พระไตรปิฎกเล่มที่ ๖ ภาษาบาลี อักษรไทย
พระวินัยปิฎกเล่มที่ ๖ วินย. จุลฺลวคฺโค (๑)

     [๑๒๙]   เตน  โข  ปน  สมเยน  อายสฺมา  สุธมฺโม มจฺฉิกาสณฺเฑ
จิตฺตสฺส    คหปติโน   อาวาสิโก   โหติ   นวกมฺมิโก   ธุวภตฺติโก   ฯ
ยทา   จิตฺโต  คหปติ  สงฺฆํ  วา  คณํ  วา  ปุคฺคลํ  วา  นิมนฺเตตุกาโม
โหติ   [๑]-   น   อายสฺมนฺตํ  สุธมฺมํ  อนปโลเกตฺวา  สงฺฆํ  วา  คณํ
วา   ปุคฺคลํ   วา   นิมนฺเตติ   ฯ  เตน  โข  ปน  สมเยน  สมฺพหุลา
เถรา   ภิกฺขู  อายสฺมา  จ  สารีปุตฺโต  อายสฺมา  จ  มหาโมคฺคลฺลาโน
อายสฺมา   จ   มหากจฺจาโน   อายสฺมา   จ   มหาโกฏฺฐิโก  อายสฺมา
จ   มหากปฺปิโน   อายสฺมา   จ   มหาจุนฺโท   อายสฺมา  จ  อนุรุทฺโธ
อายสฺมา   จ   เรวโต   อายสฺมา  จ  อุปาลิ  อายสฺมา  จ  อานนฺโท
อายสฺมา   จ   ราหุโล   กาสีสุ   จาริกญฺจรมานา  เยน  มจฺฉิกาสณฺโฑ
ตทวสรุํ ฯ
     [๑๓๐]   อสฺโสสิ  โข  จิตฺโต  คหปติ  เถรา กิร ภิกฺขู มจฺฉิกาสณฺฑํ
อนุปฺปตฺตาติ    ฯ    อถโข    จิตฺโต   คหปติ   เยน   เถรา   ภิกฺขู
เตนุปสงฺกมิ    อุปสงฺกมิตฺวา   เถเร   ภิกฺขู   อภิวาเทตฺวา   เอกมนฺตํ
นิสีทิ   ฯ   เอกมนฺตํ   นิสินฺนํ  โข  จิตฺตํ  คหปตึ  อายสฺมา  สารีปุตฺโต
ธมฺมิยา   กถาย   สนฺทสฺเสสิ   สมาทเปสิ   สมุตฺเตเชสิ  สมฺปหํเสสิ  ฯ
อถโข    จิตฺโต   คหปติ   อายสฺมตา   สารีปุตฺเตน   ธมฺมิยา   กถาย
สนฺทสฺสิโต    สมาทปิโต    สมุตฺเตชิโต    สมฺปหํสิโต    เถเร   ภิกฺขู
@เชิงอรรถ: ๑ ม. ตทา ฯ
เอตทโวจ  อธิวาเสนฺตุ  เม  ภนฺเต  เถรา สฺวาตนาย อาคนฺตุกภตฺตนฺติ ฯ
อธิวาเสสุํ โข เต ๑- เถรา ภิกฺขู ตุณฺหีภาเวน ฯ
     [๑๓๑]   อถโข  จิตฺโต  คหปติ  เถรานํ  ภิกฺขูนํ  อธิวาสนํ วิทิตฺวา
อุฏฺฐายาสนา   เถเร  ภิกฺขู  อภิวาเทตฺวา  ปทกฺขิณํ  กตฺวา  เยนายสฺมา
สุธมฺโม      เตนุปสงฺกมิ      อุปสงฺกมิตฺวา     อายสฺมนฺตํ     สุธมฺมํ
อภิวาเทตฺวา  เอกมนฺตํ  อฏฺฐาสิ  ฯ  เอกมนฺตํ  ฐิโต  โข  จิตฺโต คหปติ
อายสฺมนฺตํ    สุธมฺมํ    เอตทโวจ   อธิวาเสตุ   เม   ภนฺเต   อยฺโย
สุธมฺโม   สฺวาตนาย   ภตฺตํ   สทฺธึ   เถเรหีติ   ฯ   อถโข  อายสฺมา
สุธมฺโม   ปุพฺเพ   ขฺวายํ   จิตฺโต   คหปติ   ยทา   สงฺฆํ   วา   คณํ
วา   ปุคฺคลํ   วา   นิมนฺเตตุกาโม   น  มํ  อนปโลเกตฺวา  สงฺฆํ  วา
คณํ    วา    ปุคฺคลํ   วา   นิมนฺเตติ   โสทานิ   มํ   อนปโลเกตฺวา
เถเร   ภิกฺขู   นิมนฺเตสิ   ทุฏฺโฐทานายํ   จิตฺโต   คหปติ   อนเปกฺโข
วิรตฺตรูโป มยีติ จิตฺตํ คหปตึ เอตทโวจ อลํ คหปติ นาธิวาเสมีติ ฯ
     {๑๓๑.๑}   ทุติยมฺปิ   โข   จิตฺโต   คหปติ   อายสฺมนฺตํ  สุธมฺมํ
เอตทโวจ   อธิวาเสตุ   เม  ภนฺเต  อยฺโย  สุธมฺโม  สฺวาตนาย  ภตฺตํ
สทฺธึ  เถเรหีติ  ฯ  อลํ  คหปติ  นาธิวาเสมีติ  ฯ  ตติยมฺปิ  โข  จิตฺโต
คหปติ    อายสฺมนฺตํ    สุธมฺมํ   เอตทโวจ   อธิวาเสตุ   เม   ภนฺเต
อยฺโย   สุธมฺโม   สฺวาตนาย   ภตฺตํ   สทฺธึ  เถเรหีติ  ฯ  อลํ  คหปติ
นาธิวาเสมีติ   ฯ   อถโข   จิตฺโต   คหปติ   กึ  เม  กริสฺสติ  อยฺโย
@เชิงอรรถ: ๑ ม. ยุ. เตสทฺโท น ทิสฺสติ ฯ
สุธมฺโม   อธิวาเสนฺโต   วา   อนธิวาเสนฺโต  วาติ  อายสฺมนฺตํ  สุธมฺมํ
อภิวาเทตฺวา ปทกฺขิณํ กตฺวา ปกฺกามิ ฯ
     [๑๓๒]   อถโข  จิตฺโต  คหปติ  ตสฺสา  รตฺติยา  อจฺจเยน เถรานํ
ภิกฺขูนํ   ปณีตํ   ขาทนียํ   โภชนียํ  ปฏิยาทาเปสิ   ฯ  อถโข  อายสฺมา
สุธมฺโม    ยนฺนูนาหํ   จิตฺตสฺส   คหปติโน   เถรานํ   ภิกฺขูนํ   ปฏิยตฺตํ
ปสฺเสยฺยนฺติ     ปุพฺพณฺหสมยํ    นิวาเสตฺวา    ปตฺตจีวรมาทาย    เยน
จิตฺตสฺส    คหปติโน   นิเวสนํ   เตนุปสงฺกมิ   อุปสงฺกมิตฺวา   ปญฺญตฺเต
อาสเน   นิสีทิ   ฯ   อถโข   จิตฺโต   คหปติ   เยนายสฺมา   สุธมฺโม
