|
| บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ |
|
| ฉบับหลวง บาลีอักษรไทย PaliRoman |
พระไตรปิฎกเล่มที่ ๓๓ ภาษาบาลี อักษรไทย พระสุตตันตปิฎกเล่มที่ ๒๕ สุตฺต. ขุ. อปทานํ (๒) พุทฺธวํโส จริยาปิฏกํ
|
|
[๓] |๓.๑| ทีปงฺกรสฺส อปเรน โกณฺฑญฺโญ นาม นายโก อนนฺตเตชามิตยโส อปฺปเมยฺโย ทุราสโท ฯ |๓.๒| จรณูปโม โส ขมเนน สีเลน สาครูปโม สมาธินา เมรูปโม ญาเณน คคนูปโม ฯ |๓.๓| อินฺทฺริยพลโพชฺฌงฺค- มคฺคสจฺจปฺปกาสนํ ปกาเสสิ สทา พุทฺโธ หิตาย สพฺพปาณินํ ฯ |๓.๔| ธมฺมจกฺกํ ปวตฺเตนฺเต โกณฺฑญฺเญ โลกนายเก โกฏิสตสหสฺสานํ ปฐมาภิสมโย อหุ ฯ |๓.๕| ตโต ปรํปิ เทเสนฺเต นรมรูนํ สมาคเม นวุติโกฏิสหสฺสานํ ทุติยาภิสมโย อหุ ฯ |๓.๖| ติตฺถิเย อภิมทฺทนฺโต ยทา ธมฺมมเทสยิ อสีติ โกฏิสหสฺสานํ ตติยาภิสมโย อหุ ฯ |๓.๗| สนฺนิปาตา ตโย อาสุํ โกณฺฑญฺญสฺส มเหสิโน ขีณาสวานํ วิมลานํ สนฺตจิตฺตาน ตาทินํ ฯ |๓.๘| โกฏิสตสหสฺสานํ ปฐโม อาสิ สมาคโม ทุติโย โกฏิสหสฺสานํ ตติโย นวุติ โกฏินํ ฯ |๓.๙| อหํ เตน สมเยน วิชิตาวี นาม ขตฺติโย สมุทฺทอนฺตมนฺเตน อิสฺสริยํ วตฺตยามิหํ ฯ--------------------------------------------------------------------------------------------- หน้าที่ ๔๔๐.
|๓.๑๐| โกฏิสตสหสฺสานํ วิมลานํ มเหสินํ สหโลกคฺคนาเถน ปรมนฺเนน ตปฺปยึ ฯ |๓.๑๑| โสปิ มํ พุทฺโธ พฺยากาสิ โกณฺฑญฺโญ โลกนายโก อปริเมยฺเย อิโต กปฺเป พุทฺโธ โลเก ภวิสฺสติ ฯ |๓.๑๒| อหุ กปิลวฺหยา รมฺมา นิกฺขมิตฺวา ตถาคโต ปธานํ ปทหิตฺวาน กตฺวา ทุกฺกรการิกํ ฯ |๓.๑๓| อชปาล รุกฺขมูลสฺมึ นิสีทิตฺวา ตถาคโต ตตฺถ ปายาสํ ปคฺคยฺห เนรญฺชรมุเปหิติ ฯ |๓.๑๔| เนรญฺชราย ตีรมฺหิ ปายาสํ อทิ โส ชิโน ปฏิยตฺต วรมคฺเคน โพธิมูลมฺหิ เอหิติ ฯ |๓.๑๕| ตโต ปทกฺขิณํ กตฺวา โพธิมณฺฑํ อนุตฺตรํ ๑- อสฺสตฺถ รุกฺขมูลมฺหิ ๒- พุชฺฌิสฺสติ มหายโส ฯ |๓.๑๖| อิมสฺส ชนิกา มาตา มายา นาม ภวิสฺสติ ปิตา สุทฺโธทโน นาม อยํ เหสฺสติ โคตโม ฯ |๓.๑๗| โกลิโต อุปติสฺโส จ อคฺคา เหสฺสนฺติ สาวกา อนาสวา วีตราคา สนฺตจิตฺตา สมาหิตา อานนฺโท นามุปฏฺฐาโก อุปฏฺฐิสฺสติมํ ชินํ ฯ |๓.๑๘| เขมา อุปฺปลวณฺณา จ อคฺคา เหสฺสนฺติ สาวิกา อนาสวา วีตราคา สนฺตจิตฺตา สมาหิตา ฯ @เชิงอรรถ: ๑ ม. โพธิมณฺฑํ อนุตฺตรนฺติ อิเม ปาฐา นตฺถิ ฯ ๒ ม. ยุ. อสฺสตฺถมูเล สมฺพุทฺโธ ฯ--------------------------------------------------------------------------------------------- หน้าที่ ๔๔๑.
|๓.๑๙| โพธิ ตสฺส ภควโต อสฺสตฺโถติ ปวุจฺจติ จิตฺโต จ หตฺถาฬวโก อคฺคา เหสฺสนฺตุปฏฺฐกา ฯ |๓.๒๐| นนฺทมาตา จ อุตฺตรา อคฺคา เหสฺสนฺตุปฏฺฐิกา อายุ วสฺสสตํ ตสฺส โคตมสฺส ยสสฺสิโน ฯ |๓.๒๑| อิทํ สุตฺวาน วจนํ อสมสฺส มเหสิโน อาโมทิตา นร มรู พุทฺธวีชงฺกุโร อยํ ฯ |๓.๒๒| อุกฺกุฏฺฐิ สทฺทา วตฺตนฺติ อปฺโผเฏนฺติ หสนฺติ จ กตญฺชลี นมสฺสนฺติ ทสสหสฺสี สเทวกา ๑- ฯ |๓.๒๓| ยทิ มสฺส โลกนาถสฺส วิรชฺฌิสฺสาม สาสนํ อนาคตมฺหิ อทฺธาเน เหสฺสาม สมฺมุขา อิมํ ฯ |๓.๒๔| ยถา มนุสฺสา นทึ ตรนฺตา ปฏิติตฺถํ วิรชฺฌิย เหฏฺฐา ติตฺถํ ๒- คเหตฺวาน อุตฺตรนฺติ มหานทึ ฯ |๓.๒๕| เอวเมว มยํ สพฺเพ ยทิ มุญฺจามิมํ ชินํ อนาคตมฺหิ อทฺธาเน เหสฺสาม สมฺมุขา อิมํ ฯ |๓.๒๖| ตสฺสาหํ วจนํ สุตฺวา ภิยฺโย จิตฺตํ ปสาทยึ ตเมว อตฺถํ สาเธนฺโต มหารชฺชํ ชิเน อทํ |๓.๒๗| มหารชฺชํ ททิตฺวาน ปพฺพชึ ตสฺส สนฺติเก ฯ สุตฺตนฺตํ วินยญฺจาปิ นวงฺค สตฺถุสาสนํ |๓.๒๘| สพฺพํ ปริยาปุณิตฺวาน โสภยึ ชินสาสนํ ฯ @เชิงอรรถ: ๑ ม. สเทวตา ฯ ๒ ม. ยุ. ...ติตฺเถ ฯ--------------------------------------------------------------------------------------------- หน้าที่ ๔๔๒.
|๓.๒๙| ตตฺถปฺปมตฺโต วิหรนฺโต นิสชฺชฏฺฐานจงฺกเม อภิญฺญาปารมึ คนฺตฺวา พฺรหฺมโลกมคญฺฉิหํ ฯ |๓.๓๐| นครํ รมฺมวตี นาม สุนนฺโท นาม ขตฺติโย สุชาตา นาม ชนิกา โกณฺฑญฺญสฺส มเหสิโน ฯ |๓.๓๑| ทสวสฺสสหสฺสานิ อคารมชฺเฌ จ โส วสิ รุจิ สุรุจิ สุโภ จ ตโย ปาสาทมุตฺตมา ฯ |๓.๓๒| ตีณิ สตสหสฺสานิ นาริโย สมลงฺกตา รุจิเทวี นาม สา นารี ชีวิตเสโน ๑- นาม อตฺรโช ฯ |๓.๓๓| นิมิตฺเต จตุโร ทิสฺวา รถ ยาเนน นิกฺขมิ อนูน ทสมาสานิ ปธานํ ปทหี ชิโน ฯ |๓.๓๔| พฺรหฺมุนา ยาจิโต สนฺโต โกณฺฑญฺโญ ทิปทุตฺตโม วตฺตจกฺโก มหาวีโร เทวานญฺจ ๒- มหาวเน ฯ |๓.๓๕| ภทฺโท เจว สุภทฺโท จ อเหสุํ อคฺคสาวกา อนุรุทฺโธ นามุปฏฺฐาโก โกณฺฑญฺญสฺส มเหสิโน ฯ |๓.๓๖| ติสฺสา จ อุปติสฺสา จ อเหสุํ อคฺคสาวิกา สาลกลฺยาณิโก ๓- โพธิ โกณฺฑญฺญสฺส มเหสิโน ฯ |๓.๓๗| โสโณ จ อุปโสโณ จ อเหสุํ อคฺคุปฏฺฐกา นนฺทา เจว สิริมา จ อเหสุํ อคฺคุปฏฺฐิกา ฯ |๓.๓๘| โส อฏฺฐาสีติ หตฺถานิ อจฺจุคฺคโต มหามุนิ โสภติ อุฬุราชาว สุริโย มชฺฌนฺติเก ยถา ฯ @เชิงอรรถ: ๑ ม. ยุ. วิชิตเสโน ฯ ๒ ม. ยุ. เทวานํ นครุตฺตเม ฯ ๓ ยุ. สาลกลฺยาณิกา ฯ--------------------------------------------------------------------------------------------- หน้าที่ ๔๔๓.
|๓.๓๙| วสฺสสตสหสฺสานิ อายุ วิชฺชติ ตาวเท ตาวตา ติฏฺฐมาโน โส ตาเรสิ ชนตํ พหุํ ฯ |๓.๔๐| ขีณาสเวหิ วิมเลหิ วิจิตฺตา อาสิ เมทนี ยถา คคนํ อุฬุภิ เอวํ โส อุปโสภถ ฯ |๓.๔๑| เตปิ นาคา อปฺปเมยฺยา อสงฺโขพฺภา ๑- ทุราสทา วิชฺชุปาตํว ทสฺเสตฺวา นิพฺพุตา เต มหายสา ฯ |๓.๔๒| สา จ อตุลิยา ชินสฺส อิทฺธิ ญาณปริภาวิโต สมาธิ สพฺพํ สมนฺตรหิตํ นนุ ริตฺตา สพฺพสงฺขาราติ ฯ |๓.๔๓| โกณฺฑญฺโญ สิริธโร ๒- พุทฺโธ นนฺทารามมฺหิ นิพฺพุโต ตตฺเถว เจติโย ๓- ตสฺส สตฺตโยชนมุสฺสิโตติ ฯ โกณฺฑญฺญพุทฺธวํโส ทุติโย ฯ ตติโย มงฺคลพุทฺธวํโสเนื้อความพระไตรปิฎกฉบับภาษาบาลีอักษรไทย เล่มที่ ๓๓ หน้าที่ ๔๓๙-๔๔๓. http://84000.org/tipitaka/pitaka_item/pali_item_s.php?book=33&item=183&items=1&pagebreak=1&modeTY=2&mode=bracket อ่านโดยใช้เนื้อความเป็นเกณฑ์แบ่งข้อ :- http://84000.org/tipitaka/pitaka_item/pali_item_s.php?book=33&item=183&items=1&pagebreak=1&modeTY=2 อ่านเทียบพระไตรปิฎกฉบับภาษาบาลีอักษรโรมัน :- http://84000.org/tipitaka/read/roman_item_s.php?book=33&item=183&items=1&pagebreak=1&modeTY=2&mode=bracket อ่านเทียบพระไตรปิฎกภาษาไทยฉบับหลวง :- http://84000.org/tipitaka/read/byitem_s.php?book=33&item=183&items=1&pagebreak=1&modeTY=2&mode=bracket ศึกษาอรรถกถานี้ได้ที่ :- http://84000.org/tipitaka/attha/attha.php?b=33&i=183 The Pali Atthakatha in Thai :- http://84000.org/tipitaka/atthapali/read_th.php?B=51&A=4317 The Pali Atthakatha in Roman :- http://84000.org/tipitaka/atthapali/read_rm.php?B=51&A=4317 สารบัญพระไตรปิฎกเล่มที่ ๓๓ http://84000.org/tipitaka/read/?index_33
       |
|
บันทึก ๑๒ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]