บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ |
TIPITAKA Volume 2 : PALI ROMAN Vinaya Pitaka Vol 2 : Vinaya. Mahāvi (2)
Dutiyasikkhāpadaṃ [182] Tena samayena buddho bhagavā sāvatthiyaṃ viharati jetavane anāthapiṇḍikassārāme . tena kho pana samayena chabbaggiyā bhikkhū pesalehi bhikkhūhi saddhiṃ bhaṇḍantā 1- pesale bhikkhū omasanti jātiyāpi nāmenapi gottenapi kammenapi sippenapi ābādhenapi liṅgenapi kilesenapi āpattiyāpi hīnenapi akkosena khuṃsenti vambhenti . ye te bhikkhū appicchā .pe. te ujjhāyanti khīyanti vipācenti kathaṃ hi nāma chabbaggiyā bhikkhū pesalehi bhikkhūhi saddhiṃ bhaṇḍantā pesale bhikkhū omasissanti jātiyāpi nāmenapi gottenapi kammenapi sippenapi ābādhenapi liṅgenapi kilesenapi āpattiyāpi hīnenapi akkosena khuṃsessanti vambhessantīti. {182.1} Athakho te bhikkhū bhagavato etamatthaṃ ārocesuṃ. Saccaṃ kira tumhe bhikkhave pesalehi bhikkhūhi saddhiṃ bhaṇḍantā pesale bhikkhū omasatha jātiyāpi nāmenapi gottenapi kammenapi sippenapi ābādhenapi liṅgenapi kilesenapi āpattiyāpi hīnenapi akkosena khuṃsetha vambhethāti . saccaṃ bhagavāti . Vigarahi buddho bhagavā kathaṃ hi nāma tumhe moghapurisā pesalehi bhikkhūhi saddhiṃ bhaṇḍantā pesale bhikkhū omasissatha jātiyāpi .pe. hīnenapi akkosena khuṃsessatha @Footnote: 1 Yu. bhaṇḍentā. evamuparipi. Vambhessatha netaṃ moghapurisā appasannānaṃ vā pasādāya pasannānaṃ vā bhiyyobhāvāya .pe. vigarahitvā dhammiṃ kathaṃ katvā bhikkhū āmantesi. [183] Bhūtapubbaṃ bhikkhave takkasilāyaṃ 1- aññatarassa brāhmaṇassa nandivisālo nāma balibaddo 2- ahosi . athakho bhikkhave nandivisālo balibaddo taṃ brāhmaṇaṃ etadavoca gaccha tvaṃ brāhmaṇa seṭṭhinā saddhiṃ sahassena abbhudaṃ 3- karohi mayhaṃ balibaddo sakaṭasataṃ atibaddhaṃ pavaṭṭessatīti . athakho bhikkhave so brāhmaṇo seṭṭhinā saddhiṃ sahassena abbhudaṃ akāsi mayhaṃ balibaddo sakaṭasataṃ atibaddhaṃ pavaṭṭessatīti . athakho bhikkhave so brāhmaṇo sakaṭasataṃ atibandhitvā nandivisālaṃ balibaddaṃ yuñjitvā etadavoca añcha 4- kūṭa vahassu kūṭāti. {183.1} Athakho bhikkhave nandivisālo balibaddo tattheva aṭṭhāsi. Athakho bhikkhave so brāhmaṇo sahassena parājito pajjhāyi . Athakho bhikkhave nandivisālo balibaddo taṃ brāhmaṇaṃ etadavoca kissa tvaṃ brāhmaṇa pajjhāyasīti . tathā hi panāhaṃ bho tayā sahassena parājitoti . kissa pana maṃ tvaṃ brāhmaṇa akūṭaṃ kūṭavādena pāpesi gaccha tvaṃ brāhmaṇa seṭṭhinā saddhiṃ dvīhi sahassehi abbhudaṃ karohi mayhaṃ balibaddo sakaṭasataṃ atibaddhaṃ pavaṭṭessatīti mā ca maṃ akūṭaṃ kūṭavādena pāpesīti . athakho bhikkhave so brāhmaṇo @Footnote: 1 Ma. takkasīlāyaṃ . 