บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ |
ฉบับภาษาไทย บาลีอักษรไทย บาลีอักษรโรมัน |
พระไตรปิฎกเล่มที่ ๒๖ ภาษาบาลี อักษรไทย พระสุตตันตปิฎกเล่มที่ ๑๘ สุตฺต. ขุ. วิมานวตฺถุ-เปตวตฺถุ-เถรคาถา-เถรีคาถา
[๓๘๒] |๓๘๒.๖๕๙| ๒ ยถาปิ ภทฺโท ๑- อาชญฺโญ ธุเร ยุตฺโต ธุรสฺสโห @เชิงอรรถ: ๑ โป. ภทฺโร ฯ มถิโต อติภาเรน สํยุตฺตํ ๑- นาติวตฺตติ |๓๘๒.๖๖๐| เอวํ ปญฺญาย เย ติตฺตา สมุทฺโท วารินา ยถา น ปเร อติมญฺญนฺติ อริยธมฺโมว ปาณินํ ฯ |๓๘๒.๖๖๑| กาเล กาลวสมฺปตฺตา ภวาภววสํ คตา นรา ทุกฺขํ นิคจฺฉนฺติ เต จ ๒- โสจนฺติ มาณวา ฯ |๓๘๒.๖๖๒| อุนฺนตา สุขธมฺเมน ทุกฺขธมฺเมน โวนตา ทฺวเยน พาลา หญฺญนฺติ ยถาภูตํ อทสฺสิโน ฯ |๓๘๒.๖๖๓| เย จ ทุกฺเข สุขมฺหิ จ มชฺเฌ สิพฺพนิมจฺจคู ๓- ฐิตา เต อินฺทขีโลว น เต อุนฺนตโอนตา ฯ |๓๘๒.๖๖๔| น เหว ลาเภ นาลาเภ น ยเส น จ กิตฺติยา น นินฺทาย ปสํสาย น เต ทุกฺเข สุขมฺหิ จ |๓๘๒.๖๖๕| สพฺพตฺถ เต น ลิปฺปนฺติ อุทพินฺทุว โปกฺขเร สพฺพตฺถ สุขิตา ธีรา ๔- สพฺพตฺถ อปราชิตา ฯ |๓๘๒.๖๖๖| ธมฺเมน จ อลาโภ โย โย จ ลาโภ อธมฺมิโก อลาโภ ธมฺมิโก เสยฺโย ยญฺเจ ลาโภ อธมฺมิโก ฯ |๓๘๒.๖๖๗| ยโส จ อปฺปพุทฺธีนํ วิญฺญูนํ อยโส จ โย อยโส จ ๕- เสยฺโย วิญฺญูนํ น ยโส อปฺปพุทฺธินํ ฯ |๓๘๒.๖๖๘| ทุมฺเมเธหิ ปสํสา จ วิญฺญูหิ ครหา จ ยา ครหาว เสยฺโย วิญฺญูหิ ยญฺเจ พาลปฺปสํสนา ฯ @เชิงอรรถ: ๑ ยุ. สํยุคํ ฯ ๒ ยุ. เตธ ฯ ๓ ยุ. สิพฺพนิมชฺฌคู ฯ ๔ ยุ. วีรา ฯ ๕ ม. ว ฯ |๓๘๒.๖๖๙| สุขญฺจ กามมยิกํ ทุกฺขญฺจ ปวิเวกิยํ ปวิเวกิยํ ทุกฺขํ เสยฺโย ยญฺเจ กามมยํ สุขํ ฯ |๓๘๒.๖๗๐| ชีวิตญฺจ อธมฺเมน ธมฺเมน มรณญฺจ ยํ มรณํ ธมฺมิกํ เสยฺโย ยญฺเจ ชีเว อธมฺมิกํ ฯ |๓๘๒.๖๗๑| กามโกธปฺปหีนา ๑- เย สนฺตจิตฺตา ภวาภเว จรนฺติ โลเก อสิตา นตฺถิ เตสํ ปิยาปิยํ ฯ |๓๘๒.๖๗๒| ภาวยิตฺวาน โพชฺฌงฺเค อินฺทฺริยานิ พลานิ จ ปปฺปุยฺย ๒- ปรมํ สนฺตึ ปรินิพฺพนฺติ อนาสวาติ ฯ โคทตฺโต เถโร ฯ อุทฺทานํ เรวโต เจว โคทตฺโต เถรา เทฺวเต มหิทฺธิกา จุทฺทสมฺหิ นิปาตมฺหิ คาถาโย อฏฺฐวีสตีติ ฯ จุทฺทสกนิปาโต นิฏฺฐิโต ฯ ---------------- เถรคาถาย โสฬสกนิปาโต [๓๘๓] |๓๘๓.๖๗๓| ๑ เอส ภิยฺโย ปสีทามิ สุตฺวา ธมฺมํ มหารสํ วิราโค เทสิโต ธมฺโม อนุปาทาย สพฺพโส ฯ |๓๘๓.๖๗๔| พหูนิ โลเก จิตฺรานิ อสฺมึ ปฐวิมณฺฑเล ๓- @เชิงอรรถ: ๑ ม. กามโกปปฺปหีนา ฯ ยุ. กามโกปปหีนา ฯ ๒ โป. ปปฺเปยฺย ฯ ๓ โป. ยุ. @ปุถุวิมณฺฑเล ฯ มเถนฺติ มญฺเญ สงฺกปฺปํ สุภํ ราคูปสํหิตํ ฯ |๓๘๓.๖๗๕| รชมุหตํ วาเตน ยถา เมโฆปสามเย เอวํ สมฺมนฺติ สงฺกปฺปา ยทา ปญฺญาย ปสฺสติ ฯ |๓๘๓.๖๗๖| สพฺเพ สงฺขารา อนิจฺจาติ ยทา ปญฺญาย ปสฺสติ อถ นิพฺพินฺทติ ทุกฺเข เอส มคฺโค วิสุทฺธิยา ฯ |๓๘๓.๖๗๗| สพฺเพ สงฺขารา ทุกฺขาติ ยทา ปญฺญาย ปสฺสติ อถ นิพฺพินฺทติ ทุกฺเข เอส มคฺโค วิสุทฺธิยา ฯ |๓๘๓.๖๗๘| สพฺเพ ธมฺมา อนตฺตาติ ยทา ปญฺญาย ปสฺสติ อถ นิพฺพินฺทติ ทุกฺเข เอส มคฺโค วิสุทฺธิยา ฯ |๓๘๓.๖๗๙| พุทฺธานุพุทฺโธ โย เถโร โกณฺฑญฺโญ ติพฺพนิกฺกโม ๑- ปหีนชาติมรโณ พฺรหฺมจริยสฺส เกวลี ฯ |๓๘๓.๖๘๐| โอฆปาโส ทโฬฺห ขีโล ปพฺพโต ทุปฺปทาลิโย เฉตฺวา ขีลญฺจ ปาสญฺจ เสลํ เฉตฺวาน ๒- ทุพฺภิทํ ติณฺโณ ปารงฺคโต ฌายี มุตฺโต โส มารพนฺธนา ฯ |๓๘๓.๖๘๑| อุทฺธโต จปโล ภิกฺขุ มิตฺเต อาคมฺม ปาปเก สํสีทติ มโหฆสฺมึ อุมฺมิยา ปฏิกุชฺชิโต ฯ |๓๘๓.๖๘๒| อนุทฺธโต อจปโล นิปโก สํวุตินฺทฺริโย กลฺยาณมิตฺโต เมธาวี ทุกฺขสฺสนฺตกโร สิยา ฯ |๓๘๓.๖๘๓| กาลาปพฺพงฺคสงฺกาโส กีโส ธมนิสณฺฐิโต ๓- @เชิงอรรถ: ๑ โป. ยุ. ติพฺพนิกฺขโม ฯ ๒ โป. ม. เภตฺวาน ฯ ๓ ยุ. ธมนิสนฺถโต ฯ มตฺตญฺญู อนฺนปานสฺมึ อทีนมนโส นโร |๓๘๓.๖๘๔| ผุฏฺโฐ ฑํเสหิ มกเสหิ อรญฺญสฺมึ พฺรหาวเน นาโค สงฺคามสีเสว สโต ตตฺราธิวาสเย ฯ |๓๘๓.๖๘๕| นาภินนฺทามิ มรณํ นาภินนฺทามิ ชีวิตํ กาลญฺจ ปฏิกงฺขามิ นิพฺพิสํ ภตโก ยถา ฯ |๓๘๓.๖๘๖| นาภินนฺทามิ มรณํ นาภินนฺทามิ ชีวิตํ กาลญฺจ ปฏิกงฺขามิ สมฺปชาโน ปติสฺสโต ฯ |๓๘๓.๖๘๗| ปริจิณฺโณ มยา สตฺถา กตํ พุทฺธสฺส สาสนํ โอหิโต ครุโก ภาโร ภวเนตฺติ สมูหตา ฯ |๓๘๓.๖๘๘| ยสฺส จตฺถาย ปพฺพชิโต อคารสฺมา อนคาริยํ โส เม อตฺโถ อนุปฺปตฺโต กึ เม สทฺธิวิหารินาติ ๑- ฯ อญฺญาโกณฺฑญฺโญ เถโร ฯ [๓๘๔] |๓๘๔.๖๘๙| ๒ มนุสฺสภูตํ สมฺพุทฺธํ อตฺตทนฺตํ สมาหิตํ อิริยมานํ พฺรหฺมปเถ จิตฺตสฺสูปสเม รตํ |๓๘๔.๖๙๐| ยํ มนุสฺสา นมสฺสนฺติ สพฺพธมฺมาน ปารคุํ เทวาปิ นํ นมสฺสนฺติ อิติ เม อรหโต สุตํ |๓๘๔.๖๙๑| สพฺพสํโยชนาตีตํ วนา นิพฺพานมาคตํ กาเมหิ เนกฺขมฺมรตํ มุตฺตํ เสลาว กญฺจนํ |๓๘๔.๖๙๒| ส เว อจฺจรุจิ ๒- นาโค หิมวาวญฺเญ สิลุจฺจเย @เชิงอรรถ: ๑ ยุ. สนฺทวิหาเรนาติ ฯ ๒ ยุ. อจฺจนฺตรุจี ฯ สพฺเพสํ นาคนามานํ สจฺจนาโม อนุตฺตโร |๓๘๔.๖๙๓| นาคํ โว กิตฺตยิสฺสามิ น หิ อาคุํ กโรติ โส ฯ โสรจฺจํ อวิหึสา จ ปาทา นาคสฺส เต ทุเว ฯ |๓๘๔.๖๙๔| สติ จ สมฺปชญฺญญฺจ จรณา นาคสฺส เต ๑- ปเร ฯ สทฺธาหตฺโถ มหานาโค อุเปกฺขาเสตทนฺตวา ฯ |๓๘๔.๖๙๕| สติ คีวา สิโร ปญฺญา วีมํสา ธมฺมจินฺตนา ธมฺมกุจฺฉิสมาวาโส ๒- วิเวโก ตสฺส วาลธิ ฯ |๓๘๔.๖๙๖| โส ฌายี อสฺสาสรโต อชฺฌตฺตํ สุสมาหิโต คจฺฉํ สมาหิโต นาโค ฐิโต นาโค สมาหิโต |๓๘๔.๖๙๗| สยํ สมาหิโต นาโค นิสินฺโนปิ สมาหิโต สพฺพตฺถ สํวุโต นาโค เอสา นาคสฺส สมฺปทา ฯ |๓๘๔.๖๙๘| ภุญฺชติ อนวชฺชานิ สาวชฺชานิ น ภุญฺชติ ฆาสํ อจฺฉาทนํ ลทฺธา สนฺนิธึ ปริวชฺชยํ |๓๘๔.๖๙๙| สํโยชนํ อณุํ ถูลํ สพฺพํ เฉตฺวาน พนฺธนํ เยน เยเนว คจฺฉติ อนเปกฺโขว คจฺฉติ ฯ |๓๘๔.๗๐๐| ยถาปิ อุทเก ชาตํ ปุณฺฑรีกํ ปวฑฺฒติ โนปลิปฺปติ โตเยน สุจิคนฺธํ มโนรมํ |๓๘๔.๗๐๑| ตเถว จ โลเก ชาโต พุทฺโธ โลเก วิหรติ โนปลิปฺปติ โลเกน โตเยน ปทุมํ ยถา ฯ |๓๘๔.๗๐๒| มหาคฺคินิ ๓- ปชฺชลิโต อนาหาโรปสมฺมติ @เชิงอรรถ: ๑ ตฺยาปเรติปิ ฯ ๒ ธมฺมกุจฺฉิสมาตโปติปิ ฯ ๓ ยุ. มหาคินิ ฯ องฺคาเรสุ จ สนฺเตสุ นิพฺพุโตติ ปวุจฺจติ ฯ |๓๘๔.๗๐๓| อตฺถสฺสายํ วิญฺญาปนี อุปมา วิญฺญูหิ เทสิตา วิญฺญิสฺสนฺติ มหานาคา นาคํ นาเคน เทสิตํ ฯ |๓๘๔.๗๐๔| วีตราโค วีตโทโส วีตโมโห อนาสโว สรีรํ วิชหํ นาโค ปรินิพฺพิสฺสตฺยนาสโวติ ฯ อุทายี เถโร ฯ ตตฺรุทฺทานํ ภวติ โกณฺฑญฺโญ จ อุทายี จ เถรา เทฺว เต มหิทฺธิกา โสฬสมฺหิ นิปาตมฺหิ คาถาโย เทฺว จ ตึส จาติ ฯ โสฬสกนิปาโต นิฏฺฐิโต ฯ -------------- เถรคาถาย วีสตินิปาโต [๓๘๕] |๓๘๕.๗๐๕| ๑ ยญฺญตฺถํ วา ธนตฺถํ วา เย หนาม มยํ ปุเร อวเสสํ ภยํ โหติ เวธนฺติ วิลปนฺติ จ ฯ |๓๘๕.๗๐๖| ตสฺส เต นตฺถิ ภีตตฺตํ ภิยฺโย วณฺโณ ปสีทติ กสฺมา น ปริเทเวสิ เอวรูเป มหพฺภเย ฯ |๓๘๕.๗๐๗| นตฺถิ เจตสิกํ ทุกฺขํ อนเปกฺขสฺส คามณิ อติกฺกนฺตา ภยา สพฺเพ ขีณสํโยชนสฺส เว ฯ |๓๘๕.๗๐๘| ขีณาย ภวเนตฺติยา ทิฏฺเฐ ธมฺเม ยถาตถา ๑- @เชิงอรรถ: ๑ โป. ม. ยุ. ยถาตเถ ฯ น ภยํ มรเณ โหติ ภารนิกฺเขปเน ยถา ฯ |๓๘๕.๗๐๙| สุจิณฺณํ พฺรหฺมจริยํ เม มคฺโค จาปิ สุภาวิโต มรเณ เม ภยํ นตฺถิ โรคานมิว สงฺขเย ฯ |๓๘๕.๗๑๐| สุจิณฺณํ พฺรหฺมจริยํ เม มคฺโค จาปิ สุภาวิโต นิรสฺสาทา ภวา ทิฏฺฐา วิสํ ปิตฺวาน ฉฑฺฑิตํ ฯ |๓๘๕.๗๑๑| ปารคู อนุปาทาโน กตกิจฺโจ อนาสโว ตุฏฺโฐ อายุกฺขยา โหติ มุตฺโต อาฆาตนา ยถา ฯ |๓๘๕.๗๑๒| อุตฺตมํ ธมฺมตํ ปตฺโต สพฺพโลเก อนตฺถิโก อาทิตฺตาว ฆรา มุตฺโต มรณสฺมึ น โสจติ ฯ |๓๘๕.๗๑๓| ยทตฺถิ สงฺขตํ กิญฺจิ ภโว จ ยตฺถ ลพฺภติ สพฺพํ อนิสฺสรํ เอตํ อิทํ ๑- วุตฺตํ มเหสินา ฯ |๓๘๕.๗๑๔| โย ตํ ตถา ปชานาติ ยถา พุทฺเธน เทสิตํ น คณฺหาติ ภวํ กิญฺจิ สุตตฺตํว อโยคุฬํ ฯ |๓๘๕.๗๑๕| น เม โหติ อโหสินฺติ ภวิสฺสนฺติ น โหติ เม สงฺขารา วิภวิสฺสนฺติ ตตฺถ กา ปริเทวนา ฯ |๓๘๕.๗๑๖| สุทฺธํ ธมฺมสมุปฺปาทํ สุทฺธํ สงฺขารสนฺตตึ ปสฺสนฺตสฺส ยถาภูตํ น ภยํ โหติ คามณิ ฯ |๓๘๕.๗๑๗| ติณกฏฺฐสมํ โลกํ ยทา ปญฺญาย ปสฺสติ มมตฺตํ โส อสํวินฺทํ นตฺถิ เมติ น โสจติ ฯ |๓๘๕.๗๑๘| อุกฺกณฺฐามิ สรีเรน ภเวนมฺหิ อนตฺถิโก @เชิงอรรถ: ๑ โป. ม. ยุ. อิติ ฯ โสยํ ภิชฺชิสฺสติ กาโย อญฺโญ จ น ภวิสฺสติ ฯ |๓๘๕.๗๑๙| ยํ โว กิจฺจํ สรีเรน ตํ กโรถ ยทิจฺฉถ น เม ตปฺปจฺจยา ตตฺถ โทโส เปมํ จ เหหิติ ฯ |๓๘๕.