[๕๑๒] อุโปสเถ ยาวติกํ ปาปภิกฺขุ น นิกฺขมิ ๑-
โมคฺคลฺลาเนน นิวุตฺโถ ๒- อจฺฉรํ ๓- ชินสาสเน
นินฺโนนุปุพฺพสิกฺขา จ ฐิตธมฺโม นติกฺกม ๔-
กุณปุกฺขิปติ สงฺโฆ สวนฺติโย ชหนฺติ จ ๕-
สวนฺติ ปรินิพฺพนฺติ เอกรส วิมุตฺติ จ
พหุ ธมฺมวินโยปิ ภูตฏฺฐาริยปุคฺคลา
สมุทฺทํ อุปมํ กตฺวา ฐาเปสิ ๖- สาสเน คุณํ ฯ
อุโปสเถ ปาติโมกฺขํ น อเมฺห โกจิ ชานาติ
ปฏิกจฺเจว อุชฺฌนฺติ เอโก เทฺว ตีณิ จาตุโร ๗-
ปญฺจ ฉ สตฺต อฏฺฐานิ นวา ๘- จ ทสมานิ จ ฯ
สีล อาจาร ทิฏฺฐิ จ อาชีวญฺจตุภาคิเก ๙- ฯ
ปาราชิกญฺจ สงฺฆาทิ ปาจิตฺติ ปาฏิเทสนิ
ทุกฺกฏํ ปญฺจภาเคสุ สีลาจารวิปตฺติ จ
อกตาย กตาย จ ฉพฺภาเคสุ ยถาวิธิ ๑๐- ฯ
ปาราชิกํ จ สงฺฆาทิ ถุลฺลปาจิตฺติเยน จ
@เชิงอรรถ: ๑ ยุ. นิกฺขมติ ฯ ๒ ม. นิจฺฉุทฺโธ ฯ ยุ. นิจฺฉุทฺโท ฯ ๓ ม. อจฺเฉรา ฯ
@๔ ม. ยุ. นาติกฺกม ฯ ๕ ยุ. จสทฺโท นตฺถิ ฯ ๖ ม. ยุ. วาเจสิ ฯ
@๗ ม. ยุ. รา. จตฺตาริ ฯ ๘ ยุ. นว ฯ ๙ ยุ อาชีวํ จตุสาวเก ฯ
@๑๐ ม. ยุ. ยถา ฐิติ ฯ
ปาฏิเทสนียญฺเจว ทุกฺกฏญฺจ ทุพฺภาสิตํ
สีลาจารวิปตฺติ จ อาชีวญฺจ วิปตฺติยา
อฏฺฐากตาย กเตน สีลาจารา จ ทิฏฺฐิยา ๑-
อกตาย กตายาปิ กตากตายเมว จ
เอวํ นววิธา วุตฺตา ยถาภูเตน ญายโต ฯ
ปาราชิโก วิปฺปกตา ๒- ปจฺจกฺขาโต ตเถว จ
อุเปติ ปจฺจาทิยติ ปจฺจาทานกถาย จ ๓-
สีลาจารวิปตฺติ จ ตถา ๔- ทิฏฺฐิวิปตฺติยา
ทิฏฺฐสุตปริสงฺกิตํ ๕- ทสธา ตํ วิชานถ ฯ
ภิกฺขุ วิปสฺสติ ภิกฺขุํ อญฺโญ จาโรจยาติ ตํ
สุทฺเธ ว ตสฺส อกฺขาติ ปาติโมกฺขํ ฐเปสิ โส ฯ
วุฏฺฐาติ อนฺตราเยน ราชา โจรอคฺคูทกํ
มนุสฺสามนุสฺสา วาฬ สิรึสปา จ ชีวิตํ
พฺรหฺมจารี จ ทสนฺนํ ตสฺมึ อญฺญตเรสุ วา ๖-
@เชิงอรรถ: ๑ ม. ยุ. สีลาจารวิปตฺติ จ ทิฏฺฐิอาชีววิปตฺติ ยา จ อฏฺฐา กตากเต เตเนกา
@สีลาจารทิฏฺฐิยา ฯ ๒ ยุ. วิปฺปกโต ฯ ๓ ม. ปจฺจาทานกถา จ ยา ฯ ยุ. ปจฺจาทานกถา จ
@โย ฯ ๔ ยุ. ยถา ฯ ๕ ยุ. ทิฏฺฐสุตปริสงฺกิ ฯ ๖ ยุ. ภิกฺขุ วิปสฺสติ ภิกฺขุํ
@วิปสฺสญฺโญ จาโรจติ ตํ สุทฺเธ ว ตสฺส อกฺขาติ ปาติโมกฺขํ ฐเปติ โส ฯ
@วุฏฺฐาติ อนตราเยน ราชโจรคฺคุทกา จ มนุสฺส อมนุสฺสา จ วาฬสิริสปาชีวิ
