[247] Idha pana bhikkhave tadahupavaranaya bhikkhu bhikkhussa pavaranam
thapeti . tance bhikkhum anne bhikkhu jananti ayam kho ayasma
aparisuddhakayasamacaro aparisuddhavacisamacaro aparisuddhaajivo
balo abyatto na patibalo anuyunjiyamano anuyogam datunti .
Alam bhikkhu ma bhandanam ma kalaham ma viggaham ma vivadanti
omadditva sanghena pavaretabbam.
{247.1} Idha pana bhikkhave tadahupavaranaya bhikkhu bhikkhussa
pavaranam thapeti . tance bhikkhum anne bhikkhu jananti ayam kho
ayasma parisuddhakayasamacaro aparisuddhavacisamacaro
aparisuddhaajivo balo abyatto na patibalo anuyunjiyamano
anuyogam datunti . alam bhikkhu ma bhandanam ma kalaham ma viggaham
ma vivadanti omadditva sanghena pavaretabbam.
{247.2} Idha pana bhikkhave tadahupavaranaya bhikkhu bhikkhussa
pavaranam thapeti . tance bhikkhum anne bhikkhu jananti ayam kho
ayasma parisuddhakayasamacaro parisuddhavacisamacaro aparisuddhaajivo
balo abyatto na patibalo anuyunjiyamano anuyogam datunti .
Alam bhikkhu ma bhandanam ma kalaham ma viggaham ma vivadanti omadditva
sanghena pavaretabbam.
{247.3} Idha pana bhikkhave tadahupavaranaya bhikkhussa pavaranam
thapeti . tance bhikkhum anne bhikkhu jananti ayam kho ayasma
Parisuddhakayasamacaro parisuddhavacisamacaro parisuddhaajivo balo
abyatto na patibalo anuyunjiyamano anuyogam datunti . alam bhikkhu
ma bhandanam ma kalaham ma viggaham ma vivadanti omadditva sanghena
pavaretabbam.
{247.4} Idha pana bhikkhave tadahupavaranaya bhikkhu bhikkhussa
pavaranam thapeti . tance bhikkhum anne bhikkhu jananti ayam kho
ayasma parisuddhakayasamacaro parisuddhavacisamacaro parisuddhaajivo
pandito byatto medhavi patibalo anuyunjiyamano anuyogam
datunti . so evamassa vacaniyo yam kho tvam avuso imassa bhikkhuno
pavaranam thapesi kimhi nam thapesi silavipattiya [1]- thapesi acaravipattiya [2]-
thapesi ditthivipattiya [3]- thapesiti. So ce evam vadeyya silavipattiya [4]-
thapemi acaravipattiya thapemi ditthivipattiya thapemiti.
{247.5} So evamassa vacaniyo janati panayasma silavipattim
janati acaravipattim janati ditthivipattinti . so ce evam
vadeyya janami kho aham avuso silavipattim janami acaravipattim
janami ditthivipattinti . so evamassa vacaniyo katama panavuso
silavipatti katama acaravipatti katama ditthivipattiti . so ce
evam vadeyya cattari parajikani terasa sanghadisesa ayam
silavipatti thullaccayam pacittiyam patidesaniyam dukkatam
dubbhasitam ayam acaravipatti micchaditthi antaggahika
ditthi ayam ditthivipattiti . so evamassa vacaniyo yam kho
@Footnote:1-2-3 Ma. va . 4 Ma. evamupari.
Tvam avuso imassa bhikkhuno pavaranam thapesi ditthena thapesi
sutena thapesi parisankaya thapesiti . so ce evam vadeyya
ditthena va thapemi sutena va thapemi parisankaya va thapemiti .
So evamassa vacaniyo yam kho tvam avuso imassa bhikkhuno
ditthena pavaranam thapesi kinte dittham kinti te dittham kada
te dittham kattha te dittham parajikam ajjhapajjanto dittho
sanghadisesam ajjhapajjanto dittho thullaccayam pacittiyam patidesaniyam
dukkatam dubbhasitam ajjhapajjanto dittho kattha ca tvam
ahosi kattha cayam bhikkhu ahosi kinci 1- tvam karosi kincayam
bhikkhu karotiti.
