ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
   ฉบับหลวง   บาลีอักษรไทย   PaliRoman 
อ่านหัวข้อแรกอ่านหัวข้อที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหัวข้อถัดไปอ่านหัวข้อสุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๓๑ ภาษาบาลี อักษรไทย พระสุตตันตปิฎกเล่มที่ ๒๓ สุตฺต. ขุ. ปฏิสมฺภิทามคฺโค
     [๘๖]   กถํ   สุตฺวาน   สํวเร   ปญฺญา   สีลมเย   ญาณํ  ปญฺจ
สีลานิ   ปริยนฺตปาริสุทฺธิสีลํ   อปริยนฺตปาริสุทฺธิสีลํ  ปริปุณฺณปาริสุทฺธิสีลํ
อปรามฏฺฐปาริสุทฺธิสีลํ ปฏิปฺปสฺสทฺธิปาริสุทฺธิสีลนฺติ ฯ
     {๘๖.๑}   ตตฺถ   กตมํ   ปริยนฺตปาริสุทฺธิสีลํ   อนุปสมฺปนฺนานํ
ปริยนฺตสิกฺขาปทานํ อิทํ ปริยนฺตปาริสุทฺธิสีลํ ฯ
     {๘๖.๒}   กตมํ      อปริยนฺตปาริสุทฺธิสีลํ     อุปสมฺปนฺนานํ
อปริยนฺตสิกฺขาปทานํ อิทํ อปริยนฺตปาริสุทฺธิสีลํ ฯ
     {๘๖.๓}   กตมํ ปริปุณฺณปาริสุทฺธิสีลํ ปุถุชฺชนกลฺยาณกานํ กุสลธมฺเม
     {๘๖.๔}   ยุตฺตานํ อเสกฺขปริยนฺเต ปริปูริการีนํ ๑- กาเย จ ชีวิเต จ
อนเปกฺขานํ ปริจฺจตฺตชีวิตานํ อิทํ ปริปุณฺณปาริสุทฺธิสีลํ ฯ
     {๘๖.๕}   กตมํ   อปรามฏฺฐปาริสุทฺธิสีลํ   สตฺตนฺนํ  เสกฺขานํ  อิทํ
อปรามฏฺฐปาริสุทฺธิสีลํ ฯ
     {๘๖.๖}   กตมํ     ปฏิปฺปสฺสทฺธิปาริสุทฺธิสีลํ    ตถาคตสาวกานํ
ขีณาสวานํ    ปจฺเจกพุทฺธานํ   ตถาคตานํ   อรหนฺตานํ   สมฺมาสมฺพุทฺธานํ
อิทํ ปฏิปฺปสฺสทฺธิปาริสุทฺธิสีลํ ฯ
@เชิงอรรถ:  ม. ยุ. ปริปูรการีนํ ฯ
     [๘๗]   อตฺถิ   สีลํ   ปริยนฺตํ   อตฺถิ   สีลํ  อปริยนฺตํ  ฯ  ตตฺถ
กตมนฺตํ    สีลํ    ปริยนฺตํ    อตฺถิ    สีลํ   ลาภปริยนฺตํ   อตฺถิ   สีลํ
ยสปริยนฺตํ    อตฺถิ    สีลํ    ญาติปริยนฺตํ    อตฺถิ   สีลํ   องฺคปริยนฺตํ
อตฺถิ สีลํ ชีวิตปริยนฺตํ ฯ
     {๘๗.๑}   กตมนฺตํ   สีลํ   ลาภปริยนฺตํ   อิเธกจฺโจ   ลาภเหตุ
ลาภปจฺจยา     ลาภการณา     ยถาสมาทินฺนํ    สิกฺขาปทํ    วีติกฺกมติ
อิทนฺตํ สีลํ ลาภปริยนฺตํ ฯ
     {๘๗.๒}   กตมนฺตํ  สีลํ  ยสปริยนฺตํ  อิเธกจฺโจ ยสเหตุ ยสปจฺจยา
ยสการณา     ยถาสมาทินฺนํ    สิกฺขาปทํ    วีติกฺกมติ    อิทนฺตํ    สีลํ