@พฺรหฺมํ ทสนฺนญฺญตเรเกน ตสฺมึ อญฺญตเรสุ วา ฯ ม. โสเยว ตสฺส อกฺขาติ ... ฯ
ธมฺมิกาธมฺมิกา เจว ยถามคฺเคน ชานถ ๑- ฯ
กาลภูตตฺถสญฺหิตํ ลภิสฺสามิ ภวิสฺสติ
กายวาจสิกา เมตฺตา พาหุสจฺจูภยานิ ตุ ๒- ฯ
กาลภูเตน สเณฺหน อตฺถเมตฺเตน โจทเย
วิปฺปฏิสารี อธมฺเมน ตเถวาปิ วิโนทเย ๓- ฯ
ธมฺมโจทจุทิตสฺส วิโนเท วิปฺปฏิสฺสเร ฯ
กรุณา หิตานุกมฺปา วุฏฺฐานมฺปิ ปุรกฺขิตา ๔-
โจทกสฺส ปฏิปตฺติ สมฺพุทฺเธน ปกาสิตา ๕-
สจฺเจ เจว อกุปฺเป จ จุทิตสฺเสส ๖- ธมฺมตาติ ฯ
----------
@เชิงอรรถ: ๑ ม. ยุ. ชานาถ ฯ ๒ ม. ยุ. พาหุสจฺจํ อุภยานิ ฯ ๓ ม. ยุ. วิปฺปฏิสาราธมฺเมน
@ตถา วาจา วิโนทเย ฯ ๔ ม. ยุ. ธมฺมโจทจุทิตสฺส วิโนเทติ วิปฺปฏิสาโร
@กรุณา หิตานุกมฺปิ วุฏฺฐาน ปุเรกฺขารตา ฯ ๕ ยุ. รา. ปกาสิตํ ฯ ๖ ม. ยุ.
@จุทิตสฺเสว ฯ รา. จุทิตสฺเสสา ฯ
ภิกฺขุนีขนฺธกํ
[๕๑๓] เตน สมเยน พุทฺโธ ภควา สกฺเกสุ วิหรติ กปิลวตฺถุสฺมึ
นิโคฺรธาราเม ฯ อถโข มหาปชาปตี โคตมี เยน ภควา
เตนุปสงฺกมิ อุปสงฺกมิตฺวา ภควนฺตํ อภิวาเทตฺวา เอกมนฺตํ
อฏฺฐาสิ ฯ เอกมนฺตํ ฐิตา โข มหาปชาปตี โคตมี ภควนฺตํ
เอตทโวจ สาธุ ภนฺเต ลเภยฺย มาตุคาโม ตถาคตปฺปเวทิเต
ธมฺมวินเย อคารสฺมา อนคาริยํ ปพฺพชฺชนฺติ ฯ อลํ โคตมิ มา
เต รุจฺจิ มาตุคามสฺส ตถาคตปฺปเวทิเต ธมฺมวินเย อคารสฺมา
อนคาริยํ ปพฺพชฺชาติ ฯ ทุติยมฺปิ โข ฯเปฯ ตติยมฺปิ โข มหาปชาปตี
โคตมี ภควนฺตํ เอตทโวจ สาธุ ภนฺเต ลเภยฺย มาตุคาโม
ตถาคตปฺปเวทิเต ธมฺมวินเย อคารสฺมา อนคาริยํ ปพฺพชฺชนฺติ ฯ
อลํ โคตมิ มา เต รุจฺจิ มาตุคามสฺส ตถาคตปฺปเวทิเต
ธมฺมวินเย อคารสฺมา อนคาริยํ ปพฺพชฺชาติ ฯ อถโข มหาปชาปตี
โคตมี น ภควา อนุชานาติ มาตุคามสฺส ตถาคตปฺปเวทิเต
ธมฺมวินเย อคารสฺมา อนคาริยํ ปพฺพชฺชนฺติ ทุกฺขี ทุมฺมนา อสฺสุมุขี
รุทมานา ภควนฺตํ อภิวาเทตฺวา ปทกฺขิณํ กตฺวา ปกฺกามิ ฯ
[๕๑๔] อถโข ภควา กปิลวตฺถุสฺมึ ยถาภิรนฺตํ วิหริตฺวา
เยน เวสาลี เตน จาริกํ ปกฺกามิ อนุปุพฺเพน จาริกญฺจรมาโน
เยน เวสาลี ตทวสริ ฯ ตตฺร สุทํ ภควา เวสาลิยํ วิหรติ
