พระไตรปิฎกเล่มที่ ๑ ภาษาบาลี อักษรไทย
พระวินัยปิฎกเล่มที่ ๑ วินย. มหาวิภงฺโค (๑)

     [๕๕๙]   ทิฏฺฐสฺส   โหติ  ปาราชิกํ  ธมฺมํ  อชฺฌาปชฺชนฺโต  ทิฏฺเฐ
เวมติโก   ทิฏฺฐํ   โนกปฺเปติ   ทิฏฺฐํ   นสฺสรติ   ทิฏฺฐํ   ปมุฏฺโฐ  โหติ
ฯเปฯ   สุเต   เวมติโก   สุตํ  โนกปฺเปติ  สุตํ  นสฺสรติ  สุตํ  ปมุฏฺโฐ
โหติ   ฯเปฯ   ปริสงฺกิเต   เวมติโก   ปริสงฺกิตํ  โนกปฺเปติ  ปริสงฺกิตํ
นสฺสรติ   ปริสงฺกิตํ   ปมุฏฺโฐ   โหติ   ตญฺเจ   โจทาเปติ  ปริสงฺกิโตสิ
ทิฏฺโฐสิ   ฯเปฯ   ปริสงฺกิโตสิ   สุโตสิ   ฯเปฯ   ปริสงฺกิโตสิ  ทิฏฺโฐสิ
สุโตสิ    ปาราชิกํ   ธมฺมํ   อชฺฌาปนฺโนสิ   อสฺสมโณสิ   อสกฺยปุตฺติโยสิ
นตฺถิ    ตยา    สทฺธึ    อุโปสโถ   วา   ปวารณา   วา   สงฺฆกมฺมํ
วาติ อาปตฺติ วาจาย วาจาย สงฺฆาทิเสสสฺส ฯ
     [๕๖๐]   อสุทฺเธ    สุทฺธทิฏฺฐิ    สุทฺเธ   อสุทฺธทิฏฺฐิ   อสุทฺเธ
อสุทฺธทิฏฺฐิ สุทฺเธ สุทฺธทิฏฺฐิ ฯ
     [๕๖๑]   อสุทฺโธ   โหติ   ปุคฺคโล   อญฺญตรํ   ปาราชิกํ   ธมฺมํ
อชฺฌาปนฺโน    ตญฺเจ    สุทฺธทิฏฺฐิ   สมาโน   อโนกาสํ   การาเปตฺวา
จาวนาธิปฺปาโย   วเทติ  อาปตฺติ  สงฺฆาทิเสเสน  ทุกฺกฏสฺส  ฯ  อสุทฺโธ
โหติ    ปุคฺคโล    อญฺญตรํ    ปาราชิกํ   ธมฺมํ   อชฺฌาปนฺโน   ตญฺเจ
สุทฺธทิฏฺฐิ   สมาโน   โอกาสํ   การาเปตฺวา   จาวนาธิปฺปาโย   วเทติ
อาปตฺติ    สงฺฆาทิเสสสฺส    ฯ    อสุทฺโธ   โหติ   ปุคฺคโล   อญฺญตรํ
ปาราชิกํ   ธมฺมํ   อชฺฌาปนฺโน   ตญฺเจ   สุทฺธทิฏฺฐิ   สมาโน  อโนกาสํ
การาเปตฺวา    อกฺโกสาธิปฺปาโย    วเทติ    อาปตฺติ    โอมสวาเทน
ทุกฺกฏสฺส   ฯ   อสุทฺโธ   โหติ   ปุคฺคโล   อญฺญตรํ   ปาราชิกํ   ธมฺมํ
อชฺฌาปนฺโน    ตญฺเจ    สุทฺธทิฏฺฐิ    สมาโน   โอกาสํ   การาเปตฺวา
อกฺโกสาธิปฺปาโย วเทติ อาปตฺติ โอมสวาทสฺส ฯ
     [๕๖๒]   สุทฺโธ   โหติ   ปุคฺคโล   อญฺญตรํ   ปาราชิกํ   ธมฺมํ
อนชฺฌาปนฺโน   ตญฺเจ   อสุทฺธทิฏฺฐิ   สมาโน   อโนกาสํ   การาเปตฺวา
จาวนาธิปฺปาโย   วเทติ   อาปตฺติ  ทุกฺกฏสฺส  ฯ  สุทฺโธ  โหติ  ปุคฺคโล
อญฺญตรํ   ปาราชิกํ   ธมฺมํ   อนชฺฌาปนฺโน   ตญฺเจ  อสุทฺธทิฏฺฐิ  สมาโน
โอกาสํ   การาเปตฺวา   จาวนาธิปฺปาโย   วเทติ  อนาปตฺติ  ฯ  สุทฺโธ
โหติ    ปุคฺคโล    อญฺญตรํ   ปาราชิกํ   ธมฺมํ   อนชฺฌาปนฺโน   ตญฺเจ
อสุทฺธทิฏฺฐิ    สมาโน    อโนกาสํ    การาเปตฺวา    อกฺโกสาธิปฺปาโย
วเทติ   อาปตฺติ   โอมสวาเทน   ทุกฺกฏสฺส   ฯ  สุทฺโธ  โหติ  ปุคฺคโล
อญฺญตรํ     ปาราชิกํ    ธมฺมํ    อนชฺฌาปนฺโน    ตญฺเจ    อสุทฺธทิฏฺฐิ
สมาโน   โอกาสํ   การาเปตฺวา   อกฺโกสาธิปฺปาโย   วเทติ   อาปตฺติ
โอมสวาทสฺส ฯ
     [๕๖๓]   อสุทฺโธ   โหติ   ปุคฺคโล   อญฺญตรํ   ปาราชิกํ   ธมฺมํ
อชฺฌาปนฺโน    ตญฺเจ   อสุทฺธทิฏฺฐิ   สมาโน   อโนกาสํ   การาเปตฺวา
จาวนาธิปฺปาโย    วเทติ    อาปตฺติ   ทุกฺกฏสฺส   ฯ   อสุทฺโธ   โหติ
ปุคฺคโล   อญฺญตรํ   ปาราชิกํ   ธมฺมํ   อชฺฌาปนฺโน   ตญฺเจ  อสุทฺธทิฏฺฐิ
สมาโน   โอกาสํ   การาเปตฺวา  จาวนาธิปฺปาโย  วเทติ  อนาปตฺติ  ฯ
อสุทฺโธ   โหติ   ปุคฺคโล  อญฺญตรํ  ปาราชิกํ  ธมฺมํ  อชฺฌาปนฺโน  ตญฺเจ
อสุทฺธทิฏฺฐิ   สมาโน   อโนกาสํ  การาเปตฺวา  อกฺโกสาธิปฺปาโย  วเทติ
อาปตฺติ   โอมสวาเทน   ทุกฺกฏสฺส  ฯ  อสุทฺโธ  โหติ  ปุคฺคโล  อญฺญตรํ
ปาราชิกํ   ธมฺมํ   อชฺฌาปนฺโน   ตญฺเจ   อสุทฺธทิฏฺฐิ   สมาโน  โอกาสํ
