Vinayapiṭake mahāvaggassa
paṭhamo bhāgo
----------
namo tassa bhagavato arahato sammāsambuddhassa.
Mahākhandhakaṃ
[1] Tena samayena buddho bhagavā uruvelāyaṃ viharati najjā
nerañjarāya tīre bodhirukkhamūle paṭhamābhisambuddho . athakho bhagavā
bodhirukkhamūle sattāhaṃ ekapallaṅkena nisīdi vimuttisukhapaṭisaṃvedī .
Athakho bhagavā rattiyā paṭhamaṃ yāmaṃ paṭiccasamuppādaṃ anulomapaṭilomaṃ
manasākāsi
{1.1} avijjāpaccayā saṅkhārā saṅkhārapaccayā viññāṇaṃ
viññāṇapaccayā nāmarūpaṃ nāmarūpapaccayā saḷāyatanaṃ
saḷāyatanapaccayā phasso phassapaccayā vedanā vedanāpaccayā
taṇhā taṇhāpaccayā upādānaṃ upādānapaccayā bhavo bhavapaccayā
jāti jātipaccayā jarāmaraṇaṃ sokaparidevadukkhadomanassupāyāsā
sambhavanti evametassa kevalassa dukkhakkhandhassa samudayo hoti
avijjāya tveva asesavirāganirodhā saṅkhāranirodho saṅkhāranirodhā
viññāṇanirodho viññāṇanirodhā nāmarūpanirodho nāmarūpanirodhā
saḷāyatananirodho saḷāyatananirodhā phassanirodho phassanirodhā
vedanānirodho vedanānirodhā taṇhānirodho taṇhānirodhā
Upādānanirodho upādānanirodhā bhavanirodho bhavanirodhā jātinirodho
jātinirodhā jarāmaraṇaṃ sokaparidevadukkhadomanassupāyāsā
nirujjhanti evametassa kevalassa dukkhakkhandhassa nirodho hotīti.
{1.2} Athakho bhagavā etamatthaṃ viditvā tāyaṃ velāyaṃ imaṃ udānaṃ
udānesi
yadā have pātubhavanti dhammā
ātāpino jhāyato brāhmaṇassa
athassa kaṅkhā vapayanti sabbā
yato pajānāti sahetudhammanti.
[2] Athakho bhagavā rattiyā majjhimaṃ yāmaṃ paṭiccasamuppādaṃ
anulomapaṭilomaṃ manasākāsi
{2.1} avijjāpaccayā saṅkhārā saṅkhārapaccayā viññāṇaṃ
viññāṇapaccayā nāmarūpaṃ nāmarūpapaccayā saḷāyatanaṃ saḷāyatanapaccayā
phasso phassapaccayā vedanā vedanāpaccayā taṇhā taṇhāpaccayā
upādānaṃ upādānapaccayā bhavo bhavapaccayā jāti jātipaccayā
jarāmaraṇaṃ sokaparidevadukkhadomanassupāyāsā sambhavanti evametassa
kevalassa dukkhakkhandhassa samudayo hoti avijjāya tveva asesavirāganirodhā
saṅkhāranirodho saṅkhāranirodhā viññāṇanirodho viññāṇanirodhā
nāmarūpanirodho nāmarūpanirodhā saḷāyatananirodho saḷāyatananirodhā
phassanirodho phassanirodhā vedanānirodho vedanānirodhā taṇhānirodho
Taṇhānirodhā upādānanirodho upādānanirodhā bhavanirodho bhavanirodhā
jātinirodho jātinirodhā jarāmaraṇaṃ sokaparidevadukkhadomanassupāyāsā
nirujjhanti evametassa kevalassa dukkhakkhandhassa nirodho hotīti.
{2.2} Athakho bhagavā etamatthaṃ viditvā tāyaṃ velāyaṃ imaṃ udānaṃ
udānesi
yadā have pātubhavanti dhammā
ātāpino jhāyato brāhmaṇassa
athassa kaṅkhā vapayanti sabbā
yato khayaṃ paccayānaṃ avedīti.
[3] Athakho bhagavā rattiyā pacchimaṃ yāmaṃ paṭiccasamuppādaṃ
anulomapaṭilomaṃ manasākāsi
{3.1} avijjāpaccayā saṅkhārā saṅkhārapaccayā viññāṇaṃ
viññāṇapaccayā nāmarūpaṃ nāmarūpapaccayā saḷāyatanaṃ saḷāyatanapaccayā
phasso phassapaccayā vedanā vedanāpaccayā taṇhā taṇhāpaccayā
upādānaṃ upādānapaccayā bhavo bhavapaccayā jāti jātipaccayā
jarāmaraṇaṃ sokaparidevadukkhadomanassupāyāsā sambhavanti evametassa
kevalassa dukkhakkhandhassa samudayo hoti avijjāya tveva asesavirāganirodhā
saṅkhāranirodho saṅkhāranirodhā viññāṇanirodho viññāṇanirodhā
nāmarūpanirodho nāmarūpanirodhā saḷāyatananirodho saḷāyatananirodhā
phassanirodho phassanirodhā vedanānirodho vedanānirodhā taṇhānirodho
taṇhānirodhā
Upādānanirodho upādānanirodhā bhavanirodho bhavanirodhā jātinirodho
jātinirodhā jarāmaraṇaṃ sokaparidevadukkhadomanassupāyāsā nirujjhanti
evametassa kevalassa dukkhakkhandhassa nirodho hotīti.
{3.2} Athakho bhagavā etamatthaṃ viditvā tāyaṃ velāyaṃ imaṃ udānaṃ
udānesi
yadā have pātubhavanti dhammā
ātāpino jhāyato brāhmaṇassa
vidhūpayaṃ tiṭṭhati mārasenaṃ
suriyova 1- obhāsayamantalikkhanti.
Bodhikathā niṭṭhitā 2-.
[4] Athakho bhagavā sattāhassa accayena tamhā samādhimhā
vuṭṭhahitvā bodhirukkhamūlā yena ajapālanigrodho tenupasaṅkami
upasaṅkamitvā ajapālanigrodharukkhamūle 3- sattāhaṃ ekapallaṅkena nisīdi
vimuttisukhapaṭisaṃvedī.
Athakho aññataro huṃhukajātiko 4- brāhmaṇo yena bhagavā
tenupasaṅkami upasaṅkamitvā bhagavatā saddhiṃ sammodi sammodanīyaṃ
@Footnote: 1 Ma. sūriyova. katthaci sūrova itipi dissati. 2 Sī. idaṃ pāṭhadvayaṃ na dissati.
@3 Ma. ajapālanigrodhamūle. 4 Yu. Rā. huṃhukajātiko. huṃhukajātikoti so kira
@diṭṭhamaṅgaliko nāma mānavasena kodhavasena ca huṃhunti karonto vicarati tasmā
@huṃhukajātikoti vuccati. huhukkajātikotipi paṭhantīti tabbaṇṇanā.
Kathaṃ sārāṇīyaṃ vītisāretvā ekamantaṃ aṭṭhāsi . ekamantaṃ ṭhito
kho so brāhmaṇo bhagavantaṃ etadavoca kittāvatā nu kho
bho gotama brāhmaṇo hoti katame ca pana brāhmaṇakaraṇā
dhammāti.
{4.1} Athakho bhagavā etamatthaṃ viditvā tāyaṃ velāyaṃ imaṃ
udānaṃ udānesi
yo brāhmaṇo bāhitapāpadhammo
nīhuṃhuko 1- nikkasāvo yatatto
vedantagū vūsitabrahmacariyo
dhammena so 2- brahmavādaṃ vadeyya
yassussadā natthi kuhiñci loketi.
Ajapālanigrodhakathā niṭṭhitā 3-.
[5] Athakho bhagavā sattāhassa accayena tamhā samādhimhā
vuṭṭhahitvā ajapālanigrodhamūlā yena mucalindo tenupasaṅkami
upasaṅkamitvā mucalindamūle sattāhaṃ ekapallaṅkena nisīdi
vimuttisukhapaṭisaṃvedī.
Tena kho pana samayena mahāakālamegho udapādi .
Sattāhavaddalikā sītavātaduddinī . athakho mucalindo nāgarājā
sakabhavanā nikkhamitvā bhagavato kāyaṃ sattakkhattuṃ bhogehi parikkhipitvā
@Footnote: 1 Yu. Rā. nihuhuṃko. Ma. nihuṃhuṃko nikasāvo. 2 Yu. Rā. so brāhmaṇo.
