บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ |
TIPITAKA Volume 21 : PALI ROMAN Sutta Pitaka Vol 13 : Sutta. Aṅ. (2): catukkanipāto
Bhayavaggo tatiyo [121] Cattārīmāni bhikkhave bhayāni katamāni cattāri attānuvāda- bhayaṃ parānuvādabhayaṃ daṇḍabhayaṃ duggatibhayaṃ . katamañca bhikkhave attānuvādabhayaṃ idha bhikkhave ekacco iti paṭisañcikkhati ahañceva Kho pana kāyena duccaritaṃ careyyaṃ vācāya duccaritaṃ careyyaṃ manasā duccaritaṃ careyyaṃ kiñca 1- maṃ attā sīlato na upavadeyyāti so attānuvādabhayassa bhīto kāyaduccaritaṃ pahāya kāyasucaritaṃ bhāveti vacīduccaritaṃ pahāya vacīsucaritaṃ bhāveti manoduccaritaṃ pahāya manosucaritaṃ bhāveti suddhaṃ attānaṃ pariharati idaṃ vuccati bhikkhave attānuvādabhayaṃ. {121.1} Katamañca bhikkhave parānuvādabhayaṃ idha bhikkhave ekacco iti paṭisañcikkhati ahañceva kho pana kāyena duccaritaṃ careyyaṃ vācāya duccaritaṃ careyyaṃ manasā duccaritaṃ careyyaṃ kiñca maṃ pare sīlato na upavadeyyunti so parānuvādabhayassa bhīto kāyaduccaritaṃ pahāya kāyasucaritaṃ bhāveti vacīduccaritaṃ pahāya vacīsucaritaṃ bhāveti manoduccaritaṃ pahāya manosucaritaṃ bhāveti suddhaṃ attānaṃ pariharati idaṃ vuccati bhikkhave parānuvādabhayaṃ. {121.2} Katamañca bhikkhave daṇḍabhayaṃ idha bhikkhave ekacco passati coraṃ āgucāriṃ rājāno gahetvā vividhā kammakāraṇā karonte kasāhipi tāḷente vettehipi tāḷente aḍḍhadaṇḍakehipi tāḷente hatthampi chindante pādampi chindante hatthapādampi chindante kaṇṇampi chindante nāsampi chindante kaṇṇanāsampi chindante bilaṅgathālikampi karonte saṅkhamuṇḍikampi karonte rāhumukhampi karonte jotimālikampi karonte hatthappajjotikampi karonte erakavaṭṭikampi karonte cirakavāsikampi karonte eṇeyyakampi karonte balisamaṃsikampi karonte kahāpaṇakampi karonte @Footnote: 1 Po. kinti maṃ. Ma. kiñca taṃ yaṃ maṃ. Yu. kiñca taṃ kammaṃ. Khārāpaṭicchakampi 1- karonte palighaparivattakampi karonte palālapiṭhakampi karonte tattenapi telena osiñcante sunakhehipi khādāpente jīvantampi sūle uttāsente asināpi sīsaṃ chindante tassa evaṃ hoti yathārūpānaṃ kho pāpakānaṃ kammānaṃ hetu coraṃ āgucāriṃ rājāno gahetvā vividhā kammakāraṇā karonti kasāhipi tāḷenti .pe. asināpi sīsaṃ chindanti ahañceva kho pana evarūpaṃ pāpakammaṃ kareyyaṃ mampi rājāno gahetvā evarūpā vividhā kammakāraṇā kareyyuṃ kasāhipi tāḷeyyuṃ .pe. asināpi sīsaṃ chindeyyunti so daṇḍabhayassa bhīto na paresaṃ pābhaṭaṃ palumpanto 2- carati idaṃ vuccati bhikkhave daṇḍabhayaṃ. {121.3} Katamañca bhikkhave duggatibhayaṃ idha bhikkhave ekacco iti paṭisañcikkhati kāyaduccaritassa kho pāpako vipāko abhisamparāyaṃ vacīduccaritassa pāpako vipāko abhisamparāyaṃ manoduccaritassa pāpako vipāko abhisamparāyaṃ ahañceva kho pana kāyena duccaritaṃ careyyaṃ vācāya duccaritaṃ careyyaṃ manasā duccaritaṃ careyyaṃ kiñca taṃ yenāhaṃ kāyassa bhedā parammaraṇā apāyaṃ duggatiṃ vinipātaṃ nirayaṃ upapajjeyyanti so duggatibhayassa bhīto kāyaduccaritaṃ pahāya kāyasucaritaṃ bhāveti vacīduccaritaṃ pahāya vacīsucaritaṃ bhāveti manoduccaritaṃ pahāya manosucaritaṃ bhāveti suddhaṃ attānaṃ pariharati idaṃ vuccati bhikkhave duggatibhayaṃ . Imāni kho bhikkhave cattāri bhayānīti. [122] Cattārīmāni bhikkhave bhayāni udakorohantassa 3- pāṭikaṅkhitabbāni @Footnote: 1 Ma. Yu. khārāpaṭacchikampi. 