๗๒๐| ตสฺส ตํ วจนํ สุตฺวา อพฺภูตํ โลมหํสนํ สตฺถานิ นิกฺขิปิตฺวาน มาณวา เอตทพฺรวุํ ฯ |๓๘๕.๗๒๑| กึ ภทนฺเต กริตฺวาน โก วา อาจริโย ตว กสฺส สาสนมาคมฺม ลพฺภเต ตํ อโสกตา ฯ |๓๘๕.๗๒๒| สพฺพญฺญู สพฺพทสฺสาวี ชิโน อาจริโย มม มหาการุณิโก สตฺถา สพฺพโลกติกิจฺฉโก ฯ |๓๘๕.๗๒๓| เตนายํ เทสิโต ธมฺโม ขยคามี อนุตฺตโร ตสฺส สาสนมาคมฺม ลพฺภเต ตํ อโสกตา ฯ |๓๘๕.๗๒๔| สุตฺวาน โจรา อิสิโน สุภาสิตํ นิกฺขิปฺป สตฺถานิ จ อาวุธานิ จ ตมฺหา จ กมฺมา วิรมึสุ เอเก เอเก จ ปพฺพชฺชมโรจยึสุ ฯ |๓๘๕.๗๒๕| เต ปพฺพชิตฺวา สุคตสฺส สาสเน ภาเวตฺวา โพชฺฌงฺคพลานิ ปณฺฑิตา อุทคฺคจิตฺตา สุมนา กตินฺทฺริยา ผุสึสุ นิพฺพานปทํ อสงฺขตนฺติ ฯ อธิมุตฺโต เถโร ฯ [๓๘๖] |๓๘๖.๗๒๖| ๒ สมณสฺส อหู จินฺตา ปาราสริยสฺส ๑- ภิกฺขุโน เอกกสฺส นิสินฺนสฺส ปวิวิตฺตสฺส ฌายิโน |๓๘๖.๗๒๗| กิมานุปุพฺพํ ปุริโส กึ วตฺตํ กึ สมาจารํ ๒- อตฺตโน กิจฺจการิสฺส น จ กิญฺจิ วิเหฐเย ฯ |๓๘๖.๗๒๘| อินฺทฺริยานิ มนุสฺสานํ หิตาย อหิตาย จ อรกฺขิตานิ อหิตาย รกฺขิตานิ หิตาย จ ฯ |๓๘๖.๗๒๙| อินฺทฺริยาเนว สารกฺขํ อินฺทฺริยานิ จ โคปยํ อตฺตโน กิจฺจการิสฺส น จ กิญฺจิ วิเหฐเย ฯ |๓๘๖.๗๓๐| จกฺขุนฺทฺริยญฺจ รูเปสุ คจฺฉนฺตํ อนิวารยํ อนาทีนวทสฺสาวี โส ทุกฺขา น หิ มุจฺจติ ฯ |๓๘๖.๗๓๑| โสตินฺทฺริยญฺจ ๓- สทฺเทสุ คจฺฉนฺตํ อนิวารยํ อนาทีนวทสฺสาวี โส ทุกฺขา น หิ มุจฺจติ ฯ |๓๘๖.๗๓๒| อนิสฺสรณทสฺสาวี คนฺเธ เจ ปฏิเสวติ น โส มุจฺจติ ทุกฺขมฺหา คนฺเธสุ อธิมุจฺฉิโต ฯ |๓๘๖.๗๓๓| อมฺพิลมธุรคฺคญฺจ ติตฺตกคฺคมนุสฺสรํ รสตณฺหาย คธิโต หทยํ นาวพุชฺฌติ ฯ |๓๘๖.๗๓๔| สุภานยปฺปฏิกูลานิ โผฏฺฐพฺพานิ อนุสฺสรํ รตฺโต ราคาธิกรณํ วิวิธํ วินฺทเต ทุกฺขํ ๔- ฯ |๓๘๖.๗๓๕| มนญฺเจเตหิ ธมฺเมหิ โย น สกฺโกติ รกฺขิตุํ @เชิงอรรถ: ๑ ยุ. ปาราปริยสฺส ฯ ๒ โป. ยุ. สมาจรํ ฯ ๓ โป. ม. เจ ฯ ๔ ม. ยุ. ทุขํ ฯ ตโต นํ ทุกฺขมเนฺวติ สพฺพโสเตหิ ปญฺจหิ ฯ |๓๘๖.๗๓๖| ปุพฺพโลหิตสมฺปุณฺณํ พหุสฺส กุณปสฺส จ นรวีรกตํ วคฺคุํ สมุคฺคมิว จิตฺติตํ ฯ |๓๘๖.๗๓๗| กฏุกํ มธุรสฺสาทํ ปิยนิพนฺธนํ ทุกฺขํ ๑- ขุรํว มธุนาลิตฺตํ อุลฺลิตฺตํ นาวพุชฺฌติ ฯ |๓๘๖.๗๓๘| อิตฺถิรูเป อิตฺถิรเส โผฏฺฐพฺเพปิจ อิตฺถิยา อิตฺถิคนฺเธสุ สารตฺโต วิวิธํ วินฺทเต ทุกฺขํ ๑- ฯ |๓๘๖.๗๓๙| อิตฺถิโสตานิ สพฺพานิ สนฺทนฺติ ปญฺจปญฺจสุ เตสมาวรณํ กาตุํ โย สกฺโกติ วิริยวา ฯ |๓๘๖.๗๔๐| โส อตฺถวา โส ธมฺมฏฺโฐ โส ทกฺโข โส วิจกฺขโณ กเรยฺย รมมาโน หิ กิจฺจํ ธมฺมตฺถสํหิตํ ฯ |๓๘๖.๗๔๑| อโถ สีทติ สญฺญุตฺตํ วชฺเช กิจฺจํ นิรตฺถกํ น ตํ กิจฺจนฺติ มญฺญิตฺวา อปฺปมตฺโต วิจกฺขโณ ฯ |๓๘๖.๗๔๒| ยญฺจ อตฺเถน สญฺญุตฺตํ ยา จ ธมฺมคตา รติ ตํ สมาทาย วตฺเตถ สา หิ เว อุตฺตมา รติ ฯ |๓๘๖.๗๔๓| อุจฺจาวเจหุปาเยหิ ปเรสมภิชิคีสาติ หนฺตฺวา วธิตฺวา อถ โสจยิตฺวา อาโลปติ สาหสา โย ปเรสํ ฯ |๓๘๖.๗๔๔| ตจฺฉนฺโต อาณิยา อาณึ นิหนฺติ พลวา ยถา @เชิงอรรถ: ๑ ม. ยุ. ทุขํ ฯ อินฺทฺริยานินฺทฺริเยเหว นิหนฺติ กุสลา ตถา ฯ |๓๘๖.๗๔๕| สทฺธํ วิริยํ สมาธิญฺจ สติปญฺญญฺจ ภาวยํ ปญฺจ ปญฺจหิ หนฺตฺวาน อนีโฆ ยาติ พฺราหฺมโณ ฯ |๓๘๖.๗๔๖| โส อตฺถวา โส ธมฺมฏฺโฐ กตฺวา วากฺยานุสาสนึ สพฺเพน สพฺพํ พุทฺธสฺส โส นโร สุขเมธตีติ ฯ ปาราสริโย ๑- เถโร ฯ [๓๘๗] |๓๘๗.๗๔๗| ๓ จิรรตฺตํ วตาตาปี ธมฺมํ อนุวิจินฺตยํ สมํ จิตฺตสฺส นาลตฺถํ ปุจฺฉํ สมณพฺราหฺมเณ ฯ |๓๘๗.๗๔๘| โก โส ปารคโต ๒- โลเก โก ปตฺโต อมโตคธํ กสฺส ธมฺมํ ปฏิจฺฉามิ ปรมตฺถวิชานนํ ฯ |๓๘๗.๗๔๙| อนฺโตวงฺกคโต อาสึ มจฺโฉว ฆสมามิสํ พทฺโธ มหินฺทปาเสน เวปจิตฺยาสุโร ยถา ฯ |๓๘๗.๗๕๐| อญฺฉามิ นํ น มุญฺจามิ อสฺมา โสกปริทฺทวา โก เม พนฺธํ มุญฺจํ โลเก สมฺโพธึ เวทยิสฺสติ ฯ |๓๘๗.๗๕๑| สมณํ พฺราหฺมณํ วา กํ อาทิสนฺตํ ปภงฺคุณํ กสฺส ธมฺมํ ปฏิจฺฉามิ ชรามจฺจุปวาหนํ ฯ |๓๘๗.๗๕๒| วิจิกิจฺฉากงฺขาคธิตํ ๓- สารมฺภพลสญฺญุตํ โกธปฺปตฺตมนตฺถทฺธํ อภิชปฺปปทารณํ ฯ |๓๘๗.๗๕๓| ตณฺหาธนุสมุฏฺฐานํ เทฺว จ ปนฺนรสายุตํ @เชิงอรรถ: ๑ ยุ. ปาราปริโย ฯ ๒ ม. ยุ. ปารงฺคโต ฯ ๓ ม. วิจิกิจฺฉากงฺขาคนฺถิตํ ฯ @ยุ. ...