{247.6} So ce evam vadeyya na kho aham avuso imassa
bhikkhuno ditthena pavaranam thapemi apica sutena pavaranam thapemiti .
So evamassa vacaniyo yam kho tvam avuso imassa bhikkhuno sutena
pavaranam thapesi kinte sutam kinti te sutam kada te sutam kattha
te sutam parajikam ajjhapannoti sutam sanghadisesam ajjhapannoti
sutam thullaccayam pacittiyam patidesaniyam dukkatam dubbhasitam
ajjhapannoti sutam bhikkhussa sutam bhikkhuniya sutam sikkhamanaya
sutam samanerassa sutam samaneriya sutam upasakassa sutam
upasikaya sutam rajunam sutam rajamahamattanam sutam titthiyanam
sutam titthiyasavakanam sutanti . so ce evam vadeyya na kho aham
avuso imassa bhikkhuno sutena pavaranam
@Footnote: 1 Po. Ma. Yu. kinca.
Thapemi apica parisankaya pavaranam thapemiti . so evamassa vacaniyo
yam kho tvam avuso imassa bhikkhuno parisankaya pavaranam thapesi kim
parisankasi kinti parisankasi kada parisankasi kattha parisankasi parajikam
ajjhapannoti parisankasi sanghadisesam ajjhapannoti parisankasi
thullaccayam pacittiyam patidesaniyam dukkatam dubbhasitam ajjhapannoti
parisankasi bhikkhussa sutva parisankasi bhikkhuniya sutva parisankasi
sikkhamanaya sutva parisankasi samanerassa sutva parisankasi
samaneriya sutva parisankasi upasakassa sutva parisankasi
upasikaya sutva parisankasi rajunam sutva parisankasi
rajamahamattanam sutva parisankasi titthiyanam sutva parisankasi
titthiyasavakanam sutva parisankasiti.
{247.7} So ce evam vadeyya na kho aham avuso imassa bhikkhuno
parisankaya pavaranam thapemi apica ahampi 1- na janami kenapaham 2-
imassa bhikkhuno pavaranam thapemiti . so ce bhikkhave codako bhikkhu
anuyogena vinnunam sabrahmacarinam cittam na aradheti ananuvado
cudito bhikkhuti alam vacanaya . so ce bhikkhave codako bhikkhu anuyogena
vinnunam sabrahmacarinam cittam aradheti sanuvado cudito bhikkhuti
alam vacanaya . so ce bhikkhave codako bhikkhu amulakena parajikena
anuddhamsitam patijanati sanghadisesam aropetva sanghena pavaretabbam.
@Footnote: 1 Si. Ma. Yu. aham . 2 Si. Ma. Yu. kena aham. Si. Ma. Yu. kenapaham.
@Si. Ma. Yu. kena panaham.
So ce bhikkhave codako bhikkhu amulakena sanghadisesena anuddhamsitam
patijanati yathadhammam karapetva sanghena pavaretabbam . so
ce bhikkhave codako bhikkhu amulakena thullaccayena pacittiyena
patidesaniyena dukkatena dubbhasitena anuddhamsitam patijanati
yathadhammam karapetva sanghena pavaretabbam . so ce bhikkhave cudito
bhikkhu parajikam ajjhapannoti patijanati nasetva sanghena
pavaretabbam . so ce bhikkhave cudito bhikkhu sanghadisesam
ajjhapannoti patijanati sanghadisesam aropetva sanghena
pavaretabbam . so ce bhikkhave cudito bhikkhu thullaccayam pacittiyam
patidesaniyam dukkatam dubbhasitam ajjhapannoti patijanati
yathadhammam karapetva sanghena pavaretabbam.
[248] Idha pana bhikkhave bhikkhu tadahupavaranaya thullaccayam
ajjhapanno hoti . ekacce bhikkhu thullaccayaditthino honti
ekacce bhikkhu sanghadisesaditthino honti . ye te bhikkhave bhikkhu
thullaccayaditthino tehi so bhikkhave bhikkhu ekamantam apanetva
yathadhammam karapetva sangham upasankamitva evamassa vacaniyo yam
kho so avuso bhikkhu apattim apanno sassa yathadhammam
patikata yadi sanghassa pattakallam sangho pavareyyati.