ยสปริยนฺตํ ฯ
     {๘๗.๓}   กตมนฺตํ   สีลํ   ญาติปริยนฺตํ   อิเธกจฺโจ   ญาติเหตุ
ญาติปจฺจยา     ญาติการณา     ยถาสมาทินฺนํ    สิกฺขาปทํ    วีติกฺกมติ
อิทนฺตํ สีลํ ญาติปริยนฺตํ ฯ
     {๘๗.๔}   กตมนฺตํ สีลํ องฺคปริยนฺตํ อิเธกจฺโจ องฺคเหตุ องฺคปจฺจยา
องฺคการณา    ยถาสมาทินฺนํ    สิกฺขาปทํ    วีติกฺกมติ    อิทนฺตํ    สีลํ
องฺคปริยนฺตํ ฯ
     {๘๗.๕}   กตมนฺตํ สีลํ ชีวิตปริยนฺตํ อิเธกจฺโจ ชีวิตเหตุ ชีวิตปจฺจยา
ชีวิตการณา  ยถาสมาทินฺนํ  สิกฺขาปทํ  วีติกฺกมติ  อิทนฺตํ สีลํ ชีวิตปริยนฺตํ ฯ
เอวรูปานิ   สีลานิ   ขณฺฑานิ   ฉิทฺทานิ  สพลานิ  กมฺมาสานิ  นภุชิสฺสานิ
นวิญฺญุปสตฺถานิ ปรามฏฺฐานิ อสมาธิสํวตฺตนิกานิ
นอวิปฺปฏิสารวตฺถุกานิ          นปามุชฺชวตฺถุกานิ         นปีติวตฺถุกานิ
นปสฺสทฺธิวตฺถุกานิ            นสุขวตฺถุกานิ           นสมาธิวตฺถุกานิ
นยถาภูตญาณทสฺสนวตฺถุกานิ      น      เอกนฺตนิพฺพิทาย      วิราคาย
นิโรธาย      อุปสมาย      อภิญฺญาย      สมฺโพธาย     นิพฺพานาย
สํวตฺตนฺติ อิทนฺตํ สีลํ ปริยนฺตํ ฯ
     [๘๘]   กตมนฺตํ   สีลํ   อปริยนฺตํ   อตฺถิ   สีลํ   นลาภปริยนฺตํ
อตฺถิ    สีลํ    นยสปริยนฺตํ   อตฺถิ   สีลํ   นญาติปริยนฺตํ   อตฺถิ   สีลํ
นองฺคปริยนฺตํ อตฺถิ สีลํ นชีวิตปริยนฺตํ ฯ
     {๘๘.๑}   กตมนฺตํ   สีลํ   นลาภปริยนฺตํ   อิเธกจฺโจ   ลาภเหตุ
ลาภปจฺจยา     ลาภการณา    ยถาสมาทินฺนํ    สิกฺขาปทํ    วีติกฺกมาย
จิตฺตํปิ น อุปฺปาเทติ กึ โส วีติกฺกมิสฺสติ อิทนฺตํ สีลํ นลาภปริยนฺตํ ฯ
     {๘๘.๒}   กตมนฺตํ  สีลํ  นยสปริยนฺตํ อิเธกจฺโจ ยสเหตุ ยสปจฺจยา
ยสการณา     ยถาสมาทินฺนํ    สิกฺขาปทํ    วีติกฺกมาย    จิตฺตํปิ    น
อุปฺปาเทติ กึ โส วีติกฺกมิสฺสติ อิทนฺตํ สีลํ นยสปริยนฺตํ ฯ
     {๘๘.๓}   กตมนฺตํ   สีลํ   นญาติปริยนฺตํ   อิเธกจฺโจ  ญาติเหตุ
ญาติปจฺจยา     ญาติการณา    ยถาสมาทินฺนํ    สิกฺขาปทํ    วีติกฺกมาย
จิตฺตํปิ น อุปฺปาเทติ กึ โส วีติกฺกมิสฺสติ อิทนฺตํ สีลํ นญาติปริยนฺตํ ฯ
     {๘๘.๔}   กตมนฺตํ   สีลํ   นองฺคปริยนฺตํ   อิเธกจฺโจ  องฺคเหตุ