การาเปตฺวา อกฺโกสาธิปฺปาโย วเทติ อาปตฺติ โอมสวาทสฺส ฯ
     [๕๖๔]   สุทฺโธ   โหติ   ปุคฺคโล   อญฺญตรํ   ปาราชิกํ   ธมฺมํ
อนชฺฌาปนฺโน    ตญฺเจ   สุทฺธทิฏฺฐิ   สมาโน   อโนกาสํ   การาเปตฺวา
จาวนาธิปฺปาโย   วเทติ   อาปตฺติ  สงฺฆาทิเสเสน  ทุกฺกฏสฺส  ฯ  สุทฺโธ
โหติ    ปุคฺคโล    อญฺญตรํ   ปาราชิกํ   ธมฺมํ   อนชฺฌาปนฺโน   ตญฺเจ
สุทฺธทิฏฺฐิ   สมาโน   โอกาสํ   การาเปตฺวา   จาวนาธิปฺปาโย   วเทติ
อาปตฺติ   สงฺฆาทิเสสสฺส   ฯ  สุทฺโธ  โหติ  ปุคฺคโล  อญฺญตรํ  ปาราชิกํ
ธมฺมํ   อนชฺฌาปนฺโน  ตญฺเจ  สุทฺธทิฏฺฐิ  สมาโน  อโนกาสํ  การาเปตฺวา
อกฺโกสาธิปฺปาโย   วเทติ   อาปตฺติ  โอมสวาเทน  ทุกฺกฏสฺส  ฯ  สุทฺโธ
โหติ    ปุคฺคโล    อญฺญตรํ   ปาราชิกํ   ธมฺมํ   อนชฺฌาปนฺโน   ตญฺเจ
สุทฺธทิฏฺฐิ   สมาโน   โอกาสํ   การาเปตฺวา   อกฺโกสาธิปฺปาโย  วเทติ
อาปตฺติ โอมสวาทสฺส ฯ
     [๕๖๕]   อนาปตฺติ   สุทฺเธ  อสุทฺธทิฏฺฐิสฺส  อสุทฺเธ  อสุทฺธทิฏฺฐิสฺส
อุมฺมตฺตกสฺส อาทิกมฺมิกสฺสาติ ฯ
                        อฏฺฐมสงฺฆาทิเสสํ นิฏฺฐิตํ ฯ
                                 ------------
                              นวมสงฺฆาทิเสสํ
     [๕๖๖]   เตน  สมเยน  พุทฺโธ  ภควา  ราชคเห  วิหรติ เวฬุวเน
กลนฺทกนิวาเป   ฯ   เตน   โข   ปน  สมเยน  เมตฺติยภุมฺมชกา  ภิกฺขู
คิชฺฌกูฏา   ปพฺพตา  โอโรหนฺตา  อทฺทสํสุ  ฉกลกํ  อชิกาย  วิปฺปฏิปชฺชนฺตํ
ทิสฺวาน     เอวมาหํสุ     หนฺท     มยํ    อาวุโส    อิมํ    ฉกลกํ
ทพฺพํ   มลฺลปุตฺตํ   นาม   กโรม   อิมํ   อชิกํ   เมตฺติยํ  นาม  ภิกฺขุนึ
กโรม   เอวํ   มยํ  โวหริสฺสาม  ปุพฺเพ  มยํ  อาวุโส  ทพฺพํ  มลฺลปุตฺตํ
สุเตน   อโวจุมฺหา   อิทานิ   ปน   อเมฺหหิ   สามํ  ทิฏฺโฐ  เมตฺติยาย
ภิกฺขุนิยา   วิปฺปฏิปชฺชนฺโตติ   ฯ   เต   ตํ   ฉกลกํ   ทพฺพํ   มลฺลปุตฺตํ
นาม   อกํสุ   ตํ   อชิกํ  เมตฺติยํ  นาม  ภิกฺขุนึ  อกํสุ  ฯ  เต  ภิกฺขูนํ
อาโรเจสุํ   ปุพฺเพ   มยํ   อาวุโส  ทพฺพํ  มลฺลปุตฺตํ  สุเตน  อโวจุมฺหา
อิทานิ  ปน  อเมฺหหิ  สามํ  ทิฏฺโฐ เมตฺติยาย ภิกฺขุนิยา วิปฺปฏิปชฺชนฺโตติ ฯ
ภิกฺขู   เอวมาหํสุ   มา   อาวุโส   เอวํ   อวจุตฺถ   นายสฺมา  ทพฺโพ
มลฺลปุตฺโต เอวํ กริสฺสตีติ ฯ
     {๕๖๖.๑}   อถโข  เต  ภิกฺขู ภควโต เอตมตฺถํ อาโรเจสุํ ฯ อถโข
ภควา   เอตสฺมึ  นิทาเน  เอตสฺมึ  ปกรเณ  ภิกฺขุสงฺฆํ  สนฺนิปาตาเปตฺวา
อายสฺมนฺตํ   ทพฺพํ  มลฺลปุตฺตํ  ปฏิปุจฺฉิ  สรสิ  ตฺวํ  ทพฺพ  เอวรูปํ  กตฺตา
ยถา   อิเม  ภิกฺขู  อาหํสูติ  ฯ  ยถา  มํ  ภนฺเต  ภควา  ชานาตีติ  ฯ
ทุติยมฺปิ   โข   ภควา   ฯเปฯ  ตติยมฺปิ  โข  ภควา  อายสฺมนฺตํ  ทพฺพํ
มลฺลปุตฺตํ   เอตทโวจ   สรสิ   ตฺวํ  ทพฺพ  เอวรูปํ  กตฺตา  ยถา  อิเม
ภิกฺขู   อาหํสูติ   ฯ   ยถา   มํ  ภนฺเต  ภควา  ชานาตีติ  ฯ  น  โข
ทพฺพ   ทพฺพา   เอวํ   นิพฺเพเฐนฺติ   สเจ   ตยา  กตํ  กตนฺติ  วเทหิ
สเจ   ตยา   อกตํ   อกตนฺติ   วเทหีติ   ฯ   ยโตหํ   ภนฺเต  ชาโต
นาภิชานามิ  สุปินนฺเตนปิ  เมถุนํ  ธมฺมํ  ปฏิเสวิตา  ปเคว  ชาคโรติ  ฯ
อถโข    ภควา   ภิกฺขู   อามนฺเตสิ   เตนหิ   ภิกฺขเว   อิเม   ภิกฺขู
อนุยุญฺชถาติ ฯ อิทํ วตฺวา ภควา อุฏฺฐายาสนา วิหารํ ปาวิสิ ฯ
     {๕๖๖.๒}   อถโข  เต  ภิกฺขู  เมตฺติยภุมฺมชเก  ภิกฺขู  อนุยุญฺชึสุ ฯ