มหาวเน กูฏาคารสาลายํ ฯ อถโข มหาปชาปตี โคตมี เกเส
เฉทาเปตฺวา กาสายานิ วตฺถานิ อจฺฉาเทตฺวา สมฺพหุลาหิ สากิยานีหิ
สทฺธึ เยน เวสาลี เตน ปกฺกามิ อนุปุพฺเพน เยน เวสาลี
มหาวนํ กูฏาคารสาลา เตนุปสงฺกมิ ฯ อถโข มหาปชาปตี
โคตมี สุเนหิ ปาเทหิ รโชกิณฺเณน คตฺเตน ทุกฺขี ทุมฺมนา
อสฺสุมุขี รุทมานา พหิทฺวารโกฏฺฐเก อฏฺฐาสิ ฯ อทฺทสา โข
อายสฺมา อานนฺโท มหาปชาปตึ โคตมึ สุเนหิ ปาเทหิ รโชกิณฺเณน
คตฺเตน ทุกฺขึ ทุมฺมนํ อสฺสุมุขึ รุทมานํ พหิทฺวารโกฏฺฐเก
ฐิตํ ทิสฺวาน มหาปชาปตึ โคตมึ เอตทโวจ กิสฺส ตฺวํ โคตมิ
สุเนหิ ปาเทหิ รโชกิณฺเณน คตฺเตน ทุกฺขี ทุมฺมนา อสฺสุมุขี
รุทมานา พหิทฺวารโกฏฺฐเก ฐิตาติ ฯ ตถา หิ ปน ภนฺเต อานนฺท
น ภควา อนุชานาติ มาตุคามสฺส ตถาคตปฺปเวทิเต ธมฺมวินเย
อคารสฺมา อนคาริยํ ปพฺพชฺชนฺติ ฯ เตนหิ ๑- โคตมิ มุหุตฺตํ ตฺวํ ๒-
อิเธว ตาว โหหิ ยาวาหํ ภควนฺตํ ยาจามิ มาตุคามสฺส
ตถาคตปฺปเวทิเต ธมฺมวินเย อคารสฺมา อนคาริยํ ปพฺพชฺชนฺติ ฯ
[๕๑๕] อถโข อายสฺมา อานนฺโท เยน ภควา เตนุปสงฺกมิ
อุปสงฺกมิตฺวา ภควนฺตํ อภิวาเทตฺวา เอกมนฺตํ นิสีทิ ฯ เอกมนฺตํ
นิสินฺโน โข อายสฺมา อานนฺโท ภควนฺตํ เอตทโวจ เอสา
ภนฺเต มหาปชาปตี โคตมี สุเนหิ ปาเทหิ รโชกิณฺเณน คตฺเตน
ทุกฺขี ทุมฺมนา อสฺสุมุขี รุทมานา พหิทฺวารโกฏฺฐเก ฐิตา น
@เชิงอรรถ: ๑ ม. เตนหิ ตฺวํ ฯ ๒ ยุ. ตฺวํสทฺโท นตฺถิ ฯ
ภควา อนุชานาติ มาตุคามสฺส ตถาคตปฺปเวทิเต ธมฺมวินเย
อคารสฺมา อนคาริยํ ปพฺพชฺชนฺติ สาธุ ภนฺเต ลเภยฺย มาตุคาโม
ตถาคตปฺปเวทิเต ธมฺมวินเย อคารสฺมา อนคาริยํ ปพฺพชฺชนฺติ ฯ
อลํ อานนฺท มา เต รุจฺจิ มาตุคามสฺส ตถาคตปฺปเวทิเต
ธมฺมวินเย อคารสฺมา อนคาริยํ ปพฺพชฺชาติ ฯ ทุติยมฺปิ โข
อายสฺมา อานนฺโท ภควนฺตํ เอตทโวจ สาธุ ภนฺเต ลเภยฺย
มาตุคาโม ตถาคตปฺปเวทิเต ธมฺมวินเย อคารสฺมา อนคาริยํ
ปพฺพชฺชนฺติ ฯ อลํ อานนฺท มา เต รุจฺจิ มาตุคามสฺส
ตถาคตปฺปเวทิเต ธมฺมวินเย อคารสฺมา อนคาริยํ ปพฺพชฺชาติ ฯ
{๕๑๕.๑} ตติยมฺปิ โข อายสฺมา อานนฺโท ภควนฺตํ เอตทโวจ
สาธุ ภนฺเต ลเภยฺย มาตุคาโม ตถาคตปฺปเวทิเต ธมฺมวินเย อคารสฺมา