2 Ma. balībaddo. Sī. balivaddo. evamuparipi. @3 Ma. abbhutaṃ. evamuparipi . 4 Ma. gaccha. Seṭṭhinā saddhiṃ dvīhi sahassehi abbhudaṃ akāsi mayhaṃ balibaddo sakaṭasataṃ atibaddhaṃ pavaṭṭessatīti . athakho bhikkhave so brāhmaṇo sakaṭasataṃ atibandhitvā nandivisālaṃ balibaddaṃ yuñjitvā etadavoca añcha bhadra vahassu bhadrāti . athakho bhikkhave nandivisālo balibaddo sakaṭasataṃ atibaddhaṃ pavaṭṭesi. [184] Manāpameva bhāseyya nāmanāpaṃ kudācanaṃ manāpaṃ bhāsamānassa garubhāraṃ udabbahi dhanañca naṃ alabbhesi 1- tena cattamano ahūti. [185] Tadāpi me bhikkhave amanāpā khuṃsanā vambhanā kimaṅgaṃ panetarahi manāpā bhavissati khuṃsanā vambhanā netaṃ bhikkhave appasannānaṃ vā pasādāya .pe. evañca pana bhikkhave imaṃ sikkhāpadaṃ uddiseyyātha {185.1} omasavāde pācittiyanti. [186] Omasavādo nāma dasahi ākārehi omasati jātiyāpi nāmenapi gottenapi kammenapi sippenapi ābādhenapi liṅgenapi kilesenapi āpattiyāpi akkosenapi. [187] Jāti nāma dve jātiyo hīnā ca jāti ukkaṭṭhā ca jāti . hīnā nāma jāti caṇḍālajāti veṇajāti nesādajāti rathakārajāti pukkusajāti esā hīnā nāma jāti . ukkaṭṭhā nāma jāti khattiyajāti brāhmaṇajāti esā ukkaṭṭhā nāma jāti. [188] Nāmaṃ nāma dve nāmāni hīnañca nāmaṃ ukkaṭṭhañca @Footnote: 1 Ma. alābhesi. Nāmaṃ . hīnaṃ nāma nāmaṃ avakaṇṇakaṃ javakaṇṇakaṃ dhaniṭṭhakaṃ saviṭṭhakaṃ kulavaḍḍhakaṃ tesu tesu vā pana janapadesu oññātaṃ avaññātaṃ hīḷitaṃ paribhūtaṃ acitīkataṃ 1- etaṃ hīnaṃ nāma nāmaṃ . ukkaṭṭhaṃ nāma nāmaṃ buddhapaṭisaṃyuttaṃ dhammapaṭisaṃyuttaṃ saṅghapaṭisaṃyuttaṃ tesu tesu vā pana janapadesu anoññātaṃ anavaññātaṃ ahīḷitaṃ aparibhūtaṃ citīkataṃ etaṃ ukkaṭṭhaṃ nāma nāmaṃ. [189] Gottaṃ nāma dve gottāni hīnañca gottaṃ ukkaṭṭhañca gottaṃ . hīnaṃ nāma bhāradvājagottaṃ tesu tesu vā pana janapadesu oññātaṃ avaññātaṃ hīḷitaṃ paribhūtaṃ acitīkataṃ etaṃ hīnaṃ nāma gottaṃ . ukkaṭṭhaṃ nāma gottaṃ gotamagottaṃ moggallānagottaṃ kaccāyanagottaṃ vāseṭṭhagottaṃ 2- tesu tesu vā pana janapadesu anoññātaṃ anavaññātaṃ ahīḷitaṃ aparibhūtaṃ citīkataṃ etaṃ ukkaṭṭhaṃ nāma gottaṃ. [190] Kammaṃ nāma dve kammāni hīnañca kammaṃ ukkaṭṭhañca kammaṃ . hīnaṃ nāma kammaṃ koṭṭhakakammaṃ pupphachaḍḍakakammaṃ tesu tesu vā pana janapadesu oññātaṃ avaññātaṃ hīḷitaṃ paribhūtaṃ acitīkataṃ etaṃ hīnaṃ nāma kammaṃ . ukkaṭṭhaṃ nāma kammaṃ kasi vaṇijjā gorakkhā tesu tesu vā pana janapadesu anoññātaṃ anavaññātaṃ ahīḷitaṃ aparibhūtaṃ citīkataṃ etaṃ ukkaṭṭhaṃ nāma kammaṃ. [191] Sippaṃ nāma dve sippāni hīnañca sippaṃ ukkaṭṭhañca @Footnote: 1 Ma. acittīkataṃ. evamuparipi . 