Senāsanakkhandhakaṃ
[198] Tena samayena buddho bhagavā rājagahe viharati veḷuvane
kalandakanivāpe . tena kho pana samayena bhagavatā bhikkhūnaṃ senāsanaṃ
appaññattaṃ hoti . te ca 1- bhikkhū tahaṃ tahaṃ viharanti araññe
rukkhamūle pabbate kandarāyaṃ giriguhāyaṃ susāne vanapatthe ajjhokāse
palālapuñje . te kālasseva tato tato upanikkhamanti araññā
rukkhamūlā pabbatā kandarā giriguhā susānā vanapatthā ajjhokāsā
palālapuñjā pāsādikena abhikkantena paṭikkantena ālokitena
vilokitena sammiñjitena pasāritena okkhittacakkhū iriyāpathasampannā.
[199] Tena kho pana samayena rājagahako seṭṭhī kālasseva
uyyānaṃ agamāsi . addasā kho rājagahako seṭṭhī te bhikkhū
kālasseva tato tato upanikkhamante araññā rukkhamūlā pabbatā
kandarā giriguhā susānā vanapatthā ajjhokāsā palālapuñjā
pāsādikena abhikkantena paṭikkantena ālokitena vilokitena
sammiñjitena pasāritena okkhittacakkhū iriyāpathasampanne .
Disvānassa cittaṃ pasīdi . athakho rājagahako seṭṭhī yena te bhikkhū
tenupasaṅkami upasaṅkamitvā te bhikkhū etadavoca sacāhaṃ bhante
vihāre kāreyyaṃ 2- vaseyyātha me vihāresūti. Na kho gahapati bhagavatā
@Footnote: 1 Yu. tedha. 2 Ma. kārāpeyyaṃ. Yu. kārāpeyya.
Vihārā anuññātāti . tenahi bhante bhagavantaṃ paṭipucchitvā
mama āroceyyāthāti . evaṃ gahapatīti kho te bhikkhū rājagahakassa
seṭṭhissa paṭissutvā yena bhagavā tenupasaṅkamiṃsu upasaṅkamitvā
bhagavantaṃ abhivādetvā ekamantaṃ nisīdiṃsu . ekamantaṃ nisinnā
kho te bhikkhū bhagavantaṃ etadavocuṃ rājagahako bhante seṭṭhī vihāre
kārāpetukāmo kathaṃ nu kho bhante amhehi 1- paṭipajjitabbanti.
[200] Athakho bhagavā etasmiṃ nidāne etasmiṃ pakaraṇe 2- dhammiṃ
kathaṃ katvā bhikkhū āmantesi anujānāmi bhikkhave pañca senāsanāni 3-
vihāraṃ aḍḍhayogaṃ pāsādaṃ hammiyaṃ guhanti.
[201] Athakho te bhikkhū yena rājagahako seṭṭhī tenupasaṅkamiṃsu
upasaṅkamitvā rājagahakaṃ seṭṭhiṃ etadavocuṃ anuññātā
kho gahapati bhagavatā vihārā yassidāni kālaṃ maññasīti .
Athakho rājagahako seṭṭhī ekāheneva saṭṭhī vihāre patiṭṭhāpesi .
Athakho rājagahako seṭṭhī te saṭṭhī vihāre pariyosāpetvā
yena bhagavā tenupasaṅkami upasaṅkamitvā bhagavantaṃ abhivādetvā
ekamantaṃ nisīdi . ekamantaṃ nisinno kho rājagahako seṭṭhī
bhagavantaṃ etadavoca adhivāsetu me bhante bhagavā svātanāya
bhattaṃ saddhiṃ bhikkhusaṅghenāti . adhivāsesi bhagavā tuṇhībhāvena .
@Footnote: 1 Ma. Yu. ayaṃ pāṭho na dissati. 2 Yu. etasmiṃ pakaraṇeti pāṭhadvayaṃ natthi.
@3 Ma. leṇāni. Yu. lenāni.
Athakho rājagahako seṭṭhī bhagavato adhivāsanaṃ viditvā uṭṭhāyāsanā
bhagavantaṃ abhivādetvā padakkhiṇaṃ katvā pakkāmi . athakho
rājagahako seṭṭhī tassā rattiyā accayena paṇītaṃ khādanīyaṃ
bhojanīyaṃ paṭiyādāpetvā bhagavato kālaṃ ārocāpesi kālo
bhante niṭṭhitaṃ bhattanti.