เตนุปสงฺกมิ     อุปสงฺกมิตฺวา     อายสฺมนฺตํ    สุธมฺมํ    อภิวาเทตฺวา
เอกมนฺตํ   นิสีทิ   ฯ   เอกมนฺตํ   นิสินฺนํ  โข  จิตฺตํ  คหปตึ  อายสฺมา
สุธมฺโม   เอตทโวจ   ปหูตํ   โข   เต  อิทํ  คหปติ  ขาทนียํ  โภชนียํ
ปฏิยตฺตํ เอกา จ โข อิธ นตฺถิ ยทิทํ ติลสงฺคุฬิกาติ ฯ
     {๑๓๒.๑}   พหุมฺหิ   วต   ภนฺเต  [๑]-  พุทฺธวจเน  วิชฺชมาเน
อยฺเยน    สุธมฺเมน    ยเทว    กิญฺจิ   ภาสิตํ   ยทิทํ   ติลสงฺคุฬิกาติ
ภูตปุพฺพํ    ภนฺเต   ทกฺขิณาปถกา   วาณิชา   ปุรตฺถิมํ   ชนปทํ   อคมํสุ
เต  วาณิชา  ๒-  ตโต  กุกฺกุฏึ  อาเนสุํ อถโข สา ภนฺเต กุกฺกุฏี กาเกน
สทฺธึ   สํวาสํ   กปฺเปสิ   สา   โปตกํ  ชเนสิ  ยทา  โข  โส  ภนฺเต
@เชิงอรรถ: ๑ ม. ยุ. รตเน ฯ อิโต ปรํ อีทิสเมว ฯ    ๒ ม. ยุ. วาณิชฺชาย ฯ เต
กุกฺกุฏโปตโก    กากวสฺสํ    วสฺสิตุกาโม    โหติ   กากากุกฺกุฏีติ   ๑-
วสฺสติ   ยทา   กุกฺกุฏวสฺสํ   ๒-  วสฺสิตุกาโม  โหติ  กุกฺกุฏีกากาติ  ๓-
วสฺสติ   เอวเมว   โข  ภนฺเต  พหุมฺหิ  พุทฺธวจเน  วิชฺชมาเน  อยฺเยน
สุธมฺเมน ยเทว กิญฺจิ ภาสิตํ ยทิทํ ติลสงฺคุฬิกาติ ฯ
     {๑๓๒.๒}   อกฺโกสสิ  มํ  ตฺวํ  คหปติ  ปริภาสสิ  มํ  ตฺวํ  คหปติ
เอโส   เต  คหปติ  อาวาโส  ตมฺหา  อาวาสา  ๔-  ปกฺกมิสฺสามีติ  ฯ
นาหํ  ภนฺเต  อยฺยํ  สุธมฺมํ  อกฺโกสามิ  น  ๕-  ปริภาสามิ วสตุ โข ๖-
ภนฺเต   อยฺโย   สุธมฺโม   มจฺฉิกาสณฺเฑ   รมฺมณีเย  อมฺพาฏกวเน  ๗-
อหํ   อยฺยสฺส   สุธมฺมสฺส   อุสฺสุกฺกํ   กริสฺสามิ   จีวรปิณฺฑปาตเสนาสน-
คิลานปจฺจยเภสชฺชปริกฺขารานนฺติ ฯ
     {๑๓๒.๓}   ทุติยมฺปิ   โข   อายสฺมา   สุธมฺโม   จิตฺตํ   คหปตึ
เอตทโวจ   อกฺโกสสิ   มํ   ตฺวํ   คหปติ   ปริภาสสิ   มํ  ตฺวํ  คหปติ
เอโส   เต   คหปติ   อาวาโส   ตมฺหา   อาวาสา  ปกฺกมิสฺสามีติ  ฯ
นาหํ    ภนฺเต    อยฺยํ   สุธมฺมํ   อกฺโกสามิ   น   ปริภาสามิ   วสตุ
โข     ภนฺเต     อยฺโย     สุธมฺโม     มจฺฉิกาสณฺเฑ     รมฺมณีเย
อมฺพาฏกวเน     อหํ     อยฺยสฺส    สุธมฺมสฺส    อุสฺสุกฺกํ    กริสฺสามิ
@เชิงอรรถ: ๑ ยุ. กุกฺกุฏกาติ ฯ ม. กากกุกฺกุฏีติ ฯ  ๒ ม. กุกฺกุฏิวสฺสํ ฯ  ๓ ยุ. กากาติ ฯ
@๔ ม. ยุ. ตมฺหา อาวาสาติ ทฺวยํ น ทิสฺสติ ฯ อิโต ปรํ สพฺพตฺถ อีทิสเมว ฯ
@๕ ม. ยุ. นสทฺโท นตฺถิ ฯ  ๖ ม. ยุ. โขสทฺโท นตฺถิ ฯ
@๗ ม. ยุ. รมฺมณียํ อมฺพาฏกวนํ ฯ
จีวรปิณฺฑปาตเสนาสนคิลานปจฺจยเภสชฺชปริกฺขารานนฺติ ฯ
ตติยมฺปิ   โข   อายสฺมา   สุธมฺโม  จิตฺตํ  คหปตึ  เอตทโวจ  อกฺโกสสิ
มํ  ตฺวํ  คหปติ  ปริภาสสิ  มํ  ตฺวํ  คหปติ  เอโส  เต  คหปติ อาวาโส
ตมฺหา   อาวาสา   ปกฺกมิสฺสามีติ   ฯ   กหํ   ภนฺเต   อยฺโย  สุธมฺโม
คมิสฺสตีติ  ฯ  สาวตฺถึ  โข  อหํ  คหปติ  คมิสฺสามิ ภควนฺตํ ทสฺสนายาติ ฯ
เตนหิ    ภนฺเต    ยญฺจ   อตฺตนา   ภณิตํ   ยญฺจ   มยา   ภณิตํ   ตํ
สพฺพํ    ภควโต    อาโรเจหิ   อนจฺฉริยํ   โข   ปเนตํ   ภนฺเต   ยํ
อยฺโย สุธมฺโม ปุนเทว มจฺฉิกาสณฺฑํ ปจฺจาคจฺเฉยฺยาติ ฯ
     [๑๓๓]   อถโข   อายสฺมา   สุธมฺโม   เสนาสนํ   สํสาเมตฺวา
ปตฺตจีวรมาทาย   เยน   สาวตฺถี   เตน   ปกฺกามิ   อนุปุพฺเพน   เยน
สาวตฺถี   [๑]-   เชตวนํ   อนาถปิณฺฑิกสฺส   อาราโม   เยน   ภควา
เตนุปสงฺกมิ     อุปสงฺกมิตฺวา     ภควนฺตํ    อภิวาเทตฺวา    เอกมนฺตํ
นิสีทิ   ฯ   เอกมนฺตํ   นิสินฺโน  โข  อายสฺมา  สุธมฺโม  ยญฺจ  อตฺตนา
ภณิตํ    ยญฺจ    จิตฺเตน    คหปตินา    ภณิตํ    ตํ   สพฺพํ   ภควโต
อาโรเจสิ ฯ
     [๑๓๔]   วิครหิ  พุทฺโธ  ภควา  อนนุจฺฉวิกํ  โมฆปุริส  อนนุโลมิกํ
อปฺปฏิรูปํ    อสฺสามณกํ    อกปฺปิยํ    อกรณียํ   กถํ   หิ   นาม   ตฺวํ
โมฆปุริส   จิตฺตํ   คหปตึ   สทฺธึ   ปสนฺนํ   ทายกํ  การกํ  สงฺฆุปฏฺฐากํ