เต  เตหิ  ภิกฺขูหิ  อนุยุญฺชิยมานา  ภิกฺขูนํ  เอตมตฺถํ  อาโรเจสุํ  ฯ  กึ
ปน   ตุเมฺห   อาวุโส   อายสฺมนฺตํ   ทพฺพํ   มลฺลปุตฺตํ   อญฺญภาคิยสฺส
อธิกรณสฺส   กิญฺจิ   เทสํ   เลสมตฺตํ   อุปาทาย   ปาราชิเกน  ธมฺเมน
อนุทฺธํเสถาติ   ฯ   เอวมาวุโสติ  ฯ  เย  เต  ภิกฺขู  อปฺปิจฺฉา  ฯเปฯ
เต   อุชฺฌายนฺติ   ขียนฺติ   วิปาเจนฺติ   กถํ  หิ  นาม  เมตฺติยภุมฺมชกา
ภิกฺขู    อายสฺมนฺตํ    ทพฺพํ    มลฺลปุตฺตํ    อญฺญภาคิยสฺส    อธิกรณสฺส
กิญฺจิ  เทสํ  เลสมตฺตํ  อุปาทาย  ปาราชิเกน  ธมฺเมน อนุทฺธํเสสฺสนฺตีติ ฯ
อถโข   เต   ภิกฺขู   ภควโต  เอตมตฺถํ  อาโรเจสุํ  ฯเปฯ  สจฺจํ  กิร
ตุเมฺห   ภิกฺขเว   ทพฺพํ   มลฺลปุตฺตํ   อญฺญภาคิยสฺส   อธิกรณสฺส   กิญฺจิ
เทสํ   เลสมตฺตํ   อุปาทาย   ปาราชิเกน   ธมฺเมน   อนุทฺธํเสถาติ  ฯ
สจฺจํ   ภควาติ   ฯ   วิครหิ   พุทฺโธ   ภควา   กถํ  หิ  นาม  ตุเมฺห
โมฆปุริสา    ทพฺพํ    มลฺลปุตฺตํ    อญฺญภาคิยสฺส    อธิกรณสฺส    กิญฺจิ
เทสํ   เลสมตฺตํ   อุปาทาย   ปาราชิเกน  ธมฺเมน  อนุทฺธํเสสฺสถ  เนตํ
โมฆปุริสา   อปฺปสนฺนานํ   วา  ปสาทาย  ฯเปฯ  เอวญฺจ  ปน  ภิกฺขเว
อิมํ สิกฺขาปทํ อุทฺทิเสยฺยาถ
     {๕๖๖.๓}   โย  ปน ภิกฺขุ ภิกฺขุํ ทุฏฺโฐ โทโส อปฺปตีโต อญฺญภาคิยสฺส
อธิกรณสฺส  กิญฺจิ  เทสํ เลสมตฺตํ อุปาทาย ปาราชิเกน ธมฺเมน อนุทฺธํเสยฺย
อปฺเปวนาม  นํ  อิมมฺหา  พฺรหฺมจริยา  จาเวยฺยนฺติ  ตโต อปเรน สมเยน
สมนุคฺคาหิยมาโน   วา   อสมนุคฺคาหิยมาโน   วา   อญฺญภาคิยญฺเจว  ตํ
อธิกรณํ  โหติ  โกจิ  เทโส  เลสมตฺโต อุปาทินฺโน ภิกฺขุ จ โทสํ ปติฏฺฐาติ
สงฺฆาทิเสโสติ ฯ
     [๕๖๗]   โย   ปนาติ  โย  ยาทิโส  ฯเปฯ  ภิกฺขูติ  ฯเปฯ  อยํ
อิมสฺมึ   อตฺเถ  อธิปฺเปโต  ภิกฺขูติ  ฯ  ภิกฺขุนฺติ  อญฺญํ  ภิกฺขุํ  ฯ  ทุฏฺโฐ
โทโสติ   กุปิโต   อนตฺตมโน   อนภิรทฺโธ   อาหตจิตฺโต   ขิลชาโต  ฯ
อปฺปตีโตติ  เตน  จ  โกเปน  เตน  จ  โทเสน  ตาย  จ อนตฺตมนตาย
ตาย จ อนภิรทฺธิยา อปฺปตีโต โหติ ฯ
     [๕๖๘]   อญฺญภาคิยสฺส    อธิกรณสฺสาติ   อาปตฺตญฺญภาคิยํ   วา
โหติ อธิกรณญฺญภาคิยํ วา ฯ
     [๕๖๙]   กถํ   อธิกรณํ  อธิกรณสฺส  อญฺญภาคิยํ  ฯ  วิวาทาธิกรณํ
อนุวาทาธิกรณสฺส     อาปตฺตาธิกรณสฺส     กิจฺจาธิกรณสฺส    อญฺญภาคิยํ
อนุวาทาธิกรณํ    อาปตฺตาธิกรณสฺส    กิจฺจาธิกรณสฺส    วิวาทาธิกรณสฺส
อญฺญภาคิยํ      อาปตฺตาธิกรณํ      กิจฺจาธิกรณสฺส     วิวาทาธิกรณสฺส
อนุวาทาธิกรณสฺส      อญฺญภาคิยํ      กิจฺจาธิกรณํ     วิวาทาธิกรณสฺส
อนุวาทาธิกรณสฺส   อาปตฺตาธิกรณสฺส   อญฺญภาคิยํ   ฯ   เอวํ   อธิกรณํ
อธิกรณสฺส อญฺญภาคิยํ ฯ
     [๕๗๐]   กถํ   อธิกรณํ   อธิกรณสฺส  ตพฺภาคิยํ  ฯ  วิวาทาธิกรณํ
วิวาทาธิกรณสฺส      ตพฺภาคิยํ     อนุวาทาธิกรณํ     อนุวาทาธิกรณสฺส
ตพฺภาคิยํ     อาปตฺตาธิกรณํ     อาปตฺตาธิกรณสฺส    สิยา    ตพฺภาคิยํ
สิยา อญฺญภาคิยํ ฯ
     {๕๗๐.๑}   กถํ  อาปตฺตาธิกรณํ  อาปตฺตาธิกรณสฺส  อญฺญภาคิยํ  ฯ
เมถุนธมฺมปาราชิกาปตฺติ อทินฺนาทานปาราชิกาปตฺติยา
มนุสฺสวิคฺคหปาราชิกาปตฺติยา อุตฺตริมนุสฺสธมฺมปาราชิกาปตฺติยา
อญฺญภาคิยา     อทินฺนาทานปาราชิกาปตฺติ    มนุสฺสวิคฺคหปาราชิกาปตฺติยา
อุตฺตริมนุสฺสธมฺมปาราชิกาปตฺติยา เมถุนธมฺมปาราชิกาปตฺติยา
อญฺญภาคิยา         มนุสฺสวิคฺคหปาราชิกาปตฺติ        อุตฺตริมนุสฺสธมฺม-