คถิตํ ฯ ปสฺส โอรสิกํ พาลํ เภตฺวาน ยทิ ติฏฺฐติ ฯ |๓๘๗.๗๕๔| อนุทิฏฺฐีนํ อปฺปหานํ สงฺกปฺปสรเตชิตํ เตน วิทฺโธ ปเวธามิ ปตฺตํว มาลุเตริตํ ฯ |๓๘๗.๗๕๕| อชฺฌตฺตํ เม สมุฏฺฐาย ขิปฺปํ ปจฺเจติ ๑- ปาปกํ ฉผสฺสายตนี กาโย ยตฺถ สรติ สพฺพทา ฯ |๓๘๗.๗๕๖| ตํ น ปสฺสามิ เตกิจฺฉํ โย เม ตํ สลฺลมุทฺธเร นานารชฺเชน สตฺเถน นาญฺเญน วิจิกิจฺฉิตํ ฯ |๓๘๗.๗๕๗| โก เม อสตฺโถ อวโณ สลฺลมพฺภนฺตราปสฺสยํ อหึสํ สพฺพคตฺตานิ ลลฺลํ เม อุทฺธริสฺสติ ฯ |๓๘๗.๗๕๘| ธมฺมปฺปติ หิ โส เสฏฺโฐ วิสโทสปวาหโก คมฺภีเร ปติตสฺส เม ถลํ ปาณิว ทสฺสเย ฯ |๓๘๗.๗๕๙| รหเทหมสฺมิ โอคาโฬฺห อหาริยรชมนฺติเก มายาอุสฺสุยฺยสารมฺภ ถีนมิทฺธมปตฺถเฏ ฯ |๓๘๗.๗๖๐| อุทฺธจฺจเมฆถนิตํ สํโยชนวลาหกํ วาหา วหนฺติ กุทฺทิฏฺฐึ สงฺกปฺปา ราคนิสฺสิตา ฯ |๓๘๗.๗๖๑| สวนฺติ สพฺพธี โสตา ลตา อุพฺภิชฺช ติฏฺฐติ เต โสเต โก นิวาเรยฺย ตํ ลตํ โก หิ เฉจฺฉติ ฯ |๓๘๗.๗๖๒| เวลํ กโรถ ภทนฺเต โสตานํ สนฺนิวารณํ มา เต มโนมโย โสโต รุกฺขํว สหสา ลุเว ฯ @เชิงอรรถ: ๑ ม. ยุ. ปจฺจติ มามกํ ฯ |๓๘๗.๗๖๓| เอวํ เม ภยชาตสฺส อปารา ปารเมสโต ตาโณ ปญฺญาวุโธ สตฺถา อิสิสงฺฆนิเสวิโต ฯ |๓๘๗.๗๖๔| โสปาณํ สุกตํ สุทฺธํ ธมฺมสารมยํ ทฬฺหํ ปาทาสิ วุยฺหมานสฺส มา ภายีติ จ มพฺรวี ฯ |๓๘๗.๗๖๕| สติปฏฺฐานปาสาทํ อารุยฺห ปจฺจเวกฺขิสํ ยนฺตํ ปุพฺเพ อมญฺญิสฺสํ สกฺกายาภิรตํ ปชํ ฯ |๓๘๗.๗๖๖| ยทา จ มคฺคมทฺทกฺขึ นาวาย อภิรูหนํ อนธิฏฺฐาย อตฺตานํ ติตฺถมทฺทกฺขิมุตฺตมํ ฯ |๓๘๗.๗๖๗| สลฺลํ อตฺตสมุฏฺฐานํ ภวเนตฺติปภาวิตํ เอเตสํ อปฺปวตฺตาย เทเสสิ มคฺคมุตฺตมํ ฯ |๓๘๗.๗๖๘| ทีฆรตฺตานุสยิตํ จิรรตฺตปติฏฺฐิตํ พุทฺโธ เม ปานุที คนฺธํ วิสโทสปวาหโนติ ฯ เตลุกานิ ๑- เถโร ฯ [๓๘๘] |๓๘๘.๗๖๙| ๔ ปสฺส จิตฺตกตํ พิมฺพํ อรุกายํ สมุสฺสิตํ อาตุรํ พหุสงฺกปฺปํ ยสฺส นตฺถิ ธุวํ ฐิติ ฯ |๓๘๘.๗๗๐| ปสฺส จิตฺตกตํ รูปํ มณินา กุณฺฑเลน จ อฏฺฐิตเจน ๒- โอนทฺธํ สห วตฺเถหิ โสภติ ฯ |๓๘๘.๗๗๑| อลตฺตกกตา ปาทา มุขํ จุณฺณกมกฺขิตํ อลํ พาลสฺส โมหาย โน จ ปารคเวสิโน ฯ @เชิงอรรถ: ๑ ย. เตลกานิ ฯ ๒ ม. อฏฺฐึ ตเจน ฯ |๓๘๘.๗๗๒| อฏฺฐปทกตา เกสา เนตฺตา อญฺชนมกฺขิตา อลํ พาลสฺส โมหาย โน จ ปารคเวสิโน ฯ |๓๘๘.๗๗๓| อญฺชนีว นวา จิตฺตา ปูติกาโย อลงฺกโต อลํ พาลสฺส โมหาย โน จ ปารคเวสิโน ฯ |๓๘๘.๗๗๔| โอทหิ มิคโว ปาสํ นาสาทา วากุรํ มิโค ภุตฺวา นิวาปํ คจฺฉาม กนฺทนฺเต มิคพนฺธเก ฯ |๓๘๘.๗๗๕| ฉินฺนา ปาสา มิควสฺส นาสาทา วากุรํ มิโค ภุตฺวา นิวาปํ คจฺฉาม โสจนฺเต มิคลุทฺทเก ฯ |๓๘๘.๗๗๖| ปสฺสามิ โลเก สธเน มนุสฺเส ลทฺธาน วิตฺตํ น ททนฺติ โมหา ฯ ลทฺธา ธนํ สนฺนิจยํ กโรนฺติ ภิยฺโย จ กาเม อภิปตฺถยนฺติ ฯ |๓๘๘.๗๗๗| ราชา ปสยฺหปฺปฐวึ วิเชตฺวา สสาครนฺตํ มหิมาวสนฺโต โอรํ สมุทฺทสฺส อติตฺตรูโป ปารํ สมุทฺทสฺสปิ ปตฺถเยถ ฯ |๓๘๘.๗๗๘| ราชา จ อญฺเญ จ พหู มนุสฺสา อวีตตณฺหา มรณํ อุเปนฺติ อูนาว หุตฺวาน ชหนฺติ เทหํ กาเมหิ โลกมฺหิ น หตฺถิ ติตฺติ ฯ |๓๘๘.๗๗๙| กนฺทนฺตี นํ ญาตี ปกิริย เกเส อโห วตา โน อมราติ จาหุ วตฺเถน นํ ปารุตํ นีหริตฺวา จิตํ สโมธาย ตโต ทหนฺติ ฯ |๓๘๘.๗๘๐| โส ฑยฺหติ สูเลหิ ตุชฺชมาโน เอเกน วตฺเถน ปหาย โภเค น มิยฺยมานสฺส ภวนฺติ ตาณา ญาตี จ มิตฺตา อถ วา สหายา ฯ |๓๘๘.๗๘๑| ทายาทกา ตสฺส ธนํ หรนฺติ สตฺโต ปน คจฺฉติ เยน กมฺมํ น มิยฺยมานํ ธนมเนฺวติ กิญฺจิ ปุตฺตา จ ทารา จ ธนญฺจ รฏฺฐํ ฯ |๓๘๘.๗๘๒| น ทีฆมายุํ ลภเต ธเนน น จาปิ วิตฺเตน ชรํ วิหนฺติ อปฺปญฺหิ นํ ชีวิตมาหุ ธีรา อสสฺสตํ วิปฺปริณามธมฺมํ ฯ |๓๘๘.๗๘๓| อทฺธา ๑- ทลิทฺทา จ ผุสนฺติ ผสฺสํ พาโล จ ธีโร จ ตเถว ผุฏฺโฐ พาโล หิ พาลฺยา วธิโตว เสติ @เชิงอรรถ: ๑ อฑฺฒาติปิ ฯ ธีโร จ น เวธติ ผสฺสผุฏฺโฐ ฯ |๓๘๘.๗๘๔| ตสฺมา หิ ปญฺญาว ธเนน เสยฺโย ยาย โวสานมิธาธิคจฺฉติ อโพฺยสิตตฺตา หิ ภวาภเวสุ ปาปานิ กมฺมานิ กโรนฺติ โมหา ฯ |๓๘๘.๗๘๕| อุเปติ คพฺภญฺจ ปรญฺจ โลกํ สํสารมาปชฺช ปรมฺปราย ตสฺสปฺปปญฺโญ อภิสทฺทหนฺโต อุเปติ คพฺภญฺจ ปรญฺจ โลกํ ฯ |๓๘๘.