@3 Sī. idaṃ pāṭhadvayaṃ na dissati.
Uparimuddhani mahantaṃ phaṇaṃ karitvā aṭṭhāsi mā bhagavantaṃ sītaṃ
mā bhagavantaṃ uṇhaṃ mā bhagavantaṃ ḍaṃsamakasavātātapasiriṃsapasamphassoti 1-.
Athakho mucalindo nāgarājā sattāhassa accayena viddhaṃ vigatabalāhakaṃ
devaṃ viditvā bhagavato kāyā bhoge vinīveṭhetvā sakavaṇṇaṃ
paṭisaṃharitvā māṇavakavaṇṇaṃ abhinimminitvā bhagavato purato aṭṭhāsi
añjaliko bhagavantaṃ namassamāno.
Athakho bhagavā etamatthaṃ viditvā tāyaṃ velāyaṃ imaṃ udānaṃ
udānesi
sukho viveko tuṭṭhassa sutadhammassa passato
abyāpajjhaṃ sukhaṃ loke pāṇabhūtesu saññamo
sukhā virāgatā loke kāmānaṃ samatikkamo
asmimānassa yo vinayo etaṃ ve paramaṃ sukhanti.
Mucalindakathā niṭṭhitā 2-.
[6] Athakho bhagavā sattāhassa accayena tamhā samādhimhā
vuṭṭhahitvā mucalindamūlā yena rājāyatanaṃ tenupasaṅkami
upasaṅkamitvā rājāyatanamūle sattāhaṃ ekapallaṅkena nisīdi
vimuttisukhapaṭisaṃvedī.
Tena kho pana samayena tapussabhallikā 3- vāṇijā ukkalā taṃ
desaṃ addhānamaggapaṭipannā honti . athakho tapussabhallikānaṃ
@Footnote: 1 Ma. sarīsapa.... 2 Sī. idaṃ pāṭhadvayaṃ na dissati. 3 Sī. tapassubhallikā.
Vāṇijānaṃ ñātisālohitā devatā tapussabhallike vāṇije
etadavoca ayaṃ mārisā bhagavā rājāyatanamūle viharati
paṭhamābhisambuddho gacchatha taṃ bhagavantaṃ manthena ca madhupiṇḍikāya
ca paṭimānetha taṃ vo bhavissati dīgharattaṃ hitāya sukhāyāti . athakho
tapussabhallikā vāṇijā manthañca madhupiṇḍikañca ādāya yena
bhagavā tenupasaṅkamiṃsu upasaṅkamitvā bhagavantaṃ abhivādetvā
ekamantaṃ aṭṭhaṃsu . ekamantaṃ ṭhitā kho tapussabhallikā vāṇijā
bhagavantaṃ etadavocuṃ paṭiggaṇhātu no bhante bhagavā manthañca
madhupiṇḍikañca yaṃ amhākaṃ assa dīgharattaṃ hitāya sukhāyāti.
{6.1} Athakho bhagavato etadahosi na kho tathāgatā hatthesu
paṭiggaṇhanti kimhi nu kho ahaṃ paṭiggaṇheyyaṃ manthañca
madhupiṇḍikañcāti . athakho cattāro mahārājā 1- bhagavato cetasā
cetoparivitakkamaññāya catuddisā cattāro selamaye patte
bhagavato upanāmesuṃ idha bhante bhagavā paṭiggaṇhātu manthañca
madhupiṇḍikañcāti . paṭiggahesi bhagavā paccagghe selamaye
patte manthañca madhupiṇḍikañca paṭiggahetvā ca paribhuñji .
Athakho tapussabhallikā vāṇijā 2- bhagavantaṃ etadavocuṃ ete mayaṃ
bhante bhagavantaṃ saraṇaṃ gacchāma dhammañca upāsake no bhagavā
@Footnote: 1 yebhuyyena mahārājānoti dissati. Ma. Yu. īdisameva . 2 Ma. Yu. Rā. ito paraṃ
@bhagavantaṃ onītapattapāṇiṃ viditvā bhagavato pādesu sirasā nipatitvāti vacanaṃ dissati.
Dhāretu ajjatagge pāṇupete saraṇaṃ gateti . te ca 1- loke
paṭhamaṃ upāsakā ahesuṃ dvevācikā.
