Atthakatha Book 10 : PALI ROMAN
Ma.A. (papa–ca.4)

Antarasobbhe, muttaṅgaṇe, 1- pātakapabbate, 2- pācinagharake, dīghavāpiyaṃ, lokandare,
nomaṇḍalatale 3- kathesi. Tesupi ṭhānesu saṭṭhi saṭṭhi bhikkhū arahattaṃ pattā.
Tato  nikkhamitvā pana thero cittalapabbataṃ gato. Tadā ca cittalapabbatavihāre
atirekasaṭṭhivasso mahāthero, pokkharaṇiyaṃ kuruvakatitthaṃ nāma paṭicchannaṭṭhānaṃ
atthi, tattha thero nhāyissāmīti otiṇṇo. Devatthero tassa santikaṃ gantvā
nhāpemi bhanteti āha. Thero paṭisanthāreneva "māleyyadevo nāma atthīti vadanti,
so ayaṃ bhavissatī"ti ñatvā tvaṃ devoti āha. Āma bhanteti. Saṭṭhivassasaddhānaṃ me
āvuso koci sarīraṃ hatthena phusituṃ nāma na labhati, tvaṃ pana nhāpehīti
uttaritvā tīre nisīdi.
     Thero sabbampi hatthapādādiparikammaṃ katvā mahātheraṃ  nhāpesi.
Taṃdivasañca dhammassavanadivaso hoti. Atha mahāthero "deva amhākaṃ dhammadānaṃ
dātuṃ vaṭṭatī"ti āha. Thero sādhu bhanteti sampaṭicchi. Atthaṅgate sūriye
dhammassavanaṃ ghosesuṃ. Atikkantasaṭṭhivassāva saṭṭhi mahātherā dhammassavanatthaṃ
āgamiṃsu. Devatthero sarabhāṇāvasāne imaṃ suttaṃ ārabhi, suttantapariyosāne
saṭṭhi mahātherā arahattaṃ pāpuṇiṃsu. Tato tissamahāvihāraṃ gantvā kathesi,
tasmimpi saṭṭhi theRā. Tato nāgamahāvihāre kāḷakacchagāme kathesi, tasmimpi
saṭṭhi theRā. Tato kalyāṇiṃ gantvā tattha cātuddase heṭṭhāpāsāde kathesi,
tasmimpi saṭṭhi theRā. Uposathadivase uparipāsāde kathesi, tasmimpi saṭṭhi therāti
evaṃ devatthereyeva idaṃ suttaṃ kathente saṭṭhiṭṭhānesu saṭṭhi  saṭṭhi janā
arahattaṃ pattā.
     Ambilakāḷakavihāre pana tipiṭakacūḷanāgatthere imaṃ suttaṃ kathente
manussaparisā gāvutaṃ ahosi, devaparisā yojanikā. Suttapariyosāne sahassabhikkhū
arahattaṃ pattā, devesu pana gato tato ekekova 4- puthujjano ahosīti.
                    Papañcasūdaniyā majjhimanikāyaṭṭhakathāya
                       chachakkasuttavaṇṇanā niṭṭhitā.
                         ---------------
@Footnote: 1 Sī. mutiṅgaṇe   2 Ma. hitaṅkapabbate   3 Sī. gameṇḍavāle    4 ṭīkā. ekova


             The Pali Atthakatha in Roman Book 10 page 252.
http://84000.org/tipitaka/atthapali/read_rm.php?B=10&A=6411
             อรรถกถาบาลีอักษรไทย :-
http://84000.org/tipitaka/atthapali/read_th.php?B=10&A=6411
             อ่านอรรถกถาแปลไทย :-
http://84000.org/tipitaka/attha/attha.php?b=14&i=810
             เนื้อความพระไตรปิฎกฉบับหลวง :-
http://84000.org/tipitaka/read/r.php?B=14&A=10324
             พระไตรปิฎกฉบับบาลีอักษรไทย :-
http://84000.org/tipitaka/read/pali_read.php?B=14&A=10161
             The Pali Tipitaka in Roman Character :-
http://84000.org/tipitaka/read/roman_read.php?B=14&A=10161
             Contents of The Tipitaka Volume 14
http://84000.org/tipitaka/read/?index_14