หีเนน   ขุํเสสฺสสิ   หีเนน   วมฺเภสฺสสิ   เนตํ   โมฆปุริส  อปฺปสนฺนานํ
@เชิงอรรถ: ๑ ม. เยน ฯ
วา   ปสาทาย   ฯเปฯ   วิครหิตฺวา   ฯเปฯ  ธมฺมึ  กถํ  กตฺวา  ภิกฺขู
อามนฺเตสิ     เตนหิ     ภิกฺขเว     สงฺโฆ     สุธมฺมสฺส    ภิกฺขุโน
ปฏิสารณียกมฺมํ   กโรตุ   จิตฺโต   เต   คหปติ   ขมาเปตพฺโพ  ๑-  ฯ
เอวญฺจ   ปน   ภิกฺขเว  กาตพฺพํ  ฯ  ปฐมํ  สุธมฺโม  ภิกฺขุ  โจเทตพฺโพ
โจเทตฺวา  สาเรตพฺโพ  สาเรตฺวา  อาปตฺติ  อาโรเปตพฺพา  ๒- อาปตฺตึ
อาโรเปตฺวา พฺยตฺเตน ภิกฺขุนา ปฏิพเลน สงฺโฆ ญาเปตพฺโพ
     {๑๓๔.๑}   สุณาตุ  เม  ภนฺเต  สงฺโฆ  อยํ  สุธมฺโม  ภิกฺขุ  จิตฺตํ
คหปตึ   สทฺธํ   ปสนฺนํ   ทายกํ   การกํ   สงฺฆุปฏฺฐากํ   หีเนน  ขุํเสติ
หีเนน   วมฺเภติ  ฯ  ยทิ  สงฺฆสฺส  ปตฺตกลฺลํ  สงฺโฆ  สุธมฺมสฺส  ภิกฺขุโน
ปฏิสารณียกมฺมํ    กเรยฺย   จิตฺโต   เต   คหปติ   ขมาเปตพฺโพติ   ฯ
เอสา ญตฺติ ฯ
     {๑๓๔.๒}   สุณาตุ  เม  ภนฺเต  สงฺโฆ  อยํ  สุธมฺโม  ภิกฺขุ  จิตฺตํ
คหปตึ   สทฺธํ    ปสนฺนํ   ทายกํ   การกํ   สงฺฆุปฏฺฐากํ  หีเนน  ขุํเสติ
หีเนน    วมฺเภติ    ฯ   สงฺโฆ   สุธมฺมสฺส   ภิกฺขุโน   ปฏิสารณียกมฺมํ
กโรติ   จิตฺโต   เต   คหปติ   ขมาเปตพฺโพติ  ฯ  ยสฺสายสฺมโต  ขมติ
สุธมฺมสฺส    ภิกฺขุโน   ปฏิสารณียกมฺมสฺส   กรณํ   จิตฺโต   เต   คหปติ
ขมาเปตพฺโพติ โส ตุณฺหสฺส ยสฺส นกฺขมติ โส ภาเสยฺย ฯ
     {๑๓๔.๓}   ทุติยมฺปิ  เอตมตฺถํ  วทามิ  ฯเปฯ  ตติยมฺปิ  เอตมตฺถํ
วทามิ  ฯ  สุณาตุ  เม  ภนฺเต  สงฺโฆ  อยํ  สุธมฺโม  ภิกฺขุ  จิตฺตํ คหปตึ
สทฺธํ   ปสนฺนํ   ทายกํ   การกํ   สงฺฆุปฏฺฐากํ   หีเนน   ขุํเสติ  หีเนน
วมฺเภติ    ฯ    สงฺโฆ   สุธมฺมสฺส   ภิกฺขุโน   ปฏิสารณียกมฺมํ   กโรติ
@เชิงอรรถ: ๑ ม. ยุ. ขมาเปตพฺโพติ ฯ ๒ ม. ยุ. อาปตฺตึ อาโรเปตพฺโพ ฯ
จิตฺโต   เต   คหปติ  ขมาเปตพฺโพติ  ฯ  ยสฺสายสฺมโต  ขมติ  สุธมฺมสฺส
ภิกฺขุโน   ปฏิสารณียกมฺมสฺส   กรณํ   จิตฺโต  เต  คหปติ  ขมาเปตพฺโพติ
โส ตุณฺหสฺส ยสฺส นกฺขมติ โส ภาเสยฺย ฯ
     {๑๓๔.๔}   กตํ   สงฺเฆน   สุธมฺมสฺส   ภิกฺขุโน   ปฏิสารณียกมฺมํ
จิตฺโต   เต   คหปติ   ขมาเปตพฺโพติ  ขมติ  สงฺฆสฺส  ตสฺมา  ตุณฺหี  ฯ
เอวเมตํ ธารยามีติ ฯ
     [๑๓๕]   ตีหิ   ภิกฺขเว   องฺเคหิ   สมนฺนาคตํ   ปฏิสารณียกมฺมํ
อธมฺมกมฺมญฺเจว     โหติ     อวินยกมฺมญฺจ    ทุวูปสนฺตญฺจ    อสมฺมุขา
กตํ    โหติ    อปฺปฏิปุจฺฉา    กตํ   โหติ   อปฺปฏิญฺญาย   กตํ   โหติ
อิเมหิ     โข    ภิกฺขเว    ตีหงฺเคหิ    สมนฺนาคตํ    ปฏิสารณียกมฺมํ
อธมฺมกมฺมญฺเจว โหติ อวินยกมฺมญฺจ ทุวูปสนฺตญฺจ ฯ
     [๑๓๖]   อปเรหิปิ  ภิกฺขเว  ตีหงฺเคหิ  สมนฺนาคตํ  ปฏิสารณียกมฺมํ
อธมฺมกมฺมญฺเจว    โหติ    อวินยกมฺมญฺจ    ทุวูปสนฺตญฺจ    อนาปตฺติยา
กตํ    โหติ    อเทสนาคามินิยา   อาปตฺติยา   กตํ   โหติ   เทสิตาย
อาปตฺติยา   กตํ   โหติ   อิเมหิ   โข   ภิกฺขเว  ตีหงฺเคหิ  สมนฺนาคตํ
ปฏิสารณียกมฺมํ        อธมฺมกมฺมญฺเจว       โหติ       อวินยกมฺมญฺจ
ทุวูปสนฺตญฺจ ฯ
     [๑๓๗]   อปเรหิปิ  ภิกฺขเว  ตีหงฺเคหิ  สมนฺนาคตํ  ปฏิสารณียกมฺมํ
อธมฺมกมฺมญฺเจว    โหติ    อวินยกมฺมญฺจ    ทุวูปสนฺตญฺจ    อโจเทตฺวา
กตํ   โหติ   อสาเรตฺวา   กตํ   โหติ   อาปตฺตึ   อนาโรเปตฺวา  กตํ
โหติ   อิเมหิ   โข   ภิกฺขเว   ตีหงฺเคหิ   สมนฺนาคตํ   ปฏิสารณียกมฺมํ
อธมฺมกมฺมญฺเจว โหติ อวินยกมฺมญฺจ ทุวูปสนฺตญฺจ ฯ
     [๑๓๘]   อปเรหิปิ  ภิกฺขเว  ตีหงฺเคหิ  สมนฺนาคตํ  ปฏิสารณียกมฺมํ
อธมฺมกมฺมญฺเจว     โหติ     อวินยกมฺมญฺจ    ทุวูปสนฺตญฺจ    อสมฺมุขา
กตํ โหติ อธมฺเมน กตํ โหติ วคฺเคน กตํ โหติ อิเมหิ โข ภิกฺขเว ฯเปฯ