Rājāyatanakathā niṭṭhitā 2-.
[7] Athakho bhagavā sattāhassa accayena tamhā samādhimhā
vuṭṭhahitvā rājāyatanamūlā yena ajapālanigrodho tenupasaṅkami 3- .
Tatra sudaṃ bhagavā ajapālanigrodhamūle viharati . athakho bhagavato
rahogatassa paṭisallīnassa evaṃ cetaso parivitakko udapādi
adhigato kho mayāyaṃ dhammo gambhīro duddaso duranubodho santo
paṇīto atakkāvacaro nipuṇo paṇḍitavedanīyo ālayarāmā kho
panāyaṃ pajā ālayaratā ālayasammuditā ālayarāmāya kho pana
pajāya ālayaratāya ālayasammuditāya duddasaṃ idaṃ ṭhānaṃ yadidaṃ
idappaccayatāpaṭiccasamuppādo idaṃpi kho ṭhānaṃ sududdasaṃ yadidaṃ
sabbasaṅkhārasamatho sabbūpadhipaṭinissaggo taṇhakkhayo virāgo nirodho
nibbānaṃ ahañceva kho pana dhammaṃ deseyyaṃ pare ca me na ājāneyyuṃ
so mamassa kilamatho sā mamassa vihesāti . apissu bhagavantaṃ imā
anacchariyā gāthāyo paṭibhaṃsu pubbe assutapubbā
@Footnote: 1 Yu. te va . 2 Sī. idaṃ pāṭhadvayaṃ na dissati . 3 ito paraṃ yebhuyyena
@upasaṅkamitvāti pāṭho dissati. so atirekoti daṭṭhabbo.
Kicchena me adhigataṃ halandāni pakāsituṃ.
Rāgadosaparetehi nāyaṃ dhammo susambudho.
Paṭisotagāmiṃ nipuṇaṃ gambhīraṃ duddasaṃ aṇuṃ
rāgarattā na dakkhanti tamokkhandhena āvuṭāti.
Itiha bhagavato paṭisañcikkhato appossukkatāya cittaṃ namati no
dhammadesanāya.
[8] Athakho brahmuno sahampatissa 1- bhagavato cetasā
cetoparivitakkamaññāya etadahosi nassati vata bho loko
vinassati vata bho loko yatra hi nāma tathāgatassa arahato
sammāsambuddhassa appossukkatāya cittaṃ namati no
dhammadesanāyāti . athakho brahmā sahampati seyyathāpi
nāma balavā puriso sammiñjitaṃ vā bāhaṃ pasāreyya pasāritaṃ
vā bāhaṃ sammiñjeyya evameva 2- brahmaloke antarahito
bhagavato purato pāturahosi.
{8.1} Athakho brahmā sahampati ekaṃsaṃ uttarāsaṅgaṃ karitvā
dakkhiṇajāṇumaṇḍalaṃ 3- paṭhaviyaṃ 4- nihantvā yena bhagavā tenañjaliṃ
paṇāmetvā bhagavantaṃ etadavoca desetu bhante bhagavā dhammaṃ desetu
sugato dhammaṃ santi 5- sattā apparajakkhajātikā 6- assavanatā dhammassa
@Footnote: 1 sahappatītipi tassa nāmaṃ . 2 Sī. evamevaṃ . 3 Yu. dakkhiṇañjānumaṇḍalaṃ.
@4 Rā. bhūmiyaṃ. Sī. puthuviyaṃ . 5 santīdhātipi pāṭho . 6 Sī. apparajakkhajātiyā.
Parihāyanti bhavissanti dhammassa aññātāroti.
{8.2} Idamavoca brahmā sahampati idaṃ vatvā athāparaṃ etadavoca
pāturahosi magadhesu pubbe
dhammo asuddho samalehi cintito.
Apāpuretaṃ amatassa dvāraṃ
suṇantu dhammaṃ vimalenānubuddhaṃ.
Sele yathā pabbatamuddhaniṭṭhito
yathāpi passe janataṃ samantato
tathūpamaṃ dhammamayaṃ sumedha
pāsādamāruyha samantacakkhu
sokāvatiṇṇaṃ janataṃ apetasoko
avekkhassu 1- jātijarābhibhūtaṃ.
