[๑๒๗๕] กติสตํ รตฺติสตํ อาปตฺตึ ๑- ฉาทยิตฺวาน
กติ รตฺติโย วสิตฺวาน มุจฺเจยฺย ปาริวาสิโก ฯ
ทสสตํ รตฺติสตํ อาปตฺตึ ๑- ฉาทยิตฺวาน
@เชิงอรรถ: ๑ ม. ยุ. อาปตฺติโย ฯ
ทส รตฺติโย วสิตฺวาน มุจฺเจยฺย ปาริวาสิโก ฯ
[๑๒๗๖] กติ กมฺมโทสา วุตฺตา พุทฺเธนาทิจฺจพนฺธุนา
จมฺปายํ วินยวตฺถุสฺมึ สพฺเพ ๑- อธมฺมิกา กติ ฯ
ทฺวาทส กมฺมโทสา วุตฺตา พุทฺเธนาทิจฺจพนฺธุนา
จมฺปายํ วินยวตฺถุสฺมึ สพฺเพ ๑- อธมฺมิกา กตา ฯ
[๑๒๗๗] กติ กมฺมสมฺปตฺติโย วุตฺตา พุทฺเธนาทิจฺจพนฺธุนา
จมฺปายํ วินยวตฺถุสฺมึ สพฺเพ ว ธมฺมิกา กติ ฯ
จตสฺโส กมฺมสมฺปตฺติโย วุตฺตา พุทฺเธนาทิจฺจพนฺธุนา
จมฺปายํ วินยวตฺถุสฺมึ สพฺเพ ว ธมฺมิกา กตา ฯ
[๑๒๗๘] กติ กมฺมานิ วุตฺตานิ พุทฺเธนาทิจฺจพนฺธุนา
จมฺปายํ วินยวตฺถุสฺมึ ธมฺมิกา อธมฺมิกา กติ ฯ
ฉ กมฺมานิ วุตฺตานิ พุทฺเธนาทิจฺจพนฺธุนา
จมฺปายํ วินยวตฺถุสฺมึ เอเกตฺถ ธมฺมิกา กตา
ปญฺจ อธมฺมิกา วุตฺตา พุทฺเธนาทิจฺจพนฺธุนา ฯ
[๑๒๗๙] กติ กมฺมานิ วุตฺตานิ พุทฺเธนาทิจฺจพนฺธุนา
จมฺปายํ วินยวตฺถุสฺมึ ธมฺมิกา อธมฺมิกา กติ ฯ
จตฺตาริ กมฺมานิ วุตฺตานิ พุทฺเธนาทิจฺจพนฺธุนา
จมฺปายํ วินยวตฺถุสฺมึ เอเกตฺถ ธมฺมิกา กตา
ตโย อธมฺมิกา วุตฺตา พุทฺเธนาทิจฺจพนฺธุนา ฯ
[๑๒๘๐] ยํ เทสิตํ ๒- อนนฺตชิเนน ตาทินา
@เชิงอรรถ: ๑ ม. ยุ. สพฺเพว ฯ ๒ ยุ. เทสิตา ฯ
อาปตฺติกฺขนฺธานิ วิเวกทสฺสินา
กเตตฺถ สมฺมติ วินา สมเถหิ
ปุจฺฉามิ ตํ พฺรูหิ วิภงฺคโกวิท ฯ
ยํ เทสิตํ ๑- อนนฺตชิเนน ตาทินา
อาปตฺติกฺขนฺธานิ วิเวกทสฺสินา
เอเกตฺถ สมฺมติ วินา สมเถหิ
เอตนฺเต อกฺขามิ วิภงฺคโกวิท ฯ
[๑๒๘๑] กติ อาปายิกา วุตฺตา พุทฺเธนาทิจฺจพนฺธุนา
วินยํ ปฏิชานนฺตสฺส วิสยานิ ๒- สุโณม เต ฯ
ฉอูนทิยฑฺฒสตา วุตฺตา พุทฺเธนาทิจฺจพนฺธุนา
อาปายิกา เนรยิกา กปฺปฏฺฐา สงฺฆเภทกา
วินยํ ปฏิชานนฺตสฺส วิสยานิ สุโณหิ เม ฯ
[๑๒๘๒] กติ นาปายิกา วุตฺตา พุทฺเธนาทิจฺจพนฺธุนา
วินยํ ปฏิชานนฺตสฺส วิสยานิ สุโณม เต ฯ
อฏฺฐารส นาปายิกา วุตฺตา พุทฺเธนาทิจฺจพนฺธุนา ฯ
วินยํ ปฏิชานนฺตสฺส วิสยานิ สุโณหิ เม ฯ
[๑๒๘๓] กติ อฏฺฐกา วุตฺตา พุทฺเธนาทิจฺจพนฺธุนา
วินยํ ปฏิชานนฺตสฺส วิสยานิ สุโณม เต ฯ
อฏฺฐารสฏฺฐกา วุตฺตา พุทฺเธนาทิจฺจพนฺธุนา
วินยํ ปฏิชานนฺตสฺส วิสยานิ สุโณหิ เม ฯ
@เชิงอรรถ: ๑ ยุ. เทสิตา ฯ ๒ ม. วินยานิ ฯ สพฺพตฺถ อีทิสเมว ฯ
[๑๒๘๔] กติ กมฺมานิ วุตฺตานิ พุทฺเธนาทิจฺจพนฺธุนา
วินยํ ปฏิชานนฺตสฺส วิสยานิ สุโณม เต ฯ
โสฬส กมฺมานิ วุตฺตานิ พุทฺเธนาทิจฺจพนฺธุนา
วินยํ ปฏิชานนฺตสฺส วิสยานิ สุโณหิ เม ฯ
[๑๒๘๕] กติ กมฺมโทสา วุตฺตา พุทฺเธนาทิจฺจพนฺธุนา
วินยํ ปฏิชานนฺตสฺส วิสยานิ สุโณม เต ฯ
ทฺวาทส กมฺมโทสา วุตฺตา พุทฺเธนาทิจฺจพนฺธุนา
วินยํ ปฏิชานนฺตสฺส วิสยานิ สุโณหิ เม ฯ
[๑๒๘๖] กติ กมฺมสมฺปตฺติโย วุตฺตา พุทฺเธนาทิจฺจพนฺธุนา
วินยํ ปฏิชานนฺตสฺส วิสยานิ สุโณม เต ฯ
จตสฺโส กมฺมสมฺปตฺติโย วุตฺตา พุทฺเธนาทิจฺจพนฺธุนา
วินยํ ปฏิชานนฺตสฺส วิสยานิ สุโณหิ เม ฯ
[๑๒๘๗] กติ กมฺมานิ วุตฺตานิ พุทฺเธนาทิจฺจพนฺธุนา
วินยํ ปฏิชานนฺตสฺส วิสยานิ สุโณม เต ฯ
ฉ กมฺมานิ วุตฺตานิ พุทฺเธนาทิจฺจพนฺธุนา
วินยํ ปฏิชานนฺตสฺส วิสยานิ สุโณหิ เม ฯ
[๑๒๘๘] กติ กมฺมานิ วุตฺตานิ พุทฺเธนาทิจฺจพนฺธุนา
วินยํ ปฏิชานนฺตสฺส วิสยานิ สุโณม เต ฯ
จตฺตาริ กมฺมานิ วุตฺตานิ พุทฺเธนาทิจฺจพนฺธุนา
วินยํ ปฏิชานนฺตสฺส วิสยานิ สุโณหิ เม ฯ
[๑๒๘๙] กติ ปาราชิกา วุตฺตา พุทฺเธนาทิจฺจพนฺธุนา
วินยํ ปฏิชานนฺตสฺส วิสยานิ สุโณม เต ฯ
อฏฺฐ ปาราชิกา วุตฺตา พุทฺเธนาทิจฺจพนฺธุนา
วินยํ ปฏิชานนฺตสฺส วิสยานิ สุโณหิ เม ฯ
[๑๒๙๐] กติ สงฺฆาทิเสสา วุตฺตา พุทฺเธนาทิจฺจพนฺธุนา
วินยํ ปฏิชานนฺตสฺส วิสยานิ สุโณม เต ฯ
เตวีส สงฺฆาทิเสสา วุตฺตา พุทฺเธนาทิจฺจพนฺธุนา
วินยํ ปฏิชานนฺตสฺส วิสยานิ สุโณหิ เม ฯ
[๑๒๙๑] กติ อนิยตา วุตฺตา พุทฺเธนาทิจฺจพนฺธุนา
วินยํ ปฏิชานนฺตสฺส วิสยานิ สุโณม เต ฯ
เทฺว อนิยตา วุตฺตา พุทฺเธนาทิจฺจพนฺธุนา
วินยํ ปฏิชานนฺตสฺส วิสยานิ สุโณหิ เม ฯ
[๑๒๙๒] กติ นิสฺสคฺคิยา วุตฺตา พุทฺเธนาทิจฺจพนฺธุนา
วินยํ ปฏิชานนฺตสฺส วิสยานิ สุโณม เต ฯ
เทฺวจตฺตาฬีส นิสฺสคฺคิยา วุตฺตา พุทฺเธนาทิจฺจพนฺธุนา
วินยํ ปฏิชานนฺตสฺส วิสยานิ สุโณหิ เม ฯ