ปาราชิกาปตฺติยา       เมถุนธมฺมปาราชิกาปตฺติยา       อทินฺนาทาน-
ปาราชิกาปตฺติยา       อญฺญภาคิยา      อุตฺตริมนุสฺสธมฺมปาราชิกาปตฺติ
เมถุนธมฺมปาราชิกาปตฺติยา    อทินฺนาทานปาราชิกาปตฺติยา   มนุสฺสวิคฺคห-
ปาราชิกาปตฺติยา     อญฺญภาคิยา     ฯ     เอวํ     อาปตฺตาธิกรณํ
อาปตฺตาธิกรณสฺส อญฺญภาคิยํ ฯ
     {๕๗๐.๒}   กถญฺจ      อาปตฺตาธิกรณํ     อาปตฺตาธิกรณสฺส
ตพฺภาคิยํ    ฯ    เมถุนธมฺมปาราชิกาปตฺติ    เมถุนธมฺมปาราชิกาปตฺติยา
ตพฺภาคิยา     อทินฺนาทานปาราชิกาปตฺติ     อทินฺนาทานปาราชิกาปตฺติยา
ตพฺภาคิยา           มนุสฺสวิคฺคหปาราชิกาปตฺติ          มนุสฺสวิคฺคห-
ปาราชิกาปตฺติยา       ตพฺภาคิยา       อุตฺตริมนุสฺสธมฺมปาราชิกาปตฺติ
อุตฺตริมนุสฺสธมฺมปาราชิกาปตฺติยา   ตพฺภาคิยา   ฯ   เอวํ  อาปตฺตาธิกรณํ
อาปตฺตาธิกรณสฺส     ตพฺภาคิยํ     ฯ    กิจฺจาธิกรณํ    กิจฺจาธิกรณสฺส
ตพฺภาคิยํ ฯ เอวํ อธิกรณํ อธิกรณสฺส ตพฺภาคิยํ ฯ
     [๕๗๑]   กิญฺจิ   เทสํ  เลสมตฺตํ  อุปาทายาติ  เลโส  นาม  ทส
เลสา   ชาติเลโส   นามเลโส   โคตฺตเลโส  ลิงฺคเลโส  อาปตฺติเลโส
ปตฺตเลโส จีวรเลโส อุปชฺฌายเลโส อาจริยเลโส เสนาสนเลโส ฯ
     [๕๗๒]   ชาติเลโส  นาม  ขตฺติโย  ทิฏฺโฐ  โหติ  ปาราชิกํ  ธมฺมํ
อชฺฌาปชฺชนฺโต    อญฺญํ   ขตฺติยํ   ปสฺสิตฺวา   โจเทติ   ขตฺติโย   มยา
ทิฏฺโฐ    ปาราชิกํ   ธมฺมํ   อชฺฌาปนฺโนสิ   อสฺสมโณสิ   อสกฺยปุตฺติโยสิ
นตฺถิ   ตยา   สทฺธึ   อุโปสโถ   วา   ปวารณา  วา  สงฺฆกมฺมํ  วาติ
อาปตฺติ   วาจาย   วาจาย   สงฺฆาทิเสสสฺส   ฯ   พฺราหฺมโณ   ทิฏฺโฐ
โหติ   ฯเปฯ   เวสฺโส   ทิฏฺโฐ   โหติ   ฯเปฯ  สุทฺโท  ทิฏฺโฐ  โหติ
ปาราชิกํ    ธมฺมํ   อชฺฌาปชฺชนฺโต   อญฺญํ   สุทฺทํ   ปสฺสิตฺวา   โจเทติ
สุทฺโท    มยา   ทิฏฺโฐ   ปาราชิกํ   ธมฺมํ   อชฺฌาปนฺโนสิ   อสฺสมโณสิ
อสกฺยปุตฺติโยสิ   ฯเปฯ   สงฺฆกมฺมํ   วาติ   อาปตฺติ   วาจาย  วาจาย
สงฺฆาทิเสสสฺส ฯ
     [๕๗๓]   นามเลโส นาม พุทฺธรกฺขิโต ทิฏฺโฐ โหติ ฯเปฯ ธมฺมรกฺขิโต
ทิฏฺโฐ   โหติ   ฯเปฯ   สงฺฆรกฺขิโต   ทิฏฺโฐ   โหติ   ปาราชิกํ  ธมฺมํ
อชฺฌาปชฺชนฺโต   อญฺญํ  สงฺฆรกฺขิตํ  ปสฺสิตฺวา  โจเทติ  สงฺฆรกฺขิโต  มยา
ทิฏฺโฐ    ปาราชิกํ   ธมฺมํ   อชฺฌาปนฺโนสิ   อสฺสมโณสิ   อสกฺยปุตฺติโยสิ
ฯเปฯ สงฺฆกมฺมํ วาติ อาปตฺติ วาจาย วาจาย สงฺฆาทิเสสสฺส ฯ
     [๕๗๔]   โคตฺตเลโส   นาม   โคตโม   ทิฏฺโฐ   โหติ   ฯเปฯ
โมคฺคลฺลาโน   ทิฏฺโฐ   โหติ   ฯเปฯ  กจฺจายโน  ทิฏฺโฐ  โหติ  ฯเปฯ
วาสิฏฺโฐ    ทิฏฺโฐ    โหติ   ปาราชิกํ   ธมฺมํ   อชฺฌาปชฺชนฺโต   อญฺญํ
วาสิฏฺฐํ   ปสฺสิตฺวา   โจเทติ   วาสิฏฺโฐ  มยา  ทิฏฺโฐ  ปาราชิกํ  ธมฺมํ
อชฺฌาปนฺโนสิ     อสฺสมโณสิ     อสกฺยปุตฺติโยสิ     ฯเปฯ    สงฺฆกมฺมํ
วาติ อาปตฺติ วาจาย วาจาย สงฺฆาทิเสสสฺส ฯ
     [๕๗๕]   ลิงฺคเลโส   นาม   ทีโฆ  ทิฏฺโฐ  โหติ  ฯเปฯ  รสฺโส
ทิฏฺโฐ    โหติ    ฯเปฯ   กโณฺห   ทิฏฺโฐ   โหติ   ฯเปฯ   โอทาโต
ทิฏฺโฐ    โหติ    ปาราชิกํ    ธมฺมํ   อชฺฌาปชฺชนฺโต   อญฺญํ   โอทาตํ
ปสฺสิตฺวา    โจเทติ    โอทาโต    มยา    ทิฏฺโฐ   ปาราชิกํ   ธมฺมํ
อชฺฌาปนฺโนสิ     อสฺสมโณสิ     อสกฺยปุตฺติโยสิ     ฯเปฯ    สงฺฆกมฺมํ
วาติ อาปตฺติ วาจาย วาจาย สงฺฆาทิเสสสฺส ฯ