Uṭṭhehi vīra vijitasaṅgāma
satthavāha anaṇa vicara loke.
Desassu 2- bhagavā dhammaṃ aññātāro bhavissantīti 3-.
@Footnote: 1 apekkhassūtipi pāṭho . 2 yebhuyyena desetūti pāṭho dissati . 3 Yu. Rā.
@tikkhattuṃ ajjhesanā katā. tesu hi evaṃ dissati evaṃ vutte bhagavā brahmānaṃ
@sahampatiṃ etadavoca mayhaṃ kho brahme etadahosi adhigato kho mayāyaṃ dhammo .. sā mamassa
@vihesāti apissu maṃ brahme imā anacchariyā gāthāyo paṭibhaṃsu pubbe me
@assutapubbā ... āvuṭāti itiha me brahme paṭisañcikkhato appossukkatāya
@cittaṃ namati no dhammadesanāyāti. dutiyampikho brahmā sahampati bhagavantaṃ etadavoca
@desetu bhante
[9] Athakho bhagavā brahmuno ca ajjhesanaṃ viditvā sattesu ca
kāruññataṃ paṭicca buddhacakkhunā lokaṃ volokesi . addasā kho
bhagavā buddhacakkhunā lokaṃ volokento satte apparajakkhe
mahārajakkhe tikkhindriye mudindriye svākāre dvākāre suviññāpaye
duviññāpaye appekacce paralokavajjabhayadassāvino 1- viharante.
{9.1} Seyyathāpi nāma uppaliniyaṃ vā paduminiyaṃ vā puṇḍarīkiniyaṃ vā
appekaccāni uppalāni vā padumāni vā puṇḍarīkāni vā udake jātāni
udake saṃvaḍḍhāni udakānuggatāni antonimuggaposīni appekaccāni
uppalāni vā padumāni vā puṇḍarīkāni vā udake jātāni udake
saṃvaḍḍhāni samodakaṃ ṭhitāni appekaccāni uppalāni vā padumāni
vā puṇḍarīkāni vā udake jātāni udake saṃvaḍḍhāni udakā
accuggamma tiṭṭhanti 2- anupalittāni udakena evameva 3- bhagavā
buddhacakkhunā lokaṃ volokento addasa satte apparajakkhe
mahārajakkhe tikkhindriye mudindriye svākāre dvākāre suviññāpaye
duviññāpaye appekacce paralokavajjabhayadassāvino viharante
@Footnote:bhagavā dhammaṃ ... aññātāro bhavissantīti. dutiyampi kho bhagavā brahmānaṃ sahampatiṃ
@etadavoca mayhaṃ kho brahme etadahosi ... no dhammadesanāyāti. tatiyampi kho
@brahmā sahampati bhagavantaṃ etadavoca desetu bhante bhagavā dhammaṃ ... aññātāro
@bhavissantīti.
@1 Ma. ...dassāvine. ito paraṃ īdisameva . 2 Ma. ṭhitāni . 3 Ma. evamevaṃ.
Disvāna brahmānaṃ sahampatiṃ gāthāya ajjhabhāsi
apārutā te 1- amatassa dvārā
ye sotavanto pamuñcantu saddhaṃ.
Vihiṃsasaññī paguṇaṃ na bhāsiṃ
dhammaṃ paṇītaṃ manujesu brahmeti.
Athakho brahmā sahampati katāvakāso khomhi bhagavatā
dhammadesanāyāti bhagavantaṃ abhivādetvā padakkhiṇaṃ katvā
tatthevantaradhāyi.
Brahmayācanakathā niṭṭhitā 2-
[10] Athakho bhagavato etadahosi kassa nu kho ahaṃ paṭhamaṃ dhammaṃ
deseyyaṃ ko imaṃ dhammaṃ khippameva ājānissatīti . athakho bhagavato
etadahosi ayaṃ kho āḷāro kālāmo paṇḍito byatto medhāvī
dīgharattaṃ apparajakkhajātiko yannūnāhaṃ āḷārassa kālāmassa
paṭhamaṃ dhammaṃ deseyyaṃ so imaṃ dhammaṃ khippameva ājānissatīti .