[๑๒๙๓] กติ ปาจิตฺติยา วุตฺตา พุทฺเธนาทิจฺจพนฺธุนา
วินยํ ปฏิชานนฺตสฺส วิสยานิ สุโณม เต ฯ
อฏฺฐาสีติสตํ ปาจิตฺติยา วุตฺตา พุทฺเธนาทิจฺจพนฺธุนา
วินยํ ปฏิชานนฺตสฺส วิสยานิ สุโณหิ เม ฯ
[๑๒๙๔] กติ ปาฏิเทสนียา วุตฺตา พุทฺเธนาทิจฺจพนฺธุนา
วินยํ ปฏิชานนฺตสฺส วิสยานิ สุโณม เต ฯ
ทฺวาทส ปาฏิเทสนียา วุตฺตา พุทฺเธนาทิจฺจพนฺธุนา
วินยํ ปฏิชานนฺตสฺส วิสยานิ สุโณหิ เม ฯ
[๑๒๙๕] กติ เสขิยา วุตฺตา พุทฺเธนาทิจฺจพนฺธุนา
วินยํ ปฏิชานนฺตสฺส วิสยานิ สุโณม เต ฯ
ปญฺจสตฺตติ เสขิยา วุตฺตา พุทฺเธนาทิจฺจพนฺธุนา
วินยํ ปฏิชานนฺตสฺส วิสยานิ สุโณหิ เม ฯ
ยาว สุปุจฺฉิตํ ตยา ตาว ๑- สุวิสฺสชฺชิตํ มยา
ปุจฺฉาวิสฺสชฺชนาย วา นตฺถิ กิญฺจิ อสุตฺตกนฺติ ฯ
ทุติยคาถาสงฺคณิกํ นิฏฺฐิตํ ฯ
-------------
@เชิงอรรถ: ๑ ม. ยุ. ยาว ฯ
เสทโมจนคาถา
[๑๒๙๖] อสํวาโส ภิกฺขูหิ ๑- ภิกฺขุนีหิ จ
สมฺโภโค เอกจฺโจ ตหึ น ลพฺภติ
อวิปฺปวาเสน อนาปตฺติ
ปญฺหา เมสา กุสเลหิ จินฺติตา ฯ
[๑๒๙๗] อวิสฺสชฺชิตํ ๒- อเวภงฺคิยํ ปญฺจ วุตฺตา มเหสินา
วิสฺสชฺชนฺตสฺส ปริภุญฺชนฺตสฺส อนาปตฺติ
ปญฺหา เมสา กุสเลหิ จินฺติตา ฯ
[๑๒๙๘] ทส ปุคฺคเล น วทามิ เอกาทส วิวชฺชิย
วุฑฺฒํ วนฺทนฺตสฺส อาปตฺติ
ปญฺหา เมสา กุสเลหิ จินฺติตา ฯ
[๑๒๙๙] น อุกฺขิตฺตโก น จ ปน ปาริวาสิโก
น สงฺฆภินฺโน น จ ปน ปกฺขสงฺกนฺโต
สมานสํวาสกภูมิยา ฐิโต
กถํ นุ สิกฺขาย อสาธารโณ สิยา
ปญฺหา เมสา กุสเลหิ จินฺติตา ฯ
[๑๓๐๐] อุเปติ ธมฺมํ ปริปุจฺฉมาโน
กุสลํ อตฺถุปสญฺหิตํ
@เชิงอรรถ: ๑ ม. ยุ. ภิกฺขูหิ จ ฯ ๒ ม. ยุ. อวิสฺสชิยํ ฯ
น ชีวติ น มโต น นิพฺพุโต ฯ
ตํ ปุคฺคลํ กตมํ วทนฺติ พุทฺธา
ปญฺหา เมสา กุสเลหิ จินฺติตา ฯ
[๑๓๐๑] อุพฺภกฺขเก น วทามิ อโธนาภึ ๑- วิวชฺชิย
เมถุนธมฺมปจฺจยา กถํ ปาราชิโก สิยา
ปญฺหา เมสา กุสเลหิ จินฺติตา ฯ
[๑๓๐๒] ภิกฺขุ สญฺญาจิกาย กุฏึ กโรติ
อเทสิตวตฺถุกํ ปมาณาติกนฺตํ
สารมฺภํ อปริกฺกมนํ อนาปตฺติ
ปญฺหา เมสา กุสเลหิ จินฺติตา ฯ
[๑๓๐๓] ภิกฺขุ สญฺญาจิกาย กุฏึ กโรติ
เทสิตวตฺถุกํ ปมาณิกํ
อนารมฺภํ สปริกฺกมนํ อาปตฺติ
ปญฺหา เมสา กุสเลหิ จินฺติตา ฯ
[๑๓๐๔] น กายิกํ กิญฺจิ ปโยคมาจเร
น จาปิ วาจาย ปเร ภเณยฺย
อาปชฺเชยฺย ครุกํ เฉชฺชวตฺถุํ
ปญฺหา เมสา กุสเลหิ จินฺติตา ฯ
[๑๓๐๕] น กายิกํ วาจสิกญฺจ กิญฺจิ
มนสาปิ สนฺโต น กเรยฺย ปาปํ
@เชิงอรรถ: ๑ ยุ. อโธนาภิ ฯ
โส นาสิโต กินฺติ สุนาสิโต ภเว
ปญฺหา เมสา กุสเลหิ จินฺติตา ฯ
[๑๓๐๖] อนาลปนฺโต มนุเชน เกนจิ
วาจา คิรํ โน จ ปเร ภเณยฺย
อาปชฺเชยฺย วาจสิกํ น กายิกํ
ปญฺหา เมสา กุสเลหิ จินฺติตา ฯ
[๑๓๐๗] สิกฺขาปทา พุทฺธวเรน วณฺณิตา
สงฺฆาทิเสสา จตุโร ภเวยฺยุํ
อาปชฺเชยฺย เอกปฺปโยเคน สพฺเพ
ปญฺหา เมสา กุสเลหิ จินฺติตา ฯ
[๑๓๐๘] อุโภ เอกโต อุปสมฺปนฺนา
อุภินฺนํ หตฺถโต จีวรํ ปฏิคฺคเณฺหยฺย
สิยา อาปตฺติโย นานา
ปญฺหา เมสา กุสเลหิ จินฺติตา ฯ
[๑๓๐๙] จตุโร ชนา สํวิธาย ครุภณฺฑํ อวหรุํ ๑-
ตโย ปาราชิกา เอโก น ปาราชิโก
ปญฺหา เมสา กุสเลหิ จินฺติตา ฯ
[๑๓๑๐] อิตฺถี จ อพฺภนฺตเร สิยา ภิกฺขุ จ พหิทฺธา สิยา
ฉิทฺทํ ตสฺมึ ฆเร นตฺถิ เมถุนธมฺมปจฺจยา
กถํ ปาราชิโก สิยา
@เชิงอรรถ: ๑ ม. ยุ. อวาหรุํ ฯ
ปญฺหา เมสา กุสเลหิ จินฺติตา ฯ
[๑๓๑๑] เตลํ มธุํ ผาณิตญฺจาปิ สปฺปึ
สามํ คเหตฺวาน นิกฺขิเปยฺย
อวีติวตฺเต สตฺตาเห
สติ ปจฺจเย ปริภุญฺชนฺตสฺส อาปตฺติ
ปญฺหา เมสา กุสเลหิ จินฺติตา ฯ
[๑๓๑๒] นิสฺสคฺคิเยน อาปตฺติ สุทฺธเกน ปาจิตฺติยํ
อาปชฺชนฺตสฺส เอกโต
ปญฺหา เมสา กุสเลหิ จินฺติตา ฯ
[๑๓๑๓] ภิกฺขู สิยา วีสติยา สมาคตา
กมฺมํ กเรยฺยุํ สมคฺคสญฺญิโน
ภิกฺขุ สิยา ทฺวาทสโยชเน ฐิโต
กมฺมญฺจ ตํ กุปฺเปยฺย วคฺคปจฺจยา
ปญฺหา เมสา กุสเลหิ จินฺติตา ฯ
[๑๓๑๔] ปทวีติหารมตฺเตน วาจาย ภณิเตน จ
สพฺพานิ ครุกานิ สปฺปฏิกมฺมานิ
จตุสฏฺฐิ อาปตฺติโย อาปชฺเชยฺย เอกโต
ปญฺหา เมสา กุสเลหิ จินฺติตา ฯ
[๑๓๑๕] นิวตฺโถ อนฺตรวาสเกน ทิคุณํ สงฺฆาฏึ ปารุโต
สพฺพานิ ตานิ นิสฺสคฺคิยานิ โหนฺติ ฯ
ปญฺหา เมสา กุสเลหิ จินฺติตา ฯ
[๑๓๑๖] น จาปิ ญตฺติ น จ ปน กมฺมวาจา
น เจหิภิกฺขูติ ชิโน อโวจ
สรณคมนมฺปิ น ตสฺส อตฺถิ
อุปสมฺปทา จสฺส อกุปฺปา
ปญฺหา เมสา กุสเลหิ จินฺติตา ฯ
[๑๓๑๗] อิตฺถึ หเน น มาตรํ ปุริสญฺจ น ปิตรํ หเน
หเนยฺย อนริยํ มนฺโท เตน จานนฺตรํ ผุเส