อนคาริยํ ปพฺพชฺชนฺติ ฯ อลํ อานนฺท มา เต รุจฺจิ มาตุคามสฺส
ตถาคตปฺปเวทิเต ธมฺมวินเย อคารสฺมา อนคาริยํ ปพฺพชฺชาติ ฯ
{๕๑๕.๒} อถโข อายสฺมา อานนฺโท น ภควา อนุชานาติ
มาตุคามสฺส ตถาคตปฺปเวทิเต ธมฺมวินเย อคารสฺมา อนคาริยํ
ปพฺพชฺชํ ๑- ยนฺนูนาหํ อญฺเญนปิ ปริยาเยน ภควนฺตํ ยาเจยฺยํ
มาตุคามสฺส ตถาคตปฺปเวทิเต ธมฺมวินเย อคารสฺมา อนคาริยํ
ปพฺพชฺชนฺติ ฯ อถโข อายสฺมา อานนฺโท ภควนฺตํ เอตทโวจ ภพฺโพ
นุ โข ภนฺเต มาตุคาโม ตถาคตปฺปเวทิเต ธมฺมวินเย อคารสฺมา อนคาริยํ
ปพฺพชิตฺวา โสตาปตฺติผลํ วา สกิทาคามิผลํ ๒- วา อนาคามิผลํ วา
@เชิงอรรถ: ๑ ม. ปพฺพชฺชนฺติ ฯ ๒ ม. ยุ. สพฺพตฺถ วาเรสุ สกทาคามิผลํ ฯ
อรหตฺตผลํ วา สจฺฉิกาตุนฺติ ฯ ภพฺโพ อานนฺท มาตุคาโม
ตถาคตปฺปเวทิเต ธมฺมวินเย อคารสฺมา อนคาริยํ ปพฺพชิตฺวา
โสตาปตฺติผลํปิ สกิทาคามิผลํปิ อนาคามิผลํปิ อรหตฺตผลํปิ
สจฺฉิกาตุนฺติ ฯ สเจ ภนฺเต ภพฺโพ มาตุคาโม ตถาคตปฺปเวทิเต
ธมฺมวินเย อคารสฺมา อนคาริยํ ปพฺพชิตฺวา โสตาปตฺติผลํปิ
สกิทาคามิผลํปิ อนาคามิผลํปิ อรหตฺตผลํปิ สจฺฉิกาตุํ พหูปการา
ภนฺเต มหาปชาปตี โคตมี ภควโต มาตุจฺฉา อาปาทิกา โปสิกา
ขีรสฺส ทายิกา ภควนฺตํ ชเนตฺติยา กาลกตาย ถญฺญํ ปาเยสิ
สาธุ ภนฺเต ลเภยฺย มาตุคาโม ตถาคตปฺปเวทิเต ธมฺมวินเย
อคารสฺมา อนคาริยํ ปพฺพชฺชนฺติ ฯ
[๕๑๖] สเจ อานนฺท มหาปชาปตี โคตมี อฏฺฐ ครุธมฺเม
ปฏิคฺคณฺหาติ สา วสฺสา โหตุ อุปสมฺปทา วสฺสสตุปสมฺปนฺนาย
ภิกฺขุนิยา ตทหุปสมฺปนฺนสฺส ภิกฺขุโน อภิวาทนํ ปจฺจุฏฺฐานํ
อญฺชลิกมฺมํ สามีจิกมฺมํ กาตพฺพํ อยมฺปิ ธมฺโม สกฺกตฺวา
ครุกตฺวา มาเนตฺวา ปูเชตฺวา ยาวชีวํ อนติกฺกมนีโย น ภิกฺขุนิยา
อภิกฺขุเก อาวาเส วสฺสํ วสิตพฺพํ อยมฺปิ ธมฺโม สกฺกตฺวา ครุกตฺวา
มาเนตฺวา ปูเชตฺวา ยาวชีวํ อนติกฺกมนีโย อนฺวฑฺฒมาสํ ภิกฺขุนิยา
ภิกฺขุสงฺฆโต เทฺว ธมฺมา ปจฺจาสึสิตพฺพา อุโปสถปุจฺฉกญฺจ
โอวาทุปสงฺกมนญฺจ อยมฺปิ ธมฺโม สกฺกตฺวา ครุกตฺวา มาเนตฺวา
ปูเชตฺวา ยาวชีวํ อนติกฺกมนีโย วสฺสํ วุฏฺฐาย ภิกฺขุนิยา อุภโตสงฺเฆ
