[146] Tena kho pana samayena saṅghassa bhaṇḍāgāre cīvaraṃ
ussannaṃ hoti . bhagavato etamatthaṃ ārocesuṃ . anujānāmi
Bhikkhave sammukhībhūtena saṅghena bhājetunti . tena kho pana samayena
sabbo 1- saṅgho cīvaraṃ bhājento kolāhalaṃ akāsi . bhagavato
etamatthaṃ ārocesuṃ . anujānāmi bhikkhave pañcahaṅgehi samannāgataṃ
bhikkhuṃ cīvarabhājakaṃ sammannituṃ yo na chandāgatiṃ gaccheyya na
dosāgatiṃ gaccheyya na mohāgatiṃ gaccheyya na bhayāgatiṃ gaccheyya
bhājitābhājitañca jāneyya . evañca pana bhikkhave sammannitabbo .
Paṭhamaṃ bhikkhu yācitabbo yācitvā byattena bhikkhunā paṭibalena
saṅgho ñāpetabbo
{146.1} suṇātu me bhante saṅgho yadi saṅghassa pattakallaṃ
saṅgho itthannāmaṃ bhikkhuṃ cīvarabhājakaṃ sammanneyya. Esā ñatti.
{146.2} Suṇātu me bhante saṅgho saṅgho itthannāmaṃ bhikkhuṃ
cīvarabhājakaṃ sammannati . yassāyasmato khamati itthannāmassa
bhikkhuno cīvarabhājakassa sammati so tuṇhassa yassa nakkhamati
so bhāseyya.
{146.3} Sammato saṅghena itthannāmo bhikkhu cīvarabhājako .
Khamati saṅghassa tasmā tuṇhī. Evametaṃ dhārayāmīti.
{146.4} Athakho cīvarabhājakānaṃ bhikkhūnaṃ etadahosi kathaṃ nu kho cīvaraṃ
bhājetabbanti . bhagavato etamatthaṃ ārocesuṃ . anujānāmi bhikkhave
paṭhamaṃ uccinitvā tulayitvā vaṇṇāvaṇṇaṃ katvā bhikkhū gaṇetvā
vaggaṃ bandhitvā cīvarapaṭivisaṃ ṭhapetunti . athakho cīvarabhājakānaṃ bhikkhūnaṃ
etadahosi kathaṃ nu kho sāmaṇerānaṃ cīvarapaṭiviso dātabboti . bhagavato
etamatthaṃ ārocesuṃ . anujānāmi bhikkhave sāmaṇerānaṃ upaḍḍhapaṭivisaṃ
@Footnote: 1 Ma. ayaṃ pāṭho na dissati.
Dātunti.
{146.5} Tena kho pana samayena aññataro bhikkhu sakena bhāgena
uttaritukāmo hoti . bhagavato etamatthaṃ ārocesuṃ . anujānāmi
bhikkhave uttarantassa sakaṃ bhāgaṃ dātunti . tena kho pana samayena
aññataro bhikkhu atirekabhāgena uttaritukāmo hoti . bhagavato
etamatthaṃ ārocesuṃ . anujānāmi bhikkhave anukkhepe dinne
atirekabhāgaṃ dātunti . athakho cīvarabhājakānaṃ bhikkhūnaṃ etadahosi
kathaṃ nu kho cīvarapaṭiviso dātabbo āgatapaṭipāṭiyā nu kho
udāhu yathāvuḍḍhanti . bhagavato etamatthaṃ ārocesuṃ .
Anujānāmi bhikkhave vikalake tosetvā kusapātaṃ kātunti.
[147] Tena kho pana samayena bhikkhū chakaṇenapi paṇḍumattikāyapi
cīvaraṃ rajenti 1- . cīvaraṃ dubbaṇṇaṃ hoti . bhagavato etamatthaṃ
ārocesuṃ . anujānāmi bhikkhave cha rajanāni mūlarajanaṃ khandharajanaṃ
tacarajanaṃ pattarajanaṃ puppharajanaṃ phalarajananti.
{147.1} Tena kho pana samayena bhikkhū sītūdakāya 2- cīvaraṃ rajenti.
Cīvaraṃ duggandhaṃ hoti . bhagavato etamatthaṃ ārocesuṃ . anujānāmi
bhikkhave rajanaṃ pacituṃ cūḷarajanakumbhinti 3- . rajanaṃ uttariyati. Bhagavato
etamatthaṃ ārocesuṃ . anujānāmi bhikkhave uttarāḷuvaṃ 4- bandhitunti.