[202] Athakho bhagavā pubbaṇhasamayaṃ nivāsetvā pattacīvaramādāya
yena rājagahakassa seṭṭhissa nivesanaṃ tenupasaṅkami upasaṅkamitvā
paññatte āsane nisīdi saddhiṃ bhikkhusaṅghena . athakho rājagahako
seṭṭhī buddhappamukhaṃ bhikkhusaṅghaṃ paṇītena khādanīyena bhojanīyena sahatthā
santappetvā sampavāretvā bhagavantaṃ bhuttāviṃ onītapattapāṇiṃ
ekamantaṃ nisīdi . ekamantaṃ nisinno kho rājagahako seṭṭhī bhagavantaṃ
etadavoca ete me bhante saṭṭhī vihārā puññatthikena saggatthikena
kārāpitā kathāhaṃ bhante tesu vihāresu paṭipajjāmīti . tenahi tvaṃ
gahapati te saṭṭhī vihāre āgatānāgatassa cātuddisassa saṅghassa
patiṭṭhāpehīti . evaṃ bhanteti kho rājagahako seṭṭhī bhagavato paṭissutvā
te saṭṭhī vihāre āgatānāgatassa cātuddisassa saṅghassa patiṭṭhāpesi.
Athakho bhagavā rājagahakaṃ seṭṭhiṃ imāhi gāthāhi anumodi
[203] Sītaṃ uṇhaṃ paṭihanti tato bāḷamigāni ca
siriṃsape ca makase sisire cāpi vuṭṭhiyo
Tato vātātapo ghoro sañjāto paṭihaññati.
Leṇatthañca sukhatthañca jhāyituñca vipassituṃ
vihāradānaṃ saṅghassa aggaṃ buddhehi 1- vaṇṇitaṃ.
Tasmā hi paṇḍito poso sampassaṃ atthamattano
vihāre kāraye ramme vāsayettha bahussute
tesaṃ annañca pānañca vatthasenāsanāni ca
dadeyya ujubhūtesu vippasannena cetasā.
Te tassa dhammaṃ desenti sabbadukkhā panūdanaṃ
yaṃ so dhammaṃ idhaññāya parinibbāti anāsavoti.
Athakho bhagavā rājagahakaṃ seṭṭhiṃ imāhi gāthāhi anumoditvā
uṭṭhāyāsanā pakkāmi.
[204] Assosuṃ kho manussā bhagavatā kira vihārā anuññātāti.
Te 2- sakkaccaṃ vihāre kārāpenti . te vihārā akavāṭakā
honti . ahivicchikāpi satapadiyopi pavisanti . bhagavato etamatthaṃ
ārocesuṃ . anujānāmi bhikkhave kavāṭanti . bhitticchiddaṃ karitvā
valliyāpi rajjuyāpi kavāṭaṃ bandhanti . undūrehipi upacikāhipi
khajjanti . khāyitabandhanāni 3- kavāṭāni patanti . bhagavato etamatthaṃ
ārocesuṃ . anujānāmi bhikkhave piṭṭhasaṅghāṭaṃ udukkhalikaṃ
@Footnote: 1 Ma. Yu. buddhena. 2 Ma. Yu. tesaddo na dissati. 3 Ma. khayitabandhanāni.
Uttarapāsakanti . kavāṭā na phusiyanti 1- .pe. anujānāmi bhikkhave
āviñchanacchiddaṃ āviñchanarajjunti . kavāṭā na thakiyanti .pe.
Anujānāmi bhikkhave aggaḷavaṭṭiṃ kapisīsakaṃ sūcikaṃ ghaṭikanti.
[205] Tena kho pana samayena bhikkhū na sakkonti kavāṭaṃ
apāpurituṃ . bhagavato etamatthaṃ ārocesuṃ . anujānāmi bhikkhave
tālacchiddaṃ tīṇi tālāni lohatālaṃ kaṭṭhatālaṃ visāṇatālanti .
Yepi 2- te ugghāṭetvā pavisanti . vihārā aguttā honti .
Bhagavato etamatthaṃ ārocesuṃ. Anujānāmi bhikkhave yantakaṃ sūcikanti.
[206] Tena kho pana samayena vihārā tiṇacchadanā honti
sītakāle sītā uṇhakāle uṇhā . bhagavato etamatthaṃ ārocesuṃ.
Anujānāmi bhikkhave ogumbetvā ullittāvalittaṃ kātunti.
[207] Tena kho pana samayena vihārā avātapānakā honti
acakkhussā duggandhā . bhagavato etamatthaṃ ārocesuṃ . anujānāmi
bhikkhave tīṇi vātapānāni vedikāvātapānaṃ jālavātapānaṃ
salākavātapānanti . vātapānantarikāya kālakāpi 3- vagguliyopi
pavisanti . bhagavato etamatthaṃ ārocesuṃ . anujānāmi bhikkhave
vātapānacakkalikanti . cakkalikantarikāya 4- kālakāpi 3- vagguliyopi
pavisanti .pe. Anujānāmi bhikkhave vātapānakavāṭaṃ vātapānabhisikanti.