ปญฺหา เมสา กุสเลหิ จินฺติตา ฯ
[๑๓๑๘] อิตฺถึ หเน จ มาตรํ ปุริสญฺจ ปิตรํ หเน
มาตรํ ปิตรํ หนฺตฺวา น เตนานนฺตรํ ผุเส
ปญฺหา เมสา กุสเลหิ จินฺติตา ฯ
[๑๓๑๙] อโจทยิตฺวา อสารยิตฺวา
อสมฺมุขีภูตสฺส กเรยฺย กมฺมํ
กตญฺจ กมฺมํ สุกตํ ภเวยฺย
การโก จ สงฺโฆ อนาปตฺติโก สิยา
ปญฺหา เมสา กุสเลหิ จินฺติตา ฯ
[๑๓๒๐] โจทยิตฺวา สารยิตฺวา
สมฺมุขีภูตสฺส กเรยฺย กมฺมํ
กตญฺจ กมฺมํ อกตํ ภเวยฺย
การโก จ สงฺโฆ สาปตฺติโก สิยา
ปญฺหา เมสา กุสเลหิ จินฺติตา ฯ
[๑๓๒๑] ฉินฺทนฺตสฺส อาปตฺติ ฉินฺทนฺตสฺส อนาปตฺติ
ฉาเทนฺตสฺส อาปตฺติ ฉาเทนฺตสฺส อนาปตฺติ
ปญฺหา เมสา กุสเลหิ จินฺติตา ฯ
[๑๓๒๒] สจฺจํ ภณนฺโต ครุกํ มุสา จ ลหุ ภาสโต
มุสา ภณนฺโต ครุกํ สจฺจญฺจ ลหุ ภาสโต
ปญฺหา เมสา กุสเลหิ จินฺติตา ฯ
[๑๓๒๓] อธิฏฺฐิตํ รชนาย รตฺตํ
กปฺปกตํปิ สนฺตํ
ปริภุญฺชนฺตสฺส อาปตฺติ
ปญฺหา เมสา กุสเลหิ จินฺติตา ฯ
[๑๓๒๔] อตฺถงฺคเต สุริเย ภิกฺขุ มํสานิ ขาทติ
น อุมฺมตฺตโก น จ ปน ขิตฺตจิตฺโต
น จาปิ โส เวทนฏฺโฏ ๑- ภเวยฺย
น จสฺส โหติ อาปตฺติ
โส จ ธมฺโม สุคเตน เทสิโต
ปญฺหา เมสา กุสเลหิ จินฺติตา ฯ
[๑๓๒๕] น รตฺตจิตฺโต น จ ปน เถยฺยจิตฺโต
น จาปิ โส ปรํ มรณาย เจตยิ
@เชิงอรรถ: ๑ ม. เวทนาฏฺโฏ ฯ
สลากํ เทนฺตสฺส โหติ เฉชฺชํ
ปฏิคฺคณฺหนฺตสฺส ถุลฺลจฺจยํ
ปญฺหา เมสา กุสเลหิ จินฺติตา ฯ
[๑๓๒๖] น จาปิ อารญฺญกํ สาสงฺกสมฺมตํ
น จาปิ สงฺเฆน สมฺมติ ทินฺนา
น จสฺส กฐินํ อตฺถตํ ตตฺเถว จีวรํ
นิกฺขิปิตฺวา คจฺเฉยฺย อฑฺฒโยชนํ
ตสฺเสว ๑- อรุณํ อุคฺคจฺฉนฺตสฺส อนาปตฺติ
ปญฺหา เมสา กุสเลหิ จินฺติตา ฯ
[๑๓๒๗] กายิกานิ น วาจสิกานิ
สพฺพานิ นานาวตฺถุกานิ
อปุพฺพํ อจริมํ อาปชฺเชยฺย เอกโต
ปญฺหา เมสา กุสเลหิ จินฺติตา ฯ
[๑๓๒๘] วาจสิกานิ น กายิกานิ
สพฺพานิ นานาวตฺถุกานิ
อปุพฺพํ อจริมํ อาปชฺเชยฺย เอกโต
ปญฺหา เมสา กุสเลหิ จินฺติตา ฯ
[๑๓๒๙] ติสฺสิตฺถิโย เมถุนํ ตํ น เสเว
ตโย ปุริเส ตโย จ ๒- อนริยปณฺฑเก
น จาจเร เมถุนํ พฺยญฺชนสฺมึ
@เชิงอรรถ: ๑ ม. ตตฺเถว ฯ ๒ ม. จสทฺโท นตฺถิ ฯ
เฉชฺชํ สิยา เมถุนธมฺมปจฺจยา
ปญฺหา เมสา กุสเลหิ จินฺติตา ฯ
[๑๓๓๐] มาตรํ จีวรํ ยาเจ โน จ สงฺฆสฺส ๑- ปริณตํ
เกนสฺส โหติ อาปตฺติ อนาปตฺติ จ ญาตเก
ปญฺหา เมสา กุสเลหิ จินฺติตา ฯ
[๑๓๓๑] กุทฺโธ อาราธโก โหติ กุทฺโธ โหติ ครหิโย
อถ โก นาม โส ธมฺโม เยน กุทฺโธ ปสํสิโย
ปญฺหา เมสา กุสเลหิ จินฺติตา ฯ
[๑๓๓๒] ตุฏฺโฐ อาราธโก โหติ ตุฏฺโฐ โหติ ครหิโย
อถ โก นาม โส ธมฺโม เยน ตุฏฺโฐ ครหิโย
ปญฺหา เมสา กุสเลหิ จินฺติตา ฯ
[๑๓๓๓] สงฺฆาทิเสสํ ถุลฺลจฺจยํ
ปาจิตฺติยํ ปาฏิเทสนียํ
ทุกฺกฏํ อาปชฺเชยฺย เอกโต
ปญฺหา เมสา กุสเลหิ จินฺติตา ฯ
[๑๓๓๔] อุโภ ปริปุณฺณวีสติวสฺสา อุภินฺนํ
เอกุปชฺฌาโย เอกาจริโย เอกา กมฺมวาจา
เอโก อุปสมฺปนฺโน เอโก อนุปสมฺปนฺโน
ปญฺหา เมสา กุสเลหิ จินฺติตา ฯ
[๑๓๓๕] อกปฺปกตํ นปิ รชนาย รตฺตํ
@เชิงอรรถ: ๑ ม. สงฺเฆ ฯ
เตน นิวตฺโถ เยน กามํ วเชยฺย
น จสฺส โหติ อาปตฺติ
โส จ ธมฺโม สุคเตน เทสิโต
ปญฺหา เมสา กุสเลหิ จินฺติตา ฯ
[๑๓๓๖] น เทติ นปฺปฏิคฺคณฺหาติ
ปฏิคฺคโห เตน น วิชฺชติ
อาปชฺชติ ครุกํ น ลหุกํ
ตญฺจ ปริโภคปจฺจยา
ปญฺหา เมสา กุสเลหิ จินฺติตา ฯ
[๑๓๓๗] น เทติ นปฺปฏิคฺคณฺหาติ
ปฏิคฺคโห เตน น วิชฺชติ
อาปชฺชติ ลหุกํ น ครุกํ
ตญฺจ ปริโภคปจฺจยา
ปญฺหา เมสา กุสเลหิ จินฺติตา ฯ
[๑๓๓๘] อาปชฺชติ ครุกํ สาวเสสํ
ฉาเทติ อนาทริยํ ปฏิจฺจ
น ภิกฺขุนี โน จ ผุเสยฺย วชฺชํ
ปญฺหา เมสา กุสเลหิ จินฺติตา ฯ
เสทโมจนคาถา ๑- นิฏฺฐิตา ฯ
@เชิงอรรถ: ๑ ยุ. เสทโมจกคาถา ฯ
ตสฺสุทฺทานํ
[๑๓๓๙] อสํวาโส อวิสฺสชฺชิ ทส จ อนุกฺขิตฺตโก
อุเปติ ธมฺมํ อุพฺภกฺขํ ๑- ตโต สญฺญาจิกา จ เทฺว
น กายิกญฺจ ครุกํ น กายิกํ สุนาสิตํ ๒-
อนาลปนฺโต สิกฺขา จ อุโภ จ จตุโร ชนา
อิตฺถี เตลญฺจ นิสฺสคฺคิ ภิกฺขู จ ปทวีติโย
นิวตฺโถ จ น จ ญตฺติ น มาตรํ ปิตรํ หเน
อโจทยิตฺวา โจทยิตฺวา ฉินฺทนฺตํ สจฺจเมว จ
อธิฏฺฐิตญฺจตฺถงฺคเต น รตฺตํ น จารญฺญกํ
กายิกา วาจสิกา จ ๓- ติสฺสิตฺถี จาปิ มาตรํ
กุทฺโธ อาราธโก ตุฏฺโฐ สงฺฆาทิเสสกา ๔- อุโภ
อกปฺปกตํ น เทติ น เทตาปชฺชเต ๕- ครุํ
เสทโมจนิกา คาถา ปญฺหา วิญฺญูวิภาวิตาติ ฯ
--------------
@เชิงอรรถ: ๑ ม. ยุ. อุพฺภกฺขกํ ฯ ๒ ยุ. น วาจสิกํ ฯ ๓ ยุ. กายิกวาจสิกา ฯ
@๔ ม. ยุ. สงฺฆาทิเสสา จ ฯ ๕ ยุ. น เทตาปชฺชติ ฯ
ปญฺจ วคฺคา
[๑๓๔๐] จตฺตาริ กมฺมานิ อปโลกนกมฺมํ ญตฺติกมฺมํ
ญตฺติทุติยกมฺมํ ญตฺติจตุตฺถกมฺมํ ฯ อิมานิ จตฺตาริ กมฺมานิ
กตีหากาเรหิ วิปชฺชนฺติ ฯ อิมานิ จตฺตาริ กมฺมานิ ปญฺจหากาเรหิ
วิปชฺชนฺติ วตฺถุโต วา ญตฺติโต วา อนุสฺสาวนโต วา สีมโต
วา ปริสโต วา ฯ
[๑๓๔๑] กถํ วตฺถุโต กมฺมานิ วิปชฺชนฺติ ฯ สมฺมุขากรณียํ
กมฺมํ อสมฺมุขา กโรติ วตฺถุวิปนฺนํ อธมฺมกมฺมํ ฯ ปฏิปุจฺฉากรณียํ
กมฺมํ อปฺปฏิปุจฺฉา กโรติ วตฺถุวิปนฺนํ อธมฺมกมฺมํ ฯ
ปฏิญฺญาย กรณียํ กมฺมํ อปฺปฏิญฺญาย กโรติ วตฺถุวิปนฺนํ
อธมฺมกมฺมํ ฯ สติวินยารหสฺส อมูฬฺหวินยํ เทติ วตฺถุวิปนฺนํ
อธมฺมกมฺมํ ฯ อมูฬฺหวินยารหสฺส ตสฺสปาปิยสิกากมฺมํ กโรติ
วตฺถุวิปนฺนํ อธมฺมกมฺมํ ฯ ตสฺสปาปิยสิกากมฺมารหสฺส ตชฺชนียกมฺมํ
กโรติ วตฺถุวิปนฺนํ อธมฺมกมฺมํ ฯ ตชฺชนียกมฺมารหสฺส นิยสฺสกมฺมํ
กโรติ วตฺถุวิปนฺนํ อธมฺมกมฺมํ ฯ นิยสฺสกมฺมารหสฺส ปพฺพาชนียกมฺมํ
กโรติ วตฺถุวิปนฺนํ อธมฺมกมฺมํ ฯ ปพฺพาชนียกมฺมารหสฺส
ปฏิสารณียกมฺมํ กโรติ วตฺถุวิปนฺนํ อธมฺมกมฺมํ ฯ
ปฏิสารณียกมฺมารหสฺส อุกฺเขปนียกมฺมํ กโรติ วตฺถุวิปนฺนํ
อธมฺมกมฺมํ ฯ อุกฺเขปนียกมฺมารหสฺส ปริวาสํ เทติ วตฺถุวิปนฺนํ
อธมฺมกมฺมํ ฯ ปริวาสารหํ มูลาย ปฏิกสฺสติ วตฺถุวิปนฺนํ
อธมฺมกมฺมํ ฯ มูลาย ปฏิกสฺสนารหสฺส มานตฺตํ เทติ
วตฺถุวิปนฺนํ อธมฺมกมฺมํ ฯ มานตฺตารหํ อพฺเภติ วตฺถุวิปนฺนํ
อธมฺมกมฺมํ ฯ อพฺภานารหํ อุปสมฺปาเทติ วตฺถุวิปนฺนํ อธมฺมกมฺมํ ฯ
อนุโปสเถ อุโปสถํ กโรติ วตฺถุวิปนฺนํ อธมฺมกมฺมํ ฯ อปวารณาย
ปวาเรติ วตฺถุวิปนฺนํ อธมฺมกมฺมํ ฯ เอวํ วตฺถุโต กมฺมานิ
วิปชฺชนฺติ ฯ
[๑๓๔๒] กถํ ญตฺติโต กมฺมานิ วิปชฺชนฺติ ฯ ปญฺจหากาเรหิ
ญตฺติโต กมฺมานิ วิปชฺชนฺติ วตฺถุํ น ปรามสติ สงฺฆํ น
ปรามสติ ปุคฺคลํ น ปรามสติ ญตฺตึ น ปรามสติ ปจฺฉา
วา ญตฺตึ ฐเปติ ฯ อิเมหิ ปญฺจหากาเรหิ ญตฺติโต กมฺมานิ
วิปชฺชนฺติ ฯ
[๑๓๔๓] กถํ อนุสฺสาวนโต กมฺมานิ วิปชฺชนฺติ ฯ
ปญฺจหากาเรหิ อนุสฺสาวนโต กมฺมานิ วิปชฺชนฺติ วตฺถุํ น
ปรามสติ สงฺฆํ น ปรามสติ ปุคฺคลํ น ปรามสติ สาวนํ
หาเปติ อกาเล วา สาเวติ ฯ อิเมหิ ปญฺจหากาเรหิ อนุสฺสาวนโต
กมฺมานิ วิปชฺชนฺติ ฯ
[๑๓๔๔] กถํ สีมโต กมฺมานิ วิปชฺชนฺติ ฯ เอกาทสหากาเรหิ
สีมโต กมฺมานิ วิปชฺชนฺติ อติขุทฺทกํ สีมํ สมฺมนฺนติ อิติมหตึ
สีมํ สมฺมนฺนติ ขณฺฑนิมิตฺตํ สีมํ สมฺมนฺนติ ฉายานิมิตฺตํ
สีมํ สมฺมนฺนติ อนิมิตฺตํ สีมํ สมฺมนฺนติ พหิสีเม ฐิโต
สีมํ สมฺมนฺนติ นทิยา สีมํ สมฺมนฺนติ สมุทฺเท สีมํ สมฺมนฺนติ
ชาตสฺสเร สีมํ สมฺมนฺนติ สีมาย สีมํ สมฺภินฺทติ สีมาย
สีมํ อชฺโฌตฺถรติ ฯ อิเมหิ เอกาทสหากาเรหิ สีมโต กมฺมานิ
วิปชฺชนฺติ ฯ
[๑๓๔๕] กถํ ปริสโต กมฺมานิ วิปชฺชนฺติ ฯ ทฺวาทสหากาเรหิ
ปริสโต กมฺมานิ วิปชฺชนฺติ จตุวคฺคกรเณ กมฺเม ยาวติกา
ภิกฺขู กมฺมปฺปตฺตา เต อนาคตา โหนฺติ ฉนฺทารหานํ ฉนฺโท
อนาหโฏ โหติ สมฺมุขีภูตา ปฏิกฺโกสนฺติ จตุวคฺคกรเณ
กมฺเม ยาวติกา ภิกฺขู กมฺมปฺปตฺตา เต อาคตา โหนฺติ
ฉนฺทารหานํ ฉนฺโท อนาหโฏ โหติ สมฺมุขีภูตา ปฏิกฺโกสนฺติ
จตุวคฺคกรเณ กมฺเม ยาวติกา ภิกฺขู กมฺมปฺปตฺตา เต อาคตา
โหนฺติ ฉนฺทารหานํ ฉนฺโท อาหโฏ โหติ สมฺมุขีภูตา
ปฏิกฺโกสนฺติ ปญฺจวคฺคกรเณ กมฺเม ฯเปฯ ทสวคฺคกรเณ
กมฺเม ฯเปฯ วีสติวคฺคกรเณ กมฺเม ยาวติกา ภิกฺขู กมฺมปฺปตฺตา
เต อนาคตา โหนฺติ ฉนฺทารหานํ ฉนฺโท อนาหโฏ โหติ
สมฺมุขีภูตา ปฏิกฺโกสนฺติ วีสติวคฺคกรเณ กมฺเม ยาวติกา
ภิกฺขู กมฺมปฺปตฺตา เต อาคตา โหนฺติ ฉนฺทารหานํ ฉนฺโท
อนาหโฏ โหติ สมฺมุขีภูตา ปฏิกฺโกสนฺติ วีสติวคฺคกรเณ
กมฺเม ยาวติกา ภิกฺขู กมฺมปฺปตฺตา เต อาคตา โหนฺติ
ฉนฺทารหานํ ฉนฺโท อาหโฏ โหติ สมฺมุขีภูตา ปฏิกฺโกสนฺติ ฯ
อิเมหิ ทฺวาทสหากาเรหิ ปริสโต กมฺมานิ วิปชฺชนฺติ ฯ
[๑๓๔๖] จตุวคฺคกรเณ กมฺเม จตฺตาโร ภิกฺขู ปกตตฺตา
กมฺมปฺปตฺตา อวเสสา ปกตตฺตา ฉนฺทารหา ยสฺส สงฺโฆ
กมฺมํ กโรติ โส เนว กมฺมปฺปตฺโต นปิ ฉนฺทารโห อปิจ
กมฺมารโห ฯ ปญฺจวคฺคกรเณ กมฺเม ปญฺจ ภิกฺขู ปกตตฺตา
กมฺมปฺปตฺตา อวเสสา ปกตตฺตา ฉนฺทารหา ยสฺส สงฺโฆ
กมฺมํ กโรติ โส เนว กมฺมปฺปตฺโต นปิ ฉนฺทารโห อปิจ
กมฺมารโห ฯ ทสวคฺคกรเณ กมฺเม ทส ภิกฺขู ปกตตฺตา
