10 Vessantarajātakaṃ
[1045] Phussatī 1- varavaṇṇābhe varassu dasadhā vare
paṭhabyā cārupubbaṅgī yaṃ tuyhaṃ manaso piyaṃ.
[1046] Devarāja namo tyatthu kiṃ pāpaṃ pakataṃ mayā
rammā cāvesi maṃ ṭhānā vātova dharaṇīruhaṃ.
[1047] |1047.1| Na ceva te kataṃ pāpaṃ na ca me tvamasi appiyā
puññañca te parikkhīṇaṃ yena tevaṃ vadāmihaṃ 2-.
|1047.2| Santike maraṇaṃ tuyhaṃ vinābhāvo bhavissati
paṭiggaṇhāhi me ete vare dasa pavecchato.
[1048] |1048.1| Varañce me ado sakka sabbabhūtānamissara
sivirājassa bhaddante tattha assaṃ nivesane.
|1048.2| Nīlanettā nīlabhamū nīlakkhīva 3- yathā migī
phussatī nāma nāmena tattha assaṃ 4- purindada.
|1048.3| Puttaṃ labhetha varadaṃ yācayogaṃ amacchariṃ
pūjitaṃ paṭirājūbhi kittimantaṃ yasassinaṃ.
|1048.4| Gabbhaṃ me dhārayantiyā majjhimaṅgaṃ anuṇṇataṃ
kucchi anuṇṇato assa cāpaṃva likhitaṃ samaṃ.
|1048.5| Thanā me nappavatteyyuṃ palitā nassantu 5- vāsava
kāye rajo na limpetha vajjhañcāpi pamocaye.
|1048.6| Mayūrakoñcābhirude nārīvaragaṇāyute
@Footnote: 1 Sī. Yu. phsati. ito paraṃ īdisameva . 2 Ma. vadāmahaṃ . 3 Ma. nilakkhī ca.
@4 Ma. tatthapassaṃ . 5 Ma. na santu.
Khujjacelāvakākiṇṇe 1- sūdamāgadhavaṇṇite
|1048.7| citraggaḷerughusite surāmaṃsappabodhane
sivirājassa bhaddante tatthassaṃ mahesī piyā.
[1049] Ye te dasa varā dinnā mayā sabbaṅgasobhane
sivirājassa vijite sabbe te lacchasī vare.
[1050] Idaṃ vatvāna maghavā devarājā sujampati
phussatiyā varaṃ datvā anumodittha vāsavo.
Dasavaragāthā nāma.
[1051] |1051.1| Tato 2- cutā sā phussatī khattiye upapajjatha
jetuttaramhi nagare sañjayena samāgami.
|1051.2| Dasa māse dhārayitvā karontī pura padakkhiṇaṃ
vessānaṃ vīthiyā majjhe janesi phussatī mamaṃ.
|1051.3| Na mayhaṃ mattikaṃ nāmaṃ napi petikasambhavaṃ
jātomhi vessavīthiyā tasmā vessantaro ahuṃ.
|1051.4| Yadāhaṃ dārako homi jātiyā aṭṭhavassiko
tadā nisajja pāsāde dānaṃ dātuṃ vicintayiṃ
hadayaṃ dadeyyaṃ cakkhuṃ maṃsampi rudhirampica
dadeyyaṃ kāyaṃ sāvetvā yadi koci yācako mamaṃ.
@Footnote: 1 Ma. khujjacelāpakākiṇṇe . 2 imā cha gāthāyo sīhaḷapotthakeyeva dissanti
@na aññesu.
|1051.5| Sabhāvaṃ cintayantassa akampitamasaṇṭhitaṃ
akampi tattha paṭhavī sineruvanavaṭaṃsakā.
[1052] Paruḷhakacchanakhalomā paṅkadantā rajassirā
paggayha dakkhiṇaṃ bāhuṃ kiṃ maṃ yācanti brāhmaṇā.
[1053] Ratanaṃ deva yācāma sivīnaṃ raṭṭhavaḍḍhanaṃ
dadāhi pavaraṃ nāgaṃ īsādantaṃ uruḷhavaṃ.
[1054] Dadāmi na vikampāmi yaṃ maṃ yācanti brāhmaṇā
pabhinnaṃ kuñjaraṃ dantiṃ opaguyhaṃ 1- gajuttamaṃ.
[1055] Hatthikkhandhato oruyha rājā cāgādhimānaso
brāhmaṇānaṃ adā dānaṃ sivīnaṃ raṭṭhavaḍḍhano.
[1056] |1056.1| Tadāsi yaṃ bhiṃsanakaṃ tadāsi lomahaṃsanaṃ
hatthināge padinnamhi medanī samakampatha.
|1056.2| Tadāsi yaṃ bhiṃsanakaṃ tadāsi lomahaṃsanaṃ
hatthināge padinnamhi khubbhittha nagaraṃ tadā.
|1056.3| Samākulaṃ puraṃ āsi ghoso ca vipulo mahā
hatthināge padinnamhi sivīnaṃ raṭṭhavaḍḍhane.
[1057] Athettha 2- vattati saddo tumulo bheravo mahā
hatthināge padinnamhi khubbhittha nagaraṃ tadā.
Athettha vattati saddo tumulo bheravo mahā
@Footnote: 1 Ma. opavayhaṃ . 2 idaṃ gāthādvayaṃ Sī. potthakeyeva dissati.
Hatthināge padinnamhi sivīnaṃ raṭṭhavaḍḍhane.
[1058] |1058.1| Uggā ca rājaputtā ca vesiyānā ca brāhmaṇā
hatthārohā anīkaṭṭhā rathikā pattikārakā
|1058.2| kevalo cāpi nigamo siviyo cāpi 1- samāgatā
disvā nāgaṃ niyyamānaṃ te rañño paṭivedayuṃ.
|1058.3| Vidhamaṃ deva te raṭṭhaṃ putto vessantaro tava
kathaṃ no hatthinaṃ dajjā nāgaṃ raṭṭhassa pūjitaṃ.
|1058.4| Kathaṃ no kuñjaraṃ dajjā īsādantaṃ uruḷhavaṃ
khettaññuṃ sabbayuddhānaṃ sabbasetaṃ gajuttamaṃ.
|1058.5| Paṇḍukambalasañchannaṃ pabhinnaṃ sattumaddanaṃ
dantiṃ savālavījaniṃ setaṃ kelāsasādisaṃ.
|1058.6| Sasetacchattaṃ supattheyyaṃ 2- sāthabbanaṃ sahatthipaṃ
aggayānaṃ rājavāhiṃ brāhmaṇānaṃ adā dānaṃ 3-.
[1059] |1059.1| Annaṃ pānañca so 4- dajjā vatthasenāsanāni ca
etaṃ kho dānapaṭirūpaṃ etaṃ kho brāhmaṇārahaṃ.
|1059.2| Ayaṃ te vaṃsarājā no sivīnaṃ raṭṭhavaḍḍhano 5-
kathaṃ vessantaro putto gajaṃ bhājeti sañjaya.
|1059.3| Sace tvaṃ na karissasi sivīnaṃ vacanaṃ idaṃ
maññe taṃ saha puttena sivihatthe 6- karissare.
@Footnote: 1 Ma. sivayo ca . 2 Ma. saupādheyyaṃ . 3 Ma. gajaṃ. Sī. Yu. dhanaṃ . 4 Ma.
@yo . 5 Sī. raṭṭhavaḍḍhanaṃ. Yu. raṭṭhavaḍḍhana . 6 Ma. sivī hatthe.
[1060] |1060.1| Kāmaṃ janapado māsi raṭṭhañcāpi vinassatu
nāhaṃ sivīnaṃ vacanā rājaputtaṃ adūsakaṃ
pabbājeyyaṃ sakā raṭṭhā putto hi mama oraso.
|1060.2| Kāmaṃ janapado māsi raṭṭhañcāpi vinassatu
nāhaṃ sivīnaṃ vacanā rājaputtaṃ adūsakaṃ
pabbājeyyaṃ sakā raṭṭhā putto hi mama atrajo.
|1060.3| Na cāhaṃ tasmiṃ dubbheyyaṃ ariyasīlavato hi so
asilokopi me assa pāpañca pasave bahuṃ
kathaṃ vessantaraṃ puttaṃ satthena ghātayāmase.
[1061] Mā naṃ daṇḍena satthena na hi so bandhanāraho
pabbājehi ca naṃ raṭṭhā vaṅke vasatu pabbate.
[1062] |1062.1| Eso ce sivīnaṃ chando chandaṃ na panudāmase
imaṃ so vasatu rattiṃ kāme ca paribhuñjatu.
|1062.2| Tato ratyā vivasane suriyassuggamanaṃ pati 1-
samaggā siviyo 2- hutvā raṭṭhā pabbājayantu naṃ.
[1063] |1063.1| Uṭṭhehi katte taramāno gantvā vessantaraṃ vada
siviyo deva te kuddhā negamā ca samāgatā
uggā ca rājaputtā ca vesiyānā ca brāhmaṇā.
|1063.2| Hatthārohā anīkaṭṭhā rathikā pattikārakā
@Footnote: 1 Ma. sūriya---. ito paraṃ īdisameva 2 Ma. sabbattha sivayo.
Kevalo cāpi nigamo siviyo cāpi samāgatā.
|1063.3| Asmā ratyā vivasane suriyassuggamanaṃ pati
samaggā siviyo hutvā raṭṭhā pabbājayanti taṃ.
[1064] |1064.1| Sa kattā taramānova sivirājena pesito
āmuttahatthābharaṇo suvattho candanapphosito 1-
|1064.2| sīsaṃ nhāto udake so āmuttamaṇikuṇḍalo
upāgami puraṃ rammaṃ vessantaranivesanaṃ.
|1064.3| Tatthaddasa kumāraṃ so ramamānaṃ sake pure
parikiṇṇaṃ amaccehi tidasānaṃ va vāsavaṃ.
