabbe .pe. bodhisatto issariyakāmakārikāhetu aññaṃ satthāraṃ uddisīti . āmantā . Bodhisatto issariyakāmakārikāhetu aññaṃ satthāraṃ uddisīti attheva suttantoti . natthi . hañci bodhisatto issariyakāmakārikāhetu aññaṃ satthāraṃ uddisīti nattheva suttanto no vata re vattabbe bodhisatto issariyakāmakārikāhetu aññaṃ satthāraṃ uddisīti. Issariyakāmakārikākathā. ------------------ Rāgapaṭirūpakādikathā [1892] Atthi narāgo rāgapaṭirūpakoti . āmantā . atthi naphasso phassapaṭirūpako atthi navedanā vedanāpaṭirūpikā atthi nasaññā saññāpaṭirūpikā atthi nacetanā cetanāpaṭirūpikā atthi nacittaṃ cittapaṭirūpakaṃ atthi nasaddhā saddhāpaṭirūpikā atthi naviriyaṃ viriyapaṭirūpakaṃ atthi nasati satipaṭirūpikā atthi nasamādhi samādhipaṭirūpako Atthi na paññā paññāpaṭirūpikāti . na hevaṃ vattabbe .pe. Atthi nadoso dosapaṭirūpako atthi namoho mohapaṭirūpako atthi nakileso kilesapaṭirūpakoti 1- . āmantā . atthi naphasso phassapaṭirūpako .pe. atthi napaññā paññāpaṭirūpikāti . Na hevaṃ vattabbe .pe. Rāgapaṭirūpakādikathā. ------------- Aparinipphannakathā [1893] Rūpaṃ aparinipphannanti . āmantā . rūpaṃ nāniccaṃ na saṅkhataṃ na paṭiccasamuppannaṃ na khayadhammaṃ na vayadhammaṃ na virāgadhammaṃ na nirodhadhammaṃ na vipariṇāmadhammanti . na hevaṃ vattabbe .pe. Nanu rūpaṃ aniccaṃ saṅkhataṃ paṭiccasamuppannaṃ khayadhammaṃ vayadhammaṃ virāgadhammaṃ nirodhadhammaṃ vipariṇāmadhammanti . āmantā . hañci rūpaṃ aniccaṃ saṅkhataṃ .pe. vipariṇāmadhammaṃ no vata re vattabbe rūpaṃ aparinipphannanti. [1894] Dukkhaññeva parinipphannanti . āmantā . nanu yadaniccaṃ taṃ dukkhaṃ vuttaṃ bhagavatā rūpaṃ aniccanti . āmantā . Hañci yadaniccaṃ taṃ dukkhaṃ vuttaṃ bhagavatā rūpaṃ aniccaṃ no vata re vattabbe dukkhaññeva parinipphannanti. @Footnote:1. Ma. na kisesiyo kilesiyapaṭirūpako. [1895] Vedanā .pe. saññā saṅkhārā viññāṇaṃ .pe. Cakkhāyatanaṃ .pe. dhammāyatanaṃ .pe. cakkhudhātu .pe. dhammadhātu .pe. Cakkhundriyaṃ .pe. [1896] Aññātāvindriyaṃ aparinipphannanti . āmantā . Aññātāvindriyaṃ nāniccaṃ .pe. na vipariṇāmadhammanti . Na hevaṃ vattabbe .pe. nanu aññātāvindriyaṃ aniccaṃ saṅkhataṃ .pe. Vipariṇāmadhammanti . āmantā . hañci aññātāvindriyaṃ aniccaṃ saṅkhataṃ paṭiccasamuppannaṃ khayadhammaṃ vayadhammaṃ virāgadhammaṃ nirodhadhammaṃ vipariṇāmadhammaṃ no vata re vattabbe aññātāvindriyaṃ aparinipphannanti. [1897] Dukkhaññeva parinipphannanti . āmantā . nanu yadaniccaṃ taṃ dukkhaṃ vuttaṃ bhagavatā aññātāvindriyaṃ aniccanti . āmantā . Hañci yadaniccaṃ taṃ dukkhaṃ vuttaṃ bhagavatā aññātāvindriyaṃ aniccaṃ no vata re vattabbe dukkhaññeva parinipphannanti. Aparinipphannakathā. Tevīsatimo vaggo. Tassa uddānaṃ ekādhippāyena methuno dhammo paṭisevitabbo arahantānaṃ vaṇṇena amanussā methunaṃ dhammaṃ paṭisevanti bodhisatto issariyakāmakārikāhetu vinipātaṃ gacchati gabbhaseyyaṃ okkamati dukkarakārikaṃ Akāsi aparantapaṃ akāsi aññaṃ satthāraṃ uddisi atthi narāgo rāgapaṭirūpako atthi nadoso dosapaṭirūpako atthi namoho mohapaṭirūpako atthi nakileso kilesapaṭirūpako rūpaṃ aparinipphannaṃ aññātāvindriyaṃ aparinipphannanti. Navaṃkataṃ nibbuti ekādhippāyo rūpaṃ aparinipphannaṃ aññātāvindriyaṃ aparinipphannanti. Mahā niyāmo anusayā niggaho khuddakapañcamā parappavāda maddanā suttamūla samāhitā ujjotanā satthusamaye kathāvatthuppakaraṇe. Pañcattiṃsabhāṇavāraṃ kathāvatthuppakaraṇaṃ niṭṭhitaṃThe Pali Tipitaka in Roman Character Volume 37 page 650-662. https://84000.org/tipitaka/read/roman_item.php?book=37&item=1870&items=28 Classified by [Item Number] :- http://84000.org/tipitaka/read/roman_item.php?book=37&item=1870&items=28&mode=bracket Compare with The Pali Tipitaka in Thai Character :- https://84000.org/tipitaka/read/pali_item.php?book=37&item=1870&items=28 Compare with The Royal Version of Thai Tipitaka :- https://84000.org/tipitaka/read/byitem.php?book=37&item=1870&items=28 Study Atthakatha :- https://84000.org/tipitaka/attha/attha.php?b=37&i=1870 Contents of The Tipitaka Volume 37 https://84000.org/tipitaka/read/?index_37 https://84000.org/tipitaka/english/?index_37
|
บันทึก ๑๔ พฤศจิกายน พ.ศ. ๒๕๖๐. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน. หากพบข้อผิดพลาด กรุณาแจ้งได้ที่ [email protected]