2 Ma. kaccānagottaṃ vāsiṭṭhagottaṃ. evamuparipi. Sippaṃ . hīnaṃ nāma sippaṃ naḷakārasippaṃ kumbhakārasippaṃ pesakārasippaṃ cammakārasippaṃ nahāpitasippaṃ tesu tesu vā pana janapadesu oññātaṃ avaññātaṃ hīḷitaṃ paribhūtaṃ acitīkataṃ etaṃ hīnaṃ nāma sippaṃ . ukkaṭṭhaṃ nāma sippaṃ muddhā 1- gaṇanā lekhā tesu tesu vā pana janapadesu anoññātaṃ anavaññātaṃ ahīḷitaṃ aparibhūtaṃ citīkataṃ etaṃ ukkaṭṭhaṃ nāma sippaṃ. [192] Sabbepi ābādhā hīnā nāma apica madhumeho ābādho ukkaṭṭho. [193] Liṅgaṃ nāma dve liṅgāni hīnañca liṅgaṃ ukkaṭṭhañca liṅgaṃ . hīnaṃ nāma liṅgaṃ atidīghaṃ atirassaṃ atikaṇhaṃ accodātaṃ etaṃ hīnaṃ nāma liṅgaṃ . ukkaṭṭhaṃ nāma liṅgaṃ nātidīghaṃ nātirassaṃ nātikaṇhaṃ nāccodātaṃ etaṃ ukkaṭṭhaṃ nāma liṅgaṃ. [194] Sabbepi kilesā hīnā. [195] Sabbāpi āpattiyo hīnā apica sotāpatti samāpatti ukkaṭṭhā. [196] Akkoso nāma dve akkosā hīno ca akkoso ukkaṭṭho ca akkoso . hīno nāma akkoso oṭṭhosi meṇḍosi goṇosi gadrabhosi tiracchānagatosi nerayikosi natthi tuyhaṃ sugati duggatiyeva tuyhaṃ pāṭikaṅkhāti yakārena vā bhakārena vā kāṭakoṭacikāya vā eso hīno nāma akkoso . @Footnote: 1 Ma. muddā. evamuparipi. Ukkaṭṭho nāma akkoso paṇḍitosi byattosi medhāvīsi bahussutosi dhammakathikosi natthi tuyhaṃ duggati sugatiyeva tuyhaṃ pāṭikaṅkhāti eso ukkaṭṭho nāma akkoso. [197] Upasampanno upasampannaṃ khuṃsetukāmo vambhetukāmo maṅkukattukāmo 1- hīnena hīnaṃ vadeti caṇḍālaṃ veṇaṃ nesādaṃ rathakāraṃ pukkusaṃ caṇḍālosi veṇosi nesādosi rathakārosi pukkusosīti bhaṇati āpatti vācāya vācāya pācittiyassa. [198] Upasampanno upasampannaṃ khuṃsetukāmo vambhetukāmo maṅkukattukāmo hīnena ukkaṭṭhaṃ vadeti khattiyaṃ brāhmaṇaṃ caṇḍālosi veṇosi nesādosi rathakārosi pukkusosīti bhaṇati āpatti vācāya vācāya pācittiyassa. [199] Upasampanno upasampannaṃ khuṃsetukāmo vambhetukāmo maṅkukattukāmo ukkaṭṭhena hīnaṃ vadeti caṇḍālaṃ veṇaṃ nesādaṃ rathakāraṃ pukkusaṃ khattiyosi brāhmaṇosīti bhaṇati āpatti vācāya vācāya pācittiyassa. [200] Upasampanno upasampannaṃ khuṃsetukāmo vambhetukāmo maṅkukattukāmo ukkaṭṭhena ukkaṭṭhaṃ vadeti khattiyaṃ brāhmaṇaṃ khattiyosi brāhmaṇosīti bhaṇati āpatti vācāya vācāya pācittiyassa. @Footnote: 1 Yu. maṅkuṃ kattukāmo. evamuparipi. [201] Upasampanno upasampannaṃ khuṃsetukāmo vambhetukāmo maṅkukattukāmo hīnena hīnaṃ vadeti avakaṇṇakaṃ javakaṇṇakaṃ dhaniṭṭhakaṃ saviṭṭhakaṃ kulavaḍḍhakaṃ avakaṇṇakosi javakaṇṇakosi dhaniṭṭhakosi saviṭṭhakosi kulavaḍḍhakosīti bhaṇati āpatti vācāya vācāya pācittiyassa. [202] Upasampanno upasampannaṃ khuṃsetukāmo vambhetukāmo maṅkukattukāmo hīnena ukkaṭṭhaṃ vadeti buddharakkhitaṃ dhammarakkhitaṃ saṅgharakkhitaṃ avakaṇṇakosi javakaṇṇakosi dhaniṭṭhakosi saviṭṭhakosi kulavaḍḍhakosīti bhaṇati āpatti vācāya vācāya pācittiyassa. [203] Upasampanno upasamapannaṃ khuṃsetukāmo vambhetukāmo maṅkukattukāmo ukkaṭṭhena hīnaṃ vadeti avakaṇṇakaṃ javakaṇṇakaṃ dhaniṭṭhakaṃ saviṭṭhakaṃ kulavaḍḍhakaṃ buddharakkhitosi dhammarakkhitosi saṅgharakkhitosīti bhaṇati āpatti vācāya vācāya pācittiyassa. [204] Upasampanno upasampannaṃ khuṃsetukāmo vambhetukāmo maṅkukattukāmo ukkaṭṭhena ukkaṭṭhaṃ vadeti buddharakkhitaṃ dhammarakkhitaṃ saṅgharakkhitaṃ buddharakkhitosi dhammarakkhitosi saṅgharakkhitosīti bhaṇati āpatti vācāya vācāya pācittiyassa. [205] Upasampanno upasampannaṃ khuṃsetukāmo vambhetukāmo maṅkukattukāmo hīnena hīnaṃ vadeti kosiyaṃ bhāradvājaṃ kosiyosi bhāradvājosīti bhaṇati āpatti vācāya vācāya pācittiyassa. [206] Upasampanno upasampannaṃ khuṃsetukāmo vambhetukāmo maṅkukattukāmo hīnena ukkaṭṭhaṃ vadeti gotamaṃ moggallānaṃ kaccāyanaṃ vāseṭṭhaṃ 1- kosiyosi bhāradvājosīti bhaṇati āpatti vācāya vācāya pācittiyassa. [207] Upasampanno upasampannaṃ khuṃsetukāmo vambhetukāmo maṅkukattukāmo ukkaṭṭhena hīnaṃ vadeti kosiyaṃ bhāradvājaṃ gotamosi moggallānosi kaccāyanosi vāseṭṭhosīti bhaṇati āpatti vācāya vācāya pācittiyassa. [208] Upasampanno upasampannaṃ khuṃsetukāmo vambhetukāmo maṅkukattukāmo ukkaṭṭhena ukkaṭṭhaṃ vadeti gotamaṃ moggallānaṃ kaccāyanaṃ vāseṭṭhaṃ gotamosi moggallānosi kaccāyanosi vāseṭṭhosīti bhaṇati āpatti vācāya vācāya pācittiyassa. [209] Upasampanno upasampannaṃ khuṃsetukāmo vambhetukāmo maṅkukattukāmo hīnena hīnaṃ vadeti koṭṭhakaṃ pupphachaḍḍakaṃ koṭṭhakosi pupphachaḍḍakosīti bhaṇati āpatti vācāya vācāya pācittiyassa. [210] Upasampanno upasampannaṃ khuṃsetukāmo vambhetukāmo maṅkukattukāmo hīnena ukkaṭṭhaṃ vadeti kasakaṃ vāṇijaṃ gorakkhaṃ koṭṭhakosi pupphachaḍḍakosīti bhaṇati āpatti vācāya vācāya pācittiyassa. [211] Upasampanno upasampannaṃ khuṃsetukāmo vambhetukāmo @Footnote: 1 Ma. kaccānaṃ vāsiṭṭhaṃ. evamuparipi. Maṅkukattukāmo ukkaṭṭhena hīnaṃ vadeti koṭṭhakaṃ pupphachaḍḍakaṃ kasakosi vāṇijosi gorakkhosīti bhaṇati āpatti vācāya vācāya pācittiyassa. [212] Upasampanno