[154] Athakho bhikkhūnaṃ etadahosi bhagavatā paññattaṃ ettāvatā
sāmaggī yāvatā ekāvāsoti . kittāvatā nu kho ekāvāso
hotīti . bhagavato etamatthaṃ ārocesuṃ . anujānāmi bhikkhave sīmaṃ
sammannituṃ . evañca pana bhikkhave sammannitabbā . paṭhamaṃ
nimittā kittetabbā pabbatanimittaṃ pāsāṇanimittaṃ vananimittaṃ
rukkhanimittaṃ magganimittaṃ vammikanimittaṃ nadīnimittaṃ udakanimittaṃ nimitte
kittetvā byattena bhikkhunā paṭibalena saṅgho ñāpetabbo
{154.1} suṇātu me bhante saṅgho yāvatā samantā nimittā
kittitā yadi saṅghassa pattakallaṃ saṅgho etehi nimittehi sīmaṃ
sammanneyya samānasaṃvāsaṃ ekuposathaṃ. Esā ñatti.
@Footnote: 1 ma gaccha tavaṃ.
{154.2} Suṇātu me bhante saṅgho yāvatā samantā nimittā kittitā saṅgho
etehi nimittehi sīmaṃ sammannati samānasaṃvāsaṃ ekuposathaṃ. Yassāyasmato
khamati etehi nimittehi sīmāya sammati 1- samānasaṃvāsāya ekuposathāya
so tuṇhassa yassa nakkhamati so bhāseyya . sammatā [2]- sīmā
saṅghena 3- etehi nimittehi samānasaṃvāsā ekuposathā . khamati
saṅghassa tasmā tuṇhī. Evametaṃ dhārayāmīti.
[155] Tena kho pana samayena chabbaggiyā bhikkhū bhagavatā
sīmāsammati anuññātāti atimahatiyo sīmāyo sammannanti
catuyojanikāpi pañcayojanikāpi chayojanikāpi . bhikkhū uposathaṃ
āgacchantā uddissamānepi pātimokkhe āgacchanti uddiṭṭhamattepi
āgacchanti antarāpi parivasanti . bhagavato etamatthaṃ ārocesuṃ .
Na bhikkhave atimahatī sīmā sammannitabbā catuyojanikā vā pañcayojanikā
vā chayojanikā vā yo sammanneyya āpatti dukkaṭassa . Anujānāmi
bhikkhave tiyojanaparamaṃ sīmaṃ sammannitunti.
[156] Tena kho pana samayena chabbaggiyā bhikkhū nadīpārasīmaṃ 4-
sammannanti . uposathaṃ āgacchantā bhikkhūpi vuyhanti pattāpi
@Footnote: 1 sabbattha sammutīti dissati . 2 Po. sā . 3 sammatā saṅghena sīmāti
@pāṭho yuttataro bhaveyya padato kattu niccaṃ ṭhapitattā upasampanno saṅghena
@itthannāmoti ca sammato saṅghena itthannāmo vihāro uposathāgāranti ca
@nidassanaṃ . 4 Sī. Yu. nadīpāraṃ siṃmaṃ.
Vuyhanti cīvarānipi vuyhanti . bhagavato etamatthaṃ ārocesuṃ . na
bhikkhave nadīpārasīmā sammannitabbā yo sammanneyya āpatti
dukkaṭassa . anujānāmi bhikkhave yatthassa dhuvanāvā vā dhuvasetu
vā evarūpaṃ nadīpārasīmaṃ sammannitunti.
[157] Tena kho pana samayena bhikkhū anupariveṇiyaṃ pātimokkhaṃ
uddisanti asaṅketena . āgantukā bhikkhū na jānanti kattha
vā 1- ajja uposatho kariyissatīti . bhagavato etamatthaṃ ārocesuṃ.
Na bhikkhave anupariveṇiyaṃ pātimokkhaṃ uddisitabbaṃ asaṅketena yo
uddiseyya āpatti dukkaṭassa . anujānāmi bhikkhave uposathāgāraṃ
sammannitvā uposathaṃ kātuṃ yaṃ saṅgho ākaṅkhati vihāraṃ vā aḍḍhayogaṃ
vā pāsādaṃ vā hammiyaṃ vā guhaṃ vā. Evañca pana bhikkhave sammannitabbaṃ.