องฺคปจฺจยา     องฺคการณา    ยถาสมาทินฺนํ    สิกฺขาปทํ    วีติกฺกมาย
จิตฺตํปิ น อุปฺปาเทติ กึ โส วีติกฺกมิสฺสติ อิทนฺตํ สีลํ นองฺคปริยนฺตํ ฯ
     {๘๘.๕}   กตมนฺตํ   สีลํ   นชีวิตปริยนฺตํ   อิเธกจฺโจ  ชีวิตเหตุ
ชีวิตปจฺจยา     ชีวิตการณา    ยถาสมาทินฺนํ    สิกฺขาปทํ    วีติกฺกมาย
จิตฺตํปิ  น  อุปฺปาเทติ  กึ  โส  วีติกฺกมิสฺสติ  อิทนฺตํ  สีลํ นชีวิตปริยนฺตํ ฯ
เอวรูปานิ    สีลานิ   อกฺขณฺฑานิ   อจฺฉิทฺทานิ   อสพลานิ   อกมฺมาสานิ
ภุชิสฺสานิ       วิญฺญูปสตฺถานิ      อปรามฏฺฐานิ      สมาธิสํวตฺตนิกานิ
อวิปฺปฏิสารวตฺถุกานิ    ปามุชฺชวตฺถุกานิ    ปีติวตฺถุกานิ   ปสฺสทฺธิวตฺถุกานิ
สุขวตฺถุกานิ          สมาธิวตฺถุกานิ         ยถาภูตญาณทสฺสนวตฺถุกานิ
เอกนฺตนิพฺพิทาย     วิราคาย     นิโรธาย     อุปสมาย     อภิญฺญาย
สมฺโพธาย นิพฺพานาย สํวตฺตนฺติ อิทนฺตํ สีลํ อปริยนฺตํ ฯ
     [๘๙]   กึ สีลํ กติ สีลานิ กึสมุฏฺฐานํ สีลํ กติธมฺมสโมธานํ สีลํ ฯ
     {๘๙.๑}   กึ สีลนฺติ เจตนา สีลํ เจตสิกํ สีลํ สํวโร สีลํ อวีติกฺกโม สีลํ ฯ
     {๘๙.๒}   กติ สีลานีติ ตีณิ สีลานิ กุสลสีลํ อกุสลสีลํ อพฺยากตสีลํ ฯ
     {๘๙.๓}   กีสมุฏฺฐานํ    สีลนฺติ    กุสลจิตฺตสมุฏฺฐานํ   กุสลสีลํ
อกุสลจิตฺตสมุฏฺฐานํ อกุสลสีลํ อพฺยากตจิตฺตสมุฏฺฐานํ อพฺยากตสีลํ ฯ
     {๘๙.๔}   กติธมฺมสโมธานํ    สีลนฺติ    สํวรสโมธานํ    สีลํ
อวีติกฺกมสโมธานํ    สีลํ    ตถาภาเว   ชาตเจตนาสโมธานํ   สีลํ   ฯ
ปาณาติปาตํ    สํวรฏฺเฐน    สีลํ    อวีติกฺกมฏฺเฐน   สีลํ   อทินฺนาทานํ
สํวรฏฺเฐน  สีลํ  อวีติกฺกมฏฺเฐน  สีลํ  กาเมสุ  มิจฺฉาจารํ  สํวรฏฺเฐน สีลํ
อวีติกฺกมฏฺเฐน    สีลํ    มุสาวาทํ    สํวรฏฺเฐน   สีลํ   อวีติกฺกมฏฺเฐน
สีลํ    ปิสุณาวาจํ   สํวรฏฺเฐน   สีลํ   อวีติกฺกมฏฺเฐน   สีลํ   ผรุสวาจํ
สํวรฏฺเฐน   สีลํ   อวีติกฺกมฏฺเฐน   สีลํ   สมฺผปฺปลาปํ   สํวรฏฺเฐน  สีลํ
อวีติกฺกมฏฺเฐน   สีลํ   อภิชฺฌํ   สํวรฏฺเฐน   สีลํ   อวีติกฺกมฏฺเฐน   สีลํ
พฺยาปาทํ     สํวรฏฺเฐน    สีลํ    อวีติกฺกมฏฺเฐน    สีลํ    มิจฺฉาทิฏฺฐึ
สํวรฏฺเฐน    สีลํ    อวีติกฺกมฏฺเฐน    สีลํ    เนกฺขมฺเมน   กามจฺฉนฺทํ