upasampannaṃ khuṃsetukāmo vambhetukāmo maṅkukattukāmo ukkaṭṭhena ukkaṭṭhaṃ vadeti kasakaṃ vāṇijaṃ gorakkhaṃ kasakosi vāṇijosi gorakkhosīti bhaṇati āpatti vācāya vācāya pācittiyassa. [213] Upasampanno upasampannaṃ khuṃsetukāmo vambhetukāmo maṅkukattukāmo hīnena hīnaṃ vadeti naḷakāraṃ kumbhakāraṃ pesakāraṃ cammakāraṃ nahāpitaṃ naḷakārosi kumbhakārosi pesakārosi cammakārosi nahāpitosīti bhaṇati āpatti vācāya vācāya pācittiyassa. [214] Upasampanno upasampannaṃ khuṃsetukāmo vambhetukāmo maṅkukattukāmo hīnena ukkaṭṭhaṃ vadeti muddhikaṃ 1- gaṇakaṃ lekhakaṃ naḷakārosi kumbhakārosi pesakārosi cammakārosi nahāpitosīti bhaṇati āpatti vācāya vācāya pācittiyassa. [215] Upasampanno upasampannaṃ khuṃsetukāmo vambhetukāmo maṅkukattukāmo ukkaṭṭhena hīnaṃ vadeti naḷakāraṃ kumbhakāraṃ pesakāraṃ cammakāraṃ nahāpitaṃ muddhikosi gaṇakosi lekhakosīti bhaṇati āpatti vācāya vācāya pācittiyassa. [216] Upasampanno upasampannaṃ khuṃsetukāmo vambhetukāmo @Footnote: 1 Ma. muddikaṃ. evamuparipi. Maṅkukattukāmo ukkaṭṭhena ukkaṭṭhaṃ vadeti muddhikaṃ gaṇakaṃ lekhakaṃ muddhikosi gaṇakosi lekhakosīti bhaṇati āpatti vācāya vācāya pācittiyassa. [217] Upasampanno upasampannaṃ khuṃsetukāmo vambhetukāmo maṅkukattukāmo hīnena hīnaṃ vadeti kuṭṭhikaṃ gaṇḍikaṃ kilāsikaṃ sosikaṃ apamārikaṃ kuṭṭhikosi gaṇḍikosi kilāsikosi sosikosi apamārikosīti bhaṇati āpatti vācāya vācāya pācittiyassa. [218] Upasampanno upasampannaṃ khuṃsetukāmo vambhetukāmo maṅkukattukāmo hīnena ukkaṭṭhaṃ vadeti madhumehikaṃ kuṭṭhikosi gaṇḍikosi kilāsikosi sosikosi apamārikosīti bhaṇati āpatti vācāya vācāya pācittiyassa. [219] Upasampanno upasampannaṃ khuṃsetukāmo vambhetukāmo maṅkukattukāmo ukkaṭṭhena hīnaṃ vadeti kuṭṭhikaṃ gaṇḍikaṃ kilāsikaṃ sosikaṃ apamārikaṃ madhumehikosīti bhaṇati āpatti vācāya vācāya pācittiyassa. [220] Upasampanno upasampannaṃ khuṃsetukāmo vambhetukāmo maṅkukattukāmo ukkaṭṭhena ukkaṭṭhaṃ vadeti madhumehikaṃ madhumehikosīti bhaṇati āpatti vācāya vācāya pācittiyassa. [221] Upasampanno upasampannaṃ khuṃsetukāmo vambhetukāmo maṅkukattukāmo hīnena hīnaṃ vadeti atidīghaṃ atirassaṃ atikaṇhaṃ Accodātaṃ atidīghosi atirassosi atikaṇhosi accodātosīti bhaṇati āpatti vācāya vācāya pācittiyassa. [222] Upasampanno upasampannaṃ khuṃsetukāmo vambhetukāmo maṅkukattukāmo hīnena ukkaṭṭhaṃ vadeti nātidīghaṃ nātirassaṃ nātikaṇhaṃ nāccodātaṃ atidīghosi atirassosi atikaṇhosi accodātosīti bhaṇati āpatti vācāya vācāya pācittiyassa. [223] Upasampanno