[34] |34.406| 6 Daddallamānā vaṇṇena yasassā ca yasassinī
sabbe deve tāvatiṃse vaṇṇena atirocasi
|34.407| dassanaṃ nābhijānāmi idaṃ paṭhamadassanaṃ
kasmā kāyā nu āgamma nāmena bhāsase mamanti.
|34.408| Ahaṃ bhadde subhaddāsiṃ pubbe mānusake bhave
sahabhariyā ca te āsiṃ bhaginī ca kaniṭṭhakā
|34.409| sāhaṃ kāyassa bhedāya vippamuttā tato cutā
nimmānaratīdevānaṃ upapannā sahabyatanti.
|34.410| Pahūtakatakalyāṇā te deve yanti pāṇino
yesaṃ tvaṃ kittayissasi subhadde jātimattano
|34.411| kathaṃ tvaṃ kena vaṇṇena kena vā anusāsitā
kīdiseneva dānena subbatena yasassinī
|34.412| yasaṃ etādisaṃ pattā visesaṃ vipulamajjhagā
devate pucchitācikkha kissa kammassidaṃ phalaṃ (iti).
|34.413| Aṭṭheva piṇḍapātāni yaṃ dānaṃ adadaṃ pure
dakkhiṇeyyassa saṅghassa pasannā sakehi pāṇihi
|34.414| tena metādiso vaṇṇo ... Pe ...
Vaṇṇo ca me sabbadisā pabhāsatīti.
|34.415| Ahaṃ tayā bahutare bhikkhū saññate brahmacārino
tappesiṃ annapānena pasannā sakehi pāṇihi
|34.416| Tayā bahutaraṃ datvā hīnakāyūpagā ahaṃ
kathaṃ tvaṃ appataraṃ datvā visesaṃ vipulamajjhagā
devate pucchitācikkha kissa kammassidaṃ phalaṃ (iti).
|34.417| Manobhāvanīyo bhikkhu sandiṭṭho me pure ahu
tāhaṃ bhattena nimantesiṃ revataṃ attanaṭṭhamaṃ
|34.418| so me atthapurekkhāro anukampāya revato
saṅghe dehīti maṃ avoca tassāhaṃ vacanaṃ kariṃ
|34.419| sā dakkhiṇā saṅghagatā appameyyā patiṭṭhitā
puggalesu tayā dinnaṃ na taṃ tava mahapphalanti.
|34.420| Idānevāhaṃ jānāmi saṅghe dinnaṃ mahapphalaṃ
sāhaṃ gantvā manussattaṃ vadaññū vītamaccharā
saṅghe dānaṃ dassāmihaṃ appamattā punappunanti.
|34.421| Kā esā devatā bhadde tayā mantayate saha
sabbe deve tāvatiṃse vaṇṇena atirocati (iti).
|34.422| Manussabhūtā devinda pubbe mānusake bhave
sahabhariyā ca me āsi bhaginī ca kaniṭṭhakā 1-
saṅghe dānāni datvāna katapuññā virocati (iti).
|34.423| Dhammena pubbe bhaginī tayā bhadde virocasi
yaṃ saṅghasmiṃ appameyye patiṭṭhāpesi dakkhiṇaṃ
|34.424| pucchito hi mayā buddho gijjhakūṭasmiṃ pabbate
@Footnote: 1 Ma. yu kaniṭṭhikā.
Vipākaṃ saṃvibhāgassa yattha dinnaṃ mahapphalaṃ
|34.425| yajamānānaṃ manussānaṃ puññapekkhāna pāṇinaṃ
karontaṃ 1- opadhikaṃ puññaṃ yattha dinnaṃ mahapphalaṃ
|34.426| taṃ me buddho viyākāsi jānaṃ kammaphalaṃ sakaṃ
vipākaṃ saṃvibhāgassa yattha dinnaṃ mahapphalaṃ
|34.427| cattāro ca paṭipannā cattāro ca phale ṭhitā
esa saṅgho ujubhūto paññāsīlasamāhito
|34.428| yajamānānaṃ manussānaṃ puññapekkhāna pāṇinaṃ
karontaṃ 1- opadhikaṃ puññaṃ saṅghe dinnaṃ mahapphalaṃ
|34.429| eso hi saṅgho vipulo mahaggato
esappameyyo udadhīva sāgaro
ete hi seṭṭhā naraviriyasāvakā
pabhaṅkarā dhammakathaṃ udīrayanti
|34.430| tesaṃ sudinnaṃ suhutaṃ suyiṭṭhaṃ
ye saṅghamuddissa dadanti dānaṃ
sā dakkhiṇā saṅghagatā patiṭṭhitā
mahapphalā lokavidūhi vaṇṇitā
|34.431| etādisaṃ puññamanussarantā
ye vedajātā vicaranti loke
vineyya maccheramalaṃ samūlaṃ
@Footnote: 1 karotantipi dissati.