[208] Tena kho pana samayena bhikkhū chamāyaṃ sayanti .
@Footnote: 1 Yu. phassīyanti. 2 Ma. yehi. 3 Ma. kāḷakāpi. 4 Ma. Yu. cakkalikantarikāyapi.
Gattānipi cīvarānipi paṃsukitāni honti . bhagavato etamatthaṃ
ārocesuṃ . anujānāmi bhikkhave tiṇasantharikanti . tiṇasantharikā 1-
undūrehipi upacikāhipi khajjati .pe. anujānāmi bhikkhave miḍhinti .
Miḍhiyā gattāni dukkhāni 2- honti .pe. anujānāmi bhikkhave
vidalamañcakanti 3-.
[209] Tena kho pana samayena saṅghassa sosāniko masārako
mañco uppanno hoti . bhagavato etamatthaṃ ārocesuṃ .
Anujānāmi bhikkhave masārakaṃ mañcanti . masārakaṃ pīṭhaṃ uppannaṃ
hoti . bhagavato etamatthaṃ ārocesuṃ . anujānāmi bhikkhave
masārakaṃ pīṭhanti.
[210] Tena kho pana samayena saṅghassa sosāniko bundikābaddho
mañco uppanno hoti . bhagavato etamatthaṃ ārocesuṃ . Anujānāmi
bhikkhave bundikābaddhaṃ mañcanti . bundikābaddhaṃ pīṭhaṃ uppannaṃ hoti .
Bhagavato etamatthaṃ ārocesuṃ . anujānāmi bhikkhave bundikābaddhaṃ
pīṭhanti.
[211] Tena kho pana samayena saṅghassa sosāniko kuḷirapādako 4-
mañco uppanno hoti . bhagavato etamatthaṃ ārocesuṃ .
Anujānāmi bhikkhave kuḷirapādakaṃ 4- mañcanti . kuḷirapādakaṃ 4-
pīṭhaṃ uppannaṃ hoti . bhagavato etamatthaṃ ārocesuṃ . anujānāmi
@Footnote: 1 Ma. Yu. tiṇasanthārako. 2 Ma. Yu. dukkhā. 3 Ma. Yu. bidalamañcakanti.
@4 Ma. kuḷīra .... Yu. kulīra ...
Bhikkhave kuḷirapādakaṃ pīṭhanti.
[212] Tena kho pana samayena saṅghassa sosāniko āhaccapādako
mañco uppanno hoti . bhagavato etamatthaṃ ārocesuṃ . Anujānāmi
bhikkhave āhaccapādakaṃ mañcanti . āhaccapādakaṃ pīṭhaṃ uppannaṃ hoti.
Bhagavato etamatthaṃ ārocesuṃ . anujānāmi bhikkhave āhaccapādakaṃ
pīṭhanti.
[213] Tena kho pana samayena saṅghassa āsandiko uppanno
hoti . bhagavato etamatthaṃ ārocesuṃ . anujānāmi bhikkhave
āsandikanti . uccako āsandiko uppanno hoti . bhagavato
etamatthaṃ ārocesuṃ . anujānāmi bhikkhave uccakampi āsandikanti .
Sattaṅgo uppanno hoti . bhagavato etamatthaṃ ārocesuṃ .
Anujānāmi bhikkhave sattaṅganti . uccako sattaṅgo uppanno
hoti . bhagavato etamatthaṃ ārocesuṃ . anujānāmi bhikkhave
uccakampi sattaṅganti . bhaddapīṭhaṃ uppannaṃ hoti .pe. anujānāmi
bhikkhave bhaddapīṭhanti . pīṭhikā uppannā hoti . bhagavato etamatthaṃ
ārocesuṃ . anujānāmi bhikkhave pīṭhikanti . eḷakapādakaṃ pīṭhaṃ
uppannaṃ hoti . bhagavato etamatthaṃ ārocesuṃ . anujānāmi bhikkhave
eḷakapādakaṃ pīṭhanti . āmalakavaṇṭikaṃ pīṭhaṃ uppannaṃ hoti . bhagavato
etamatthaṃ ārocesuṃ . anujānāmi bhikkhave āmalakavaṇṭikaṃ
pīṭhanti . phalakaṃ uppannaṃ hoti . bhagavato etamatthaṃ
Ārocesuṃ . anujānāmi bhikkhave phalakanti . kocchaṃ uppannaṃ
hoti . bhagavato etamatthaṃ ārocesuṃ . anujānāmi bhikkhave
kocchanti . palālapīṭhaṃ uppannaṃ hoti . bhagavato etamatthaṃ
ārocesuṃ. Anujānāmi bhikkhave palālapīṭhanti.