[1065] |1065.1| So tattha gantvā taramāno kattā vessantaraṃ bravi
dukkhante vedayissāmi mā me kujjha rathesabha.
|1065.2| Vanditvā rodamāno so kattā rājānamabravi
bhattā mesi mahārāja sabbakāmarasāharo
dukkhante vedayissāmi tattha assāsayantu maṃ.
|1065.3| Siviyo deva te kuddhā negamā ca samāgatā
uggā ca rājaputtā ca vesiyānā ca brāhmaṇā.
|1065.4| Hatthārohā anīkaṭṭhā rathikā pattikārakā
kevalo cāpi nigamo siviyo cāpi samāgatā.
|1065.5| Asmā ratyā vivasane suriyassuggamanaṃ pati
samaggā siviyo hutvā raṭṭhā pabbājayanti taṃ.
@Footnote: 1 Ma. candanabhūsito.
[1066] Kismiṃ me siviyo kuddhā yo na passāmi dukkaṭaṃ
taṃ me katte viyācikkha kasmā pabbājayanti maṃ.
[1067] Uggā ca rājaputtā ca vesiyānā ca brāhmaṇā
hatthārohā anīkaṭṭhā rathikā pattikārakā
nāgadānena khīyanti tasmā pabbājayanti taṃ.
[1068] |1068.1| Hadayaṃ cakkhumpahaṃ dajjaṃ kiṃ me bāhirakaṃ dhanaṃ
hiraññaṃ vā suvaṇṇaṃ vā muttā veḷuriyā maṇi
|1068.2| dakkhiṇaṃ vāmahaṃ 1- bāhuṃ disvā yācakamāgate
dadeyyaṃ na vikampeyyaṃ dāne me ramatī 2- mano.
|1068.3| Kāmaṃ maṃ siviyo sabbe pabbājentu hanantu vā
neva dānā viramissaṃ kāmaṃ chindantu sattadhā.
[1069] Evantaṃ siviyo āhu negamā ca samāgatā
kontimārāya tīrena girimārañjaraṃ pati
yena pabbājitā yanti tena gacchatu subbato.
[1070] Sohaṃ tena gamissāmi yena gacchanti dūsakā
rattindivaṃ me khamatha yāva dānaṃ dadāmihaṃ.
[1071] |1071.1| Āmantayittha rājā naṃ maddiṃ sabbaṅgasobhaniṃ
yaṃ te kiñci mayā dinnaṃ dhanaṃ dhaññañca vijjati
|1071.2| hiraññaṃ vā suvaṇṇaṃ vā muttā veḷuriyā bahū
sabbantaṃ nidaheyyāsi yañca te pettikaṃ dhanaṃ.
@Footnote: 1 Ma. vāpahaṃ . 2 Ma. ramate.
[1072] Tamabravi rājaputtī maddī sabbaṅgasobhanā
kuhiṃ deva nidahāmi taṃ me akkhāhi pucchito.
[1073] Sīlavantesu dajjesi dānaṃ maddi yathārahaṃ
na hi dānā paraṃ atthi patiṭṭhā sabbapāṇinaṃ.
[1074] |1074.1| Puttesu maddi dayesi sassuyā sassuramhi ca
yo ca taṃ bhattā maññeyya sakkaccantaṃ upaṭṭhahe.
|1074.2| No ce taṃ bhattā maññeyya mayā vippavasena te
aññaṃ bhattāraṃ pariyesa mā kilittha 1- mayā vinā.
[1075] Ahaṃ hi vanaṃ gacchāmi ghoraṃ vāḷamigāyutaṃ
saṃsayo jīvitaṃ mayhaṃ ekakassa brahāvane.
[1076] |1076.1| Tamabravi rājaputtī maddī sabbaṅgasobhanā
abhumme kathaṃ nu bhaṇasi pāpakaṃ vata bhāsasi.
|1076.2| Nesa dhammo mahārāja yaṃ tvaṃ gaccheyya ekako
ahaṃpi tena gacchāmi yena gacchasi khattiya.
|1076.3| Maraṇaṃ vā tayā saddhiṃ jīvitaṃ vā tayā vinā
tadeva maraṇaṃ seyyo yañce jīve tayā vinā.
|1076.4| Aggiṃ ujjālayitvāna ekajālasamāhitaṃ
tattheva maraṇaṃ 2- seyyo yañce jīve tayā vinā.
|1076.5| Yathā āraññakaṃ nāgaṃ dantiṃ anveti hatthinī
jessantaṃ giriduggesu samesu visamesu ca.
@Footnote: 1 Ma. kilittho . 2 Ma. tattha me maraṇaṃ seyyo.
|1076.6| Evantaṃ anugacchāmi putte ādāya pacchato
subharā te bhavissāmi na te hessāmi dubbharā.
[1077] |1077.1| Ime kumāre passanto mañjuke piyabhāṇine
āsīne vanagumbasmiṃ na rajjassa sarissasi.
|1077.2| Ime kumāre passanto mañjuke piyabhāṇine
kīḷante vanagumbasmiṃ na rajjassa sarissasi.
|1077.3| Ime kumāre passanto mañjuke piyabhāṇine
assame ramaṇīyamhi na rajjassa sarissasi.
|1077.4| Ime kumāre passanto mañjuke piyabhāṇine
kīḷante assame ramme na rajjassa sarissasi.
|1077.5| Ime kumāre passanto māladhārī alaṅkate
assame ramaṇīyamhi na rajjassa sarissasi.
|1077.6| Ime kumāre passanto māladhārī alaṅkate
kīḷante assame ramme na rajjassa sarissasi.
|1077.7| Yadā dakkhasi naccante kumāre māladhārine
assame ramaṇīyamhi na rajjassa sarissasi.
|1077.8| Yadā dakkhasi naccante kumāre māladhārine
kīḷante assame ramme na rajjassa sarissasi.
|1077.9| Yadā dakkhasi mātaṅgaṃ kuñjaraṃ saṭṭhihāyanaṃ
ekaṃ araññe vicarantaṃ 1- na rajjassa sarissasi.
@Footnote: 1 Ma. carantaṃ.
|1077.10| Yadā dakkhasi mātaṅgaṃ kuñjaraṃ saṭṭhihāyanaṃ
sāyaṃ pāto vicarantaṃ na rajjassa sarissasi.
|1077.11| Yadā kareṇusaṅghassa yūthassa purato vajaṃ
koñcaṃ kāhati mātaṅgo kuñjaro saṭṭhihāyano
tassa taṃ nadato sutvā na rajjassa sarissasi.
|1077.12| Ubhato vanavikāse yadā dakkhasi kāmadaṃ
vane vāḷamigākiṇṇe na rajjassa sarissasi.
|1077.13| Migaṃ disvāna sāyaṇhaṃ pañcamālinimāgataṃ 1-
kiṃpurise ca naccante na rajjassa sarissasi.
|1077.14| Yadā sussasi 2- nigghosaṃ sandamānāya sindhuyā
gītaṃ kiṃpurisānañca na rajjassa sarissasi.
|1077.15| Yadā sussasi 2- nigghosaṃ girigabbharacārino
vassamānassulūkassa na rajjassa sarissasi.
|1077.16| Yadā sīhassa byagghassa khaggassa gavayassa ca
vane sussasi 2- vāḷānaṃ na rajjassa sarissasi.
|1077.17| Yadā morīhi parikiṇṇaṃ varahinaṃ 3- matthakāsinaṃ
moraṃ dakkhasi 4- naccantaṃ na rajjassa sarissasi.
|1077.18| Yadā morīhi parikiṇṇaṃ aṇḍajaṃ citrapekkhanaṃ 5-
moraṃ dakkhasi naccantaṃ na rajjassa sarissasi.
@Footnote: 1 Ma. pañcamālinamāgataṃ . 2 Ma. sossasi . 3 Ma. barihīnaṃ . 4 Ma. dakkhisi.
@ito paraṃ īdisameva . 5 Ma. citrapakkhinaṃ.
|1077.19| Yadā morīhi parikiṇṇaṃ nīlagīvaṃ sikhaṇḍinaṃ
moraṃ dakkhasi naccantaṃ na rajjassa sarissasi.
|1077.20| Yadā dakkhasi hemante pupphite dharaṇīruhe
surabhisampavāyante 1- na rajjassa sarissasi.
|1077.21| Yadā hemantike māse haritaṃ dakkhasi medaniṃ
indagopakasañchannaṃ na rajjassa sarissasi.
|1077.22| Yadā dakkhasi hemante pupphite dharaṇīruhe
kuṭajaṃ bimbajālañca pupphitaṃ loddapadmakaṃ
surabhisampavāyante 2- na rajjassa sarissasi.
|1077.23| Yadā hemantike māse vanaṃ dakkhasi pupphitaṃ
opupphāni ca padmāni na rajjassa sarissasi.
Himavantaṃ niṭṭhitaṃ.
[1078] |1078.1| Tesaṃ lālapitaṃ 3- sutvā puttassa suṇisāya ca
kalūnaṃ paridevesi rājaputtī yasassinī.
|1078.2| Seyyo visaṃ me khāyitaṃ papātā papateyyahaṃ
rajjuyā bajjhamiyāhaṃ
kasmā vessantaraṃ puttaṃ pabbājenti adūsakaṃ.
|1078.3| Ajjhāyakaṃ dānapatiṃ yācayogaṃ amacchariṃ
kasmā 4- vessantaraṃ puttaṃ pabbājenti adūsakaṃ 5-.
@Footnote: 1-2 Ma. surabhiṃ . 3 lālappitaṃ . 4-5 Ma. idaṃ gāthāpādadvayaṃ natthi.
|1078.4| Pūjitaṃ paṭirājūhi kittimantaṃ yasassinaṃ
kasmā vessantaraṃ puttaṃ pabbājenti adūsakaṃ.
|1078.5| Mātāpetibharaṃ jantuṃ kule jeṭṭhāpacāyinaṃ
kasmā vessantaraṃ puttaṃ pabbājenti adūsakaṃ.
|1078.6| Rañño hitaṃ devahitaṃ 1- ñātīnaṃ sakhinaṃ hitaṃ
hitaṃ sabbassa raṭṭhassa
kasmā vessantaraṃ puttaṃ pabbājenti adūsakaṃ.