กมฺมปฺปตฺตา อวเสสา ปกตตฺตา ฉนฺทารหา ยสฺส สงฺโฆ กมฺมํ
กโรติ โส เนว กมฺมปฺปตฺโต นปิ ฉนฺทารโห อปิจ กมฺมารโห ฯ
วีสติวคฺคกรเณ กมฺเม วีสติ ภิกฺขู ปกตตฺตา กมฺมปฺปตฺตา
อวเสสา ปกตตฺตา ฉนฺทารหา ยสฺส สงฺโฆ กมฺมํ กโรติ
โส เนว กมฺมปฺปตฺโต นปิ ฉนฺทารโห อปิจ กมฺมารโห ฯ
[๑๓๔๗] จตฺตาริ กมฺมานิ อปโลกนกมฺมํ ญตฺติกมฺมํ
ญตฺติทุติยกมฺมํ ญตฺติจตุตฺถกมฺมํ ฯ อิมานิ จตฺตาริ กมฺมานิ
กตีหากาเรหิ วิปชฺชนฺติ ฯ อิมานิ จตฺตาริ กมฺมานิ ปญฺจหากาเรหิ
วิปชฺชนฺติ วตฺถุโต วา ญตฺติโต วา อนุสฺสาวนโต วา สีมโต
วา ปริสโต วา ฯ
[๑๓๔๘] กถํ วตฺถุโต กมฺมานิ วิปชฺชนฺติ ฯ ปณฺฑกํ
อุปสมฺปาเทติ วตฺถุวิปนฺนํ อธมฺมกมฺมํ ฯ เถยฺยสํวาสกํ อุปสมฺปาเทติ
วตฺถุวิปนฺนํ อธมฺมกมฺมํ ฯ ติตฺถิยปกฺกนฺตกํ อุปสมฺปาเทติ
วตฺถุวิปนฺนํ อธมฺมกมฺมํ ฯ ติรจฺฉานคตํ อุปสมฺปาเทติ วตฺถุวิปนฺนํ
อธมฺมกมฺมํ ฯ มาตุฆาตกํ อุปสมฺปาเทติ วตฺถุวิปนฺนํ อธมฺมกมฺมํ ฯ
ปิตุฆาตกํ อุปสมฺปาเทติ วตฺถุวิปนฺนํ อธมฺมกมฺมํ ฯ อรหนฺตฆาตกํ
อุปสมฺปาเทติ วตฺถุวิปนฺนํ อธมฺมกมฺมํ ฯ ภิกฺขุนีทูสกํ อุปสมฺปาเทติ
วตฺถุวิปนฺนํ อธมฺมกมฺมํ ฯ สงฺฆเภทกํ อุปสมฺปาเทติ วตฺถุวิปนฺนํ
อธมฺมกมฺมํ ฯ โลหิตุปฺปาทกํ อุปสมฺปาเทติ วตฺถุวิปนฺนํ
อธมฺมกมฺมํ ฯ อุภโตพฺยญฺชนกํ อุปสมฺปาเทติ วตฺถุวิปนฺนํ
อธมฺมกมฺมํ ฯ อูนวีสติวสฺสํ ปุคฺคลํ อุปสมฺปาเทติ วตฺถุวิปนฺนํ
อธมฺมกมฺมํ ฯ เอวํ วตฺถุโต กมฺมานิ วิปชฺชนฺติ ฯ
[๑๓๔๙] กถํ ญตฺติโต กมฺมานิ วิปชฺชนฺติ ฯ ปญฺจหากาเรหิ
ญตฺติโต กมฺมานิ วิปชฺชนฺติ วตฺถุํ น ปรามสติ สงฺฆํ น
ปรามสติ ปุคฺคลํ น ปรามสติ ญตฺตึ น ปรามสติ ปจฺฉา
วา ญตฺตึ ฐเปติ ฯ อิเมหิ ปญฺจหากาเรหิ ญตฺติโต กมฺมานิ
วิปชฺชนฺติ ฯ
[๑๓๕๐] กถํ อนุสฺสาวนโต กมฺมานิ วิปชฺชนฺติ ฯ ปญฺจหากาเรหิ
อนุสฺสาวนโต กมฺมานิ วิปชฺชนฺติ วตฺถุํ น ปรามสติ
สงฺฆํ น ปรามสติ ปุคฺคลํ น ปรามสติ สาวนํ หาเปติ
อกาเล วา สาเวติ ฯ อิเมหิ ปญฺจหากาเรหิ อนุสฺสาวนโต
กมฺมานิ วิปชฺชนฺติ ฯ
[๑๓๕๑] กถํ สีมโต กมฺมานิ วิปชฺชนฺติ ฯ เอกาทสหากาเรหิ
สีมโต กมฺมานิ วิปชฺชนฺติ อติขุทฺทกํ สีมํ สมฺมนฺนติ อติมหตึ
สีมํ สมฺมนฺนติ ขณฺฑนิมิตฺตํ สีมํ สมฺมนฺนติ ฉายานิมิตฺตํ
สีมํ สมฺมนฺนติ อนิมิตฺตํ สีมํ สมฺมนฺนติ พหิสีเม ฐิโต สีมํ
สมฺมนฺนติ นทิยา สีมํ สมฺมนฺนติ สมุทฺเท สีมํ สมฺมนฺนติ
ชาตสฺสเร สีมํ สมฺมนฺนติ สีมาย สีมํ สมฺภินฺทติ สีมาย สีมํ
อชฺโฌตฺถรติ ฯ อิเมหิ เอกาทสหากาเรหิ สีมโต กมฺมานิ วิปชฺชนฺติ ฯ
[๑๓๕๒] กถํ ปริสโต กมฺมานิ วิปชฺชนฺติ ฯ ทฺวาทสหากาเรหิ
ปริสโต กมฺมานิ วิปชฺชนฺติ จตุวคฺคกรเณ กมฺเม ยาวติกา
ภิกฺขู กมฺมปฺปตฺตา เต อนาคตา โหนฺติ ฉนฺทารหานํ ฉนฺโท
อนาหโฏ โหติ สมฺมุขีภูตา ปฏิกฺโกสนฺติ จตุวคฺคกรเณ
กมฺเม ยาวติกา ภิกฺขู กมฺมปฺปตฺตา เต อาคตา โหนฺติ
ฉนฺทารหานํ ฉนฺโท อนาหโฏ โหติ สมฺมุขีภูตา ปฏิกฺโกสนฺติ
จตุวคฺคกรเณ กมฺเม ยาวติกา ภิกฺขู กมฺมปฺปตฺตา เต อาคตา
โหนฺติ ฉนฺทารหานํ ฉนฺโท อาหโฏ โหติ สมฺมุขีภูตา
ปฏิกฺโกสนฺติ ปญฺจวคฺคกรเณ กมฺเม ฯเปฯ ทสวคฺคกรเณ กมฺเม ฯเปฯ
วีสติวคฺคกรเณ กมฺเม ยาวติกา ภิกฺขู กมฺมปฺปตฺตา เต
อนาคตา โหนฺติ ฉนฺทารหานํ ฉนฺโท อนาหโฏ โหติ สมฺมุขีภูตา
ปฏิกฺโกสนฺติ วีสติวคฺคกรเณ กมฺเม ยาวติกา ภิกฺขู กมฺมปฺปตฺตา
เต อาคตา โหนฺติ ฉนฺทารหานํ ฉนฺโท อนาหโฏ โหติ สมฺมุขีภูตา
ปฏิกฺโกสนฺติ วีสติวคฺคกรเณ กมฺเม ยาวติกา ภิกฺขู กมฺมปฺปตฺตา
เต อาคตา โหนฺติ ฉนฺทารหานํ ฉนฺโท อาหโฏ โหติ สมฺมุขีภูตา
ปฏิกฺโกสนฺติ ฯ อิเมหิ ทฺวาทสหากาเรหิ ปริสโต กมฺมานิ
วิปชฺชนฺติ ฯ
[๑๓๕๓] อปโลกนกมฺมํ กติ ฐานานิ คจฺฉติ ญตฺติกมฺมํ
กติ ฐานานิ คจฺฉติ ญตฺติทุติยกมฺมํ กติ ฐานานิ คจฺฉติ
ญตฺติจตุตฺถกมฺมํ กติ ฐานานิ คจฺฉติ ฯ อปโลกนกมฺมํ ปญฺจ
ฐานานิ คจฺฉติ ญตฺติกมฺมํ นว ฐานานิ คจฺฉติ ญตฺติทุติยกมฺมํ
สตฺต ฐานานิ คจฺฉติ ญตฺติจตุตฺถกมฺมํ สตฺต ฐานานิ คจฺฉติ ฯ
[๑๓๕๔] อปโลกนกมฺมํ กตมานิ ปญฺจ ฐานานิ คจฺฉติ ฯ
โอสารณํ นิสฺสารณํ ภณฺฑุกมฺมํ พฺรหฺมทณฺฑํ กมฺมลกฺขณญฺเญว
ปญฺจมํ ฯ อปโลกนกมฺมํ อิมานิ ปญฺจ ฐานานิ คจฺฉติ ฯ
[๑๓๕๕] ญตฺติกมฺมํ กตมานิ นว ฐานานิ คจฺฉติ ฯ โอสารณํ
นิสฺสารณํ อุโปสถํ ปวารณํ สมฺมตึ ทานํ ปฏิคฺคหํ ปจฺจุกฺกฑฺฒนํ