[214] Tena kho pana samayena chabbaggiyā bhikkhū ucce mañce
sayanti . manussā vihāracārikaṃ āhiṇḍantā passitvā ujjhāyanti
khīyanti vipācenti .pe. seyyathāpi gihī kāmabhoginoti .pe.
Bhagavato etamatthaṃ ārocesuṃ . na bhikkhave ucce mañce sayitabbaṃ
yo sayeyya āpatti dukkaṭassāti.
[215] Tena kho pana samayena aññataro bhikkhu nīce mañce
sayanto ahinā daṭṭho hoti . bhagavato etamatthaṃ ārocesuṃ .
Anujānāmi bhikkhave mañcapaṭipādakanti.
[216] Tena kho pana samayena chabbaggiyā bhikkhū ucce
mañcapaṭipādake dhārenti . saha mañcapaṭipādakehi pavedhenti .
Manussā vihāracārikaṃ āhiṇḍantā passitvā ujjhāyanti khīyanti
vipācenati .pe. seyyathāpi gihī kāmabhoginoti .pe. bhagavato
etamatthaṃ ārocesuṃ .pe. na bhikkhave uccā mañcapaṭipādakā
dhāretabbā yo dhāreyya āpatti dukkaṭassa anujānāmi
bhikkhave aṭṭhaṅgulaparamaṃ mañcapaṭipādakanti.
[217] Tena kho pana samayena saṅghassa suttaṃ uppannaṃ
Hoti . bhagavato etamatthaṃ ārocesuṃ . anujānāmi bhikkhave suttaṃ 1-
mañcaṃ veṭhetunti 2- . aṅgāni bahuṃ suttaṃ pariyādiyanti .pe.
Anujānāmi bhikkhave aṅge vijjhitvā aṭṭhapadakaṃ veṭhetunti 2- .
Coḷakaṃ uppannaṃ hoti . bhagavato etamatthaṃ ārocesuṃ . anujānāmi
bhikkhave cimilikaṃ kātunti . tūlikā uppannā hoti .pe. anujānāmi
bhikkhave vijaṭetvā bimbohanaṃ kātuṃ tīṇi tūlāni rukkhatūlaṃ latātūlaṃ
poṭakītūlanti.
[218] Tena kho pana samayena chabbaggiyā bhikkhū aḍḍhakāyikāni
bimbohanāni dhārenti . manussā vihāracārikaṃ āhiṇḍantā passitvā
ujjhāyanti khīyanti vipācenti .pe. seyyathāpi gihī kāmabhoginoti
.pe. bhagavato etamatthaṃ ārocesuṃ . na bhikkhave aḍḍhakāyikāni
bimbohanāni dhāretabbāni yo dhāreyya āpatti dukkaṭassa
anujānāmi bhikkhave sīsappamāṇaṃ bimbohanaṃ kātunti.
[219] Tena kho pana samayena rājagahe giraggasamajjo hoti.
Manussā mahāmattānaṃ atthāya bhisiyo paṭiyādenti uṇṇabhisiṃ
coḷabhisiṃ vākabhisiṃ tiṇabhisiṃ paṇṇabhisiṃ . te vītivatte samajje chaviṃ
uppāṭetvā 3- haranti . addasaṃsu 4- kho bhikkhū samajjaṭṭhāne
bahuṃ uṇṇampi coḷampi 5- vākampi tiṇampi paṇṇampi chaḍḍitaṃ 6- .
@Footnote: 1 Ma. Yu. ayaṃ pāṭho na dissati. 2 Ma. vedhetunti. Yu. vetunti. 3 Ma. Yu.
@opāṭetvā. 4 Ma. Yu. addasāsuṃ. 5 Ma. coḷakampi. 6 Yu. chaḍḍitāni.
Disvāna bhagavato etamatthaṃ ārocesuṃ . anujānāmi bhikkhave pañca
bhisiyo uṇṇabhisiṃ coḷabhisiṃ vākabhisiṃ tiṇabhisiṃ paṇṇabhisinti.
[220] Tena kho pana samayena saṅghassa senāsanaparikkhārikaṃ 1-
dussaṃ uppannaṃ hoti . bhagavato etamatthaṃ ārocesuṃ . anujānāmi
bhikkhave bhisiṃ onaddhitunti 2-.
[221] Tena kho pana samayena bhikkhū mañcabhisiṃ pīṭhe saṃharanti 3-
pīṭhabhisiṃ mañce saṃharanti . bhisiyo paribhijjanti . bhagavato etamatthaṃ
ārocesuṃ . anujānāmi bhikkhave onaddhamañcaṃ onaddhapīṭhanti .
