พระไตรปิฎกเล่มที่ ๕ ภาษาบาลี อักษรไทย
พระวินัยปิฎกเล่มที่ ๕ วินย. มหาวคฺโค (๒)

     [๑๑]   อถโข   ภควา   ราชคเห   ยถาภิรนฺตํ  วิหริตฺวา  เยน
พาราณสี    เตน    จาริกํ   ปกฺกามิ   อนุปุพฺเพน   จาริกํ   จรมาโน
เยน   พาราณสี   ตทวสริ   ฯ   ตตฺร  สุทํ  ภควา  พาราณสิยํ  วิหรติ
อิสิปตเน   มิคทาเย   ฯ   เตน   โข  ปน  สมเยน  ฉพฺพคฺคิยา  ภิกฺขู
ภควตา     กฏฺฐปาทุกา     ปฏิกฺขิตฺตาติ    ตาลตรุเณ    เฉทาเปตฺวา
ตาลปตฺตปาทุกาโย   ธาเรนฺติ  ตานิ  ตาลตรุณานิ  ฉินฺนานิ  มิลายนฺติ  ฯ
มนุสฺสา    อุชฺฌายนฺติ   ขียนฺติ   วิปาเจนฺติ   กถํ   หิ   นาม   สมณา
---------------------------------------------------------------------------------------------
หน้าที่ ๒๐.
สกฺยปุตฺติยา      ตาลตรุเณ      เฉทาเปตฺวา      ตาลปตฺตปาทุกาโย
ธาเรสฺสนฺติ   [๑]-  ตาลตรุณานิ  ฉินฺนานิ  มิลายนฺติ  เอกินฺทฺริยํ  สมณา
สกฺยปุตฺติยา   ชีวํ  วิเหเฐนฺตีติ  ฯ  อสฺโสสุํ  โข  ภิกฺขู  เตสํ  มนุสฺสานํ
อุชฺฌายนฺตานํ ขียนฺตานํ วิปาเจนฺตานํ ฯ
     {๑๑.๑}   อถโข  เต  ภิกฺขู  ภควโต  เอตมตฺถํ อาโรเจสุํ ฯ สจฺจํ
กิร     ภิกฺขเว     ฉพฺพคฺคิยา    ภิกฺขู    ตาลตรุเณ    เฉทาเปตฺวา
ตาลปตฺตปาทุกาโย     ธาเรนฺติ     ตานิ     ตาลตรุณานิ     ฉินฺนานิ
มิลายนฺตีติ  ฯ  สจฺจํ  ภควาติ  ฯ  วิครหิ  พุทฺโธ  ภควา  กถํ  หิ  นาม
เต   ภิกฺขเว   โมฆปุริสา  ตาลตรุเณ  เฉทาเปตฺวา  ตาลปตฺตปาทุกาโย
ธาเรสฺสนฺติ    ตานิ    ตาลตรุณานิ    ฉินฺนานิ   มิลายนฺติ   ชีวสญฺญิโน
หิ   ภิกฺขเว   มนุสฺสา   รุกฺขสฺมึ   เนตํ   ภิกฺขเว   อปฺปสนฺนานํ   วา
ปสาทาย   ฯเปฯ   วิครหิตฺวา   ธมฺมึ   กถํ   กตฺวา  ภิกฺขู  อามนฺเตสิ
น   ภิกฺขเว   ตาลปตฺตปาทุกา   ธาเรตพฺพา   โย   ธาเรยฺย  อาปตฺติ
ทุกฺกฏสฺสาติ ฯ
     {๑๑.๒}   เตน   โข   ปน  สมเยน  ฉพฺพคฺคิยา  ภิกฺขู  ภควตา
ตาลปตฺตปาทุกา       ปฏิกฺขิตฺตาติ       เวฬุตรุเณ      เฉทาเปตฺวา
เวฬุปตฺตปาทุกาโย     ธาเรนฺติ     ตานิ     เวฬุตรุณานิ     ฉินฺนานิ
มิลายนฺติ    ฯ   มนุสฺสา   อุชฺฌายนฺติ   ขียนฺติ   วิปาเจนฺติ   กถํ   หิ
นาม      สมณา      สกฺยปุตฺติยา      เวฬุตรุเณ      เฉทาเปตฺวา
เวฬุปตฺตปาทุกาโย        ธาเรสฺสนฺติ        ตานิ       เวฬุตรุณานิ
ฉินฺนานิ     มิลายนฺติ     เอกินฺทฺริยํ     สมณา    สกฺยปุตฺติยา    ชีวํ
วิเหเฐนฺตีติ   ฯ   อสฺโสสุํ   โข   ภิกฺขู  เตสํ  มนุสฺสานํ  อุชฺฌายนฺตานํ
@เชิงอรรถ: ๑ ม. ยุ. ตานิ ฯ
---------------------------------------------------------------------------------------------
หน้าที่ ๒๑.
ขียนฺตานํ   วิปาเจนฺตานํ   ฯ   อถโข   เต   ภิกฺขู  ภควโต  เอตมตฺถํ
อาโรเจสุํ   ฯเปฯ   น   ภิกฺขเว   เวฬุปตฺตปาทุกา   ธาเรตพฺพา  โย
ธาเรยฺย อาปตฺติ ทุกฺกฏสฺสาติ ฯ
     [๑๒]   อถโข   ภควา   พาราณสิยํ  ยถาภิรนฺตํ  วิหริตฺวา  เยน
ภทฺทิยํ    เตน    จาริกํ    ปกฺกามิ    อนุปุพฺเพน   จาริกํ   จรมาโน
เยน   ภทฺทิยํ   ตทวสริ   ฯ   ตตฺร   สุทํ   ภควา   ภทฺทิเย   วิหรติ
ชาติยาวเน   ฯ   เตน   โข  ปน  สมเยน  ภทฺทิยา  ภิกฺขู  อเนกวิหิตํ
ปาทุกมณฺฑนานุโยคมนุยุตฺตา       วิหรนฺติ      ติณปาทุกํ      กโรนฺติปิ
การาเปนฺติปิ    มุญฺชปาทุกํ    กโรนฺติปิ    การาเปนฺติปิ    ปพฺพชปาทุกํ
กโรนฺติปิ    การาเปนฺติปิ    หินฺตาลปาทุกํ    กโรนฺติปิ    การาเปนฺติปิ
กมลปาทุกํ     กโรนฺติปิ     การาเปนฺติปิ     กมฺพลปาทุกํ    กโรนฺติปิ
การาเปนฺติปิ     ริญฺจนฺติ     อุทฺเทสํ    ปริปุจฺฉํ    อธิสีลํ    อธิจิตฺตํ
อธิปญฺญํ ฯ
     {๑๒.๑}   เย  เต  ภิกฺขู  อปฺปิจฺฉา  ฯเปฯ  เต อุชฺฌายนฺติ ขียนฺติ
วิปาเจนฺติ   กถํ   หิ  นาม  ภทฺทิยา  ภิกฺขู  อเนกวิหิตํ  ปาทุกมณฺฑนานุ-
โยคมนุยุตฺตา    วิหริสฺสนฺติ    ติณปาทุกํ   กริสฺสนฺติปิ   การาเปสฺสนฺติปิ
มุญฺชปาทุกํ    กริสฺสนฺติปิ    การาเปสฺสนฺติปิ    ปพฺพชปาทุกํ   กริสฺสนฺติปิ
การาเปสฺสนฺติปิ      หินฺตาลปาทุกํ      กริสฺสนฺติปิ     การาเปสฺสนฺติปิ
กมลปาทุกํ        กริสฺสนฺติปิ       การาเปสฺสนฺติปิ       กมฺพลปาทุกํ
กริสฺสนฺติปิ         การาเปสฺสนฺติปิ        ริญฺจิสฺสนฺติ        อุทฺเทสํ
ปริปุจฺฉํ    อธิสีลํ    อธิจิตฺตํ    อธิปญฺญนฺติ   ฯ   อถโข   เต   ภิกฺขู
---------------------------------------------------------------------------------------------
หน้าที่ ๒๒.
ภควโต   เอตมตฺถํ   อาโรเจสุํ  ฯ  สจฺจํ  กิร  ภิกฺขเว  ภทฺทิยา  ภิกฺขู
อเนกวิหิตํ      ปาทุกมณฺฑนานุโยคมนุยุตฺตา      วิหรนฺติ      ติณปาทุกํ
กโรนฺติปิ     การาเปนฺติปิ     มุญฺชปาทุกํ    กโรนฺติปิ    การาเปนฺติปิ
ปพฺพชปาทุกํ     กโรนฺติปิ    การาเปนฺติปิ    หินฺตาลปาทุกํ    กโรนฺติปิ
การาเปนฺติปิ    กมลปาทุกํ    กโรนฺติปิ    การาเปนฺติปิ    กมฺพลปาทุกํ
กโรนฺติปิ   การาเปนฺติปิ   ริญฺจนฺติ   อุทฺเทสํ   ปริปุจฺฉํ  อธิสีลํ  อธิจิตฺตํ
อธิปญฺญนฺติ ฯ สจฺจํ ภควาติ ฯ
     {๑๒.๒}   วิครหิ  พุทฺโธ  ภควา กถํ หิ นาม เต ภิกฺขเว โมฆปุริสา
อเนกวิหิตํ      ปาทุกมณฺฑนานุโยคมนุยุตฺตา     วิหริสฺสนฺติ     ติณปาทุกํ
กริสฺสนฺติปิ   การาเปสฺสนฺติปิ   มุญฺชปาทุกํ   กริสฺสนฺติปิ   การาเปสฺสนฺติปิ
ปพฺพชปาทุกํ    กริสฺสนฺติปิ   การาเปสฺสนฺติปิ   หินฺตาลปาทุกํ   กริสฺสนฺติปิ
การาเปสฺสนฺติปิ       กมลปาทุกํ      กริสฺสนฺติปิ      การาเปสฺสนฺติปิ
กมฺพลปาทุกํ     กริสฺสนฺติปิ    การาเปสฺสนฺติปิ    ริญฺจิสฺสนฺติ    อุทฺเทสํ
ปริปุจฺฉํ   อธิสีลํ   อธิจิตฺตํ   อธิปญฺญํ   เนตํ  ภิกฺขเว  อปฺปสนฺนานํ  วา
ปสาทาย   ฯเปฯ   วิครหิตฺวา  ธมฺมึ  กถํ  กตฺวา  ภิกฺขู  อามนฺเตสิ  น
ภิกฺขเว   ติณปาทุกา   ธาเรตพฺพา   น   มุญฺชปาทุกา   ธาเรตพฺพา  น
ปพฺพชปาทุกา    ธาเรตพฺพา    น    หินฺตาลปาทุกา   ธาเรตพฺพา   น
กมลปาทุกา    ธาเรตพฺพา    น    กมฺพลปาทุกา    ธาเรตพฺพา    น
โสวณฺณมยา   ปาทุกา   ธาเรตพฺพา  น  รูปิยมยา  ปาทุกา  ธาเรตพฺพา
น  มณิมยา  ปาทุกา  ธาเรตพฺพา  น  เวฬุริยมยา  ปาทุกา  ธาเรตพฺพา
---------------------------------------------------------------------------------------------
หน้าที่ ๒๓.
น   ผลิกมยา   ปาทุกา  ธาเรตพฺพา  น  กํสมยา  ปาทุกา  ธาเรตพฺพา
น   กาจมยา   ปาทุกา  ธาเรตพฺพา  น  ติปุมยา  ปาทุกา  ธาเรตพฺพา
น    สีสมยา    ปาทุกา    ธาเรตพฺพา   น   ตมฺพโลหมยา   ปาทุกา
ธาเรตพฺพา   โย   ธาเรยฺย   อาปตฺติ   ทุกฺกฏสฺส   น   จ   ภิกฺขเว
กาจิ    สงฺกมนียา   ปาทุกา   ธาเรตพฺพา   โย   ธาเรยฺย   อาปตฺติ
ทุกฺกฏสฺส    อนุชานามิ    ภิกฺขเว    ติสฺโส   ปาทุกาโย   ธุวฏฺฐานิยา
อสงฺกมนียาโย วจฺจปาทุกํ ปสฺสาวปาทุกํ อาจมนปาทุกนฺติ ฯ
     [๑๓]   อถโข   ภควา   ภทฺทิเย   ยถาภิรนฺตํ   วิหริตฺวา  เยน
สาวตฺถี    เตน    จาริกํ    ปกฺกามิ   อนุปุพฺเพน   จาริกํ   จรมาโน
เยน   สาวตฺถี   ตทวสริ   ฯ   ตตฺร   สุทํ   ภควา  สาวตฺถิยํ  วิหรติ
เชตวเน   อนาถปิณฺฑิกสฺส   อาราเม   ฯ   เตน   โข   ปน  สมเยน
ฉพฺพคฺคิยา   ภิกฺขู   อจิรวติยา   นทิยา   คาวีนํ   ตรนฺตีนํ   วิสาเณสุปิ
คณฺหนฺติ    กณฺเณสุปิ    คณฺหนฺติ   คีวายปิ   คณฺหนฺติ   เฉปฺปายปิ   ๑-
คณฺหนฺติ   ปิฏฺฐึปิ   อภิรูหนฺติ   รตฺตจิตฺตาปิ   องฺคชาตํ  ฉุปนฺติ  วจฺฉตรีปิ
โอคาเหตฺวา   มาเรนฺติ   ฯ   มนุสฺสา   อุชฺฌายนฺติ  ขียนฺติ  วิปาเจนฺติ
กถํ   หิ   นาม   สมณา   สกฺยปุตฺติยา   คาวีนํ   ตรนฺตีนํ   วิสาเณสุปิ
คเหสฺสนฺติ    กณฺเณสุปิ   คเหสฺสนฺติ   คีวายปิ   คเหสฺสนฺติ   เฉปฺปายปิ
คเหสฺสนฺติ      ปิฏฺฐึปิ      อภิรูหิสฺสนฺติ     รตฺตจิตฺตาปิ     องฺคชาตํ
ฉุปิสฺสนฺติ    วจฺฉตรีปิ    โอคาเหตฺวา   มาเรสฺสนฺติ   เสยฺยถาปิ   คิหี
กามโภคิโนติ   ฯ   อสฺโสสุํ   โข  ภิกฺขู  เตสํ  มนุสฺสานํ  อุชฺฌายนฺตานํ
@เชิงอรรถ: ๑ ม. เฉปฺเปติ ฯ
---------------------------------------------------------------------------------------------
หน้าที่ ๒๔.
ขียนฺตานํ   วิปาเจนฺตานํ   ฯ   อถโข   เต   ภิกฺขู  ภควโต  เอตมตฺถํ
อาโรเจสุํ   ฯ   น   ภิกฺขเว  คาวีนํ  วิสาเณสุ  คเหตพฺพํ  น  กณฺเณสุ
คเหตพฺพํ   น   คีวาย   คเหตพฺพํ   น   เฉปฺปาย  คเหตพฺพํ  น  ปิฏฺฐิ
อภิรูหิตพฺพา   โย   อภิรูเหยฺย   อาปตฺติ   ทุกฺกฏสฺส   น   จ  ภิกฺขเว
รตฺตจิตฺเตน   องฺคชาตํ   ฉุปิตพฺพํ   โย   ฉุเปยฺย  อาปตฺติ  ถุลฺลจฺจยสฺส
น วจฺฉตรี มาเรตพฺพา โย มาเรยฺย ยถาธมฺโม กาเรตพฺโพติ ฯ
     [๑๔]   เตน  โข  ปน  สมเยน  ฉพฺพคฺคิยา  ภิกฺขู ยาเนน ยายนฺติ
อิตฺถียุตฺเตนปิ   ปุริสนฺตเรน   ปุริสยุตฺเตนปิ   อิตฺถนฺตเรน   ฯ   มนุสฺสา
อุชฺฌายนฺติ   ขียนฺติ   วิปาเจนฺติ   เสยฺยถาปิ   คงฺคามหิยายาติ  ๑-  ฯ
ภควโต   เอตมตฺถํ  อาโรเจสุํ  ฯ  น  ภิกฺขเว  ยาเนน  ยายิตพฺพํ  โย
ยาเยยฺย   อาปตฺติ  ทุกฺกฏสฺสาติ  ฯ  เตน  โข  ปน  สมเยน  อญฺญตโร
ภิกฺขุ   โกสเลสุ   ชนปเทสุ   สาวตฺถึ   คจฺฉนฺโต   ภควนฺตํ   ทสฺสนาย
อนฺตรามคฺเค   คิลาโน   โหติ  ฯ  อถโข  โส  ภิกฺขุ  มคฺคา  โอกฺกมฺม
อญฺญตรสฺมึ   รุกฺขมูเล   นิสีทิ   ฯ   มนุสฺสา   ตํ  ภิกฺขุํ  ปสฺสิตฺวา  ๒-
เอตทโวจุํ   กหํ   ภนฺเต  อยฺโย  ๓-  คมิสฺสตีติ  ฯ  สาวตฺถึ  โข  อหํ
อาวุโส    คมิสฺสามิ    ภควนฺตํ    ทสฺสนายาติ    ฯ    เอหิ   ภนฺเต
คมิสฺสามาติ   ๔-   ฯ   นาหํ  อาวุโส  สกฺโกมิ  คิลาโนมฺหีติ  ฯ  เอหิ
ภนฺเต  ยานํ  อภิรูหาติ  ฯ  อลํ  อาวุโส  ปฏิกฺขิตฺตํ  ภควตา  ยานนฺติ ฯ
กุกฺกุจฺจายนฺโต   ยานํ  นาภิรูหิ  ฯ  อถโข  โส  ภิกฺขุ  สาวตฺถึ  คนฺตฺวา
@เชิงอรรถ: ๑ ม. ยุ. กงฺคามหิยายาติ ฯ ๒ ม. ยุ. ทิสฺวา ฯ ๓ ม. ยุ. อยฺโย ภนฺเต ฯ
@๔ ม. คมิสฺสามีติ ฯ
---------------------------------------------------------------------------------------------
หน้าที่ ๒๕.
ภิกฺขูนํ  เอตมตฺถํ  อาโรเจสิ  ฯ  ภิกฺขู  ภควโต  เอตมตฺถํ  อาโรเจสุํ ฯ
อถโข   ภควา   เอตสฺมึ  นิทาเน  เอตสฺมึ  ปกรเณ  ธมฺมึ  กถํ  กตฺวา
ภิกฺขู   อามนฺเตสิ   อนุชานามิ   ภิกฺขเว  คิลานสฺส  ยานนฺติ  ฯ  อถโข
ภิกฺขูนํ   เอตทโหสิ  อิตฺถียุตฺตํ  นุ  โข  ปุริสยุตฺตํ  นุ  โขติ  ฯ  ภควโต
เอตมตฺถํ  อาโรเจสุํ  ฯ  อนุชานามิ  ภิกฺขเว  ปุริสยุตฺตํ  หตฺถวฏฺฏกนฺติ ฯ
เตน   โข   ปน  สมเยน  อญฺญตรสฺส  ภิกฺขุโน  ยานุคฺฆาเฏน  พาฬฺหตรํ
อผาสุ  อโหสิ  ฯ  ภควโต  เอตมตฺถํ  อาโรเจสุํ  ฯ  อนุชานามิ ภิกฺขเว
สิวิกํ ปาฏงฺกินฺติ ฯ
     [๑๕]   เตน   โข  ปน  สมเยน  ฉพฺพคฺคิยา  ภิกฺขู  อุจฺจาสยน-
มหาสยนานิ   ธาเรนฺติ   เสยฺยถีทํ   อาสนฺทึ   ปลฺลงฺกํ  โคณกํ  จิตฺตกํ
ปฏิกํ   ปฏิลิกํ   ตูลิกํ   วิกติกํ  อุทฺธโลมึ  เอกนฺตโลมึ  กฏิสฺสํ  โกเสยฺยํ
กุตฺตกํ    หตฺถตฺถรํ    อสฺสตฺถรํ    รถตฺถรํ    อชินปฺปเวณึ   กทฺทลิมิค-
ปวรปจฺจถรณํ     สอุตฺตรจฺฉทํ     อุภโตโลหิตกูปธานํ    ฯ    มนุสฺสา
วิหารจาริกํ   อาหิณฺฑนฺตา   ปสฺสิตฺวา   อุชฺฌายนฺติ   ขียนฺติ   วิปาเจนฺติ
เสยฺยถาปิ  คิหี  กามโภคิโนติ  ฯ  ภควโต  เอตมตฺถํ  อาโรเจสุํ  ฯ  น
ภิกฺขเว    อุจฺจาสยนมหาสยนานิ    ธาเรตพฺพานิ    เสยฺยถีทํ   อาสนฺทิ
ปลฺลงฺโก    โคณโก    จิตฺตโก    ปฏิกา   ปฏลิกา   ตูลิกา   วิกติกา
อุทฺธโลมี   เอกนฺตโลมี   กฏิสฺสํ   โกเสยฺยํ  กุตฺตกํ  หตฺถตฺถรํ  อสฺสตฺถรํ
รถตฺถรํ      อชินปฺปเวณิ      กทฺทลิมิคปวรปจฺจตฺถรณํ      สอุตฺตรจฺฉทํ
อุภโตโลหิตกูปธานํ โย ธาเรยฺย อาปตฺติ ทุกฺกฏสฺสาติ ฯ
---------------------------------------------------------------------------------------------
หน้าที่ ๒๖.
     [๑๖]   เตน   โข   ปน   สมเยน   ฉพฺพคฺคิยา  ภิกฺขู  ภควตา
อุจฺจาสยนมหาสยนานิ   ปฏิกฺขิตฺตานีติ   มหาจมฺมานิ   ธาเรนฺติ   สีหจมฺมํ
พฺยคฺฆจมฺมํ    ทีปิจมฺมํ   ฯ   ตานิ   มญฺจปฺปมาเณนปิ   ฉินฺนานิ   โหนฺติ
ปีฐปฺปมาเณนปิ    ฉินฺนานิ    โหนฺติ    อนฺโตปิ    มญฺเจ    ปญฺญตฺตานิ
โหนฺติ   พหิปิ   มญฺเจ   ปญฺญตฺตานิ   โหนฺติ  อนฺโตปิ  ปีเฐ  ปญฺญตฺตานิ
โหนฺติ   พหิปิ   ปีเฐ   ปญฺญตฺตานิ   โหนฺติ   ฯ   มนุสฺสา  วิหารจาริกํ
อาหิณฺฑนฺตา    ปสฺสิตฺวา   อุชฺฌายนฺติ   ขียนฺติ   วิปาเจนฺติ   เสยฺยถาปิ
คิหี   กามโภคิโนติ   ฯ  ภควโต  เอตมตฺถํ  อาโรเจสุํ  ฯ  น  ภิกฺขเว
มหาจมฺมานิ    ธาเรตพฺพานิ    สีหจมฺมํ    พฺยคฺฆจมฺมํ    ทีปิจมฺมํ   โย
ธาเรยฺย อาปตฺติ ทุกฺกฏสฺสาติ ฯ
     [๑๗]   เตน  โข  ปน สมเยน ฉพฺพคฺคิยา ภิกฺขู ภควตา มหาจมฺมานิ
ปฏิกฺขิตฺตานีติ    โคจมฺมานิ    ธาเรนฺติ    ฯ   ตานิ   มญฺจปฺปมาเณนปิ
ฉินฺนานิ   โหนฺติ   ปีฐปฺปมาเณนปิ   ฉินฺนานิ   โหนฺติ   อนฺโตปิ   มญฺเจ
ปญฺญตฺตานิ    โหนฺติ    พหิปิ    มญฺเจ   ปญฺญตฺตานิ   โหนฺติ   อนฺโตปิ
ปีเฐ    ปญฺญตฺตานิ    โหนฺติ   พหิปิ   ปีเฐ   ปญฺญตฺตานิ   โหนฺติ   ฯ
อญฺญตโรปิ      ปาปภิกฺขุ     อญฺญตรสฺส     ปาปุปาสกสฺส     กุลุปโก
โหติ    ฯ    อถโข    โส    ปาปภิกฺขุ    ปุพฺพณฺหสมยํ   นิวาเสตฺวา
ปตฺตจีวรมาทาย    เยน   ตสฺส   ปาปุปาสกสฺส   นิเวสนํ   เตนุปสงฺกมิ
อุปสงฺกมิตฺวา   ปญฺญตฺเต   อาสเน   นิสีทิ  ฯ  อถโข  โส  ปาปุปาสโก
เยน     ปาปภิกฺขุ     เตนุปสงฺกมิ    อุปสงฺกมิตฺวา    ตํ    ปาปภิกฺขุํ
---------------------------------------------------------------------------------------------
หน้าที่ ๒๗.
อภิวาเทตฺวา เอกมนฺตํ นิสีทิ ฯ
     {๑๗.๑}   เตน  โข  ปน  สมเยน  ตสฺส  ปาปุปาสกสฺส  วจฺฉโก
โหติ   ตรุโณ   อภิรูโป   ทสฺสนีโย  ปาสาทิโก  จิโตฺร  ๑-  เสยฺยถาปิ
ทีปิจฺฉาโป  ฯ  อถโข  โส  ปาปภิกฺขุ  ตํ  วจฺฉกํ  สกฺกจฺจํ อุปนิชฺฌายติ ฯ
อถโข  โส  ปาปุปาสโก  ตํ  ปาปภิกฺขุํ  เอตทโวจ  กิสฺส  ภนฺเต  อยฺโย
อิมํ   วจฺฉกํ   สกฺกจฺจํ   อุปนิชฺฌายตีติ  ฯ  อตฺโถ  เม  อาวุโส  อิมสฺส
วจฺฉกสฺส จมฺเมนาติ ฯ
     {๑๗.๒}   อถโข  โส  ปาปุปาสโก ตํ วจฺฉกํ วธิตฺวา จมฺมํ วิธูนิตฺวา
ตสฺส   ปาปภิกฺขุโน   อทาสิ   ๒-  ฯ  อถโข  โส  ปาปภิกฺขุ  ตํ  จมฺมํ
สงฺฆาฏิยา   ปฏิจฺฉาเทตฺวา   อคมาสิ  ฯ  อถโข  สา  คาวี  วจฺฉคิทฺธินี
ตํ   ปาปภิกฺขุํ   ปิฏฺฐิโต   ปิฏฺฐิโต  อนุพนฺธิ  ฯ  ภิกฺขู  เอวมาหํสุ  กิสฺส
ตฺยายํ   อาวุโส   คาวี   ปิฏฺฐิโต   ปิฏฺฐิโต  อนุพทฺธาติ  ฯ  อหํปิ  โข
อาวุโส  น  ชานามิ  เกน  มฺยายํ  คาวี  ปิฏฺฐิโต  ปิฏฺฐิโต อนุพทฺธาติ ฯ
เตน  โข  ปน  สมเยน  ตสฺส  ปาปภิกฺขุโน  สงฺฆาฏิ  โลหิเตน  มกฺขิตา
โหติ ฯ ภิกฺขู เอวมาหํสุ อยํ ปน เต อาวุโส สงฺฆาฏิ กึ กตาติ ฯ
     {๑๗.๓}   อถโข  โส  ปาปภิกฺขุ  ภิกฺขูนํ  เอตมตฺถํ  อาโรเจสิ  ฯ
กึ  ปน  ตฺวํ  อาวุโส  ปาณาติปาเต  สมาทเปสีติ  ฯ  เอวํ  อาวุโสติ ฯ
เย   เต   ภิกฺขู  อปฺปิจฺฉา  ฯเปฯ  เต  อุชฺฌายนฺติ  ขียนฺติ  วิปาเจนฺติ
กถํ   หิ   นาม   ภิกฺขุ   ปาณาติปาเต   สมาทเปสฺสติ   นนุ   ภควตา
อเนกปริยาเยน    ปาณาติปาโต    ครหิโต    ปาณาติปาตา    เวรมณี
ปสตฺถาติ ฯ อถโข เต ภิกฺขู ภควโต เอตมตฺถํ อาโรเจสุํ ฯ
@เชิงอรรถ: ๑ โป. วิจิตฺโต ฯ ๒ ม. ยุ. ปาทาสิ ฯ
---------------------------------------------------------------------------------------------
หน้าที่ ๒๘.
     [๑๘]   อถโข  ภควา  เอตสฺมึ  นิทาเน  เอตสฺมึ ปกรเณ ภิกฺขุสงฺฆํ
สนฺนิปาตาเปตฺวา   ตํ   ปาปภิกฺขุํ   ปฏิปุจฺฉิ   สจฺจํ   กิร   ตฺวํ   ภิกฺขุ
ปาณาติปาเต   สมาทเปสีติ   ฯ   สจฺจํ   ภควาติ   ฯ   วิครหิ  พุทฺโธ
ภควา   กถํ   หิ   นาม   ตฺวํ   โมฆปุริส  ปาณาติปาเต  สมาทเปสฺสสิ
นนุ    มยา    โมฆปุริส    อเนกปริยาเยน    ปาณาติปาโต   ครหิโต
ปาณาติปาตา    เวรมณี    ปสตฺถา    เนตํ    โมฆปุริส   อปฺปสนฺนานํ
วา   ปสาทาย  ฯเปฯ  วิครหิตฺวา  ธมฺมึ  กถํ  กตฺวา  ภิกฺขู  อามนฺเตสิ
น     ภิกฺขเว    ปาณาติปาเต    สมาทเปตพฺพํ    โย    สมาทเปยฺย
ยถาธมฺโม  กาเรตพฺโพ  ฯ  น  จ  ๑-  ภิกฺขเว  โคจมฺมํ ธาเรตพฺพํ โย
ธาเรยฺย  อาปตฺติ  ทุกฺกฏสฺส  ฯ  น  [๒]- ภิกฺขเว กิญฺจิ จมฺมํ ธาเรตพฺพํ
โย ธาเรยฺย อาปตฺติ ทุกฺกฏสฺสาติ ฯ
     {๑๘.๑}   เตน  โข ปน สมเยน มนุสฺสานํ มญฺจํปิ ปีฐํปิ จมฺโมนทฺธานิ
โหนฺติ  จมฺมวินทฺธานิ  ฯ  ภิกฺขู  กุกฺกุจฺจายนฺตา  นาภินิสีทนฺติ  ฯ  ภควโต
เอตมตฺถํ  อาโรเจสุํ  ฯ  อนุชานามิ  ภิกฺขเว  คิหิวิกตํ อภินิสีทิตุํ น เตฺวว
อภินิปชฺชิตุนฺติ  ฯ  เตน โข ปน สมเยน วิหารา จมฺมพนฺเธหิ โอคุมฺผิยนฺติ ฯ
ภิกฺขู  กุกฺกุจฺจายนฺตา  นาภินิสีทนฺติ  ฯ  ภควโต  เอตมตฺถํ  อาโรเจสุํ  ฯ
อนุชานามิ ภิกฺขเว พนฺธนมตฺตํ อภินิสีทิตุนฺติ ฯ
     [๑๙]   เตน   โข   ปน  สมเยน  ฉพฺพคฺคิยา  ภิกฺขู  สอุปาหนา
คามํ   ปวิสนฺติ   ฯ  มนุสฺสา  อุชฺฌายนฺติ  ขียนฺติ  วิปาเจนฺติ  เสยฺยถาปิ
คิหี   กามโภคิโนติ   ฯ  ภควโต  เอตมตฺถํ  อาโรเจสุํ  ฯ  น  ภิกฺขเว
@เชิงอรรถ: ๑ โป. ม. ยุ. จสทฺโท นตฺถิ ฯ  ๒ ม. ยุ. จ ฯ
---------------------------------------------------------------------------------------------
หน้าที่ ๒๙.
สอุปาหเนน  คาโม  ปวิสิตพฺโพ  โย  ปวิเสยฺย  อาปตฺติ  ทุกฺกฏสฺสาติ  ฯ
เตน  โข  ปน  สมเยน  อญฺญตโร  ภิกฺขุ  คิลาโน  โหติ น สกฺโกติ วินา
อุปาหเนน   ๑-   คามํ   ปวิสิตุํ  ฯ  ภควโต  เอตมตฺถํ  อาโรเจสุํ  ฯ
อนุชานามิ ภิกฺขเว คิลาเนน ภิกฺขุนา สอุปาหเนน คามํ ปวิสิตุนฺติ ฯ
     [๒๐]   เตน  โข  ปน  สมเยน  อายสฺมา  มหากจฺจาโน  อวนฺตีสุ
วิหรติ   กุรรฆเร   ปปาเต  ๒-  ปพฺพเต  ฯ  เตน  โข  ปน  สมเยน
โสโณ      อุปาสโก      กุฏิกณฺโณ     อายสฺมโต     มหากจฺจานสฺส
อุปฏฺฐาโก   โหติ   ฯ  อถโข  โสโณ  อุปาสโก  กุฏิกณฺโณ  เยนายสฺมา
มหากจฺจาโน    เตนุปสงฺกมิ    อุปสงฺกมิตฺวา   อายสฺมนฺตํ   มหากจฺจานํ
อภิวาเทตฺวา   เอกมนฺตํ   นิสีทิ   ฯ   เอกมนฺตํ   นิสินฺโน  โข  โสโณ
อุปาสโก    กุฏิกณฺโณ    อายสฺมนฺตํ    มหากจฺจานํ   เอตทโวจ   ยถา
ยถาหํ   ภนฺเต   อยฺเยน   มหากจฺจาเนน   ธมฺมํ   เทสิตํ   อาชานามิ
นยิทํ    สุกรํ    อคารํ   อชฺฌาวสตา   เอกนฺตปริปุณฺณํ   เอกนฺตปริสุทฺธํ
สงฺขลิขิตํ   พฺรหฺมจริยํ   จริตุํ  อิจฺฉามหํ  ภนฺเต  เกสมสฺสุํ  โอหาเรตฺวา
กาสายานิ    วตฺถานิ   อจฺฉาเทตฺวา   อคารสฺมา   อนคาริยํ   ปพฺพชิตุํ
ปพฺพาเชตุ มํ ภนฺเต อยฺโย มหากจฺจาโนติ ฯ
     {๒๐.๑}   เอวํ    วุตฺเต    อายสฺมา    มหากจฺจาโน   โสณํ
อุปาสกํ    กุฏิกณฺณํ   เอตทโวจ   ๓-   ทุกฺกรํ   โข   โสณ   ยาวชีวํ
เอกเสยฺยํ     เอกภตฺตํ    พฺรหฺมจริยํ    จริตุํ    ๔-    อิงฺฆ    ตฺวํ
@เชิงอรรถ: ๑ ยุ. อุปาหเนน วินา ฯ  ๒ ม. กุรุรฆเร ปปถเก ฯ  ๓ ม. ยุ. เอวํ วุตฺเต ...
@เอตทโวจาติ อิเม ปาฐา น ทิสสนฺติ ฯ   ๔ ม. ยุ. อยํ ปาโฐ นตฺถิ ฯ
---------------------------------------------------------------------------------------------
หน้าที่ ๓๐.
โสณ    ตตฺเถว   อคาริกภูโต   พุทฺธานํ   สาสนํ   อนุยุญฺช   กาลยุตฺตํ
เอกเสยฺยํ เอกภตฺตํ พฺรหฺมจริยนฺติ ฯ
     {๒๐.๒}   อถโข   โสณสฺส   อุปาสกสฺส  กุฏิกณฺณสฺส  โย  อโหสิ
ปพฺพชฺชาภิสงฺขาโร    โส    ปฏิปฺปสฺสมฺภิ   ฯ   ทุติยมฺปิ   โข   โสโณ
อุปาสโก    กุฏิกณฺโณ    ฯเปฯ    ตติยมฺปิ    โข   โสโณ   อุปาสโก
กุฏิกณฺโณ    เยนายสฺมา    มหากจฺจาโน    เตนุปสงฺกมิ   อุปสงฺกมิตฺวา
อายสฺมนฺตํ     มหากจฺจานํ    อภิวาเทตฺวา    เอกมนฺตํ    นิสีทิ    ฯ
เอกมนฺตํ    นิสินฺโน   โข   โสโณ   อุปาสโก   กุฏิกณฺโณ   อายสฺมนฺตํ
มหากจฺจานํ   เอตทโวจ   ยถา  ยถาหํ  ภนฺเต  อยฺเยน  มหากจฺจาเนน
ธมฺมํ    เทสิตํ    อาชานามิ    นยิทํ    สุกรํ    อคารํ   อชฺฌาวสตา
เอกนฺตปริปุณฺณํ     เอกนฺตปริสุทฺธํ     สงฺขลิขิตํ     พฺรหฺมจริยํ    จริตุํ
อิจฺฉามหํ    ภนฺเต    เกสมสฺสุํ    โอหาเรตฺวา   กาสายานิ   วตฺถานิ
อจฺฉาเทตฺวา    อคารสฺมา    อนคาริยํ    ปพฺพชิตุํ    ปพฺพาเชตุ    มํ
ภนฺเต อยฺโย มหากจฺจาโนติ ฯ
     {๒๐.๓}    อถโข    อายสฺมา   มหากจฺจาโน   โสณํ   อุปาสกํ
กุฏิกณฺณํ   ปพฺพาเชสิ   ฯ   เตน   โข  ปน  สมเยน  อวนฺติทกฺขิณาปโถ
อปฺปภิกฺขุโก    โหติ    ฯ    อถโข   อายสฺมา   มหากจฺจาโน   ติณฺณํ
วสฺสานํ   อจฺจเยน   กิจฺเฉน   กสิเรน  ตโต  ตโต  ทสวคฺคํ  ภิกฺขุสงฺฆํ
สนฺนิปาตาเปตฺวา      อายสฺมนฺตํ      โสณํ      อุปสมฺปาเทสิ     ฯ
อถโข     อายสฺมโต     โสณสฺส     วสฺสํ     วุตฺถสฺส    รโหคตสฺส
ปฏิสลฺลีนสฺส     เอวํ    เจตโส    ปริวิตกฺโก    อุทปาทิ    สุโตเยว
โข   เม   โส   ภควา   เอทิโส   จ   เอทิโส  จาติ  น  จ  มยา
---------------------------------------------------------------------------------------------
หน้าที่ ๓๑.
สมฺมุขา    ทิฏฺโฐ    คจฺเฉยฺยาหํ    ตํ   ภควนฺตํ   ทสฺสนาย   อรหนฺตํ
สมฺมาสมฺพุทฺธํ สเจ มํ อุปชฺฌาโย อนุชาเนยฺยาติ ฯ
     {๒๐.๔}   อถโข   อายสฺมา   โสโณ   สายณฺหสมยํ  ปฏิสลฺลานา
วุฏฺฐิโต    เยนายสฺมา    มหากจฺจาโน    เตนุปสงฺกมิ    อุปสงฺกมิตฺวา
อายสฺมนฺตํ     มหากจฺจานํ    อภิวาเทตฺวา    เอกมนฺตํ    นิสีทิ    ฯ
เอกมนฺตํ   นิสินฺโน   โข   อายสฺมา   โสโณ   อายสฺมนฺตํ  มหากจฺจานํ
เอตทโวจ   อิธ   มยฺหํ  ภนฺเต  รโหคตสฺส  ปฏิสลฺลีนสฺส  เอวํ  เจตโส
ปริวิตกฺโก  อุทปาทิ  สุโตเยว  โข  เม  โส  ภควา  เอทิโส จ เอทิโส
จาติ  น  จ  มยา  สมฺมุขา  ทิฏฺโฐ  คจฺเฉยฺยาหํ  ตํ  ภควนฺตํ  ทสฺสนาย
อรหนฺตํ    สมฺมาสมฺพุทฺธํ    สเจ    มํ    อุปชฺฌาโย    อนุชาเนยฺยาติ
คจฺเฉยฺยาหํ   ภนฺเต   ตํ   ภควนฺตํ   ทสฺสนาย   อรหนฺตํ  สมฺมาสมฺพุทฺธํ
สเจ มํ อุปชฺฌาโย อนุชานาตีติ ฯ
     {๒๐.๕}   สาธุ  สาธุ  โสณ  คจฺฉ  ตฺวํ  โสณ ตํ ภควนฺตํ ทสฺสนาย
อรหนฺตํ   สมฺมาสมฺพุทฺธํ   ทกฺขิสฺสสิ   ตฺวํ   โสณ  ตํ  ภควนฺตํ  ปาสาทิกํ
ปสาทนียํ    สนฺตินฺทฺริยํ    สนฺตมานสํ    อุตฺตมทมถสมถมนุปฺปตฺตํ    ทนฺตํ
คุตฺตํ  ยตินฺทฺริยํ  นาคํ  เตนหิ  ตฺวํ โสณ มม วจเนน ภควโต ปาเท สิรสา
วนฺท   อุปชฺฌาโย  เม  ภนฺเต  อายสฺมา  มหากจฺจาโน  ภควโต  ปาเท
สิรสา   วนฺทตีติ  เอวญฺจ  วเทหิ  อวนฺติทกฺขิณาปโถ  ภนฺเต  อปฺปภิกฺขุโก
ติณฺณํ   เม   วสฺสานํ  อจฺจเยน  กิจฺเฉน  กสิเรน  ตโต  ตโต  ทสวคฺคํ
ภิกฺขุสงฺฆํ   สนฺนิปาตาเปตฺวา   อุปสมฺปทํ   อลตฺถํ   อปฺเปวนาม   ภควา
---------------------------------------------------------------------------------------------
หน้าที่ ๓๒.
อวนฺติทกฺขิณาปเถ     อปฺปตเรน     คเณน    อุปสมฺปทํ    อนุชาเนยฺย
อวนฺติทกฺขิณาปเถ    ภนฺเต    กณฺหุตฺตรา    ภูมิ   ขรา   โคกณฺฏกหตา
อปฺเปวนาม    ภควา    อวนฺติทกฺขิณาปเถ   คณงฺคณุปาหนํ   อนุชาเนยฺย
อวนฺติทกฺขิณาปเถ     ภนฺเต     นหานครุกา    มนุสฺสา    อุทกสุทฺธิกา
อปฺเปวนาม     ภควา    อวนฺติทกฺขิณาปเถ    ธุวนหานํ    อนุชาเนยฺย
อวนฺติทกฺขิณาปเถ   ภนฺเต   จมฺมานิ   อตฺถรณานิ   เอฬกจมฺมํ   อชจมฺมํ
มิคจมฺมํ    เสยฺยถาปิ   ภนฺเต   มชฺฌิเมสุ   ชนปเทสุ   เอรคุ   โมรคุ
มชฺชารุ   ชนฺตุ   เอวเมว   โข   ภนฺเต   อวนฺติทกฺขิณาปเถ   จมฺมานิ
อตฺถรณานิ    เอฬกจมฺมํ    อชจมฺมํ    มิคจมฺมํ    อปฺเปวนาม   ภควา
อวนฺติทกฺขิณาปเถ    จมฺมานิ    อตฺถรณานิ    อนุชาเนยฺย    เอฬกจมฺมํ
อชจมฺมํ    มิคจมฺมํ   เอตรหิ   ภนฺเต   มนุสฺสา   นิสฺสีมคตานํ   ภิกฺขูนํ
จีวรํ   เทนฺติ   อิมํ   จีวรํ   อิตฺถนฺนามสฺส   เทมาติ   เต  อาคนฺตฺวา
อาโรเจนฺติ   อิตฺถนฺนาเมหิ   เต   อาวุโส   มนุสฺเสหิ   จีวรํ  ทินฺนนฺติ
เต   กุกฺกุจฺจายนฺตา   น   สาทิยนฺติ   มา   โน   นิสฺสคฺคิยํ   อโหสีติ
อปฺเปวนาม ภควา จีวเร ปริยายํ อาจิกฺเขยฺยาติ ฯ
     {๒๐.๖}   เอวํ ภนฺเตติ โข อายสฺมา โสโณ อายสมฺโต มหากจฺจานสฺส
ปฏิสฺสุณิตฺวา    อุฏฺฐายาสนา    อายสฺมนฺตํ   มหากจฺจานํ   อภิวาเทตฺวา
ปทกฺขิณํ   กตฺวา  เสนาสนํ  สํสาเมตฺวา  ปตฺตจีวรมาทาย  เยน  สาวตฺถี
เตน   ปกฺกามิ   อนุปุพฺเพน   เยน   สาวตฺถี   เชตวนํ  อนาถปิณฺฑิกสฺส
อาราโม    เยน    ภควา    เตนุปสงฺกมิ    อุปสงฺกมิตฺวา    ภควนฺตํ
---------------------------------------------------------------------------------------------
หน้าที่ ๓๓.
อภิวาเทตฺวา   เอกมนฺตํ   นิสีทิ  ฯ  อถโข  ภควา  อายสฺมนฺตํ  อานนฺทํ
อามนฺเตสิ    อิมสฺส    อานนฺท    อาคนฺตุกสฺส    ภิกฺขุโน    เสนาสนํ
ปญฺญาเปหีติ   ฯ   อถโข   อายสฺมา   อานนฺโท  ยสฺส  โข  มํ  ภควา
อาณาเปติ    อิมสฺส    อานนฺท    อาคนฺตุกสฺส    ภิกฺขุโน    เสนาสนํ
ปญฺญาเปหีติ    อิจฺฉติ    ภควา   เตน   ภิกฺขุนา   สทฺธึ   เอกวิหาเร
วตฺถุํ    อิจฺฉติ    ภควา    อายสฺมตา   โสเณน   สทฺธึ   เอกวิหาเร
วตฺถุนฺติ   ยสฺมึ   วิหาเร   ภควา   วิหรติ   ตสฺมึ  วิหาเร  อายสฺมโต
โสณสฺส เสนาสนํ ปญฺญาเปสิ ฯ

             เนื้อความพระไตรปิฎกฉบับภาษาบาลีอักษรไทย เล่มที่ ๕ หน้าที่ ๑๙-๓๓.
https://84000.org/tipitaka/read/pali_item.php?book=5&item=11&items=10&pagebreak=1&modeTY=2
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
https://84000.org/tipitaka/read/pali_item.php?book=5&item=11&items=10&pagebreak=1&modeTY=2&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
https://84000.org/tipitaka/read/roman_item.php?book=5&item=11&items=10&pagebreak=1&modeTY=2
             อ่านเทียบพระไตรปิฎกภาษาไทยฉบับหลวง :-
https://84000.org/tipitaka/read/byitem.php?book=5&item=11&items=10&pagebreak=1&modeTY=2
             ศึกษาอรรถกถานี้ได้ที่ :-
https://84000.org/tipitaka/attha/attha.php?b=5&i=11
             สารบัญพระไตรปิฎกเล่มที่ ๕
https://84000.org/tipitaka/read/?index_5
https://84000.org/tipitaka/english/?index_5