[1079] |1079.1| Madhūnīva palitāni 2- ambāva patitā chamā
evaṃ hessati te raṭṭhaṃ pabbājenti adūsakaṃ.
|1079.2| Haṃso nikkhīṇapattova pallalasmiṃ anūdake
apaviṭṭho amaccehi eko rājā vihiyyasi.
|1079.3| Tantaṃ brūmi mahārāja attho te mā upaccagā
mā naṃ sivīnaṃ vacanā pabbājesi adūsakaṃ.
[1080] Dhammassāpacitiṃ kummiṃ 3- sivīnaṃ vinayaṃ dhajaṃ
pabbājemi sakaṃ puttaṃ pāṇā piyataro hi me.
[1081] |1081.1| Yassa pubbe dhajaggāni kaṇikārāva pupphitā
yāyantamanuyāyanti svajjekova gamissati.
|1081.2| Yassa pubbe dhajaggāni kaṇikāravanāniva
yāyantamanuyāyanti svajjekova gamissati.
|1081.3| Yassa pubbe anīkāni kaṇikārāva pupphitā
@Footnote: 1 Ma. devihitaṃ . 2 Ma. palātāni . 3 Ma. kummi.
Yāyantamanuyāyanti svajjekova gamissati.
|1081.4| Yassa pubbe anīkāni kaṇikāravanāni va
yāyantamanuyāyanti svajjekova gamissati.
|1081.5| Indagopakavaṇṇābhā gandhārā paṇḍukambalā
yāyantamanuyāyanti svajjekova gamissati.
|1081.6| Yo pubbe hatthinā yāti sivikāya rathena ca
svajja vessantaro rājā kathaṃ gacchati pattiko.
|1081.7| Kathaṃ candanalittaṅgo naccagītappabodhano
khurājinaṃ pharasuñca khārikājañca hāriti 1-.
|1081.8| Kasmā nābhiharīyanti kāsāvā ajināni ca
pavisantaṃ brahāraññaṃ kasmā cīraṃ na bajjhare.
|1081.9| Kathaṃ nu cīraṃ dhārenti rājapabbajitā janā
kathaṃ kusamayaṃ cīraṃ maddī paridahessati 2-.
|1081.10| Kāsiyāni ca dhāretvā khomakodumbarāni ca
kusacīrāni dhārentī kathaṃ maddī karissati.
|1081.11| Vayhāhi pariyāyitvā sivikāya rathena ca
sā kathajja anuccaṅgī pathaṃ gacchati pattikā.
|1081.12| Yassā mudutalā hatthā calanā 3- ca sukhe ṭhitā
sā kathajja anuccaṅgī pathaṃ gacchati pattikā.
@Footnote: 1 Ma. hāhiti . 2 Ma. paridahissati . 3 Sī. Ma. caraṇā.
|1081.13| Yassā mudutalā pādā calanā 1- ca sukhe ṭhitā
pādukāhi suvaṇṇāhi pīḷamānāva gacchati
sā kathajja anuccaṅgī pathaṃ gacchati pattikā.
|1081.14| Yassu itthīsahassassa 2- purato gacchati mālinī
sā kathajja anuccaṅgī vanaṃ gacchati ekikā.
|1081.15| Yā sā 3- sivāya sutvāna muhuṃ uttasate pure
sā kathajja anuccaṅgī vanaṃ gacchati bhīrukā.
|1081.16| Yā sā 3- indasagottassa ulūkassa pavassato
sutvāna nadato bhītā vāruṇīva pavedhati
sā kathajja anuccaṅgī vanaṃ gacchati bhīrukā.
|1081.17| Sakuṇī hataputtāva suññaṃ disvā kulāvakaṃ
ciraṃ dukkhena jhāyissaṃ suññaṃ āgammimaṃ puraṃ.
|1081.18| Sakuṇī hataputtāva suññaṃ disvā kulāvakaṃ
kīsā paṇḍu bhavissāmi piye putte apassatī.
|1081.19| Sakuṇī hataputtāva suññaṃ disvā kulāvakaṃ
tena tena padhāvissaṃ piye putte apassatī.
|1081.20| Kururī 4- hatacchāpāva suññaṃ disvā kulāvakaṃ
ciraṃ dukkhena jhāyissaṃ suññaṃ āgammimaṃ puraṃ.
|1081.21| Kururī hatacchāpāva suññaṃ disvā kulāvakaṃ
kīsā paṇḍu bhavissāmi piye putte apassatī.
@Footnote: 1 Sī. Ma. caraṇā . 2 Ma. yāssu itthisahassānaṃ . 3 Ma. yāssu.
@4 Ma. kurarī. ito paraṃ īdisameva.
|1081.22| Kururī hatacchāpāva suññaṃ disvā kulāvakaṃ
tena tena padhāvissaṃ piye putte apassatī.
|1081.23| Sā nūna cakkavakkīva 1- pallalasmiṃ anūdake
ciraṃ dukkhena jhāyissaṃ suññaṃ āgammimaṃ puraṃ.
|1081.24| Sā nūna cakkavakkīva pallalasmiṃ anūdake
kīsā paṇḍu bhavissāmi piye putte apassatī.
|1081.25| Sā nūna cakkavakkīva pallalasmiṃ anūdake
tena tena padhāvissaṃ piye putte apassatī.
|1081.26| Evaṃ me vilapantiyā rājaputtaṃ adūsakaṃ
pabbājesi ca 2- naṃ raṭṭhā maññe hessāmi jīvitaṃ.
[1082] |1082.1| Tassā lālapitaṃ sutvā sabbā antepure ahu 3-
bāhā paggayha pakkanduṃ sivikaññā samāgatā.
|1082.2| Sālāva sampamadditā 4- mālutena pamadditā
senti puttā ca dārā ca vessantaranivesane.
|1082.3| Orodhā ca kumārā ca vesiyānā ca brāhmaṇā
bāhā paggayha pakkanduṃ vessantaranivesane.
|1082.4| Hatthārohā anīkaṭṭhā rathikā pattikārakā
bāhā paggayha pakkanduṃ vessantaranivesane.
|1082.5| Tato ratyā vivasane suriyassuggamanaṃ pati
atha vessantaro rājā dānaṃ dātuṃ upāgami.
@Footnote: 1 Ma. cakkavāthīva. ito paraṃ īdisameva . 2 Ma. va. . 3 ma bahū . 4 Ma. sampamathitā.
|1082.6| Vatthāni vatthakāmānaṃ soṇḍānaṃ detha vāruṇiṃ
bhojanaṃ bhojanatthīnaṃ sammadeva pavecchatha.
|1082.7| Mā ca kiñci vanibbake heṭhayittha idhāgate
tappetha annapānena gacchantu paṭipūjitā.
|1082.8| (athettha vattati saddo tumulo bheravo mahā
dānena taṃ nīharanti puna dānaṃ adā tuvaṃ 1- .)
[1083] |1083.1| Te su mattā kilantāva sampatanti vanibbakā
nikkhamante mahārāje sivīnaṃ raṭṭhavaḍḍhane.
|1083.2| Acchecchuṃ vata bho rukkhaṃ nānāphaladadaṃ dumaṃ
yathā vessantaraṃ raṭṭhā pabbājenti adūsakaṃ.
|1083.3| Acchecchuṃ vata bho rukkhaṃ nānāphaladharaṃ dumaṃ
yathā vessantaraṃ raṭṭhā pabbājenti adūsakaṃ.
|1083.4| Acchecchuṃ vata bho rukkhaṃ sabbakāmadadaṃ dumaṃ
yathā vessantaraṃ raṭṭhā pabbājenti adūsakaṃ.
|1083.5| Acchecchuṃ vata bho rukkhaṃ sabbakāmarasāharaṃ
yathā vessantaraṃ raṭṭhā pabbājenti adūsakaṃ.
|1083.6| Ye vuḍḍhā ye ca daharā ye ca majjhimaporisā
bāhā paggayha pakkanduṃ
nikkhamante mahārāje sivīnaṃ raṭṭhavaḍḍhane.
@Footnote: 1 ayaṃ gāthā Ma. potthakeyeva dissati.
|1083.7| Atiyakkhā vessavarā 1- itthāgārā ca rājino
bāhā paggayha pakkanduṃ
nikkhamante mahārāje sivīnaṃ raṭṭhavaḍḍhane.
|1083.8| Thiyopi tattha pakkanduṃ yā tamhi nagare ahu
nikkhamante mahārāje sivīnaṃ raṭṭhavaḍḍhane.
|1083.9| Ye brāhmaṇā ye ca samaṇā aññe vāpi vanibbakā
bāhā paggayha pakkanduṃ adhammo kira bho iti.
|1083.10| Yathā vessantaro rājā yajamāno sake pure
sivīnaṃ vacanatthena samhā raṭṭhā nirajjati.
|1083.11| Satta hatthisate datvā sabbālaṅkārabhūsite
suvaṇṇakacche mātaṅge hemakappanivāsase 2-
āruḷhe gāmaṇīyebhi tomaraṅkusapāṇibhi
esa vessantaro rājā samhā raṭṭhā nirajjati.
|1083.12| Satta assasate datvā sabbālaṅkārabhūsite
ājāniyeva jātiyā sindhave sīghavāhane
āruḷhe gāmaṇīyebhi indiyācāpadhāribhi 3-
esa vessantaro rājā samhā raṭṭhā nirajjati.
|1083.13| Satta rathasate datvā sannaddhe ussitaddhaje
dīpe athopi veyyagghe sabbālaṅkārabhūsite
|1083.14| āruḷhe gāmaṇīyebhi cāpahatthehi cammibhi 4-
@Footnote: 1 Ma. vassavarā . 2 Ma. hemakappanavāsase . 3 Ma. illiyā ... . 4 Ma. vammibhi.