Ullokaṃ akaritvā santharanti 4- . heṭṭhato nippāṭenti 5- .pe.
Anujānāmi bhikkhave ullokaṃ karitvā santharitvā bhisiṃ onaddhitunti .
Chaviṃ uppāṭetvā haranti .pe. anujānāmi bhikkhave phositunti 6-.
Harantiyeva .pe. anujānāmi bhikkhave bhittikammanti . harantiyeva
.pe. Anujānāmi bhikkhave hatthabhittinti 7-.
[222] Tena kho pana samayena titthiyānaṃ seyyāyo setavaṇṇāyo
honti . kāḷavaṇṇakatā bhūmi . gerukaparikammakatā bhitti .
Bahū manussā seyyāpekkhakā gacchanti . bhagavato etamatthaṃ
ārocesuṃ . anujānāmi bhikkhave vihāre setavaṇṇaṃ kāḷavaṇṇaṃ
@Footnote: 1 Yu. senāsanaparikkhāradussaṃ. 2 Ma. Yu. onandhitunti. 3 Ma. santharanti.
@4 Yu. saṃharanti. 5 Ma. Yu. nipphaṭanti. 6 Ma. posetunti. Yu. positunti.
@7 Ma. Yu. bhattikammanti.
Gerukaparikammanti.
[223] Tena kho pana samayena pharusāya bhittiyā setavaṇṇo
na nipatati . bhagavato etamatthaṃ ārocesuṃ . anujānāmi bhikkhave
thusapiṇḍaṃ datvā pāṇikāya paṭibāhetvā 1- setavaṇṇaṃ nipātetunti .
Setavaṇṇo anibandhanīyo hoti . bhagavato etamatthaṃ ārocesuṃ .
Anujānāmi bhikkhave saṇhamattikaṃ datvā pāṇikāya paṭibāhetvā
setavaṇṇaṃ nipātetunti . setavaṇṇo anibandhanīyo hoti .pe.
Anujānāmi bhikkhave ikkāsaṃ piṭṭhamaddanti.
[224] Tena kho pana samayena pharusāya bhittiyā gerukā na
nipatati . bhagavato etamatthaṃ ārocesuṃ . anujānāmi bhikkhave
thusapiṇḍaṃ datvā pāṇikāya paṭibāhetvā gerukaṃ nipātetunti .
Gerukā anibandhanīyā hoti .pe. anujānāmi bhikkhave kuṇḍakamattikaṃ
datvā pāṇikāya paṭibāhetvā gerukaṃ nipātetunti . gerukā
anibandhanīyā hoti . bhagavato etamatthaṃ ārocesuṃ . anujānāmi
bhikkhave sāsapakuṭaṃ 2- sitthatelakanti . accussannaṃ hoti . bhagavato
etamatthaṃ ārocesuṃ. Anujānāmi bhikkhave coḷakena paccuddharitunti.
[225] Tena kho pana samayena pharusāya bhūmiyā kāḷavaṇṇo
na nipatati .pe. anujānāmi bhikkhave thusapiṇḍaṃ datvā pāṇikāya
paṭibāhetvā kāḷavaṇṇaṃ nipātetunti . kāḷavaṇṇo anibandhanīyo
@Footnote: 1 Ma. Yu. paṭibāhitvā. 2 Ma. sāsapakuṭṭaṃ. Yu. sāsapakuḍḍaṃ.
Hoti . bhagavato etamatthaṃ ārocesuṃ . anujānāmi bhikkhave
laṇḍumattikaṃ 1- datvā pāṇikāya paṭibāhetvā kāḷavaṇṇaṃ
nipātetunti . kāḷavaṇṇo anibandhanīyo hoti . bhagavato
etamatthaṃ ārocesuṃ. Anujānāmi bhikkhave ikkāsaṃ kasāvanti.
[226] Tena kho pana samayena chabbaggiyā bhikkhū vihāre
paṭibhāṇacittaṃ 2- kārāpenti itthīrūpakaṃ purisarūpakaṃ. Manussā vihāracārikaṃ
āhiṇḍantā passitvā ujjhāyanti khīyanti vipācenti .pe.
Seyyathāpi gihī kāmabhoginoti .pe. bhagavato etamatthaṃ ārocesuṃ .
Na bhikkhave paṭibhāṇacittaṃ kārāpetabbaṃ itthīrūpakaṃ purisarūpakaṃ yo
kārāpeyya āpatti dukkaṭassa anujānāmi bhikkhave mālākammaṃ
latākammaṃ makaradantakaṃ pañcapaṭikanti.