Aninditā saggamupenti ṭhānanti.
Daddallavimānaṃ chaṭṭhaṃ.
[35] |35.432| 7 Phalikarajatahemajālacchannaṃ
vividhavicitratalamaddasaṃ surammaṃ
byamhaṃ sunimmitaṃ toraṇūpapannaṃ
rucakūpakiṇṇamidaṃ subhaṃ vimānaṃ
|35.433| bhāti ca dasa disā nabheva suriyo
sarade tamanudo sahassaraṃsī
tathā tapatimidaṃ tava vimānaṃ
jalamiva dhūmasikho nise nabhagge
|35.434| musatīva nayanaṃ sateritāva
ākāse ṭhapitamidaṃ manuññaṃ
vīṇāmurajasammatāḷaghuṭṭhaṃ
iddhaṃ indapuraṃ yathā tava yidaṃ
|35.435| padumakumudauppalakuvalayaṃ
yothikābhaṇḍikānojakā ca santi
sālakusumitapupphitā asokā
vividhadumaggasugandhasevitamidaṃ
|35.436| salaḷalabujasujakasaṃyuttā
Kusakasuphullitalatāvalambinīhi
maṇijālasadisā yasassinī
rammā pokkharaṇī upaṭṭhitā te
|35.437| udakaruhā ca yetthi pupphajātā
thalajā ye ca santi rukkhajātā
mānussakā amānussakā ca dibbā
sabbe tuyhaṃ nivesanamhi jātā
|35.438| kissa samadamassa 1- ayaṃ vipāko
kenāsi kammaphalenidhūpapannā
yathā ca te adhigatamidaṃ vimānaṃ
tadanupadaṃ avacāsi āḷārapakhumeti.
|35.439| Yathā ca me adhigatamidaṃ vimānaṃ
koñcamayuracakorasaṅghacaritaṃ
dibyapilavahaṃsarājaciṇṇaṃ
dijakāraṇḍavakokilābhināditaṃ
|35.440| nānāsantānakapuppharukkhavividhā
pāṭalijambuasokarukkhavantaṃ
yathā ca me adhigatamidaṃ vimānaṃ
@Footnote: 1 Ma. saññamadamassayaṃ.
Tante pavedissāmi suṇohi bhante
|35.441| magadhavarapuratthimena
nāḷakagāmako nāma atthi bhante
tattha ahosiṃ pure suṇisā
sesavatīti tattha jāniṃsu mamaṃ
|35.442| sāhaṃ apacitatthadhammakusalaṃ
devamanussapūjitaṃ mahantaṃ
upatissaṃ nibbutaṃ appameyyaṃ
muditamanā kusumehi abbhokiriṃ
|35.443| paramagatigatañca pūjayitvā
antimadehadharaṃ isiṃ uḷāraṃ
pahāya mānusakaṃ samussayaṃ
tidasāgatā idhamāvasāmi ṭhānanti.
Sesavatīvimānaṃ sattamaṃ.
[36] |36.444| 8 Pītavatthe pītadhaje pītālaṅkārabhūsite
pītantarāhi vaggūhi apilandhā va sobhasi
|36.445| kā kambukāyuradhare kañcanāveḷabhūsite
hemajālakasañchanne nānāratanamālinī
|36.446| sovaṇṇamayā lohitaṅkamayā ca
Muttāmayā veḷuriyāmayā ca
masāragallā sahalohitaṅkā
pārevatakkhīhi maṇīhi cittatā
|36.447| koci koci ettha mayūrasussaro
haṃsassa rañño karavīkasussaro
tesaṃ saro suyyati vaggurūpo
pañcaṅgikaṃ turiyamivappavāditaṃ
|36.448| ratho ca te subho vaggū 1- nānāratanacittaṅgo 2-
nānāvaṇṇīhi dhātūhi suvibhatto va sobhati
|36.449| tasmiṃ rathe kāñcanabimbavaṇṇe
yattha ṭhitā bhāsasimaṃ padesaṃ
devate pucchitācikkha kissa kammassidaṃ phalanti.
|36.450| Sovaṇṇajālaṃ 3- maṇisoṇṇacittaṃ
muttācittaṃ hemajālena channaṃ
parinibbute gotame appameyye
pasannacittā ahamābhiropayiṃ
|36.451| tāhaṃ kammaṃ karitvāna kusalaṃ buddhavaṇṇitaṃ
apetasokā sukhitā sampamodāmanāmayāti.