Esa vessantaro rājā samhā raṭṭhā nirajjati.
|1083.15| Satta itthīsate datvā ekamekā rathe ṭhitā
sannaddhā nikkharajjūhi suvaṇṇehi alaṅkatā
|1083.16| pītālaṅkārā pītavasanā pītābharaṇabhūsitā 1-
āḷārappamukhā 2- hasulā susaññā tanumajjhimā
esa vessantaro rājā samhā raṭṭhā nirajjati.
|1083.17| Satta dhenusate datvā sabbā kaṃsupadhārino 3-
esa vessantaro rājā samhā raṭṭhā nirajjati.
|1083.18| Satta dāsīsate datvā satta dāsasatāni ca
esa vessantaro rājā samhā raṭṭhā nirajjati.
|1083.19| Hatthī asse rathe datvā nāriyo ca alaṅkatā
esa vessantaro rājā samhā raṭṭhā nirajjati.
|1083.20| Tadāsi yaṃ bhiṃsanakaṃ tadāsi lomahaṃsanaṃ
mahādāne padinnamhi medanī samakampatha.
|1083.21| Tadāsi yaṃ bhiṃsanakaṃ tadāsi lomahaṃsanaṃ
yaṃ pañjalīkato rājā samhā raṭṭhā nirajjati.
[1084] Athettha vattati saddo tumulo bheravo mahā
dānena taṃ nīharanti puna dānaṃ dadāti so 4-.
@Footnote: 1 Ma. -vibhūsitā . 2 Ma. āḷārapamhā. pamhanti akkhigaṇḍo . 3 Ma. kaṃspadhāraṇā.
@4 Sī. Ma. puna dānaṃ adā tuvaṃ.
[1085] Te su mattā kilantāva sampatanti vanibbakā
nikkhamante mahārāje sivīnaṃ raṭṭhavaḍḍhane.
[1086] |1086.1| Āmantayittha rājānaṃ sañjayaṃ dhammikaṃ 1- varaṃ
avaruddhasi maṃ deva vaṅkaṃ gacchāmi pabbataṃ.
|1086.2| Ye hi keci mahārāja bhūtā ye ca bhavissare
atittāyeva kāmehi gacchanti yamasādhanaṃ.
|1086.3| Sohaṃ sake abhisasiṃ yajamāno sake pure
sivīnaṃ vacanatthena samhā raṭṭhā nirajjahaṃ
|1086.4| aghantaṃ paṭisevissaṃ
vane vāḷamigākiṇṇe khaggadīpinisevite
ahaṃ puññāni karomi tumhe paṅkamhi sīdatha.
[1087] Anujānāhi maṃ amma pabbajjā mama ruccati
sohaṃ sake abhisasiṃ yajamāno sake pure
sivīnaṃ vacanatthena samhā raṭṭhā nirajjahaṃ
|1087.1| aghantaṃ paṭisevissaṃ
vane vāḷamigākiṇṇe khaggadīpinisevite
ahaṃ puññāni karomi vaṅkaṃ gacchāmi pabbataṃ 2-.
[1088] Anujānāmi taṃ putta pabbajjā te samijjhatu
ayañca maddī kalyāṇī susaññā tanumajjhimā
acchataṃ saha puttehi kiṃ araññe karissati.
@Footnote: 1 Ma. dhamminaṃ . 2 Ma. tumhe paṅkamhi sīdatha.
[1089] Nāhaṃ akāmā dāsiṃpi araññaṃ netumussahe
sace icchati anvetu sace nicchati acchatu.
[1090] |1090.1| Tato suṇhaṃ mahārājā yācituṃ paṭipajjatha
mā candanasamācāre rajojallaṃ adhārayi.
|1090.2| Kāsiyāni padhāretvā 1- kusacīraṃ adhārayi
dukkho vāso araññasmiṃ mā hi tvaṃ lakkhaṇe gami.
[1091] Tamabravi rājaputtī maddī sabbaṅgasobhanā
nāhantaṃ sukhamiccheyyaṃ yaṃ me vessantaraṃ vinā.
[1092] |1092.1| Tamabravi mahārājā sivīnaṃ raṭṭhavaḍḍhano
iṅgha maddi nisāmehi vane ye honti dussahā.
|1092.2| Bahū kīṭā paṭaṅgā ca makasā madhumakkhikā
tepi taṃ tattha hiṃseyyuṃ tante dukkhataraṃ siyā.
|1092.3| Apare passa santāse nadīnūpanisevite
sappā ajagarā nāma avisā te mahabbalā.
|1092.4| Te manussaṃ migaṃ vāpi apicāsannamāgataṃ
parikkhipitvā bhogehi vasamānenti attano.
|1092.5| Aññepi kaṇhā jaṭino acchā nāma aghammigā
na tehi puriso diṭṭho rukkhamāruyha muccati.
|1092.6| Saṅghaṭṭayantā siṅgāni tikkhaggāni pahārino
mahisā 2- vicarantettha nadiṃ sotumbaraṃ pati.
@Footnote: 1 Ma. mā kāsiyāni dhāretvā . 2 Ma. mahiṃsā.
|1092.7| Disvā migānaṃ yūthānaṃ gavaṃ sañcaritaṃ 1- vane
dhenuva vacchagiddhāva kathaṃ maddi karissasi.
|1092.8| Disvā sampatite ghore dummaggesu plavaṅgame
akhettaññāya te maddi bhavissate mahabbhayaṃ.
|1092.9| Yā tvaṃ sivāya sutvāna muhuṃ uttasate 2- pure
sā tvaṃ vaṅkaṃ anuppattā kathaṃ maddi karissasi.
|1092.10| Ṭhite majjhantike kāle sannisinnesu pakkhisu
suṇateva brahāraññaṃ tattha kiṃ gantumicchasi.
[1093] |1093.1| Tamabravi rājaputtī maddī sabbaṅgasobhanā
yāni etāni akkhāsi vane paṭibhayāni me
sabbāni abhisambhossaṃ gacchaññeva rathesabha.
|1093.2| Kāsaṃ kusaṃ potakilaṃ usiraṃ muñjapabbajaṃ
urasā panūdahissāmi nāssa hessāmi dunnayā.
|1093.3| Bahūhi vattacariyāhi kumārī vindate patiṃ
udarassuparodhena gohanuveṭṭhanena ca
aggissa pāricariyāya udakummujjanena ca
vedhabyaṃ 3- kaṭukaṃ loke gacchaññeva rathesabha.
|1093.4| Apissā hoti appatto ucchiṭṭhaṃ paribhuñjituṃ 4-
yo naṃ hatthe gahetvāna akāmaṃ parikaḍḍhati
vedhabyaṃ kaṭukaṃ loke gacchaññeva rathesabha.
@Footnote: 1 Ma. sañcarataṃ . 2 Ma. uttasayī . 3 Sī. Yu. vedhabbaṃ. ito paraṃ īdisameva.
@4 Ma. ucchiṭṭhampi bhuñjituṃ.
|1093.5| Kesaggahaṇamukkhepā bhūmyā ca parisumbhanā
datvā ca no pakkamati bahuṃ dukkhaṃ anappakaṃ
vedhabyaṃ kaṭukaṃ loke gacchaññeva rathesabha.
|1093.6| Sukkacchavī vedhaverā datvā subhaggamānino
akāmaṃ parikaḍḍhanti ulūkaññeva vāyasā
vedhabyaṃ kaṭukaṃ loke gacchaññeva rathesabha.
|1093.7| Api ñātikule phīte kaṃsappajjotane vasaṃ
nevātivākyaṃ na labhe bhātūhi sakhinīhi 1- ca
vedhabyaṃ kaṭukaṃ loke gacchaññeva rathesabha.
|1093.8| Naggā nadī anūdakā naggaṃ raṭṭhaṃ arājikaṃ
itthīpi vidhavā naggā yassāpi dasa bhātaro
vedhabyaṃ kaṭukaṃ loke gacchaññeva rathesabha.
|1093.9| Dhajo rathassa paññāṇaṃ dhūmo paññāṇamaggino
rājā raṭṭhassa paññāṇaṃ bhattā paññāṇamitthiyā
vedhabyaṃ kaṭukaṃ loke gacchaññeva rathesabha.
|1093.10| Yā daliddī daliddassa aḍḍhā aḍḍhassa kittimā
taṃ ve devā pasaṃsanti dukkaraṃ hi karoti sā.
|1093.11| Sāmikaṃ anubandhissaṃ sadā kāsāyavāsinī
paṭhabyāpi abhijjantyā vedhabyaṃ kaṭukitthiyā.
|1093.12| Api sāgarapariyantaṃ bahuvittadharaṃ mahiṃ
@Footnote: 1 Ma. sakhinīhipi . Sī. Yu. sakhikāhi ca.
Nānāratanaparipūraṃ nicche vessantaraṃ vinā.
|1093.13| Kathannu tāsaṃ hadayaṃ sukharā vata itthiyo
yā sāmike dukkhitamhi sukhamicchanti attano.
|1093.14| Nikkhamante mahārāje sivīnaṃ raṭṭhavaḍḍhane
tamahaṃ anubandhissaṃ sabbakāmadado hi me.
[1094] Tamabravī mahārājā maddiṃ sabbaṅgasobhanaṃ
ime te daharā puttā jālī kaṇhājinā cubho
nikkhippa lakkhaṇe gaccha mayante posayāmase.
[1095] Tamabravī rājaputtī maddī sabbaṅgasobhanā
piyā me puttakā deva jālī kaṇhājinā cubho
tyamhaṃ tattha ramissanti araññe jīvisokinaṃ.
[1096] |1096.1| Tamabravī mahārājā sivīnaṃ raṭṭhavaḍḍhano
sālīnamodanaṃ bhutvā sucimaṃsūpasecanaṃ
rukkhaphalāni bhuñjantā kathaṃ kāhanti dārakā.
|1096.2| Bhutvā satapale kaṃse sovaṇṇe satarājike
rukkhapattesu bhuñjantā kathaṃ kāhanti dārakā.
|1096.3| Kāsiyāni ca dhāretvā khomakodumbarāni ca
kusacīrāni dhārentā kathaṃ kāhanti dārakā.
|1096.4| Vayhāhi pariyāyitvā sivikāya rathena ca
pattikā paridhāvantā kathaṃ kāhanti dārakā.
|1096.5| Kūṭāgāre sayitvāna nivāte phusitaggaḷe
sayantā rukkhamūlasmiṃ kathaṃ kāhanti dārakā.
|1096.6| Pallaṅkesu sayitvāna gonake citrasanthate
sayantā tiṇasanthāre kathaṃ kāhanti dārakā.
|1096.7| Gandhakena vilimpitvā aggalucandanena ca
rajojallāni dhārentā kathaṃ kāhanti dārakā.
|1096.8| Cāmarīmorahatthehi vījitaṅgā sukhe ṭhitā 1-
phuṭṭhā ḍaṃsehi makasehi kathaṃ kāhanti dārakā.