[227] Tena kho pana samayena vihārā nīcavatthukā honti .
Udakena otthariyanti . bhagavato etamatthaṃ ārocesuṃ .pe.
Anujānāmi bhikkhave uccavatthukaṃ kātunti . cayo paripatati .pe.
Anujānāmi bhikkhave cinituṃ tayo caye iṭṭhakācayaṃ silācayaṃ dārucayanti.
Ārohantā vihaññanti .pe. anujānāmi bhikkhave tayo sopāṇe
iṭṭhakāsopāṇaṃ silāsopāṇaṃ dārusopāṇanti . ārohantā
paripatanti .pe. Anujānāmi bhikkhave ālambanabāhanti.
[228] Tena kho pana samayena vihārā āḷakamandā pākaṭā 3-
@Footnote: 1 Ma. Yu. gaṇḍumattikaṃ. 2 Ma. Yu. paṭibhānacittaṃ. 3 ayaṃ pāṭho na dissati.
Honti . bhikkhū hiriyanti nipajjituṃ . bhagavato etamatthaṃ ārocesuṃ.
Anujānāmi bhikkhave tirokaraṇinti . tirokaraṇiṃ ukkhipitvā
olokenti . bhagavato etamatthaṃ ārocesuṃ . anujānāmi
bhikkhave aḍḍhakuḍḍakanti . aḍḍhakuḍḍakā uparito olokenti .
Bhagavato etamatthaṃ ārocesuṃ . anujānāmi bhikkhave tayo gabbhe
sivikāgabbhaṃ nāḷikāgabbhaṃ hammiyagabbhanti.
[229] Tena kho pana samayena bhikkhū khuddake vihāre majjhe
gabbhaṃ karonti . upacāro na hoti . Bhagavato etamatthaṃ ārocesuṃ.
Anujānāmi bhikkhave khuddake vihāre ekamantaṃ gabbhaṃ kātuṃ mahallake
majjheti.
[230] Tena kho pana samayena vihārassa kuḍḍapādo jirati .
Bhagavato etamatthaṃ ārocesuṃ . anujānāmi bhikkhave kulaṅkapādakanti.
Vihārassa kuḍḍo ovassati .pe. anujānāmi bhikkhave parittāṇakiṭikaṃ
uddhāsudhanti 1-.
[231] Tena kho pana samayena aññatarassa bhikkhuno tiṇacchadanā
ahi khandhe papati . so bhiṃto vissaramakāsi . bhikkhū upadhāvitvā
taṃ bhikkhuṃ etadavocuṃ kissa tvaṃ āvuso vissaramakāsīti . athakho
so bhikkhūnaṃ 2- etamatthaṃ ārocesi . bhikkhū bhagavato etamatthaṃ
ārocesuṃ. Anujānāmi bhikkhave vitānanti.
@Footnote: 1 Ma. Yu. uddhasudhanti. 2 Yu. so bhikkhu bhikkhūnaṃ.
[232] Tena kho pana samayena bhikkhū mañcapādepi pīṭhapādepi
thavikāyo laggenti . undūrehipi upacikāhipi khajjanti . bhagavato
etamatthaṃ ārocesuṃ. Anujānāmi bhikkhave bhittikhīlaṃ nāgadantakanti.
[233] Tena kho pana samayena bhikkhū mañcepi pīṭhepi cīvaraṃ
nikkhipanti . cīvaraṃ paribhijjati 1- . bhagavato etamatthaṃ ārocesuṃ.
Anujānāmi bhikkhave vihāre 2- cīvaravaṃsaṃ cīvararajjunti.
[234] Tena kho pana samayena vihārā anālindakā honti
appaṭisaraṇā . bhagavato etamatthaṃ ārocesuṃ . anujānāmi
bhikkhave ālindaṃ paghanaṃ pakuṭṭaṃ 3- osārakinti 4- . ālindā
pākaṭā honti . bhikkhū hiriyanti nipajjituṃ .pe. anujānāmi
bhikkhave saṃsaraṇakiṭikaṃ ugghāṭanakiṭikanti.
[235] Tena kho pana samayena bhikkhū ajjhokāse bhattavissaggaṃ
karontā sītenapi uṇhenapi kilamanti . bhagavato etamatthaṃ
ārocesuṃ . anujānāmi bhikkhave upaṭṭhānasālanti . upaṭṭhānasālā
nīcavatthukā hoti . udakena otthariyati .pe. anujānāmi
bhikkhave uccavatthukaṃ kātunti . cayo paripatati .pe. anujānāmi
bhikkhave cinituṃ tayo caye iṭṭhakācayaṃ silācayaṃ dārucayanti .