{248.1} Idha pana bhikkhave bhikkhu tadahupavaranaya thullaccayam ajjhapanno
hoti . ekacce bhikkhu thullaccayaditthino honti ekacce bhikkhu
Pacittiyaditthino honti ekacce bhikkhu thullaccayaditthino honti
ekacce bhikkhu patidesaniyaditthino honti ekacce bhikkhu
thullaccayaditthino honti ekacce bhikkhu dukkataditthino honti
ekacce bhikkhu thullaccayaditthino honti ekacce bhikkhu
dubbhasitaditthino honti . ye te bhikkhave bhikkhu thullaccayaditthino
tehi so bhikkhave bhikkhu ekamantam apanetva yathadhammam karapetva
sangham upasankamitva evamassa vacaniyo yam kho so avuso bhikkhu
apattim apanno sassa yathadhammam patikata yadi sanghassa pattakallam
sangho pavareyyati.
{248.2} Idha pana bhikkhave bhikkhu tadahupavaranaya pacittiyam
ajjhapanno hoti patidesaniyam ajjhapanno hoti dukkatam
ajjhapanno hoti dubbhasitam ajjhapanno hoti . ekacce
bhikkhu dubbhasitaditthino honti ekacce bhikkhu sanghadisesaditthino
honti . ye te bhikkhave bhikkhu dubbhasitaditthino tehi so bhikkhave
bhikkhu ekamantam apanetva yathadhammam karapetva sangham
upasankamitva evamassa vacaniyo yam kho so avuso bhikkhu apattim
apanno sassa yathadhammam patikata yadi sanghassa pattakallam
sangho pavareyyati.
{248.3} Idha pana bhikkhave bhikkhu tadahupavaranaya dubbhasitam
ajjhapanno hoti . ekacce bhikkhu dubbhasitaditthino honti
ekacce bhikkhu thullaccayaditthino honti ekacce bhikkhu
dubbhasitaditthino honti ekacce bhikkhu pacittiyaditthino
Honti ekacce bhikkhu dubbhasitaditthino honti ekacce bhikkhu
patidesaniyaditthino honti ekacce bhikkhu dubbhasitaditthino
honti ekacce bhikkhu dukkataditthino honti . ye te bhikkhave
bhikkhu dubbhasitaditthino tehi so bhikkhave bhikkhu ekamantam apanetva
yathadhammam karapetva sangham upasankamitva evamassa vacaniyo yam
kho so avuso bhikkhu apattim apanno sassa yathadhammam
patikata yadi sanghassa pattakallam sangho pavareyyati.
[249] Idha pana bhikkhave bhikkhu tadahupavaranaya sanghamajjhe
udahareyya sunatu me bhante sangho idam vatthum pannayati
na puggalo yadi sanghassa pattakallam vatthum thapetva sangho
pavareyyati . so evamassa vacaniyo bhagavata kho avuso
visuddhanam pavarana pannatta sace vatthum pannayati na puggalo
idaneva nam vadehiti.
{249.1} Idha pana bhikkhave bhikkhu tadahupavaranaya sanghamajjhe
udahareyya sunatu me bhante sangho ayam puggalo pannayati na
vatthum yadi sanghassa pattakallam puggalam thapetva sangho pavareyyati.
So evamassa vacaniyo bhagavata kho avuso samagganam pavarana
pannatta sace puggalo pannayati na vatthum idaneva nam vadehiti.
{249.2} Idha pana bhikkhave bhikkhu tadahupavaranaya
sanghamajjhe udahareyya sunatu me bhante sangho idam
vatthunca puggalo ca pannayati yadi sanghassa pattakallam
Vatthunca puggalanca thapetva sangho pavareyyati . so evamassa
vacaniyo bhagavata kho avuso visuddhananca samaggananca pavarana
pannatta sace vatthunca puggalo ca pannayati idaneva nam
vadehiti . pubbe ce bhikkhave pavaranaya vatthum pannayati paccha
puggalo kallam vacanaya . pubbe ce bhikkhave pavaranaya puggalo
pannayati paccha vatthum kallam vacanaya . pubbe ce bhikkhave
pavaranaya vatthunca puggalo ca pannayati tance kataya
pavaranaya ukkoteti ukkotanakam pacittiyanti.
