paliTIPITAKA Volume 3 - Vinaya Pitaka 3

Chattupāhanavaggo ^3- navamo. [483] Uddiṭṭhā kho ayyāyo chasaṭṭhisatā pācittiyā dhammā. Tatthayyāyo pucchāmi kaccittha parisuddhā . dutiyampi pucchāmi kaccittha parisuddhā . tatiyampi pucchāmi kaccittha parisuddhā . Parisuddhetthayyāyo tasmā tuṇhī. Evametaṃ dhārayāmīti. Pācittiyā niṭṭhitā ^4-. ---- @Footnote: ¹ Ma. Yu. atikkāmentiyā. ² Ma. Yu. āpadāsu. ³ chattavaggotipi pāṭho. @⁴ Ma. Yu. khuddakaṃ niṭṭhitaṃ. Pāṭidesanīyakaṇḍaṃ ime kho panayyāyo aṭṭha pāṭidesanīyā dhammā uddesaṃ āgacchanti. [484] Tena samayena buddho bhagavā sāvatthiyaṃ viharati jetavane anāthapiṇḍikassa ārāme . tena kho pana samayena chabbaggiyā bhikkhuniyo sappiṃ viññāpetvā bhuñjanti . manussā ujjhāyanti khīyanti vipācenti kathaṃ hi nāma bhikkhuniyo sappiṃ viññāpetvā bhuñjissanti kassa sampannaṃ na manāpaṃ kassa sāduṃ na ruccatīti. {484.1} Assosuṃ kho bhikkhuniyo tesaṃ manussānaṃ ujjhāyantānaṃ khīyantānaṃ vipācentānaṃ . yā tā bhikkhuniyo appicchā .pe. tā ujjhāyanti khīyanti vipācenti kathaṃ hi nāma chabbaggiyā bhikkhuniyo sappiṃ viññāpetvā bhuñjissantīti .pe. saccaṃ kira bhikkhave bhikkhuniyo sappiṃ viññāpetvā bhuñjantīti . saccaṃ bhagavāti . Vigarahi buddho bhagavā kathaṃ hi nāma bhikkhave chabbaggiyā bhikkhuniyo sappiṃ viññāpetvā bhuñjissanti netaṃ bhikkhave appasannānaṃ vā pasādāya .pe. evañca pana bhikkhave bhikkhuniyo imaṃ sikkhāpadaṃ uddisantu {484.2} yā pana bhikkhunī sappiṃ viññāpetvā bhuñjeyya paṭidesetabbaṃ tāya bhikkhuniyā gārayhaṃ ayye dhammaṃ āpajjiṃ asappāyaṃ pāṭidesanīyaṃ taṃ paṭidesemīti . evañcidaṃ Bhagavatā bhikkhunīnaṃ sikkhāpadaṃ paññattaṃ hoti. [485] Tena kho pana samayena bhikkhuniyo gilānā honti . Gilānapucchikā bhikkhuniyo gilānā bhikkhuniyo etadavocuṃ kacci ayye khamanīyaṃ kacci yāpanīyanti . pubbe mayaṃ ayye sappiṃ viññāpetvā bhuñjāma tena no phāsu hotu idāni pana bhagavatā paṭikkhittanti kukkuccāyantā na viññāpema tena no na phāsu hotīti . bhagavato etamatthaṃ ārocesuṃ .pe. anujānāmi bhikkhave gilānāya bhikkhuniyā sappiṃ viññāpetvā bhuñjituṃ . evañca pana bhikkhave bhikkhuniyo imaṃ sikkhāpadaṃ uddisantu {485.1} yā pana bhikkhunī agilānā sappiṃ viññāpetvā bhuñjeyya paṭidesetabbaṃ tāya bhikkhuniyā gārayhaṃ ayye dhammaṃ āpajjiṃ asappāyaṃ pāṭidesanīyaṃ taṃ paṭidesemīti. [486] Yā panāti yā yādisā .pe. bhikkhunīti .pe. ayaṃ imasmiṃ atthe adhippetā bhikkhunīti . agilānā nāma yassā vinā sappinā phāsu hoti . gilānā nāma yassā vinā sappinā na phāsu hoti . sappi nāma gosappi vā ajikāsappi vā mahisasappi ^1- vā yesaṃ maṃsaṃ kappati tesaṃ sappi . agilānā attano atthāya viññāpeti payoge dukkaṭaṃ paṭilābhena bhuñjissāmīti paṭiggaṇhāti āpatti dukkaṭassa ajjhohāre @Footnote: ¹ Yu. māhisaṃ vā sappi. Ma. māhiṃsā vā sappi. Ajjhohāre āpatti pāṭidesanīyassa. [487] Agilānā agilānasaññā sappiṃ viññāpetvā bhuñjati āpatti pāṭidesanīyassa . agilānā vematikā sappiṃ viññāpetvā bhuñjati āpatti pāṭidesanīyassa . agilānā gilānasaññā sappiṃ viññāpetvā bhuñjati āpatti pāṭidesanīyassa . gilānā agilānasaññā āpatti dukkaṭassa . gilānā vematikā āpatti dukkaṭassa. Gilānā gilānasaññā anāpatti. [488] Anāpatti gilānāya gilānā hutvā viññāpetvā agilānā bhuñjati gilānāya sesakaṃ bhuñjati ñātakānaṃ pavāritānaṃ aññassatthāya attano dhanena ummattikāya ādikammikāyāti. [489] Tena samayena buddho bhagavā sāvatthiyaṃ viharati jetavane anāthapiṇḍikassa ārāme . tena kho pana samayena chabbaggiyā bhikkhuniyo telaṃ viññāpetvā bhuñjanti . saṅkhepo . madhuṃ viññāpetvā bhuñjanti . phāṇitaṃ viññāpetvā bhuñjanti . macchaṃ viññāpetvā bhuñjanti . maṃsaṃ viññāpetvā bhuñjanti . khīraṃ viññāpetvā bhuñjanti ^1- . dadhiṃ viññāpetvā bhuñjanti . Manussā ujjhāyanti khīyanti vipācenti kathaṃ hi nāma bhikkhuniyo dadhiṃ viññāpetvā bhuñjissanti kassa sampannaṃ na manāpaṃ kassa @Footnote: ¹ pivantīti pāṭhena bhavitabbaṃ. Sāduṃ na ruccatīti . assosuṃ kho bhikkhuniyo tesaṃ manussānaṃ ujjhāyantānaṃ khīyantānaṃ vipācentānaṃ . yā tā bhikkhuniyo appicchā .pe. tā ujjhāyanti khīyanti vipācenti kathaṃ hi nāma chabbaggiyā bhikkhuniyo dadhiṃ viññāpetvā bhuñjissantīti .pe. saccaṃ kira bhikkhave chabbaggiyā bhikkhuniyo dadhiṃ viññāpetvā bhuñjantīti . Saccaṃ bhagavāti. {489.1} Vigarahi buddho bhagavā kathaṃ hi nāma bhikkhave chabbaggiyā bhikkhuniyo dadhiṃ viññāpetvā bhuñjissanti netaṃ bhikkhave appasannānaṃ vā pasādāya .pe. Evañca pana bhikkhave bhikkhuniyo imaṃ sikkhāpadaṃ uddisantu {489.2} yā pana bhikkhunī dadhiṃ viññāpetvā bhuñjeyya paṭidesetabbaṃ tāya bhikkhuniyā gārayhaṃ ayye dhammaṃ āpajjiṃ asappāyaṃ pāṭidesanīyaṃ taṃ paṭidesemīti. {489.3} Evañcidaṃ bhagavatā bhikkhunīnaṃ sikkhāpadaṃ paññattaṃ hoti. [490] Tena kho pana samayena bhikkhuniyo gilānā honti . Gilānapucchikā bhikkhuniyo gilānā bhikkhuniyo etadavocuṃ kacci ayye khamanīyaṃ kacci yāpanīyanti . pubbe mayaṃ ayye dadhiṃ viññāpetvā bhuñjāma ^1- tena no phāsu hoti idāni pana bhagavatā paṭikkhittanti kukkuccāyantā na viññāpema tena no na phāsu hotīti . Bhagavato etamatthaṃ ārocesuṃ .pe. anujānāmi bhikkhave gilānāya bhikkhuniyā dadhiṃ viññāpetvā bhuñjituṃ . evañca pana bhikkhave bhikkhuniyo imaṃ sikkhāpadaṃ uddisantu yā pana bhikkhunī agilānā @Footnote: ¹ Ma. bhuñjimha. Dadhiṃ viññāpetvā bhuñjeyya paṭidesetabbaṃ tāya bhikkhuniyā gārayhaṃ ayye dhammaṃ āpajjiṃ asappāyaṃ pāṭidesanīyaṃ taṃ paṭidesemīti. [491] Yā panāti yā yādisā .pe. bhikkhunīti .pe. ayaṃ imasmiṃ atthe adhippetā bhikkhunīti . agilānā nāma yassā vinā dadhinā phāsu hoti . gilānā nāma yassā vinā dadhinā na phāsu hoti . telaṃ nāma tilatelaṃ sāsapatelaṃ madhukatelaṃ eraṇḍatelaṃ ^1- vasātelaṃ . madhu nāma makkhikāmadhu . phāṇitaṃ nāma ucchumhā nibbattaṃ . maccho nāma odako vuccati . maṃsaṃ nāma yesaṃ maṃsaṃ kappati tesaṃ maṃsaṃ . khīraṃ nāma gokhīraṃ vā ajikākhīraṃ vā mahisakhīraṃ vā ^2- yesaṃ maṃsaṃ kappati tesaṃ khīraṃ . dadhi nāma tesaññeva dadhi . agilānā attano atthāya viññāpeti payoge dukkaṭaṃ paṭilābhena bhuñjissāmīti paṭiggaṇhāti āpatti dukkaṭassa . ajjhohāre ajjhohāre āpatti pāṭidesanīyassa. [492] Agilānā agilānasaññā dadhiṃ viññāpetvā bhuñjati āpatti pāṭidesanīyassa . agilānā vematikā dadhiṃ viññāpetvā bhuñjati āpatti pāṭidesanīyassa . agilānā gilānasaññā dadhiṃ viññāpetvā bhuñjati āpatti pāṭidesanīyassa . gilānā agilānasaññā āpatti dukkaṭassa . gilānā vematikā āpatti dukkaṭassa. Gilānā gilānasaññā anāpatti. @Footnote: ¹ Ma. Yu. eraṇḍakatelaṃ. ² Yu. māhisaṃ vā khīraṃ. Ma. māhiṃsaṃ vā khīraṃ. [493] Anāpatti gilānāya gilānā hutvā viññāpetvā agilānā bhuñjati gilānāya sesakaṃ bhuñjati ñātakānaṃ pavāritānaṃ aññassatthāya attano dhanena ummattikāya ādikammikāyāti.

The Pali Tipitaka in Roman Character Volume 3 page 257-263. http://84000.org/tipitaka/pali/roman_item_s.php?book=3&item=483&items=11 Classified by [Item Number] :- http://84000.org/tipitaka/pali/roman_item_s.php?book=3&item=483&items=11&mode=bracket Compare with The Pali Tipitaka in Thai Character :- http://84000.org/tipitaka/read/pali_item_s.php?book=3&item=483&items=11 Compare with The Royal Version of Thai Tipitaka :- http://84000.org/tipitaka/read/byitem_s.php?book=3&item=483&items=11 Study Atthakatha :- http://84000.org/tipitaka/attha/attha.php?b=3&i=483 The Pali Atthakatha in Thai :- http://84000.org/tipitaka/atthapali/read_th.php?B=2&A=11939 The Pali Atthakatha in Roman :- http://84000.org/tipitaka/atthapali/read_rm.php?B=2&A=11939 Contents of The Tipitaka Volume 3 http://84000.org/tipitaka/read/?index_3