[1097] |1097.1| Tamabravī rājaputtī maddī sabbaṅgasobhanā
mā deva paridevasi mā ca tvaṃ vimano ahu
yathā mayaṃ bhavissāma tathā hessanti dārakā.
|1097.2| Idaṃ vatvāna pakkāmi maddī sabbaṅgasobhanā
sivimaggena anvesi putte ādāya lakkhaṇā.
[1098] |1098.1| Tato vessantaro rājā dānaṃ datvāna khattiyo
pitu mātuñca vanditvā katvā ca naṃ padakkhiṇaṃ.
|1098.2| Catuvāhiṃ rathaṃ yuttaṃ sīghamāruyha sandanaṃ
ādāya putta dārañca vaṅkaṃ pāyāsi pabbataṃ.
[1099] Tato vessantaro rājā yenāsi bahuko jano
āmanta kho taṃ gacchāma arogā hontu ñātayo
[1100] Nikkhamitvāna nagarā nivattitvā vilokite
@Footnote: 1 Ma. sukhedhitā.
Tadāpi paṭhavī kampi sineruvanavaṭaṃsakā.
[1101] Iṅgha maddi nisāmehi rammarūpaṃva dissati
āvāso siviseṭṭhassa pettikaṃ bhavanaṃ mama.
[1102] Taṃ brāhmaṇā anvagamuṃ te taṃ asse ayācisuṃ
yācito paṭipādesi catunnaṃ caturo haye.
[1103] Iṅgha maddi nisāmehi cittarūpaṃ na dissati
migā rohiccavaṇṇena dakkhiṇassā vahanti maṃ.
[1104] Athettha pañcamo āgā so taṃ rathamayācatha
tassa taṃ paṭiyādāsi 1- na cassu pahato mano.
[1105] Tato vessantaro rājā oropetvā sakaṃ janaṃ
assāsayi assarathaṃ brāhmaṇassa dhanesino.
[1106] Tvaṃ maddi kaṇhaṃ gaṇhāhi lahukā esā kaniṭṭhakā 2-
ahaṃ jāliṃ gahessāmi garuko bhātiko hi so.
[1107] Rājā kumāramādāya rājaputtī ca dārikaṃ
sammodamānā pakkāmuṃ aññamaññaṃ piyaṃvadā.
Dānakaṇḍaṃ nāma.
[1108] |1108.1| Yadi keci manujā enti anumagge paṭipathe
maggante paṭipucchāma kuhiṃ vaṅkatapabbato.
|1108.2| Te tattha amhe passitvā kalūnaṃ paridevayuṃ
@Footnote: 1 Ma. tassa taṃ yācito dāsi . 2 Ma. kaniṭṭhikā.
Dukkhante paṭivedenti dūre vaṅkatapabbato.
[1109] |1109.1| Yadi passanti pavane dārakā phalite 1- dume
tesaṃ phalānaṃ hetumhi uparodanti dārakā.
|1109.2| Rodante dārake disvā ubbiggā 2- vipulā dumā
sayamevonamitvāna upagacchanti dārake.
|1109.3| Idaṃ accherakaṃ disvā abbhūtaṃ lomahaṃsanaṃ
sādhukāraṃ pavattesi maddī sabbaṅgasobhanā.
|1109.4| Accheraṃ vata lokasmiṃ abbhūtaṃ lomahaṃsanaṃ
vessantarassa tejena sayamevonatā dumā.
[1110] Saṅkhipiṃsu pathaṃ yakkhā anukampāya dārake
nikkhantadivaseneva cetaraṭṭhamupāgamuṃ.
[1111] Te gantvā dīghamaddhānaṃ cetaraṭṭhamupāgamuṃ
iddhaṃ phītaṃ janapadaṃ bahumaṃsasurodakaṃ.
[1112] |1112.1| Cetiyo parikariṃsu 3- disvā lakkhaṇamāgataṃ
sukhumālī vatāyayyā 4- pattikā paridhāvati.
|1112.2| Vayhāhi pariyāyitvā sivikāya rathena ca
sājja maddī araññasmiṃ pattikā paridhāvati.
[1113] |1113.1| Taṃ disvā cetapāmokkhā rodamānā upāgamuṃ
kacci nu deva kusalaṃ kacci deva anāmayaṃ.
@Footnote: 1 Ma. phaline . 2 Ma. ubbiddhā . 3 Ma. parivāriṃsu . 4 Ma. vata ayyā.
|1113.2| Kacci pitā arogā te sivīnañca anāmayaṃ
ko te balaṃ mahārāja ko nu te rathamaṇḍalaṃ.
|1113.3| Anassako arathako dīghamaddhānamāgato
kaccāmittehi pakato anuppattosimaṃ disaṃ.
[1114] |1114.1| Kusalañceva me sammā atho sammā anāmayaṃ
atho pitā arogā me sivīnañca anāmayaṃ.
|1114.2| Ahaṃ hi kuñjaraṃ dajjaṃ īsādantaṃ uruḷhavaṃ
khettaññuṃ sabbayuddhānaṃ sabbasetaṃ gajuttamaṃ.
|1114.3| Paṇḍukambalasañchannaṃ pabhinnaṃ sattumaddanaṃ
dantiṃ savālavījaniṃ setaṃ kelāsasādisaṃ.
|1114.4| Sasetacchattaṃ supattheyyaṃ 1- sāthabbanaṃ sahatthipaṃ
aggayānaṃ rājavāhiṃ brāhmaṇānaṃ adāsahaṃ.
|1114.5| Tasmiṃ me siviyo kuddhā pitā cupahatomano
avaruddhasi maṃ rājā vaṅkaṃ gacchāmi pabbataṃ
okāsaṃ sammā jānātha vane yattha vasemhase 2-.
[1115] |1115.1| Svāgatante mahārāja atho te adurāgataṃ
issarosi anuppatto yaṃ idhatthi pavedaya.
|1115.2| Sākaṃ bhiṃsaṃ madhuṃ maṃsaṃ suddhaṃ sālīnamodanaṃ
paribhuñja mahārāja pāhuno nosi āgato.
@Footnote: 1 Ma. saupādheyyaṃ . 2 Ma. vasāmase. ito paraṃ īdisameva.
[1116] Paṭiggahitaṃ yaṃ dinnaṃ sabbassa agghiyaṃ kataṃ
avaruddhasi maṃ rājā vaṅkaṃ gacchāmi pabbataṃ
okāsaṃ sammā jānātha vane yattha vasemhase.
[1117] |1117.1| Idheva tāva acchassu cetaraṭṭhe rathesabha
yāva cetā gamissanti rañño santika yācituṃ.
|1117.2| Nijjhāpetuṃ mahārājaṃ sivīnaṃ raṭṭhavaḍḍhanaṃ
taṃ taṃ cetā purakkhitvā 1- patītā laddhapaccayā
parivāretvāna gacchanti evaṃ jānāhi khattiya.
[1118] |1118.1| Mā vo rucittha gamanaṃ rañño santika yācituṃ
nijjhāpetuṃ mahārājaṃ rājāpi tattha nissaro.
|1118.2| Accuggatā hi siviyo balaggā negamā ca ye
te padhaṃsetumicchanti 2- rājānaṃ mama kāraṇā.
[1119] |1119.1| Sace esā pavattettha raṭṭhasmiṃ raṭṭhavaḍḍhana
idheva rajjaṃ kārehi cetehi parivārito.
|1119.2| Iddhaṃ phītañcidaṃ raṭṭhaṃ iddho janapado mahā
matiṃ karohi tvaṃ deva rajjassamanusāsituṃ.
[1120] |1120.1| Na me chando mati atthi rajjassamanusāsituṃ
pabbājitassa raṭṭhasmā cetaputtā suṇātha me.
|1120.2| Atuṭṭhā siviyo assu balaggā negamā ca ye
pabbājitassa raṭṭhasmā cetā rajjebhisecayuṃ.
@Footnote: 1 Ma. purakkhatvā . 2 Ma. te vidhaṃsetu....
|1120.3| Asammodiyaṃpi vo assa accantaṃ mama kāraṇā
sivīhi bhaṇḍanañcāpi viggaho me na ruccati.
|1120.4| Athassa bhaṇḍanaṃ ghoraṃ sampahāro anappako
ekassa kāraṇā mayhaṃ hiṃseyya bahuko jano.
|1120.5| Paṭiggahitaṃ yaṃ dinnaṃ sabbassa agghiyaṃ kataṃ
avaruddhasi maṃ rājā vaṅkaṃ gacchāmi pabbataṃ
okāsaṃ sammā jānātha vane yattha vasemhase.
[1121] |1121.1| Taggha te mayamakkhāma yathāpi kusalā tathā
rājisī yattha sammanti āhutaggī samāhitā.
|1121.2| Esa selo mahārāja pabbato gandhamādano
yattha tvaṃ saha puttehi saha bhariyāya cacchasi.
