paliTIPITAKA Volume 8 - Vinaya Pitaka 8

[1359] Dve atthavase paṭicca tathāgatena sāvakānaṃ sikkhāpadaṃ paññattaṃ saṅghasuṭṭhutāya saṅghaphāsutāya . ime dve atthavase paṭicca tathāgatena sāvakānaṃ sikkhāpadaṃ paññattaṃ . dve atthavase paṭicca tathāgatena sāvakānaṃ sikkhāpadaṃ paññattaṃ dummaṅkūnaṃ puggalānaṃ niggahāya pesalānaṃ bhikkhūnaṃ phāsuvihārāya . ime dve atthavase paṭicca tathāgatena sāvakānaṃ sikkhāpadaṃ paññattaṃ . Dve atthavase paṭicca tathāgatena sāvakānaṃ sikkhāpadaṃ paññattaṃ diṭṭhadhammikānaṃ āsavānaṃ saṃvarāya samparāyikānaṃ āsavānaṃ paṭighātāya . Ime dve atthavase paṭicca tathāgatena sāvakānaṃ sikkhāpadaṃ paññattaṃ . dve atthavase paṭicca tathāgatena sāvakānaṃ sikkhāpadaṃ paññattaṃ diṭṭhadhammikānaṃ verānaṃ saṃvarāya samparāyikānaṃ verānaṃ paṭighātāya . ime dve atthavase paṭicca tathāgatena sāvakānaṃ sikkhāpadaṃ paññattaṃ . dve atthavase paṭicca tathāgatena sāvakānaṃ sikkhāpadaṃ paññattaṃ diṭṭhadhammikānaṃ vajjānaṃ saṃvarāya samparāyikānaṃ vajjānaṃ paṭighātāya . ime dve atthavase paṭicca tathāgatena sāvakānaṃ sikkhāpadaṃ paññattaṃ . dve atthavase paṭicca tathāgatena sāvakānaṃ sikkhāpadaṃ paññattaṃ diṭṭhadhammikānaṃ bhayānaṃ saṃvarāya samparāyikānaṃ bhayānaṃ paṭighātāya. {1359.1} Ime dve atthavase paṭicca tathāgatena sāvakānaṃ sikkhāpadaṃ paññattaṃ . dve atthavase paṭicca tathāgatena sāvakānaṃ sikkhāpadaṃ paññattaṃ diṭṭhadhammikānaṃ akusalānaṃ dhammānaṃ saṃvarāya samparāyikānaṃ akusalānaṃ dhammānaṃ paṭighātāya . ime dve atthavase paṭicca tathāgatena sāvakānaṃ sikkhāpadaṃ paññattaṃ . dve atthavase paṭicca tathāgatena sāvakānaṃ sikkhāpadaṃ paññattaṃ gihīnaṃ anukampāya pāpicchānaṃ pakkhupacchedāya . ime dve atthavase paṭicca tathāgatena sāvakānaṃ sikkhāpadaṃ paññattaṃ . dve atthavase paṭicca tathāgatena sāvakānaṃ sikkhāpadaṃ paññattaṃ appasannānaṃ pasādāya pasannānaṃ bhiyyobhāvāya . ime dve atthavase paṭicca tathāgatena sāvakānaṃ sikkhāpadaṃ paññattaṃ. Dve atthavase paṭicca tathāgatena sāvakānaṃ sikkhāpadaṃ paññattaṃ saddhammaṭṭhitiyā vinayānuggahāya . ime dve atthavase paṭicca tathāgatena sāvakānaṃ sikkhāpadaṃ paññattanti. Atthavasavaggo niṭṭhito dutiyo. [1360] Dve atthavase paṭicca tathāgatena sāvakānaṃ pātimokkhaṃ paññattaṃ .pe. pātimokkhuddeso paññatto pātimokkhaṭṭhapanaṃ paññattaṃ pavāraṇā paññattā pavāraṇāṭhapanaṃ paññattaṃ tajjanīyakammaṃ paññattaṃ niyassakammaṃ paññattaṃ pabbājanīyakammaṃ paññattaṃ paṭisāraṇīyakammaṃ paññattaṃ ukkhepanīyakammaṃ paññattaṃ parivāsadānaṃ paññattaṃ mūlāya paṭikassanā paññattā mānattadānaṃ paññattaṃ abbhānaṃ paññattaṃ osāraṇīyaṃ paññattaṃ nissāraṇīyaṃ paññattaṃ upasampadā paññattā apalokanakammaṃ paññattaṃ ñattikammaṃ paññattaṃ ñattidutiyakammaṃ paññattaṃ ñatticatutthakammaṃ paññattanti. Paññattivaggo