upasampannaṃ khuṃsetukāmo vambhetukāmo maṅkukattukāmo ukkaṭṭhena hīnaṃ vadeti atidīghaṃ atirassaṃ atikaṇhaṃ accodātaṃ nātidīghosi nātirassosi nātikaṇhosi nāccodātosīti bhaṇati āpatti vācāya vācāya pācittiyassa. [224] Upasampanno upasampannaṃ khuṃsetukāmo vambhetukāmo maṅkukattukāmo ukkaṭṭhena ukkaṭṭhaṃ vadeti nātidīghaṃ nātirassaṃ nātikaṇhaṃ nāccodātaṃ nātidīghosi nātirassosi nātikaṇhosi nāccodātosīti bhaṇati āpatti vācāya vācāya pācittiyassa. [225] Upasampanno upasampannaṃ khuṃsetukāmo vambhetukāmo maṅkukattukāmo hīnena hīnaṃ vadeti rāgapariyuṭṭhitaṃ dosapariyuṭṭhitaṃ mohapariyuṭṭhitaṃ rāgapariyuṭṭhitosi dosapariyuṭṭhitosi mohapariyuṭṭhitosīti bhaṇati āpatti vācāya vācāya pācittiyassa. [226] Upasampanno upasampannaṃ khuṃsetukāmo vambhetukāmo maṅkukattukāmo hīnena ukkaṭṭhaṃ vadeti vītarāgaṃ vītadosaṃ vītamohaṃ Rāgapariyuṭṭhitosi dosapariyuṭṭhitosi mohapariyuṭṭhitosīti bhaṇati āpatti vācāya vācāya pācittiyassa. [227] Upasampanno upasampannaṃ khuṃsetukāmo vambhetukāmo maṅkukattukāmo ukkaṭṭhena hīnaṃ vadeti rāgapariyuṭṭhitaṃ dosapariyuṭṭhitaṃ mohapariyuṭṭhitaṃ vītarāgosi vītadososi vītamohosīti bhaṇati āpatti vācāya vācāya pācittiyassa. [228] Upasampanno upasampannaṃ khuṃsetukāmo vambhetukāmo maṅkukattukāmo ukkaṭṭhena ukkaṭṭhaṃ vadeti vītarāgaṃ vītadosaṃ vītamohaṃ vītarāgosi vītadososi vītamohosīti bhaṇati āpatti vācāya vācāya pācittiyassa. [229] Upasampanno upasampannaṃ khuṃsetukāmo vambhetukāmo maṅkukattukāmo hīnena hīnaṃ vadeti pārājikaṃ ajjhāpannaṃ saṅghādisesaṃ ajjhāpannaṃ thullaccayaṃ ajjhāpannaṃ pācittiyaṃ ajjhāpannaṃ pāṭidesanīyaṃ ajjhāpannaṃ dukkaṭaṃ ajjhāpannaṃ dubbhāsitaṃ ajjhāpannaṃ pārājikaṃ ajjhāpannosi saṅghādisesaṃ ajjhāpannosi thullaccayaṃ ajjhāpannosi pācittiyaṃ ajjhāpannosi pāṭidesanīyaṃ ajjhāpannosi dukkaṭaṃ ajjhāpannosi dubbhāsitaṃ ajjhāpannosīti bhaṇati āpatti vācāya vācāya pācittiyassa. [230] Upasampanno upasampannaṃ khuṃsetukāmo vambhetukāmo maṅkukattukāmo hīnena ukkaṭṭhaṃ vadeti sotāpannaṃ pārājikaṃ Ajjhāpannosi .pe. dubbhāsitaṃ ajjhāpannosīti bhaṇati āpatti vācāya vācāya pācittiyassa. [231] Upasampanno upasampannaṃ khuṃsetukāmo vambhetukāmo maṅkukattukāmo ukkaṭṭhena hīnaṃ vadeti pārājikaṃ ajjhāpannaṃ .pe. Dubbhāsitaṃ ajjhāpannaṃ sotāpannosīti bhaṇati āpatti vācāya vācāya pācittiyassa. [232] Upasampanno upasampannaṃ khuṃsetukāmo vambhetukāmo maṅkukattukāmo ukkaṭṭhena ukkaṭṭhaṃ vadeti sotāpannaṃ sotāpannosīti bhaṇati āpatti vācāya vācāya