Byattena bhikkhunā paṭibalena saṅgho ñāpetabbo
{157.1} suṇātu me bhante saṅgho yadi saṅghassa pattakallaṃ saṅgho
itthannāmaṃ vihāraṃ uposathāgāraṃ sammanneyya. Esā ñatti.
{157.2} Suṇātu me bhante saṅgho saṅgho itthannāmaṃ vihāraṃ
uposathāgāraṃ sammannati . yassāyasmato khamati itthannāmassa
vihārassa uposathāgārassa sammati so tuṇhassa yassa nakkhamati
so bhāseyya . sammato saṅghena itthannāmo vihāro uposathāgāraṃ.
Khamati saṅghassa tasmā tuṇhī. Evametaṃ dhārayāmīti.
@Footnote: 1 ayaṃ saddo atireko viya khāyati.
[158] Tena kho pana samayena aññatarasmiṃ āvāse dve
uposathāgārāni sammatāni honti . bhikkhū ubhayattha sannipatanti
idha uposatho kariyissati idha uposatho kariyissatīti . bhagavato
etamatthaṃ ārocesuṃ . na bhikkhave ekasmiṃ āvāse dve
uposathāgārāni sammannitabbāni yo sammanneyya āpatti dukkaṭassa .
Anujānāmi bhikkhave ekaṃ samūhanitvā ekattha uposathaṃ kātuṃ .
Evañca pana bhikkhave samūhantabbaṃ . byattena bhikkhunā paṭibalena
saṅgho ñāpetabbo
{158.1} suṇātu me bhante saṅgho yadi saṅghassa pattakallaṃ
saṅgho itthannāmaṃ uposathāgāraṃ samūhaneyya. Esā ñatti.
{158.2} Suṇātu me bhante saṅgho saṅgho itthannāmaṃ
uposathāgāraṃ samūhanati . yassāyasmato khamati itthannāmassa
uposathāgārassa samugghāto so tuṇhassa yassa nakkhamati
so bhāseyya . samūhataṃ saṅghena itthannāmaṃ uposathāgāraṃ . khamati
saṅghassa tasmā tuṇhī. Evametaṃ dhārayāmīti.
[159] Tena kho pana samayena aññatarasmiṃ āvāse atikhuddakaṃ
uposathāgāraṃ sammataṃ hoti . tadahuposathe mahābhikkhusaṅgho sannipatito
hoti . bhikkhū asammatāya bhūmiyā nisinnā pātimokkhaṃ assosuṃ .
Athakho tesaṃ bhikkhūnaṃ etadahosi bhagavatā paññattaṃ uposathāgāraṃ
sammannitvā uposatho kātabboti mayañcamha asammatāya bhūmiyā
nisinnā pātimokkhaṃ assumhā 1- kato nu kho amhākaṃ uposatho
@Footnote: 1 Yu. assosumhā.
Akato nu khoti . bhagavato etamatthaṃ ārocesuṃ. Sammatāya vā bhikkhave
bhūmiyā nisinno 1- asammatāya vā yato pātimokkhaṃ suṇāti kato
vassa uposatho tenahi bhikkhave saṅgho yāvamahantaṃ uposathamukhaṃ 2-
ākaṅkhati tāvamahantaṃ uposathamukhaṃ sammannatu . evañca pana bhikkhave
sammannitabbaṃ . paṭhamaṃ nimittā kittetabbā nimitte kittetvā
byattena bhikkhunā paṭibalena saṅgho ñāpetabbo
{159.1} suṇātu me bhante saṅgho yāvatā samantā nimittā
kittitā yadi saṅghassa pattakallaṃ saṅgho etehi nimittehi uposathamukhaṃ
sammanneyya. Esā ñatti.
{159.2} Suṇātu me bhante saṅgho yāvatā samantā nimittā
kittitā saṅgho etehi nimittehi uposathamukhaṃ sammannati .
Yassāyasmato khamati etehi nimittehi uposathamukhassa sammati so
tuṇhassa yassa nakkhamati so bhāseyya . sammataṃ saṅghena etehi
nimittehi uposathamukhaṃ . khamati saṅghassa tasmā tuṇhī . evametaṃ
dhārayāmīti.
[160] Tena kho pana samayena aññatarasmiṃ āvāse tadahuposathe
navakā bhikkhū paṭhamataraṃ sannipatitvā na tāva therā āgacchantīti
pakkamiṃsu . uposatho vikālo 3- ahosi . bhagavato etamatthaṃ
ārocesuṃ . anujānāmi bhikkhave tadahuposathe therehi bhikkhūhi
paṭhamataraṃ sannipatitunti
@Footnote: 1 Ma. Yu. nisinnā . 2 sabbattha pamukhaṃ . 3 Ma. Yu. vikāle.