     [๕๗๖]   อาปตฺติเลโส   นาม   ลหุกํ   อาปตฺตึ   อชฺฌาปชฺชนฺโต
ทิฏฺโฐ   โหติ  ตญฺเจ  ปาราชิเกน  ธมฺเมน  โจเทติ  ทิฏฺโฐ  มยา  ๑-
ปาราชิกํ    ธมฺมํ   อชฺฌาปนฺโนสิ   อสฺสมโณสิ   อสกฺยปุตฺติโยสิ   ฯเปฯ
สงฺฆกมฺมํ วาติ อาปตฺติ วาจาย วาจาย สงฺฆาทิเสสสฺส ฯ
     [๕๗๗]   ปตฺตเลโส   นาม   โลหปตฺตธโร  ทิฏฺโฐ  โหติ  ฯเปฯ
มตฺติกาปตฺตธโร   ทิฏฺโฐ   โหติ   ฯเปฯ   สาฏกปตฺตธโร  ทิฏฺโฐ  โหติ
@เชิงอรรถ: ๑ ยุโรปิยโปตฺถเก อิทํ ปาฐทฺวยํ น ทิสฺสติ ฯ
ฯเปฯ   สุมฺภกปตฺตธโร   ทิฏฺโฐ   โหติ  ปาราชิกํ  ธมฺมํ  อชฺฌาปชฺชนฺโต
อญฺญํ   สุมฺภกปตฺตธรํ   ปสฺสิตฺวา   โจเทติ  สุมฺภกปตฺตธโร  มยา  ทิฏฺโฐ
ปาราชิกํ    ธมฺมํ   อชฺฌาปนฺโนสิ   อสฺสมโณสิ   อสกฺยปุตฺติโยสิ   ฯเปฯ
สงฺฆกมฺมํ วาติ อาปตฺติ วาจาย วาจาย สงฺฆาทิเสสสฺส ฯ
     [๕๗๘]   จีวรเลโส นาม ปํสุกูลิโก ทิฏฺโฐ โหติ ฯเปฯ คหปติจีวรธโร
ทิฏฺโฐ      โหติ     ปาราชิกํ     ธมฺมํ     อชฺฌาปชฺชนฺโต     อญฺญํ
คหปติจีวรธรํ    ปสฺสิตฺวา    โจเทติ    คหปติจีวรธโร   มยา   ทิฏฺโฐ
ปาราชิกํ    ธมฺมํ   อชฺฌาปนฺโนสิ   อสฺสมโณสิ   อสกฺยปุตฺติโยสิ   ฯเปฯ
สงฺฆกมฺมํ วาติ อาปตฺติ วาจาย วาจาย สงฺฆาทิเสสสฺส ฯ
     [๕๗๙]   อุปชฺฌายเลโส  นาม  อิตฺถนฺนามสฺส  สทฺธิวิหาริโก  ทิฏฺโฐ
โหติ   ปาราชิกํ  ธมฺมํ  อชฺฌาปชฺชนฺโต  อญฺญํ  อิตฺถนฺนามสฺส  สทฺธิวิหาริกํ
ปสฺสิตฺวา   โจเทติ  อิตฺถนฺนามสฺส  สทฺธิวิหาริโก  มยา  ทิฏฺโฐ  ปาราชิกํ
ธมฺมํ    อชฺฌาปนฺโนสิ   อสฺสมโณสิ   อสกฺยปุตฺติโยสิ   ฯเปฯ   สงฺฆกมฺมํ
วาติ อาปตฺติ วาจาย วาจาย สงฺฆาทิเสสสฺส ฯ
     [๕๘๐]   อาจริยเลโส  นาม  อิตฺถนฺนามสฺส  อนฺเตวาสิโก  ทิฏฺโฐ
โหติ   ปาราชิกํ  ธมฺมํ  อชฺฌาปชฺชนฺโต  อญฺญํ  อิตฺถนฺนามสฺส  อนฺเตวาสิกํ
ปสฺสิตฺวา   โจเทติ  อิตฺถนฺนามสฺส  อนฺเตวาสิโก  มยา  ทิฏฺโฐ  ปาราชิกํ
ธมฺมํ    อชฺฌาปนฺโนสิ   อสฺสมโณสิ   อสกฺยปุตฺติโยสิ   ฯเปฯ   สงฺฆกมฺมํ
วาติ อาปตฺติ วาจาย วาจาย สงฺฆาทิเสสสฺส ฯ
     [๕๘๑]   เสนาสนเลโส  นาม  อิตฺถนฺนามสฺส เสนาสนวาสิโก ทิฏฺโฐ
โหติ  ปาราชิกํ  ธมฺมํ  อชฺฌาปชฺชนฺโต  อญฺญํ  อิตฺถนฺนามสฺส เสนาสนวาสิกํ
ปสฺสิตฺวา    โจเทติ    อิตฺถนฺนามสฺส   เสนาสนวาสิโก   มยา   ทิฏฺโฐ
ปาราชิกํ    ธมฺมํ    อชฺฌาปนฺโนสิ   อสฺสมโณสิ   อสกฺยปุตฺติโยสิ   นตฺถิ
ตยา   สทฺธึ   อุโปสโถ   วา  ปวารณา  วา  สงฺฆกมฺมํ  วาติ  อาปตฺติ
วาจาย วาจาย สงฺฆาทิเสสสฺส ฯ
     [๕๘๒]   ปาราชิเกน  ธมฺเมนาติ จตุนฺนํ อญฺญตเรน ฯ อนุทฺธํเสยฺยาติ
โจเทติ  วา  โจทาเปติ  วา  ฯ  อปฺเปวนาม  นํ  อิมมฺหา  พฺรหฺมจริยา
จาเวยฺยนฺติ   ภิกฺขุภาวา   จาเวยฺยํ   สมณธมฺมา   จาเวยฺยํ  สีลกฺขนฺธา
จาเวยฺยํ ตโปคุณา จาเวยฺยํ ฯ
     [๕๘๓]   ตโต  อปเรน  สมเยนาติ  ยสฺมึ  ขเณ  อนุทฺธํสิโต  โหติ
ตํ   ขณํ   ตํ   ลยํ  ตํ  มุหุตฺตํ  วีติวตฺเต  ฯ  สมนุคฺคาหิยมาโนติ  เยน
วตฺถุนา    อนุทฺธํสิโต   โหติ   ตสฺมึ   วตฺถุสฺมึ   สมนุคฺคาหิยมาโน   ฯ
อสมนุคฺคาหิยมาโนติ น เกนจิ วุจฺจมาโน ฯ
     [๕๘๔]   อธิกรณํ   นาม   จตฺตาริ   อธิกรณานิ   วิวาทาธิกรณํ
อนุวาทาธิกรณํ ๑- อาปตฺตาธิกรณํ กิจฺจาธิกรณํ ฯ
     [๕๘๕]   โกจิ  เทโส  เลสมตฺโต  อุปาทินฺโนติ เตสํ ทสนฺนํ เลสานํ
อญฺญตโร เลโส อุปาทินฺโน โหติ ฯ
     [๕๘๖]   ภิกฺขุ   จ   โทสํ   ปติฏฺฐาตีติ   ตุจฺฉกํ   มยํ   ภณิตํ