Athakho devatā 3- antarahitā bhagavato ārocesi sattāhakālakato
bhante āḷāro kālāmoti . bhagavatopi kho ñāṇaṃ udapādi
sattāhakālakato āḷāro kālāmoti . athakho
@Footnote: 1 Ma. Yu. tesaṃ . 2 Sī. idaṃ pāṭhadvayaṃ na dissati . 3 Ma. Yu. antarahitā
@devatā. ito paraṃ īdisameva.
Bhagavato etadahosi mahājāniyo kho āḷāro kālāmo sace
hi so imaṃ dhammaṃ suṇeyya khippameva ājāneyyāti . athakho
bhagavato etadahosi kassa nu kho ahaṃ paṭhamaṃ dhammaṃ deseyyaṃ
ko imaṃ dhammaṃ khippameva ājānissatīti.
{10.1} Athakho bhagavato etadahosi ayaṃ kho uddako rāmaputto
paṇḍito byatto medhāvī dīgharattaṃ apparajakkhajātiko yannūnāhaṃ
uddakassa rāmaputtassa paṭhamaṃ dhammaṃ deseyyaṃ so imaṃ dhammaṃ khippameva
ājānissatīti . athakho devatā antarahitā bhagavato ārocesi
abhidosakālakato bhante uddako rāmaputtoti . bhagavatopi kho
ñāṇaṃ udapādi abhidosakālakato uddako rāmaputtoti.
{10.2} Athakho bhagavato etadahosi mahājāniyo kho uddako
rāmaputto sace hi so imaṃ dhammaṃ suṇeyya khippameva ājāneyyāti.
Athakho bhagavato etadahosi kassa nu kho ahaṃ paṭhamaṃ dhammaṃ deseyyaṃ
ko imaṃ dhammaṃ khippameva ājānissatīti . athakho bhagavato etadahosi
bahūpakārā kho me pañcavaggiyā bhikkhū ye maṃ padhānapahitattaṃ
upaṭṭhahiṃsu yannūnāhaṃ pañcavaggiyānaṃ bhikkhūnaṃ paṭhamaṃ dhammaṃ deseyyanti .
Athakho bhagavato etadahosi kahaṃ nu kho etarahi pañcavaggiyā bhikkhū
viharantīti . addasā kho bhagavā dibbena cakkhunā visuddhena
atikkantamānusakena pañcavaggiye bhikkhū bārāṇasiyaṃ
Viharante isipatane migadāye . athakho bhagavā uruvelāyaṃ yathābhirantaṃ
viharitvā yena bārāṇasī tena cārikaṃ pakkāmi.
[11] Addasā kho upako ājīvako bhagavantaṃ antarā ca gayaṃ
antarā ca bodhiṃ addhānamaggapaṭipannaṃ disvāna bhagavantaṃ etadavoca
vippasannāni kho te āvuso indriyāni parisuddho chavivaṇṇo
pariyodāto kaṃsi tvaṃ āvuso uddissa pabbajito ko vā
te satthā kassa vā tvaṃ dhammaṃ rocesīti . evaṃ vutte bhagavā
upakaṃ ājīvakaṃ gāthāhi ajjhabhāsi
sabbābhibhū sabbavidūhamasmi
sabbesu dhammesu anūpalitto
sabbañjaho taṇhakkhaye vimutto
sayaṃ abhiññāya kamuddiseyyaṃ.
Na me ācariyo atthi sadiso me na vijjati
sadevakasmiṃ lokasmiṃ natthi me paṭipuggalo.
Ahañhi arahā loke ahaṃ satthā anuttaro
ekomhi sammāsambuddho sītibhūtosmi nibbuto.
Dhammacakkaṃ pavattetuṃ gacchāmi kāsinaṃ puraṃ
andhabhūtasmiṃ lokasmiṃ ahaññiṃ 1- amatadundubhinti.
Yathā kho tvaṃ āvuso paṭijānāsi arahasi anantajinoti.
Mādisā ve jinā honti ye pattā āsavakkhayaṃ.
@Footnote: 1 Yu. ahañhi.
Jitā me pāpakā dhammā tasmāhamupaka jinoti.
Evaṃ vutte upako ājīvako huveyyāvusoti 1- vatvā sīsaṃ
okampetvā ummaggaṃ gahetvā pakkāmi.