     [๑๓๙]   อปเรหิปิ  ภิกฺขเว  ตีหงฺเคหิ  สมนฺนาคตํ  ปฏิสารณียกมฺมํ
อธมฺมกมฺมญฺเจว    โหติ    อวินยกมฺมญฺจ    ทุวูปสนฺตญฺจ    อปฺปฏิปุจฺฉา
กตํ  โหติ  อธมฺเมน  กตํ  โหติ  วคฺเคน  กตํ  โหติ  อิเมหิ โข ภิกฺขเว
ตีหงฺเคหิ     สมนฺนาคตํ     ปฏิสารณียกมฺมํ    อธมฺมกมฺมญฺเจว    โหติ
อวินยกมฺมญฺจ ทุวูปสนฺตญฺจ ฯ
     [๑๔๐]   อปเรหิปิ  ภิกฺขเว  ตีหงฺเคหิ  สมนฺนาคตํ  ปฏิสารณียกมฺมํ
อธมฺมกมฺมญฺเจว    โหติ    อวินยกมฺมญฺจ    ทุวูปสนฺตญฺจ    อปฺปฏิญฺญาย
กตํ  โหติ  อธมฺเมน  กตํ  โหติ  วคฺเคน  กตํ  โหติ  อิเมหิ โข ภิกฺขเว
ตีหงฺเคหิ     สมนฺนาคตํ     ปฏิสารณียกมฺมํ    อธมฺมกมฺมญฺเจว    โหติ
อวินยกมฺมญฺจ ทุวูปสนฺตญฺจ ฯ
     [๑๔๑]   อปเรหิปิ  ภิกฺขเว  ตีหงฺเคหิ  สมนฺนาคตํ  ปฏิสารณียกมฺมํ
อธมฺมกมฺมญฺเจว    โหติ    อวินยกมฺมญฺจ    ทุวูปสนฺตญฺจ    อนาปตฺติยา
กตํ  โหติ  อธมฺเมน  กตํ  โหติ  วคฺเคน  กตํ  โหติ  อิเมหิ โข ภิกฺขเว
ตีหงฺเคหิ       สมนฺนาคตํ       ปฏิสารณียกมฺมํ       อธมฺมกมฺมญฺเจว
โหติ อวินยกมฺมญฺจ ทุวูปสนฺตญฺจ ฯ
     [๑๔๒]   อปเรหิปิ  ภิกฺขเว  ตีหงฺเคหิ  สมนฺนาคตํ  ปฏิสารณียกมฺมํ
อธมฺมกมฺมญฺเจว   โหติ   อวินยกมฺมญฺจ   ทุวูปสนฺตญฺจ   อเทสนาคามินิยา
อาปตฺติยา กตํ โหติ อธมฺเมน กตํ โหติ วคฺเคน กตํ โหติ อิเมหิ ฯเปฯ
     [๑๔๓]   อปเรหิปิ   ฯเปฯ   เทสิตาย   อาปตฺติยา   กตํ  โหติ
อธมฺเมน   กตํ   โหติ   วคฺเคน   กตํ   โหติ   อิเมหิ   โข  ภิกฺขเว
ตีหงฺเคหิ สมนฺนาคตํ ปฏิสารณียกมฺมํ อธมฺมกมฺมญฺเจว ฯเปฯ
     [๑๔๔]   อปเรหิปิ   ภิกฺขเว   ฯเปฯ   อโจเทตฺวา   กตํ  โหติ
อธมฺเมน   กตํ   โหติ   วคฺเคน   กตํ   โหติ   อิเมหิ   โข  ภิกฺขเว
ตีหงฺเคหิ     สมนฺนาคตํ     ปฏิสารณียกมฺมํ    อธมฺมกมฺมญฺเจว    โหติ
อวินยกมฺมญฺจ ทุวูปสนฺตญฺจ ฯ
     [๑๔๕]   อปเรหิปิ  ภิกฺขเว  ตีหงฺเคหิ  สมนฺนาคตํ  ปฏิสารณียกมฺมํ
อธมฺมกมฺมญฺเจว    โหติ    อวินยกมฺมญฺจ    ทุวูปสนฺตญฺจ    อสาเรตฺวา
กตํ  โหติ  อธมฺเมน  กตํ  โหติ  วคฺเคน  กตํ  โหติ  อิเมหิ โข ภิกฺขเว
ตีหงฺเคหิ       สมนฺนาคตํ       ปฏิสารณียกมฺมํ       อธมฺมกมฺมญฺเจว
โหติ อวินยกมฺมญฺจ ทุวูปสนฺตญฺจ ฯ
     [๑๔๖]   อปเรหิปิ  ภิกฺขเว  ตีหงฺเคหิ  สมนฺนาคตํ  ปฏิสารณียกมฺมํ
อธมฺมกมฺมญฺเจว   ฯเปฯ   อาปตฺตึ  อนาโรเปตฺวา  กตํ  โหติ  อธมฺเมน
กตํ   โหติ   วคฺเคน   กตํ   โหติ   อิเมหิ   โข   ภิกฺขเว  ตีหงฺเคหิ
สมนฺนาคตํ    ปฏิสารณียกมฺมํ    อธมฺมกมฺมญฺเจว    โหติ   อวินยกมฺมญฺจ
ทุวูปสนฺตญฺจ ฯ
           ปฏิสารณียกมฺเม อธมฺมกมฺมทฺวาทสกํ นิฏฺฐิตํ ฯ
     [๑๔๗]   ตีหิ   ภิกฺขเว   องฺเคหิ   สมนฺนาคตํ   ปฏิสารณียกมฺมํ
ธมฺมกมฺมญฺเจว    โหติ    วินยกมฺมญฺจ    สุวูปสนฺตญฺจ    สมฺมุขา   กตํ
โหติ   ปฏิปุจฺฉา  กตํ  โหติ  ปฏิญฺญาย  กตํ  โหติ  อิเมหิ  โข  ภิกฺขเว
ตีหงฺเคหิ        สมนฺนาคตํ       ปฏิสารณียกมฺมํ       ธมฺมกมฺมญฺเจว
โหติ วินยกมฺมญฺจ สุวูปสนฺตญฺจ ฯ
     [๑๔๘]   อปเรหิปิ  ภิกฺขเว  ตีหงฺเคหิ  สมนฺนาคตํ  ปฏิสารณียกมฺมํ
ธมฺมกมฺมญฺเจว    โหติ    วินยกมฺมญฺจ   สุวูปสนฺตญฺจ   อาปตฺติยา   กตํ
โหติ   เทสนาคามินิยา   อาปตฺติยา   กตํ  โหติ  อเทสิตาย  อาปตฺติยา
กตํ   โหติ   อิเมหิ  โข  ภิกฺขเว  ตีหงฺเคหิ  สมนฺนาคตํ  ปฏิสารณียกมฺมํ
ธมฺมกมฺมญฺเจว โหติ วินยกมฺมญฺจ สุวูปสนฺตญฺจ ฯ
     [๑๔๙]   อปเรหิปิ  ภิกฺขเว  ตีหงฺเคหิ  สมนฺนาคตํ  ปฏิสารณียกมฺมํ
ธมฺมกมฺมญฺเจว     โหติ     วินยกมฺมญฺจ     สุวูปสนฺตญฺจ    โจเทตฺวา
กตํ   โหติ   สาเรตฺวา   กตํ  โหติ  อาปตฺตึ  อาโรเปตฺวา  กตํ  โหติ
อิเมหิ โข ภิกฺขเว ตีหงฺเคหิ สมนฺนาคตํ ฯเปฯ