[1122] |1122.1| Taṃ cetā anusāsiṃsu assunettā rudammukhā
ito gaccha mahārāja ujuṃ yenuttarāmukho.
|1122.2| Atha dakkhasi bhaddante vepullaṃ nāma pabbataṃ
nānādumagaṇākiṇṇaṃ sītacchāyaṃ manoramaṃ.
|1122.3| Tamatikkamma bhaddante atha dakkhasi āpakaṃ
nadiṃ ketumatiṃ nāma gambhīraṃ girigabbharaṃ.
|1122.4| Puthulomamacchākiṇṇaṃ supatitthaṃ mahodakaṃ
tattha nhātvā pivitvā ca assāsetvā saputtake.
|1122.5| Atha dakkhasi bhaddante nigrodhaṃ madhuvipphalaṃ
Rammake sikhare jātaṃ sītacchāyaṃ manoramaṃ.
|1122.6| Atha dakkhasi bhaddante nālikaṃ nāma pabbataṃ
nānādijagaṇākiṇṇaṃ selaṃ kiṃpurisāyutaṃ.
|1122.7| Tassa uttarapubbena mucalindo nāma so saro
puṇḍarīkehi sañchanno setasogandhiyehi ca.
|1122.8| So vanaṃ meghasaṅkāsaṃ dhuvaṃ haritasaddalaṃ
sīhovāmisapekkhīva vanasaṇḍaṃ vigāhiya
puppharukkhehi sañchannaṃ phalarukkhehi cūbhayaṃ.
|1122.9| Tattha bindussarā vaggū nānāvaṇṇā bahū dijā
kūjantamupakūjanti utusampupphite dume.
|1122.10| Gantvā girividuggāni nadīnaṃ pabhavāni ca
so addasa 1- pokkharaṇiṃ karañjakakudhāyutaṃ.
|1122.11| Puthulomamacchākiṇṇaṃ supatitthaṃ mahodakaṃ
samañca caturassañca sādhuṃ appaṭigandhiyaṃ.
|1122.12| Tassā uttarapubbena paṇṇasālaṃ amāpaya
paṇṇasālaṃ amāpetvā uñchācariyāya īhatha.
Vanappavesanaṃ nāma.
[1123] |1123.1| Ahu vāsī kaliṅgesu jūjako nāma brāhmaṇo
tassāpi daharā bhariyā nāmenāmittatāpanā.
|1123.2| Tā naṃ tattha gatāvocuṃ nadīudakahāriyā
@Footnote: 1 Sī. Yu. dakkhasi.
Thiyo naṃ paribhāsiṃsu samāgantvā kutūhalā.
|1123.3| Amittā nūna te mātā amitto nūna te pitā
ye taṃ jiṇṇassa pādaṃsu evaṃ dahariyaṃ satiṃ.
|1123.4| Ahitaṃ vata te ñātī mantayiṃsu rahogatā
ye taṃ jiṇṇassa pādaṃsu evaṃ dahariyaṃ satiṃ.
[1]-
|1123.5| Dukkaṭaṃ vata te ñātī mantayiṃsu rahogatā
ye taṃ jiṇṇassa pādaṃsu evaṃ dahariyaṃ satiṃ.
|1123.6| Pāpakaṃ vata te ñātī mantayiṃsu rahogatā
ye taṃ jiṇṇassa pādaṃsu evaṃ dahariyaṃ satiṃ.
|1123.7| Amanāpaṃ vata te ñātī mantayiṃsu rahogatā
ye taṃ jiṇṇassa pādaṃsu evaṃ dahariyaṃ satiṃ.
|1123.8| Amanāpavāsaṃ vasi jiṇṇena patinā saha 2-
yā tvaṃ vasasi jiṇṇassa matante jīvitā varaṃ.
|1123.9| Na hi nūna tuyhaṃ kalyāṇī pitā mātā ca sobhane
aññaṃ bhattāraṃ vindiṃsu
ye taṃ jiṇṇassa pādaṃsu evaṃ dahariyaṃ satiṃ.
|1123.10| Duyiṭṭhante navamiyaṃ akataṃ aggihuttakaṃ
ye taṃ jiṇṇassa pādaṃsu evaṃ dahariyaṃ satiṃ.
|1123.11| Samaṇe brāhmaṇe nūna brahmacariyaparāyane
@Footnote: 1 Ma. amittā vata te ñātī mantayiṃsu rahogatā
@ ye taṃ jiṇṇassa pādaṃsu evaṃ dahāriyaṃ satiṃ.
@2 Sī. Yu. evaṃ dahariyā satī.
Sā tvaṃ loke abhissasi 1- sīlavante bahussute
yā tvaṃ vasasi jiṇṇassa evaṃ dahariyaṃ satiṃ 2-.
|1123.12| Na dukkhaṃ ahinā daṭṭhaṃ na dukkhaṃ sattiyā hataṃ
tañca dukkhañca tippañca yaṃ passe jiṇṇakaṃ patiṃ.
|1123.13| Natthi khiḍḍā natthi rati jiṇṇena patinā saha
natthi allāpasallāpo jagghitampi 3- na sobhati.
|1123.14| Yadā ca daharo daharā mantayiṃsu 4- rahogatā
sabbe sokā vinassanti 5- yekeci hadayassitā.
|1123.15| Daharā tvaṃ rūpavatī purisānaṃbhipatthitā
gaccha ñātikule accha kiṃ jiṇṇo ramayissati.
[1124] Na te brāhmaṇa gacchāmi nadiṃ udakahāriyā
thiyo maṃ paribhāsanti tayā jiṇṇena brāhmaṇa.
[1125] Mā me tvaṃ akarā kammaṃ mā me udakamāhari
ahaṃ udakamāhissaṃ mā bhotī kuppitā ahu.
[1126] |1126.1| Nāhaṃ tamhi kule jātā yaṃ tvaṃ udakamāhare
evaṃ brāhmaṇa jānāhi na te vacchāmihaṃ ghare.
|1126.2| Sace me dāsaṃ dāsiṃ vā nānayissasi brāhmaṇa
evaṃ brāhmaṇa jānāhi na te vacchāmi santike.
[1127] Natthi me sippaṭṭhānaṃ vā dhanaṃ dhaññañca brāhmaṇi
@Footnote: 1 Ma. abhisapi . 2 Ma. dahariyā satī . 3 Ma. jagghitumpi . 4 Ma. mantayanti.
@5 Ma. sabbesaṃ sokā nassanti.
Kutohaṃ dāsaṃ dāsiṃ vā ānayissāmi bhotiyā
ahaṃ bhotiṃ upaṭṭhissaṃ mā bhotī kuppitā ahu.
[1128] |1128.1| Ehi te ahamakkhissaṃ yathā me vacanaṃ sutaṃ
esa vessantaro rājā vaṅke vasati pabbate.
|1128.2| Taṃ tvaṃ gantvāna yācassu dāsaṃ dāsiñca brāhmaṇa
so te dassati yācito dāsaṃ dāsiñca khattiyo.
[1129] Jiṇṇohamasmi dubbalo 1- dīgho caddhā suduggamo
mā bhotī paridevesi mā bhotī 2- vimanā ahu
ahaṃ bhotiṃ upaṭṭhissaṃ mā bhotī kuppitā ahu.
[1130] |1130.1| Yathā agantvā saṅgāmaṃ ayuddheva parājito
evameva tuvaṃ brahme agantvāva parājito.
|1130.2| Sace me dāsaṃ dāsiṃ vā nānayissasi brāhmaṇa
evaṃ brāhmaṇa jānāhi na te vacchāmihaṃ ghare
amanāpante karissāmi tante dukkhaṃ bhavissati.
|1130.3| Nakkhatte utupubbesu yadā maṃ dakkhasilaṅkataṃ
aññehi saddhiṃ ramamānaṃ tante dukkhaṃ bhavissati.
|1130.4| Adassanena mayhante jiṇṇassa paridevato
bhiyyo vaṅkā palitā ca bahū hessanti brāhmaṇa.
[1131] |1131.1| Tato so brāhmaṇo bhīto brāhmaṇiyā vasānugo
aṭṭito kāmarāgena brāhmaṇiṃ etadabravi.
@Footnote: 1 Sī. Yu. abalo . 2 Ma. mā ca tavaṃ.
|1131.2| Pātheyyaṃ me karohi tvaṃ saṅkulā saṅguḷāni 1- ca
madhupiṇḍikā ca sukatāyo sattubhattañca brāhmaṇi.
|1131.3| Ānayissaṃ methunake ubho dāsakumārake
te ca 2- paricarissanti rattindivamatanditā.
[1132] |1132.1| Idaṃ vatvā brahmabandhu paṭimuñci upāhanaṃ 3-
tato so mantayitvāna bhariyaṃ katvā padakkhiṇaṃ.
|1132.2| Pakkāmi so ruṇṇamukho brāhmaṇo sahitabbato
sivīnaṃ nagaraṃ phītaṃ dāsapariyesanañcaraṃ.
[1133] |1133.1| So tattha gantvā avacāsi 4- ye tatthāsuṃ samāgatā
kuhiṃ vessantaro rājā kattha passemu khattiyaṃ.
|1133.2| Te janā taṃ avaciṃsu ye tatthāsuṃ samāgatā
tumhehi brahme pakato atidānena khattiyo
pabbājito sakā raṭṭhā vaṅke vasati pabbate.
|1133.3| Tumhehi brahme pakato atidānena khattiyo
ādāya puttadārañca vaṅke vasati pabbate.
[1134] |1134.1| So codito brāhmaṇiyā brāhmaṇo kāmagiddhimā
aghantaṃ paṭisevittha
vane vāḷamigākiṇṇe khaggadīpinisevite.
|1134.2| Ādāya veluvaṃ daṇḍaṃ aggihuttaṃ kamaṇḍaluṃ
so pāvisi brahāraññaṃ yattha assosi kāmadaṃ.
@Footnote: 1 Ma. saṅkulyā saguḷāni ca . 2 Ma. taṃ . 3 Ma. upāhanā . 4 Ma. avaca.
|1134.3| Taṃ paviṭṭhaṃ brahāraññaṃ kokā naṃ parivārayuṃ
vikkandi so vippanaṭṭho dūre panthā apakkami.
|1134.4| Tato so brāhmaṇo gantvā bhogaluddho asaññato
vaṅkassoharaṇe naṭṭho 1- (sunakhehi parivārito 2-)
(rukkhasmiñca nisinno va 3-) imā gāthā abhāsatha.