niṭṭhito tatiyo. [1361] Appaññatte paññattaṃ paññatte anuppaññattaṃ sammukhāvinayo paññatto sativinayo paññatto amūḷhavinayo paññatto paṭiññātakaraṇaṃ paññattaṃ yebhuyyasikā paññattā tassapāpiyasikā paññattā tiṇavatthārako paññatto saṅghasuṭṭhutāya saṅghaphāsutāya . ime dve atthavase paṭicca tathāgatena Sāvakānaṃ tiṇavatthārako paññatto . dve atthavase paṭicca tathāgatena sāvakānaṃ tiṇavatthārako paññatto dummaṅkūnaṃ puggalānaṃ niggahāya pesalānaṃ bhikkhūnaṃ phāsuvihārāya . ime dve atthavase paṭicca tathāgatena sāvakānaṃ tiṇavatthārako paññatto . dve atthavase paṭicca tathāgatena sāvakānaṃ tiṇavatthārako paññatto diṭṭhadhammikānaṃ āsavānaṃ saṃvarāya samparāyikānaṃ āsavānaṃ paṭighātāya . ime dve atthavase paṭicca tathāgatena sāvakānaṃ tiṇavatthārako paññatto . dve atthavase paṭicca tathāgatena sāvakānaṃ tiṇavatthārako paññatto diṭṭhadhammikānaṃ verānaṃ saṃvarāya samparāyikānaṃ verānaṃ paṭighātāya. {1361.1} Ime dve atthavase paṭicca tathāgatena sāvakānaṃ tiṇavatthārako paññatto . dve atthavase paṭicca tathāgatena sāvakānaṃ tiṇavatthārako paññatto diṭṭhadhammikānaṃ vajjānaṃ saṃvarāya samparāyikānaṃ vajjānaṃ paṭighātāya . ime dve atthavase paṭicca tathāgatena sāvakānaṃ tiṇavatthārako paññatto . dve atthavase paṭicca tathāgatena sāvakānaṃ tiṇavatthārako paññatto diṭṭhadhammikānaṃ bhayānaṃ saṃvarāya samparāyikānaṃ bhayānaṃ paṭighātāya . Ime dve atthavase paṭicca tathāgatena sāvakānaṃ tiṇavatthārako paññatto . dve atthavase paṭicca tathāgatena sāvakānaṃ tiṇavatthārako paññatto diṭṭhadhammikānaṃ akusalānaṃ dhammānaṃ saṃvarāya samparāyikānaṃ akusalānaṃ dhammānaṃ Paṭighātāya . ime dve atthavase paṭicca tathāgatena sāvakānaṃ tiṇavatthārako paññatto . dve atthavase paṭicca tathāgatena sāvakānaṃ tiṇavatthārako paññatto gihīnaṃ anukampāya pāpicchānaṃ pakkhupacchedāya . ime dve atthavase paṭicca tathāgatena sāvakānaṃ tiṇavatthārako paññatto . dve atthavase paṭicca tathāgatena sāvakānaṃ tiṇavatthārako paññatto appasannānaṃ pasādāya pasannānaṃ bhiyyobhāvāya . ime dve atthavase paṭicca tathāgatena sāvakānaṃ tiṇavatthārako paññatto . dve atthavase paṭicca tathāgatena sāvakānaṃ tiṇavatthārako paññatto saddhammaṭṭhitiyā vinayānuggahāya . ime dve atthavase paṭicca tathāgatena sāvakānaṃ tiṇavatthārako paññattoti. Paññattavaggo ^1- niṭṭhito catuttho. [1362] Nava saṅgahā vatthusaṅgaho vipattisaṅgaho āpattisaṅgaho nidānasaṅgaho puggalasaṅgaho khandhasaṅgaho samuṭṭhānasaṅgaho adhikaraṇasaṅgaho samathasaṅgaho ^2-. [1363] Adhikaraṇe samuppanne sace ubho atthapaccatthikā ^3- āgacchanti ubhinnampi vatthuṃ ^4- ārocāpetabbaṃ ubhinnampi vatthuṃ ārocāpetvā ubhinnampi paṭiññā sotabbā ubhinnampi paṭiññaṃ sutvā ubhopi vattabbā amhākaṃ imasmiṃ adhikaraṇe vūpasamite ^5- @Footnote: ¹ Ma. apaññatte paññattavaggo. ² Ma. Yu. samathasaṅgahoti. ³ Yu. attapaccatthikā. @⁴ Ma. Yu. vatthu. ⁵ Ma. vūpasamepi. Ubhopi tuṭṭhā bhavissathāpi ^1- sace āhaṃsu ubhopi tuṭṭhā bhavissāmāti saṅghena taṃ adhikaraṇaṃ paṭicchitabbaṃ ^2- . Sace alajjussannā hoti parisā ubbāhikāya vūpasametabbaṃ . sace bālussannā hoti parisā vinayadharo pariyesitabbo . yena dhammena yena vinayena yena satthusāsanena taṃ adhikaraṇaṃ vūpasammati tathā taṃ adhikaraṇaṃ vūpasametabbaṃ. [1364] Vatthuṃ jānitabbaṃ gottaṃ jānitabbaṃ nāmaṃ jānitabbaṃ āpatti jānitabbā . methunadhammoti vatthuñceva gottañca . Pārājikanti nāmañceva āpatti ca . adinnādānanti vatthuñceva gottañca . pārājikanti nāmañceva āpatti ca . manussaviggahoti vatthuñceva gottañca . pārājikanti nāmañceva āpatti ca . Uttarimanussadhammoti vatthuñceva gottañca . pārājikanti nāmañceva āpatti ca . sukkavisaṭṭhīti vatthuñceva gottañca . Saṅghādisesoti nāmañceva āpatti ca . kāyasaṃsaggoti vatthuñceva gottañca . saṅghādisesoti nāmañceva āpatti ca . duṭṭhullavācāti vatthuñceva gottañca . saṅghādisesoti nāmañceva āpatti ca . attakāmanti vatthuñceva gottañca . saṅghādisesoti nāmañceva āpatti ca . sañcarittanti vatthuñceva gottañca . Saṅghādisesoti nāmañceva āpatti ca . saññācikāya kuṭiṃ kārāpananti vatthuñceva gottañca . saṅghādisesoti nāmañceva @Footnote: ¹ Po. Ma. Yu. bhavissathāti ayaṃ pāṭho yuttataro. ² Ma. sampaṭicchitabbaṃ. Āpatti ca . mahallakaṃ vihāraṃ kārāpananti vatthuñceva gottañca . Saṅghādisesoti nāmañceva āpatti ca . bhikkhuṃ amūlakena pārājikena dhammena anuddhaṃsananti vatthuñceva gottañca . saṅghādisesoti nāmañceva āpatti ca . bhikkhuṃ aññabhāgiyassa adhikaraṇassa kiñci desaṃ lesamattaṃ upādāya pārājikena dhammena anuddhaṃsananti vatthuñceva gottañca . saṅghādisesoti nāmañceva āpatti ca . Saṅghabhedakassa bhikkhuno yāvatatiyaṃ samanubhāsanāya nappaṭinissajjananti vatthuñceva gottañca. Saṅghādisesoti nāmañceva āpatti ca. {1364.1} Bhedakānuvattakānaṃ bhikkhūnaṃ yāvatatiyaṃ samanubhāsanāya nappaṭinissajjananti vatthuñceva gottañca . saṅghādisesoti nāmañceva āpatti ca . dubbacassa bhikkhuno yāvatatiyaṃ samanubhāsanāya nappaṭinissajjananti vatthuñceva gottañca . saṅghādisesoti nāmañceva āpatti ca . Kuladūsakassa bhikkhuno yāvatatiyaṃ samanubhāsanāya nappaṭinissajjananti vatthuñceva gottañca . saṅghādisesoti nāmañceva āpatti ca .pe. Anādariyaṃ paṭicca udake uccāraṃ vā passāvaṃ vā kheḷaṃ vā karaṇanti vatthuñceva gottañca. Dukkaṭanti nāmañceva āpatti cāti. Navasaṅgahavaggo niṭṭhito pañcamo. -------------- Tassuddānaṃ [1365] Apalokanaṃ ñatti ca ^1- dutiyaṃ catutthena ca vatthu ñatti anussāvanaṃ sīmāparisameva ca sammukhā paṭipucchā ca paṭiññā vinayāraho vatthusaṅghapuggalañca ñattiṃ pacchā ñattiṃ ṭhape ^2- vatthusaṅghapuggalañca sāvanaṃ ca akālikaṃ ^3- atikhuddā ^4- mahantā ca khaṇḍacchāyānimittakā bahinadīsamudde ca jātassare ca bhindati ajjhottharati sīmāya catupañcavaggikā dasavīsativaggā ca anāhaṭā ca āhaṭā kammappattā chandārahā kammārahā ca puggalā apalokanaṃ pañcaṭṭhānaṃ ñatti ca navaṭhānikā ñattidutiyaṃ sattaṭṭhānaṃ catutthā sattaṭhānikā suṭṭhu phāsu dummaṅkūnaṃ ^5- pesalā cāpi āsavā veravajjabhayañceva akusalañca gīhinaṃ ^6- pāpicchā appasannānaṃ pasannādhammaṭhapanā vinayānuggahā ceva pātimokkhuddesena ca @Footnote: ¹ Yu. apalokanañatti ca. ² Ma. ñattiṃ na pacchā ñatti ca. Yu. ñattīnaṃ pacchā @ñatti ca. ³ Ma. Yu. sāvanaṃ akālena ca. ⁴ Ma. Yu. atikhuddakā. @⁵ Ma. suṭṭhu phāsu ca dummaṅku. Yu. suṭṭhu phāsu ca dummaṅkūnaṃ. @⁶ Ma. Yu. akusalaṃ gihīnañca. Pātimokkhañca ṭhapanā pavāraṇañca ṭhapanaṃ tajjanīyāniyassañca pabbājapaṭisāraṇī ^1- ukkhepanaparivāsaṃ mūlaṃ mānattabbhānakaṃ ^2- osāraṇaṃ nissāraṇaṃ tatheva upasampadā apalokanaṃ ñatti ca ^3- dutiyañca catutthakaṃ appaññattenupaññattaṃ sammukhāvinayo sati amūḷhapaṭiyebhuyya pāpiyatiṇavatthārakaṃ vatthuṃ ^4- vipatti āpatti nidānaṃ puggalena ca khandhā ceva samuṭṭhānā adhikaraṇameva ca samathā saṅgahā ceva nāmā āpattikā ^5- tathāti. Parivāro niṭṭhito. -------- [1366] Pubbācariyamaggañca pucchitvā va tahiṃ tahiṃ dīpanāmo mahāpañño sutadharo vicakkhaṇo imaṃ vitthārasaṅkhepaṃ sajjhāmaggena majjhime cintayitvā likhāpesi sissakānaṃ sukhāvahaṃ. Parivāranti yaṃ vuttaṃ sabbaṃ vatthuṃ salakkhaṇaṃ atthaṃ atthena saddhamme dhammaṃ dhammena paññatte @Footnote: ¹ Ma. Yu. pabbājanīyapaṭisāraṇī. ² Ma. Yu. mūlamānattaabbhānaṃ. ³ apalokanañatti ca. @⁴ vatthu. 5 nāmaāpattikā. Sāsanaṃ parivāresi jambūdīpaṃva sāgaro. Parivāraṃ ajānanto kuto dhammavinicchayaṃ. Vipatti vatthu paññatti anuppaññatti puggalo ekato ubhato ceva lokapaṇṇattivajjato yassa jāyati vimati parivārena chijjati cakkavatti mahāsene migamajjheva kesarī ravi raṃsiparikiṇṇo cando tāragaṇe yathā brahmā brahmaparisāya gaṇamajjheva nāyako. Evaṃ saddhammavinayo parivārena sobhatīti.

The Pali Tipitaka in Roman Character Volume 8 page 545-554. https://84000.org/tipitaka/read/roman_item.php?book=8&item=1359&items=8 Classified by [Item Number] :- http://84000.org/tipitaka/read/roman_item.php?book=8&item=1359&items=8&mode=bracket Compare with The Pali Tipitaka in Thai Character :- https://84000.org/tipitaka/read/pali_item.php?book=8&item=1359&items=8 Compare with The Royal Version of Thai Tipitaka :- https://84000.org/tipitaka/read/byitem.php?book=8&item=1359&items=8 Study Atthakatha :- https://84000.org/tipitaka/attha/attha.php?b=8&i=1359 Contents of The Tipitaka Volume 8 https://84000.org/tipitaka/read/?index_8 https://84000.org/tipitaka/english/?index_8