paliTIPITAKA Volume 6 - Vinaya Pitaka 6

Samathakkhandhakaṃ [585] Tena samayena buddho bhagavā sāvatthiyaṃ viharati jetavane anāthapiṇḍikassa ārāme . tena kho pana samayena chabbaggiyā bhikkhū asammukhībhūtānaṃ bhikkhūnaṃ kammāni karonti tajjanīyampi ^1- niyassampi pabbājanīyampi paṭisāraṇīyampi ukkhepanīyampi ^2- . Ye te bhikkhū appicchā .pe. te ujjhāyanti khīyanti vipācenti kathaṃ hi nāma chabbaggiyā bhikkhū asammukhībhūtānaṃ bhikkhūnaṃ kammāni karissanti tajjanīyampi niyassampi pabbājanīyampi paṭisāraṇīyampi ukkhepanīyampīti. {585.1} Athakho te bhikkhū bhagavato etamatthaṃ ārocesuṃ .pe. Saccaṃ kira bhikkhave chabbaggiyā bhikkhū asammukhībhūtānaṃ bhikkhūnaṃ kammāni karonti tajjanīyampi niyassampi pabbājanīyampi paṭisāraṇīyampi ukkhepanīyampīti. Saccaṃ bhagavāti. {585.2} Vigarahi buddho bhagavā ananucchavikaṃ bhikkhave tesaṃ moghapurisānaṃ ananulomikaṃ appaṭirūpaṃ assāmaṇakaṃ akappiyaṃ akaraṇīyaṃ kathaṃ hi nāma te bhikkhave moghapurisā asammukhībhūtānaṃ bhikkhūnaṃ kammāni karissanti tajjanīyampi niyassampi pabbājanīyampi paṭisāraṇīyampi ukkhepanīyampi netaṃ bhikkhave appasannānaṃ vā pasādāya .pe. vigarahitvā dhammiṃ kathaṃ katvā bhikkhū āmantesi na bhikkhave asammukhībhūtānaṃ bhikkhūnaṃ kammaṃ kātabbaṃ tajjanīyaṃ vā niyassaṃ vā pabbājanīyaṃ vā paṭisāraṇīyaṃ vā ukkhepanīyaṃ vā yo @Footnote: ¹ Yu. tajjaniyampi. evamuparipi ² Yu. pabbājanīyampi paṭisāraṇīyampi @ukkhepanīyampi evamuparipi. Kareyya āpatti dukkaṭassa. [586] Adhammavādī puggalo adhammavādī sambahulā adhammavādī saṅgho dhammavādī puggalo dhammavādī sambahulā dhammavādī saṅgho. [587] Adhammavādī puggalo dhammavādiṃ puggalaṃ saññāpeti nijjhāpeti pekkheti anupekkheti dasseti anudasseti ayaṃ dhammo ayaṃ vinayo idaṃ satthusāsanaṃ imaṃ gaṇhāhi imaṃ rocehīti evañce taṃ adhikaraṇaṃ vūpasammati adhammena vūpasammati sammukhāvinayapaṭirūpakena . Adhammavādī puggalo dhammavādī sambahule saññāpeti nijjhāpeti pekkheti anupekkheti dasseti anudasseti ayaṃ dhammo ayaṃ vinayo idaṃ satthusāsanaṃ imaṃ gaṇhatha imaṃ rocethāti evañce taṃ adhikaraṇaṃ vūpasammati adhammena vūpasammati sammukhāvinayapaṭirūpakena . adhammavādī puggalo dhammavādiṃ saṅghaṃ saññāpeti nijjhāpeti pekkheti anupekkheti dasseti anudasseti ayaṃ dhammo ayaṃ vinayo idaṃ satthusāsanaṃ imaṃ gaṇhāhi imaṃ rocehīti evañce taṃ adhikaraṇaṃ vūpasammati adhammena vūpasammati sammukhāvinayapaṭirūpakena. {587.1} Adhammavādī sambahulā dhammavādiṃ puggalaṃ saññāpenti nijjhāpenti pekkhenti anupekkhenti dassenti anudassenti ayaṃ dhammo ayaṃ vinayo idaṃ satthusāsanaṃ imaṃ gaṇhāhi imaṃ rocehīti evañce taṃ adhikaraṇaṃ vūpasammati adhammena vūpasammati sammukhāvinayapaṭirūpakena . Adhammavādī sambahulā dhammavādī sambahule saññāpenti nijjhāpenti pekkhenti anupekkhenti dassenti anudassenti ayaṃ dhammo ayaṃ vinayo idaṃ satthusāsanaṃ imaṃ gaṇhatha imaṃ rocethāti evañce taṃ adhikaraṇaṃ vūpasammati adhammena vūpasammati sammukhāvinayapaṭirūpakena . Adhammavādī sambahulā dhammavādiṃ saṅghaṃ saññāpenti nijjhāpenti pekkhenti anupekkhenti dassenti anudassenti ayaṃ dhammo ayaṃ vinayo idaṃ satthusāsanaṃ imaṃ gaṇhāhi ^1- imaṃ rocehīti ^2- evañce taṃ adhikaraṇaṃ vūpasammati adhammena vūpasammati sammukhāvinayapaṭirūpakena. {587.2} Adhammavādī saṅgho dhammavādiṃ puggalaṃ saññāpeti nijjhāpeti pekkheti anupekkheti dasseti anudasseti ayaṃ dhammo ayaṃ vinayo idaṃ satthusāsanaṃ imaṃ gaṇhāhi imaṃ rocehīti evañce taṃ adhikaraṇaṃ vūpasammati adhammena vūpasammati sammukhāvinayapaṭirūpakena . Adhammavādī saṅgho dhammavādī sambahule saññāpeti nijjhāpeti pekkheti anupekkheti dasseti anudasseti ayaṃ dhammo ayaṃ vinayo idaṃ satthusāsanaṃ imaṃ gaṇhatha imaṃ rocethāti evañce taṃ adhikaraṇaṃ vūpasammati adhammena vūpasammati sammukhāvinayapaṭirūpakena . Adhammavādī saṅgho dhammavādiṃ saṅghaṃ saññāpeti nijjhāpeti pekkheti anupekkheti dasseti anudasseti ayaṃ dhammo ayaṃ vinayo idaṃ satthusāsanaṃ imaṃ gaṇhāhi imaṃ rocehīti evañce taṃ adhikaraṇaṃ vūpasammati @Footnote: ¹ Ma. gaṇhatha. evamuparipi . ² Ma. rocethāti. evamuparipi. Adhammena vūpasammati sammukhāvinayapaṭirūpakena. Kaṇhapakkhanavakaṃ niṭṭhitaṃ. [588] Dhammavādī puggalo adhammavādiṃ puggalaṃ saññāpeti nijjhāpeti pekkheti anupekkheti dasseti anudasseti ayaṃ dhammo ayaṃ vinayo idaṃ satthusāsanaṃ imaṃ gaṇhāhi imaṃ rocehīti evañce taṃ adhikaraṇaṃ vūpasammati dhammena vūpasammati sammukhāvinayena . Dhammavādī puggalo adhammavādī sambahule saññāpeti nijjhāpeti pekkheti anupekkheti dasseti anudasseti ayaṃ dhammo ayaṃ vinayo idaṃ satthusāsanaṃ imaṃ gaṇhatha imaṃ rocethāti evañce taṃ adhikaraṇaṃ vūpasammati dhammena vūpasammati sammukhāvinayena. {588.1} Dhammavādī puggalo adhammavādiṃ saṅghaṃ saññāpeti nijjhāpeti pekkheti anupekkheti dasseti anudasseti ayaṃ dhammo ayaṃ vinayo idaṃ satthusāsanaṃ imaṃ gaṇhāhi imaṃ rocehīti evañce taṃ adhikaraṇaṃ vūpasammati dhammena vūpasammati sammukhāvinayena. {588.2} Dhammavādī sambahulā adhammavādiṃ puggalaṃ saññāpenti nijjhāpenti pekkhenti anupekkhenti dassenti anudassenti ayaṃ dhammo ayaṃ vinayo idaṃ satthusāsanaṃ imaṃ gaṇhāhi imaṃ rocehīti evañce taṃ adhikaraṇaṃ vūpasammati dhammena vūpasammati sammukhāvinayena . dhammavādī sambahulā adhammavādī sambahule saññāpenti nijjhāpenti pekkhenti anupekkhenti Dassenti anudassenti ayaṃ dhammo ayaṃ vinayo idaṃ satthusāsanaṃ imaṃ gaṇhatha imaṃ rocethāti evañce taṃ adhikaraṇaṃ vūpasammati dhammena vūpasammati sammukhāvinayena . dhammavādī sambahulā adhammavādiṃ saṅghaṃ saññāpenti nijjhāpenti pekkhenti anupekkhenti dassenti anudassenti ayaṃ dhammo ayaṃ vinayo idaṃ satthusāsanaṃ imaṃ gaṇhāhi imaṃ rocehīti evañce taṃ adhikaraṇaṃ vūpasammati dhammena vūpasammati sammukhāvinayena. {588.3} Dhammavādī saṅgho adhammavādiṃ puggalaṃ saññāpeti nijjhāpeti pekkheti anupekkheti dasseti anudasseti ayaṃ dhammo ayaṃ vinayo idaṃ satthusāsanaṃ imaṃ gaṇhāhi imaṃ rocehīti evañce taṃ adhikaraṇaṃ vūpasammati dhammena vūpasammati sammukhāvinayena . Dhammavādī saṅgho adhammavādī sambahule saññāpeti nijjhāpeti pekkheti anupekkheti dasseti anudasseti ayaṃ dhammo ayaṃ vinayo idaṃ satthusāsanaṃ imaṃ gaṇhatha imaṃ rocethāti evañce taṃ adhikaraṇaṃ vūpasammati dhammena vūpasammati sammukhāvinayena . dhammavādī saṅgho adhammavādiṃ saṅghaṃ saññāpeti nijjhāpeti pekkheti anupekkheti dasseti anudasseti ayaṃ dhammo ayaṃ vinayo idaṃ satthusāsanaṃ imaṃ gaṇhāhi imaṃ rocehīti evañce taṃ adhikaraṇaṃ vūpasammati dhammena vūpasammati sammukhāvinayenāti. Sukkapakkhanavakaṃ niṭṭhitaṃ. [589] Tena samayena buddho bhagavā rājagahe viharati veḷuvane kalandakanivāpe . tena kho pana samayena āyasmatā dabbena mallaputtena jātiyā sattavassena arahattaṃ sacchikataṃ hoti yaṅkiñci sāvakena pattabbaṃ sabbaṃ tena anuppattaṃ hoti natthi cassa kiñci uttari ^1- karaṇīyaṃ katassa vā paticayo. [590] Athakho āyasmato dabbassa mallaputtassa rahogatassa paṭisallīnassa evañcetaso parivitakko udapādi mayā kho jātiyā sattavassena arahattaṃ sacchikataṃ yaṅkiñci sāvakena pattabbaṃ sabbaṃ mayā anuppattaṃ natthi ca me kiñci uttari karaṇīyaṃ katassa vā paticayo kiṃ nu kho ahaṃ saṅghassa veyyāvaccaṃ kareyyanti. Athakho āyasmato dabbassa mallaputtassa etadahosi yannūnāhaṃ saṅghassa senāsanañca paññāpeyyaṃ bhattāni ca uddiseyyanti. [591] Athakho āyasmā dabbo mallaputto sāyaṇhasamayaṃ paṭisallānā vuṭṭhito yena bhagavā tenupasaṅkami upasaṅkamitvā bhagavantaṃ abhivādetvā ekamantaṃ nisīdi . ekamantaṃ nisinno kho āyasmā dabbo mallaputto bhagavantaṃ etadavoca idha mayhaṃ bhante rahogatassa paṭisallīnassa evañcetaso parivitakko udapādi mayā kho jātiyā sattavassena arahattaṃ sacchikataṃ yaṅkiñci sāvakena pattabbaṃ sabbaṃ mayā anuppattaṃ natthi ca me kiñci uttari karaṇīyaṃ katassa vā paticayo kiṃ nu kho ahaṃ saṅghassa veyyāvaccaṃ @Footnote: ¹ Yu. uttariṃ. evamuparipi. Kareyyanti tassa mayhaṃ bhante etadahosi yannūnāhaṃ saṅghassa senāsanañca paññāpeyyaṃ bhattāni ca uddiseyyanti icchāmahaṃ bhante saṅghassa senāsanañca paññāpetuṃ bhattāni ca uddisitunti . Sādhu sādhu dabba tenahi tvaṃ dabba saṅghassa senāsanañca paññāpehi bhattāni ca uddisāhīti . evaṃ bhanteti kho āyasmā dabbo mallaputto bhagavato paccassosi. [592] Athakho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi tenahi bhikkhave saṅgho dabbaṃ mallaputtaṃ senāsanapaññāpakañca bhattuddesakañca sammannatu . Evañca pana bhikkhave sammannitabbo . paṭhamaṃ dabbo yācitabbo yācitvā byattena bhikkhunā paṭibalena saṅgho ñāpetabbo suṇātu me bhante saṅgho yadi saṅghassa pattakallaṃ saṅgho āyasmantaṃ dabbaṃ mallaputtaṃ senāsanapaññāpakañca bhattuddesakañca sammanneyya . esā ñatti . suṇātu me bhante saṅgho saṅgho āyasmantaṃ dabbaṃ mallaputtaṃ senāsanapaññāpakañca bhattuddesakañca sammannati . yassāyasmato khamati āyasmato dabbassa mallaputtassa senāsanapaññāpakassa ca bhattuddesakassa ca sammati so tuṇhassa yassa nakkhamati so bhāseyya . sammato saṅghena āyasmā dabbo mallaputto senāsanapaññāpako ca bhattuddesako ca khamati saṅghassa tasmā tuṇhī . evametaṃ Dhārayāmīti. [593] Sammato cāyasmā ^1- dabbo mallaputto sabhāgānaṃ sabhāgānaṃ ^2- bhikkhūnaṃ ekajjhaṃ senāsanaṃ paññāpeti ye te bhikkhū suttantikā tesaṃ ekajjhaṃ senāsanaṃ paññāpeti te aññamaññaṃ suttantaṃ saṅgāyissantīti ye te bhikkhū vinayadharā tesaṃ ekajjhaṃ senāsanaṃ paññāpeti te aññamaññaṃ vinayaṃ vinicchinissantīti ye te bhikkhū dhammakathikā tesaṃ ekajjhaṃ senāsanaṃ paññāpeti te aññamaññaṃ dhammaṃ sākacchissantīti ye te bhikkhū jhāyino tesaṃ ekajjhaṃ senāsanaṃ paññāpeti te aññamaññaṃ na byābādhissantīti ye te bhikkhū tiracchānakathikā kāyadaḷhibahulā ^3- viharanti tesampi ekajjhaṃ senāsanaṃ paññāpeti imāyapīme ^4- āyasmantā ^5- ratiyā acchissantīti yepi te bhikkhū vikāle āgacchanti tesampi tejodhātuṃ samāpajjitvā teneva ālokena senāsanaṃ paññāpeti . Apissu bhikkhū sañcicca vikāle āgacchanti mayaṃ āyasmato dabbassa mallaputtassa iddhipāṭihāriyaṃ passissāmāti. {593.1} Te āyasmantaṃ dabbaṃ mallaputtaṃ upasaṅkamitvā evaṃ vadenti amhākaṃ āvuso dabba senāsanaṃ paññāpehīti . Te āyasmā dabbo mallaputto evaṃ vadeti kattha āyasmantā icchanti kattha paññāpemīti . te sañcicca dūre apadissanti amhākaṃ āvuso dabba gijjhakūṭe pabbate ^6- @Footnote: ¹ Ma. ca panāyasmā. Yu. ca āyasmā . ² Ma. Yu. ayaṃ pāṭho natthi. @³ Yu. kāyadaḷhībahulā . ⁴ Ma. Yu. imāyapime . ⁵ Ma. āyasmanto. @⁶ Yu. ayaṃ pāṭho na dissati. Senāsanaṃ paññāpehi . amhākaṃ āvuso dabba ^1- corappapāte senāsanaṃ paññāpehi . amhākaṃ āvuso dabba isigilipasse kāḷasilāyaṃ senāsanaṃ paññāpehi . amhākaṃ āvuso dabba vebhārapasse sattapaṇṇaguhāyaṃ senāsanaṃ paññāpehi . amhākaṃ āvuso dabba sītavane sappasoṇḍikapabbhāre senāsanaṃ paññāpehi . Amhākaṃ āvuso dabba gomaṭakandarāyaṃ senāsanaṃ paññāpehi . Amhākaṃ āvuso dabba tiṇḍukakandarāyaṃ ^2- senāsanaṃ paññāpehi . Amhākaṃ āvuso dabba kapotakandarāyaṃ ^3- senāsanaṃ paññāpehi . Amhākaṃ āvuso dabba tapodārāme senāsanaṃ paññāpehi . Amhākaṃ āvuso dabba jīvakambavane senāsanaṃ paññāpehi . amhākaṃ āvuso dabba maddakucchimhi migadāye senāsanaṃ paññāpehīti. {593.2} Tesaṃ āyasmā dabbo mallaputto tejodhātuṃ samāpajjitvā aṅguliyā jalamānāya purato purato gacchati . Tepi teneva ālokena āyasmato dabbassa mallaputtassa piṭṭhito piṭṭhito gacchanti . tesaṃ āyasmā dabbo mallaputto evaṃ senāsanaṃ paññāpeti ayaṃ mañco idaṃ pīṭhaṃ ayaṃ bhisī idaṃ bimbohanaṃ idaṃ vaccaṭṭhānaṃ idaṃ passāvaṭṭhānaṃ idaṃ pānīyaṃ idaṃ paribhojanīyaṃ ayaṃ kattaradaṇḍo idaṃ saṅghassa katikasaṇṭhānaṃ imaṃ kālaṃ @Footnote: ¹ ito paraṃ dabbātyālapanaṃ sabbattha na dissati . ² Yu. Rā. tindukakandarāyaṃ. @³ Yu. tapodakandarāyaṃ. Pavisitabbaṃ imaṃ kālaṃ nikkhamitabbanti . tesaṃ āyasmā dabbo mallaputto evaṃ senāsanaṃ paññāpetvā punadeva veḷuvanaṃ paccāgacchati. [594] Tena kho pana samayena mettiyabhummajakā ^1- bhikkhū navakā ceva honti appapuññā ca . yāni saṅghassa lāmakāni senāsanāni tāni tesaṃ ^2- pāpuṇanti lāmakāni ca bhattāni. Tena kho pana samayena rājagahe manussā icchanti therānaṃ bhikkhūnaṃ abhisaṅkhārikaṃ dātuṃ sappimpi telampi uttaribhaṅgampi mettiyabhummajakānaṃ pana bhikkhūnaṃ pākatikaṃ denti yathāraddhaṃ kāṇājakaṃ bilaṅgadutiyaṃ . te pacchābhattaṃ piṇḍapātapaṭikkantā there bhikkhū pucchanti tumhākaṃ āvuso bhattagge kiṃ ahosi tumhākaṃ kiṃ nāhosīti ^3- . ekacce therā evaṃ vadenti amhākaṃ āvuso sappi