     [๑๕๐]   อปเรหิปิ  ภิกฺขเว  ฯเปฯ  สมฺมุขา  กตํ  โหติ  ธมฺเมน
กตํ   โหติ   สมคฺเคน   กตํ   โหติ   อิเมหิ   โข  ภิกฺขเว  ตีหงฺเคหิ
สมนฺนาคตํ ปฏิสารณียกมฺมํ ฯเปฯ
     [๑๕๑]   อปเรหิปิ  ภิกฺขเว  ฯเปฯ  ปฏิปุจฺฉา  กตํ  โหติ  ธมฺเมน
กตํ โหติ สมคฺเคน กตํ โหติ อิเมหิ โข ภิกฺขเว ตีหงฺเคหิ ฯเปฯ
     [๑๕๒]   อปเรหิปิ  ภิกฺขเว  ตีหงฺเคหิ  สมนฺนาคตํ  ฯเปฯ ปฏิญฺญาย
กตํ  โหติ  ธมฺเมน  กตํ  โหติ  สมคฺเคน  กตํ  โหติ  อิเมหิ โข ภิกฺขเว
ตีหงฺเคหิ ฯเปฯ
     [๑๕๓]   อปเรหิปิ   ภิกฺขเว   ฯเปฯ   อาปตฺติยา   กตํ   โหติ
ธมฺเมน กตํ โหติ สมคฺเคน กตํ โหติ อิเมหิ โข ภิกฺขเว ฯเปฯ
     [๑๕๔]   อปเรหิปิ   ภิกฺขเว  ฯเปฯ  เทสนาคามินิยา  อาปตฺติยา
กตํ โหติ ธมฺเมน กตํ โหติ สมคฺเคน กตํ โหติ อิเมหิ ฯเปฯ
     [๑๕๕]   อปเรหิปิ   ภิกฺขเว  ฯเปฯ  อเทสิตาย  อาปตฺติยา  กตํ
โหติ    ธมฺเมน   กตํ   โหติ   สมคฺเคน   กตํ   โหติ   อิเมหิ   โข
ภิกฺขเว ฯเปฯ
     [๑๕๖]   อปเรหิปิ  ภิกฺขเว  ฯเปฯ  โจเทตฺวา  กตํ  โหติ ธมฺเมน
กตํ โหติ สมคฺเคน กตํ โหติ อิเมหิ โข ภิกฺขเว ฯเปฯ
     [๑๕๗]   อปเรหิปิ  ภิกฺขเว  ฯเปฯ  สาเรตฺวา  กตํ  โหติ ธมฺเมน
กตํ   โหติ   สมคฺเคน   กตํ   โหติ   อิเมหิ   โข  ภิกฺขเว  ตีหงฺเคหิ
สมนฺนาคตํ     ปฏิสารณียกมฺมํ    ธมฺมกมฺมญฺเจว    โหติ    วินยกมฺมญฺจ
สุวูปสนฺตญฺจ ฯ
     [๑๕๘]   อปเรหิปิ  ภิกฺขเว  ตีหงฺเคหิ  สมนฺนาคตํ  ปฏิสารณียกมฺมํ
ธมฺมกมฺมญฺเจว      โหติ     วินยกมฺมญฺจ     สุวูปสนฺตญฺจ     อาปตฺตึ
อาโรเปตฺวา   กตํ   โหติ   ธมฺเมน   กตํ  โหติ  สมคฺเคน  กตํ  โหติ
อิเมหิ     โข    ภิกฺขเว    ตีหงฺเคหิ    สมนฺนาคตํ    ปฏิสารณียกมฺมํ
ธมฺมกมฺมญฺเจว โหติ วินยกมฺมญฺจ สุวูปสนฺตญฺจ ฯ
          ปฏิสารณียกมฺเม ธมฺมกมฺมทฺวาทสกํ นิฏฺฐิตํ ฯ
     [๑๕๙]   ปญฺจหงฺเคหิ  ภิกฺขเว  สมนฺนาคตสฺส  ภิกฺขุโน อากงฺขมาโน
สงฺโฆ     ปฏิสารณียกมฺมํ    กเรยฺย    คิหีนํ    อลาภาย    ปริสกฺกติ
คิหีนํ   อนตฺถาย   ปริสกฺกติ   คิหีนํ   อนาวาสาย   ๑-  ปริสกฺกติ  คิหี
อกฺโกสติ    ปริภาสติ   คิหี   คิหีหิ   เภเทติ   อิเมหิ   โข   ภิกฺขเว
ปญฺจหงฺเคหิ     สมนฺนาคตสฺส     ภิกฺขุโน     อากงฺขมาโน     สงฺโฆ
ปฏิสารณียกมฺมํ กเรยฺย ฯ
     [๑๖๐]   อปเรหิปิ   ภิกฺขเว  ปญฺจหงฺเคหิ  สมนฺนาคตสฺส  ภิกฺขุโน
อากงฺขมาโน    สงฺโฆ    ปฏิสารณียกมฺมํ    กเรยฺย    คิหีนํ   พุทฺธสฺส
อวณฺณํ    ภาสติ    คิหีนํ   ธมฺมสฺส   อวณฺณํ   ภาสติ   คิหีนํ   สงฺฆสฺส
อวณฺณํ   ภาสติ   คิหี   หีเนน  ขุํเสติ  คิหี  ๒-  หีเนน  วมฺเภติ  คิหีนํ
ธมฺมิกํ   ปฏิสฺสวํ   น   สจฺจาเปติ   อิเมหิ   โข  ภิกฺขเว  ปญฺจหงฺเคหิ
สมนฺนาคตสฺส     ภิกฺขุโน     อากงฺขมาโน    สงฺโฆ    ปฏิสารณียกมฺมํ
กเรยฺย ฯ
     [๑๖๑]   ปญฺจนฺนํ  ภิกฺขเว ภิกฺขูนํ อากงฺขมาโน สงฺโฆ ปฏิสารณียกมฺมํ
กเรยฺย      เอโก      คิหีนํ     อลาภาย     ปริสกฺกติ     เอโก
@เชิงอรรถ: ๑ ยุ. อวาสาย ฯ   ๒ ม. ยุ. อยํ ปาโฐ นตฺถิ ฯ
คิหีนํ    อนตฺถาย   ปริสกฺกติ   เอโก   คิหีนํ   อนาวาสาย   ปริสกฺกติ
เอโก    คิหี    อกฺโกสติ   ปริภาสติ   เอโก   คิหี   คิหีหิ   เภเทติ
อิเมสํ    โข    ภิกฺขเว    ปญฺจนฺนํ    ภิกฺขูนํ   อากงฺขมาโน   สงฺโฆ
ปฏิสารณียกมฺมํ กเรยฺย ฯ
     [๑๖๒]   อปเรสํปิ  ภิกฺขเว  ปญฺจนฺนํ  ภิกฺขูนํ  อากงฺขมาโน  สงฺโฆ
ปฏิสารณียกมฺมํ    กเรยฺย    เอโก   คิหีนํ   พุทฺธสฺส   อวณฺณํ   ภาสติ
เอโก    คิหีนํ    ธมฺมสฺส   อวณฺณํ   ภาสติ   เอโก   คิหีนํ   สงฺฆสฺส
อวณฺณํ   ภาสติ   เอโก   คิหี   หีเนน   ขุํเสติ   คิหี  หีเนน  วมฺเภติ
เอโก   คิหีนํ   ธมฺมิกํ   ปฏิสฺสวํ   น  สจฺจาเปติ  อิเมสํ  โข  ภิกฺขเว