Ārohantā vihaññanti .pe. anujānāmi bhikkhave tayo sopāṇe
iṭṭhakāsopāṇaṃ silāsopāṇaṃ dārusopāṇanti . ārohantā
@Footnote: 1 Ma. Yu. paribhijjiti. 2 Yu. ayaṃ pāṭho na dissati. 3 Ma. Yu. pakuṭaṃ.
@4 Ma. osārakanti. Yu. osarakanti.
Paripatanti .pe. anujānāmi bhikkhave ālambanabāhanti .
Upaṭṭhānasālāya tiṇacuṇṇaṃ paripatati .pe. anujānāmi bhikkhave
ogumbetvā ullittāvalittaṃ kātuṃ setavaṇṇaṃ kāḷavaṇṇaṃ
gerukaparikammaṃ mālākammaṃ latākammaṃ makaradantakaṃ pañcapaṭikaṃ cīvaravaṃsaṃ
cīvararajjunti.
[236] Tena kho pana samayena bhikkhū ajjhokāse chamāyaṃ cīvaraṃ
pattharanti . cīvaraṃ paṃsukitaṃ hoti .pe. anujānāmi bhikkhave
ajjhokāse cīvaravaṃsaṃ cīvararajjunti .pe. pānīyaṃ otappati .pe.
Anujānāmi bhikkhave pānīyasālaṃ pānīyamaṇḍapanti . pānīyasālā
nīcavatthukā hoti . udakena otthariyati .pe. anujānāmi bhikkhave
uccavatthukaṃ kātunti . cayo paripatati .pe. anujānāmi bhikkhave
cinituṃ tayo caye iṭṭhakācayaṃ silācayaṃ dārucayanti . ārohantā
vihaññanti .pe. anujānāmi bhikkhave tayo sopāṇe iṭṭhakāsopāṇaṃ
silāsopāṇaṃ dārusopāṇanti . ārohantā paripatanti .pe.
Anujānāmi bhikkhave ālambanabāhanti . pānīyasālāya tiṇacuṇṇaṃ
paripatati .pe. anujānāmi bhikkhave ogumbetvā ullittāvalittaṃ
kātuṃ setavaṇṇaṃ kāḷavaṇṇaṃ gerukaparikammaṃ mālākammaṃ latākammaṃ
makaradantakaṃ pañcapaṭikaṃ cīvaravaṃsaṃ cīvararajjunti . pānīyabhājanaṃ na
saṃvijjati .pe. Anujānāmi bhikkhave pānīyasaṅkhaṃ pānīyasarāvakanti.
[237] Tena kho pana samayena vihārā aparikkhittā honti
.pe. anujānāmi bhikkhave parikkhipituṃ tayo pākāre iṭṭhakāpākāraṃ
silāpākāraṃ dārupākāranti . koṭṭhako na hoti .pe. anujānāmi
bhikkhave koṭṭhakanti . koṭṭhako nīcavatthuko hoti. Udakena otthariyati
.pe. anujānāmi bhikkhave uccavatthukaṃ kātunti . koṭṭhakassa kavāṭaṃ
na hoti .pe. anujānāmi bhikkhave kavāṭaṃ piṭṭhasaṅghāṭaṃ udukkhalikaṃ
uttarapāsakaṃ aggaḷavaṭṭiṃ kapisīsakaṃ sūcikaṃ ghaṭikaṃ tālacchiddaṃ
āviñchanacchiddaṃ āviñchanarajjunti . koṭṭhake 1- tiṇacuṇṇaṃ
paripatati .pe. anujānāmi bhikkhave ogumbetvā ullittāvalittaṃ
kātuṃ setavaṇṇaṃ kāḷavaṇṇaṃ gerukaparikammaṃ mālākammaṃ latākammaṃ
makaradantakaṃ pañcapaṭikanti.
[238] Tena kho pana samayena pariveṇaṃ cikkhallaṃ hoti. Bhagavato
etamatthaṃ ārocesuṃ . anujānāmi bhikkhave marumbaṃ upakiritunti . na
pariyāpuṇanti .pe. anujānāmi bhikkhave padarasilaṃ nikkhipitunti .
Udakaṃ santiṭṭhati .pe. Anujānāmi bhikkhave udakaniddhamananti.
[239] Tena kho pana samayena bhikkhū pariveṇe tahaṃ tahaṃ
aggiṭṭhānaṃ karonti . pariveṇaṃ uklāpaṃ 2- hoti . bhagavato
etamatthaṃ ārocesuṃ . anujānāmi bhikkhave ekamantaṃ aggisālaṃ
@Footnote: 1 Yu. koṭṭhakā. 2 Ma. Yu. ukkalāpaṃ.