[250] Tena kho pana samayena sambahula sandittha sambhatta
bhikkhu kosalesu janapadesu annatarasmim avase vassam upagacchimsu .
Tesam samanta anne bhikkhu bhandanakaraka kalahakaraka vivadakaraka
bhassakaraka sanghe adhikaranakaraka vassam upagacchimsu mayam tesam
bhikkhunam vassam vutthanam pavaranaya pavaranam thapessamati.
{250.1} Assosum kho te bhikkhu amhakam kira samanta anne
bhikkhu bhandanakaraka kalahakaraka vivadakaraka bhassakaraka sanghe
adhikaranakaraka vassam upagata mayam tesam bhikkhunam vassam vutthanam
pavaranaya pavaranam thapessamati katham nu kho amhehi patipajjitabbanti.
Bhagavato etamattham arocesum.
{250.2} Idha pana bhikkhave sambahula sandittha sambhatta
bhikkhu annatarasmim avase vassam upagacchanti . tesam samanta
anne bhikkhu bhandanakaraka kalahakaraka vivadakaraka
Bhassakaraka sanghe adhikaranakaraka vassam upagacchanti mayam tesam
bhikkhunam vassam vutthanam pavaranaya pavaranam thapessamati . anujanami
bhikkhave tehi bhikkhuhi dve tayo uposathe catuddasike katum katham
mayam tehi bhikkhuhi pathamataram pavareyyamati . te ce bhikkhave bhikkhu
bhandanakaraka kalahakaraka vivadakaraka bhassakaraka sanghe
adhikaranakaraka [1]- avasam agacchanti tehi bhikkhave avasikehi
bhikkhuhi lahum lahum sannipatitva pavaretabbam pavaretva vattabba
pavarita kho mayam avuso yatha ayasmanto 2- mannanti tatha
karontuti.
{250.3} Te ce bhikkhave bhikkhu bhandanakaraka kalahakaraka
vivadakaraka bhassakaraka sanghe adhikaranakaraka asamvihita tam
avasam agacchanti tehi bhikkhave avasikehi bhikkhuhi asanam
pannapetabbam padodakam padapitham padakathalikam upanikkhipitabbam
paccuggantva pattacivaram patiggahetabbam paniyena pucchitabba 3- .
Tesam vikkhitva nissimam gantva pavaretabbam . pavaretva vattabba
pavarita kho mayam avuso yatha ayasmanto mannanti tatha
karontuti . evancetam labhetha iccetam kusalam no ce labhetha
avasikena bhikkhuna byattena patibalena avasika bhikkhu napetabba
{250.4} sunantu me ayasmanto avasika yadayasmantanam
pattakallam idani uposatham kareyyama patimokkham uddiseyyama
agame kale pavareyyamati . te ce bhikkhave bhikkhu bhandanakaraka
@Footnote: 1 Ma. tam . 2 Ma. Yu. ayasmanta. evamupari . 3 Ma. paripucchitabba.
Kalahakaraka vivadakaraka bhassakaraka sanghe adhikaranakaraka
te bhikkhu evam vadeyyum sadhu avuso idaneva no pavarethati.
Te evamassu vacaniya anissara kho tumhe avuso amhakam
pavaranaya na tava mayam pavaressamati 1- . te ce bhikkhave
bhikkhu bhandanakaraka kalahakaraka vivadakaraka bhassakaraka sanghe
adhikaranakaraka tam kalam anuvaseyyum avasikena [2]- bhikkhuna byattena
patibalena avasika bhikkhu napetabba
{250.5} sunantu me ayasmanto avasika yadayasmantanam
pattakallam idani uposatham kareyyama patimokkham uddiseyyama
agame junhe pavareyyamati . te ce bhikkhave bhikkhu bhandanakaraka
kalahakaraka vivadakaraka bhassakaraka sanghe adhikaranakaraka te
bhikkhu evam vadeyyum sadhu avuso idaneva no pavarethati 3-. Te
evamassu vacaniya anissara kho tumhe avuso amhakam pavaranaya
na tava mayam pavaressamati 4-. Te ce bhikkhave bhikkhu bhandanakaraka
kalahakaraka vivadakaraka bhassakaraka sanghe adhikaranakaraka tampi
junham anuvaseyyum tehi bhikkhave bhikkhuhi sabbeheva agame junhe
komudiya catumasiniya akama pavaretabbam . tehi ce bhikkhave
bhikkhuhi pavariyamane gilano agilanassa pavaranam thapeti so
evamassa vacaniyo ayasma kho gilano gilano ca ananuyogakkhamo
vutto bhagavata agamehi avuso yava arogo hosi arogo
@Footnote: 1 Ma. pavareyyamati. 2 Ma. Yu. bhikkhave. 3 Ma. pavareyyathati.