Mallikāvimānaṃ aṭṭhamaṃ.
@Footnote: 1 Ma. Yu. vaggu . 2 Ma. Yu. nānāratanacittito . 3 Ma. maṇisoṇṇacittitaṃ.
@Po. maṇisovaṇṇacittaṃ.
[37] |37.452| 9 Kā nāma tvaṃ visālakkhī ramme cittalatāvane
samantā anupariyāsi nārīgaṇapurakkhitā
|37.453| yadā devā tāvatiṃsā pavisanti imaṃ vanaṃ
sayoggā sarathā sabbe citrā honti idhāgatā
|37.454| tuyhañca idha pattāya uyyāne vicarantiyā
kāyena dissati cittaṃ kena rūpaṃ tavedisaṃ
devate pucchitācikkha kissa kammassidaṃ phalaṃ (iti .)
|37.455| yena kammena devinda rūpaṃ mayhaṃ gatī ca me
iddhī ca ānubhāvo ca taṃ suṇohi purindada
|37.456| ahaṃ rājagahe ramme sunandā nāma upāsikā
saddhāsīlena sampannā saṃvibhāgaratā sadā
|37.457| acchādanañca bhattañca senāsanaṃ padīpiyaṃ
adāsiṃ ujubhūtesu vippasannena cetasā
|37.458| cātuddasiṃ pañcadasiṃ yā ca pakkhassa aṭṭhamī
pāṭihāriyapakkhañca aṭṭhaṅgasusamāgataṃ
|37.459| uposathaṃ upavasiṃ sadā sīle susaṃvutā
pāṇātipātā viratā musāvādā ca saññatā
theyyā ca aticārā ca majjapānā ca ārakā
|37.460| pañcasikkhāpade ratā ariyasaccāna kovidā
upāsikā cakkhumato gotamassa yasassino
|37.461| Tassā me ñātikulaṃ āsi sadā mālābhihārati
tāhaṃ bhagavato thūpe sabbamevābhiropayiṃ
|37.462| uposathevahaṃ gantvā mālāgandhavilepanaṃ
thūpasmiṃ abhiropesiṃ pasannā sakehi pāṇihi
|37.463| tena kammena devinda rūpaṃ mayhaṃ gatī ca me
iddhī ca ānubhāvo ca yañca mālābhiropayiṃ
|37.464| yañca sīlavatī āsiṃ na taṃ tāva vipaccati
āsā ca pana me devinda sakadāgāminī siyanti.
Visālakkhivimānaṃ navamaṃ.
[38] |38.465| 10 Pārichattake koviḷāre ramaṇīye manorame
dibbamālaṃ ganthamānā gāyantī sampamodasi
|38.466| tassā te naccamānāya aṅgamaṅgehi sabbaso
dibbā saddā niccharanti savanīyā manoramā
|38.467| tassā te naccamānāya aṅgamaṅgehi sabbaso
dibbā gandhā pavāyanti sucigandhā manoramā
|38.468| vivattamānā kāyena yā veṇīsu pilandhanā
tesaṃ suyyati nigghoso turiye pañcaṅgike yathā
|38.469| vaṭaṃsakā vātadhūtā vātena sampakampitā
tesaṃ suyyati nigghoso turiye pañcaṅgike yathā
|38.470| yāpi te sirasmiṃ mālā sucigandhā manoramā
Vāti gandho disā sabbā rukkho mañjūsako yathā
|38.471| ghāyase taṃ sucigandhaṃ rūpaṃ passasi amānusaṃ
devate pucchitācikkha kissa kammassidaṃ phalaṃ (iti .)
|38.472| pabhassaraṃ acchimantaṃ vaṇṇagandhena saññutaṃ
asokapupphamālāhaṃ buddhassa upanāmayiṃ
|38.473| tāhaṃ kammaṃ karitvāna kusalaṃ buddhavaṇṇitaṃ
apetasokā sukhitā sampamodāmanāmayāti.
Pārichattakavimānaṃ dasamaṃ.
Uddānaṃ
uḷāraṃ ucchupallaṅkaṃ 1- latā ca guttilena ca
daddalla sesavatī mallī visālakkhi pārichattako
vaggo tena pavuccatīti.