มุสา   มยา   ภณิตํ   อภูตํ   มยา  ภณิตํ  อชานนฺเตน  มยา  ภณิตํ  ฯ
@เชิงอรรถ: ๑ อยํ ปาโฐ สพฺพตฺถ น ทิสฺสติ ฯ
สงฺฆาทิเสโสติ ฯเปฯ เตนปิ วุจฺจติ สงฺฆาทิเสโสติ ฯ
     [๕๘๗]   ภิกฺขุ  สงฺฆาทิเสสํ อชฺฌาปชฺชนฺโต ทิฏฺโฐ โหติ สงฺฆาทิเสเส
สงฺฆาทิเสสทิฏฺฐิ    โหติ    ตญฺเจ   ปาราชิเกน   โจเทติ   อสฺสมโณสิ
อสกฺยปุตฺติโยสิ  นตฺถิ  ตยา  สทฺธึ  อุโปสโถ  วา  ปวารณา วา สงฺฆกมฺมํ
วาติ   เอวํปิ   อาปตฺตญฺญภาคิยํ   โหติ  เลโส  จ  อุปาทินฺโน  อาปตฺติ
วาจาย วาจาย สงฺฆาทิเสสสฺส ฯ
     {๕๘๗.๑}   ภิกฺขุ สงฺฆาทิเสสํ อชฺฌาปชฺชนฺโต ทิฏฺโฐ โหติ สงฺฆาทิเสเส
ถุลฺลจฺจยทิฏฺฐิ   โหติ   ตญฺเจ   ปาราชิเกน  โจเทติ  อสฺสมโณสิ  ฯเปฯ
สงฺฆกมฺมํ   วาติ   เอวํปิ  อาปตฺตญฺญภาคิยํ  โหติ  เลโส  จ  อุปาทินฺโน
อาปตฺติ วาจาย วาจาย สงฺฆาทิเสสสฺส ฯ
     {๕๘๗.๒}   ภิกฺขุ สงฺฆาทิเสสํ อชฺฌาปชฺชนฺโต ทิฏฺโฐ โหติ สงฺฆาทิเสเส
ปาจิตฺติยทิฏฺฐิ   โหติ   ตญฺเจ   ปาราชิเกน  โจเทติ  อสฺสมโณสิ  ฯเปฯ
สงฺฆกมฺมํ   วาติ   เอวํปิ  อาปตฺตญฺญภาคิยํ  โหติ  เลโส  จ  อุปาทินฺโน
อาปตฺติ วาจาย วาจาย สงฺฆาทิเสสสฺส ฯ
     {๕๘๗.๓}   ภิกฺขุ   สงฺฆาทิเสสํ   อชฺฌาปชฺชนฺโต   ทิฏฺโฐ   โหติ
สงฺฆาทิเสเส     ปาฏิเทสนียทิฏฺฐิ     โหติ     ฯเปฯ    สงฺฆาทิเสเส
ทุกฺกฏทิฏฺฐิ    โหติ    ฯเปฯ    สงฺฆาทิเสเส    ทุพฺภาสิตทิฏฺฐิ    โหติ
ตญฺเจ  ปาราชิเกน  โจเทติ  อสฺสมโณสิ  ฯเปฯ  สงฺฆกมฺมํ  วาติ  เอวํปิ
อาปตฺตญฺญภาคิยํ  โหติ  เลโส  จ  อุปาทินฺโน  อาปตฺติ  วาจาย  วาจาย
สงฺฆาทิเสสสฺส ฯ
     [๕๘๘]   ภิกฺขุ  ถุลฺลจฺจยํ  อชฺฌาปชฺชนฺโต  ทิฏฺโฐ  โหติ  ถุลฺลจฺจเย
ถุลฺลจฺจยทิฏฺฐิ   โหติ   ฯเปฯ   ถุลฺลจฺจเย   ปาจิตฺติยทิฏฺฐิ  โหติ  ฯเปฯ
ถุลฺลจฺจเย    ปาฏิเทสนียทิฏฺฐิ   โหติ   ฯเปฯ   ถุลฺลจฺจเย   ทุกฺกฏทิฏฺฐิ
โหติ   ฯเปฯ   ถุลฺลจฺจเย   ทุพฺภาสิตทิฏฺฐิ   โหติ   ฯเปฯ   ถุลฺลจฺจเย
สงฺฆาทิเสสทิฏฺฐิ    โหติ    ตญฺเจ   ปาราชิเกน   โจเทติ   อสฺสมโณสิ
ฯเปฯ   สงฺฆกมฺมํ   วาติ   เอวํปิ   อาปตฺตญฺญภาคิยํ   โหติ  เลโส  จ
อุปาทินฺโน อาปตฺติ วาจาย วาจาย สงฺฆาทิเสสสฺส ฯ
     {๕๘๘.๑}   ภิกฺขุ  ปาจิตฺติยํ  อชฺฌาปชฺชนฺโต  ทิฏฺโฐ  โหติ  ฯเปฯ
ภิกฺขุ   ปาฏิเทสนียํ   อชฺฌาปชฺชนฺโต  ทิฏฺโฐ  โหติ  ฯเปฯ  ภิกฺขุ  ทุกฺกฏํ
อชฺฌาปชฺชนฺโต   ทิฏฺโฐ   โหติ   ฯเปฯ  ภิกฺขุ  ทุพฺภาสิตํ  อชฺฌาปชฺชนฺโต
ทิฏฺโฐ   โหติ   ทุพฺภาสิเต   ทุพฺภาสิตทิฏฺฐิ   โหติ   ฯเปฯ   ทุพฺภาสิเต
สงฺฆาทิเสสทิฏฺฐิ   โหติ   ฯเปฯ  ทุพฺภาสิเต  ถุลฺลจฺจยทิฏฺฐิ  โหติ  ฯเปฯ
ทุพฺภาสิเต  ปาจิตฺติยทิฏฺฐิ  โหติ  ฯเปฯ  ทุพฺภาสิเต  ปาฏิเทสนียทิฏฺฐิ โหติ
ฯเปฯ   ทุพฺภาสิเต   ทุกฺกฏทิฏฺฐิ   โหติ   ตญฺเจ   ปาราชิเกน  โจเทติ
อสฺสมโณสิ   ฯเปฯ   สงฺฆกมฺมํ   วาติ   เอวํปิ   อาปตฺตญฺญภาคิยํ  โหติ
เลโส จ อุปาทินฺโน อาปตฺติ วาจาย วาจาย สงฺฆาทิเสสสฺส ฯ
                    เอเกกํ มูลํ กาตูน จกฺกํ พนฺธิตพฺพํ ฯ
     [๕๘๙]   ภิกฺขุ  สงฺฆาทิเสสํ อชฺฌาปชฺชนฺโต ทิฏฺโฐ โหติ สงฺฆาทิเสเส
สงฺฆาทิเสสทิฏฺฐิ      โหติ      ตญฺเจ     ปาราชิเกน     โจทาเปติ
อสฺสมโณสิ    ฯเปฯ    สงฺฆกมฺมํ    วาติ    เอวํปิ    อาปตฺตญฺญภาคิยํ
โหติ  เลโส  จ  อุปาทินฺโน  อาปตฺติ  วาจาย  วาจาย สงฺฆาทิเสสสฺส ฯ