สํวรฏฺเฐน    สีลํ    อวีติกฺกมฏฺเฐน    สีลํ    อพฺยาปาเทน   พฺยาปาทํ
สํวรฏฺเฐน สีลํ อวีติกฺกมฏฺเฐน สีลํ
     {๘๙.๕}   อาโลกสญฺญาย    ถีนมิทฺธํ   อวิกฺเขปฏฺเฐน   อุทฺธจฺจํ
ธมฺมววตฺถาเนน  วิจิกิจฺฉํ  ญาเณน อวิชฺชํ ปามุชฺเชน อรตึ ปฐมชฺฌาเนน ๑-
นีวรเณ   ทุติยชฺฌาเนน  วิตกฺกวิจาเร  ตติยชฺฌาเนน  ปีตึ  จตุตฺถชฺฌาเนน
สุขทุกฺขํ      อากาสานญฺจายตนสมาปตฺติยา      รูปสญฺญํ      ปฏิฆสญฺญํ
นานตฺตสญฺญํ      วิญฺญาณญฺจายตนสมาปตฺติยา      อากาสานญฺจายตนสญฺญํ
อากิญฺจญฺญายตนสมาปตฺติยา วิญฺญาณญฺจายตนสญฺญํ
เนวสญฺญานาสญฺญายตนสมาปตฺติยา อากิญฺจญฺญายตนสญฺญํ
     {๘๙.๖}   อนิจฺจานุปสฺสนาย     นิจฺจสญฺญํ     ทุกฺขานุปสฺสนาย
สุขสญฺญํ       อนตฺตานุปสฺสนาย       อตฺตสญฺญํ      นิพฺพิทานุปสฺสนาย
นนฺทึ      วิราคานุปสฺสนาย     ราคํ     นิโรธานุปสฺสนาย     สมุทยํ
ปฏินิสฺสคฺคานุปสฺสนาย       อาทานํ       ขยานุปสฺสนาย      ฆนสญฺญํ
วยานุปสฺสนาย       อายุหนํ       วิปริณามานุปสฺสนาย       ธุวสญฺญํ
@เชิงอรรถ:  ม. ปฐเมน ฌาเนน ฯ เอวมุปริปิ ฯ
อนิมิตฺตานุปสฺสนาย       นิมิตฺตํ       อปฺปณิหิตานุปสฺสนาย       ปณิธึ
สุญฺญตานุปสฺสนาย           อภินิเวสํ          อธิปญฺญาธมฺมวิปสฺสนาย
สาราทานาภินิเวสํ         ยถาภูตญาณทสฺสเนน        สมฺโมหาภินิเวสํ
อาทีนวานุปสฺสนาย          อาลยาภินิเวสํ         ปฏิสงฺขานุปสฺสนาย
อปฺปฏิสงฺขํ    วิวฏฺฏนานุปสฺสนาย    สญฺโญคาภินิเวสํ    โสตาปตฺติมคฺเคน
ทิฏฺเฐกฏฺเฐ     กิเลเส     สกทาคามิมคฺเคน    โอฬาริเก    กิเลเส
อนาคามิมคฺเคน    อณุสหคเต    กิเลเส   อรหตฺตมคฺเคน   สพฺพกิเลเส
สํวรฏฺเฐน สีลํ อวีติกฺกมฏฺเฐน สีลํ ฯ
     [๙๐]   ปญฺจ   สีลานิ   ปาณาติปาตสฺส   ปหานํ   สีลํ   เวรมณี
สีลํ   เจตนา   สีลํ   สํวโร   สีลํ  อวีติกฺกโม  สีลํ  เอวรูปานิ  สีลานิ
จิตฺตสฺส    อวิปฺปฏิสาราย    สํวตฺตนฺติ    ปามุชฺชาย    ๑-   สํวตฺตนฺติ
ปีติยา    สํวตฺตนฺติ    ปสฺสทฺธิยา    สํวตฺตนฺติ   โสมนสฺสาย   สํวตฺตนฺติ
อาเสวนาย      สํวตฺตนฺติ     ภาวนาย     สํวตฺตนฺติ     พหุลีกมฺมาย