@4 Ma. pavareyyamati.
Akankhamano codessasiti . evanca vuccamano codeti
anadariye pacittiyam . tehi ce bhikkhave bhikkhuhi pavariyamane
agilano gilanassa pavaranam thapeti so evamassa vacaniyo ayam kho
avuso bhikkhu gilano gilano ca ananuyogakkhamo vutto bhagavata
agamehi avuso yavayam bhikkhu arogo hoti arogam akankhamano
codessasiti . evance vuccamano codeti anadariye pacittiyam .
Tehi ce bhikkhave bhikkhuhi pavariyamane gilano gilanassa pavaranam
thapeti so evamassa vacaniyo ayasmanta kho gilana gilano
ca ananuyogakkhamo vutto bhagavata agamehi avuso yava
aroga hotha arogo arogam akankhamano codessasiti . evance
vuccamano codeti anadariye pacittiyam . tehi ce bhikkhave
bhikkhuhi pavariyamane agilano agilanassa pavaranam thapeti . ubho
sanghena samanuyunjitva samanuggahitva yathadhammam karapetva sanghena
pavaretabbanti.
[251] Tena kho pana samayena sambahula sandittha sambhatta
bhikkhu kosalesu janapadesu annatarasmim avase vassam upagacchimsu .
Tesam samagganam sammodamananam avivadamananam viharatam annataro
phasuviharo adhigato hoti . athakho tesam bhikkhunam etadahosi
amhakam kho samagganam sammodamananam avivadamananam viharatam
annataro phasuviharo adhigato sace mayam idani pavaressama
Siyapi bhikkhu pavaretva carikam pakkameyyum evam mayam imamha
phasuvihara paribahira bhavissama katham nu kho amhehi
patipajjitabbanti. Bhagavato etamattham arocesum.
{251.1} Idha pana bhikkhave sambahula sandittha sambhatta
bhikkhu annatarasmim avase vassam upagacchanti . tesam samagganam
sammodamananam avivadamananam viharatam annataro phasuviharo
adhigato hoti . tatra ce bhikkhunam evam hoti amhakam kho samagganam
sammodamananam avivadamananam viharatam annataro phasuviharo
adhigato sace mayam idani pavaressama siyapi bhikkhu pavaretva
carikam pakkameyyum evam mayam imamha phasuvihara paribahira
bhavissamati . anujanami bhikkhave tehi bhikkhuhi pavaranasangaham
katum . evanca pana bhikkhave katabbo . sabbeheva ekajjham
sannipatitabbam . sannipatitva byattena bhikkhuna patibalena
sangho napetabbo
{251.2} sunatu me bhante sangho amhakam samagganam
sammodamananam avivadamananam viharatam annataro phasuviharo
adhigato . sace mayam idani pavaressama siyapi bhikkhu pavaretva
carikam pakkameyyum evam mayam imamha phasuvihara paribahira
bhavissama . yadi sanghassa pattakallam sangho pavaranasangaham
kareyya idani uposatham kareyya patimokkham uddiseyya agame [1]-
komudiya catumasiniya pavareyya. Esa natti.
{251.3} Sunatu me bhante sangho amhakam samagganam
sammodamananam avivadamananam
@Footnote: 1 Ma. junhe. evamupari.
Viharatam annataro phasuviharo adhigato . sace mayam idani
pavaressama siyapi bhikkhu pavaretva carikam pakkameyyum evam
mayam imamha phasuvihara paribahira bhavissama . sangho
pavaranasangaham karoti idani uposatham karissati patimokkham
uddisissati agame komudiya catumasiniya pavaressati .