[161] Tena kho pana samayena rājagahe sambahulā āvāsā
samānasīmā honti . tattha bhikkhū vivadanti amhākaṃ āvāse
uposatho kariyatu 1- amhākaṃ āvāse uposatho kariyatūti . Bhagavato
etamatthaṃ ārocesuṃ . idha pana bhikkhave sambahulā āvāsā
samānasīmā honti tattha bhikkhū vivadanti amhākaṃ āvāse
uposatho kariyatu amhākaṃ āvāse uposatho kariyatūti tehi
bhikkhave bhikkhūhi sabbeheva ekajjhaṃ sannipatitvā uposatho kātabbo
yattha vā pana thero bhikkhu viharati tattha sannipatitvā uposatho
kātabbo na tveva vaggena saṅghena uposatho kātabbo yo
kareyya āpatti dukkaṭassāti.
[162] Tena kho pana samayena āyasmā mahākassapo andhakavindā
rājagahaṃ uposathaṃ āgacchanto antarāmagge nadiṃ taranto manaṃ
vuḷho ahosi cīvarānissa allāni . bhikkhū āyasmantaṃ mahākassapaṃ
etadavocuṃ kissa te āvuso cīvarāni allānīti . idhāhaṃ āvuso
andhakavindā rājagahaṃ uposathaṃ āgacchanto antarāmagge
nadiṃ taranto manamhi 2- vuḷho tena me cīvarāni allānīti .
Bhagavato etamatthaṃ ārocesuṃ . yā sā bhikkhave saṅghena sīmā
sammatā samānasaṃvāsā ekuposathā saṅgho taṃ sīmaṃ ticīvarena
avippavāsaṃ sammannatu . evañca pana bhikkhave sammannitabbā .
@Footnote: 1 Yu. kariyatūti . 2 manaṃ amhīti padacchedo.
Byattena bhikkhunā paṭibalena saṅgho ñāpetabbo
{162.1} suṇātu me bhante saṅgho yā sā saṅghena sīmā
sammatā samānasaṃvāsā ekuposathā yadi saṅghassa pattakallaṃ
saṅgho taṃ sīmaṃ ticīvarena avippavāsaṃ sammanneyya. Esā ñatti.
{162.2} Suṇātu me bhante saṅgho yā sā saṅghena sīmā
sammatā samānasaṃvāsā ekuposathā saṅgho taṃ sīmaṃ ticīvarena
avippavāsaṃ sammannati . yassāyasmato khamati etissā sīmāya
ticīvarena avippavāsassa 1- sammati so tuṇhassa yassa nakkhamati
so bhāseyya . sammatā sā sīmā saṅghena ticīvarena avippavāso 2-
khamati saṅghassa tasmā tuṇhī. Evametaṃ dhārayāmīti.
{162.3} Tena kho pana samayena bhikkhū bhagavatā ticīvarena
avippavāsasammati anuññātāti antaraghare cīvarāni 3- nikkhipanti .
Tāni cīvarāni nassantipi dayhantipi undurehipi khajjanti . bhikkhū
duccolā honti lūkhacīvarā . bhikkhū evamāhaṃsu kissa tumhe āvuso
duccolā lūkhacīvarāti . idha mayaṃ āvuso bhagavatā ticīvarena
avippavāsasammati anuññātāti antaraghare cīvarāni
@Footnote: 1 sabbattha ticīvarena avippavāsāyāti dissati . 2 sabbattha ticīvarena avippavāsāti
@dissati. vikatikammametaṃ na visesanaṃ tasmā ticīvarena avippavāsassāti ca ticīvarena
@avippavāsoti ca yuttataraṃ sammato saṅghena itthannāmo vihāro uposathāgāranti hettha
@nidassanaṃ . 3 ticīvarānītipi pāṭho.
Nikkhipimhā tāni cīvarāni naṭṭhānipi daḍḍhānipi undurehipi khāyitāni
tena mayaṃ duccolā lūkhacīvarāti . bhagavato etamatthaṃ ārocesuṃ .