กมฺมลกฺขณญฺเญว นวมํ ฯ ญตฺติกมฺมํ อิมานิ นว ฐานานิ
คจฺฉติ ฯ
[๑๓๕๖] ญตฺติทุติยกมฺมํ กตมานิ สตฺต ฐานานิ คจฺฉติ ฯ
โอสารณํ นิสฺสารณํ สมฺมตึ ทานํ อุทฺธรณํ เทสนํ กมฺมลกฺขณญฺเญว
สตฺตมํ ฯ ญตฺติทุติยกมฺมํ อิมานิ สตฺต ฐานานิ คจฺฉติ ฯ
[๑๓๕๗] ญตฺติจตุตฺถกมฺมํ กตมานิ สตฺต ฐานานิ คจฺฉติ ฯ
โอสารณํ นิสฺสารณํ สมฺมตึ ทานํ นิคฺคหํ สมนุภาสนํ กมฺมลกฺขณญฺเญว
สตฺตมํ ฯ ญตฺติจตุตฺถกมฺมํ อิมานิ สตฺต ฐานานิ คจฺฉติ ฯ
[๑๓๕๘] จตุวคฺคกรเณ กมฺเม จตฺตาโร ภิกฺขู ปกตตฺตา
กมฺมปฺปตฺตา อวเสสา ปกตตฺตา ฉนฺทารหา ยสฺส สงฺโฆ
กมฺมํ กโรติ โส เนว กมฺมปฺปตฺโต นปิ ฉนฺทารโห อปิจ
กมฺมารโห ฯ ปญฺจวคฺคกรเณ กมฺเม ฯเปฯ ทสวคฺคกรเณ
กมฺเม ฯเปฯ วีสติวคฺคกรเณ กมฺเม วีสติ ภิกฺขู ปกตตฺตา
กมฺมปฺปตฺตา อวเสสา ปกตตฺตา ฉนฺทารหา ยสฺส สงฺโฆ
กมฺมํ กโรติ โส เนว กมฺมปฺปตฺโต นปิ ฉนฺทารโห อปิจ
กมฺมารโห ฯ
กมฺมวคฺโค นิฏฺฐิโต ปฐโม ฯ
[๑๓๕๙] เทฺว อตฺถวเส ปฏิจฺจ ตถาคเตน สาวกานํ สิกฺขาปทํ
ปญฺญตฺตํ สงฺฆสุฏฺฐุตาย สงฺฆผาสุตาย ฯ อิเม เทฺว อตฺถวเส
ปฏิจฺจ ตถาคเตน สาวกานํ สิกฺขาปทํ ปญฺญตฺตํ ฯ เทฺว อตฺถวเส
ปฏิจฺจ ตถาคเตน สาวกานํ สิกฺขาปทํ ปญฺญตฺตํ ทุมฺมงฺกูนํ
ปุคฺคลานํ นิคฺคหาย เปสลานํ ภิกฺขูนํ ผาสุวิหาราย ฯ อิเม เทฺว
อตฺถวเส ปฏิจฺจ ตถาคเตน สาวกานํ สิกฺขาปทํ ปญฺญตฺตํ ฯ
เทฺว อตฺถวเส ปฏิจฺจ ตถาคเตน สาวกานํ สิกฺขาปทํ ปญฺญตฺตํ
ทิฏฺฐธมฺมิกานํ อาสวานํ สํวราย สมฺปรายิกานํ อาสวานํ ปฏิฆาตาย ฯ
อิเม เทฺว อตฺถวเส ปฏิจฺจ ตถาคเตน สาวกานํ สิกฺขาปทํ
ปญฺญตฺตํ ฯ เทฺว อตฺถวเส ปฏิจฺจ ตถาคเตน สาวกานํ สิกฺขาปทํ
ปญฺญตฺตํ ทิฏฺฐธมฺมิกานํ เวรานํ สํวราย สมฺปรายิกานํ เวรานํ
ปฏิฆาตาย ฯ อิเม เทฺว อตฺถวเส ปฏิจฺจ ตถาคเตน สาวกานํ
สิกฺขาปทํ ปญฺญตฺตํ ฯ เทฺว อตฺถวเส ปฏิจฺจ ตถาคเตน สาวกานํ
สิกฺขาปทํ ปญฺญตฺตํ ทิฏฺฐธมฺมิกานํ วชฺชานํ สํวราย สมฺปรายิกานํ
วชฺชานํ ปฏิฆาตาย ฯ อิเม เทฺว อตฺถวเส ปฏิจฺจ ตถาคเตน
สาวกานํ สิกฺขาปทํ ปญฺญตฺตํ ฯ เทฺว อตฺถวเส ปฏิจฺจ ตถาคเตน
สาวกานํ สิกฺขาปทํ ปญฺญตฺตํ ทิฏฺฐธมฺมิกานํ ภยานํ สํวราย
สมฺปรายิกานํ ภยานํ ปฏิฆาตาย ฯ
{๑๓๕๙.๑} อิเม เทฺว อตฺถวเส ปฏิจฺจ ตถาคเตน สาวกานํ
สิกฺขาปทํ ปญฺญตฺตํ ฯ เทฺว อตฺถวเส ปฏิจฺจ ตถาคเตน สาวกานํ
สิกฺขาปทํ ปญฺญตฺตํ ทิฏฺฐธมฺมิกานํ อกุสลานํ ธมฺมานํ สํวราย
สมฺปรายิกานํ อกุสลานํ ธมฺมานํ ปฏิฆาตาย ฯ อิเม เทฺว อตฺถวเส
ปฏิจฺจ ตถาคเตน สาวกานํ สิกฺขาปทํ ปญฺญตฺตํ ฯ เทฺว อตฺถวเส
ปฏิจฺจ ตถาคเตน สาวกานํ สิกฺขาปทํ ปญฺญตฺตํ คิหีนํ อนุกมฺปาย
ปาปิจฺฉานํ ปกฺขุปจฺเฉทาย ฯ อิเม เทฺว อตฺถวเส ปฏิจฺจ ตถาคเตน
สาวกานํ สิกฺขาปทํ ปญฺญตฺตํ ฯ เทฺว อตฺถวเส ปฏิจฺจ ตถาคเตน
สาวกานํ สิกฺขาปทํ ปญฺญตฺตํ อปฺปสนฺนานํ ปสาทาย ปสนฺนานํ
ภิยฺโยภาวาย ฯ อิเม เทฺว อตฺถวเส ปฏิจฺจ ตถาคเตน สาวกานํ
สิกฺขาปทํ ปญฺญตฺตํ ฯ
เทฺว อตฺถวเส ปฏิจฺจ ตถาคเตน สาวกานํ สิกฺขาปทํ ปญฺญตฺตํ
สทฺธมฺมฏฺฐิติยา วินยานุคฺคหาย ฯ อิเม เทฺว อตฺถวเส ปฏิจฺจ
ตถาคเตน สาวกานํ สิกฺขาปทํ ปญฺญตฺตนฺติ ฯ
อตฺถวสวคฺโค นิฏฺฐิโต ทุติโย ฯ
[๑๓๖๐] เทฺว อตฺถวเส ปฏิจฺจ ตถาคเตน สาวกานํ ปาติโมกฺขํ
ปญฺญตฺตํ ฯเปฯ ปาติโมกฺขุทฺเทโส ปญฺญตฺโต ปาติโมกฺขฏฺฐปนํ
ปญฺญตฺตํ ปวารณา ปญฺญตฺตา ปวารณาฐปนํ ปญฺญตฺตํ
ตชฺชนียกมฺมํ ปญฺญตฺตํ นิยสฺสกมฺมํ ปญฺญตฺตํ ปพฺพาชนียกมฺมํ
ปญฺญตฺตํ ปฏิสารณียกมฺมํ ปญฺญตฺตํ อุกฺเขปนียกมฺมํ ปญฺญตฺตํ
ปริวาสทานํ ปญฺญตฺตํ มูลาย ปฏิกสฺสนา ปญฺญตฺตา มานตฺตทานํ
ปญฺญตฺตํ อพฺภานํ ปญฺญตฺตํ โอสารณียํ ปญฺญตฺตํ
นิสฺสารณียํ ปญฺญตฺตํ อุปสมฺปทา ปญฺญตฺตา อปโลกนกมฺมํ
ปญฺญตฺตํ ญตฺติกมฺมํ ปญฺญตฺตํ ญตฺติทุติยกมฺมํ ปญฺญตฺตํ
ญตฺติจตุตฺถกมฺมํ ปญฺญตฺตนฺติ ฯ
ปญฺญตฺติวคฺโค นิฏฺฐิโต ตติโย ฯ
[๑๓๖๑] อปฺปญฺญตฺเต ปญฺญตฺตํ ปญฺญตฺเต อนุปฺปญฺญตฺตํ
สมฺมุขาวินโย ปญฺญตฺโต สติวินโย ปญฺญตฺโต อมูฬฺหวินโย
ปญฺญตฺโต ปฏิญฺญาตกรณํ ปญฺญตฺตํ เยภุยฺยสิกา ปญฺญตฺตา
ตสฺสปาปิยสิกา ปญฺญตฺตา ติณวตฺถารโก ปญฺญตฺโต สงฺฆสุฏฺฐุตาย
สงฺฆผาสุตาย ฯ อิเม เทฺว อตฺถวเส ปฏิจฺจ ตถาคเตน
สาวกานํ ติณวตฺถารโก ปญฺญตฺโต ฯ เทฺว อตฺถวเส ปฏิจฺจ
ตถาคเตน สาวกานํ ติณวตฺถารโก ปญฺญตฺโต ทุมฺมงฺกูนํ ปุคฺคลานํ
นิคฺคหาย เปสลานํ ภิกฺขูนํ ผาสุวิหาราย ฯ อิเม เทฺว อตฺถวเส