ahosi telaṃ ahosi uttaribhaṅgaṃ ahosīti . Mettiyabhummajakā pana bhikkhū evaṃ vadenti amhākaṃ āvuso na kiñci ahosi pākatikaṃ yathāraddhaṃ kāṇājakaṃ bilaṅgadutiyanti. [595] Tena kho pana samayena kalyāṇabhattiko gahapati saṅghassa catukkabhattaṃ deti niccabhattaṃ . so bhattagge saputtadāro upatiṭṭhitvā parivisati . aññe odanena pucchanti aññe sūpena pucchanti aññe telena pucchanti aññe uttaribhaṅgena pucchanti. [596] Tena kho pana samayena kalyāṇabhattikassa gahapatino bhattaṃ svātanāya mettiyabhummajakānaṃ bhikkhūnaṃ uddiṭṭhaṃ hoti . @Footnote: ¹ Ma. sabbavāre mettiyabhūmajakā . ² Ma. tesaṃ tāni . ³ Ma. Yu. kiṃ ahosīti. @nasaddo na dissati. Athakho kalyāṇabhattiko gahapati ārāmaṃ agamāsi kenacideva karaṇīyena yenāyasmā ^1- dabbo mallaputto tenupasaṅkami upasaṅkamitvā āyasmantaṃ dabbaṃ mallaputtaṃ abhivādetvā ekamantaṃ nisīdi . Ekamantaṃ nisinnaṃ kho kalyāṇabhattikaṃ gahapatiṃ āyasmā dabbo mallaputto dhammiyā kathāya sandassesi samādapesi samuttejesi sampahaṃsesi . athakho kalyāṇabhattiko gahapati āyasmatā dabbena mallaputtena dhammiyā kathāya sandassito samādapito samuttejito sampahaṃsito āyasmantaṃ dabbaṃ mallaputtaṃ etadavoca kassa bhante amhākaṃ ghare svātanāya bhattaṃ uddiṭṭhanti . mettiyabhummajakānaṃ kho gahapati bhikkhūnaṃ tumhākaṃ ghare svātanāya bhattaṃ uddiṭṭhanti. {596.1} Athakho kalyāṇabhattiko gahapati anattamano ahosi kathaṃ hi nāma pāpabhikkhū amhākaṃ ghare bhuñjissantīti gharaṃ gantvā dāsiṃ āṇāpesi ye je sve bhattikā āgacchanti ^[2]- koṭṭhake āsanaṃ paññāpetvā kāṇājakena bilaṅgadutiyena parivisāti . evaṃ ayyāti kho sā dāsī kalyāṇabhattikassa gahapatino paccassosi . Athakho mettiyabhummajakā bhikkhū hiyyo kho āvuso amhākaṃ kalyāṇabhattikassa gahapatino bhattaṃ uddiṭṭhaṃ sve amhe ^3- kalyāṇabhattiko gahapati saputtadāro upatiṭṭhitvā parivisissati aññe odanena pucchissanti aññe sūpena pucchissanti aññe telena pucchissanti aññe uttaribhaṅgena pucchissantīti . te teneva @Footnote: ¹ Ma. so yenāyasmā . ² Ma. te . ³ Yu. amhākaṃ. Somanassena na cittarūpaṃ rattiyā supiṃsu . athakho mettiyabhummajakā bhikkhū pubbaṇhasamayaṃ nivāsetvā pattacīvaramādāya yena kalyāṇabhattikassa gahapatino nivesanaṃ tenupasaṅkamiṃsu . addasā kho sā dāsī mettiyabhummajake bhikkhū dūrato va āgacchante disvāna koṭṭhake āsanaṃ paññāpetvā mettiyabhummajake bhikkhū etadavoca nisīdatha bhanteti . athakho mettiyabhummajakānaṃ bhikkhūnaṃ etadahosi nissaṃsayaṃ kho na tāva bhattaṃ siddhaṃ bhavissati yathā mayaṃ koṭṭhake nisīdāpiyāmāti ^2-. {596.2} Athakho sā dāsī kāṇājakena bilaṅgadutiyena upagañchi bhuñjatha bhanteti . mayaṃ kho bhagini niccabhattikāti . jānāmi ayyā niccabhattikāti ^3- apicāhaṃ hiyyo va gahapatinā āṇattā ye je sve bhattikā āgacchanti ^[4]- koṭṭhake āsanaṃ paññāpetvā kāṇājakena bilaṅgadutiyena parivisāti bhuñjatha bhanteti . athakho mettiyabhummajakā bhikkhū hiyyo kho āvuso kalyāṇabhattiko gahapati ārāmaṃ agamāsi dabbassa mallaputtassa santike nissaṃsayaṃ kho mayaṃ dabbena mallaputtena gahapatino santike ^5- paribhinnāti. Te teneva domanassena na cittarūpaṃ bhuñjiṃsu. {596.3} Athakho mettiyabhummajakā bhikkhū pacchābhattaṃ piṇḍapātapaṭikkantā ārāmaṃ gantvā pattacīvaraṃ paṭisāmetvā bahārāmakoṭṭhake saṅghāṭipallatthikāya nisīdiṃsu tuṇhībhūtā maṅkubhūtā pattakkhandhā adhomukhā @Footnote: ¹ sabbattha nisīdāpeyyāmāti dissati . ² Yu. itisaddo natthi . ³ Ma. te. @⁴ Ma. Yu. antare. Pajjhāyantā appaṭibhāṇā . athakho mettiyā bhikkhunī yena mettiyabhummajakā bhikkhū tenupasaṅkami upasaṅkamitvā mettiyabhummajake bhikkhū etadavoca vandāmi ayyāti . evaṃ vutte mettiyabhummajakā bhikkhū nālapiṃsu . dutiyampi kho .pe. tatiyampi kho mettiyā bhikkhunī mettiyabhummajake bhikkhū etadavoca vandāmi ayyāti . Tatiyampi kho mettiyabhummajakā bhikkhū nālapiṃsu . kyāhaṃ ayyānaṃ aparajjhāmi kissa maṃ ayyā nālapantīti . tathā hi pana tvaṃ bhagini amhe dabbena mallaputtena viheṭhiyamāne ajjhupekkhasīti . kyāhaṃ ayyā karomīti. {596.4} Sace kho tvaṃ bhagini iccheyyāsi ajjeva bhagavā āyasmantaṃ dabbaṃ mallaputtaṃ nāsāpeyyāti . kyāhaṃ ayyā karomi kiṃ mayā sakkā kātunti . ehi tvaṃ bhagini yena bhagavā tenupasaṅkama ^1- upasaṅkamitvā bhagavantaṃ evaṃ vadehi idaṃ bhante nacchannaṃ nappaṭirūpaṃ yāyaṃ bhante disā abhayā anītikā anupaddavā sayaṃ disā sabhayā saītikā saupaddavā yato nīvātaṃ tato pavātaṃ udakaṃ maññe ādittaṃ ayyenamhi dabbena mallaputtena dūsitāti . evaṃ ayyāti kho mettiyā bhikkhunī mettiyabhummajakānaṃ bhikkhūnaṃ paṭissuṇitvā yena bhagavā tenupasaṅkami upasaṅkamitvā bhagavantaṃ abhivādetvā ekamantaṃ aṭṭhāsi . ekamantaṃ ṭhitā kho sā ^2- mettiyā bhikkhunī bhagavantaṃ @Footnote: ¹ Ma. tenupasaṅkami . ² yuropiyapotthake ca amhākaṃ mahāvibhaṅge ca sāti na dissati. Etadavoca idaṃ bhante nacchannaṃ nappaṭirūpaṃ yāyaṃ bhante disā abhayā anītikā anupaddavā sāyaṃ disā sabhayā saītikā saupaddavā yato nīvātaṃ tato pavātaṃ udakaṃ maññe ādittaṃ ayyenamhi dabbena mallaputtena dūsitāti. [597] Athakho bhagavā etasmiṃ nidāne etasmiṃ pakaraṇe bhikkhusaṅghaṃ sannipātāpetvā āyasmantaṃ dabbaṃ mallaputtaṃ paṭipucchi sarasi tvaṃ dabba evarūpaṃ kattā yathāyaṃ bhikkhunī āhāti . yathā maṃ bhante bhagavā jānātīti . dutiyampi kho bhagavā .pe. tatiyampi kho bhagavā āyasmantaṃ dabbaṃ mallaputtaṃ etadavoca sarasi tvaṃ dabba evarūpaṃ kattā yathāyaṃ bhikkhunī āhāti . yathā maṃ bhante bhagavā jānātīti . na kho dabba dabbā evaṃ nibbeṭhenti sace tayā kataṃ katanti vadehi sace akataṃ akatanti vadehīti . yatohaṃ bhante jāto nābhijānāmi supinantenāpi methunaṃ dhammaṃ paṭisevitā pageva jāgaroti. {597.1} Athakho bhagavā bhikkhū āmantesi tenahi bhikkhave mettiyaṃ bhikkhuniṃ nāsetha ime ca bhikkhū anuyuñjathāti . Idaṃ vatvā bhagavā uṭṭhāyāsanā vihāraṃ pāvisi . athakho te bhikkhū mettiyaṃ bhikkhuniṃ nāsesuṃ . athakho mettiyabhummajakā bhikkhū te bhikkhū etadavocuṃ mā āvuso ^3- mettiyaṃ bhikkhuniṃ nāsetha na sā kiñci aparajjhati amhehi sā ussāhitā kupitehi anattamanehi cāvanādhippāyehīti . kiṃ pana tumhe āvuso āyasmantaṃ @Footnote: ¹ Ma. Yu. māvuso. Dabbaṃ mallaputtaṃ amūlikāya sīlavipattiyā anuddhaṃsethāti . Evamāvusoti. Ye te bhikkhū appicchā .pe. te ujjhāyanti khīyanti vipācenti kathaṃ hi nāma mettiyabhummajakā bhikkhū āyasmantaṃ dabbaṃ mallaputtaṃ amūlikāya sīlavipattiyā anuddhaṃsessantīti . athakho te bhikkhū bhagavato etamatthaṃ ārocesuṃ . saccaṃ kira bhikkhave mettiyabhummajakā bhikkhū dabbaṃ mallaputtaṃ amūlikāya sīlavipattiyā anuddhaṃsentīti . Saccaṃ bhagavāti .pe. vigarahitvā dhammiṃ kathaṃ katvā bhikkhū āmantesi tenahi bhikkhave saṅgho dabbassa mallaputtassa sativepullappattassa sativinayaṃ detu. {597.2} Evañca pana bhikkhave dātabbo. Tena bhikkhave dabbena mallaputtena saṅghaṃ upasaṅkamitvā ekaṃsaṃ uttarāsaṅgaṃ karitvā vuḍḍhānaṃ bhikkhūnaṃ pāde vanditvā ukkuṭikaṃ nisīditvā añjaliṃ paggahetvā evamassa vacanīyo ime maṃ bhante mettiyabhummajakā bhikkhū amūlikāya sīlavipattiyā anuddhaṃsenti sohaṃ bhante sativepullappatto saṅghaṃ sativinayaṃ yācāmīti . dutiyampi yācitabbo tatiyampi yācitabbo ime maṃ bhante mettiyabhummajakā bhikkhū amūlikāya sīlavipattiyā anuddhaṃsenti sohaṃ sativepullappatto tatiyampi bhante saṅghaṃ ^1- sativinayaṃ yācāmīti. [598] Byattena bhikkhunā paṭibalena saṅgho ñāpetabbo @Footnote: ¹ Ma. sohaṃ bhante sativepullappatto tatiyampi bhante saṅghaṃ. Yu. sohaṃ bhante @sativepullappatto tatiyampi saṅghaṃ. {598.1} Suṇātu me bhante saṅgho ime mettiyabhummajakā bhikkhū āyasmantaṃ dabbaṃ mallaputtaṃ amūlikāya sīlavipattiyā anuddhaṃsenti . Āyasmā dabbo mallaputto sativepullappatto saṅghaṃ sativinayaṃ yācati. Yadi saṅghassa pattakallaṃ saṅgho āyasmato dabbassa mallaputtassa sativepullappattassa sativinayaṃ dadeyya. Esā ñatti. {598.2} Suṇātu me bhante saṅgho ime mettiyabhummajakā bhikkhū āyasmantaṃ dabbaṃ mallaputtaṃ amūlikāya sīlavipattiyā anuddhaṃsenti . Āyasmā dabbo mallaputto sativepullappatto saṅghaṃ sativinayaṃ yācati. Saṅgho āyasmato dabbassa mallaputtassa sativepullappattassa sativinayaṃ deti . yassāyasmato khamati āyasmato dabbassa mallaputtassa sativepullappattassa sativinayassa dānaṃ so tuṇhassa yassa nakkhamati so bhāseyya. {598.3} Dutiyampi etamatthaṃ vadāmi .pe. tatiyampi etamatthaṃ vadāmi . suṇātu me bhante saṅgho ime mettiyabhummajakā bhikkhū āyasmantaṃ dabbaṃ mallaputtaṃ amūlikāya sīlavipattiyā anuddhaṃsenti . Āyasmā dabbo mallaputto sativepullappatto saṅghaṃ sativinayaṃ yācati . saṅgho āyasmato dabbassa sativepullappattassa sativinayaṃ deti . yassāyasmato khamati āyasmato dabbassa mallaputtassa sativepullappattassa sativinayassa dānaṃ so tuṇhassa yassa nakkhamati so bhāseyya. {598.4} Dinno saṅghena āyasmato dabbassa mallaputtassa Sativepullappattassa sativinayo khamati saṅghassa tasmā tuṇhī . Evametaṃ dhārayāmīti. [599] Pañcimāni bhikkhave dhammikāni sativinayassa dānāni suddho hoti bhikkhu anāpattiko anuvadanti ca naṃ yācati ca tassa saṅgho sativinayaṃ deti dhammena samaggena ^1- imāni kho bhikkhave pañca dhammikāni sativinayassa dānānīti. [600] Tena kho pana samayena gaggo bhikkhu ummattako hoti cittavipariyāsakato . tena ummattakena cittavipariyāsakatena bahuṃ assāmaṇakaṃ ajjhāciṇṇaṃ hoti bhāsitaparikkantaṃ . bhikkhū gaggaṃ bhikkhuṃ ummattakena cittavipariyāsakatena ajjhāciṇṇena āpattiyā codenti saratāyasmā evarūpiṃ āpattiṃ āpajjitāti . so evaṃ vadeti ahaṃ kho āvuso ummattako ahosiṃ cittavipariyāsakato tena me ummattakena cittavipariyāsakatena bahuṃ assāmaṇakaṃ ajjhāciṇṇaṃ bhāsitaparikkantaṃ nāhantaṃ sarāmi mūḷhena me etaṃ katanti. {600.1} Evampi naṃ vuccamānā codenteva saratāyasmā evarūpiṃ āpattiṃ āpajjitāti . ye te bhikkhū appicchā .pe. Te ujjhāyanti khīyanti vipācenti kathaṃ hi nāma bhikkhū gaggaṃ bhikkhuṃ ummattakena cittavipariyāsakatena ajjhāciṇṇena āpattiyā codessanti saratāyasmā evarūpiṃ āpattiṃ āpajjitāti so evaṃ @Footnote: ¹ Yu. samaggo. Vadeti ahaṃ kho āvuso ummattako ahosiṃ cittavipariyāsakato tena me ummattakena cittavipariyāsakatena bahuṃ assāmaṇakaṃ ajjhāciṇṇaṃ bhāsitaparikkantaṃ nāhantaṃ ^1- sarāmi mūḷhena me etaṃ katanti evampi naṃ vuccamānā codenteva saratāyasmā evarūpiṃ āpattiṃ āpajjitāti. {600.2} Athakho te bhikkhū bhagavato etamatthaṃ ārocesuṃ. Saccaṃ kira bhikkhave .pe. saccaṃ bhagavāti .pe. vigarahitvā dhammiṃ kathaṃ katvā bhikkhū āmantesi tenahi bhikkhave saṅgho gaggassa bhikkhuno amūḷhassa amūḷhavinayaṃ detu . evañca pana bhikkhave dātabbo . tena bhikkhave gaggena bhikkhunā saṅghaṃ upasaṅkamitvā ekaṃsaṃ uttarāsaṅgaṃ karitvā vuḍḍhānaṃ bhikkhūnaṃ pāde vanditvā ukkuṭikaṃ nisīditvā añjaliṃ paggahetvā evamassa vacanīyo ahaṃ bhante ummattako ahosiṃ cittavipariyāsakato tena me ummattakena cittavipariyāsakatena bahuṃ assāmaṇakaṃ ajjhāciṇṇaṃ bhāsitaparikkantaṃ maṃ ^1- bhikkhū ummattakena cittavipariyāsakatena ajjhāciṇṇena āpattiyā codenti saratāyasmā evarūpiṃ āpattiṃ āpajjitāti tyāhaṃ evaṃ vadāmi ahaṃ kho āvuso ummattako ahosiṃ cittavipariyāsakato tena me ummattakena cittavipariyāsakatena bahuṃ assāmaṇakaṃ ajjhāciṇṇaṃ bhāsitaparikkantaṃ nāhantaṃ ^1- sarāmi mūḷhena me etaṃ katanti evampi maṃ vuccamānā codenteva saratāyasmā evarūpiṃ āpattiṃ āpajjitāti @Footnote: ¹ Yu. taṃ maṃ. Sohaṃ bhante amūḷho saṅghaṃ amūḷhavinayaṃ yācāmīti. {600.3} Dutiyampi yācitabbo .pe. tatiyampi yācitabbo ahaṃ bhante ummattatho ahosiṃ cittavipariyāsakato tena me ummattakena cittavipariyāsakatena bahuṃ assāmaṇakaṃ ajjhāciṇṇaṃ bhāsitaparikkantaṃ maṃ bhikkhū ummattakena cittavipariyāsakatena ajjhāciṇṇena āpattiyā codenti saratāyasmā evarūpiṃ āpattiṃ āpajjitāti tyāhaṃ evaṃ vadāmi ahaṃ kho āvuso ummattako ahosiṃ cittavipariyāsakato tena me ummattakena cittavipariyāsakatena bahuṃ assāmaṇakaṃ ajjhāciṇṇaṃ bhāsitaparikkantaṃ nāhantaṃ sarāmi mūḷhena me etaṃ katanti evampi maṃ vuccamānā codenteva saratāyasmā evarūpiṃ āpattiṃ āpajjitāti sohaṃ ^[1]- amūḷho tatiyampi bhante saṅghaṃ amūḷhavinayaṃ yācāmīti. [601] Byattena bhikkhunā paṭibalena saṅgho ñāpetabbo. {601.1} Suṇātu me bhante saṅgho ayaṃ gaggo bhikkhu ummattako ahosi cittavipariyāsakato tena ummattakena cittavipariyāsakatena bahuṃ assāmaṇakaṃ ajjhāciṇṇaṃ bhāsitaparikkantaṃ . bhikkhū gaggaṃ bhikkhuṃ ummattakena cittavipariyāsakatena ajjhāciṇṇena āpattiyā codenti saratāyasmā evarūpiṃ āpattiṃ āpajjitāti . so evaṃ vadeti ahaṃ kho āvuso ummattako ahosiṃ cittavipariyāsakato tena me ummattakena cittavipariyāsakatena bahuṃ assāmaṇakaṃ @Footnote: ¹ Ma. Yu. bhante. Ajjhāciṇṇaṃ bhāsitaparikkantaṃ nāhantaṃ sarāmi mūḷhena me etaṃ katanti . evampi naṃ vuccamānā codenteva saratāyasmā evarūpiṃ āpattiṃ āpajjitāti . so amūḷho saṅghaṃ amūḷhavinayaṃ yācati . yadi saṅghassa pattakallaṃ saṅgho gaggassa bhikkhuno amūḷhassa amūḷhavinayaṃ dadeyya. Esā ñatti. {601.2} Suṇātu me bhante saṅgho ayaṃ gaggo bhikkhu ummattato ahosi cittavipariyāsakato tena ummattakena cittavipariyāsakatena bahuṃ assāmaṇakaṃ ajjhāciṇṇaṃ bhāsitaparikkantaṃ . bhikkhū gaggaṃ bhikkhuṃ ummattakena cittavipariyāsakatena ajjhāciṇṇena āpattiyā codenti ^1- saratāyasmā evarūpiṃ āpattiṃ āpajjitāti . so evaṃ vadeti ahaṃ kho āvuso ummattako ahosiṃ cittavipariyāsakato tena me ummattakena cittavipariyāsakatena bahuṃ assāmaṇakaṃ ajjhāciṇṇaṃ bhāsitaparikkantaṃ nāhantaṃ sarāmi mūḷhena me etaṃ katanti . Evampi naṃ vuccamānā codenteva saratāyasmā evarūpiṃ āpattiṃ āpajjitāti . so amūḷho saṅghaṃ amūḷhavinayaṃ yācati . saṅgho gaggassa bhikkhuno amūḷhassa amūḷhavinayaṃ deti . yassāyasmato khamati gaggassa bhikkhuno amūḷhassa amūḷhavinayassa dānaṃ so tuṇhassa yassa nakkhamati so bhāseyya. {601.3} Dutiyampi etamatthaṃ vadāmi .pe. tatiyampi etamatthaṃ vadāmi .pe. dinno saṅghena gaggassa bhikkhuno amūḷhassa amūḷhavinayo khamati saṅghassa tasmā @Footnote: ¹ Ma. codenteva. Tuṇhī. Evametaṃ dhārayāmīti. [602] Tīṇīmāni bhikkhave adhammikāni amūḷhavinayassa dānāni tīṇi dhammikāni . katamāni tīṇi adhammikāni amūḷhavinayassa dānāni . Idha pana bhikkhave bhikkhu āpattiṃ āpanno hoti . tamenaṃ codeti saṅgho vā sambahulā vā ekapuggalo vā saratāyasmā evarūpiṃ āpattiṃ āpajjitāti . so saramāno va evaṃ vadeti na kho ahaṃ āvuso sarāmi evarūpiṃ āpattiṃ āpajjitāti . Tassa saṅgho amūḷhavinayaṃ deti. Adhammikaṃ amūḷhavinayassa dānaṃ. [603] Idha pana bhikkhave bhikkhu āpattiṃ āpanno hoti . Tamenaṃ codeti saṅgho vā sambahulā vā ekapuggalo vā saratāyasmā evarūpiṃ āpattiṃ āpajjitāti . so saramāno va evaṃ vadeti sarāmi kho ahaṃ āvuso yathāsupinantenāti . tassa saṅgho amūḷhavinayaṃ deti. Adhammikaṃ amūḷhavinayassa dānaṃ. [604] Idha pana bhikkhave bhikkhu āpattiṃ āpanno hoti . Tamenaṃ codeti saṅgho vā sambahulā vā ekapuggalo vā saratāyasmā evarūpiṃ āpattiṃ āpajjitāti . so anummattako ummattakālayaṃ karoti ahaṃpi ^[1]- evaṃ karomi tumhepi evaṃ karotha mayhampi etaṃ kappati tumhākampetaṃ kappatīti . tassa saṅgho amūḷhavinayaṃ deti . adhammikaṃ amūḷhavinayassa dānaṃ . Imāni tīṇi adhammikāni amūḷhavinayassa dānāni. @Footnote: ¹ Ma. kho. [605] Katamāni tīṇi dhammikāni amūḷhavinayassa dānāni . Idha pana bhikkhave bhikkhu ummattako hoti cittavipariyāsakato . Tena ummattakena cittavipariyāsakatena bahuṃ assāmaṇakaṃ ajjhāciṇṇaṃ hoti bhāsitaparikkantaṃ . tamenaṃ codeti saṅgho vā sambahulā vā ekapuggalo vā saratāyasmā evarūpiṃ āpattiṃ āpajjitāti . So asaramāno va evaṃ vadeti na kho ahaṃ āvuso sarāmi evarūpiṃ āpattiṃ āpajjitāti . tassa saṅgho amūḷhavinayaṃ deti . Dhammikaṃ amūḷhavinayassa dānaṃ. [606] Idha pana bhikkhave bhikkhu ummattako hoti cittavipariyāsakato . tena ummattakena cittavipariyāsakatena bahuṃ assāmaṇakaṃ ajjhāciṇṇaṃ hoti bhāsitaparikkantaṃ . tamenaṃ codeti saṅgho vā sambahulā vā ekapuggalo vā saratāyasmā evarūpiṃ āpattiṃ āpajjitāti . so asaramāno va evaṃ vadeti sarāmi kho ahaṃ āvuso yathāsupinantenāti . tassa saṅgho amūḷhavinayaṃ deti. Dhammikaṃ amūḷhavinayassa dānaṃ. [607] Idha pana bhikkhave bhikkhu ummattako hoti cittavipariyāsakato. Tena ummattakena cittavipariyāsakatena bahuṃ assāmaṇakaṃ ajjhāciṇṇaṃ hoti bhāsitaparikkantaṃ . tamenaṃ codeti saṅgho vā sambahulā vā ekapuggalo vā saratāyasmā evarūpiṃ āpattiṃ āpajjitāti . so ummattako ummattakālayaṃ karoti ahampi Evaṃ karomi tumhepi evaṃ karotha mayhampi etaṃ kappati tumhākampetaṃ kappatīti . tassa saṅgho amūḷhavinayaṃ deti . Dhammikaṃ amūḷhavinayassa dānaṃ . imāni tīṇi dhammikāni amūḷhavinayassa dānānīti. [608] Tena kho pana samayena chabbaggiyā bhikkhū appaṭiññāya bhikkhūnaṃ kammāni karonti tajjanīyampi niyassampi pabbājanīyampi paṭisāraṇīyampi ukkhepanīyampi . ye te bhikkhū appicchā .pe. Te ujjhāyanti khīyanti vipācenti kathaṃ hi nāma chabbaggiyā bhikkhū appaṭiññāya bhikkhūnaṃ kammāni karissanti tajjanīyampi niyassampi pabbājanīyampi paṭisāraṇīyampi ukkhepanīyampīti . athakho te bhikkhū bhagavato etamatthaṃ ārocesuṃ . saccaṃ kira bhikkhave .pe. Saccaṃ bhagavāti .pe. vigarahitvā dhammiṃ kathaṃ katvā bhikkhū āmantesi na bhikkhave appaṭiññāya bhikkhūnaṃ kammaṃ kātabbaṃ tajjanīyaṃ vā niyassaṃ vā pabbājanīyaṃ vā paṭisāraṇīyaṃ vā ukkhepanīyaṃ vā yo kareyya āpatti dukkaṭassa. [609] Evaṃ kho bhikkhave adhammikaṃ hoti paṭiññātakaraṇaṃ evaṃ dhammikaṃ . kathañca bhikkhave adhammikaṃ hoti paṭiññātakaraṇaṃ . Bhikkhu pārājikaṃ ajjhāpanno hoti . tamenaṃ codeti saṅgho vā sambahulā vā ekapuggalo vā pārājikaṃ āyasmā ajjhāpannoti. So evaṃ vadeti na kho ahaṃ āvuso pārājikaṃ Ajjhāpanno saṅghādisesaṃ ajjhāpannoti . taṃ saṅgho saṅghādisesena kāreti . adhammikaṃ paṭiññātakaraṇaṃ . bhikkhu pārājikaṃ ajjhāpanno hoti . tamenaṃ codeti saṅgho vā sambahulā vā ekapuggalo vā pārājikaṃ āyasmā ajjhāpannoti . so evaṃ vadeti na kho ahaṃ āvuso pārājikaṃ ajjhāpanno thullaccayaṃ ajjhāpannoti . taṃ saṅgho thullaccayena kāreti . Adhammikaṃ paṭiññātakaraṇaṃ. {609.1} Bhikkhu pārājikaṃ ajjhāpanno hoti . tamenaṃ codeti saṅgho vā sambahulā vā ekapuggalo vā pārājikaṃ āyasmā ajjhāpannoti . so evaṃ vadeti na kho ahaṃ āvuso pārājikaṃ ajjhāpanno pācittiyaṃ ajjhāpannoti . taṃ saṅgho pācittiyena kāreti . adhammikaṃ paṭiññātakaraṇaṃ . bhikkhu pārājikaṃ ajjhāpanno hoti . tamenaṃ codeti saṅgho vā sambahulā vā ekapuggalo vā pārājikaṃ āyasmā ajjhāpannoti . so evaṃ vadeti na kho ahaṃ āvuso pārājikaṃ ajjhāpanno pāṭidesanīyaṃ ajjhāpannoti . taṃ saṅgho pāṭidesanīyena kāreti . adhammikaṃ paṭiññātakaraṇaṃ . bhikkhu pārājikaṃ ajjhāpanno hoti . tamenaṃ codeti saṅgho vā sambahulā vā ekapuggalo vā pārājikaṃ āyasmā ajjhāpannoti . so evaṃ vadeti na kho ahaṃ āvuso pārājikaṃ ajjhāpanno dukkaṭaṃ ajjhāpannoti . Taṃ saṅgho dukkaṭena kāreti . adhammikaṃ paṭiññātakaraṇaṃ . bhikkhu Pārājikaṃ ajjhāpanno hoti . tamenaṃ codeti saṅgho vā sambahulā vā ekapuggalo vā pārājikaṃ āyasmā ajjhāpannoti . So evaṃ vadeti na kho ahaṃ āvuso pārājikaṃ ajjhāpanno dubbhāsitaṃ ajjhāpannoti . taṃ saṅgho dubbhāsitena kāreti . Adhammikaṃ paṭiññātakaraṇaṃ. {609.2} Bhikkhu saṅghādisesaṃ ajjhāpanno .pe. thullaccayaṃ .pe. pācittiyaṃ .pe. pāṭidesanīyaṃ .pe. dukkaṭaṃ .pe. dubbhāsitaṃ ajjhāpanno hoti . tamenaṃ codeti saṅgho vā sambahulā vā ekapuggalo vā dubbhāsitaṃ āyasmā ajjhāpannoti . so evaṃ vadeti na kho ahaṃ āvuso dubbhāsitaṃ ajjhāpanno pārājikaṃ ajjhāpannoti . taṃ saṅgho pārājikena kāreti . adhammikaṃ paṭiññātakaraṇaṃ . bhikkhu dubbhāsitaṃ ajjhāpanno hoti . tamenaṃ codeti saṅgho vā sambahulā vā ekapuggalo vā dubbhāsitaṃ āyasmā ajjhāpannoti . so evaṃ vadeti na kho ahaṃ āvuso dubbhāsitaṃ ajjhāpanno saṅghādisesaṃ .pe. Thullaccayaṃ .pe. pācittiyaṃ .pe. pāṭidesanīyaṃ .pe. dukkaṭaṃ ajjhāpannoti . taṃ saṅgho dukkaṭena kāreti . adhammikaṃ paṭiññātakaraṇaṃ. Evaṃ kho bhikkhave adhammikaṃ hoti paṭiññātakaraṇaṃ. [610] Kathañca bhikkhave dhammikaṃ hoti paṭiññātakaraṇaṃ . bhikkhu pārājikaṃ ajjhāpanno hoti . tamenaṃ codeti saṅgho vā sambahulā vā ekapuggalo vā pārājikaṃ āyasmā ajjhāpannoti . So evaṃ vadeti āmāvuso ^1- pārājikaṃ ajjhāpannoti . taṃ saṅgho pārājikena kāreti . dhammikaṃ paṭiññātakaraṇaṃ . bhikkhu saṅghādisesaṃ .pe. thullaccayaṃ .pe. pācittiyaṃ .pe. Pāṭidesanīyaṃ .pe. Dukkaṭaṃ .pe. dubbhāsitaṃ ajjhāpanno hoti . tamenaṃ codeti saṅgho vā sambahulā vā ekapuggalo vā dubbhāsitaṃ āyasmā ajjhāpannoti . so evaṃ vadeti āmāvuso ^1- dubbhāsitaṃ ajjhāpannoti. Taṃ saṅgho dubbhāsitena kāreti . dhammikaṃ paṭiññātakaraṇaṃ . Evaṃ kho bhikkhave dhammikaṃ hoti paṭiññātakaraṇanti. [611] Tena kho pana samayena bhikkhū saṅghamajjhe bhaṇḍanajātā kalahajātā vivādāpannā aññamaññaṃ mukhasattīhi vitudentā viharanti na sakkonti taṃ adhikaraṇaṃ vūpasametuṃ . te bhikkhū bhagavato etamatthaṃ ārocesuṃ . anujānāmi bhikkhave evarūpaṃ adhikaraṇaṃ yebhuyyasikāya vūpasametuṃ . pañcahaṅgehi samannāgato bhikkhu salākagāhāpako sammannitabbo yo na chandāgatiṃ gaccheyya na dosāgatiṃ gaccheyya na mohāgatiṃ gaccheyya na bhayāgatiṃ gaccheyya gahitāgahitañca jāneyya . evañca pana bhikkhave sammannitabbo . paṭhamaṃ bhikkhu yācitabbo yācitvā byattena bhikkhunā paṭibalena saṅgho ñāpetabbo suṇātu me bhante saṅgho yadi saṅghassa pattakallaṃ saṅgho itthannāmaṃ bhikkhuṃ salākagāhāpakaṃ sammanneyya . @Footnote: ¹ Ma. āma āvuso. Esā ñatti . suṇātu me bhante saṅgho saṅgho itthannāmaṃ bhikkhuṃ salākagāhāpakaṃ sammannati . yassāyasmato khamati itthannāmassa bhikkhuno salākagāhāpakassa sammati so tuṇhassa yassa nakkhamati so bhāseyya . sammato saṅghena itthannāmo bhikkhu salākagāhāpako khamati saṅghassa tasmā tuṇhī. Evametaṃ dhārayāmīti. [612] Dasayime bhikkhave adhammikā salākagāhā dasa dhammikā ^1-. Katame dasa adhammikā salākagāhā . oramattakañca adhikaraṇaṃ hoti na ca gatigataṃ hoti na ca saritasāritaṃ hoti jānāti adhammavādī bahutarāti appevanāma adhammavādī bahutarā assūti jānāti saṅgho bhijjissatīti appevanāma saṅgho bhijjeyyāti adhammena gaṇhanti vaggā gaṇhanti na ca yathādiṭṭhiyā gaṇhanti ime dasa adhammikā salākagāhā. [613] Katame dasa dhammikā salākagāhā . na ca oramattakaṃ adhikaraṇaṃ hoti gatigatañca hoti saritasāritañca hoti jānāti dhammavādī bahutarāti appevanāma dhammavādī bahutarā assūti jānāti saṅgho na bhijjissatīti appevanāma saṅgho na bhijjeyyāti dhammena gaṇhanti samaggā gaṇhanti yathādiṭṭhiyā ca gaṇhanti ime dasa dhammikā salākagāhāti. [614] Tena kho pana samayena upavāḷo ^2- bhikkhu saṅghamajjhe @Footnote: ¹ Ma. dhammikā salākagāhā . ² upavāḷhotipi uvāḷotipi pāṭho dissati. Āpattiyā anuyuñjiyamāno avajānitvā paṭijānāti paṭijānitvā avajānāti aññena aññaṃ paṭicarati sampajānamusā bhāsati . Ye te bhikkhū appicchā .pe. te ujjhāyanti khīyanti vipācenti kathaṃ hi nāma upavāḷo bhikkhu saṅghamajjhe āpattiyā anuyuñjiyamāno avajānitvā paṭijānissati paṭijānitvā avajānissati aññena aññaṃ paṭicarissati sampajānamusā bhāsissatīti . athakho te bhikkhū bhagavato etamatthaṃ ārocesuṃ . saccaṃ kira bhikkhave .pe. Saccaṃ bhagavāti .pe. vigarahitvā dhammiṃ kathaṃ katvā bhikkhū āmantesi tenahi bhikkhave saṅgho upavāḷassa bhikkhuno tassapāpiyasikākammaṃ ^1- karotu . evañca pana bhikkhave kātabbaṃ . paṭhamaṃ upavāḷo bhikkhu codetabbo codetvā sāretabbo sāretvā āpatti āropetabbā ^2- āpattiṃ āropetvā byattena bhikkhunā paṭibalena saṅgho ñāpetabbo {614.1} suṇātu me bhante saṅgho ayaṃ upavāḷo bhikkhu saṅghamajjhe āpattiyā anuyuñjiyamāno avajānitvā paṭijānāti paṭijānitvā avajānāti aññena aññaṃ ^3- paṭicarati sampajānamusā bhāsati . yadi saṅghassa pattakallaṃ saṅgho upavāḷassa bhikkhuno tassapāpiyasikākammaṃ kareyya. Esā ñatti. {614.2} Suṇātu me bhante saṅgho ayaṃ upavāḷo bhikkhu saṅghamajjhe āpattiyā anuyuñjiyamāno avajānitvā paṭijānāti @Footnote: ¹ Yu. tassapāpiyyasikākammaṃ . ² Ma. Yu. āpattiṃ āropetabbo. @³ Ma. aññenaññaṃ. Paṭijānitvā avajānāti aññena aññaṃ paṭicarati sampajānamusā bhāsati . saṅgho upavāḷassa bhikkhuno tassapāpiyasikākammaṃ karoti . Yassāyasmato khamati upavāḷassa bhikkhuno tassapāpiyasikākammassa karaṇaṃ so tuṇhassa yassa nakkhamati so bhāseyya. {614.3} Dutiyampi etamatthaṃ vadāmi .pe. tatiyampi etamatthaṃ vadāmi .pe. kataṃ saṅghena upavāḷassa bhikkhuno tassapāpiyasikākammaṃ khamati saṅghassa tasmā tuṇhī evametaṃ dhārayāmīti. [615] Pañcimāni bhikkhave dhammikāni tassapāpiyasikākammassa karaṇāni asuci ca hoti alajjī ca sānuvādo ca tassa saṅgho tassapāpiyasikākammaṃ karoti dhammena samaggena imāni kho bhikkhave pañca dhammikāni tassapāpiyasikākammassa karaṇāni. [616] Tīhi bhikkhave aṅgehi samannāgataṃ tassapāpiyasikākammaṃ adhammakammañceva ^1- hoti avinayakammañca duvūpasantañca asammukhā kataṃ hoti appaṭipucchā kataṃ hoti appaṭiññāya kataṃ hoti imehi kho bhikkhave tīhaṅgehi samannāgataṃ tassapāpiyasikākammaṃ adhammakammañceva hoti avinayakammañca duvūpasantañca .pe. Aparehipi bhikkhave tīhaṅgehi samannāgataṃ tassapāpiyasikākammaṃ adhammakammañceva hoti avinayakammañca duvūpasantañca āpattiṃ anāropetvā kataṃ hoti adhammena kataṃ hoti vaggena kataṃ @Footnote: ¹ Ma. Yu. evasaddo na dissati. Hoti imehi kho bhikkhave tīhaṅgehi samannāgataṃ tassapāpiyasikākammaṃ adhammakammañceva hoti avinayakammañca duvūpasantañca. [617] Tīhi bhikkhave aṅgehi samannāgataṃ tassapāpiyasikākammaṃ dhammakammañceva ^1- hoti vinayakammañca suvūpasantañca sammukhā kataṃ hoti paṭipucchā kataṃ hoti paṭiññāya kataṃ hoti imehi kho bhikkhave tīhaṅgehi samannāgataṃ tassapāpiyasikākammaṃ dhammakammañceva hoti vinayakammañca suvūpasantañca .pe. aparehipi bhikkhave tīhaṅgehi samannāgataṃ tassapāpiyasikākammaṃ dhammakammañceva hoti vinayakammañca suvūpasantañca āpattiṃ āropetvā kataṃ hoti dhammena kataṃ hoti samaggena kataṃ hoti imehi kho bhikkhave tīhaṅgehi samannāgataṃ tassapāpiyasikākammaṃ dhammakammañceva ^1- hoti vinayakammañca suvūpasantañca. [618] Tīhi bhikkhave aṅgehi samannāgatassa bhikkhuno ākaṅkhamāno saṅgho tassapāpiyasikākammaṃ kareyya bhaṇḍanakārako hoti kalahakārako vivādakārako bhassakārako saṅghe adhikaraṇakārako bālo hoti abyatto āpattibahulo anapadāno gihisaṃsaṭṭho viharati ananulomikehi gihisaṃsaggehi imehi kho bhikkhave tīhaṅgehi samannāgatassa bhikkhuno ākaṅkhamāno saṅgho tassapāpiyasikākammaṃ kareyya. [619] Aparehipi bhikkhave tīhaṅgehi samannāgatassa bhikkhuno @Footnote: ¹ Ma. Yu. evasaddo na dissati. Ākaṅkhamāno saṅgho tassapāpiyasikākammaṃ kareyya adhisīle sīlavipanno hoti ajjhācāre ācāravipanno hoti atidiṭṭhiyā diṭṭhivipanno hoti imehi kho bhikkhave .pe. [620] Aparehipi bhikkhave .pe. buddhassa avaṇṇaṃ bhāsati dhammassa avaṇṇaṃ bhāsati saṅghassa avaṇṇaṃ bhāsati imehi kho bhikkhave tīhaṅgehi samannāgatassa bhikkhuno ākaṅkhamāno saṅgho tassapāpiyasikākammaṃ kareyya. [621] Tiṇṇaṃ bhikkhave bhikkhūnaṃ ākaṅkhamāno saṅgho tassapāpiyasikākammaṃ kareyya eko bhaṇḍanakārako hoti kalahakārako vivādakārako bhassakārako saṅghe adhikaraṇakārako eko bālo hoti abyatto āpattibahulo anapadāno eko gihisaṃsaṭṭho viharati ananulomikehi gihisaṃsaggehi imesaṃ kho bhikkhave tiṇṇaṃ bhikkhūnaṃ ākaṅkhamāno saṅgho tassapāpiyasikākammaṃ kareyya. [622] Aparesampi bhikkhave tiṇṇaṃ bhikkhūnaṃ ākaṅkhamāno saṅgho tassapāpiyasikākammaṃ kareyya eko adhisīle sīlavipanno hoti eko ajjhācāre ācāravipanno hoti eko atidiṭṭhiyā diṭṭhivipanno hoti imesaṃ kho bhikkhave .pe. [623] Aparesampi bhikkhave .pe. eko buddhassa avaṇṇaṃ bhāsati eko dhammassa avaṇṇaṃ bhāsati eko saṅghassa avaṇṇaṃ bhāsati imesaṃ kho bhikkhave tiṇṇaṃ bhikkhūnaṃ ākaṅkhamāno saṅgho Tassapāpiyasikākammaṃ kareyya. [624] Tena ^1- tassapāpiyasikākammakatena bhikkhave ^2- bhikkhunā sammā vattitabbaṃ . tatrāyaṃ sammāvattanā na upasampādetabbaṃ na nissayo dātabbo na sāmaṇero upaṭṭhāpetabbo na bhikkhunovādakasammati sāditabbā sammatenapi bhikkhuniyo na ovaditabbā .pe. na bhikkhū ^3- bhikkhūhi sampayojetabbanti. Athakho saṅgho upavāḷassa bhikkhuno tassapāpiyasikākammaṃ akāsi. [625] Tena kho pana samayena bhikkhūnaṃ bhaṇḍanajātānaṃ kalahajātānaṃ vivādāpannānaṃ viharataṃ bahuṃ assāmaṇakaṃ ajjhāciṇṇaṃ hoti bhāsitaparikkantaṃ . athakho tesaṃ bhikkhūnaṃ etadahosi amhākaṃ kho bhaṇḍanajātānaṃ kalahajātānaṃ vivādāpannānaṃ viharataṃ bahuṃ assāmaṇakaṃ ajjhāciṇṇaṃ bhāsitaparikkantaṃ sace mayaṃ imāhi āpattīhi aññamaññaṃ kāressāma ^4- siyāpi taṃ adhikaraṇaṃ kakkhaḷatāya vāḷatāya ^5- bhedāya saṃvatteyya kathaṃ nu kho amhehi paṭipajjitabbanti . bhagavato etamatthaṃ ārocesuṃ. [626] Idha pana bhikkhave bhikkhūnaṃ bhaṇḍanajātānaṃ kalahajātānaṃ vivādāpannānaṃ viharataṃ bahuṃ assāmaṇakaṃ ajjhāciṇṇaṃ hoti @Footnote: ¹ Ma. Yu. tenāti natthi . ² Yu. bhikkhavetyālapanaṃ na dissati. @³ Ma. Yu. ayaṃ pāṭho natthi . ⁴ Yu. kāreyyāma . ⁵ Ma. Yu. kakkhaḷattāya vāḷattāya. Bhāsitaparikkantaṃ . tatra ce bhikkhave ^1- bhikkhūnaṃ evaṃ hoti amhākaṃ kho bhaṇḍanajātānaṃ kalahajātānaṃ vivādāpannānaṃ viharataṃ bahuṃ assāmaṇakaṃ ajjhāciṇṇaṃ bhāsitaparikkantaṃ sace mayaṃ imāhi āpattīhi aññamaññaṃ kāressāma siyāpi taṃ adhikaraṇaṃ kakkhaḷatāya vāḷatāya bhedāya saṃvatteyyāti . anujānāmi bhikkhave evarūpaṃ adhikaraṇaṃ tiṇavatthārakena vūpasametuṃ. [627] Evañca pana bhikkhave vūpasametabbaṃ . sabbeheva ekajjhaṃ sannipatitabbaṃ sannipatitvā byattena bhikkhunā paṭibalena saṅgho ñāpetabbo suṇātu me bhante saṅgho amhākaṃ bhaṇḍanajātānaṃ kalahajātānaṃ vivādāpannānaṃ viharataṃ bahuṃ assāmaṇakaṃ ajjhāciṇṇaṃ bhāsitaparikkantaṃ sace mayaṃ imāhi āpattīhi aññamaññaṃ kāressāma siyāpi taṃ adhikaraṇaṃ kakkhaḷatāya vāḷatāya bhedāya saṃvatteyya . yadi saṅghassa pattakallaṃ saṅgho imaṃ adhikaraṇaṃ tiṇavatthārakena vūpasameyya ṭhapetvā thullavajjaṃ ^2- ṭhapetvā gihipaṭisaṃyuttanti . ekatopakkhikānaṃ bhikkhūnaṃ byattena bhikkhunā paṭibalena sako pakkho ñāpetabbo suṇantu me āyasmantā amhākaṃ bhaṇḍanajātānaṃ kalahajātānaṃ vivādāpannānaṃ viharataṃ bahuṃ assāmaṇakaṃ ajjhāciṇṇaṃ bhāsitaparikkantaṃ sace mayaṃ imāhi āpattīhi aññamaññaṃ kāressāma siyāpi taṃ adhikaraṇaṃ @Footnote: ¹ Ma. Yu. bhikkhaveti natthi . ² Yu. thūlavajjaṃ. Kakkhaḷatāya vāḷatāya bhedāya saṃvatteyya . yadāyasmantānaṃ pattakallaṃ ahaṃ yā ceva āyasmantānaṃ āpatti yā ca attano āpatti āyasmantānañceva atthāya attano ca atthāya saṅghamajjhe tiṇavatthārakena deseyyaṃ ṭhapetvā thullavajjaṃ ṭhapetvā gihipaṭisaṃyuttanti. [628] Athāparesaṃ ekatopakkhikānaṃ bhikkhūnaṃ byattena bhikkhunā paṭibalena sako pakkho ñāpetabbo suṇantu me āyasmantā amhākaṃ bhaṇḍanajātānaṃ kalahajātānaṃ vivādāpannānaṃ viharataṃ bahuṃ assāmaṇakaṃ ajjhāciṇṇaṃ bhāsitaparikkantaṃ sace mayaṃ imāhi āpattīhi aññamaññaṃ kāressāma siyāpi taṃ adhikaraṇaṃ kakkhaḷatāya vāḷatāya bhedāya saṃvatteyya . yadāyasmantānaṃ pattakallaṃ ahaṃ yā ceva āyasmantānaṃ āpatti yā ca attano āpatti āyasmantānañceva atthāya attano ca atthāya saṅghamajjhe tiṇavatthārakena deseyyaṃ ṭhapetvā thullavajjaṃ ṭhapetvā gihipaṭisaṃyuttanti. [629] ^[1]- Ekatopakkhikānaṃ bhikkhūnaṃ byattena bhikkhunā paṭibalena saṅgho ñāpetabbo {629.1} suṇātu me bhante saṅgho amhākaṃ bhaṇḍanajātānaṃ kalahajātānaṃ vivādāpannānaṃ viharataṃ bahuṃ assāmaṇakaṃ ajjhāciṇṇaṃ bhāsitaparikkantaṃ sace mayaṃ imāhi āpattīhi aññamaññaṃ kāressāma siyāpi taṃ adhikaraṇaṃ kakkhaḷatāya vāḷatāya bhedāya saṃvatteyya . yadi saṅghassa pattakallaṃ ahaṃ yā ceva @Footnote: ¹ Ma. athāparesaṃ. Imesaṃ āyasmantānaṃ āpatti yā ca attano āpatti imesañceva āyasmantānaṃ atthāya attano ca atthāya saṅghamajjhe tiṇavatthārakena deseyyaṃ ṭhapetvā thullavajjaṃ ṭhapetvā gihipaṭisaṃyuttaṃ . esā ñatti. {629.2} Suṇātu me bhante saṅgho amhākaṃ bhaṇḍanajātānaṃ kalahajātānaṃ vivādāpannānaṃ viharataṃ bahuṃ assāmaṇakaṃ ajjhāciṇṇaṃ bhāsitaparikkantaṃ sace mayaṃ imāhi āpattīhi aññamaññaṃ kāressāma siyāpi taṃ adhikaraṇaṃ kakkhaḷatāya vāḷatāya bhedāya saṃvatteyya . Ahaṃ yā ceva imesaṃ āyasmantānaṃ āpatti yā ca attano āpatti imesañceva āyasmantānaṃ atthāya attano ca atthāya saṅghamajjhe tiṇavatthārakena desemi ṭhapetvā thullavajjaṃ ṭhapetvā gihipaṭisaṃyuttaṃ . yassāyasmato khamati amhākaṃ imāsaṃ āpattīnaṃ saṅghamajjhe tiṇavatthārakena desanā ṭhapetvā thullavajjaṃ ṭhapetvā gihipaṭisaṃyuttaṃ so tuṇhassa yassa nakkhamati so bhāseyya. {629.3} Desitā amhākaṃ imā āpattiyo saṅghamajjhe tiṇavatthārakena ṭhapetvā thullavajjaṃ ṭhapetvā gihipaṭisaṃyuttaṃ khamati saṅghassa tasmā tuṇhī. Evametaṃ dhārayāmīti. [630] Athāparesaṃ ekatopakkhikānaṃ bhikkhūnaṃ byattena bhikkhunā paṭibalena saṅgho ñāpetabbo {630.1} suṇātu me bhante saṅgho amhākaṃ bhaṇḍanajātānaṃ kalahajātānaṃ vivādāpannānaṃ viharataṃ bahuṃ assāmaṇakaṃ ajjhāciṇṇaṃ bhāsitaparikkantaṃ sace mayaṃ imāhi āpattīhi Aññamaññaṃ kāressāma siyāpi taṃ adhikaraṇaṃ kakkhaḷatāya vāḷatāya bhedāya saṃvatteyya . yadi saṅghassa pattakallaṃ ahaṃ yā ceva imesaṃ āyasmantānaṃ āpatti yā ca attano āpatti imesañceva āyasmantānaṃ atthāya attano ca atthāya saṅghamajjhe tiṇavatthārakena deseyyaṃ ṭhapetvā thullavajjaṃ ṭhapetvā gihipaṭisaṃyuttaṃ . Esā ñatti. {630.2} Suṇātu me bhante saṅgho amhākaṃ bhaṇḍanajātānaṃ kalahajātānaṃ vivādāpannānaṃ viharataṃ bahuṃ assāmaṇakaṃ ajjhāciṇṇaṃ bhāsitaparikkantaṃ . sace mayaṃ imāhi āpattīhi aññamaññaṃ kāressāma siyāpi taṃ adhikaraṇaṃ kakkhaḷatāya vāḷatāya bhedāya saṃvatteyya . ahaṃ yā ceva imesaṃ āyasmantānaṃ āpatti yā ca attano āpatti imesañceva āyasmantānaṃ atthāya attano ca atthāya saṅghamajjhe tiṇavatthārakena desemi ṭhapetvā thullavajjaṃ ṭhapetvā gihipaṭisaṃyuttaṃ . yassāyasmato khamati amhākaṃ imāsaṃ āpattīnaṃ saṅghamajjhe tiṇavatthārakena desanā ṭhapetvā thullavajjaṃ ṭhapetvā gihipaṭisaṃyuttaṃ so tuṇhassa yassa nakkhamati so bhāseyya. {630.3} Desitā amhākaṃ imā āpattiyo saṅghamajjhe tiṇavatthārakena ṭhapetvā thullavajjaṃ ṭhapetvā gihipaṭisaṃyuttaṃ khamati saṅghassa tasmā tuṇhī. Evametaṃ dhārayāmīti. [631] Evañca pana bhikkhave te bhikkhū tāhi āpattīhi vuṭṭhitā honti ṭhapetvā thullavajjaṃ ṭhapetvā gihipaṭisaṃyuttaṃ ṭhapetvā Diṭṭhāvikammaṃ ṭhapetvā ye na tattha hontīti. [632] Tena kho pana samayena bhikkhūpi bhikkhunīhi ^1- vivadanti. Bhikkhuniyopi bhikkhūhi vivadanti . channopi bhikkhu bhikkhunīnaṃ anupakhajja bhikkhūhi saddhiṃ vivadati bhikkhunīnaṃ pakkhaṃ gāheti . ye te bhikkhū appicchā .pe. te ujjhāyanti khīyanti vipācenti kathaṃ hi nāma channo bhikkhu bhikkhunīnaṃ anupakhajja bhikkhūhi saddhiṃ vivadissati bhikkhunīnaṃ pakkhaṃ gāhessatīti . athakho te bhikkhū bhagavato etamatthaṃ ārocesuṃ. Saccaṃ kira bhikkhave .pe. saccaṃ bhagavāti .pe. vigarahitvā dhammiṃ kathaṃ katvā bhikkhū āmantesi cattārīmāni bhikkhave adhikaraṇāni vivādādhikaraṇaṃ anuvādādhikaraṇaṃ āpattādhikaraṇaṃ kiccādhikaraṇaṃ. [633] Tattha katamaṃ vivādādhikaraṇaṃ . idha pana ^2- bhikkhave bhikkhū vivadanti dhammoti vā adhammoti vā vinayoti vā avinayoti vā bhāsitaṃ lapitaṃ tathāgatenāti vā abhāsitaṃ alapitaṃ tathāgatenāti vā āciṇṇaṃ tathāgatenāti vā anāciṇṇaṃ tathāgatenāti vā paññattaṃ tathāgatenāti vā appaññattaṃ tathāgatenāti vā āpattīti vā anāpattīti vā lahukā āpattīti vā garukā āpattīti vā sāvasesā āpattīti vā anavasesā āpattīti vā duṭṭhullā āpattīti vā aduṭṭhullā āpattīti vā yaṃ @Footnote: ¹ Yu. bhikkhūhi . ² Yu. panasaddo natthi. Tattha bhaṇḍanaṃ kalaho viggaho vivādo nānāvādo aññathāvādo vipaccatāya vohāro medhagaṃ ^1- idaṃ vuccati vivādādhikaraṇaṃ. [634] Tattha katamaṃ anuvādādhikaraṇaṃ . idha pana bhikkhave bhikkhū bhikkhuṃ anuvadanti sīlavipattiyā vā ācāravipattiyā vā diṭṭhivipattiyā vā ājīvavipattiyā vā yo tattha anuvādo anuvadanā anullapanā anubhaṇanā anusampavaṅkatā abbhussahanatā anubalappadānaṃ idaṃ vuccati anuvādādhikaraṇaṃ. [635] Tattha katamaṃ āpattādhikaraṇaṃ . pañcapi āpattikkhandhā āpattādhikaraṇaṃ sattapi āpattikkhandhā āpattādhikaraṇaṃ idaṃ vuccati āpattādhikaraṇaṃ. [636] Tattha katamaṃ kiccādhikaraṇaṃ . yā saṅghassa kiccayatā karaṇīyatā apalokanakammaṃ ñattikammaṃ ñattidutiyakammaṃ ñatticatutthakammaṃ idaṃ vuccati kiccādhikaraṇaṃ. [637] Vivādādhikaraṇassa kiṃ mūlaṃ. Cha vivādamūlāni vivādādhikaraṇassa mūlaṃ tīṇipi akusalamūlāni vivādādhikaraṇassa mūlaṃ tīṇipi kusalamūlāni vivādādhikaraṇassa mūlaṃ . katamāni cha vivādamūlāni vivādādhikaraṇassa mūlaṃ . idha pana ^2- bhikkhave bhikkhu kodhano hoti upanāhī yo so bhikkhave bhikkhu kodhano hoti upanāhī so sattharipi agāravo viharati appatisso dhammepi agāravo viharati @Footnote: ¹ Yu. medhakaṃ . ² Ma. Yu. panasaddo natthi. Appatisso saṅghepi agāravo viharati appatisso sikkhāyapi na paripūrīkārī ^1- hoti yo so bhikkhave bhikkhu sattharipi ^2- agāravo viharati appatisso dhammepi agāravo viharati appatisso saṅghepi agāravo viharati appatisso sikkhāyapi na paripūrīkārī hoti ^3- so saṅghe vivādaṃ janeti yo ^4- hoti vivādo bahujanaahitāya bahujanaasukhāya ^5- bahuno janassa anatthāya ahitāya dukkhāya devamanussānaṃ. {637.1} Evarūpañce tumhe bhikkhave vivādamūlaṃ ajjhattaṃ vā bahiddhā vā samanupasseyyātha tatra tumhe bhikkhave tasseva pāpakassa vivādamūlassa pahānāya vāyameyyātha . evarūpañce tumhe bhikkhave vivādamūlaṃ ajjhattaṃ vā bahiddhā vā na samanupasseyyātha tatra tumhe bhikkhave tasseva pāpakassa vivādamūlassa āyatiṃ anavassavāya paṭipajjeyyātha . evametassa pāpakassa vivādamūlassa pahānaṃ hoti. Evametassa pāpakassa vivādamūlassa āyatiṃ anavassavo hoti. [638] Puna caparaṃ bhikkhave bhikkhu makkhī hoti paḷāsī .pe. Issukī hoti maccharī .pe. saṭho hoti māyāvī .pe. pāpiccho hoti micchādiṭṭhi .pe. sandiṭṭhiparāmāsī hoti ādānagāhī ^6- duppaṭinissaggī yo so bhikkhave bhikkhu sandiṭṭhiparāmāsī hoti @Footnote: ¹ Ma. Yu. paripūrakārī . ² Yu. apisaddo natthi . ³ Ma. Yu. hotīti natthi. @evamupari . ⁴ Yu. so . ⁵ Ma. bahujanāhitāya bahujanāskhāya. evamupari. @⁶ Ma. Yu. ādhānagāhī. evamupari. Ādānagāhī duppaṭinissaggī so sattharipi agāravo viharati appatisso dhammepi agāravo viharati appatisso saṅghepi agāravo viharati appatisso sikkhāyapi na paripūrīkārī hoti yo so bhikkhave bhikkhu sattharipi agāravo viharati appatisso dhammepi .pe. saṅghepi .pe. Sikkhāyapi na paripūrīkārī hoti so saṅghe vivādaṃ janeti yo hoti vivādo bahujanaahitāya bahujanaasukhāya bahuno janassa anatthāya ahitāya dukkhāya devamanussānaṃ. {638.1} Evarūpañce tumhe bhikkhave vivādamūlaṃ ajjhattaṃ vā bahiddhā vā samanupasseyyātha tatra tumhe bhikkhave tasseva pāpakassa vivādamūlassa pahānāya vāyameyyātha . evarūpañce tumhe bhikkhave vivādamūlaṃ ajjhattaṃ vā bahiddhā vā na samanupasseyyātha tatra tumhe bhikkhave tasseva pāpakassa vivādamūlassa āyatiṃ anavassavāya paṭipajjeyyātha. Evametassa pāpakassa vivādamūlassa pahānaṃ hoti . evametassa pāpakassa vivādamūlassa āyatiṃ anavassavo hoti imāni cha vivādamūlāni vivādādhikaraṇassa mūlaṃ. [639] Katamāni tīṇi akusalamūlāni vivādādhikaraṇassa mūlaṃ . Idha pana ^1- bhikkhave bhikkhū luddhacittā vivadanti duṭṭhacittā vivadanti mūḷhacittā vivadanti dhammoti vā adhammoti vā vinayoti vā avinayoti vā bhāsitaṃ lapitaṃ tathāgatenāti vā abhāsitaṃ alapitaṃ @Footnote: ¹ Ma. panasaddo na dissati. Yu. pana bhikkhaveti pāṭhadvayaṃ na dissati. evamupari. Tathāgatenāti vā āciṇṇaṃ tathāgatenāti vā anāciṇṇaṃ tathāgatenāti vā paññattaṃ tathāgatenāti vā appaññattaṃ tathāgatenāti vā āpattīti vā anāpattīti vā lahukā āpattīti vā garukā āpattīti vā sāvasesā āpattīti vā anavasesā āpattīti vā duṭṭhullā āpattīti vā aduṭṭhullā āpattīti vā imāni tīṇi akusalamūlāni vivādādhikaraṇassa mūlaṃ. [640] Katamāni tīṇi kusalamūlāni vivādādhikaraṇassa mūlaṃ . Idha pana bhikkhave bhikkhū aluddhacittā vivadanti aduṭṭhacittā vivadanti amūḷhacittā vivadanti dhammoti vā adhammoti vā .pe. duṭṭhullā āpattīti vā aduṭṭhullā āpattīti vā imāni tīṇi kusalamūlāni vivādādhikaraṇassa mūlaṃ. [641] Anuvādādhikaraṇassa kiṃ mūlaṃ . cha anuvādamūlāni anuvādādhikaraṇassa mūlaṃ tīṇipi akusalamūlāni anuvādādhikaraṇassa mūlaṃ tīṇipi kusalamūlāni anuvādādhikaraṇassa mūlaṃ kāyopi anuvādādhikaraṇassa mūlaṃ vācāpi anuvādādhikaraṇassa mūlaṃ. [642] Katamāni cha anuvādamūlāni anuvādādhikaraṇassa mūlaṃ . Idha pana bhikkhave bhikkhu kodhano hoti upanāhī yo so bhikkhave ^1- bhikkhu kodhano hoti upanāhī so sattharipi agāravo viharati appatisso dhammepi agāravo viharati appatisso saṅghepi agāravo @Footnote: ¹ Ma. bhikkhaveti natthi. Viharati appatisso sikkhāyapi na paripūrīkārī hoti yo so bhikkhave bhikkhu sattharipi agāravo viharati appatisso dhammepi agāravo viharati appatisso saṅghepi agāravo viharati appatisso sikkhāyapi na paripūrīkārī hoti so saṅghe anuvādaṃ janeti yo hoti anuvādo bahujanaahitāya bahujanaasukhāya bahuno janassa anatthāya ahitāya dukkhāya devamanussānaṃ. {642.1} Evarūpañce tumhe bhikkhave anuvādamūlaṃ ajjhattaṃ vā bahiddhā vā samanupasseyyātha tatra tumhe bhikkhave tasseva pāpakassa anuvādamūlassa pahānāya vāyameyyātha . evarūpañce tumhe bhikkhave anuvādamūlaṃ ajjhattaṃ vā bahiddhā vā na samanupasseyyātha tatra tumhe bhikkhave tasseva pāpakassa anuvādamūlassa āyatiṃ anavassavāya paṭipajjeyyātha . evametassa pāpakassa anuvādamūlassa pahānaṃ hoti. Evametassa pāpakassa anuvādamūlassa āyatiṃ anavassavo hoti. [643] Puna caparaṃ bhikkhave bhikkhu makkhī hoti paḷāsī .pe. Issukī hoti maccharī .pe. saṭho hoti māyāvī .pe. pāpiccho hoti micchādiṭṭhi .pe. sandiṭṭhiparāmāsī hoti ādānagāhī duppaṭinissaggī yo so bhikkhave bhikkhu sandiṭṭhiparāmāsī hoti ādānagāhī duppaṭinissaggī so sattharipi agāravo viharati appatisso dhammepi .pe. saṅghepi agāravo viharati appatisso sikkhāyapi na paripūrīkārī hoti yo so bhikkhave bhikkhu sattharipi Agāravo viharati appatisso dhammepi .pe. saṅghepi .pe. Sikkhāyapi na paripūrīkārī hoti so saṅghe anuvādaṃ janeti yo hoti anuvādo bahujanaahitāya bahujanaasukhāya bahuno janassa anatthāya ahitāya dukkhāya devamanussānaṃ. {643.1} Evarūpañce tumhe bhikkhave anuvādamūlaṃ ajjhattaṃ vā bahiddhā vā samanupasseyyātha tatra tumhe bhikkhave tasseva pāpakassa anuvādamūlassa pahānāya vāyameyyātha . evarūpañce tumhe bhikkhave anuvādamūlaṃ ajjhattaṃ vā bahiddhā vā na samanupasseyyātha tatra tumhe bhikkhave tasseva pāpakassa anuvādamūlassa āyatiṃ anavassavāya paṭipajjeyyātha . evametassa pāpakassa anuvādamūlassa pahānaṃ hoti . evametassa pāpakassa anuvādamūlassa āyatiṃ anavassavo hoti imāni cha anuvādamūlāni anuvādādhikaraṇassa mūlaṃ. [644] Katamāni tīṇi akusalamūlāni anuvādādhikaraṇassa mūlaṃ . Idha pana bhikkhave bhikkhū bhikkhuṃ luddhacittā anuvadanti duṭṭhacittā anuvadanti mūḷhacittā anuvadanti sīlavipattiyā vā ācāravipattiyā vā diṭṭhivipattiyā vā ājīvavipattiyā vā imāni tīṇi akusalamūlāni anuvādādhikaraṇassa mūlaṃ. [645] Katamāni tīṇi kusalamūlāni anuvādādhikaraṇassa mūlaṃ . Idha pana bhikkhave bhikkhū bhikkhuṃ aluddhacittā anuvadanti aduṭṭhacittā anuvadanti amūḷhacittā anuvadanti sīlavipattiyā vā ācāravipattiyā Vā diṭṭhivipattiyā vā ājīvavipattiyā vā imāni tīṇi kusalamūlāni anuvādādhikaraṇassa mūlaṃ. [646] Katamo ca ^1- kāyo anuvādādhikaraṇassa mūlaṃ. Idhekacco dubbaṇṇo hoti duddassiko okoṭimako bahvābādho kāṇo vā kuṇi vā khañjo vā pakkhahato vā yena naṃ anuvadanti ayaṃ kāyo anuvādādhikaraṇassa mūlaṃ. [647] Katamā ca ^2- vācā anuvādādhikaraṇassa mūlaṃ. Idhekacco dubbaco hoti mammano eḷagalavāco yāya naṃ anuvadanti ayaṃ vācā anuvādādhikaraṇassa mūlaṃ. [648] Āpattādhikaraṇassa kiṃ mūlaṃ . cha āpattisamuṭṭhānā āpattādhikaraṇassa mūlaṃ atthāpatti kāyato samuṭṭhāti na vācato na cittato atthāpatti vācato samuṭṭhāti na kāyato na cittato atthāpatti kāyato ca vācato ca samuṭṭhāti na cittato atthāpatti kāyato ca cittato ca samuṭṭhāti na vācato atthāpatti vācato ca cittato ca samuṭṭhāti na kāyato atthāpatti kāyato ca vācato ca cittato ca samuṭṭhāti ime cha āpattisamuṭṭhānā āpattādhikaraṇassa mūlaṃ. [649] Kiccādhikaraṇassa kiṃ mūlaṃ . kiccādhikaraṇassa ekaṃ mūlaṃ saṅgho. @Footnote: ^1-2 Ma. Yu. Rā. casaddo na dissati. [650] Vivādādhikaraṇaṃ kusalaṃ akusalaṃ abyākataṃ . vivādādhikaraṇaṃ siyā kusalaṃ siyā akusalaṃ siyā abyākataṃ. [651] Tattha katamaṃ vivādādhikaraṇaṃ akusalaṃ . idha pana bhikkhave bhikkhū akusalacittā vivadanti dhammoti vā adhammoti vā .pe. Duṭṭhullā āpattīti vā aduṭṭhullā āpattīti vā yaṃ tattha bhaṇḍanaṃ kalaho viggaho vivādo nānāvādo aññathāvādo vipaccatāya vohāro medhagaṃ ^1- idaṃ vuccati vivādādhikaraṇaṃ akusalaṃ. [652] Tattha katamaṃ vivādādhikaraṇaṃ kusalaṃ . idha pana bhikkhave bhikkhū kusalacittā vivadanti dhammoti vā adhammoti vā .pe. Duṭṭhullā āpattīti vā aduṭṭhullā āpattīti vā yaṃ tattha bhaṇḍanaṃ kalaho viggaho vivādo nānāvādo aññathāvādo vipaccatāya vohāro medhagaṃ idaṃ vuccati vivādādhikaraṇaṃ kusalaṃ ^2-. [653] Tattha katamaṃ vivādādhikaraṇaṃ abyākataṃ . idha pana bhikkhave bhikkhū bhikkhuṃ ^3- abyākatacittā vivadanti dhammoti vā adhammoti vā .pe. duṭṭhullā āpattīti vā aduṭṭhullā āpattīti vā yaṃ tattha bhaṇḍanaṃ kalaho viggaho vivādo nānāvādo aññathāvādo vipaccatāya vohāro medhagaṃ ^1- idaṃ vuccati vivādādhikaraṇaṃ abyākataṃ. @Footnote: ¹ Yu. medhakaṃ . ² Ma. Yu. potthakesu paṭhamaṃ kusalaṃ āgataṃ pacchā akusalaṃ āgataṃ. @³ Ma. Yu. ayaṃ pāṭho natthi. [654] Anuvādādhikaraṇaṃ kusalaṃ akusalaṃ abyākataṃ . Anuvādādhikaraṇaṃ siyā kusalaṃsiyā akusalaṃ siyā abyākataṃ. [655] Tattha katamaṃ anuvādādhikaraṇaṃ akusalaṃ . idha pana bhikkhave bhikkhū bhikkhuṃ akusalacittā anuvadanti sīlavipattiyā vā ācāravipattiyā vā diṭṭhivipattiyā vā ājīvavipattiyā vā yo tattha anuvādo anuvadanā anullapanā anubhaṇanā anusampavaṅkatā abbhussahanatā anubalappadānaṃ idaṃ vuccati anuvādādhikaraṇaṃ akusalaṃ. [656] Tattha katamaṃ anuvādādhikaraṇaṃ kusalaṃ . idha pana bhikkhave bhikkhū bhikkhuṃ kusalacittā anuvadanti sīlavipattiyā vā ācāravipattiyā vā diṭṭhivipattiyā vā ājīvavipattiyā vā yo tattha anuvādo anuvadanā anullapanā anubhaṇanā anusampavaṅkatā abbhussahanatā anubalappadānaṃ idaṃ vuccati anuvādādhikaraṇaṃ kusalaṃ ^1-. [657] Tattha katamaṃ anuvādādhikaraṇaṃ abyākataṃ . idha pana bhikkhave bhikkhū bhikkhuṃ abyākatacittā anuvadanti sīlavipattiyā vā ācāravipattiyā vā diṭṭhivipattiyā vā ājīvavipattiyā vā yo tattha anuvādo anuvadanā anullapanā anubhaṇanā anusampavaṅkatā abbhussahanatā anubalappadānaṃ idaṃ vuccati anuvādādhikaraṇaṃ abyākataṃ. [658] Āpattādhikaraṇaṃ akusalaṃ abyākataṃ ^2- . āpattādhikaraṇaṃ siyā akusalaṃ siyā abyākataṃ natthi āpattādhikaraṇaṃ kusalaṃ. @Footnote: ¹ Ma. Yu. paṭhamaṃ kusalaṃ āgataṃ pacchā akusalaṃ āgataṃ . ² Ma. Yu. āpattādhikaraṇaṃ @kusalaṃ akusalaṃ abyākataṃ. [659] Tattha katamaṃ āpattādhikaraṇaṃ akusalaṃ . yaṃ jānanto sañjānanto cecca abhivitaritvā vītikkamo idaṃ vuccati āpattādhikaraṇaṃ akusalaṃ . tattha katamaṃ āpattādhikaraṇaṃ abyākataṃ . Yaṃ ajānanto asañjānanto acecca anabhivitaritvā vītikkamo idaṃ vuccati āpattādhikaraṇaṃ abyākataṃ. [660] Kiccādhikaraṇaṃ kusalaṃ akusalaṃ abyākataṃ . kiccādhikaraṇaṃ siyā kusalaṃ siyā akusalaṃ siyā abyākataṃ. [661] Tattha katamaṃ kiccādhikaraṇaṃ akusalaṃ . Yaṃ saṅgho akusalacitto kammaṃ karoti apalokanakammaṃ ñattikammaṃ ñattidutiyakammaṃ ñatticatutthakammaṃ idaṃ vuccati kiccādhikaraṇaṃ akusalaṃ. [662] Tattha katamaṃ kiccādhikaraṇaṃ kusalaṃ . yaṃ saṅgho kusalacitto kammaṃ karoti apalokanakammaṃ ñattikammaṃ ñattidutiyakammaṃ ñatticatutthakammaṃ idaṃ vuccati kiccādhikaraṇaṃ kusalaṃ ^1-. [663] Tattha katamaṃ kiccādhikaraṇaṃ abyākataṃ . yaṃ saṅgho abyākatacitto kammaṃ karoti apalokanakammaṃ ñattikammaṃ ñattidutiyakammaṃ ñatticatutthakammaṃ idaṃ vuccati kiccādhikaraṇaṃ abyākataṃ. [664] Vivādo vivādādhikaraṇaṃ vivādo no adhikaraṇaṃ adhikaraṇaṃ no vivādo adhikaraṇaṃ ceva vivādo ca . siyā vivādo vivādādhikaraṇaṃ siyā vivādo no adhikaraṇaṃ siyā adhikaraṇaṃ @Footnote: ¹ Ma. Yu. paṭhamaṃ kusalaṃ āgataṃ pacchā akusalaṃ āgataṃ. No vivādo siyā adhikaraṇañceva vivādo ca. [665] Tattha katamo vivādo vivādādhikaraṇaṃ . idha pana bhikkhave bhikkhū vivadanti dhammoti vā adhammoti vā .pe. Duṭṭhullā āpattīti vā aduṭṭhullā āpattīti vā yaṃ tattha bhaṇḍanaṃ kalaho viggaho vivādo nānāvādo aññathāvādo vipaccatāya vohāro medhagaṃ ayaṃ vivādo vivādādhikaraṇaṃ . tattha katamo vivādo no adhikaraṇaṃ . mātāpi puttena vivadati puttopi mātarā vivadati pitāpi puttena vivadati puttopi pitarā vivadati bhātāpi bhātarā vivadati bhātāpi bhaginiyā vivadati bhaginīpi bhātarā vivadati sahāyopi sahāyena vivadati ayaṃ vivādo no adhikaraṇaṃ . tattha katamaṃ adhikaraṇaṃ no vivādo anuvādādhikaraṇaṃ āpattādhikaraṇaṃ kiccādhikaraṇaṃ idaṃ adhikaraṇaṃ no vivādo . tattha katamaṃ adhikaraṇañceva vivādo ca . vivādādhikaraṇaṃ adhikaraṇañceva vivādo ca. [666] Anuvādo anuvādādhikaraṇaṃ anuvādo no adhikaraṇaṃ adhikaraṇaṃ no anuvādo adhikaraṇañceva anuvādo ca . siyā anuvādo anuvādādhikaraṇaṃ siyā anuvādo no adhikaraṇaṃ siyā adhikaraṇaṃ no anuvādo siyā adhikaraṇañceva anuvādo ca. [667] Tattha katamo anuvādo anuvādādhikaraṇaṃ . idha pana bhikkhave bhikkhū bhikkhuṃ anuvadanti sīlavipattiyā vā ācāravipattiyā Vā diṭṭhivipattiyā vā ājīvavipattiyā vā yo tattha anuvādo anuvadanā anullapanā anubhaṇanā anusampavaṅkatā abbhussahanatā anubalappadānaṃ ayaṃ anuvādo anuvādādhikaraṇaṃ . tattha katamo anuvādo no adhikaraṇaṃ . mātāpi puttaṃ anuvadati puttopi mātaraṃ anuvadati pitāpi puttaṃ anuvadati puttopi pitaraṃ anuvadati bhātāpi bhātaraṃ anuvadati bhātāpi bhaginiṃ anuvadati bhaginīpi bhātaraṃ anuvadati sahāyopi sahāyaṃ anuvadati ayaṃ anuvādo no adhikaraṇaṃ . tattha katamaṃ adhikaraṇaṃ no anuvādo . āpattādhikaraṇaṃ kiccādhikaraṇaṃ vivādādhikaraṇaṃ idaṃ adhikaraṇaṃ no anuvādo . Tattha katamaṃ adhikaraṇañceva anuvādo ca . anuvādādhikaraṇaṃ adhikaraṇañceva anuvādo ca. [668] Āpatti āpattādhikaraṇaṃ āpatti no adhikaraṇaṃ adhikaraṇaṃ no āpatti adhikaraṇañceva āpatti ca . siyā āpatti āpattādhikaraṇaṃ siyā āpatti no adhikaraṇaṃ siyā adhikaraṇaṃ no āpatti siyā adhikaraṇañceva āpatti ca. [669] Tattha katamā ^1- āpatti