Yā sā bhikkhave saṅghena sīmā sammatā samānasaṃvāsā ekuposathā
saṅgho taṃ sīmaṃ ticīvarena avippavāsaṃ sammannatu ṭhapetvā gāmañca
gāmūpacārañca . evañca pana bhikkhave sammannitabbā . byattena
bhikkhunā paṭibalena saṅgho ñāpetabbo
{162.4} suṇātu me bhante saṅgho yā sā saṅghena sīmā
sammatā samānasaṃvāsā ekuposathā yadi saṅghassa pattakallaṃ
saṅgho taṃ sīmaṃ ticīvarena avippavāsaṃ sammanneyya ṭhapetvā
gāmañca gāmūpacārañca. Esā ñatti.
{162.5} Suṇātu me bhante saṅgho yā sā saṅghena sīmā
sammatā samānasaṃvāsā ekuposathā saṅgho taṃ sīmaṃ ticīvarena
avippavāsaṃ sammannati ṭhapetvā gāmañca gāmūpacārañca .
Yassāyasmato khamati etissā sīmāya ticīvarena avippavāsassa
sammati ṭhapetvā gāmañca gāmūpacārañca so tuṇhassa yassa
nakkhamati so bhāseyya . sammatā sā sīmā saṅghena 1- ticīvarena
avippavāso ṭhapetvā gāmañca gāmūpacārañca . khamati saṅghassa
tasmā tuṇhī. Evametaṃ dhārayāmīti.
[163] Sīmaṃ bhikkhave sammannantena paṭhamaṃ samānasaṃvāsā sīmā 2-
@Footnote: 1 sammatā sā saṅghena sīmā ticīvarena avippavāso . 2 samānasaṃvāsasīmātipi pāṭho.
@paṭhamaṃ sīmā sammannitabbā.
Sammannitabbā pacchā ticīvarena avippavāso sammannitabbo .
Sīmaṃ bhikkhave samūhanantena paṭhamaṃ ticīvarena avippavāso samūhantabbo
pacchā samānasaṃvāsā sīmā 1- samūhantabbā . evañca pana bhikkhave
ticīvarena avippavāso samūhantabbo . byattena bhikkhunā paṭibalena
saṅgho ñāpetabbo
{163.1} suṇātu me bhante saṅgho yo so saṅghena ticīvarena
avippavāso sammato yadi saṅghassa pattakallaṃ saṅgho taṃ ticīvarena
avippavāsaṃ samūhaneyya . esā ñatti . suṇātu me bhante saṅgho
yo so saṅghena ticīvarena avippavāso sammato saṅgho taṃ ticīvarena
avippavāsaṃ samūhanati 2- . yassāyasmato khamati etassa ticīvarena
avippavāsassa samugghāto so tuṇhassa yassa nakkhamati so bhāseyya.
Samūhato so saṅghena ticīvarena avippavāso . khamati saṅghassa tasmā
tuṇhī. Evametaṃ dhārayāmīti.
{163.2} Evañca pana bhikkhave samānasaṃvāsā 3- sīmā samūhantabbā.
Byattena bhikkhunā paṭibalena saṅgho ñāpetabbo
{163.3} suṇātu me bhante saṅgho yā sā saṅghena sīmā sammatā
samānasaṃvāsā ekuposathā yadi saṅghassa pattakallaṃ saṅgho taṃ sīmaṃ
samūhaneyya [4]-. Esā ñatti.
{163.4} Suṇātu me bhante saṅgho yā sā saṅghena
sīmā sammatā samānasaṃvāsā ekuposathā saṅgho
@Footnote: 1 pacchā sīmā samūhantabbā . 2 sī samūhanti . 3 Yu. Rā. ayaṃ pāṭho na dissati.
@4 Ma. samānasaṃvāsaṃ ekuposathaṃ.
Taṃ sīmaṃ samūhanati [1]- . yassāyasmato khamati etissā sīmāya
samānasaṃvāsāya ekuposathāya samugghāto so tuṇhassa yassa
nakkhamati so bhāseyya . samūhatā sā sīmā saṅghena samānasaṃvāsā
ekuposathā. Khamati saṅghassa tasmā tuṇhī. Evametaṃ dhārayāmīti 2-.
[164] Asammatāya bhikkhave sīmāya aṭṭhapitāya yaṃ gāmaṃ vā
nigamaṃ vā upanissāya viharati yā tassa gāmassa vā gāmasīmā
@Footnote: 1 Ma. samānasaṃvāsaṃ ekuposathaṃ . 2 sabbapotthakesu īdisāyevāyaṃ kammavācā āgatā.