ปฏิจฺจ ตถาคเตน สาวกานํ ติณวตฺถารโก ปญฺญตฺโต ฯ เทฺว
อตฺถวเส ปฏิจฺจ ตถาคเตน สาวกานํ ติณวตฺถารโก ปญฺญตฺโต
ทิฏฺฐธมฺมิกานํ อาสวานํ สํวราย สมฺปรายิกานํ อาสวานํ
ปฏิฆาตาย ฯ อิเม เทฺว อตฺถวเส ปฏิจฺจ ตถาคเตน สาวกานํ
ติณวตฺถารโก ปญฺญตฺโต ฯ เทฺว อตฺถวเส ปฏิจฺจ ตถาคเตน
สาวกานํ ติณวตฺถารโก ปญฺญตฺโต ทิฏฺฐธมฺมิกานํ เวรานํ สํวราย
สมฺปรายิกานํ เวรานํ ปฏิฆาตาย ฯ
{๑๓๖๑.๑} อิเม เทฺว อตฺถวเส ปฏิจฺจ ตถาคเตน สาวกานํ
ติณวตฺถารโก ปญฺญตฺโต ฯ เทฺว อตฺถวเส ปฏิจฺจ ตถาคเตน
สาวกานํ ติณวตฺถารโก ปญฺญตฺโต ทิฏฺฐธมฺมิกานํ วชฺชานํ สํวราย
สมฺปรายิกานํ วชฺชานํ ปฏิฆาตาย ฯ อิเม เทฺว อตฺถวเส ปฏิจฺจ
ตถาคเตน สาวกานํ ติณวตฺถารโก ปญฺญตฺโต ฯ เทฺว อตฺถวเส
ปฏิจฺจ ตถาคเตน สาวกานํ ติณวตฺถารโก ปญฺญตฺโต ทิฏฺฐธมฺมิกานํ
ภยานํ สํวราย สมฺปรายิกานํ ภยานํ ปฏิฆาตาย ฯ อิเม เทฺว อตฺถวเส
ปฏิจฺจ ตถาคเตน สาวกานํ ติณวตฺถารโก ปญฺญตฺโต ฯ เทฺว อตฺถวเส
ปฏิจฺจ ตถาคเตน สาวกานํ ติณวตฺถารโก ปญฺญตฺโต ทิฏฺฐธมฺมิกานํ
อกุสลานํ ธมฺมานํ สํวราย สมฺปรายิกานํ อกุสลานํ ธมฺมานํ
ปฏิฆาตาย ฯ อิเม เทฺว อตฺถวเส ปฏิจฺจ ตถาคเตน สาวกานํ
ติณวตฺถารโก ปญฺญตฺโต ฯ เทฺว อตฺถวเส ปฏิจฺจ ตถาคเตน
สาวกานํ ติณวตฺถารโก ปญฺญตฺโต คิหีนํ อนุกมฺปาย ปาปิจฺฉานํ
ปกฺขุปจฺเฉทาย ฯ อิเม เทฺว อตฺถวเส ปฏิจฺจ ตถาคเตน สาวกานํ
ติณวตฺถารโก ปญฺญตฺโต ฯ เทฺว อตฺถวเส ปฏิจฺจ ตถาคเตน
สาวกานํ ติณวตฺถารโก ปญฺญตฺโต อปฺปสนฺนานํ ปสาทาย
ปสนฺนานํ ภิยฺโยภาวาย ฯ อิเม เทฺว อตฺถวเส ปฏิจฺจ ตถาคเตน
สาวกานํ ติณวตฺถารโก ปญฺญตฺโต ฯ เทฺว อตฺถวเส ปฏิจฺจ
ตถาคเตน สาวกานํ ติณวตฺถารโก ปญฺญตฺโต สทฺธมฺมฏฺฐิติยา
วินยานุคฺคหาย ฯ อิเม เทฺว อตฺถวเส ปฏิจฺจ ตถาคเตน สาวกานํ
ติณวตฺถารโก ปญฺญตฺโตติ ฯ
ปญฺญตฺตวคฺโค ๑- นิฏฺฐิโต จตุตฺโถ ฯ
[๑๓๖๒] นว สงฺคหา วตฺถุสงฺคโห วิปตฺติสงฺคโห อาปตฺติสงฺคโห
นิทานสงฺคโห ปุคฺคลสงฺคโห ขนฺธสงฺคโห สมุฏฺฐานสงฺคโห
อธิกรณสงฺคโห สมถสงฺคโห ๒- ฯ
[๑๓๖๓] อธิกรเณ สมุปฺปนฺเน สเจ อุโภ อตฺถปจฺจตฺถิกา ๓-
อาคจฺฉนฺติ อุภินฺนมฺปิ วตฺถุํ ๔- อาโรจาเปตพฺพํ อุภินฺนมฺปิ วตฺถุํ
อาโรจาเปตฺวา อุภินฺนมฺปิ ปฏิญฺญา โสตพฺพา อุภินฺนมฺปิ ปฏิญฺญํ
สุตฺวา อุโภปิ วตฺตพฺพา อมฺหากํ อิมสฺมึ อธิกรเณ วูปสมิเต ๕-
@เชิงอรรถ: ๑ ม. อปญฺญตฺเต ปญฺญตฺตวคฺโค ฯ ๒ ม. ยุ. สมถสงฺคโหติ ฯ ๓ ยุ. อตฺตปจฺจตฺถิกา ฯ
@๔ ม. ยุ. วตฺถุ ฯ ๕ ม. วูปสเมปิ ฯ
อุโภปิ ตุฏฺฐา ภวิสฺสถาปิ ๑- สเจ อาหํสุ อุโภปิ ตุฏฺฐา
ภวิสฺสามาติ สงฺเฆน ตํ อธิกรณํ ปฏิจฺฉิตพฺพํ ๒- ฯ สเจ อลชฺชุสฺสนฺนา
โหติ ปริสา อุพฺพาหิกาย วูปสเมตพฺพํ ฯ สเจ พาลุสฺสนฺนา
โหติ ปริสา วินยธโร ปริเยสิตพฺโพ ฯ เยน ธมฺเมน เยน
วินเยน เยน สตฺถุสาสเนน ตํ อธิกรณํ วูปสมฺมติ ตถา ตํ
อธิกรณํ วูปสเมตพฺพํ ฯ
[๑๓๖๔] วตฺถุํ ชานิตพฺพํ โคตฺตํ ชานิตพฺพํ นามํ ชานิตพฺพํ
อาปตฺติ ชานิตพฺพา ฯ เมถุนธมฺโมติ วตฺถุญฺเจว โคตฺตญฺจ ฯ
ปาราชิกนฺติ นามญฺเจว อาปตฺติ จ ฯ อทินฺนาทานนฺติ วตฺถุญฺเจว
โคตฺตญฺจ ฯ ปาราชิกนฺติ นามญฺเจว อาปตฺติ จ ฯ มนุสฺสวิคฺคโหติ
วตฺถุญฺเจว โคตฺตญฺจ ฯ ปาราชิกนฺติ นามญฺเจว อาปตฺติ จ ฯ
อุตฺตริมนุสฺสธมฺโมติ วตฺถุญฺเจว โคตฺตญฺจ ฯ ปาราชิกนฺติ
นามญฺเจว อาปตฺติ จ ฯ สุกฺกวิสฏฺฐีติ วตฺถุญฺเจว โคตฺตญฺจ ฯ
สงฺฆาทิเสโสติ นามญฺเจว อาปตฺติ จ ฯ กายสํสคฺโคติ วตฺถุญฺเจว
โคตฺตญฺจ ฯ สงฺฆาทิเสโสติ นามญฺเจว อาปตฺติ จ ฯ ทุฏฺฐุลฺลวาจาติ
วตฺถุญฺเจว โคตฺตญฺจ ฯ สงฺฆาทิเสโสติ นามญฺเจว อาปตฺติ
จ ฯ อตฺตกามนฺติ วตฺถุญฺเจว โคตฺตญฺจ ฯ สงฺฆาทิเสโสติ
นามญฺเจว อาปตฺติ จ ฯ สญฺจริตฺตนฺติ วตฺถุญฺเจว โคตฺตญฺจ ฯ
สงฺฆาทิเสโสติ นามญฺเจว อาปตฺติ จ ฯ สญฺญาจิกาย กุฏึ
การาปนนฺติ วตฺถุญฺเจว โคตฺตญฺจ ฯ สงฺฆาทิเสโสติ นามญฺเจว
@เชิงอรรถ: ๑ โป. ม. ยุ. ภวิสฺสถาติ อยํ ปาโฐ ยุตฺตตโร ฯ ๒ ม. สมฺปฏิจฺฉิตพฺพํ ฯ
อาปตฺติ จ ฯ มหลฺลกํ วิหารํ การาปนนฺติ วตฺถุญฺเจว โคตฺตญฺจ ฯ
สงฺฆาทิเสโสติ นามญฺเจว อาปตฺติ จ ฯ ภิกฺขุํ อมูลเกน ปาราชิเกน
ธมฺเมน อนุทฺธํสนนฺติ วตฺถุญฺเจว โคตฺตญฺจ ฯ สงฺฆาทิเสโสติ
นามญฺเจว อาปตฺติ จ ฯ ภิกฺขุํ อญฺญภาคิยสฺส อธิกรณสฺส
กิญฺจิ เทสํ เลสมตฺตํ อุปาทาย ปาราชิเกน ธมฺเมน อนุทฺธํสนนฺติ
วตฺถุญฺเจว โคตฺตญฺจ ฯ สงฺฆาทิเสโสติ นามญฺเจว อาปตฺติ จ ฯ
สงฺฆเภทกสฺส ภิกฺขุโน ยาวตติยํ สมนุภาสนาย นปฺปฏินิสฺสชฺชนนฺติ
วตฺถุญฺเจว โคตฺตญฺจ ฯ สงฺฆาทิเสโสติ นามญฺเจว อาปตฺติ จ ฯ
{๑๓๖๔.๑} เภทกานุวตฺตกานํ ภิกฺขูนํ ยาวตติยํ สมนุภาสนาย
นปฺปฏินิสฺสชฺชนนฺติ วตฺถุญฺเจว โคตฺตญฺจ ฯ สงฺฆาทิเสโสติ นามญฺเจว
อาปตฺติ จ ฯ ทุพฺพจสฺส ภิกฺขุโน ยาวตติยํ สมนุภาสนาย นปฺปฏินิสฺสชฺชนนฺติ
วตฺถุญฺเจว โคตฺตญฺจ ฯ สงฺฆาทิเสโสติ นามญฺเจว อาปตฺติ จ ฯ
กุลทูสกสฺส ภิกฺขุโน ยาวตติยํ สมนุภาสนาย นปฺปฏินิสฺสชฺชนนฺติ
วตฺถุญฺเจว โคตฺตญฺจ ฯ สงฺฆาทิเสโสติ นามญฺเจว อาปตฺติ จ ฯเปฯ
อนาทริยํ ปฏิจฺจ อุทเก อุจฺจารํ วา ปสฺสาวํ วา เขฬํ วา กรณนฺติ
วตฺถุญฺเจว โคตฺตญฺจ ฯ ทุกฺกฏนฺติ นามญฺเจว อาปตฺติ จาติ ฯ
นวสงฺคหวคฺโค นิฏฺฐิโต ปญฺจโม ฯ
--------------
ตสฺสุทฺทานํ
[๑๓๖๕] อปโลกนํ ญตฺติ จ ๑- ทุติยํ จตุตฺเถน จ
วตฺถุ ญตฺติ อนุสฺสาวนํ สีมาปริสเมว จ
สมฺมุขา ปฏิปุจฺฉา จ ปฏิญฺญา วินยารโห
วตฺถุสงฺฆปุคฺคลญฺจ ญตฺตึ ปจฺฉา ญตฺตึ ฐเป ๒-
วตฺถุสงฺฆปุคฺคลญฺจ สาวนํ จ อกาลิกํ ๓-
อติขุทฺทา ๔- มหนฺตา จ ขณฺฑจฺฉายานิมิตฺตกา
พหินทีสมุทฺเท จ ชาตสฺสเร จ ภินฺทติ
อชฺโฌตฺถรติ สีมาย จตุปญฺจวคฺคิกา
ทสวีสติวคฺคา จ อนาหฏา จ อาหฏา
กมฺมปฺปตฺตา ฉนฺทารหา กมฺมารหา จ ปุคฺคลา
อปโลกนํ ปญฺจฏฺฐานํ ญตฺติ จ นวฐานิกา
ญตฺติทุติยํ สตฺตฏฺฐานํ จตุตฺถา สตฺตฐานิกา
สุฏฺฐุ ผาสุ ทุมฺมงฺกูนํ ๕- เปสลา จาปิ อาสวา
เวรวชฺชภยญฺเจว อกุสลญฺจ คีหินํ ๖-
ปาปิจฺฉา อปฺปสนฺนานํ ปสนฺนาธมฺมฐปนา
วินยานุคฺคหา เจว ปาติโมกฺขุทฺเทเสน จ
@เชิงอรรถ: ๑ ยุ. อปโลกนญตฺติ จ ฯ ๒ ม. ญตฺตึ น ปจฺฉา ญตฺติ จ ฯ ยุ. ญตฺตีนํ ปจฺฉา
@ญตฺติ จ ฯ ๓ ม. ยุ. สาวนํ อกาเลน จ ฯ ๔ ม. ยุ. อติขุทฺทกา ฯ
@๕ ม. สุฏฺฐุ ผาสุ จ ทุมฺมงฺกุ ฯ ยุ. สุฏฺฐุ ผาสุ จ ทุมฺมงฺกูนํ ฯ
@๖ ม. ยุ. อกุสลํ คิหีนญฺจ ฯ
ปาติโมกฺขญฺจ ฐปนา ปวารณญฺจ ฐปนํ
ตชฺชนียานิยสฺสญฺจ ปพฺพาชปฏิสารณี ๑-
อุกฺเขปนปริวาสํ มูลํ มานตฺตพฺภานกํ ๒-
โอสารณํ นิสฺสารณํ ตเถว อุปสมฺปทา
อปโลกนํ ญตฺติ จ ๓- ทุติยญฺจ จตุตฺถกํ
อปฺปญฺญตฺเตนุปญฺญตฺตํ สมฺมุขาวินโย สติ
อมูฬฺหปฏิเยภุยฺย ปาปิยติณวตฺถารกํ
วตฺถุํ ๔- วิปตฺติ อาปตฺติ นิทานํ ปุคฺคเลน จ
ขนฺธา เจว สมุฏฺฐานา อธิกรณเมว จ
สมถา สงฺคหา เจว นามา อาปตฺติกา ๕- ตถาติ ฯ
ปริวาโร นิฏฺฐิโต ฯ
--------
[๑๓๖๖] ปุพฺพาจริยมคฺคญฺจ ปุจฺฉิตฺวา ว ตหึ ตหึ
ทีปนาโม มหาปญฺโญ สุตธโร วิจกฺขโณ
อิมํ วิตฺถารสงฺเขปํ สชฺฌามคฺเคน มชฺฌิเม
จินฺตยิตฺวา ลิขาเปสิ สิสฺสกานํ สุขาวหํ ฯ
ปริวารนฺติ ยํ วุตฺตํ สพฺพํ วตฺถุํ สลกฺขณํ
อตฺถํ อตฺเถน สทฺธมฺเม ธมฺมํ ธมฺเมน ปญฺญตฺเต
@เชิงอรรถ: ๑ ม. ยุ. ปพฺพาชนียปฏิสารณี ฯ ๒ ม. ยุ. มูลมานตฺตอพฺภานํ ฯ ๓ อปโลกนญตฺติ จ ฯ
@๔ วตฺถุ ฯ ๕ นามอาปตฺติกา ฯ
สาสนํ ปริวาเรสิ ชมฺพูทีปํว สาคโร ฯ
ปริวารํ อชานนฺโต กุโต ธมฺมวินิจฺฉยํ ฯ
วิปตฺติ วตฺถุ ปญฺญตฺติ อนุปฺปญฺญตฺติ ปุคฺคโล
เอกโต อุภโต เจว โลกปณฺณตฺติวชฺชโต
ยสฺส ชายติ วิมติ ปริวาเรน ฉิชฺชติ
จกฺกวตฺติ มหาเสเน มิคมชฺเฌว เกสรี
รวิ รํสิปริกิณฺโณ จนฺโท ตารคเณ ยถา
พฺรหฺมา พฺรหฺมปริสาย คณมชฺเฌว นายโก ฯ
เอวํ สทฺธมฺมวินโย ปริวาเรน โสภตีติ ฯ
เนื้อความพระไตรปิฎกฉบับภาษาบาลีอักษรไทย เล่มที่ ๘ หน้าที่ ๕๒๒-๕๕๔.
https://84000.org/tipitaka/read/pali_item.php?book=8&item=1275&items=92
อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
https://84000.org/tipitaka/read/pali_item.php?book=8&item=1275&items=92&mode=bracket
อ่านเทียบพระไตรปิฎกฉบับภาษาบาลีอักษรโรมัน :-
https://84000.org/tipitaka/read/roman_item.php?book=8&item=1275&items=92
อ่านเทียบพระไตรปิฎกภาษาไทยฉบับหลวง :-
https://84000.org/tipitaka/read/byitem.php?book=8&item=1275&items=92
ศึกษาอรรถกถานี้ได้ที่ :-
https://84000.org/tipitaka/attha/attha.php?b=8&i=1275
สารบัญพระไตรปิฎกเล่มที่ ๘
https://84000.org/tipitaka/read/?index_8
https://84000.org/tipitaka/english/?index_8
บันทึก ๒ ธันวาคม พ.ศ. ๒๕๕๙.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย.
หากพบข้อผิดพลาด กรุณาแจ้งได้ที่ [email protected]