[1135] |1135.1| Ko rājaputtaṃ nisabhaṃ jayantamaparājitaṃ
bhaye khemassa dātāraṃ ko me vessantaraṃ vidū.
|1135.2| Yo yācataṃ patiṭṭhāsi bhūtānaṃ dharaṇīriva
dharaṇūpamaṃ mahārājaṃ ko me vessantaraṃ vidū.
|1135.3| Yo yācataṃ gatī āsi savantīnaṃva sāgaro
udadhūpamaṃ 4- mahārājaṃ ko me vessantaraṃ vidū.
|1135.4| Kalyāṇatitthaṃ supivaṃ sītūdakaṃ manoramaṃ
puṇḍarīkehi sañchannaṃ yuttaṃ kiñjakkhareṇunā
rahadūpamaṃ mahārājaṃ ko me vassantaraṃ vidū.
|1135.5| Assatthaṃva pathe jātaṃ sītacchāyaṃ manoramaṃ
samantānaṃ visametāraṃ 5- kilantānaṃ paṭiggahaṃ
tathūpamaṃ mahārājaṃ ko me vessantaraṃ vidū.
|1135.6| Nigrodhaṃva pathe jātaṃ sītacchāyaṃ manoramaṃ
@Footnote: 1 Ma. vaṅkassorohaṇe naṭṭhe . 2-3 idaṃ pādadvayaṃ sabbattha potthakesu na dissati
@ṭhapetvā aṭṭhakathāpotthakaṃyeva . 4 Ma. sāgarūpamaṃ . 5 visametānantipi.
Santānaṃ visametāraṃ kilantānaṃ paṭiggahaṃ
tathūpamaṃ mahārājaṃ ko me vessantaraṃ vidū.
|1135.7| Ambaṃ iva pathe jātaṃ sītacchāyaṃ manoramaṃ
santānaṃ visametāraṃ kilantānaṃ paṭiggahaṃ
tathūpamaṃ mahārājaṃ ko me vessantaraṃ vidū.
|1135.8| Sālaṃ iva pathe jātaṃ sītacchāyaṃ manoramaṃ
santānaṃ visametāraṃ kilantānaṃ paṭiggahaṃ
tathūpamaṃ mahārājaṃ ko me vessantaraṃ vidū.
|1135.9| Dumaṃ iva pathe jātaṃ sītacchāyaṃ manoramaṃ
santānaṃ visametāraṃ kilantānaṃ paṭiggahaṃ
tathūpamaṃ mahārājaṃ ko me vessantaraṃ vidū.
|1135.10| Evañca me vilapato paviṭṭhassa brahāvane
ahaṃ jānanti yo vajjā nandiṃ so janaye mama.
|1135.11| Evañca me vilapato paviṭṭhassa brahāvane
ahaṃ jānanti yo vajjā vessantaranivāsanaṃ 1-
tāya so ekavācāya pasave puññaṃ anappakaṃ.
[1136] |1136.1| Tassa ceto paṭissosi araññaṃ luddako caro
tumhehi brahme pakato atidānena khattiyo
pabbājito sakā raṭṭhā vaṅke vasati pabbate.
|1136.2| Tumhehi brahme pakato atidānena khattiyo
@Footnote: 1 Ma. ayaṃ gāthāpādo natthi.
Ādāya puttadārañca vaṅke vasati pabbate.
|1136.3| Akiccakārī dummedho raṭṭhā vivanamāgato 1-
rājaputtaṃ gavesanto bako macchamivodake.
|1136.4| Tassa tyāhaṃ na dassāmi jīvitaṃ idha brāhmaṇa
ayaṃ hi te mayā nunno saro pāssati 2- lohitaṃ.
|1136.5| Siro te vajjhayitvāna hadayaṃ chetvā sabandhanaṃ
panthasakuṇaṃ yajissāmi tuyhaṃ maṃsena brāhmaṇa.
|1136.6| Tuyhaṃ maṃsena medena matthakena ca brāhmaṇa
āhutiṃ paggahessāmi chetvāna hadayaṃ tava.
|1136.7| Taṃ me suyiṭṭhaṃ suhutaṃ tuyhaṃ maṃsena brāhmaṇa
na ca tvaṃ rājaputtassa bhariyaṃ putte ca nessasi.
[1137] |1137.1| Avajjho brāhmaṇo dūto cetaputta suṇohi me
tasmā hi dūtaṃ na hanti esa dhammo sanantano.
|1137.2| Nijjhattā siviyo sabbe pitā naṃ daṭṭhumicchati
mātā ca dubbalā tassa acirā cakkhūni jīyare.
|1137.3| Tesāhaṃ pahito dūto cetaputta suṇohi me
rājaputtaṃ nayissāmi yadi jānāsi saṃsa me.
[1138] Piyassa me piyo dūto puṇṇapattaṃ dadāmi te
imañca madhuno tumbaṃ migasatthiñca brāhmaṇa
@Footnote: 1 Ma. pavanamāgato . 2 Ma. pissati.
Tañca te desamakkhissaṃ yattha sammati kāmado.
Jūjakapabbaṃ nāma.
[1139] |1139.1| Esa selo mahābrahme pabbato gandhamādano
yattha vessantaro rājā saha puttehi sammati.
|1139.2| Dhārento brāhmaṇavaṇṇaṃ āsadañca masañjaṭaṃ
cammavāsī chamā seti jātavedaṃ namassati.
|1139.3| Ete nīlā padissanti nānāphaladharā dumā
uggatā abbhakūṭāva nīlā añjanapabbatā.
|1139.4| Dhavassakaṇṇā khadirā sālā phandanamāluvā
sampavedhenti 1- vātena sakiṃ pītāva māṇavā.
|1139.5| Upari dumapariyāyesu saṅgītiyova suyyare
najjuhā kokilā saṅghā sampatanti dumā dumaṃ.
|1139.6| Avhayanteva gacchantaṃ sākhāpattasamīritā
ramayanteva āgantuṃ modayanti nivāsanaṃ 2-.
|1139.7| Yattha vessantaro rājā saha puttehi sammati
dhārento brāhmaṇavaṇṇaṃ āsadañca masañjaṭaṃ
cammavāsī chamā seti jātavedaṃ namassati.
[1140] |1140.1| Ambā kapitthā panasā sālā jambū vibhedakā
harītakī āmalakā assatthā badarāni ca.
@Footnote: 1 Ma. sampavedhanti . 2 Ma. nivāsinaṃ.
|1140.2| Cārutimbarukkhā cettha nigrodhā ca kapitthanā
madhumadhukā thevanti nīce pakkā cudumbarā
|1140.3| pārevatā bhaveyyā ca muddikā ca madhutthikā
madhuṃ anelakaṃ tattha sakamādāya bhuñjare.
|1140.4| Aññettha pupphitā ambā aññe tiṭṭhanti dovilā
aññe āmā ca pakkā ca bhiṅgavaṇṇā 1- tadūbhayaṃ.
|1140.5| Athettha heṭṭhā puriso ambapakkāni gaṇhati
āmāni ceva pakkāni vaṇṇagandharasuttamā 2-.
|1140.6| Ateva me acchariyaṃ hiṅkāro paṭibhāti maṃ
devānamiva āvāso sobhati nandanūpamo.
|1140.7| Vibhedakā nāḷikerā khajjurīnaṃ brahāvane
mālāva ganthitā ṭhanti dhajaggāneva dissare.
Nānāvaṇṇehi pupphehi nabhaṃ tārā citāmiva
|1140.8| kuṭajī kuṭṭhataggarā pāṭaliyo ca pupphitā
punnāgā giripunnāgā koviḷārā ca pupphitā.
|1140.9| Uddhālakā somarukkhā agarubhalliyā 3- bahū
pattajīvā ca kukkuṭā 4- asanā cettha pupphitā.
|1140.10| Kuṭajā salaḷā nīpā kosambalabujā dhavā
sālā ca pupphitā tattha palālakhalasannibhā.
@Footnote: 1 Ma. bheṅgavaṇṇā . 2 Ma. ...suttame . 3 Ma. agaruphalliyā . 4 Sī. Ma.
@kakudhā.
|1140.11| Tassāvidūre pokkharaṇī bhūmibhāge manorame
padumuppalasañchannā devānamiva nandane.
|1140.12| Athettha puppharasamattā kokilā mañjubhāṇikā
abhinādenti taṃ vanaṃ 1- utusampupphite dume.
|1140.13| Bhassanti makarandehi pokkhare pokkhare madhū
athettha vātā vāyanti dakkhiṇā atha pacchimā.
|1140.14| Padumakiñjakkhareṇūhi okiṇṇo hoti assamo
thūlā siṅghāṭakā cettha sasādiyā pasādiyā 2-.
|1140.15| Macchakacchapabyāvidhā bahū cettha mupayānakā
madhuṃ bhiṃsehi 3- savati khīraṃ sappi muḷālibhi
surabhi taṃ vanaṃ vāti nānāgandhasameritaṃ 4-.
|1140.16| Sammoditeva 5- gandhena pupphasākhāhi taṃ vanaṃ
bhamarā pupphagandhena samantāmabhināditā.
|1140.17| Athettha sakuṇā santi nānāvaṇṇā bahū dijā
modanti saha bhariyāhi aññamaññaṃ pakūjino.
|1140.18| Nandikā jīvaputtā ca jīvaputtā piyā ca no
piyā puttā piyā nandā dijā pokkharaṇīgharā.
|1140.19| Mālāva ganthitā ṭhanti dhajaggāneva dissare
nānāvaṇṇehi pupphehi kusalehi 6- suganthitā.
@Footnote: 1 Ma. pavanaṃ . 2 saṃsāriyā pasāriyātipi pāṭho. Ma. saṃsādiyā pasādiyā.
@3 Ma. bhisehi . 4 Ma. ...samoditaṃ . 5 Ma. sammaddateva . 6 Ma. kusaleheva.
Yattha vessantaro rājā saha puttehi sammati
|1140.20| dhārento brāhmaṇavaṇṇaṃ āsadañca masañjaṭaṃ
cammavāsī chamā seti jātavedaṃ namassati.
[1141] Idañca me sattubhattaṃ madhunā paṭisaṃyutaṃ
madhupiṇḍikā ca sukatāyo sattubhattaṃ dadāmi te.