@sā pana ūnā vā atirekā vā khāyati. tattha hi samānasaṃvāsā ekuposathāti padadvayaṃ
@sace sīmāti padassa visesanaṃ saṅgho taṃ sīmaṃ samūhaneyyāti ca saṅgho taṃ sīmaṃ
@samūhanatīti ca vacanesu ūnaṃ siyā yadi pana sammatāti pade vikatikammaṃ yassāyasmato ...
@samugghātoti ca samūhatā sā ... ekuposathāti ca vacanesu atirekaṃ siyā. vicāretvā
@gahetabbaṃ. amhākampanāyaṃ khanti suṇātu me bhante saṅgho yā sā saṅghena sīmā
@sammatā samānasaṃvāsā ekuposathā. yadi saṅghassa pattakallaṃ saṅgho taṃ sīmaṃ
@samūhaneyya. esā ñatti. suṇātu me bhante saṅgho yā sā saṅghena sīmā
@sammatā samānasaṃvāsā ekuposathā saṅgho taṃ sīmaṃ samūhanati. yassāyasmato khamati
@etissā sīmāya samugghāto so tuṇhassa yassa nakkhamati so bhāseyya. samūhatā
@sā saṅghena sīmā. khamati saṅghassa tasmā tuṇhī. evametaṃ dhārayāmīti.
Nigamassa vā nigamasīmā ayaṃ tattha samānasaṃvāsā ekuposathā .
Agāmake ce bhikkhave araññe samantā sattabbhantarā ayaṃ tattha
samānasaṃvāsā ekuposathā . sabbā bhikkhave nadī asīmā sabbo
samuddo asīmo sabbo jātassaro asīmo . nadiyā vā bhikkhave
samudde vā jātassare vā yaṃ majjhimassa purisassa samantā
udakukkhepā ayaṃ tattha samānasaṃvāsā ekuposathāti.
[165] Tena kho pana samayena chabbaggiyā bhikkhū sīmāya sīmaṃ
sambhindanti . bhagavato etamatthaṃ ārocesuṃ . yesaṃ bhikkhave
sīmā paṭhamaṃ sammatā tesaṃ taṃ kammaṃ dhammikaṃ akuppaṃ ṭhānārahaṃ
yesaṃ bhikkhave sīmā pacchā sammatā tesaṃ taṃ kammaṃ adhammikaṃ
kuppaṃ aṭṭhānārahaṃ na bhikkhave sīmāya sīmā sambhinditabbā yo
sambhindeyya āpatti dukkaṭassāti.
{165.1} Tena kho pana samayena chabbaggiyā bhikkhū sīmāya
sīmaṃ ajjhottharanti . bhagavato etamatthaṃ ārocesuṃ . yesaṃ bhikkhave
sīmā paṭhamaṃ sammatā tesaṃ taṃ kammaṃ dhammikaṃ akuppaṃ ṭhānārahaṃ yesaṃ
bhikkhave pacchā sīmā sammatā tesaṃ taṃ kammaṃ adhammikaṃ kuppaṃ
aṭṭhānārahaṃ na bhikkhave sīmāya sīmā ajjhottharitabbā yo
ajjhotthareyya āpatti dukkaṭassa anujānāmi bhikkhave sīmaṃ
sammannantena sīmantarikaṃ ṭhapetvā sīmaṃ sammannitunti.
The Pali Tipitaka in Roman Character Volume 4 page 209-219.
http://84000.org/tipitaka/pali/roman_item_s.php?book=4&item=154&items=12
Classified by [Item Number] :-
http://84000.org/tipitaka/pali/roman_item_s.php?book=4&item=154&items=12&mode=bracket
Compare with The Pali Tipitaka in Thai Character :-
http://84000.org/tipitaka/read/pali_item_s.php?book=4&item=154&items=12
Compare with The Royal Version of Thai Tipitaka :-
http://84000.org/tipitaka/read/byitem_s.php?book=4&item=154&items=12
Study Atthakatha :-
http://84000.org/tipitaka/attha/attha.php?b=4&i=154
The Pali Atthakatha in Thai :-
http://84000.org/tipitaka/atthapali/read_th.php?B=3&A=2393
The Pali Atthakatha in Roman :-
http://84000.org/tipitaka/atthapali/read_rm.php?B=3&A=2393
Contents of The Tipitaka Volume 4
http://84000.org/tipitaka/read/?index_4
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