2 Po. vilumpanto. 3 udakorohantepi. Katamāni cattāri ūmibhayaṃ kumbhīlabhayaṃ āvaṭṭabhayaṃ susukābhayaṃ imāni kho bhikkhave cattāri bhayāni udakorohantassa pāṭikaṅkhitabbāni . Evameva kho bhikkhave cattārīmāni bhayāni idhekaccassa 1- kulaputtassa imasmiṃ dhammavinaye saddhā agārasmā anagāriyaṃ pabbajito pāṭikaṅkhitabbāni katamāni cattāri ūmibhayaṃ kumbhīlabhayaṃ āvaṭṭabhayaṃ susukābhayaṃ. {122.1} Katamañca bhikkhave ūmibhayaṃ idha bhikkhave ekacco kulaputto saddhā agārasmā anagāriyaṃ pabbajito hoti otiṇṇomhi jātiyā jarāmaraṇena sokehi paridevehi dukkhehi domanassehi upāyāsehi dukkhotiṇṇo dukkhapareto appevanāma imassa kevalassa dukkhakkhandhassa antakiriyā paññāyethāti tamenaṃ tathāpabbajitaṃ samānaṃ sabrahmacārī ovadanti anusāsanti evante abhikkamitabbaṃ evante paṭikkamitabbaṃ evante āloketabbaṃ evante viloketabbaṃ evante sammiñjitabbaṃ evante pasāretabbaṃ evante saṅghāṭipattacīvaraṃ dhāretabbanti tassa evaṃ hoti mayaṃ kho pubbe agāriyabhūtā samānā aññe ovadāmapi anusāsāmapi ime pana amhākaṃ puttamattā maññe nattamattā maññe ovaditabbaṃ anusāsitabbaṃ maññantīti so kupito anattamano sikkhaṃ paccakkhāya hīnāyāvattati ayaṃ vuccati bhikkhave bhikkhu ūmibhayassa bhīto sikkhaṃ paccakkhāya hīnāyāvatto ūmibhayanti kho bhikkhave kodhūpāyāsassetaṃ adhivacanaṃ idaṃ vuccati bhikkhave ūmibhayaṃ. {122.2} Katamañca bhikkhave kumbhīlabhayaṃ idha bhikkhave ekacco kulaputto saddhā agārasmā anagāriyaṃ pabbajito hoti @Footnote: 1 idhekacce puggale ... pabbajitetipi. Otiṇṇomhi jātiyā jarāmaraṇena sokehi paridevehi dukkhehi domanassehi upāyāsehi dukkhotiṇṇo dukkhapareto appevanāma imassa kevalassa dukkhakkhandhassa antakiriyā paññāyethāti tamenaṃ tathāpabbajitaṃ samānaṃ sabrahmacārī ovadanti anusāsanti idante khāditabbaṃ idante na khāditabbaṃ idante bhuñjitabbaṃ idante na bhuñjitabbaṃ idante sāyitabbaṃ idante na sāyitabbaṃ idante pātabbaṃ idante na pātabbaṃ kappiyante khāditabbaṃ akappiyante na khāditabbaṃ kappiyante bhuñjitabbaṃ akappiyante na bhuñjitabbaṃ kappiyante sāyitabbaṃ akappiyante na sāyitabbaṃ kappiyante pātabbaṃ akappiyante na pātabbaṃ kāle te khāditabbaṃ vikāle te na khāditabbaṃ kāle te bhuñjitabbaṃ vikāle te na bhuñjitabbaṃ kāle te sāyitabbaṃ vikāle te na sāyitabbaṃ kāle te pātabbaṃ vikāle te na pātabbanti {122.3} tassa evaṃ hoti mayaṃ kho pubbe agāriyabhūtā samānā yaṃ icchāma taṃ khādāma yaṃ na icchāma na taṃ khādāma yaṃ icchāma taṃ bhuñjāma yaṃ na icchāma na taṃ bhuñjāma yaṃ icchāma taṃ sāyāma yaṃ na icchāma na taṃ sāyāma yaṃ icchāma taṃ pivāma 1- yaṃ na icchāma na taṃ pivāma 2- kappiyaṃpi khādāma akappiyaṃpi khādāma kappiyaṃpi bhuñjāma akappiyaṃpi bhuñjāma kappiyaṃpi sāyāma akappiyaṃpi sāyāma kappiyaṃpi pivāma akappiyaṃpi pivāma kālepi khādāma vikālepi khādāma kālepi bhuñjāma vikālepi bhuñjāma kālepi @Footnote: 1-2 Yu. pipāma. ito paraṃ īdisameva. Sāyāma vikālepi sāyāma kālepi pivāma vikālepi pivāma yaṃpi no saddhā gahapatikā divā vikāle paṇītaṃ khādanīyaṃ vā bhojanīyaṃ vā denti tatrāpīme mukhāvaraṇaṃ maññe karontīti so kupito 1- anattamano 1- sikkhaṃ paccakkhāya hīnāyāvattati ayaṃ vuccati bhikkhave bhikkhu kumbhīlabhayassa bhīto sikkhaṃ paccakkhāya hīnāyāvatto kumbhīlabhayanti kho bhikkhave odarikattassetaṃ adhivacanaṃ idaṃ vuccati bhikkhave kumbhīlabhayaṃ. {122.4} Katamañca bhikkhave āvaṭṭabhayaṃ idha bhikkhave ekacco kulaputto saddhā agārasmā anagāriyaṃ pabbajito hoti otiṇṇomhi jātiyā jarāmaraṇena sokehi paridevehi dukkhehi domanassehi upāyāsehi dukkhotiṇṇo dukkhapareto appevanāma imassa kevalassa dukkhakkhandhassa antakiriyā paññāyethāti so evaṃ pabbajito samāno pubbaṇhasamayaṃ nivāsetvā pattacīvaramādāya gāmaṃ vā nigamaṃ vā piṇḍāya pāvisi 2- arakkhiteneva kāyena arakkhitāya vācāya arakkhitena cittena anupaṭṭhitāya satiyā asaṃvutehi indriyehi so tattha passati gahapatiṃ vā gahapatiputtaṃ vā pañcahi kāmaguṇehi samappitaṃ samaṅgibhūtaṃ paricārayamānaṃ tassa evaṃ hoti mayaṃ kho pubbe agāriyabhūtā samānā pañcahi kāmaguṇehi samappitā samaṅgibhūtā paricārayimhā saṃvijjante kho pana me kule bhogā sakkā bhoge ca bhuñjituṃ puññāni ca kātuṃ yannūnāhaṃ sikkhaṃ paccakkhāya hīnāyāvattitvā bhoge ca bhuñjeyyaṃ puññāni ca @Footnote: 1 Yu. ime pāṭhā natthi. 2 Ma. Yu. pavisati. Kareyyanti so sikkhaṃ paccakkhāya hīnāyāvattati ayaṃ vuccati bhikkhave bhikkhu āvaṭṭabhayassa bhīto sikkhaṃ paccakkhāya hīnāyāvatto āvaṭṭabhayanti kho bhikkhave pañcannaṃ kāmaguṇānaṃ adhivacanaṃ idaṃ vuccati bhikkhave āvaṭṭabhayaṃ. {122.5} Katamañca bhikkhave susukābhayaṃ idha bhikkhave ekacco kulaputto saddhā agārasmā anagāriyaṃ pabbajito hoti otiṇṇomhi jātiyā jarāmaraṇena sokehi paridevehi dukkhehi domanassehi upāyāsehi dukkhotiṇṇo dukkhapareto appevanāma imassa kevalassa dukkhakkhandhassa antakiriyā paññāyethāti so evaṃ pabbajito samāno pubbaṇhasamayaṃ nivāsetvā pattacīvaramādāya gāmaṃ vā nigamaṃ vā piṇḍāya pāvisi 1- arakkhiteneva kāyena arakkhitāya vācāya arakkhitena cittena anupaṭṭhitāya satiyā asaṃvutehi indriyehi so tattha passati mātugāmaṃ dunnivatthaṃ vā duppārutaṃ vā tassa mātugāmaṃ disvā dunnivatthaṃ vā duppārutaṃ vā rāgo cittaṃ anuddhaṃseti so rāgānuddhaṃsena cittena sikkhaṃ paccakkhāya hīnāyāvattati ayaṃ vuccati bhikkhave bhikkhu susukābhayassa bhīto sikkhaṃ paccakkhāya hīnāyāvatto susukābhayanti kho bhikkhave mātugāmassetaṃ adhivacanaṃ idaṃ vuccati bhikkhave susukābhayaṃ . imāni kho bhikkhave cattāri bhayāni idhekaccassa kulaputtassa imasmiṃ dhammavinaye saddhā agārasmā anagāriyaṃ pabbajito pāṭikaṅkhitabbānīti.The Pali Tipitaka in Roman Character Volume 21 page 162-168. http://84000.org/tipitaka/pali/roman_item_s.php?book=21&item=121&items=2 Classified by [Item Number] :- http://84000.org/tipitaka/pali/roman_item_s.php?book=21&item=121&items=2&mode=bracket Compare with The Pali Tipitaka in Thai Character :- http://84000.org/tipitaka/read/pali_item_s.php?book=21&item=121&items=2 Compare with The Royal Version of Thai Tipitaka :- http://84000.org/tipitaka/read/byitem_s.php?book=21&item=121&items=2 Study Atthakatha :- http://84000.org/tipitaka/attha/attha.php?b=21&i=121 The Pali Atthakatha in Thai :- http://84000.org/tipitaka/atthapali/read_th.php?B=15&A=8605 The Pali Atthakatha in Roman :- http://84000.org/tipitaka/atthapali/read_rm.php?B=15&A=8605 Contents of The Tipitaka Volume 21 http://84000.org/tipitaka/read/?index_21
|
บันทึก ๑๔ พฤศจิกายน พ.ศ. ๒๕๖๐. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน. หากพบข้อผิดพลาด กรุณาแจ้งได้ที่ [email protected]