Yassayasmato khamati pavaranasangahassa karanam idani uposatham
karissati patimokkham uddisissati agame komudiya catumasiniya
pavaressati so tunhassa yassa nakkhamati so bhaseyya.
{251.4} Kato sanghena pavaranasangaho idani uposatham
karissati patimokkham uddisissati agame komudiya catumasiniya
pavaressati. Khamati sanghassa tasma tunhi. Evametam dharayamiti.
{251.5} Tehi ce bhikkhave bhikkhuhi kate pavaranasangahe annataro
bhikkhu evam vadeyya icchamaham avuso janapadacarikam pakkamitum atthi me
janapade karaniyanti . so evamassa vacaniyo sadhu avuso pavaretva
gacchahiti . so ce bhikkhave bhikkhu pavarayamano annatarassa bhikkhuno
pavaranam thapeti so evamassa vacaniyo anissaro kho me tvam avuso
pavaranaya na tavaham pavaressamiti . tassa ce bhikkhave
bhikkhuno pavarayamanassa annataro bhikkhu tassa bhikkhuno pavaranam
thapeti ubho sanghena samanuyunjitva samanuggahitva yathadhammam
karapetabba . so ce bhikkhave bhikkhu janapade tam karaniyam
Tiretva punadeva antokomudiya catumasiniya tam avasam
agacchati tehi ce bhikkhave bhikkhuhi pavariyamane annataro
bhikkhu tassa bhikkhuno pavaranam thapeti so evamassa vacaniyo
anissaro kho me tvam avuso pavaranaya pavarito ahanti .
Tehi ce bhikkhave bhikkhuhi pavariyamane so bhikkhu annatarassa
bhikkhuno pavaranam thapeti . ubho sanghena samanuyunjitva
samanuggahitva yathadhammam karapetva sanghena pavaretabbanti.
Pavaranakkhandhakam nitthitam catuttham.
Imamhi khandhake vatthu chacattalisa.
-------
Tassuddanam
[252] Vassam vuttha kosalesu agamma 1- satthu dassanam
aphasupasusamvasam annamannanulomata 2-
pavarentasane 3- dve ca kammagilananataka 4-
raja cora ca dhutta ca bhikkhupaccatthika 5- tatha
panca catutayo dveko apanno vemati sari
sabbo sangho vematiko bahusama 6- ca thokika
avasika catuddassa 7- lingasamvasaka ubho
@Footnote: 1 Ma. Yu. agamum. 2 Si. annamannanulomita. 3 Ma. pavarenta panamanca.
@Yu. pavarenta pana dve ca . 4 Ma. Yu. kammam gilananataka. 5 Yu. bhikkhu
@paccatthika tatha. 6 Ma. Yu. bahu sama .... 7 Ma. catuddasa. Yu. catuddasa.
Gantabbam na nisinnaya chandadane pavarana 1-
sancarehi 2- khepita megho antara ca pavarana
na karonti 3- puramhakam atthapita ca bhikkhuno
kimhi cati 4- katamanca ditthena sutasankaya
codako cuditako ca thullavatthu 5- ca bhandanam
pavaranassa sangaho 6- anissaro pavarayeti.
---------------
@Footnote: 1 Yu. chandadanapavarana . 2 Si. Ma. Yu. savarehi . 3 Ma. na icchanti.
@4 Ma. Yu. kimhi vati. 5 Ma. Yu. thullaccayavatthu ....
@6 Ma. Yu. pavaranasangaho ca.
The Pali Tipitaka in Roman Character Volume 4 page 348-362.
https://84000.org/tipitaka/read/roman_item.php?book=4&item=247&items=6
Classified by [Item Number] :-
http://84000.org/tipitaka/read/roman_item.php?book=4&item=247&items=6&mode=bracket
Compare with The Pali Tipitaka in Thai Character :-
https://84000.org/tipitaka/read/pali_item.php?book=4&item=247&items=6
Compare with The Royal Version of Thai Tipitaka :-
https://84000.org/tipitaka/read/byitem.php?book=4&item=247&items=6
Study Atthakatha :-
https://84000.org/tipitaka/attha/attha.php?b=4&i=247
Contents of The Tipitaka Volume 4
https://84000.org/tipitaka/read/?index_4
https://84000.org/tipitaka/english/?index_4
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