ปญฺจนฺนํ ภิกฺขูนํ อากงฺขมาโน สงฺโฆ ปฏิสารณียกมฺมํ กเรยฺย ฯ
                            อากงฺขมานจตุปญฺจกํ ๑- นิฏฺฐิตํ ฯ
     [๑๖๓]   ปฏิสารณียกมฺมกเตน  ภิกฺขเว  ภิกฺขุนา  สมฺมา วตฺติตพฺพํ ฯ
ตตฺรายํ   สมฺมาวตฺตนา   น   อุปสมฺปาเทตพฺพํ   น   นิสฺสโย  ทาตพฺโพ
น   สามเณโร   อุปฏฺฐาเปตพฺโพ   น   ภิกฺขุโนวาทกสมฺมติ   สาทิตพฺพา
สมฺมเตนปิ   ภิกฺขุนิโย   น   โอวทิตพฺพา   ยาย   อาปตฺติยา   สงฺเฆน
ปฏิสารณียกมฺมํ   กตํ   โหติ   สา   อาปตฺติ   น  อาปชฺชิตพฺพา  อญฺญา
วา   ตาทิสิกา   ตโต   วา  ปาปิฏฺฐตรา  กมฺมํ  น  ครหิตพฺพํ  กมฺมิกา
น   ครหิตพฺพา   น   ปกตตฺตสฺส   ภิกฺขุโน   อุโปสโถ   ฐเปตพฺโพ  น
ปวารณา    ฐเปตพฺพา    น    สวจนียํ    กาตพฺพํ    น    อนุวาโท
ปฏฺฐเปตพฺโพ น โอกาโส
@เชิงอรรถ: ๑ ม. อากงฺขมานจตุกฺกํ ฯ
กาเรตพฺโพ   น   โจเทตพฺโพ   น   สาเรตพฺโพ   น   ภิกฺขู   ภิกฺขูหิ
สมฺปโยเชตพฺพนฺติ ฯ
                    ปฏิสารณียกมฺเม อฏฺฐารสวตฺตํ นิฏฺฐิตํ ฯ
     [๑๖๔]   อถ   โข   สงฺโฆ   สุธมฺมสฺส  ภิกฺขุโน  ปฏิสารณียกมฺมํ
อกาสิ    จิตฺโต    เต   คหปติ   ขมาเปตพฺโพติ   ฯ   โส   สงฺเฆน
ปฏิสารณียกมฺมกโต     มจฺฉิกาสณฺฑํ     คนฺตฺวา    มงฺกุภูโต    นาสกฺขิ
จิตฺตํ   คหปตึ  ขมาเปตุํ  ฯ  โส  ๑-  ปุนเทว  สาวตฺถึ  ปจฺจาคจฺฉิ  ฯ
ภิกฺขู   เอวมาหํสุ   ขมาปิโต   ตยา  อาวุโส  สุธมฺมจิตฺโต  คหปตีติ  ฯ
อิธาหํ    อาวุโส   มจฺฉิกาสณฺฑํ   คนฺตฺวา   มงฺกุภูโต   นาสกฺขึ   จิตฺตํ
คหปตึ  ขมาเปตุนฺติ  ฯ  เต  ภิกฺขู  ๒-  ภควโต  เอตมตฺถํ อาโรเจสุํ ฯ
เตนหิ   ภิกฺขเว   สงฺโฆ   สุธมฺมสฺส   ภิกฺขุโน   อนุทูตํ   เทตุ   จิตฺตํ
คหปตึ   ขมาเปตุํ   ฯ   เอวญฺจ   ปน   ภิกฺขเว   ทาตพฺโพ  ฯ  ปฐมํ
ภิกฺขุ   ยาจิตพฺโพ   ยาจิตฺวา   พฺยตฺเตน   ภิกฺขุนา   ปฏิพเลน   สงฺโฆ
ญาเปตพฺโพ
     {๑๖๔.๑}   สุณาตุ   เม  ภนฺเต  สงฺโฆ  ยทิ  สงฺฆสฺส  ปตฺตกลฺลํ
สงฺโฆ    อิตฺถนฺนามํ    ภิกฺขุํ    สุธมฺมสฺส   ภิกฺขุโน   อนุทูตํ   ทเทยฺย
จิตฺตํ คหปตึ ขมาเปตุํ ฯ เอสา ญตฺติ ฯ
     {๑๖๔.๒}   สุณาตุ  เม  ภนฺเต  สงฺโฆ  สงฺโฆ  อินฺถนฺนามํ  ภิกฺขุํ
สุธมฺมสฺส    ภิกฺขุโน    อนุทูตํ   เทติ   จิตฺตํ   คหปตึ   ขมาเปตุํ   ฯ
ยสฺสายสฺมโต    ขมติ    อิตฺถนฺนามสฺส    ภิกฺขุโน   สุธมฺมสฺส   ภิกฺขุโน
อนุทูตสฺส       ทานํ       จิตฺตํ      คหปตึ      ขมาเปตุํ      ฯ
@เชิงอรรถ: ๑ ม. ยุ. โสติ น ทิสฺสติ ฯ ม. เตติ น ทิสฺสติ ฯ
โส ตุณฺหสฺส ยสฺส นกฺขมติ โส ภาเสยฺย ฯ
     {๑๖๔.๓}   ทินฺโน    สงฺเฆน   อิตฺถนฺนาโม   ภิกฺขุ   สุธมฺมสฺส
ภิกฺขุโน   อนุทูโต   จิตฺตํ   คหปตึ   ขมาเปตุํ   ขมติ   สงฺฆสฺส  ตสฺมา
ตุณฺหี ฯ เอวเมตํ ธารยามีติ ฯ
     [๑๖๕]   เตน  [๑]-   ภิกฺขเว สุธมฺเมน ภิกฺขุนา อนุทูเตน ภิกฺขุนา
สทฺธึ    มจฺฉิกาสณฺฑํ    คนฺตฺวา   จิตฺโต   คหปติ   ขมาเปตพฺโพ   ขม
คหปติ    ปสาเทมิ    ตนฺติ    เอวญฺเจ   วุจฺจมาโน   ขมติ   อิจฺเจตํ
กุสลํ   ฯ   โน   เจ  ขมติ  อนุทูเตน  ภิกฺขุนา  วตฺตพฺโพ  ขม  คหปติ
อิมสฺส   ภิกฺขุโน   ปสาเทติ  ตนฺติ  เอวญฺเจ  วุจฺจมาโน  ขมติ  อิจฺเจตํ
กุสลํ   ฯ   โน   เจ  ขมติ  อนุทูเตน  ภิกฺขุนา  วตฺตพฺโพ  ขม  คหปติ
อิมสฺส    ภิกฺขุโน   อหนฺตํ   ปสาเทมีติ   เอวญฺเจ   วุจฺจมาโน   ขมติ
อิจฺเจตํ   กุสลํ   ฯ  โน  เจ  ขมติ  อนุทูเตน  ภิกฺขุนา  วตฺตพฺโพ  ขม
คหปติ   อิมสฺส   ภิกฺขุโน   สงฺฆสฺส   วจเนนาติ   เอวญฺเจ  วุจฺจมาโน
ขมติ  อิจฺเจตํ  กุสลํ  ฯ  โน  เจ ขมติ อนุทูเตน ภิกฺขุนา สุธมฺมํ ภิกฺขุํ ๒-
จิตฺตสฺส     คหปติโน     ทสฺสนุปจารํ     อวิชหาเปตฺวา    สวนุปจารํ
อวิชหาเปตฺวา     เอกํสํ     อุตฺตราสงฺคํ     การาเปตฺวา    อุกฺกุฏิกํ