āpattādhikaraṇaṃ . pañcapi āpattikkhandhā āpattādhikaraṇaṃ sattapi āpattikkhandhā āpattādhikaraṇaṃ ayaṃ āpatti āpattādhikaraṇaṃ . tattha katamā ^2- āpatti no adhikaraṇaṃ . sotāpatti samāpatti ayaṃ āpatti no @Footnote: ^1-2 Ma. Yu. katamaṃ. Adhikaraṇaṃ . tattha katamaṃ adhikaraṇaṃ no āpatti . kiccādhikaraṇaṃ vivādādhikaraṇaṃ anuvādādhikaraṇaṃ idaṃ adhikaraṇaṃ no āpatti . Tattha katamaṃ adhikaraṇañceva āpatti ca . āpattādhikaraṇaṃ adhikaraṇañceva āpatti ca. [670] Kiccaṃ kiccādhikaraṇaṃ kiccaṃ no adhikaraṇaṃ adhikaraṇaṃ no kiccaṃ adhikaraṇañceva kiccañca . siyā kiccaṃ kiccādhikaraṇaṃ siyā kiccaṃ no adhikaraṇaṃ siyā adhikaraṇaṃ no kiccaṃ siyā adhikaraṇañceva kiccañca. [671] Tattha katamaṃ kiccaṃ kiccādhikaraṇaṃ . yā saṅghassa kiccayatā karaṇīyatā apalokanakammaṃ ñattikammaṃ ñattidutiyakammaṃ ñatticatutthakammaṃ idaṃ kiccaṃ kiccādhikaraṇaṃ . tattha katamaṃ kiccaṃ no adhikaraṇaṃ . ācariyakiccaṃ upajjhāyakiccaṃ samānupajjhāyakiccaṃ samānācariyakiccaṃ idaṃ kiccaṃ no adhikaraṇaṃ . tattha katamaṃ adhikaraṇaṃ no kiccaṃ . vivādādhikaraṇaṃ anuvādādhikaraṇaṃ āpattādhikaraṇaṃ idaṃ adhikaraṇaṃ no kiccaṃ . tattha katamaṃ adhikaraṇañceva kiccañca . Kiccādhikaraṇaṃ adhikaraṇañceva kiccañca. [672] Vivādādhikaraṇaṃ katīhi samathehi sammati . vivādādhikaraṇaṃ dvīhi samathehi sammati sammukhāvinayena ^1- ca yebhuyyasikāya ca. Siyā vivādādhikaraṇaṃ ekaṃ samathaṃ anāgamma yebhuyyasikaṃ ekena samathena sammeyya sammukhāvinayenāti . siyātissa vacanīyaṃ . yathākathaṃ viya @Footnote: ¹ Yu. sammukhāvinayena ca. Idha pana bhikkhave bhikkhū ^1- vivadanti dhammoti vā adhammoti vā vinayoti vā avinayoti vā bhāsitaṃ lapitaṃ tathāgatenāti vā abhāsitaṃ alapitaṃ tathāgatenāti vā āciṇṇaṃ tathāgatenāti vā anāciṇṇaṃ tathāgatenāti vā paññattaṃ tathāgatenāti vā appaññattaṃ tathāgatenāti vā āpattīti vā anāpattīti vā lahukā āpattīti vā garukā āpattīti vā sāvasesā āpattīti vā anavasesā āpattīti vā duṭṭhullā āpattīti vā aduṭṭhullā āpattīti vā {672.1} te ce bhikkhave bhikkhū sakkonti taṃ adhikaraṇaṃ vūpasametuṃ idaṃ vuccati bhikkhave adhikaraṇaṃ vūpasantaṃ . kena vūpasantaṃ . sammukhāvinayena . kiñca tattha sammukhāvinayasmiṃ . Saṅghasammukhatā dhammasammukhatā vinayasammukhatā puggalasammukhatā. {672.2} Kā ca tattha saṅghasammukhatā . yāvatikā bhikkhū kammappattā te āgatā honti chandārahānaṃ chando āhaṭo hoti sammukhībhūtā na paṭikkosanti ayaṃ tattha saṅghasammukhatā . Kā ca tattha dhammasammukhatā vinayasammukhatā . yena dhammena yena vinayena yena satthusāsanena taṃ adhikaraṇaṃ vūpasammati ayaṃ tattha dhammasammukhatā vinayasammukhatā . kā ca tattha puggalasammukhatā . yo ca vivadati yena ca vivadati ubho atthapaccatthikā ^2- sammukhībhūtā honti ayaṃ tattha puggalasammukhatā . evaṃ vūpasantaṃ ce bhikkhave adhikaraṇaṃ @Footnote: ¹ Ma. Yu. pana bhikkhaveti pāṭhadvayaṃ na dissati . ² Yu. attapaccatthikā. Kārako ukkoṭeti ukkoṭanakaṃ pācittiyaṃ . chandadāyako khīyati khīyanakaṃ pācittiyaṃ. [673] Te ce bhikkhave bhikkhū na sakkonti taṃ adhikaraṇaṃ tasmiṃ āvāse vūpasametuṃ tehi bhikkhave bhikkhūhi yasmiṃ āvāse bahutarā ^1- bhikkhū so āvāso gantabbo . te ce bhikkhave bhikkhū taṃ āvāsaṃ gacchantā antarāmagge sakkonti taṃ adhikaraṇaṃ vūpasametuṃ idaṃ vuccati bhikkhave adhikaraṇaṃ vūpasantaṃ . kena vūpasantaṃ sammukhāvinayena . kiñca tattha sammukhāvinayasmiṃ . saṅghasammukhatā dhammasammukhatā vinayasammukhatā puggalasammukhatā . kā ca tattha saṅghasammukhatā . yāvatikā bhikkhū kammappattā te āgatā honti chandārahānaṃ chando āhaṭo hoti sammukhībhūtā na paṭikkosanti ayaṃ tattha saṅghasammukhatā. {673.1} Kā ca tattha dhammasammukhatā vinayasammukhatā . yena dhammena yena vinayena yena satthusāsanena taṃ adhikaraṇaṃ vūpasammati ayaṃ tattha dhammasammukhatā vinayasammukhatā . kā ca tattha puggalasammukhatā . Yo ca vivadati yena ca vivadati ubho atthapaccatthitā sammukhībhūtā honti ayaṃ tattha puggalasammukhatā . evaṃ vūpasantaṃ ce bhikkhave adhikaraṇaṃ kārako ukkoṭeti ukkoṭanakaṃ pācittiyaṃ . chandadāyako khīyati khīyanakaṃ pācittiyaṃ. @Footnote: ¹ Ma. sambahulā. [674] Te ce bhikkhave bhikkhū taṃ āvāsaṃ gacchantā ^3- antarāmagge na sakkonti taṃ adhikaraṇaṃ vūpasametuṃ tehi bhikkhave bhikkhūhi taṃ āvāsaṃ gantvā āvāsikā bhikkhū evamassu vacanīyā idaṃ kho āvuso adhikaraṇaṃ evaṃjātaṃ evaṃsamuppannaṃ sādhāyasmanto ^2- imaṃ adhikaraṇaṃ vūpasamentu dhammena vinayena satthusāsanena yathāyidaṃ ^3- adhikaraṇaṃ suvūpasantaṃ assāti. {674.1} Sace bhikkhave āvāsikā bhikkhū vuḍḍhatarā honti āgantukā bhikkhū navakatarā tehi bhikkhave āvāsikehi bhikkhūhi āgantukā bhikkhū evamassu vacanīyā iṅgha tumhe āyasmanto muhuttaṃ ekamantaṃ hotha yāva mayaṃ mantemāti. {674.2} Sace pana bhikkhave āvāsikā bhikkhū navakatarā honti āgantukā bhikkhū vuḍḍhatarā tehi bhikkhave āvāsikehi bhikkhūhi āgantukā bhikkhū evamassu vacanīyā tenahi tumhe āyasmanto muhuttaṃ idheva tāva ^4- hotha yāva mayaṃ mantemāti. Sace ^5- bhikkhave āvāsikānaṃ bhikkhūnaṃ mantayamānānaṃ evaṃ hoti na mayaṃ sakkoma imaṃ adhikaraṇaṃ vūpasametuṃ dhammena vinayena satthusāsanenāti na taṃ adhikaraṇaṃ āvāsikehi bhikkhūhi ^6- paṭicchitabbaṃ ^7- . sace pana bhikkhave āvāsikānaṃ bhikkhūnaṃ mantayamānānaṃ evaṃ hoti sakkoma mayaṃ imaṃ ^8- adhikaraṇaṃ vūpasametuṃ dhammena vinayena satthusāsanenāti tehi bhikkhave @Footnote: ¹ Ma. āgacchantā . ² Ma. Yu. sādhāyasmantā . ³ Ma. Yu. yathayidaṃ . ⁴ Yu. @tāvasaddo na dissati . ⁵ Ma. sace pana . ⁶ Yu. āvāsikehi bhikkhūhīti padadvayaṃ @na dissati . ⁷ Ma. sampaṭicchitabbaṃ . ⁸ Ma. idaṃ. ito paraṃ īdisameva. Āvāsikehi bhikkhūhi āgantukā bhikkhū evamassu vacanīyā sace tumhe āyasmanto amhākaṃ imaṃ adhikaraṇaṃ yathājātaṃ yathāsamuppannaṃ ārocessatha yathā ca mayaṃ imaṃ adhikaraṇaṃ vūpasamessāma dhammena vinayena satthusāsanena tathā suvūpasantaṃ ^2- bhavissati evaṃ mayaṃ imaṃ adhikaraṇaṃ paṭicchissāma ^3- . no ce tumhe āyasmanto amhākaṃ imaṃ adhikaraṇaṃ yathājātaṃ yathāsamuppannaṃ ārocessatha yathā ca mayaṃ imaṃ adhikaraṇaṃ vūpasamessāma dhammena vinayena satthusāsanena tathā na suvūpasantaṃ bhavissati na mayaṃ imaṃ adhikaraṇaṃ paṭicchissāmāti . Evaṃ supariggahitaṃ kho bhikkhave katvā āvāsikehi bhikkhūhi taṃ adhikaraṇaṃ paṭicchitabbaṃ ^4-. {674.3} Tehi bhikkhave āgantukehi bhikkhūhi āvāsikā bhikkhū evamassu vacanīyā yathājātaṃ yathāsamuppannaṃ kho ^4- mayaṃ imaṃ adhikaraṇaṃ āyasmantānaṃ ārocessāma sace āyasmanto ^5- sakkonti ettakena vā ettakena vā ^6- antarena imaṃ adhikaraṇaṃ vūpasametuṃ dhammena vinayena satthusāsanena tathā suvūpasantaṃ bhavissati evaṃ mayaṃ imaṃ adhikaraṇaṃ āyasmantānaṃ niyyādessāma no ce āyasmanto sakkonti ettakena vā ettakena vā antarena imaṃ adhikaraṇaṃ vūpasametuṃ dhammena vinayena satthusāsanena tathā na suvūpasantaṃ bhavissati na mayaṃ imaṃ adhikaraṇaṃ āyasmantānaṃ niyyādessāma @Footnote: ¹ Yu. vūpasantaṃ . ² Ma. sampaṭicchissāma . ³ Ma. sampaṭicchitabbaṃ . ⁴ Ma. Yu. @khosaddo natthi . ⁵ Ma. Yu. āyasmantā . ⁶ Yu. āmeḍitavacanaṃ natthi. Mayameva imassa adhikaraṇassa sāmino bhavissāmāti . evaṃ supariggahitaṃ kho bhikkhave katvā āgantukehi bhikkhūhi taṃ adhikaraṇaṃ āvāsikānaṃ bhikkhūnaṃ niyyādetabbaṃ. {674.4} Te ce bhikkhave bhikkhū sakkonti taṃ adhikaraṇaṃ vūpasametuṃ idaṃ vuccati bhikkhave adhikaraṇaṃ suvūpasantaṃ . kena vūpasantaṃ . Sammukhāvinayena . kiñca tattha sammukhāvinayasmiṃ . saṅghasammukhatā dhammasammukhatā vinayasammukhatā puggalasammukhatā .pe. evaṃ vūpasantaṃ ce bhikkhave adhikaraṇaṃ kārako ukkoṭeti ukkoṭanakaṃ pācittiyaṃ. Chandadāyako khīyati khīyanakaṃ pācittiyaṃ. [675] Tehi ce bhikkhave bhikkhūhi tasmiṃ adhikaraṇe vinicchiyamāne anantāni ^1- ceva bhassāni jāyanti na cetassa ^2- bhāsitassa attho viññāyati anujānāmi bhikkhave evarūpaṃ adhikaraṇaṃ ubbāhikāya vūpasametuṃ . dasahaṅgehi samannāgato bhikkhu ubbāhikāya sammannitabbo sīlavā hoti pātimokkhasaṃvarasaṃvuto viharati ācāragocarasampanno ^3- aṇumattesu vajjesu bhayadassāvī samādāya sikkhati sikkhāpadesu bahussuto hoti sutadharo sutasanniccayo ye te dhammā ādikalyāṇā majjhekalyāṇā pariyosānakalyāṇā sātthaṃ sabyañjanaṃ ^4- kevalaparipuṇṇaṃ parisuddhaṃ brahmacariyaṃ abhivadanti tathārūpāssa ^5- dhammā bahussutā honti dhatā ^6- vacasā paricitā manasānupekkhitā @Footnote: ¹ Yu. anaggāni . ² Ma. Yu. na cekassa . ³ Yu. ācārasampanno . ⁴ Yu. sātthā @sabyañjanā . ⁵ Ma. Yu. tathārūpassa . ⁶ Ma. dhātā. Diṭṭhiyā suppaṭividdhā ubhayāni kho panassa pātimokkhāni vitthārena svāgatāni honti suvibhattāni suppavattīni suvinicchitāni suttaso ^1- anubyañjanaso vinaye kho pana ṭhito ^2- hoti asaṃhiro paṭibalo hoti ubho atthapaccatthike saññāpetuṃ nijjhāpetuṃ pekkhetuṃ passituṃ ^3- pasādetuṃ adhikaraṇasamuppādaṃ vūpasametuṃ kusalo ^4- hoti adhikaraṇaṃ jānāti adhikaraṇasamudayaṃ jānāti adhikaraṇanirodhaṃ jānāti adhikaraṇanirodhagāminipaṭipadaṃ jānāti anujānāmi bhikkhave imehi dasahaṅgehi samannāgataṃ bhikkhuṃ ubbāhikāya sammannituṃ. [676] Evañca pana bhikkhave sammannitabbo . paṭhamaṃ bhikkhu yācitabbo yācitvā byattena bhikkhunā paṭibalena saṅgho ñāpetabbo {676.1} suṇātu me bhante saṅgho amhākaṃ imasmiṃ adhikaraṇe vinicchiyamāne anantāni ceva bhassāni jāyanti na cetassa bhāsitassa attho viññāyati . yadi saṅghassa pattakallaṃ saṅgho itthannāmañca itthannāmañca bhikkhuṃ sammanneyya ubbāhikāya imaṃ adhikaraṇaṃ vūpasametuṃ. Esā ñatti. {676.2} Suṇātu me bhante saṅgho amhākaṃ imasmiṃ adhikaraṇe vinicchiyamāne anantāni ceva bhassāni jāyanti na cetassa bhāsitassa attho viññāyati . saṅgho itthannāmañca itthannāmañca bhikkhuṃ sammannati ubbāhikāya imaṃ @Footnote: ¹ Yu. suttato . ² Ma. Yu. cheko . ³ dassetuṃ. @⁴ Ma. Yu. adhikaraṇasamuppādavūpasamanakusalo. Adhikaraṇaṃ vūpasametuṃ . yassāyasmato khamati itthannāmassa ca itthannāmassa ca bhikkhuno sammati ubbāhikāya imaṃ adhikaraṇaṃ vūpasametuṃ so tuṇhassa yassa nakkhamati so bhāseyya. {676.3} Sammato saṅghena itthannāmo ca itthannāmo ca bhikkhu ubbāhikāya imaṃ adhikaraṇaṃ vūpasametuṃ khamati saṅghassa tasmā tuṇhī . Evametaṃ dhārayāmīti. [677] Te ce bhikkhave bhikkhū sakkonti taṃ adhikaraṇaṃ ubbāhikāya vūpasametuṃ idaṃ vuccati bhikkhave adhikaraṇaṃ vūpasantaṃ . kena vūpasantaṃ . sammukhāvinayena . kiñca tattha sammukhāvinayasmiṃ . Dhammasammukhatā vinayasammukhatā puggalasammukhatā .pe. evaṃ vūpasantaṃ ce bhikkhave adhikaraṇaṃ kārako ukkoṭeti ukkoṭanakaṃ pācittiyaṃ. [678] Tehi ce bhikkhave bhikkhūhi tasmiṃ adhikaraṇe vinicchiyamāne tatrassa ^1- bhikkhu dhammakathiko tassa neva suttaṃ āgataṃ hoti no suttavibhaṅgo so atthaṃ asallakkhento byañjanacchāyāya atthaṃ paṭibāhati byattena bhikkhunā paṭibalena te bhikkhū ñāpetabbā {678.1} suṇantu me āyasmantā ayaṃ itthannāmo bhikkhu dhammakathiko imassa neva suttaṃ āgataṃ hoti ^2- no suttavibhaṅgo so atthaṃ asallakkhento byañjanacchāyāya atthaṃ paṭibāhati . Yadāyasmantānaṃ pattakallaṃ itthannāmaṃ bhikkhuṃ vuṭṭhāpetvā avasesā @Footnote: ¹ Ma. tatrāssa . ² Yu. hotīti na paññāyati. Imaṃ adhikaraṇaṃ vūpasameyyāmāti . te ce bhikkhave bhikkhū taṃ bhikkhuṃ vuṭṭhāpetvā sakkonti taṃ adhikaraṇaṃ vūpasametuṃ idaṃ vuccati bhikkhave adhikaraṇaṃ vūpasantaṃ . kena vūpasantaṃ . sammukhāvinayena . Kiñca tattha sammukhāvinayasmiṃ . dhammasammukhatā vinayasammukhatā puggalasammukhatā .pe. evaṃ vūpasantaṃ ce bhikkhave adhikaraṇaṃ kārako ukkoṭeti ukkoṭanakaṃ pācittiyaṃ. [679] Tehi ce bhikkhave bhikkhūhi tasmiṃ adhikaraṇe vinicchiyamāne tatrassa bhikkhu dhammakathiko tassa suttaṃ hi kho āgataṃ hoti no suttavibhaṅgo so atthaṃ asallakkhento byañjanacchāyāya atthaṃ paṭibāhati byattena bhikkhunā paṭibalena te bhikkhū ñāpetabbā {679.1} suṇantu me āyasmantā ayaṃ itthannāmo bhikkhu dhammakathiko imassa suttaṃ hi kho āgataṃ hoti no suttavibhaṅgo so atthaṃ asallakkhento byañjanacchāyāya atthaṃ paṭibāhati . Yadāyasmantānaṃ pattakallaṃ itthannāmaṃ bhikkhuṃ vuṭṭhāpetvā avasesā imaṃ adhikaraṇaṃ vūpasameyyāmāti . te ce bhikkhave bhikkhū taṃ bhikkhuṃ vuṭṭhāpetvā sakkonti taṃ adhikaraṇaṃ vūpasametuṃ idaṃ vuccati bhikkhave adhikaraṇaṃ vūpasantaṃ . kena vūpasantaṃ . sammukhāvinayena . Kiñca tattha sammukhāvinayasmiṃ . dhammasammukhatā vinayasammukhatā puggalasammukhatā .pe. evaṃ vūpasantaṃ ce bhikkhave adhikaraṇaṃ kārako ukkoṭeti ukkoṭanakaṃ pācittiyaṃ. [680] Te ce bhikkhave bhikkhū na sakkonti taṃ adhikaraṇaṃ Ubbāhikāya vūpasametuṃ tehi bhikkhave bhikkhūhi taṃ adhikaraṇaṃ saṅghassa niyyādetabbaṃ na mayaṃ bhante sakkoma imaṃ adhikaraṇaṃ ubbāhikāya vūpasametuṃ saṅgho va imaṃ adhikaraṇaṃ vūpasametūti . anujānāmi bhikkhave evarūpaṃ adhikaraṇaṃ yebhuyyasikāya vupasametuṃ . pañcahaṅgehi samannāgato bhikkhu salākagāhāpako sammannitabbo yo na chandāgatiṃ gaccheyya na dosāgatiṃ gaccheyya na mohāgatiṃ gaccheyya na bhayāgatiṃ gaccheyya gahitāgahitañca jāneyya .pe. Sammato saṅghena itthannāmo bhikkhu salākagāhāpako khamati saṅghassa tasmā tuṇhī. Evametaṃ dhārayāmīti. {680.1} Tena salākagāhāpakena bhikkhunā salākā gāhāpetabbā ^1-. Yathā bahutarā bhikkhū dhammavādino vadenti tathā taṃ adhikaraṇaṃ vūpasametabbaṃ idaṃ vuccati bhikkhave adhikaraṇaṃ vūpasantaṃ . kena vūpasantaṃ . Sammukhāvinayena ca yebhuyyasikāya ca . kiñca tattha sammukhāvinayasmiṃ . Saṅghasammukhatā dhammasammukhatā vinayasammukhatā puggalasammukhatā . Kā ca tattha saṅghasammukhatā . yāvatikā bhikkhū kammappattā te āgatā honti chandārahānaṃ chando āhaṭo hoti sammukhībhūtā na paṭikkosanti ayaṃ tattha saṅghasammukhatā . kā ca tattha dhammasammukhatā vinayasammukhatā . yena dhammena yena vinayena yena satthusāsanena taṃ adhikaraṇaṃ vūpasammati ayaṃ tattha dhammasammukhatā @Footnote: ¹ Ma. Yu. gāhetabbā. Vinayasammukhatā . kā ca tattha puggalasammukhatā . yo ca vivadati yena ca vivadati ubho atthapaccatthikā sammukhībhūtā honti ayaṃ tattha puggalasammukhatā . kā ca tattha yebhuyyasikāya . yā yebhuyyasikāya kammassa kiriyā karaṇaṃ upagamanaṃ ajjhupagamanaṃ adhivāsanā appaṭikkosanā ayaṃ tattha yebhuyyasikāya . evaṃ vūpasantaṃ ce bhikkhave adhikaraṇaṃ kārako ukkoṭeti ukkoṭanakaṃ pācittiyaṃ . Chandadāyako khīyati khīyanakaṃ pācittiyanti. [681] Tena kho pana samayena sāvatthiyā evaṃjātaṃ evaṃsamuppannaṃ adhikaraṇaṃ hoti . athakho te bhikkhū asantuṭṭhā sāvatthiyā saṅghassa adhikaraṇavūpasamanena assosuṃ kho amukasmiṃ kira āvāse sambahulā therā viharanti bahussutā āgatāgamā dhammadharā vinayadharā mātikādharā paṇḍitā viyattā medhāvino lajjino kukkuccakā sikkhākāmā te ce therā imaṃ adhikaraṇaṃ vūpasameyyuṃ dhammena vinayena satthusāsanena evamidaṃ adhikaraṇaṃ suvūpasantaṃ assāti. {681.1} Athakho te bhikkhū taṃ āvāsaṃ gantvā te there etadavocuṃ idaṃ bhante adhikaraṇaṃ evaṃjātaṃ evaṃsamuppannaṃ sādhu bhante therā imaṃ adhikaraṇaṃ vūpasamentu dhammena vinayena satthusāsanena yathāyidaṃ adhikaraṇaṃ suvūpasantaṃ assāti . athakho te therā yathā sāvatthiyā saṅghena adhikaraṇaṃ vūpasamitaṃ yathāsuvūpasantaṃ ^1- tathā taṃ adhikaraṇaṃ @Footnote: ¹ Ma. Yu. tathāvūpasantanti. Vūpasamesuṃ . athakho te bhikkhū asantuṭṭhā sāvatthiyā saṅghassa adhikaraṇavūpasamanena asantuṭṭhā sambahulānaṃ therānaṃ adhikaraṇavūpasamanena assosuṃ kho amukasmiṃ kira āvāse tayo therā viharanti .pe. Dve therā viharanti .pe. eko thero viharati bahussuto āgatāgamo dhammadharo vinayadharo mātikādharo paṇḍito viyatto medhāvī lajjī kukkuccako sikkhākāmo so ce thero imaṃ adhikaraṇaṃ vūpasameyya dhammena vinayena satthusāsanena evamidaṃ adhikaraṇaṃ suvūpasantaṃ assāti. {681.2} Athakho te bhikkhū taṃ āvāsaṃ gantvā taṃ theraṃ etadavocuṃ idaṃ bhante adhikaraṇaṃ evaṃjātaṃ evaṃsamuppannaṃ sādhu bhante thero imaṃ adhikaraṇaṃ vūpasametu dhammena vinayena satthusāsanena yathāyidaṃ adhikaraṇaṃ suvūpasantaṃ assāti . athakho so thero yathā sāvatthiyā saṅghena adhikaraṇaṃ vūpasamitaṃ yathā sambahulehi therehi adhikaraṇaṃ vūpasamitaṃ yathā tīhi therehi adhikaraṇaṃ vūpasamitaṃ yathā dvīhi therehi adhikaraṇaṃ vūpasamitaṃ yathāsuvūpasantaṃ yathā taṃ adhikaraṇaṃ vūpasamesi. {681.3} Athakho te bhikkhū asantuṭṭhā sāvatthiyā saṅghassa adhikaraṇavūpasamanena asantuṭṭhā sambahulānaṃ therānaṃ adhikaraṇavūpasamanena asantuṭṭhā tiṇṇaṃ therānaṃ adhikaraṇavūpasamanena asantuṭṭhā dvinnaṃ therānaṃ adhikaraṇavūpasamanena asantuṭṭhā ekassa therassa adhikaraṇavūpasamanena yena bhagavā tenupasaṅkamiṃsu upasaṅkamitvā bhagavato etamatthaṃ Ārocesuṃ . nīhatametaṃ bhikkhave adhikaraṇaṃ santaṃ vūpasantaṃ suvūpasantaṃ ^1-. Anujānāmi bhikkhave tesaṃ bhikkhūnaṃ saññattiyā tayo salākagāhe gūḷhakaṃ sakaṇṇajappakaṃ vivaṭakaṃ . kathañca bhikkhave gūḷhako salākagāho hoti . tena salākagāhāpakena bhikkhunā salākāyo vaṇṇāvaṇṇāyo katvā ekeko ^2- bhikkhu upasaṅkamitvā evamassa vacanīyo ayaṃ evaṃvādissa salākā ayaṃ evaṃvādissa salākā yaṃ icchasi taṃ gaṇhāhīti . gahite vattabbo mā ca kassaci dassehīti . sace jānāti adhammavādī bahutarāti duggahoti paccukkaḍḍhitabbaṃ . sace jānāti dhammavādī bahutarāti suggahoti sāvetabbaṃ . evaṃ kho bhikkhave gūḷhako salākagāho hoti . Kathañca bhikkhave sakaṇṇajappako salākagāho hoti. {681.4} Tena salākagāhāpakena bhikkhunā ekamekassa bhikkhuno upakaṇṇake ārocetabbaṃ ayaṃ evaṃvādissa salākā ayaṃ evaṃvādissa salākā yaṃ icchasi taṃ gaṇhāhīti . gahite vattabbo mā ca kassaci ārocehīti . sace jānāti adhammavādī bahutarāti duggahoti paccukkaḍḍhitabbaṃ . sace jānāti dhammavādī bahutarāti suggahoti sāvetabbaṃ . evaṃ kho bhikkhave sakaṇṇajappako salākagāho hoti . kathañca bhikkhave vivaṭako salākagāho hoti . sace jānāti dhammavādī bahutarāti vissaṭṭheneva vivaṭena salākagāhena @Footnote: ¹ Ma. Yu. suvūpasantanti . ² Ma. Yu. ekameko. Gāhetabbā ^1- evaṃ kho bhikkhave vivaṭako salākagāho hoti ime kho bhikkhave tayo salākagāhāti. [682] Anuvādādhikaraṇaṃ katīhi samathehi sammati . anuvādādhikaraṇaṃ catūhi samathehi sammati sammukhāvinayena ca sativinayena ca amūḷhavinayena ca tassapāpiyasikāya ca. [683] Siyā anuvādādhikaraṇaṃ dve samathe anāgamma amūḷhavinayañca tassapāpiyasikañca dvīhi samathehi sammeyya sammukhāvinayena ca sativinayena cāti . siyātissa vacanīyaṃ . yathā kathaṃ viya . Idha pana bhikkhave ^2- bhikkhū bhikkhuṃ amūlikāya sīlavipattiyā anuddhaṃsenti. Tassa kho taṃ bhikkhave bhikkhuno sativepullappattassa sativinayo dātabbo . evañca pana bhikkhave dātabbo . tena bhikkhave bhikkhunā saṅghaṃ upasaṅkamitvā ekaṃsaṃ uttarāsaṅgaṃ karitvā .pe. Evamassa vacanīyo maṃ bhante bhikkhū amūlikāya sīlavipattiyā anuddhaṃsenti sohaṃ bhante sativepullappatto saṅghaṃ sativinayaṃ yācāmīti. Dutiyampi yācitabbo tatiyampi yācitabbo. [684] Byattena bhikkhunā paṭibalena saṅgho ñāpetabbo {684.1} suṇātu me bhante saṅgho bhikkhū itthannāmaṃ bhikkhuṃ amūlikāya sīlavipattiyā anuddhaṃsenti . so sativepullappatto saṅghaṃ sativinayaṃ yācati . yadi saṅghassa pattakallaṃ saṅgho itthannāmassa bhikkhuno @Footnote: ¹ Ma. Yu. visattheneva vivaṭena gāhetabbo . ² Ma. Yu. bhikkhaveti natthi. Sativepullappattassa sativinayaṃ dadeyya. Esā ñatti. {684.2} Suṇātu me bhante saṅgho bhikkhū itthannāmaṃ bhikkhuṃ amūlikāya sīlavipattiyā anuddhaṃsenti . so sativepullappatto saṅghaṃ sativinayaṃ yācati. Saṅgho itthannāmassa bhikkhuno sativepullappattassa sativinayaṃ deti . Yassāyasmato khamati itthannāmassa bhikkhuno sativepullappattassa sativinayassa dānaṃ so tuṇhassa yassa nakkhamati so bhāseyya. {684.3} Dutiyampi etamatthaṃ vadāmi .pe. tatiyampi etamatthaṃ vadāmi .pe. dinno saṅghena itthannāmassa bhikkhuno sativepullappattassa sativinayo khamati saṅghassa tasmā tuṇhī. Evametaṃ dhārayāmīti. {684.4} Idaṃ vuccati bhikkhave adhikaraṇaṃ vūpasantaṃ. Kena vūpasantaṃ. Sammukhāvinayena ca sativinayena ca . kiñca tattha sammukhāvinayasmiṃ . Saṅghasammukhatā dhammasammukhatā vinayasammukhatā puggalasammukhatā .pe. Kā ca tattha puggalasammukhatā . yo ca anuvadati yañca anuvadati ubho sammukhībhūtā honti ayaṃ tattha puggalasammukhatā . kiñca tattha sativinayasmiṃ . yā sativinayassa kammassa kiriyā karaṇaṃ upagamanaṃ ajjhupagamanaṃ adhivāsanā appaṭikkosanā idaṃ tattha sativinayasmiṃ . Evaṃ vūpasantaṃ ce bhikkhave adhikaraṇaṃ kārako ukkoṭeti ukkoṭanakaṃ pācittiyaṃ. Chandadāyako khīyati khīyanakaṃ pācittiyaṃ. [685] Siyā anuvādādhikaraṇaṃ dve samathe anāgamma sativinayañca tassapāpiyasikañca dvīhi samathehi sammeyya sammukhāvinayena ca Amūḷhavinayena cāti . siyātissa vacanīyaṃ . yathā kathaṃ viya . Idha pana bhikkhave bhikkhu ummattako hoti cittavipariyāsakato tena ummattakena cittavipariyāsakatena bahuṃ assāmaṇakaṃ ajjhāciṇṇaṃ hoti bhāsitaparikkantaṃ . taṃ bhikkhū ummattakena cittavipariyāsakatena ajjhāciṇṇena āpattiyā codenti saratāyasmā evarūpiṃ āpattiṃ āpajjitāti . so evaṃ vadeti ahaṃ kho āvuso ummattako ahosiṃ cittavipariyāsakato tena me ummattakena cittavipariyāsakatena bahuṃ assāmaṇakaṃ ajjhāciṇṇaṃ bhāsitaparikkantaṃ nāhantaṃ sarāmi mūḷhena me etaṃ katanti . evaṃpi naṃ vuccamānā codenteva saratāyasmā evarūpiṃ āpattiṃ āpajjitāti . tassa kho bhikkhave bhikkhuno amūḷhassa amūḷhavinayo dātabbo. {685.1} Evañca pana bhikkhave dātabbo . tena bhikkhave bhikkhunā saṅghaṃ upasaṅkamitvā ekaṃsaṃ uttarāsaṅgaṃ karitvā .pe. Evamassa vacanīyo ahaṃ bhante ummattako ahosiṃ cittavipariyāsakato tena me ummattakena cittavipariyāsakatena bahuṃ assāmaṇakaṃ ajjhāciṇṇaṃ bhāsitaparikkantaṃ maṃ bhikkhū ummattakena cittavipariyāsakatena ajjhāciṇṇena āpattiyā codenti saratāyasmā evarūpiṃ āpattiṃ āpajjitāti tyāhaṃ evaṃ vadāmi ahaṃ kho āvuso ummattako ahosiṃ cittavipariyāsakato tena me ummattakena cittavipariyāsakatena bahuṃ assāmaṇakaṃ ajjhāciṇṇaṃ bhāsitaparikkantaṃ nāhantaṃ sarāmi muḷhena me etaṃ Katanti . evaṃpi maṃ vuccamānā codenteva saratāyasmā evarūpiṃ āpattiṃ āpajjitāti . sohaṃ bhante amūḷho saṅghaṃ amūḷhavinayaṃ yācāmīti. Dutiyampi yācitabbo tatiyampi yācitabbo. [686] Byattena bhikkhunā paṭibalena saṅgho ñāpetabbo {686.1} suṇātu me bhante saṅgho ayaṃ itthannāmo bhikkhu ummattako ahosi cittavipariyāsakato tena ummattakena cittavipariyāsakatena bahuṃ assāmaṇakaṃ ajjhāciṇṇaṃ bhāsitaparikkantaṃ . Taṃ bhikkhū ummattakena cittavipariyāsakatena ajjhāciṇṇena āpattiyā codenti saratāyasmā evarūpiṃ āpattiṃ āpajjitāti . so evaṃ vadeti ahaṃ kho āvuso ummattako ahosiṃ cittavipariyāsakato tena me ummattakena cittavipariyāsakatena bahuṃ assāmaṇakaṃ ajjhāciṇṇaṃ bhāsitaparikkantaṃ nāhantaṃ sarāmi mūḷhena me etaṃ katanti . Evaṃpi naṃ vuccamānā codenteva saratāyasmā evarūpiṃ āpattiṃ āpajjitāti . so amūḷho saṅghaṃ amūḷhavinayaṃ yācati . yadi saṅghassa pattakallaṃ saṅgho itthannāmassa bhikkhuno amūḷhassa amūḷhavinayaṃ dadeyya. Esā ñatti. {686.2} Suṇātu me bhante saṅgho ayaṃ itthannāmo bhikkhu ummattako ahosi cittavipariyāsakato tena ummattakena cittavipariyāsakatena bahuṃ assāmaṇakaṃ ajjhāciṇṇaṃ bhāsitaparikkantaṃ . Taṃ bhikkhū ummattakena cittavipariyāsakatena ajjhāciṇṇena āpattiyā codenti saratāyasmā evarūpiṃ āpattiṃ Āpajjitāti . so evaṃ vadeti ahaṃ kho āvuso ummattako ahosiṃ cittavipariyāsakato tena me ummattakena cittavipariyāsakatena bahuṃ assāmaṇakaṃ ajjhāciṇṇaṃ bhāsitaparikkantaṃ nāhantaṃ sarāmi mūḷhena me etaṃ katanti . evaṃpi naṃ vuccamānā codenteva saratāyasmā evarūpiṃ āpattiṃ āpajjitāti . so amūḷho saṅghaṃ amūḷhavinayaṃ yācati . saṅgho itthannāmassa bhikkhuno amūḷhassa amūḷhavinayaṃ deti . yassāyasmato khamati itthannāmassa bhikkhuno amūḷhassa amūḷhavinayassa dānaṃ so tuṇhassa yassa nakkhamati so bhāseyya. {686.3} Dutiyampi etamatthaṃ vadāmi .pe. tatiyampi etamatthaṃ vadāmi .pe. dinno saṅghena itthannāmassa bhikkhuno amūḷhassa amūḷhavinayo khamati saṅghassa tasmā tuṇhī. Evametaṃ dhārayāmīti. {686.4} Idaṃ vuccati bhikkhave adhikaraṇaṃ vūpasantaṃ . kena vūpasantaṃ . sammukhāvinayena ca amūḷhavinayena ca . kiñca tattha sammukhāvinayasmiṃ . saṅghasammukhatā dhammasammukhatā vinayasammukhatā puggalasammukhatā .pe. kiñca tattha amūḷhavinayasmiṃ . yā amūḷhavinayassa kammassa kiriyā karaṇaṃ upagamanaṃ ajjhupagamanaṃ adhivāsanā appaṭikkosanā idaṃ tattha amūḷhavinayasmiṃ . evaṃ vūpasantaṃ ce bhikkhave adhikaraṇaṃ kārako ukkoṭeti ukkoṭanakaṃ pācittiyaṃ . chandadāyako khīyati khīyanakaṃ pācittiyaṃ. [687] Siyā anuvādādhikaraṇaṃ dve samathe anāgamma sativinayañca Amūḷhavinayañca dvīhi samathehi sammeyya sammukhāvinayena ca tassapāpiyasikāya cāti . siyātissa vacanīyaṃ . yathā kathaṃ viya . Idha pana bhikkhave bhikkhu bhikkhuṃ saṅghamajjhe garukāya āpattiyā codeti saratāyasmā evarūpiṃ garukaṃ āpattiṃ āpajjitā pārājikaṃ vā pārājikasāmantaṃ vāti . so evaṃ vadeti na kho ahaṃ āvuso sarāmi evarūpiṃ garukaṃ āpattiṃ āpajjitā pārājikaṃ vā pārājikasāmantaṃ vāti . tamenaṃ so niveṭhentaṃ ^1- ativeṭheti iṅghāyasmā sādhukameva jānāhi yadi sarasi evarūpiṃ garukaṃ āpattiṃ āpajjitā pārājikaṃ vā pārājikasāmantaṃ vāti. {687.1} So evaṃ vadeti na kho ahaṃ āvuso sarāmi evarūpiṃ garukaṃ āpattiṃ āpajjitā pārājikaṃ vā pārājikasāmantaṃ vā sarāmi ca kho ahaṃ āvuso evarūpiṃ appamattakaṃpi āpattiṃ āpajjitāti . tamenaṃ so niveṭhentaṃ ativeṭheti iṅghāyasmā sādhukameva jānāhi yadi sarasi evarūpiṃ garukaṃ āpattiṃ āpajjitā pārājikaṃ vā pārājikasāmantaṃ vāti . so evaṃ vadeti imaṃ hi nāmāhaṃ āvuso appamattakaṃpi ^2- āpattiṃ āpajjitā ^3- apuṭṭho paṭijānissāmi kiṃ panāhaṃ evarūpiṃ garukaṃ āpattiṃ āpajjitā pārājikaṃ vā pārājikasāmantaṃ vā puṭṭho na paṭijānissāmīti . So evaṃ vadeti imaṃ hi nāma tvaṃ āvuso appamattakaṃpi āpattiṃ āpajjitā apuṭṭho na paṭijānissasi kiṃ pana tvaṃ @Footnote: ¹ Ma. Yu. nibbeṭhentaṃ . ² Ma. Yu. appamattakaṃ . ³ Ma. Yu. āpajjitvā. Evarūpiṃ garukaṃ āpattiṃ āpajjitā pārājikaṃ vā pārājikasāmantaṃ vā apuṭṭho paṭijānissasi iṅghāyasmā sādhukameva jānāhi yadi sarasi evarūpiṃ garukaṃ āpattiṃ āpajjitā pārājikaṃ vā pārājikasāmantaṃ vāti . so evaṃ vadeti ^1- sarāmi kho ahaṃ āvuso evarūpiṃ garukaṃ āpattiṃ āpajjitā pārājikaṃ vā pārājikasāmantaṃ vā davā me etaṃ vuttaṃ ravā me etaṃ vuttaṃ nāhantaṃ sarāmi evarūpiṃ garukaṃ āpattiṃ āpajjitā pārājikaṃ vā pārājikasāmantaṃ vāti . Tassa khvetaṃ ^2- bhikkhave bhikkhuno tassapāpiyasikākammaṃ kātabbaṃ. [688] Evañca pana bhikkhave kātabbaṃ . byattena bhikkhunā paṭibalena saṅgho ñāpetabbo {688.1} suṇātu me bhante saṅgho ayaṃ itthannāmo bhikkhu saṅghamajjhe garukāya āpattiyā anuyuñjiyamāno avajānitvā paṭijānāti paṭijānitvā avajānāti aññena aññaṃ paṭicarati sampajānamusā bhāsati . yadi saṅghassa pattakallaṃ saṅgho itthannāmassa bhikkhuno tassapāpiyasikākammaṃ kareyya . Esā ñatti. {688.2} Suṇātu me bhante saṅgho ayaṃ itthannāmo bhikkhu saṅghamajjhe garukāya āpattiyā anuyuñjiyamāno avajānitvā paṭijānāti paṭijānitvā avajānāti aññena aññaṃ paṭicarati sampajānamusā bhāsati . saṅgho itthannāmassa bhikkhuno tassapāpiyasikākammaṃ @Footnote: ¹ Ma. vadesi . ² Ma. kho taṃ. Yu. kho. Karoti . yassāyasmato khamati itthannāmassa bhikkhuno tassapāpiyasikākammassa karaṇaṃ so tuṇhassa yassa nakkhamati so bhāseyya. {688.3} Dutiyampi etamatthaṃ vadāmi .pe. tatiyampi etamatthaṃ vadāmi .pe. kataṃ saṅghena itthannāmassa bhikkhuno tassapāpiyasikākammaṃ khamati saṅghassa tasmā tuṇhī. Evametaṃ dhārayāmīti {688.4} idaṃ vuccati bhikkhave adhikaraṇaṃ vūpasantaṃ. Kena vūpasantaṃ. Sammukhāvinayena ca tassapāpiyasikāya ca . kiñca tattha sammukhāvinayasmiṃ. Saṅghasammukhatā dhammasammukhatā vinayasammukhatā puggalasammukhatā .pe. Kā ca tattha tassapāpiyasikāya . yā tassapāpiyasikāya kammassa kiriyā karaṇaṃ upagamanaṃ ajjhupagamanaṃ adhivāsanā appaṭikkosanā ayaṃ tattha tassapāpiyasikāya . evaṃ vūpasantaṃ ce bhikkhave adhikaraṇaṃ kārako ukkoṭeti ukkoṭanakaṃ pācittiyaṃ. Chandadāyako khīyati khīyanakaṃ pācittiyaṃ. [689] Āpattādhikaraṇaṃ katīhi samathehi sammati . āpattādhikaraṇaṃ tīhi samathehi sammati sammukhāvinayena ca paṭiññātakaraṇena ca tiṇavatthārakena ca. [690] Siyā āpattādhikaraṇaṃ ekaṃ samathaṃ anāgamma tiṇavatthārakaṃ dvīhi samathehi sammeyya sammukhāvinayena ca paṭiññātakaraṇena cāti . Siyātissa vacanīyaṃ . yathā kathaṃ viya . idha pana bhikkhave bhikkhu lahukaṃ āpattiṃ āpanno hoti . tena bhikkhave bhikkhunā ekaṃ bhikkhuṃ upasaṅkamitvā ekaṃ uttarāsaṅgaṃ karitvā ukkuṭikaṃ ^1- nisīditvā @Footnote: ¹ Ma. karitvā vuḍḍhānaṃ bhikkhūnaṃ pāde vanditvā ukkuṭikaṃ. Añjaliṃ paggahetvā evamassa vacanīyo ahaṃ āvuso itthannāmaṃ āpattiṃ āpanno taṃ paṭidesemīti . tena vattabbo passasīti . Āma passāmīti. Āyatiṃ saṃvareyyāsīti. {690.1} Idaṃ vuccati bhikkhave adhikaraṇaṃ vūpasantaṃ. Kena vūpasantaṃ. Sammukhāvinayena ca paṭiññātakaraṇena ca . kiñca tattha sammukhāvinayasmiṃ. Dhammasammukhatā vinayasammukhatā puggalasammukhatā .pe. kā ca tattha puggalasammukhatā . yo ca deseti yassa ca deseti ubho sammukhībhūtā honti ayaṃ tattha puggalasammukhatā . kiñca tattha paṭiññātakaraṇasmiṃ . Yā paṭiññātakaraṇassa kammassa kiriyā karaṇaṃ upagamanaṃ ajjhupagamanaṃ adhivāsanā appaṭikkosanā idaṃ tattha paṭiññātakaraṇasmiṃ . evaṃ vūpasantaṃ ce bhikkhave adhikaraṇaṃ paṭiggāhako ukkoṭeti ukkoṭanakaṃ pācittiyaṃ. {690.2} Evañce taṃ labhetha iccetaṃ kusalaṃ no ce labhetha tena bhikkhave bhikkhunā sambahule bhikkhū upasaṅkamitvā ekaṃsaṃ uttarāsaṅgaṃ karitvā vuḍḍhānaṃ bhikkhūnaṃ pāde vanditvā ukkuṭikaṃ nisīditvā añjaliṃ paggahetvā evamassu vacanīyā ahaṃ bhante itthannāmaṃ āpattiṃ āpanno taṃ paṭidesemīti . byattena bhikkhunā paṭibalena te bhikkhū ñāpetabbā {690.3} suṇantu me āyasmantā ayaṃ itthannāmo bhikkhu āpattiṃ sarati vivarati uttānīkaroti deseti . Yadāyasmantānaṃ pattakallaṃ ahaṃ itthannāmassa bhikkhuno āpattiṃ paṭiggaṇheyyanti . tena vattabbo passasīti . Āma passāmīti . āyatiṃ saṃvareyyāsīti . idaṃ vuccati bhikkhave adhikaraṇaṃ vūpasantaṃ . kena vūpasantaṃ . sammukhāvinayena ca paṭiññātakaraṇena ca . kiñca tattha sammukhāvinayasmiṃ . dhammasammukhatā vinayasammukhatā puggalasammukhatā .pe. kā ca tattha puggalasammukhatā . Yo ca deseti yassa ca deseti ubho sammukhībhūtā honti ayaṃ tattha puggalasammukhatā . kiñca tattha paṭiññātakaraṇasmiṃ . yā paṭiññātakaraṇassa kammassa kiriyā karaṇaṃ upagamanaṃ ajjhupagamanaṃ adhivāsanā appaṭikkosanā idaṃ tattha paṭiññātakaraṇasmiṃ . Evaṃ vūpasantaṃ ce bhikkhave adhikaraṇaṃ paṭiggāhako ukkoṭeti ukkoṭanakaṃ pācittiyaṃ. {690.4} Evañce taṃ labhetha iccetaṃ kusalaṃ no ce labhetha tena bhikkhave bhikkhunā saṅghaṃ upasaṅkamitvā ekaṃsaṃ uttarāsaṅgaṃ karitvā vuḍḍhānaṃ bhikkhūnaṃ pāde vanditvā ukkuṭikaṃ nisīditvā añjaliṃ paggahetvā evamassa vacanīyo ahaṃ bhante itthannāmaṃ āpattiṃ āpanno taṃ paṭidesemīti . byattena bhikkhunā paṭibalena saṅgho ñāpetabbo {690.5} suṇātu me bhante saṅgho ayaṃ itthannāmo bhikkhu āpattiṃ sarati vivarati uttānīkaroti deseti . yadi saṅghassa pattakallaṃ ahaṃ itthannāmassa bhikkhuno āpattiṃ paṭiggaṇheyyanti . tena vattabbo passasīti. Āma passāmīti. Āyatiṃ saṃvareyyāsīti. {690.6} Idaṃ vuccati bhikkhave adhikaraṇaṃ vūpasantaṃ. Kena vūpasantaṃ. Sammukhāvinayena ca paṭiññātakaraṇena Ca . kiñca tattha sammukhāvinayasmiṃ . saṅghasammukhatā dhammasammukhatā vinayasammukhatā puggalasammukhatā .pe. evaṃ vūpasantaṃ ce bhikkhave adhikaraṇaṃ paṭiggāhako ukkoṭeti ukkoṭanakaṃ pācittiyaṃ . Chandadāyako khīyati khīyanakaṃ pācittiyaṃ. [691] Siyā āpattādhikaraṇaṃ ekaṃ samathaṃ anāgamma paṭiññātakaraṇaṃ dvīhi samathehi sammeyya sammukhāvinayena ca tiṇavatthārakena cāti . siyātissa vacanīyaṃ . yathā kathaṃ viya . idha pana bhikkhave bhikkhūnaṃ bhaṇḍanajātānaṃ kalahajātānaṃ vivādāpannānaṃ viharataṃ bahuṃ assāmaṇakaṃ ajjhāciṇṇaṃ hoti bhāsitaparikkantaṃ . tatra ce bhikkhave ^1- bhikkhūnaṃ evaṃ hoti amhākaṃ kho bhaṇḍanajātānaṃ kalahajātānaṃ vivādāpannānaṃ viharataṃ bahuṃ assāmaṇakaṃ ajjhāciṇṇaṃ bhāsitaparikkantaṃ sace mayaṃ imāhi āpattīhi aññamaññaṃ kāressāma siyāpi taṃ adhikaraṇaṃ kakkhaḷatāya vāḷatāya bhedāya saṃvatteyyāti . anujānāmi bhikkhave evarūpaṃ adhikaraṇaṃ tiṇavatthārakena vūpasametuṃ. {691.1} Evañca pana bhikkhave vūpasametabbaṃ. Sabbeheva ekajjhaṃ sannipatitabbaṃ sannipatitvā byattena bhikkhunā paṭibalena saṅgho ñāpetabbo {691.2} suṇātu me bhante saṅgho amhākaṃ bhaṇḍanajātānaṃ kalahajātānaṃ vivādāpannānaṃ viharataṃ bahuṃ assāmaṇakaṃ ajjhāciṇṇaṃ bhāsitaparikkantaṃ . sace mayaṃ imāhi āpattīhi aññamaññaṃ kāressāma siyāpi taṃ adhikaraṇaṃ kakkhaḷatāya vāḷatāya bhedāya @Footnote: ¹ Ma. bhikkhaveti natthi. Saṃvatteyya . yadi saṅghassa pattakallaṃ saṅgho imaṃ adhikaraṇaṃ tiṇavatthārakena vūpasameyya ṭhapetvā thullavajjaṃ ṭhapetvā gihipaṭisaṃyuttanti. Ekatopakkhikānaṃ bhikkhūnaṃ byattena bhikkhunā paṭibalena sako pakkho ñāpetabbo {691.3} suṇantu me āyasmantā amhākaṃ bhaṇḍanajātānaṃ kalahajātānaṃ vivādāpannānaṃ viharataṃ bahuṃ assāmaṇakaṃ ajjhāciṇṇaṃ bhāsitaparikkantaṃ . sace mayaṃ imāhi āpattīhi aññamaññaṃ kāressāma siyāpi taṃ adhikaraṇaṃ kakkhaḷatāya vāḷatāya bhedāya saṃvatteyya . yadāyasmantānaṃ pattakallaṃ ahaṃ yā ceva āyasmantānaṃ āpatti yā ca attano āpatti āyasmantānañceva atthāya attano ca atthāya saṅghamajjhe tiṇavatthārakena deseyyaṃ ṭhapetvā thullavajjaṃ ṭhapetvā gihipaṭisaṃyuttanti. [692] Athāparesaṃ ekatopakkhikānaṃ bhikkhūnaṃ byattena bhikkhunā paṭibalena sako pakkho ñāpetabbo {692.1} suṇantu me āyasmantā amhākaṃ bhaṇḍanajātānaṃ kalahajātānaṃ vivādāpannānaṃ viharataṃ bahuṃ assāmaṇakaṃ ajjhāciṇṇaṃ bhāsitaparikkantaṃ . sace mayaṃ imāhi āpattīhi aññamaññaṃ kāressāma siyāpi taṃ adhikaraṇaṃ kakkhaḷatāya vāḷatāya bhedāya saṃvatteyya . Yadāyasmantānaṃ pattakallaṃ ahaṃ yā ceva āyasmantānaṃ āpatti yā ca attano āpatti āyasmantānañceva atthāya attano ca atthāya saṅghamajjhe tiṇavatthārakena deseyyaṃ ṭhapetvā thullavajjaṃ ṭhapetvā gihipaṭisaṃyuttanti. [693] ^[1]- Ekatopakkhikānaṃ bhikkhūnaṃ byattena bhikkhunā paṭibalena saṅgho ñāpetabbo {693.1} suṇātu me bhante saṅgho amhākaṃ bhaṇḍanajātānaṃ kalahajātānaṃ vivādāpannānaṃ viharataṃ bahuṃ assāmaṇakaṃ ajjhāciṇṇaṃ bhāsitaparikkantaṃ . sace mayaṃ imāhi āpattīhi aññamaññaṃ kāressāma siyāpi taṃ adhikaraṇaṃ kakkhaḷatāya vāḷatāya bhedāya saṃvatteyya . yadi saṅghassa pattakallaṃ ahaṃ yā ceva imesaṃ āyasmantānaṃ āpatti yā ca attano āpatti imesañceva āyasmantānaṃ atthāya attano ca atthāya saṅghamajjhe tiṇavatthārakena deseyyaṃ ṭhapetvā thullavajjaṃ ṭhapetvā gihipaṭisaṃyuttaṃ. Esā ñatti. {693.2} Suṇātu me bhante saṅgho amhākaṃ bhaṇḍanajātānaṃ kalahajātānaṃ vivādāpannānaṃ viharataṃ bahuṃ assāmaṇakaṃ ajjhāciṇṇaṃ bhāsitaparikkantaṃ . sace mayaṃ imāhi āpattīhi aññamaññaṃ kāressāma siyāpi taṃ adhikaraṇaṃ kakkhaḷatāya vāḷatāya bhedāya saṃvatteyya . ahaṃ yā ceva imesaṃ āyasmantānaṃ āpatti yā ca attano āpatti imesañceva āyasmantānaṃ atthāya attano ca atthāya saṅghamajjhe tiṇavatthārakena desemi ṭhapetvā thullavajjaṃ ṭhapetvā gihipaṭisaṃyuttaṃ . yassāyasmato khamati amhākaṃ imāsaṃ āpattīnaṃ saṅghamajjhe tiṇavatthārakena desanā ṭhapetvā thullavajjaṃ ṭhapetvā gihipaṭisaṃyuttaṃ so tuṇhassa yassa nakkhamati so bhāseyya. {693.3} Desitā amhākaṃ imā āpattiyo saṅghamajjhe @Footnote: ¹ Ma. athāparesaṃ. Tiṇavatthārakena ṭhapetvā thullavajjaṃ ṭhapetvā gihipaṭisaṃyuttaṃ khamati saṅghassa tasmā tuṇhī . evametaṃ dhārayāmīti . athāparesaṃ .pe. Evametaṃ dhārayāmīti. {693.4} Idaṃ vuccati bhikkhave adhikaraṇaṃ vūpasantaṃ. Kena vūpasantaṃ. Sammukhāvinayena ca tiṇavatthārakena ca . kiñca tattha sammukhāvinayasmiṃ. Saṅghasammukhatā dhammasammukhatā vinayasammukhatā puggalasammukhatā . kā ca tattha saṅghasammukhatā . yāvatikā bhikkhū kammappattā te āgatā honti chandārahānaṃ chando āhaṭo hoti sammukhībhūtā na paṭikkosanti ayaṃ tattha saṅghasammukhatā . kā ca tattha dhammasammukhatā vinayasammukhatā. Yena dhammena yena vinayena yena satthusāsanena taṃ adhikaraṇaṃ vūpasammati ayaṃ tattha dhammasammukhatā vinayasammukhatā. Kā ca tattha puggalasammukhatā. {693.5} Yo ca deseti yassa ca deseti ubho sammukhībhūtā honti ayaṃ tattha puggalasammukhatā . kiñca tattha tiṇavatthārakasmiṃ . Yā tiṇavatthārakassa kammassa kiriyā karaṇaṃ upagamanaṃ ajjhupagamanaṃ adhivāsanā appaṭikkosanā idaṃ tattha tiṇavatthārakasmiṃ . evaṃ vūpasantaṃ ce bhikkhave adhikaraṇaṃ paṭiggāhako ukkoṭeti ukkoṭanakaṃ pācittiyaṃ. Chandadāyako khīyati khīyanakaṃ pācittiyaṃ. [694] Kiccādhikaraṇaṃ katīhi samathehi sammati . kiccādhikaraṇaṃ ekena samathena sammati sammukhāvinayenāti. Samathakkhandhakaṃ niṭṭhitaṃ catutthaṃ ^1-. ------------ @Footnote: ¹ Ma. samathakkhandhako niṭṭhito catuttho.

The Pali Tipitaka in Roman Character Volume 6 page 299-374. http://84000.org/tipitaka/pali/roman_item_s.php?book=6&item=585&items=400 Classified by [Item Number] :- http://84000.org/tipitaka/pali/roman_item_s.php?book=6&item=585&items=400&mode=bracket Compare with The Pali Tipitaka in Thai Character :- http://84000.org/tipitaka/read/pali_item_s.php?book=6&item=585&items=400 Compare with The Royal Version of Thai Tipitaka :- http://84000.org/tipitaka/read/byitem_s.php?book=6&item=585&items=400 Study Atthakatha :- http://84000.org/tipitaka/attha/attha.php?b=6&i=585 The Pali Atthakatha in Thai :- http://84000.org/tipitaka/atthapali/read_th.php?B=3&A=6602 The Pali Atthakatha in Roman :- http://84000.org/tipitaka/atthapali/read_rm.php?B=3&A=6602 Contents of The Tipitaka Volume 6 http://84000.org/tipitaka/read/?index_6