[1142] |1142.1| Tuyheva sambalaṃ hotu nāhaṃ icchāmi sambalaṃ
itopi brahme gaṇhāhi gaccha brahme yathāsukhaṃ.
|1142.2| Ayaṃ ekapadī eti ujuṃ gacchati assamaṃ
isīpi accuto tattha paṅkadanto rajassiro
dhārento brāhmaṇavaṇṇaṃ āsadañca masañjaṭaṃ.
|1142.3| Cammavāsī chamā seti jātavedaṃ namassati
taṃ tvaṃ gantvāna pucchassu so te maggaṃ pavakkhati.
[1143] Idaṃ sutvā brahmabandhu cetaṃ katvā padakkhiṇaṃ
udaggacitto pakkāmi yenāsi accuto isi.
Cullavanavaṇṇanā 1-.
[1144] |1144.1| Gacchanto so bhāradvājo addasa accutaṃ isiṃ
disvāna taṃ bhāradvājo sammodi isinā saha.
|1144.2| Kacci nu bhoto kusalaṃ kacci bhoto anāmayaṃ
kacci uñchena yāpetha kacci mūlaphalā bahū.
|1144.3| Kacci ḍaṃsā makasā ca appameva siriṃsapā 2-
@Footnote: 1 Ma. cūḷavanavaṇṇā . 2 Ma. sarisapā. ito paraṃ īdisameva.
Vane vāḷamigākiṇṇe kacci hiṃsā na vijjati.
[1145] |1145.1| Kusalañceva me brahme atho brahme anāmayaṃ
atho uñchena yāpemi atho mūlaphalā bahū.
|1145.2| Atho ḍaṃsā makasā ca appameva siriṃsapā
vane vāḷamigākiṇṇe hiṃsā mayhaṃ na vijjati.
|1145.3| Bahūni vassapūgāni assame sammato mama
nābhijānāmi uppannaṃ ābādhaṃ amanoramaṃ.
|1145.4| Svāgatante mahābrahme atho te adurāgataṃ
anto pavisa bhaddante pāde pakkhālayassu te.
|1145.5| Tiṇḍukāni piyālāni madhuke kāsamāriyo
phalāni khuddakappāni bhuñja brahme varaṃ varaṃ.
|1145.6| Idaṃpi pāniyaṃ sītaṃ ābhataṃ girigabbharā
tato piva mahābrahme sace tvaṃ abhikaṅkhasi.
[1146] Paṭiggahitaṃ yaṃ dinnaṃ sabbassa agghiyaṃ kataṃ
sañjayassa sakaṃ puttaṃ sivīhi vippavāsitaṃ
tamahaṃ dassanamāgato yadi jānāsi saṃsa me.
[1147] |1147.1| Na bhavaṃ eti puññatthaṃ sivirājassa dassanaṃ
maññe bhavaṃ patthayati rañño bhariyaṃ patibbataṃ.
Maññe kaṇhājinaṃ dāsiṃ jāliṃ dāsañca icchasi
|1147.2| athavā tayo mātāputte araññā netumāgato
Na tassa bhogā vijjanti dhanaṃ dhaññañca brāhmaṇa.
[1148] |1148.1| Akuddharūpohaṃ bhoto 1- nāhaṃ yācitumāgato
sāhu dassanamariyānaṃ sannivāso sadā sukho
|1148.2| adiṭṭhapubbo sivirājā sivīhi vippavāsito
tamahaṃ dassanamāgato yadi jānāsi saṃsa me.
[1149] |1149.1| Esa selo mahābrahme pabbato gandhamādano
yattha vessantaro rājā saha puttehi sammati.
|1149.2| Dhārento brāhmaṇavaṇṇaṃ āsadañca masañjaṭaṃ
cammavāsī chamā seti jātavedaṃ namassati.
|1149.3| Ete nīlā padissanti nānāphaladharā dumā
uggatā abbhakūṭāva nīlā añjanapabbatā
|1149.4| dhavassakaṇṇā khadirā sālā phandanamāluvā
sampavedhenti vātena sakiṃ pītāva māṇavā.
|1149.5| Upari dumapariyāyesu saṅgītiyova suyyare
najjuhā kokilā saṅghā sampatanti dumā dumaṃ.
|1149.6| Avhayanteva gacchantaṃ sākhā pattasamīritā
ramayanteva āgantuṃ modayanti nivāsinaṃ.
Yattha vessantaro rājā saha puttehi sammati
|1149.7| dhārento brāhmaṇavaṇṇaṃ āsadañca masañjaṭaṃ
cammavāsī chamā seti jātavedaṃ namassati.
@Footnote: 1 Sī. Yu. bhotā.
|1149.8| Kirerīmālā vitatā bhūmibhāge manorame
saddalā haritā bhūmi na tatthuddhaṃsate rajo.
|1149.9| Mayūragīvasaṅkāsā tūlaphassasamūpamā
tiṇāni nātivattanti samantā caturaṅgulā.
|1149.10| Ambā jambū kapiṭṭhā ca nīce pakkā cudumbarā
paribhogehi rukkhehi vanantaṃ rativaḍḍhanaṃ.
|1149.11| Veḷuriyavaṇṇasannibhaṃ macchagumbanisevitaṃ
suci sugandhaṃ salilaṃ āpo tatthapi sandati.
|1149.12| Tassāvidūre pokkharaṇī bhūmibhāge manorame
padumuppalasañchannā devānamiva nandane.
|1149.13| Tīṇi uppalajātāni tasmiṃ sarasi brāhmaṇa
vicitranīlānekāni setā lohitakāni ca.
[1150] |1150.1| Khomāva tattha padumā setasogandhiyehi ca 1-
kalambakehi sañchanno mucalindo nāma so saro.
|1150.2| Athettha padumā phullā apariyantāva dissare
gimhā hemantikā phullā jaṇṇutagghā upattharā.
|1150.3| Surabhī sampavāyanti vicitrā pupphasanthatā
bhamarā pupphagandhena samantāmabhināditā.
[1151] |1151.1| Athettha udakantasmiṃ rukkhā tiṭṭhanti brāhmaṇa
kadambā pāṭalī phullā koviḷārā ca pupphitā.
|1151.2| Aṅkolā kaccikārā ca pārijaññā ca pupphitā
@Footnote: 1 ma ...gandhikehi ca.
Vāraṇā vuyhanā 1- rukkhā mucalindamubhato 2- saraṃ.
|1151.3| Sirīsā setapārisā 3- sādhu vāyanti padmakā
niggaṇḍī saraniggaṇḍī 4- asanā cettha pupphitā.
|1151.4| Paṅkurā 5- bahulā selā sobhañjanā ca pupphitā
ketakā kaṇikārā ca kaṇaverā ca pupphitā.
|1151.5| Ajjunā ajjukaṇṇā ca mahānāmā ca pupphitā
sampupphitaggā tiṭṭhanti pajjalanteva kiṃsukā.
|1151.6| Setapaṇṇi sattapaṇṇā kadaliyo kusumbharā
dhanutakkāripupphehi sīsapāvaraṇāni ca.
|1151.7| Acchipā simbalīrukkhā 6- sallakiyo ca pupphitā
setagerūtagarikā maṃsikoṭṭhakulāvarā 7-.
|1151.8| Daharā rukkhā vuḍḍhā ca akuṭilā cettha pupphitā
assamaṃ ubhato ṭhanti agyāgāraṃ samantato.
[1152] |1152.1| Athettha udakantasmiṃ bahū jātā phaṇijjakā
muggatiyo karatiyo sevālaṃ sīsakaṃ bahu 8-.
|1152.2| Uddhāpavattaṃ 9- ulluḷitaṃ makkhikā hiṅgujālikā
dāsimakañcako cettha bahū nīce kalambakā.
|1152.3| Eḷambakehi sañchannā rukkhā tiṭṭhanti brāhmaṇa
sattāhaṃ dhāriyamānānaṃ gandho tesaṃ na chijjati.
@Footnote: 1 Ma. vayanā. Sī. Yu. sāyanā . 2 Sī. Yu. ...mabhito . 3 Sī. Yu. setavārisā.
@4 Ma. nigguṇḍī sirīnigguṇḍī . 5 Ma. paṅgurā . 6 Ma. acchivā sallavā. Sī. ..
@sabalā. Yu. ... simalā . 7 Ma. ...kaṭṭha... . 8 Ma. sevālasīsakā bahū . 9 Ma.
@uddāpavattaṃ.
|1152.4| Ubhato sarañca mucalindaṃ pupphā tiṭṭhanti bhāgaso
indivarehi sañchannaṃ vanantamupasobhati
|1152.5| aḍḍhamāsaṃ dhāriyamānānaṃ gandho tesaṃ na chijjati.
Nīlapupphisetavārī pupphitā girikaṇṇikā
kalerukkhehi 1- sañchannaṃ vanantaṃ tulasīhi ca.
|1152.6| Sammoditeva 2- gandhena pupphasākhāhi taṃ vanaṃ
bhamarā pupphagandhena samantāmabhināditā.
|1152.7| Tīṇi kakkārujātāni tasmiṃ sarasi brāhmaṇa
kumbhamattāni cekāni muramattāni 3- vā ubho.
The Pali Tipitaka in Roman Character Volume 28 page 365-410.
http://84000.org/tipitaka/pali/roman_item_s.php?book=28&item=1045&items=108
Classified by [Item Number] :-
http://84000.org/tipitaka/pali/roman_item_s.php?book=28&item=1045&items=108&mode=bracket
Compare with The Pali Tipitaka in Thai Character :-
http://84000.org/tipitaka/read/pali_item_s.php?book=28&item=1045&items=108
Compare with The Royal Version of Thai Tipitaka :-
http://84000.org/tipitaka/read/byitem_s.php?book=28&item=1045&items=108
Study Atthakatha :-
http://84000.org/tipitaka/attha/attha.php?b=28&i=1045
The Pali Atthakatha in Thai :-
http://84000.org/tipitaka/atthapali/read_th.php?B=44&A=6531
The Pali Atthakatha in Roman :-
http://84000.org/tipitaka/atthapali/read_rm.php?B=44&A=6531
Contents of The Tipitaka Volume 28
http://84000.org/tipitaka/read/?index_28
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