[12] Athakho bhagavā anupubbena cārikaṃ caramāno yena bārāṇasī
isipatanaṃ migadāyo yena pañcavaggiyā bhikkhū tenupasaṅkami .
Addasaṃsu kho pañcavaggiyā bhikkhū bhagavantaṃ dūrato va āgacchantaṃ
disvāna aññamaññaṃ [2]- saṇṭhapesuṃ ayaṃ āvuso samaṇo gotamo
āgacchati bāhulliko padhānavibbhanto āvatto bāhullāya so
neva abhivādetabbo na paccuṭṭhātabbo nāssa pattacīvaraṃ
paṭiggahetabbaṃ apica kho āsanaṃ ṭhapetabbaṃ sace [3]- ākaṅkhissati
nisīdissatīti.
{12.1} Yathā yathā kho bhagavā pañcavaggiye bhikkhū upasaṅkamati
tathā tathā te 4- pañcavaggiyā bhikkhū [5]- sakāya katikāya [6]-
asaṇṭhahantā bhagavantaṃ paccuggantvā eko bhagavato pattacīvaraṃ
paṭiggahesi eko āsanaṃ paññāpesi eko pādodakaṃ [7]- pādapīṭhaṃ [8]-
pādakathalikaṃ upanikkhipi . nisīdi bhagavā paññatte āsane . nisajja
kho bhagavā pāde pakkhālesi. Apissu bhagavantaṃ nāmena ca āvusovādena
ca samudācaranti . evaṃ vutte bhagavā pañcavaggiye bhikkhū etadavoca
mā bhikkhave tathāgataṃ nāmena ca āvusovādena
@Footnote: 1 Sī. huveyya āvusoti. Ma. Yu. hupeyya āvusoti. Rā. hupeyyāvusoti.
@2 Ma. katikaṃ . 3 Ma. so . 4 Ma. ayaṃ saddo na dissati . 5 Po. na
@sakkonti saṇṭhātuṃ. Ma. nāsakkhiṃsu. 6 Ma. saññātuṃ . 7-8 Ma. eko.
Ca samudācarittha 1- arahaṃ bhikkhave tathāgato sammāsambuddho
odahatha bhikkhave sotaṃ amatamadhigataṃ ahamanusāsāmi ahaṃ dhammaṃ
desemi yathānusiṭṭhaṃ 2- paṭipajjamānā nacirasseva yassatthāya
kulaputtā sammadeva agārasmā anagāriyaṃ pabbajanti tadanuttaraṃ
brahmacariyapariyosānaṃ diṭṭhe va dhamme sayaṃ abhiññā sacchikatvā
upasampajja viharissathāti . evaṃ vutte pañcavaggiyā bhikkhū
bhagavantaṃ etadavocuṃ tāyapi kho tvaṃ āvuso gotama cariyāya 3- tāya
paṭipadāya tāya dukkarakārikāya nevajjhagā uttarimanussadhammaṃ
alamariyañāṇadassanavisesaṃ kiṃ pana tvaṃ [4]- etarahi bāhulliko
padhānavibbhanto āvatto bāhullāya adhigamissasi
uttarimanussadhammaṃ alamariyañāṇadassanavisesanti.
{12.2} Evaṃ vutte bhagavā pañcavaggiye bhikkhū etadavoca na
bhikkhave tathāgato bāhulliko na padhānavibbhanto na āvatto
bāhullāya arahaṃ bhikkhave tathāgato sammāsambuddho odahatha
bhikkhave sotaṃ amatamadhigataṃ ahamanusāsāmi ahaṃ dhammaṃ desemi
yathānusiṭṭhaṃ paṭipajjamānā nacirasseva yassatthāya kulaputtā
sammadeva agārasmā anagāriyaṃ pabbajanti
@Footnote: 1 Ma. Yu. samudācaratha . 2 ito paraṃ sabbapotthakesu tathāsaddo dissati. so pana
@yasmā yathānusiṭṭhanti padaṃ paṭipajjamānāti pade kiriyāvisesanaṃ hoti tasmā
@atirekoti daṭṭhabbo. tena taṃ vajjetvā sodhitaṃ . 3 Sī. Ma. iriyāya.
@4 Po. āvuso.