ภิกฺขุ    สงฺฆาทิเสสํ    อชฺฌาปชฺชนฺโต    ทิฏฺโฐ   โหติ   สงฺฆาทิเสเส
ถุลฺลจฺจยทิฏฺฐิ    โหติ    ฯเปฯ    สงฺฆาทิเสเส   ปาจิตฺติยทิฏฺฐิ   โหติ
ฯเปฯ   สงฺฆาทิเสเส   ปาฏิเทสนียทิฏฺฐิ   โหติ   ฯเปฯ   สงฺฆาทิเสเส
ทุกฺกฏทิฏฺฐิ   โหติ   ฯเปฯ   สงฺฆาทิเสเส   ทุพฺภาสิตทิฏฺฐิ  โหติ  ตญฺเจ
ปาราชิเกน   โจทาเปติ   อสฺสมโณสิ   ฯเปฯ   สงฺฆกมฺมํ  วาติ  เอวํปิ
อาปตฺตญฺญภาคิยํ    โหติ   เลโส   จ   อุปาทินฺโน   อาปตฺติ   วาจาย
วาจาย สงฺฆาทิเสสสฺส ฯ
     [๕๙๐]   ภิกฺขุ  ถุลฺลจฺจยํ  อชฺฌาปชฺชนฺโต  ทิฏฺโฐ  โหติ  ถุลฺลจฺจเย
ถุลฺลจฺจยทิฏฺฐิ   โหติ   ฯเปฯ   ถุลฺลจฺจเย   ปาจิตฺติยทิฏฺฐิ  โหติ  ฯเปฯ
ถุลฺลจฺจเย    ปาฏิเทสนียทิฏฺฐิ   โหติ   ฯเปฯ   ถุลฺลจฺจเย   ทุกฺกฏทิฏฺฐิ
โหติ   ฯเปฯ   ถุลฺลจฺจเย   ทุพฺภาสิตทิฏฺฐิ   โหติ   ฯเปฯ   ถุลฺลจฺจเย
สงฺฆาทิเสสทิฏฺฐิ   โหติ   ตญฺเจ   ปาราชิเกน   โจทาเปติ   อสฺสมโณสิ
ฯเปฯ    สงฺฆกมฺมํ    วาติ   เอวํปิ   อาปตฺตญฺญภาคิยํ   โหติ   เลโส
จ อุปาทินฺโน อาปตฺติ วาจาย วาจาย สงฺฆาทิเสสสฺส ฯ
     {๕๙๐.๑}   ภิกฺขุ  ปาจิตฺติยํ  อชฺฌาปชฺชนฺโต  ทิฏฺโฐ  โหติ  ฯเปฯ
ภิกฺขุ   ปาฏิเทสนียํ   อชฺฌาปชฺชนฺโต  ทิฏฺโฐ  โหติ  ฯเปฯ  ภิกฺขุ  ทุกฺกฏํ
อชฺฌาปชฺชนฺโต  ทิฏฺโฐ  โหติ  ฯเปฯ  ทุพฺภาสิตํ อชฺฌาปชฺชนฺโต ทิฏฺโฐ โหติ
ทุพฺภาสิเต   ทุพฺภาสิตทิฏฺฐิ   โหติ   ฯเปฯ   ทุพฺภาสิเต  สงฺฆาทิเสสทิฏฺฐิ
โหติ   ฯเปฯ   ทุพฺภาสิเต   ถุลฺลจฺจยทิฏฺฐิ   โหติ   ฯเปฯ   ทุพฺภาสิเต
ปาจิตฺติยทิฏฺฐิ   โหติ   ฯเปฯ  ทุพฺภาสิเต  ปาฏิเทสนียทิฏฺฐิ  โหติ  ฯเปฯ
ทุพฺภาสิเต    ทุกฺกฏทิฏฺฐิ    โหติ    ตญฺเจ    ปาราชิเกน   โจทาเปติ
อสฺสมโณสิ    อสกฺยปุตฺติโยสิ    นตฺถิ    ตยา   สทฺธึ   อุโปสโถ   วา
ปวารณา    วา    สงฺฆกมฺมํ   วาติ   เอวํปิ   อาปตฺตญฺญภาคิยํ   โหติ
เลโส จ อุปาทินฺโน อาปตฺติ วาจาย วาจาย สงฺฆาทิเสสสฺส ฯ
     [๕๙๑]   อนาปตฺติ   ตถาสญฺญี   โจเทติ   วา   โจทาเปติ  วา
อุมฺมตฺตกสฺส อาทิกมฺมิกสฺสาติ ฯ
                          นวมสงฺฆาทิเสสํ นิฏฺฐิตํ ฯ
                               ----------------
                               ทสมสงฺฆาทิเสสํ
     [๕๙๒]   เตน  สมเยน  พุทฺโธ  ภควา  ราชคเห  วิหรติ เวฬุวเน
กลนฺทกนิวาเป  ฯ  อถโข  เทวทตฺโต  เยน  โกกาลิโก  กฏโมรกติสฺสโก
ขณฺฑเทวิยา     ปุตฺโต     สมุทฺททตฺโต    เตนุปสงฺกมิ    อุปสงฺกมิตฺวา
โกกาลิกํ   กฏโมรกติสฺสกํ   ขณฺฑเทวิยา   ปุตฺตํ   สมุทฺททตฺตํ  เอตทโวจ
เอถ  มยํ  อาวุโส  สมณสฺส  โคตมสฺส  สงฺฆเภทํ กริสฺสาม จกฺกเภทนฺติ ฯ
เอวํ    วุตฺเต    โกกาลิโก    เทวทตฺตํ    เอตทโวจ   สมโณ   โข
อาวุโส   โคตโม   มหิทฺธิโก  มหานุภาโว  กถํ  มยํ  สมณสฺส  โคตมสฺส
สงฺฆเภทํ   กริสฺสาม  จกฺกเภทนฺติ  ฯ  เอถ  มยํ  อาวุโส  สมณํ  โคตมํ
อุปสงฺกมิตฺวา   ปญฺจ  วตฺถูนิ  ยาจิสฺสาม  ภควา  ภนฺเต  อเนกปริยาเยน
อปฺปิจฺฉสฺส   สนฺตุฏฺฐสฺส   สลฺเลขสฺส   ธูตสฺส   ปาสาทิกสฺส  อปฺปจฺจยสฺส
วิริยารมฺภสฺส   วณฺณวาที   อิมานิ  ภนฺเต  ปญฺจ  วตฺถูนิ  อเนกปริยาเยน
อปฺปิจฺฉตาย  สนฺตุฏฺฐตาย  ๑-  สลฺเลขาย  ธูตาย  ๒-  ปาสาทิกาย  ๓-
วิริยารมฺภาย   สํวตฺตนฺติ  สาธุ  ภนฺเต  ภิกฺขู  ยาวชีวํ  อารญฺญกา  อสฺสุ
โย   คามนฺตํ   โอสเรยฺย   วชฺชํ   นํ   ผุเสยฺย  ยาวชีวํ  ปิณฺฑปาติกา