๗๘๖| โจโร ยถา สนฺธิมุเข คหีโต สกมฺมุนา หญฺญติ ปาปธมฺโม เอวํ ปชา เปจฺจ ปรมฺหิ โลเก สกมฺมุนา หญฺญติ ปาปธมฺโม ฯ |๓๘๘.๗๘๗| กามา หิ จิตฺรา มธุรา มโนรมา วิรูปรูเปน มเถนฺติ จิตฺตํ อาทีนวํ กามคุเณสุ ทิสฺวา ตสฺมา อหํ ปพฺพชิโตมฺหิ ราช ฯ |๓๘๘.๗๘๘| ทุมปฺผลานีว ปตนฺติ มาณวา ทหรา จ วุฑฺฒา จ สรีรเภทา เอตมฺปิ ทิสฺวา ปพฺพชิโตมฺหิ ราช อปณฺณกํ สามญฺญเมว เสยฺโย ฯ |๓๘๘.๗๘๙| สทฺธายาหํ ปพฺพชิโต อุเปโต ชินสาสเน อวชฺชา มยฺหํ ปพฺพชฺชา อนโณ ภุญฺชามิ โภชนํ ฯ |๓๘๘.๗๙๐| กาเม อาทิตฺตโต ทิสฺวา ชาตรูปานิ สตฺถโต คพฺเภ โวกฺกนฺติโต ทุกฺขํ นิรเยสุ มหพฺภยํ ฯ |๓๘๘.๗๙๑| เอตมาทีนวํ ทิสฺวา สํเวคํ อลภึ ตทา โสหํ วิทฺโธ ตทา สนฺโต สมฺปตฺโต อาสวกฺขยํ ฯ |๓๘๘.๗๙๒| ปริจิณฺโณ มยา สตฺถา กตํ พุทฺธสฺส สาสนํ โอหิโต ครุโก ภาโร ภวเนตฺติ สมูหตา ฯ |๓๘๘.๗๙๓| ยสฺส จตฺถาย ปพฺพชิโต อคารสฺมา อนคาริยํ โส เม อตฺโถ อนุปฺปตฺโต สพฺพสํโยชนกฺขโยติ ฯ รฏฺฐปาโล เถโร ฯ [๓๘๙] |๓๘๙.๗๙๔| ๕ รูปํ ทิสฺวา สติ มุฏฺฐา ปิยนิมิตฺตํ มนสิกโรโต สารตฺตจิตฺโต เวเทติ ตญฺจ อชฺโฌส ติฏฺฐติ ฯ |๓๘๙.๗๙๕| ตสฺส วฑฺฒนฺติ เวทนา อเนกา รูปสมฺภวา อภิชฺฌา จ วิเหสา จ จิตฺตมสฺสูปหญฺญติ เอวมาจินโต ทุกฺขํ อารา นิพฺพาน วุจฺจติ ฯ |๓๘๙.๗๙๖| สทฺทํ สุตฺวา สติ มุฏฺฐา ปิยนิมิตฺตํ มนสิกโรโต สารตฺตจิตฺโต เวเทติ ตญฺจ อชฺโฌส ติฏฺฐติ ฯ |๓๘๙.๗๙๗| ตสฺส วฑฺฒนฺติ เวทนา อเนกา สทฺทสมฺภวา อภิชฺฌา จ วิเหสา จ จิตฺตมสฺสูปหญฺญติ เอวมาจินโต ทุกฺขํ อารา นิพฺพาน วุจฺจติ ฯ |๓๘๙.๗๙๘| คนฺธํ ฆตฺวา สติ มุฏฺฐา ปิยนิมิตฺตํ มนสิกโรโต สารตฺตจิตฺโต เวเทติ ตญฺจ อชฺโฌส ติฏฺฐติ ฯ |๓๘๙.๗๙๙| ตสฺส วฑฺฒนฺติ เวทนา อเนกา คนฺธสมฺภวา อภิชฺฌา จ วิเหสา จ จิตฺตมสฺสูปหญฺญติ เอวมาจินโต ทุกฺขํ อารา นิพฺพาน วุจฺจติ ฯ |๓๘๙.๘๐๐| รสํ โภตฺวา สติ มุฏฺฐา ปิยนิมิตฺตํ มนสิกโรโต สารตฺตจิตฺโต เวเทติ ตญฺจ อชฺโฌส ติฏฺฐติ ฯ |๓๘๙.๘๐๑| ตสฺส วฑฺฒนฺติ เวทนา อเนกา รสสมฺภวา อภิชฺฌา จ วิเหสา จ จิตฺตมสฺสูปหญฺญติ เอวมาจินโต ทุกฺขํ อารา นิพฺพาน วุจฺจติ ฯ |๓๘๙.๘๐๒| ผสฺสํ ผุสฺส สติ มุฏฺฐา ปิยนิมิตฺตํ มนสิกโรโต สารตฺตจิตฺโต เวเทติ ตญฺจ อชฺโฌส ติฏฺฐติ ฯ |๓๘๙.๘๐๓| ตสฺส วฑฺฒนฺติ เวทนา อเนกา ผสฺสสมฺภวา อภิชฺฌา จ วิเหสา จ จิตฺตมสฺสูปหญฺญติ เอวมาจินโต ทุกฺขํ อารา นิพฺพาน วุจฺจติ ฯ |๓๘๙.๘๐๔| ธมฺมํ ญตฺวา สติ มุฏฺฐา ปิยนิมิตฺตํ มนสิกโรโต สารตฺตจิตฺโต เวเทติ ตญฺจ อชฺโฌส ติฏฺฐติ ฯ |๓๘๙.๘๐๕| ตสฺส วฑฺฒนฺติ เวทนา อเนกา ธมฺมสมฺภวา อภิชฺฌา จ วิเหสา จ จิตฺตมสฺสูปหญฺญติ เอวมาจินโต ทุกฺขํ อารา นิพฺพาน วุจฺจติ ฯ |๓๘๙.๘๐๖| น โส รชฺชติ รูเปสุ รูปํ ทิสฺวา ปติสฺสโต วิรตฺตจิตฺโต เวเทติ ตญฺจ นาชฺโฌส ๑- ติฏฺฐติ ฯ |๓๘๙.๘๐๗| ยถาสฺส ปสฺสโต รูปํ เสวโต วาปิ เวทนํ ขิยฺยติ โนปจิยฺยติ เอวํ โส จรตี สโต เอวํ อปจินโต ทุกฺขํ สนฺติเก นิพฺพาน วุจฺจติ ฯ |๓๘๙.๘๐๘| น โส รชฺชติ สทฺเทสุ สทฺทํ สุตฺวา ปติสฺสโต วิรตฺตจิตฺโต เวเทติ ตญฺจ นาชฺโฌส ติฏฺฐติ ฯ |๓๘๙.๘๐๙| ยถาสฺส สุณโต สทฺทํ เสวโต วาปิ เวทนํ ขิยฺยติ โนปจิยฺยติ เอวํ โส จรตี สโต เอวํ อปจินโต ทุกฺขํ สนฺติเก นิพฺพาน วุจฺจติ ฯ |๓๘๙.๘๑๐| น โส รชฺชติ คนฺเธสุ คนฺธํ ฆตฺวา ปติสฺสโต วิรตฺตจิตฺโต เวเทติ ตญฺจ นาชฺโฌส ติฏฺฐติ ฯ |๓๘๙.๘๑๑| ยถาสฺส ฆายโต คนฺธํ เสวโต วาปิ เวทนํ ขิยฺยติ โนปจิยฺยติ เอวํ โส จรตี สโต เอวํ อปจินโต ทุกฺขํ สนฺติเก นิพฺพาน วุจฺจติ ฯ @เชิงอรรถ: ๑ ยุ. นชฺโฌส ฯเปฯ ฯ |๓๘๙.๘๑๒| น โส รชฺชติ รเสสุ รสํ โภตฺวา ปติสฺสโต วิรตฺตจิตฺโต เวเทติ ตญฺจ นาชฺโฌส ติฏฺฐติ ฯ |๓๘๙.๘๑๓| ยถาสฺส สายโต รสํ เสวโต วาปิ เวทนํ ขิยฺยติ โนปจิยฺยติ เอวํ โส จรตี สโต เอวํ อปจินโต ทุกฺขํ สนฺติเก นิพฺพาน วุจฺจติ ฯ |๓๘๙.๘๑๔| น โส รชฺชติ ผสฺเสสุ ผสฺสํ ผุสฺส ปติสฺสโต วิรตฺตจิตฺโต เวเทติ ตญฺจ นาชฺโฌส ติฏฺฐติ ฯ |๓๘๙.๘๑๕| ยถาสฺส ผุสโต ผสฺสํ เสวโต วาปิ เวทนํ ขิยฺยติ โนปจิยฺยติ เอวํ โส จรตี สโต เอวํ อปจินโต ทุกฺขํ สนฺติเก นิพฺพาน วุจฺจติ ฯ |๓๘๙.