pācittiyassa. [233] Upasampanno upasampannaṃ khuṃsetukāmo vambhetukāmo maṅkukattukāmo hīnena hīnaṃ vadeti oṭṭhaṃ meṇḍaṃ goṇaṃ gadrabhaṃ tiracchānagataṃ nerayikaṃ oṭṭhosi meṇḍosi goṇosi gadrabhosi tiracchānagatosi nerayikosi natthi tuyhaṃ sugati duggatiyeva tuyhaṃ pāṭikaṅkhāti bhaṇati āpatti vācāya vācāya pācittiyassa. [234] Upasampanno upasampannaṃ khuṃsetukāmo vambhetukāmo maṅkukattukāmo hīnena ukkaṭṭhaṃ vadeti paṇḍitaṃ byattaṃ medhāviṃ bahussutaṃ dhammakathikaṃ oṭṭhosi meṇḍosi goṇosi gadrabhosi tiracchānagatosi nerayikosi natthi tuyhaṃ sugati duggatiyeva tuyhaṃ pāṭikaṅkhāti bhaṇati āpatti vācāya vācāya pācittiyassa. [235] Upasampanno upasampannaṃ khuṃsetukāmo vambhetukāmo Maṅkukattukāmo ukkaṭṭhena hīnaṃ vadeti oṭṭhaṃ meṇḍaṃ goṇaṃ gadrabhaṃ tiracchānagataṃ nerayikaṃ paṇḍitosi byattosi medhāvīsi bahussutosi dhammakathikosi natthi tuyhaṃ duggati sugatiyeva tuyhaṃ pāṭikaṅkhāti bhaṇati āpatti vācāya vācāya pācittiyassa. [236] Upasampanno upasampannaṃ khuṃsetukāmo vambhetukāmo maṅkukattukāmo ukkaṭṭhena ukkaṭṭhaṃ vadeti paṇḍitaṃ byattaṃ medhādhiṃ bahussutaṃ dhammakathikaṃ paṇḍitosi byattosi medhāvīsi bahussutosi dhammakathikosi natthi tuyhaṃ duggati sugatiyeva tuyhaṃ pāṭikaṅkhāti bhaṇati āpatti vācāya vācāya pācittiyassa. [237] Upasampanno upasampannaṃ khuṃsetukāmo vambhetukāmo maṅkukattukāmo evaṃ vadeti santi idhekacce caṇḍālā veṇā nesādā rathakārā pukkusāti bhaṇati āpatti vācāya vācāya dukkaṭassa. [238] Upasampanno upasampannaṃ khuṃsetukāmo vambhetukāmo maṅkukattukāmo evaṃ vadeti santi idhekacce khattiyā brāhmaṇāti bhaṇati āpatti vācāya vācāya dukkaṭassa. [239] Upasampanno upasampannaṃ khuṃsetukāmo vambhetukāmo maṅkukattukāmo evaṃ vadeti santi idhekacce avakaṇṇakā javakaṇṇakā dhaniṭṭhakā saviṭṭhakā kulavaḍḍhakāti bhaṇati āpatti vācāya vācāya dukkaṭassa .pe. santi idhekacce buddharakkhitā Dhammarakkhitā saṅgharakkhitāti bhaṇati āpatti vācāya vācāya dukkaṭassa .pe. santi idhekacce kosiyā bhāradvājāti bhaṇati .pe. santi idhekacce gotamā moggallānā kaccāyanā vāseṭṭhāti bhaṇati .pe. santi idhekacce koṭṭhakā pupphachaḍḍakāti bhaṇati .pe. Santi idhekacce kasakā vāṇijā gorakkhāti bhaṇati .pe. santi idhekacce naḷakārā kumbhakārā pesakārā cammakārā nahāpitāti .pe. santi idhekacce muddhikā gaṇakā lekhakāti bhaṇati .pe. Santi idhekacce kuṭṭhikā gaṇḍikā kilāsikā sosikā apamārikāti bhaṇati .pe. santi idhekacce madhumehikāti bhaṇati .pe. santi idhekacce atidīghā atirassā atikaṇhā accodātāti