ตีหิ ฐาเนหิ ปวาเรตพฺพํ ทิฏฺเฐน วา สุเตน วา ปริสงฺกาย วา
อยมฺปิ ธมฺโม สกฺกตฺวา ครุกตฺวา มาเนตฺวา ปูเชตฺวา ยาวชีวํ
อนติกฺกมนีโย ครุธมฺมํ อชฺฌาปนฺนาย ภิกฺขุนิยา อุภโตสงฺเฆ
ปกฺขมานตฺตํ จริตพฺพํ อยมฺปิ ธมฺโม สกฺกตฺวา ครุกตฺวา
มาเนตฺวา ปูเชตฺวา ยาวชีวํ อนติกฺกมนีโย เทฺว วสฺสานิ ฉสุ
ธมฺเมสุ สิกฺขิตสิกฺขาย สิกฺขมานาย อุภโตสงฺเฆ อุปสมฺปทา
ปริเยสิตพฺพา อยมฺปิ ธมฺโม สกฺกตฺวา ครุกตฺวา มาเนตฺวา ปูเชตฺวา
ยาวชีวํ อนติกฺกมนีโย น ภิกฺขุนิยา เกนจิ ปริยาเยน ภิกฺขุ
อกฺโกสิตพฺโพ ปริภาสิตพฺโพ อยมฺปิ ธมฺโม สกฺกตฺวา ครุกตฺวา
มาเนตฺวา ปูเชตฺวา ยาวชีวํ อนติกฺกมนีโย อชฺชตคฺเค โอวโฏ
ภิกฺขุนีนํ ภิกฺขูสุ วจนปโถ อโนวโฏ ภิกฺขูนํ ภิกฺขุนีสุ วจนปโถ
อยมฺปิ ธมฺโม สกฺกตฺวา ครุกตฺวา มาเนตฺวา ปูเชตฺวา ยาวชีวํ
อนติกฺกมนีโย สเจ ปนานนฺท ๑- มหาปชาปตี โคตมี อิเม
อฏฺฐ ครุธมฺเม ปฏิคฺคณฺหาติ สา วสฺสา โหตุ อุปสมฺปทาติ ฯ
[๕๑๗] อถโข อายสฺมา อานนฺโท ภควโต สนฺติเก อฏฺฐ
ครุธมฺเม อุคฺคเหตฺวา เยน มหาปชาปตี โคตมี เตนุปสงฺกมิ
อุปสงฺกมิตฺวา มหาปชาปตึ โคตมึ เอตทโวจ สเจ โข ตฺวํ
โคตมิ อฏฺฐ ครุธมฺเม ปฏิคฺคเณฺหยฺยาสิ สา ว เต ภวิสฺสติ
อุปสมฺปทา
{๕๑๗.๑} วสฺสสตุปสมฺปนฺนาย ภิกฺขุนิยา ตทหุปสมฺปนฺนสฺส
ภิกฺขุโน อภิวาทนํ ปจฺจุฏฺฐานํ อญฺชลิกมฺมํ สามีจิกมฺมํ กาตพฺพํ
@เชิงอรรถ: ๑ ม. ยุ. สเจ อานนฺท ฯ
อยมฺปิ ธมฺโม สกฺกตฺวา ครุกตฺวา มาเนตฺวา ปูเชตฺวา ยาวชีวํ
อนติกฺกมนีโย น ภิกฺขุนิยา อภิกฺขุเก อาวาเส วสฺสํ วสิตพฺพํ
อยมฺปิ ธมฺโม สกฺกตฺวา ครุกตฺวา มาเนตฺวา ปูเชตฺวา ยาวชีวํ
อนติกฺกมนีโย อนฺวฑฺฒมาสํ ภิกฺขุนิยา ภิกฺขุสงฺฆโต เทฺว ธมฺมา
ปจฺจาสึสิตพฺพา อุโปสถปุจฺฉกญฺจ โอวาทุปสงฺกมนญฺจ อยมฺปิ
ธมฺโม สกฺกตฺวา ครุกตฺวา มาเนตฺวา ปูเชตฺวา ยาวชีวํ อนติกฺกมนีโย
วสฺสํ วุฏฺฐาย ภิกฺขุนิยา อุภโตสงฺเฆ ตีหิ ฐาเนหิ ปวาเรตพฺพํ
ทิฏฺเฐน วา สุเตน วา ปริสงฺกาย วา อยมฺปิ ธมฺโม สกฺกตฺวา
ครุกตฺวา มาเนตฺวา ปูเชตฺวา ยาวชีวํ อนติกฺกมนีโย ครุธมฺมํ
อชฺฌาปนฺนาย ภิกฺขุนิยา อุภโตสงฺเฆ ปกฺขมานตฺตํ จริตพฺพํ