สํวตฺตนฺติ      อลงฺการาย     สํวตฺตนฺติ     ปริกฺขาราย     สํวตฺตนฺติ
ปริวาราย     สํวตฺตนฺติ     ปาริปูริยา    สํวตฺตนฺติ    เอกนฺตนิพฺพิทาย
วิราคาย    นิโรธาย    อุปสมาย   อภิญฺญาย   สมฺโพธาย   นิพฺพานาย
สํวตฺตนฺติ   เอวรูปานํ   สีลานํ   สํวรปาริสุทฺธิ   อธิสีลํ  สํวรปาริสุทฺธิยา
ฐิตํ    จิตฺตํ    น    วิกฺเขปํ    คจฺฉติ    อวิกฺเขปปาริสุทฺธิ   อธิจิตฺตํ
สํวรปาริสุทฺธึ      สมฺมา      ปสฺสติ     อวิกฺเขปปาริสุทฺธึ     สมฺมา
ปสฺสติ    ทสฺสนปาริสุทฺธิ    อธิปญฺญา    โย    ตตฺถ   สํวรฏฺโฐ   อยํ
@เชิงอรรถ:  ม. ยุ. ปาโมชฺชาย ฯ เอวมุปริปิ ฯ
อธิสีลสิกฺขา    โย    ตตฺถ   อวิกฺเขปฏฺโฐ   อยํ   อธิจิตฺตสิกฺขา   โย
ตตฺถ    ทสฺสนฏฺโฐ    อยํ   อธิปญฺญาสิกฺขา   อิมา   ติสฺโส   สิกฺขาโย
อาวชฺชนฺโต   สิกฺขติ  ชานนฺโต  สิกฺขติ  ปสฺสนฺโต  สิกฺขติ  ปจฺจเวกฺขนฺโต
สิกฺขติ    จิตฺตํ   อธิฏฺฐหนฺโต   สิกฺขติ   สทฺธาย   อธิมุจฺจนฺโต   สิกฺขติ
วิริยํ    ปคฺคณฺหนฺโต    สิกฺขติ    สตึ    อุปฏฺฐหนฺโต    สิกฺขติ   จิตฺตํ
สมาทหนฺโต    สิกฺขติ    ปญฺญาย    ปชานนฺโต    สิกฺขติ    อภิญฺเญยฺยํ
อภิชานนฺโต    สิกฺขติ    ปริญฺเญยฺยํ    ปริชานนฺโต   สิกฺขติ   ปหาตพฺพํ
ปชหนฺโต    สิกฺขติ    ภาเวตพฺพํ    ภาเวนฺโต    สิกฺขติ   สจฺฉิกาตพฺพํ
สจฺฉิกโรนฺโต สิกฺขติ ฯ
     [๙๑]   ปญฺจ   สีลานิ   ปาณาติปาตสฺส   อทินฺนาทานสฺส  กาเมสุ
มิจฺฉาจารสฺส    มุสาวาทสฺส    ปิสุณาย    วาจาย   ผรุสาย   วาจาย
สมฺผปฺปลาปสฺส    อภิชฺฌาย    พฺยาปาทสฺส   มิจฺฉาทิฏฺฐิยา   เนกฺขมฺเมน
กามจฺฉนฺทสฺส       อพฺยาปาเทน      พฺยาปาทสฺส      อาโลกสญฺญาย
ถีนมิทฺธสฺส    อวิกฺเขเปน    อุทฺธจฺจสฺส    ธมฺมววตฺถาเนน   วิจิกิจฺฉาย
ญาเณน อวิชฺชาย ปามุชฺเชน อรติยา
     {๙๑.๑}   ปฐมชฺฌาเนน   นีวรณานํ  ทุติยชฺฌาเนน  วิตกฺกวิจารานํ
ตติยชฺฌาเนน   ปีติยา   จตุตฺถชฺฌาเนน   สุขทุกฺขานํ  อากาสานญฺจายตน-
สมาปตฺติยา       รูปสญฺญาย       ปฏิฆสญฺญาย       นานตฺตสญฺญาย
วิญฺญาณญฺจายตนสมาปตฺติยา อากาสานญฺจายตนสญฺญาย
อากิญฺจญฺญายตนสมาปตฺติยา วิญฺญาณญฺจายตนสญฺญาย