๘๑๖| น โส รชฺชติ ธมฺเมสุ ธมฺมํ ญตฺวา ปติสฺสโต วิรตฺตจิตฺโต เวเทติ ตญฺจ นาชฺโฌส ติฏฺฐติ ฯ |๓๘๙.๘๑๗| ยถาสฺส วิชานโต ธมฺมํ เสวโต วาปิ เวทนํ ขิยฺยติ โนปจิยฺยติ เอวํ โส จรตี สโต เอวํ อปจินโต ทุกฺขํ สนฺติเก นิพฺพาน วุจฺจติ ฯ มาลุงฺกยปุตฺโต เถโร ฯ [๓๙๐] |๓๙๐.๘๑๘| ๖ ปริปุณฺณกาโย สุรุจิ สุชาโต จารุทสฺสโน สุวณฺณวณฺโณสิ ภควา สุสุกฺกทาโฐสิ วิริยวา ฯ |๓๙๐.๘๑๙| นรสฺส หิ สุชาตสฺส เย ภวนฺติ วิยญฺชนา สพฺเพ เต ตว กายสฺมึ มหาปุริสลกฺขณา ฯ |๓๙๐.๘๒๐| ปสนฺนเนตฺโต สุมุโข พฺรหา อุชุ ปตาปวา มชฺเฌ สมณสงฺฆสฺส อาทิจฺโจว วิโรจสิ ฯ |๓๙๐.๘๒๑| กลฺยาณทสฺสโน ภิกฺขุ กญฺจนสนฺนิภตฺตโจ กึ เต สมณภาเวน เอวํ อุตฺตมวณฺณิโน ฯ |๓๙๐.๘๒๒| ราชา อรหสิ ภวิตุํ จกฺกวตฺติ รเถสโภ จาตุรนฺโต วิชิตาวี ชมฺพุสณฺฑสฺส อิสฺสโร ฯ |๓๙๐.๘๒๓| ขตฺติยา โภชราชาโน อนุยนฺตา ภวนฺติ เต ราชาภิราชา มนุชินฺโท รชฺชํ กาเรหิ โคตม ฯ |๓๙๐.๘๒๔| ราชาหมสฺมิ เสลาติ (ภควา) ธมฺมราชา อนุตฺตโร ธมฺเมน จกฺกํ วตฺเตมิ จกฺกํ อปฺปฏิวตฺติยํ ฯ |๓๙๐.๘๒๕| สมฺพุทฺโธ ปฏิชานาสิ (อิติ เสโล พฺราหฺมโณ) ธมฺมราชา อนุตฺตโร ธมฺเมน จกฺกํ วตฺเตมิ อิติ ภาสสิ โคตม ฯ |๓๙๐.๘๒๖| โก นุ เสนาปติ โภโต สาวโก สตฺถุรนฺวโย โก อิมํ อนุวตฺเตติ ธมฺมจกฺกํ ปวตฺติตํ ฯ |๓๙๐.๘๒๗| มยา ปวตฺติตํ จกฺกํ (เสลาติ ภควา) ธมฺมจกฺกมนุตฺตรํ สารีปุตฺโตนุวตฺเตติ อนุชาโต ตถาคตํ ฯ |๓๙๐.๘๒๘| อภิญฺเญยฺยํ อภิญฺญาตํ ภาเวตพฺพญฺจ ภาวิตํ ปหาตพฺพํ ปหีนํ เม ตสฺมา พุทฺโธสฺมิ พฺราหฺมณ ฯ |๓๙๐.๘๒๙| วินยสฺสุ มยิ กงฺขํ อธิมุจฺจสฺสุ พฺราหฺมณ ทุลฺลภํ ทสฺสนํ โหติ สมฺพุทฺธานํ อภิณฺหโส ฯ |๓๙๐.๘๓๐| เยสํ เว ทุลฺลโภ โลเก ปาตุภาโว อภิณฺหโส โสหํ พฺราหฺมณ พุทฺโธสฺมิ สลฺลกตฺโต อนุตฺตโร ฯ |๓๙๐.๘๓๑| พฺรหฺมภูโต อติตุโล มารเสนปฺปมทฺทโน สพฺพามิตฺเต วสีกตฺวา โมทามิ อกุโตภโย ฯ |๓๙๐.๘๓๒| อิทํ โภนฺโต นิสาเมถ ยถา ภาสติ จกฺขุมา สลฺลกตฺโต มหาวีโร สีโหว นทตี วเน ฯ |๓๙๐.๘๓๓| พฺรหฺมภูตํ อติตุลํ มารเสนปฺปมทฺทนํ โก ทิสฺวา นปฺปสีเทยฺย อปิ กณฺหาภิชาติโก ฯ |๓๙๐.๘๓๔| โย มํ อิจฺฉติ อเนฺวตุ โย วา นิจฺฉติ คจฺฉตุ อิธาหํ ปพฺพชิสฺสามิ วรปญฺญสฺส สนฺติเก ฯ |๓๙๐.๘๓๕| เอตญฺเจ รุจฺจตี โภโต สมฺมาสมฺพุทฺธสาสนํ มยมฺปิ ปพฺพชิสฺสาม วรปญฺญสฺส สนฺติเก ฯ |๓๙๐.๘๓๖| พฺราหฺมณา ติสตา อิเม ยาจนฺติ ปญฺชลีกตา พฺรหฺมจริยํ จริสฺสาม ภควา ตว สนฺติเก ฯ |๓๙๐.๘๓๗| สฺวากฺขาตํ พฺรหฺมจริยํ (เสลาติ ภควา) สนฺทิฏฺฐิกมกาลิกํ ยตฺถ อโมฆา ปพฺพชฺชา อปฺปมตฺตสฺส สิกฺขโต ฯ |๓๙๐.๘๓๘| ยนฺตํ สรณมาคมฺม อิโต อฏฺฐมิ ๑- จกฺขุม สตฺตรตฺเตน ภควา ทนฺตมฺห ตว สาสเน ฯ @เชิงอรรถ: ๑ ม. อฏฺฐเม ฯ |๓๙๐.๘๓๙| ตุวํ พุทฺโธ ตุวํ สตฺถา ตุวํ มาราภิภู มุนิ ตุวํ อนุสเย เฉตฺวา ติณฺโณ ตาเรสิมํ ปชํ ฯ |๓๙๐.๘๔๐| อุปธี เต สมติกฺกนฺตา อาสวา เต ปทาลิตา สีโหว อนุปาทาโน ปหีนภยเภรโว ฯ |๓๙๐.๘๔๑| ภิกฺขโว ติสตา อิเม ติฏฺฐนฺตี ปญฺชลีกตา ปาเท วีร ปสาเรหิ นาคา วนฺทนฺตุ สตฺถุโนติ ฯ เสโล เถโร ฯ [๓๙๑] |๓๙๑.๘๔๒| ๗ ยา ตํ เม หตฺถิคีวาย สุขุมา วตฺถา ปธาริตา สาลีนํ โอทโน ภุตฺโต สุจิมํสูปเสจโน ฯ |๓๙๑.๘๔๓| โสชฺช ภทฺโท สาตติโก อุญฺฉาปตฺตาคเต รโต ฌายติ อนุปาทาโน ปุตฺโต โคธาย ภทฺทิโย ฯ |๓๙๑.๘๔๔| ปํสุกูลี สาตติโก อุญฺฉาปตฺตาคเต รโต ฌายติ อนุปาทาโน ปุตฺโต โคธาย ภทฺทิโย ฯ |๓๙๑.๘๔๕| ปิณฺฑปาตี สาตติโก ................. |๓๙๑.๘๔๖| เตจีวรี สาตติโก ................. |๓๙๑.๘๔๗| สปทานจารี สาตติโก ................. |๓๙๑.๘๔๘| เอกาสนี สาตติโก ................. |๓๙๑.๘๔๙| ปตฺตปิณฺฑี สาตติโก ................. |๓๙๑.๘๕๐| ขลุปจฺฉาภตฺตี สาตติโก ................. |๓๙๑.๘๕๑| อารญฺญิโก สาตติโก ................. |๓๙๑.๘๕๒| รุกฺขมูลิโก สาตติโก ................. |๓๙๑.๘๕๓| อพฺโภกาสี สาตติโก ................. |๓๙๑.๘๕๔| โสสานิโก สาตติโก ................. |๓๙๑.๘๕๕| ยถาสนฺถติโก สาตติโก ................. |๓๙๑.๘๕๖| เนสชฺชิโก สาตติโก ................. |๓๙๑.๘๕๗| อปฺปิจฺโฉ สาตติโก ................. |๓๙๑.๘๕๘| สนฺตุฏฺโฐ สาตติโก ................. |๓๙๑.๘๕๙| ปวิวิตฺโต สาตติโก ................. |๓๙๑.๘๖๐| อสํสฏฺโฐ สาตติโก ................. |๓๙๑.๘๖๑| อารทฺธวิริโย สาตติโก อุญฺฉาปตฺตาคเต รโต ฌายติ อนุปาทาโน ปุตฺโต โคธาย ภทฺทิโย ฯ |๓๙๑.๘๖๒| หิตฺวา สตปลํ กํสํ โสวณฺณํ สตราชิกํ อคฺคหึ มตฺติกาปตฺตํ อิทํ ทุติยาภิเสจนํ ฯ |๓๙๑.๘๖๓| อุจฺเจ มณฺฑลิปากาเร ทฬฺหมฏฺฏาลโกฏฺฐเก รกฺขิโต ขคฺคหตฺเถหิ อุตฺตสํ วิหรึ ปุเร ฯ |๓๙๑.๘๖๔| โสชฺช ภทฺโท อนุตฺราสี ปหีนภยเภรโว ฌายติ วนโมคยฺห ปุตฺโต โคธาย ภทฺทิโย ฯ |๓๙๑.๘๖๕| สีลกฺขนฺเธ ปติฏฺฐาย สตึ ปญฺญญฺจ ภาวยํ ปาปุณึ อนุปุพฺเพน สพฺพสํโยชนกฺขยนฺติ ฯ ภทฺทิโย กาลิโคธาย ปุตฺโต เถโร ฯ [๓๙๒] |๓๙๒.๘๖๖| ๘ คจฺฉํ วเทสิ สมณ ฐิโตมฺหิ มมญฺจ พฺรูสิ ฐิตมฏฺฐิโตติ ปุจฺฉามิ ตํ สมณ เอตมตฺถํ กสฺมา ฐิโต ตฺวํ อหมฏฺฐิโตมฺหิ ฯ |๓๙๒.๘๖๗| ฐิโต อหํ องฺคุลิมาล สพฺพทา สพฺเพสุ ภูเตสุ นิธาย ทณฺฑํ ตุวญฺจ ปาเณสุ อสญฺญโตสิ ตสฺมา ฐิโตหํ ตุวมฏฺฐิโตสิ ฯ |๓๙๒.๘๖๘| จิรสฺสํ วต เม มหิโต มเหสิ มหาวนํ สมโณ ปจฺจุปาทิ โสหํ จชิสฺสามิ สหสฺสปาปํ สุตฺวาน คาถํ ตว ธมฺมยุตฺตํ ฯ |๓๙๒.๘๖๙| อิจฺเจว โจโร อสิมาวุธญฺจ โสพฺเภ ปปาเต นรเก อนฺวกาสิ อวนฺทิ โจโร สุคตสฺส ปาเท ตตฺเถว ปพฺพชฺชมยาจิ พุทฺธํ ฯ |๓๙๒.๘๗๐| พุทฺโธ จ โข การุณิโก มเหสิ โย สตฺถา โลกสฺส สเทวกสฺส ตเมหิ ภิกฺขูติ ตทา อโวจ เอเสว ตสฺส อหุ ภิกฺขุภาโว ฯ |๓๙๒.๘๗๑| โย จ ปุพฺเพ ปมชฺชิตฺวา ๑- ปจฺฉา โส นปฺปมชฺชติ โสมํ โลกํ ปภาเสติ อพฺภา มุตฺโตว จนฺทิมา ฯ |๓๙๒.๘๗๒| ยสฺส ปาปํ กตํ กมฺมํ กุสเลน ปิถียติ โสมํ โลกํ ปภาเสติ อพฺภา มุตฺโตว จนฺทิมา ฯ |๓๙๒.๘๗๓| โย หเว ทหโร ภิกฺขุ ยุญฺชตี พุทฺธสาสเน โสมํ โลกํ ปภาเสติ อพฺภา มุตฺโตว จนฺทิมา ฯ |๓๙๒.๘๗๔| ทิสา หิ เม ธมฺมกถํ สุณนฺตุ ทิสา หิ เม ยุญฺชนฺตุ พุทฺธสาสเน จ ๒- ทิสา หิ เม เต มนุสฺเส ภชนฺตุ เย ธมฺมเมวาทปยนฺติ สนฺโต ฯ |๓๙๒.๘๗๕| ทิสา หิ เม ขนฺติวาทานํ อวิโรธปฺปสํสินํ สุณนฺตุ ธมฺมํ กาเลน ตญฺจ อนุวิธียนฺตุ ฯ |๓๙๒.๘๗๖| น หิ ชาตุ โส มมํ หึเส อญฺญํ วา ปน กญฺจินํ ๓- ปปฺปุยฺย ปรมํ สนฺตึ รกฺเขยฺย ตสถาวเร ฯ |๓๙๒.๘๗๗| อุทกํ หิ นยนฺติ เนตฺติกา อุสุการา นมยนฺติ เตชนํ ทารุํ นมยนฺติ ตจฺฉกา อตฺตานํ ทมยนฺติ ปณฺฑิตา ฯ |๓๙๒.๘๗๘| ทณฺเฑเนเก ทมยนฺติ องฺกุเสหิ กสาหิ จ อทณฺเฑน อสตฺเถน อหํ ทนฺโตมฺหิ ตาทินา ฯ @เชิงอรรถ: ๑ ยุ. โย ปุพฺเพ ปมชฺชิตฺวาน ฯ ๒ ม. ยุ. จสทฺโท นตฺถิ ฯ ๓ โป ม. กิญฺจนํ ฯ |๓๙๒.๘๗๙| อหึสโกติ เม นามํ หึสกสฺส ปุเร สโต อชฺชาหํ สจฺจนาโมมฺหิ น นํ หึสามิ กญฺจินํ ฯ |๓๙๒.๘๘๐| โจโร อหํ ปุเร อาสึ องฺคุลิมาโลติ วิสฺสุโต วุยฺหมาโน มโหเฆน พุทฺธํ สรณมาคมํ ฯ |๓๙๒.๘๘๑| โลหิตปาณี ปุเร อาสึ องฺคุลิมาโลติ วิสฺสุโต สรณาคมนํ ปสฺส ภวเนตฺติ สมูหตา ฯ |๓๙๒.๘๘๒| ตาทิสํ กมฺมํ กตฺวาน พหุํ ทุคฺคติคามินํ ผุฏฺโฐ กมฺมวิปาเกน อนโณ ภุญฺชามิ โภชนํ ฯ |๓๙๒.๘๘๓| ปมาทมนุยุญฺชนฺติ พาลา ทุมฺเมธิโน ชนา อปฺปมาทญฺจ เมธาวี ธนํ เสฏฺฐํว รกฺขติ ฯ |๓๙๒.๘๘๔| มา ปมาทมนุยุญฺเชถ มา กามรติสนฺถวํ อปฺปมตฺโต หิ ฌายนฺโต ปปฺโปติ ปรมํ สุขํ ฯ |๓๙๒.๘๘๕| สฺวาคตํ นาปคตํ เนตํ ทุมฺมนฺติตํ มม สํวิภตฺเตสุ ธมฺเมสุ ยํ เสฏฺฐํ ตทุปาคมํ ฯ |๓๙๒.๘๘๖| สฺวาคตํ นาปคตํ เนตํ ทุมฺมนฺติตํ มม ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ |๓๙๒.๘๘๗| อรญฺเญ รุกฺขมูเล วา ปพฺพเตสุ คุหาสุ วา ตตฺถ ตตฺเถว อฏฺฐาสึ อุพฺพิคฺคมนโส ตทา ฯ |๓๙๒.๘๘๘| สุขํ สยามิ ฐายามิ สุขํ กปฺเปมิ ชีวิตํ อหตฺถปาโส มารสฺส อโห สตฺถานุกมฺปิโต ฯ |๓๙๒.๘๘๙| พฺรหฺมชจฺโจ ปุเร อาสึ อุทิจฺโจ อุภโต อหุํ ๑- โสชฺช ปุตฺโต สุคตสฺส ธมฺมราชสฺส สตฺถุโน ฯ |๓๙๒.๘๙๐| วีตตโณฺห อนาทาโน คุตฺตทฺวาโร สุสํวุโต อฆมูลํ วธิตฺวาน ๒- ปตฺโต เม อาสวกฺขโย ฯ |๓๙๒.๘๙๑| ปริจิณฺโณ มยา สตฺถา กตํ พุทฺธสฺส สาสนํ โอหิโต ครุโก ภาโร ภวเนตฺติ สมูหตาติ ฯ องฺคุลิมาโล เถโร ฯ [๓๙๓] |๓๙๓.๘๙๒| ๙ ปหาย มาตาปิตโร ภคินีญาติภาตโร ปญฺจ กามคุเณ หิตฺวา อนุรุทฺโธว ฌายติ ฯ |๓๙๓.