Pārichattakavaggo tatiyo.
--------------
Catuttho mañjiṭṭhakavaggo
[39] |39.474| 1 Mañjiṭṭhake 2- vimānasmiṃ sovaṇṇavālukasanthate
pañcaṅgikena turiyena ramasi suppavādite
|39.475| tamhā vimānā oruyha nimmitā ratanāmayā
@Footnote: 1 Ma. uḷāro. uchupallaṅko . 2 Yu. mañjeṭṭhake .pe.
Ogāhasi sālavanaṃ pupphitaṃ sabbakālikaṃ
|39.476| yassa yasseva sālassa mūle tiṭṭhasi devate
so so muñcati pupphāni onamitvā dumuttamo
|39.477| vāteritaṃ sālavanaṃ ādhutaṃ dijasevitaṃ
vāti gandho disā sabbā rukkho mañjūsako yathā
|39.478| ghāyase taṃ sucigandhaṃ rūpaṃ passasi amānusaṃ
devate pucchitācikkha kissa kammassidaṃ phalanti.
|39.479| Ahaṃ manussesu manussabhūtā
dāsī ayyirakule 1- ahuṃ
buddhaṃ nisinnaṃ disvāna sālapupphehi okiriṃ
|39.480| vaṭaṃsakañca sukataṃ sālapupphamayaṃ ahaṃ
buddhassa upanāmesiṃ pasannā sakehi pāṇihi
|39.481| tāhaṃ kammaṃ karitvāna kusalaṃ buddhavaṇṇitaṃ
apetasokā sukhitā sampamodāmanāmayāti.
Mañjiṭṭhakavimānaṃ paṭhamaṃ.
[40] |40.482| 2 Pabhassavaravaṇṇanibhe
surattavatthanivāsane
mahiddhike candanaruciragatte
kā tvaṃ subhe devate vandase mamaṃ
|40.483| pallaṅko ca te mahaggho
@Footnote: 1 Ma. ayirakule. Yu. ayyarakule . 2 Yu. candara ....
Nānāratanacittito ruciro
yattha tvaṃ nisinnā virocasi
devarājāriva nandane vane
|40.484| kiṃ tvaṃ pure sucaritamācari bhadde
kissa kammassa vipākaṃ anubhosi
devalokasmiṃ devate pucchitācikkha
kissa kammassidaṃ phalanti.
|40.485| Piṇḍāya te carantassa
mālaṃ phāṇitañca adadaṃ bhante
tassa kammassidaṃ vipākaṃ
anubhomi devalokasmiṃ
|40.486| hoti ca me anutāpo
aparādhaṃ 1- dukkhitañca me bhante
sāhaṃ dhammaṃ nāssosiṃ
sudesitaṃ dhammarājena
|40.487| taṃ taṃ vadāmi bhaddante
yassa me anukampiyo
koci dhammesu taṃ samādapetha
sudesitaṃ dhammarājena
|40.488| yesaṃ atthi saddhā buddhe
@Footnote: 1 Ma. Yu. aparaddhaṃ.
Dhamme ca saṅgharatane ca
te maṃ ativirocanti
āyunā yasasā siriyā
|40.489| patāpena vaṇṇena uttaritarā
aññe mahiddhikatarā mayā devāti.
Pabhassaravimānaṃ dutiyaṃ.
The Pali Tipitaka in Roman Character Volume 26 page 59-71.
http://84000.org/tipitaka/pitaka_item/roman_item_s.php?book=26&item=34&items=7
Classified by [Item Number] :-
http://84000.org/tipitaka/pitaka_item/roman_item_s.php?book=26&item=34&items=7&mode=bracket
Compare with The Pali Tipitaka in Thai Character :-
http://84000.org/tipitaka/read/pali_item_s.php?book=26&item=34&items=7
Compare with The Royal Version of Thai Tipitaka :-
http://84000.org/tipitaka/read/byitem_s.php?book=26&item=34&items=7
Study Atthakatha :-
http://84000.org/tipitaka/attha/attha.php?b=26&i=34
The Pali Atthakatha in Thai :-
http://84000.org/tipitaka/atthapali/read_th.php?B=30&A=3557
The Pali Atthakatha in Roman :-
http://84000.org/tipitaka/atthapali/read_rm.php?B=30&A=3557
Contents of The Tipitaka Volume 26
http://84000.org/tipitaka/read/?index_26
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