bhaṇati .pe. Santi idhekacce nātidīghā nātirassā nātikaṇhā nāccodātāti bhaṇati .pe. santi idhekacce rāgapariyuṭṭhitā dosapariyuṭṭhitā mohapariyuṭṭhitāti bhaṇati .pe. santi idhekacce vītarāgā vītadosā vītamohāti bhaṇati .pe. santi idhekacce pārājikaṃ ajjhāpannā .pe. dubbhāsitaṃ ajjhāpannāti bhaṇati .pe. santi idhekacce sotāpannāti bhaṇati .pe. santi idhekacce oṭṭhā meṇḍā goṇā gadrabhā tiracchānagatā nerayikā natthi tesaṃ sugati duggatiyeva tesaṃ pāṭikaṅkhāti bhaṇati āpatti vācāya vācāya dukkaṭassa. [240] Upasampanno upasampannaṃ khuṃsetukāmo vambhetukāmo Maṅkukattukāmo evaṃ vadeti santi idhekacce paṇḍitā byattā medhāvino bahussutā dhammakathikā natthi tesaṃ duggati sugatiyeva tesaṃ pāṭikaṅkhāti bhaṇati āpatti vācāya vācāya dukkaṭassa. [241] Upasampanno upasampannaṃ khuṃsetukāmo vambhetukāmo maṅkukattukāmo evaṃ vadeti ye nūna caṇḍālā veṇā nesādā rathakārā pukkusāti bhaṇati āpatti vācāya vācāya dukkaṭassa .pe. Upasampanno upasampannaṃ khuṃsetukāmo vambhetukāmo maṅkukattukāmo evaṃ vadeti ye nūna paṇḍitā byattā medhāvino bahussutā dhammakathikā natthi tesaṃ duggati sugatiyeva tesaṃ pāṭikaṅkhāti bhaṇati āpatti vācāya vācāya dukkaṭassa. [242] Upasampanno upasampannaṃ khuṃsetukāmo vambhetukāmo maṅkukattukāmo evaṃ vadeti na mayaṃ caṇḍālā veṇā nesādā rathakārā pukkusāti bhaṇati .pe. na mayaṃ paṇḍitā byattā medhāvino bahussutā dhammakathikā natthi amhākaṃ duggati sugatiyeva amhākaṃ pāṭikaṅkhāti bhaṇati āpatti vācāya vācāya dukkaṭassa.The Pali Tipitaka in Roman Character Volume 2 page 162-177. http://84000.org/tipitaka/pali/roman_item_s.php?book=2&item=182&items=61 Classified by [Item Number] :- http://84000.org/tipitaka/pali/roman_item_s.php?book=2&item=182&items=61&mode=bracket Compare with The Pali Tipitaka in Thai Character :- http://84000.org/tipitaka/read/pali_item_s.php?book=2&item=182&items=61 Compare with The Royal Version of Thai Tipitaka :- http://84000.org/tipitaka/read/byitem_s.php?book=2&item=182&items=61 Study Atthakatha :- http://84000.org/tipitaka/attha/attha.php?b=2&i=182 The Pali Atthakatha in Thai :- http://84000.org/tipitaka/atthapali/read_th.php?B=2&A=6032 The Pali Atthakatha in Roman :- http://84000.org/tipitaka/atthapali/read_rm.php?B=2&A=6032 Contents of The Tipitaka Volume 2 http://84000.org/tipitaka/read/?index_2
|
บันทึก ๑๔ พฤศจิกายน พ.ศ. ๒๕๖๐. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน. หากพบข้อผิดพลาด กรุณาแจ้งได้ที่ [email protected]