Tadanuttaraṃ brahmacariyapariyosānaṃ diṭṭhe va dhamme sayaṃ abhiññā
sacchikatvā upasampajja viharissathāti . dutiyampi kho pañcavaggiyā
bhikkhū bhagavantaṃ etadavocuṃ .pe. dutiyampi kho bhagavā pañcavaggiye
bhikkhū etadavoca .pe. tatiyampi kho pañcavaggiyā bhikkhū bhagavantaṃ
etadavocuṃ tāyapi kho tvaṃ āvuso gotama cariyāya tāya
paṭipadāya tāya dukkarakārikāya nevajjhagā uttarimanussadhammaṃ
alamariyañāṇadassanavisesaṃ kiṃ pana tvaṃ etarahi bāhulliko
padhānavibbhanto āvatto bāhullāya adhigamissasi uttarimanussadhammaṃ
alamariyañāṇadassanavisesanti.
{12.3} Evaṃ vutte bhagavā pañcavaggiye bhikkhū etadavoca abhijānātha
me no tumhe bhikkhave ito pubbe [1]- bhāsitametanti 2-. Nohetaṃ
bhante 3- . arahaṃ bhikkhave tathāgato sammāsambuddho odahatha bhikkhave
sotaṃ amatamadhigataṃ ahamanusāsāmi ahaṃ dhammaṃ desemi yathānusiṭṭhaṃ paṭijjamānā
nacirasseva yassatthāya kulaputtā sammadeva agārasmā anagāriyaṃ
pabbajanti tadanuttaraṃ brahmacariyapariyosānaṃ diṭṭhe va dhamme
sayaṃ abhiññā sacchikatvā upasampajja viharissathāti . asakkhi
kho bhagavā pañcavaggiye bhikkhū saññāpetuṃ . athakho pañcavaggiyā
bhikkhū bhagavantaṃ sussūsiṃsu sotaṃ odahiṃsu aññāya 4- cittaṃ upaṭṭhāpesuṃ.
[13] Athakho bhagavā pañcavaggiye bhikkhū āmantesi dveme
@Footnote: 1 Po. Ma. Yu. evarūpaṃ . 2 Sī. dhammādhigatametanti. Rā. abbhācikkhitametanti.
@3 Po. Ma. Yu. itisaddo dissati . 4 Po. Ma. Yu. aññā.
Bhikkhave antā pabbajitena na sevitabbā 1- . yo cāyaṃ kāmesu
kāmasukhallikānuyogo hīno gammo pothujjaniko anariyo anatthasañhito
yo cāyaṃ attakilamathānuyogo dukkho anariyo anatthasañhito
ete te 2- bhikkhave ubho ante anupagamma majjhimā paṭipadā
tathāgatena abhisambuddhā cakkhukaraṇī ñāṇakaraṇī upasamāya abhiññāya
sambodhāya nibbānāya saṃvattati.
{13.1} Katamā ca sā bhikkhave majjhimā paṭipadā tathāgatena
abhisambuddhā cakkhukaraṇī ñāṇakaraṇī upasamāya abhiññāya
sambodhāya nibbānāya saṃvattati ayameva ariyo aṭṭhaṅgiko maggo
seyyathīdaṃ sammādiṭṭhi sammāsaṅkappo sammāvācā sammākammanto
sammāājīvo sammāvāyāmo sammāsati sammāsamādhi . ayaṃ kho
sā bhikkhave majjhimā paṭipadā tathāgatena abhisambuddhā cakkhukaraṇī
ñāṇakaraṇī upasamāya abhiññāya sambodhāya nibbānāya saṃvattati.
The Pali Tipitaka in Roman Character Volume 4 page 1-18.
https://84000.org/tipitaka/read/roman_item.php?book=4&item=1&items=13
Classified by [Item Number] :-
http://84000.org/tipitaka/read/roman_item.php?book=4&item=1&items=13&mode=bracket
Compare with The Pali Tipitaka in Thai Character :-
https://84000.org/tipitaka/read/pali_item.php?book=4&item=1&items=13
Compare with The Royal Version of Thai Tipitaka :-
https://84000.org/tipitaka/read/byitem.php?book=4&item=1&items=13
Study Atthakatha :-
https://84000.org/tipitaka/attha/attha.php?b=4&i=1
Contents of The Tipitaka Volume 4
https://84000.org/tipitaka/read/?index_4
https://84000.org/tipitaka/english/?index_4
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