เนวสญฺญานาสญฺญายตนสมาปตฺติยา
     {๙๑.๒}   อากิญฺจญฺญายตนสญฺญาย        อนิจฺจานุปสฺสนาย
นิจฺจสญฺญาย      ทุกฺขานุปสฺสนาย      สุขสญฺญาย     อนตฺตานุปสฺสนาย
อตฺตสญฺญาย      นิพฺพิทานุปสฺสนาย      นนฺทิยา      วิราคานุปสฺสนาย
ราคสฺส      นิโรธานุปสฺสนาย      สมุทยสฺส     ปฏินิสฺสคฺคานุปสฺสนาย
อาทานสฺส       ขยานุปสฺสนาย       ฆนสญฺญาย       วยานุปสฺสนาย
อายุหนสฺส     วิปริณามานุปสฺสนาย     ธุวสญฺญาย    อนิมิตฺตานุปสฺสนาย
นิมิตฺตสฺส      อปฺปณิหิตานุปสฺสนาย      ปณิธิยา      สุญฺญตานุปสฺสนาย
อภินิเวสสฺส        อธิปญฺญาธมฺมวิปสฺสนาย        สาราทานาภินิเวสสฺส
ยถาภูตญาณทสฺสเนน        สมฺโมหาภินิเวสสฺส        อาทีนวานุปสฺสาย
อาลยาภินิเวสสฺส           ปฏิสงฺขานุปสฺสนาย          อปฺปฏิสงฺขาย
วิวฏฺฏนานุปสฺสนาย สญฺโญคาภินิเวสสฺส
     {๙๑.๓}   โสตาปตฺติมคฺเคน ทิฏฺเฐกฏฺฐานํ กิเลสานํ สกทาคามิมคฺเคน
โอฬาริกานํ    กิเลสานํ    อนาคามิมคฺเคน    อณุสหคตานํ    กิเลสานํ
อรหตฺตมคฺเคน   สพฺพกิเลสานํ   ปหานํ  สีลํ  เวรมณี  สีลํ  เจตนา  สิลํ
สํวโร สีลํ อวีติกฺกโม สีลํ ฯ
     {๙๑.๔}   เอวรูปานิ   สีลานิ  จิตฺตสฺส  อวิปฺปฏิสาราย  สํวตฺตนฺติ
ปามุชฺชาย    สํวตฺตนฺติ    ปีติยา    สํวตฺตนฺติ    ปสฺสทฺธิยา   สํวตฺตนฺติ
โสมนสฺสาย   สํวตฺตนฺติ   อาเสวนาย   สํวตฺตนฺติ   ภาวนาย   สํวตฺตนฺติ
พหุลีกมฺมาย   สํวตฺตนฺติ   อลงฺการาย   สํวตฺตนฺติ  ปริกฺขาราย  สํวตฺตนฺติ
ปริวาราย   สํวตฺตนฺติ   ปาริปูริยา  สํวตฺตนฺติ  เอกนฺตนิพฺพิทาย  วิราคาย
นิโรธาย อุปสมาย อภิญฺญาย สมฺโพธาย นิพฺพานาย สํวตฺตนฺติ
     {๙๑.๕}   เอวรูปานํ  สีลานํ  สํวรปาริสุทฺธิ  อธิสีลํ สํวรปาริสุทฺธิยา
ฐิตํ  จิตฺตํ  น  ๑- วิกฺเขปํ คจฺฉติ อวิกฺเขปปาริสุทฺธิ อธิจิตฺตํ สํวรปาริสุทฺธึ
สมฺมา    ปสฺสติ    อวิกฺเขปปาริสุทฺธึ   สมฺมา   ปสฺสติ   ทสฺสนปาริสุทฺธิ
อธิปญฺญา  โย  ตตฺถ  สํวรฏฺโฐ  อยํ  อธิสีลสิกฺขา  โย ตตฺถ อวิกฺเขปฏฺโฐ
อยํ   อธิจิตฺตสิกฺขา   โย   ตตฺถ  ทสฺสนฏฺโฐ  อยํ  อธิปญฺญาสิกฺขา  อิมา