อยมฺปิ ธมฺโม สกฺกตฺวา ครุกตฺวา มาเนตฺวา ปูเชตฺวา ยาวชีวํ
อนติกฺกมนีโย เทฺว วสฺสานิ ฉสุ ธมฺเมสุ สิกฺขิตสิกฺขาย
สิกฺขมานาย อุภโตสงฺเฆ อุปสมฺปทา ปริเยสิตพฺพา อยมฺปิ ธมฺโม
สกฺกตฺวา ครุกตฺวา มาเนตฺวา ปูเชตฺวา ยาวชีวํ อนติกฺกมนีโย
น ภิกฺขุนิยา เกนจิ ปริยาเยน ภิกฺขุ อกฺโกสิตพฺโพ ปริภาสิตพฺโพ
อยมฺปิ ธมฺโม สกฺกตฺวา ครุกตฺวา มาเนตฺวา ปูเชตฺวา ยาวชีวํ
อนติกฺกมนีโย อชฺชตคฺเค โอวโฏ ภิกฺขุนีนํ ภิกฺขูสุ วจนปโถ
อโนวโฏ ภิกฺขูนํ ภิกฺขุนีสุ วจนปโถ อยมฺปิ ธมฺโม สกฺกตฺวา
ครุกตฺวา มาเนตฺวา ปูเชตฺวา ยาวชีวํ อนติกฺกมนีโย
{๕๑๗.๒} สเจ โข ตฺวํ โคตมิ อิเม อฏฺฐ ครุธมฺเม ปฏิคฺคเณฺหยฺยาสิ สา ว เต
ภวิสฺสติ อุปสมฺปทาติ ฯ เสยฺยถาปิ ภนฺเต อานนฺท อิตฺถี วา ปริโส
วา ทหโร ยุวา มณฺฑนชาติโก สีสํนหาโต อุปฺปลมาลํ วา วสฺสิกมาลํ
วา อธิมตฺตกมาลํ วา ๑- ลภิตฺวา อุโภหิ หตฺเถหิ ปฏิคฺคเหตฺวา
อุตฺตมงฺเค สิรสิ ปติฏฺฐาเปยฺย เอวเมว โข อหํ ภนฺเต อานนฺท อิเม
อฏฺฐ ครุธมฺเม ปฏิคฺคณฺหามิ ยาวชีวํ อนติกฺกมนีเยติ ฯ
เนื้อความพระไตรปิฎกฉบับภาษาบาลีอักษรไทย เล่มที่ ๗ หน้าที่ ๓๑๗-๓๒๖.
https://84000.org/tipitaka/read/pali_item.php?book=7&item=512&items=6&mode=bracket
อ่านโดยใช้เนื้อความเป็นเกณฑ์แบ่งข้อ :-
https://84000.org/tipitaka/read/pali_item.php?book=7&item=512&items=6
อ่านเทียบพระไตรปิฎกฉบับภาษาบาลีอักษรโรมัน :-
https://84000.org/tipitaka/read/roman_item.php?book=7&item=512&items=6&mode=bracket
อ่านเทียบพระไตรปิฎกภาษาไทยฉบับหลวง :-
https://84000.org/tipitaka/read/byitem.php?book=7&item=512&items=6&mode=bracket
ศึกษาอรรถกถานี้ได้ที่ :-
https://84000.org/tipitaka/attha/attha.php?b=7&i=512
สารบัญพระไตรปิฎกเล่มที่ ๗
https://84000.org/tipitaka/read/?index_7
https://84000.org/tipitaka/english/?index_7
บันทึก ๒ ธันวาคม พ.ศ. ๒๕๕๙.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย.
หากพบข้อผิดพลาด กรุณาแจ้งได้ที่ [email protected]