นิสีทาเปตฺวา      อญฺชลึ      ปคฺคณฺหาเปตฺวา      สา      อาปตฺติ
เทสาเปตพฺพาติ ๓- ฯ
     [๑๖๖]   อถ   โข  อายสฺมา  สุธมฺโม  อนุทูเตน  ภิกฺขุนา  สทฺธึ
มจฺฉิกาสณฺฑํ    คนฺตฺวา   จิตฺตํ   คหปตึ   ขมาเปสิ   ฯ   โส   สมฺมา
วตฺตติ   โลมํ   ปาเตติ   เนตฺถารํ   วตฺตติ  ภิกฺขู  อุปสงฺกมิตฺวา  เอวํ
@เชิงอรรถ: ๑ ม. หิ ฯ   ๒ ม. ยุ. สุธมฺโม ภิกฺขุ ฯ   ๓ ม. ตํ อาปตฺตึ เทสาเปตพฺโพติ ฯ
วเทติ   อหํ   อาวุโส   สงฺเฆน   ปฏิสารณียกมฺมกโต   สมฺมา  วตฺตามิ
โลมํ  ปาเตมิ  เนตฺถารํ  วตฺตามิ  กถํ  นุ  โข  มยา  ปฏิปชฺชิตพฺพนฺติ ฯ
เต   ภิกฺขู   ภควโต  เอตมตฺถํ  อาโรเจสุํ  ฯ  เตนหิ  ภิกฺขเว  สงฺโฆ
สุธมฺมสฺส ภิกฺขุโน ปฏิสารณียกมฺมํ ปฏิปฺปสฺสมฺเภตุ ฯ
     [๑๖๗]   ปญฺจหิ    ภิกฺขเว   องฺเคหิ   สมนฺนาคตสฺส   ภิกฺขุโน
ปฏิสารณียกมฺมํ    น   ปฏิปฺปสฺสมฺเภตพฺพํ   อุปสมฺปาเทติ   นิสฺสยํ   เทติ
สามเณรํ     อุปฏฺฐาเปติ    ภิกฺขุโนวาทกสมฺมตึ    สาทิยติ    สมฺมโตปิ
ภิกฺขุนิโย   โอวทติ   อิเมหิ   โข   ภิกฺขเว  ปญฺจหงฺเคหิ  สมนฺนาคตสฺส
ภิกฺขุโน ปฏิสารณียกมฺมํ น ปฏิปฺปสฺสมฺเภตพฺพํ ฯ
     [๑๖๘]   อปเรหิปิ   ภิกฺขเว  ปญฺจหงฺเคหิ  สมนฺนาคตสฺส  ภิกฺขุโน
ปฏิสารณียกมฺมํ    น    ปฏิปฺปสฺสมฺเภตพฺพํ   ยาย   อาปตฺติยา   สงฺเฆน
ปฏิสารณียกมฺมํ    กตํ    โหติ   ตํ   อาปตฺตึ   อาปชฺชติ   อญฺญํ   วา
ตาทิสิกํ    ตโต   วา   ปาปิฏฺฐตรํ   กมฺมํ   ครหติ   กมฺมิเก   ครหติ
อิเมหิ     โข     ภิกฺขเว    ปญฺจหงฺเคหิ    สมนฺนาคตสฺส    ภิกฺขุโน
ปฏิสารณียกมฺมํ น ปฏิปฺปสฺสมฺเภตพฺพํ ฯ
     [๑๖๙]   อฏฺฐหิ    ภิกฺขเว   องฺเคหิ   สมนฺนาคตสฺส   ภิกฺขุโน
ปฏิสารณียกมฺมํ     น     ปฏิปฺปสฺสมฺเภตพฺพํ     ปกตตฺตสฺส     ภิกฺขุโน
อุโปสถํ   ฐเปติ   ปวารณํ   ฐเปติ  สวจนียํ  กโรติ  อนุวาทํ  ปฏฺฐเปติ
โอกาสํ    กาเรติ    โจเทติ   สาเรติ   ภิกฺขู   ภิกฺขูหิ   สมฺปโยเชติ
อิเมหิ  โข  ภิกฺขเว  อฏฺฐหงฺเคหิ  สมนฺนาคตสฺส  ภิกฺขุโน  ปฏิสารณียกมฺมํ
น ปฏิปฺปสฺสมฺเภตพฺพํ ฯ
         ปฏิสารณียกมฺเม น ปฏิปฺปสฺสมฺเภตพฺพอฏฺฐารสกํ นิฏฺฐิตํ ฯ
     [๑๗๐]   ปญฺจหิ    ภิกฺขเว    องฺเคหิ   สมนฺนาคสฺส   ภิกฺขุโน
ปฏิสารณียกมฺมํ    ปฏิปฺปสฺสมฺเภตพฺพํ    น    อุปสมฺปาเทติ   น   นิสฺสยํ
เทติ   น   สามเณรํ   อุปฏฺฐาเปติ   น   ภิกฺขุโนวาทกสมฺมตึ   สาทิยติ
สมฺมโตปิ   ภิกฺขุนิโย   น   โอวทติ   อิเมหิ  โข  ภิกฺขเว  ปญฺจหงฺเคหิ
สมนฺนาคตสฺส ภิกฺขุโน ปฏิสารณียกมฺมํ ปฏิปฺปสฺสมฺเภตพฺพํ ฯ
     [๑๗๑]   อปเรหิปิ   ภิกฺขเว  ปญฺจหงฺเคหิ  สมนฺนาคตสฺส  ภิกฺขุโน
ปฏิสารณียกมฺมํ     ปฏิปฺปสฺสมฺเภตพฺพํ     ยาย    อาปตฺติยา    สงฺเฆน
ปฏิสารณียกมฺมํ    กตํ    โหติ    ตํ   อาปตฺตึ   น   อาปชฺชติ   อญฺญํ
วา   ตาทิสิกํ   ตโต   วา   ปาปิฏฺฐตรํ   กมฺมํ   น   ครหติ  กมฺมิเก
น   ครหติ   อิเมหิ   โข  ภิกฺขเว  ปญฺจหงฺเคหิ  สมนฺนาคตสฺส  ภิกฺขุโน
ปฏิสารณียกมฺมํ ปฏิปฺปสฺสมฺเภตพฺพํ ฯ
     [๑๗๒]   อฏฺฐหิ    ภิกฺขเว   องฺเคหิ   สมนฺนาคตสฺส   ภิกฺขุโน
ปฏิสารณียกมฺมํ     ปฏิปฺปสฺสมฺเภตพฺพํ     น     ปกตตฺตสฺส     ภิกฺขุโน
อุโปสถํ   ฐเปติ   น  ปวารณํ  ฐเปติ  น  สวจนียํ  กโรติ  น  อนุวาทํ
ปฏฺฐเปติ   น   โอกาสํ   กาเรติ   น  โจเทติ  น  สาเรติ  น  ภิกฺขู
ภิกฺขูหิ   สมฺปโยเชติ   อิเมหิ   โข  ภิกฺขเว  อฏฺฐหงฺเคหิ  สมนฺนาคตสฺส
ภิกฺขุโน ปฏิสารณียกมฺมํ ปฏิปฺปสฺสมฺเภตพฺพํ ฯ
     ปฏิสารณียกมฺเม ปฏิปฺปสฺสมฺเภตพฺพอฏฺฐารสกํ นิฏฺฐิตํ ฯ
     [๑๗๓]   เอวญฺจ   ปน   ภิกฺขเว   ปฏิปฺปสฺสมฺเภตพฺพํ  ฯ  เตนหิ
ภิกฺขเว   สุธมฺเมน   ภิกฺขุนา   สงฺฆํ  อุปสงฺกมิตฺวา  เอกํสํ  อุตฺตราสงฺคํ