Kātunti . aggisālā nīcavatthukā hoti . udakena otthariyati .pe.
Anujānāmi bhikkhave uccavatthukaṃ kātunti . cayo paripatati .pe.
Anujānāmi bhikkhave cinituṃ tayo caye iṭṭhakācayaṃ silācayaṃ
dārucayanti . ārohantā vihaññanti .pe. anujānāmi bhikkhave
tayo sopāṇe iṭṭhakāsopāṇaṃ silāsopāṇaṃ dārusopāṇanti .
Ārohantā paripatanti .pe. Anujānāmi bhikkhave ālambanabāhanti.
{239.1} Aggisālāya kavāṭaṃ na hoti .pe. Anujānāmi bhikkhave
kavāṭaṃ piṭṭhasaṅghāṭaṃ udukkhalikaṃ uttarapāsakaṃ aggaḷavaṭṭiṃ kapisīsakaṃ
sūcikaṃ ghaṭikaṃ tālacchiddaṃ āviñchanacchiddaṃ āviñchanarajjunti .
Aggisālāya tiṇacuṇṇaṃ paripatati .pe. anujānāmi bhikkhave
ogumbetvā ullittāvalittaṃ kātuṃ setavaṇṇaṃ kāḷavaṇṇaṃ
gerukaparikammaṃ mālākammaṃ latākammaṃ makaradantakaṃ pañcapaṭikaṃ
cīvaravaṃsaṃ cīvarajjunti . ārāmo aparikkhitto hoti . Ajakāpi pasukāpi
uparope viheṭhenti . bhagavato etamatthaṃ ārocesuṃ . anujānāmi
bhikkhave parikkhipituṃ tayo vaṭe veḷuvaṭaṃ kaṇṭakavaṭaṃ 1- parikhanti .
Koṭṭhako na hoti . tatheva ajakāpi pasukāpi uparope viheṭhenti.
Anujānāmi bhikkhave koṭṭhakaṃ apesiṃ yamakakavāṭaṃ toraṇaṃ palighanti .
Koṭṭhake 2- tiṇacuṇṇaṃ paripatati .pe. anujānāmi bhikkhave ogumbetvā
ullittāvalittaṃ kātuṃ setavaṇṇaṃ kāḷavaṇṇaṃ gerukaparikammaṃ
@Footnote: 1 Ma. Yu. vāṭe veḷuvāṭaṃ kaṇṭakāvāṭaṃ. Ma. kaṇṭakavāṭaṃ. 2 Yu. koṭṭhakā.
Mālākammaṃ latākammaṃ makaradantakaṃ pañcapaṭikanti . ārāmo
cikkhallo hoti .pe. anujānāmi bhikkhave marumbaṃ upakiritunti .
Na pariyāpuṇanti .pe. anujānāmi bhikkhave padarasilaṃ nikkhipitunti .
Udakaṃ santiṭṭhati .pe. Anujānāmi bhikkhave udakaniddhamananti.
[240] Tena kho pana samayena rājā māgadho seniyo bimbisāro
saṅghassa atthāya sudhāmattikālepanaṃ pāsādaṃ kārāpetukāmo
hoti . athakho bhikkhūnaṃ etadahosi kiṃ nu kho bhagavatā chadanaṃ
anuññātanti 1- . bhagavato etamatthaṃ ārocesuṃ . anujānāmi
bhikkhave pañca chadanāni iṭṭhakāchadanaṃ silāchadanaṃ sudhāchadanaṃ
tiṇacchadanaṃ paṇṇacchadananti.
Bhāṇavāraṃ niṭṭhitaṃ paṭhamaṃ. 2-
The Pali Tipitaka in Roman Character Volume 7 page 85-102.
http://84000.org/tipitaka/pali/roman_item_s.php?book=7&item=198&items=43
Classified by [Item Number] :-
http://84000.org/tipitaka/pali/roman_item_s.php?book=7&item=198&items=43&mode=bracket
Compare with The Pali Tipitaka in Thai Character :-
http://84000.org/tipitaka/read/pali_item_s.php?book=7&item=198&items=43
Compare with The Royal Version of Thai Tipitaka :-
http://84000.org/tipitaka/read/byitem_s.php?book=7&item=198&items=43
Study Atthakatha :-
http://84000.org/tipitaka/attha/attha.php?b=7&i=198
The Pali Atthakatha in Thai :-
http://84000.org/tipitaka/atthapali/read_th.php?B=3&A=7229
The Pali Atthakatha in Roman :-
http://84000.org/tipitaka/atthapali/read_rm.php?B=3&A=7229
Contents of The Tipitaka Volume 7
http://84000.org/tipitaka/read/?index_7
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