Tena kho pana samayena bhikkhū na jānanti rajanaṃ pakkaṃ vā apakkaṃ vā. Bhagavato
etamatthaṃ ārocesuṃ . anujānāmi bhikkhave udake vā nakhapiṭṭhikāya vā
@Footnote: 1 Ma. Yu. rajanti. 2 Sī. sītundakāya. Ma. sītudakāya. Yu. situnnakāya.
@3 Po. Yu. culla-. Ma. cullaṃ. 4 Ma. Yu. uttarāḷumpaṃ.
Thevakaṃ dātunti.
{147.2} Tena kho pana samayena bhikkhū rajanaṃ oropentā
kumbhiṃ āvaṭṭanti 1- kumbhī bhijjati . bhagavato etamatthaṃ ārocesuṃ.
Anujānāmi bhikkhave rajanuḷuṅkaṃ daṇḍakathālikanti 2- . tena kho pana
samayena bhikkhūnaṃ rajanabhājanaṃ na saṃvijjati . bhagavato etamatthaṃ
ārocesuṃ . anujānāmi bhikkhave rajanakolambaṃ rajanaghaṭanti .
Tena kho pana samayena bhikkhū pātiyāpi pattepi cīvaraṃ maddanti .
Cīvaraṃ paribhijjati . bhagavato etamatthaṃ ārocesuṃ . anujānāmi
bhikkhave rajanadoṇikanti.
{147.3} Tena kho pana samayena bhikkhū chamāyaṃ cīvaraṃ pattharanti
cīvaraṃ paṃsukitaṃ hoti . bhagavato etamatthaṃ ārocesuṃ . anujānāmi
bhikkhave tiṇasanthārakanti . tiṇasanthārako upacikāhi khajjati .
Bhagavato etamatthaṃ ārocesuṃ. Anujānāmi bhikkhave cīvaravaṃsaṃ cīvararajjunti.
Majjhena laggenti rajanaṃ ubhato galati . Bhagavato etamatthaṃ ārocesuṃ.
Anujānāmi bhikkhave kaṇṇe bandhitunti . kaṇṇo jīrati . bhagavato
etamatthaṃ ārocesuṃ . anujānāmi bhikkhave kaṇṇasuttakanti . rajanaṃ
ekato galati . bhagavato etamatthaṃ ārocesuṃ . anujānāmi bhikkhave
samparivattakaṃ samparivattakaṃ rajetuṃ na ca acchinne theve pakkamitunti.
{147.4} Tena kho pana samayena cīvaraṃ patthinnaṃ hoti. Bhagavato
etamatthaṃ ārocesuṃ . anujānāmi bhikkhave udake osādetunti 3-.
Tena kho pana samayena cīvaraṃ pharusaṃ hoti. Bhagavato etamatthaṃ ārocesuṃ.
@Footnote: 1 Po. Yu. āvajjanti. Sī. āviñjanti. Ma. āvicchanti. 2 Ma. thālakanti.
@3 Ma. Yu. osāretunti.
Anujānāmi bhikkhave pāṇinā ākoṭetunti.
The Pali Tipitaka in Roman Character Volume 5 page 198-202.
http://84000.org/tipitaka/pitaka_item/roman_item_s.php?book=5&item=146&items=2
Classified by [Item Number] :-
http://84000.org/tipitaka/pitaka_item/roman_item_s.php?book=5&item=146&items=2&mode=bracket
Compare with The Pali Tipitaka in Thai Character :-
http://84000.org/tipitaka/read/pali_item_s.php?book=5&item=146&items=2
Compare with The Royal Version of Thai Tipitaka :-
http://84000.org/tipitaka/read/byitem_s.php?book=5&item=146&items=2
Study Atthakatha :-
http://84000.org/tipitaka/attha/attha.php?b=5&i=146
The Pali Atthakatha in Thai :-
http://84000.org/tipitaka/atthapali/read_th.php?B=3&A=4763
The Pali Atthakatha in Roman :-
http://84000.org/tipitaka/atthapali/read_rm.php?B=3&A=4763
Contents of The Tipitaka Volume 5
http://84000.org/tipitaka/read/?index_5
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