กริตฺวา    วุฑฺฒานํ    ภิกฺขูนํ   ปาเท   วนฺทิตฺวา   อุกฺกุฏิกํ   นิสีทิตฺวา
อญฺชลึ    ปคฺคเหตฺวา    เอวมสฺส    วจนีโย   อหํ   ภนฺเต   สงฺเฆน
ปฏิสารณียกมฺมกโต    สมฺมา    วตฺตามิ    โลมํ    ปาเตมิ   เนตฺถารํ
วตฺตามิ    ปฏิสารณียกมฺมสฺส    ปฏิปฺปสฺสทฺธึ    ยาจามีติ   ฯ   ทุติยมฺปิ
ยาจิตพฺพา   ฯ   ตติยมฺปิ   ยาจิตพฺพา  ฯ  พฺยตฺเตน  ภิกฺขุนา  ปฏิพเลน
สงฺโฆ ญาเปตพฺโพ
     {๑๗๓.๑}   สุณาตุ  เม  ภนฺเต  สงฺโฆ  อยํ  สุธมฺโม ภิกฺขุ สงฺเฆน
ปฏิสารณียกมฺมกโต   สมฺมา   วตฺตติ   โลมํ   ปาเตติ  เนตฺถารํ  วตฺตติ
ปฏิสารณียกมฺมสฺส   ปฏิปฺปสฺสทฺธึ   ยาจติ   ฯ   ยทิ   สงฺฆสฺส  ปตฺตกลฺลํ
สงฺโฆ    สุธมฺมสฺส    ภิกฺขุโน    ปฏิสารณียกมฺมํ   ปฏิปฺปสฺสมฺเภยฺย   ฯ
เอสา ญตฺติ ฯ
     {๑๗๓.๒}   สุณาตุ  เม  ภนฺเต  สงฺโฆ  อยํ  สุธมฺโม ภิกฺขุ สงฺเฆน
ปฏิสารณียกมฺมกโต   สมฺมา   วตฺตติ   โลมํ   ปาเตติ  เนตฺถารํ  วตฺตติ
ปฏิสารณียกมฺมสฺส   ปฏิปฺปสฺสทฺธึ   ยาจติ   ฯ  สงฺโฆ  สุธมฺมสฺส  ภิกฺขุโน
ปฏิสารณียกมฺมํ    ปฏิปฺปสฺสมฺเภติ   ฯ   ยสฺสายสฺมโต   ขมติ   สุธมฺมสฺส
ภิกฺขุโน    ปฏิสารณียกมฺมสฺส    ปฏิปฺปสฺสทฺธิ    โส    ตุณฺหสฺส    ยสฺส
นกฺขมติ โส ภาเสยฺย ฯ
     {๑๗๓.๓}   ทุติยมฺปิ   เอตมตฺถํ   วทามิ  ฯ  สุณาตุ  เม  ภนฺเต
สงฺโฆ    อยํ   สุธมฺโม   ภิกฺขุ   สงฺเฆน   ปฏิสารณียกมฺมกโต   สมฺมา
วตฺตติ     โลมํ    ปาเตติ    เนตฺถารํ    วตฺตติ    ปฏิสารณียกมฺมสฺส
ปฏิปฺปสฺสทฺธึ   ยาจติ   ฯ   สงฺโฆ   สุธมฺมสฺส   ภิกฺขุโน  ปฏิสารณียกมฺมํ
ปฏิปฺปสฺสมฺเภติ     ฯ    ยสฺสายสฺมโต    ขมติ    สุธมฺมสฺส    ภิกฺขุโน
ปฏิสารณียกมฺมสฺส    ปฏิปฺปสฺสทฺธิ    โส    ตุณฺหสฺส    ยสฺส    นกฺขมติ
โส ภาเสยฺย ฯ
     {๑๗๓.๔}   ตติยมฺปิ   เอตมตฺถํ   วทามิ  ฯ  สุณาตุ  เม  ภนฺเต
สงฺโฆ    อยํ   สุธมฺโม   ภิกฺขุ   สงฺเฆน   ปฏิสารณียกมฺมกโต   สมฺมา
วตฺตติ     โลมํ    ปาเตติ    เนตฺถารํ    วตฺตติ    ปฏิสารณียกมฺมสฺส
ปฏิปฺปสฺสทฺธึ   ยาจติ   ฯ   สงฺโฆ   สุธมฺมสฺส   ภิกฺขุโน  ปฏิสารณียกมฺมํ
ปฏิปฺปสฺสมฺเภติ    ฯ    ยสฺสายสฺมโต    ขมติ     สุธมฺมสฺส    ภิกฺขุโน
ปฏิสารณียกมฺมสฺส    ปฏิปฺปสฺสทฺธิ    โส    ตุณฺหสฺส    ยสฺส    นกฺขมติ
โส ภาเสยฺย ฯ
     {๑๗๓.๕}   ปฏิปฺปสฺสทฺธํ     สงฺเฆน     สุธมฺมสฺส    ภิกฺขุโน
ปฏิสารณียกมฺมํ    ขมติ    สงฺฆสฺส    ตสฺมา    ตุณฺหี    ฯ   เอวเมตํ
ธารยามีติ ฯ
                        ปฏิสารณียกมฺมํ จตุตฺถํ นิฏฺฐิตํ ฯ


             เนื้อความพระไตรปิฎกฉบับภาษาบาลีอักษรไทย เล่มที่ ๖ หน้าที่ ๕๗-๗๕.
http://84000.org/tipitaka/pali/pali_item_s.php?book=6&item=129&items=45&modeTY=2
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
http://84000.org/tipitaka/pali/pali_item_s.php?book=6&item=129&items=45&modeTY=2&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
http://84000.org/tipitaka/read/roman_item_s.php?book=6&item=129&items=45&modeTY=2
             อ่านเทียบพระไตรปิฎกภาษาไทยฉบับหลวง :-
http://84000.org/tipitaka/read/byitem_s.php?book=6&item=129&items=45&modeTY=2
             ศึกษาอรรถกถานี้ได้ที่ :-
http://84000.org/tipitaka/attha/attha.php?b=6&i=129
             The Pali Atthakatha in Thai :-
http://84000.org/tipitaka/atthapali/read_th.php?B=3&A=5722
             The Pali Atthakatha in Roman :-
http://84000.org/tipitaka/atthapali/read_rm.php?B=3&A=5722
             สารบัญพระไตรปิฎกเล่มที่ ๖
http://84000.org/tipitaka/read/?index_6