อสฺสุ   โย   นิมนฺตนํ  สาทิเยยฺย  วชฺชํ  นํ  ผุเสยฺย  ยาวชีวํ  ปํสุกูลิกา
อสฺสุ    โย   คหปติจีวรํ   สาทิเยยฺย   วชฺชํ   นํ   ผุเสยฺย   ยาวชีวํ
รุกฺขมูลิกา   อสฺสุ   โย  ฉนฺนํ  อุปคจฺเฉยฺย  วชฺชํ  นํ  ผุเสยฺย  ยาวชีวํ
@เชิงอรรถ: ๑ ยุ. ม. สนฺตุฏฺฐิยา ฯ ๒ ยุ. ม. ธุตฺตาย ฯ ๓ ยุ. ม. ปาสาทิกตาย ฯ
มจฺฉมํสํ   น   ขาเทยฺยุํ   โย  มจฺฉมํสํ  ขาเทยฺย  วชฺชํ  นํ  ผุเสยฺยาติ
อิมานิ   สมโณ   โคตโม   นานุชานิสฺสติ   เต   มยํ   อิเมหิ   ปญฺจหิ
วตฺถูหิ   ชนํ   สญฺญาเปสฺสามาติ   ฯ   สกฺกา   โข   อาวุโส   อิเมหิ
ปญฺจหิ   วตฺถูหิ  สมณสฺส  โคตมสฺส  สงฺฆเภทํ  ๑-  กาตุํ  จกฺกเภทํ  ๒-
ลูขปฺปสนฺนา หิ อาวุโส มนุสฺสาติ ฯ
     [๕๙๓]   อถโข   เทวทตฺโต  สปริโส  เยน  ภควา  เตนุปสงฺกมิ
อุปสงฺกมิตฺวา   ภควนฺตํ   อภิวาเทตฺวา   เอกมนฺตํ  นิสีทึสุ  ฯ  เอกมนฺตํ
นิสินฺโน  โข  เทวทตฺโต  ภควนฺตํ เอตทโวจ ภควา ภนฺเต อเนกปริยาเยน
อปฺปิจฺฉสฺส   สนฺตุฏฺฐสฺส   สลฺเลขสฺส   ธูตสฺส   ปาสาทิกสฺส  อปฺปจฺจยสฺส
วิริยารมฺภสฺส   วณฺณวาที   อิมานิ  ภนฺเต  ปญฺจ  วตฺถูนิ  อเนกปริยาเยน
อปฺปิจฺฉตาย     สนฺตุฏฺฐตาย     สลฺเลขาย     ธูตาย     ปาสาทิกาย
อปฺปจฺจยาย     วิริยารมฺภาย     สํวตฺตนฺติ    สาธุ    ภนฺเต    ภิกฺขู
ยาวชีวํ   อารญฺญกา  อสฺสุ  โย  คามนฺตํ  โอสเรยฺย  วชฺชํ  นํ  ผุเสยฺย
ยาวชีวํ   ปิณฺฑปาติกา   อสฺสุ   โย   นิมนฺตนํ   สาทิเยยฺย   วชฺชํ   นํ
ผุเสยฺย   ยาวชีวํ   ปํสุกูลิกา   อสฺสุ  โย  คหปติจีวรํ  สาทิเยยฺย  วชฺชํ
นํ   ผุเสยฺย   ยาวชีวํ  รุกฺขมูลิกา  อสฺสุ  โย  ฉนฺนํ  อุปคจฺเฉยฺย  วชฺชํ
นํ   ผุเสยฺย   ยาวชีวํ   มจฺฉมํสํ  น  ขาเทยฺยุํ  โย  มจฺฉมํสํ  ขาเทยฺย
วชฺชํ   นํ   ผุเสยฺยาติ   ฯ   อลํ   เทวทตฺต   โย  อิจฺฉติ  อารญฺญโก
โหตุ   โย   อิจฺฉติ   คามนฺเต  วิหรตุ  โย  อิจฺฉติ  ปิณฺฑปาติโก  โหตุ
@เชิงอรรถ: ๑ ยุ. ม. สงฺฆเภโท ฯ ๒ ยุ. ม. จกฺกเภโท ฯ
โย   อิจฺฉติ   นิมนฺตนํ   สาทิยตุ   โย   อิจฺฉติ   ปํสุกูลิโก  โหตุ  โย
อิจฺฉติ    คหปติจีวรํ    สาทิยตุ    อฏฺฐมาเส   โข   มยา   เทวทตฺต
รุกฺขมูลเสนาสนํ     อนุญฺญาตํ     ติโกฏิปริสุทฺธํ     มจฺฉมํสํ     อทิฏฺฐํ
อสฺสุตํ อปริสงฺกิตนฺติ ฯ
     [๕๙๔]   อถโข   เทวทตฺโต   น   ภควา  อิมานิ  ปญฺจ  วตฺถูนิ
อนุชานาตีติ    หฏฺโฐ    อุทคฺโค    สปริโส    อุฏฺฐายาสนา   ภควนฺตํ
อภิวาเทตฺวา  ปทกฺขิณํ  กตฺวา  ปกฺกามิ  ฯ  อถโข เทวทตฺโต สปริโส ๑-
ราชคหํ   ปวิสิตฺวา   ปญฺจหิ   วตฺถูหิ   ชนํ   สญฺญาเปสิ   มยํ  อาวุโส
สมณํ   โคตมํ   อุปสงฺกมิตฺวา   ปญฺจ   วตฺถูนิ  ยาจิมฺหา  ภควา  ภนฺเต
อเนกปริยาเยน   อปฺปิจฺฉสฺส  สนฺตุฏฺฐสฺส  สลฺเลขสฺส  ธูตสฺส  ปาสาทิกสฺส
อปฺปจฺจยสฺส     วิริยารมฺภสฺส    วณฺณวาที    อิมานิ    ภนฺเต    ปญฺจ
วตฺถูนิ   อเนกปริยาเยน   อปฺปิจฺฉตาย   สนฺตุฏฺฐตาย  สลฺเลขาย  ธูตาย
ปาสาทิกาย    อปฺปจฺจยาย    วิริยารมฺภาย   สํวตฺตนฺติ   สาธุ   ภนฺเต
ภิกฺขู   ยาวชีวํ   อารญฺญกา   อสฺสุ  โย  คามนฺตํ  โอสเรยฺย  วชฺชํ  นํ
ผุเสยฺย    ยาวชีวํ    ปิณฺฑปาติกา   อสฺสุ   โย   นิมนฺตนํ   สาทิเยยฺย
วชฺชํ    นํ    ผุเสยฺย   ยาวชีวํ   ปํสุกูลิกา   อสฺสุ   โย   คหปติจีวรํ
สาทิเยยฺย   วชฺชํ   นํ   ผุเสยฺย  ยาวชีวํ  รุกฺขมูลิกา  อสฺสุ  โย  ฉนฺนํ
อุปคจฺเฉยฺย   วชