Atthakatha Book 16 : PALI ROMAN
Aṅ.A. (manoratha.3)

                       3. Nissāraṇīyasuttavaṇṇanā
     [13] Tatiye nissāraṇīyā dhātuyoti nissaraṇadhātuyova. 2- Mettā hi kho me
cetovimuttīti ettha paccanīkadhammehi vimuttattā tikacatukkajjhānikā mettāva
mettācetovimutti nāma. Bhāvitāti vaḍḍhitā. Bahulīkatāti punappunaṃ katā. Yānīkatāti
yuttayānasadisā katā. Vatthukatāti patiṭṭhā katā. Anuṭṭhitāti adhiṭṭhitā. Paricitāti
samantato citā ācitā upacitā. Susamāraddhāti suppaguṇakaraṇena suṭṭhu
samāraddhā. Pariyādāya tiṭṭhatīti pariyādiyitvā gahetvā tiṭṭhati. Mā hevantissa
vacanīyoti yasmā abhūtabyākaraṇaṃ byākaroti, tasmā "mā evaṃ bhaṇī"ti
vattabbo. Yadidaṃ mettācetovimuttīti yā ayaṃ mettācetovimutti, idaṃ nissaraṇaṃ
byāpādassa, byāpādato nissaṭāti attho. Yo pana mettāya tikacatukkajjhānato
vuṭṭhito saṅkhāre sammasitvā tatiyamaggaṃ patvā "puna byāpādo natthī"ti
tatiyaphalena nibbānaṃ passati, tassa cittaṃ accantanissaraṇaṃ byāpādassa.
Etenupāyena sabbattha attho veditabbo.
     Animittācetovimuttīti balavavipassanā. Dīghabhāṇakā ca 3- arahattaphalasamāpattīti
vadanti. Sā hi rāganimittādīnañceva rūpanimittādīnañca niccanimittādīnañca abhāvā
animittāti vuttā. Nimittānusārīti vuttappabhedaṃ nimittaṃ anussaraṇasabhāvaṃ.
@Footnote: 1 cha.Ma. avivadanatthāya  2 Ma. nissaṭadhātuyova  3 cha.Ma. pana
---------------------------------------------------------------------------------------------
page105.
     Asmīti asmimāno. Ayamahamasmīti pañcasu khandhesu ayaṃ nāma ahaṃ asmīti.
Ettāvatā arahattaṃ byākataṃ hoti. Vicikicchākathaṃkathāsallanti vicikicchābhūtaṃ
kathaṃkathāsallaṃ. Mā hevantissa vacanīyoti sace te paṭhamamaggavajjhā vicikicchā
uppajjati, arahattabyākaraṇaṃ micchā hoti, tasmā "mā abhūtaṃ bhaṇī"ti 1- vāretabbo.
Asmīti mānasamugghātoti arahattamaggo. Arahattamaggaphalavasena hi nibbāne diṭṭhe
puna asmimāno natthīti arahattamaggo "asmīti mānasamugghāto"ti vutto. Iti
imasmiṃ sutte abhūtabyākaraṇannāma kathitaṃ.


             The Pali Atthakatha in Roman Book 16 page 104-105.
http://84000.org/tipitaka/pitaka_item/read_rm.php?B=16&A=2326&pagebreak=1
             อรรถกถาบาลีอักษรไทย :-
http://84000.org/tipitaka/pitaka_item/read_th.php?B=16&A=2326&pagebreak=1
             อ่านอรรถกถาแปลไทย :-
http://84000.org/tipitaka/attha/attha.php?b=22&i=284
             เนื้อความพระไตรปิฎกฉบับหลวง :-
http://84000.org/tipitaka/read/r.php?B=22&A=6886
             พระไตรปิฎกฉบับบาลีอักษรไทย :-
http://84000.org/tipitaka/read/pali_read.php?B=22&A=6808
             The Pali Tipitaka in Roman Character :-
http://84000.org/tipitaka/read/roman_read.php?B=22&A=6808
             Contents of The Tipitaka Volume 22
http://84000.org/tipitaka/read/?index_22