๘๙๓| สเมโต นจฺจคีเตหิ สมฺมตาฬปฺปโพธโน น เตน สุทฺธิมชฺฌคมา มารสฺส วิสเย รโต ฯ |๓๙๓.๘๙๔| เอตญฺจ สมติกฺกมฺม รโต พุทฺธสฺส สาสเน สพฺโพฆํ สมติกฺกมฺม อนุรุทฺโธว ฌายติ ฯ |๓๙๓.๘๙๕| รูปา สทฺทา รสา คนฺธา โผฏฺฐพฺพา จ มโนรมา เอเต จ สมติกฺกมฺม อนุรุทฺโธว ฌายติ ฯ |๓๙๓.๘๙๖| ปิณฺฑปาตปฏิกฺกนฺโต เอโก อทุติโย มุนิ เอสติ ปํสุกูลานิ อนุรุทฺโธ อนาสโว ฯ |๓๙๓.๘๙๗| วิจินิ ๓- อคฺคหี โธวิ รชยี ธารยี มุนิ ปํสุกูลานิ มติมา อนุรุทฺโธ อนาสโว ฯ @เชิงอรรถ: ๑ ม. อหุ ฯ ๒ ยุ. วมิตฺวาน ฯ ๓ ม. วิจินี ฯ |๓๙๓.๘๙๘| มหิจฺโฉ จ อสนฺตุฏฺโฐ สํสฏฺโฐ โย จ อุทฺธโต ตสฺส ธมฺมา อิเม โหนฺติ ปาปกา สงฺกิเลสิกา ฯ |๓๙๓.๘๙๙| สโต จ โหติ อปฺปิจฺโฉ สนฺตุฏฺโฐ อวิฆาตวา ปวิเวกรโต วิตฺโต นิจฺจมารทฺธวีริโย ฯ |๓๙๓.๙๐๐| ตสฺส ธมฺมา อิเม โหนฺติ กุสลา โพธิปกฺขิกา อนาสโว จ โส โหติ อิติ วุตฺตํ มเหสินา ฯ |๓๙๓.๙๐๑| มม สงฺกปฺปมญฺญาย สตฺถา โลเก อนุตฺตโร มโนมเยน กาเยน อิทฺธิยา อุปสงฺกมิ ฯ |๓๙๓.๙๐๒| ยทา เม อหุ สงฺกปฺโป ตโต อุตฺตรึ ๑- เทสยิ นิปฺปปญฺจรโต พุทฺโธ นิปฺปปญฺจมเทสยิ ฯ |๓๙๓.๙๐๓| ตสฺสาหํ ธมฺมมญฺญาย วิหาสึ สาสเน รโต ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ |๓๙๓.๙๐๔| ปญฺจปญฺญาส วสฺสานิ ยโต เนสชฺชิโก อหํ ปญฺจวีสติ วสฺสานิ ยโต มิทฺธํ สมูหตํ ฯ |๓๙๓.๙๐๕| นาหุ อสฺสาสปสฺสาโส ฐิตจิตฺตสฺส ตาทิโน อเนโช สนฺติมารพฺภ จกฺขุมา ปรินิพฺพุโต ฯ |๓๙๓.๙๐๖| อสลฺลีเนน จิตฺเตน เวทนํ อชฺฌวาสยิ ปชฺโชตสฺเสว นิพฺพานํ วิโมกฺโข เจตโส อหุ ฯ |๓๙๓.๙๐๗| เอเต ปจฺฉิมกา ทานิ มุนิโน ผสฺสปญฺจมา @เชิงอรรถ: ๑ ม. ยุ. อุตฺตริ ฯ นาญฺเญ ธมฺมา ภวิสฺสนฺติ สมฺพุทฺเธ ปรินิพฺพุเต ฯ |๓๙๓.๙๐๘| นตฺถิ ทานิ ปุนาวาโส เทวกายสฺมึ ๑- ชาลินิ วิกฺขีโณ ชาติสํสาโร นตฺถิ ทานิ ปุนพฺภโว ฯ |๓๙๓.๙๐๙| ยสฺส มุหุตฺเตน สหสฺสธา โลโก สํวิทิโต สพฺรหฺมกปฺโป วสี อิทฺธิคุเณ จุตูปปาเต กาเล ปสฺสติ เทวตา ส ภิกฺขุ ฯ |๓๙๓.๙๑๐| อนฺนภาโร ปุเร อาสึ ทลิทฺโท ฆาสหารโก สมณํ ปฏิปาเทสึ อุปริฏฺฐํ ยสสฺสินํ ฯ |๓๙๓.๙๑๑| โสมฺหิ สกฺยกุเล ชาโต อนุรุทฺโธติ มํ วิทู อุเปโต นจฺจคีเตหิ สมฺมตาฬปฺปโพธโน ฯ |๓๙๓.๙๑๒| อถทฺทสาสึ สมฺพุทฺธํ สตฺถารํ อกุโตภยํ ตสฺมึ จิตฺตํ ปสาเทตฺวา ปพฺพชึ อนคาริยํ ฯ |๓๙๓.๙๑๓| ปุพฺเพนิวาสํ ชานามิ ยตฺถ เม วุสิตํ ปุเร ตาวตึเสสุ เทเวสุ อฏฺฐาสึ สกฺกชาติยา ฯ |๓๙๓.๙๑๔| สตฺตกฺขตฺตุํ มนุสฺสินฺโท อหํ รชฺชมการยึ จาตุรนฺโต วิชิตาวี ชมฺพุสณฺฑสฺส อิสฺสโร อทณฺเฑน อสตฺเถน ธมฺเมน อนุสาสยึ ฯ |๓๙๓.๙๑๕| อิโต สตฺต อิโต สตฺต สํสารานิ จตุทฺทส นิวาสมภิชานิสฺสํ เทวโลเก ฐิโต ตทา ฯ @เชิงอรรถ: ๑ ม. ยุ. เทวกายสฺมิ ฯ |๓๙๓.๙๑๖| ปญฺจงฺคิเก สมาธิมฺหิ สนฺเต เอโกทิภาวิเต ปฏิปฺปสฺสทฺธิลทฺธมฺหิ ทิพฺพจกฺขุํ วิสุชฺฌิ เม ฯ |๓๙๓.๙๑๗| จุตูปปาตํ ชานามิ สตฺตานํ อาคตึ คตึ อิตฺถภาวญฺญถาภาวํ ฌาเน ปญฺจงฺคิเก ฐิโต ฯ |๓๙๓.๙๑๘| ปริจิณฺโณ มยา สตฺถา ฯเปฯ ภวเนตฺติ สมูหตา ฯ |๓๙๓.๙๑๙| วชฺชีนํ เวฬุวคาเม อหํ ชีวิตสงฺขยา เหฏฺฐโต เวฬุคุมฺพสฺมึ นิพฺพายิสฺสํ อนาสโวติ ฯ อนุรุทฺโธ เถโร ฯ
เนื้อความพระไตรปิฎกฉบับภาษาบาลีอักษรไทย เล่มที่ ๒๖ หน้าที่ ๓๖๓-๓๙๔. https://84000.org/tipitaka/read/pali_item.php?book=26&item=382&items=12 อ่านโดยใช้เครื่องหมาย [เลขข้อ] เป็นเกณฑ์แบ่งข้อ :- https://84000.org/tipitaka/read/pali_item.php?book=26&item=382&items=12&mode=bracket อ่านเทียบพระไตรปิฎกฉบับภาษาบาลีอักษรโรมัน :- https://84000.org/tipitaka/read/roman_item.php?book=26&item=382&items=12 อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=26&item=382&items=12 ศึกษาอรรถกถานี้ได้ที่ :- https://84000.org/tipitaka/attha/attha.php?b=26&i=382 สารบัญพระไตรปิฎกเล่มที่ ๒๖ https://84000.org/tipitaka/read/?index_26 https://84000.org/tipitaka/english/?index_26
|
บันทึก ๒ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]