ติสฺโส   สิกฺขาโย   อาวชฺชนฺโต   สิกฺขติ   ชานนฺโต   สิกฺขติ  ปสฺสนฺโต
สิกฺขติ   ปจฺจเวกฺขนฺโต   สิกฺขติ   จิตฺตํ   อธิฏฺฐหนฺโต   สิกฺขติ  สทฺธาย
อธิมุจฺจนฺโต   สิกฺขติ   วิริยํ   ปคฺคณฺหนฺโต   สิกฺขติ   สตึ  อุปฏฺฐเปนฺโต
สิกฺขติ   จิตฺตํ   สมาทหนฺโต   สิกฺขติ   ปญฺญาย   ชานนฺโต  ๒-  สิกฺขติ
อภิญฺเญยฺยํ    อภิชานนฺโต    สิกฺขติ   ปริญฺเญยฺยํ   ปริชานนฺโต   สิกฺขติ
ปหาตพฺพํ   ปชหนฺโต  สิกฺขติ  ภาเวตพฺพํ  ภาเวนฺโต  สิกฺขติ  สจฺฉิกาตพฺพํ
สจฺฉิกโรนฺโต สิกฺขติ
     {๙๑.๖}   ตํ  ญาตฏฺเฐน  ญาณํ  ปชานนฏฺเฐน  ปญฺญา  เตน วุจฺจติ
สุตฺวาน สํวเร ปญฺญา สีลมเย ญาณํ ฯ
                                                --------



             เนื้อความพระไตรปิฎกฉบับภาษาบาลีอักษรไทย เล่มที่ ๓๑ หน้าที่ ๖๑-๖๙. http://84000.org/tipitaka/pitaka_item/pali_item_s.php?book=31&item=86&items=6&modeTY=2              อ่านโดยใช้เครื่องหมาย [เลขข้อ] เป็นเกณฑ์แบ่งข้อ :- http://84000.org/tipitaka/pitaka_item/pali_item_s.php?book=31&item=86&items=6&modeTY=2&mode=bracket              อ่านเทียบพระไตรปิฎกฉบับภาษาบาลีอักษรโรมัน :- http://84000.org/tipitaka/read/roman_item_s.php?book=31&item=86&items=6&modeTY=2              อ่านเทียบพระไตรปิฎกภาษาไทยฉบับหลวง :- http://84000.org/tipitaka/read/byitem_s.php?book=31&item=86&items=6&modeTY=2              ศึกษาอรรถกถานี้ได้ที่ :- http://84000.org/tipitaka/attha/attha.php?b=31&i=86              The Pali Atthakatha in Thai :- http://84000.org/tipitaka/atthapali/read_th.php?B=47&A=4865              The Pali Atthakatha in Roman :- http://84000.org/tipitaka/atthapali/read_rm.php?B=47&A=4865              สารบัญพระไตรปิฎกเล่มที่ ๓๑ http://84000.org/tipitaka/read/?index_31

อ่านหัวข้อแรกอ่านหัวข้อที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหัวข้อถัดไปอ่านหัวข้อสุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๑๒ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]

สีพื้นหลัง :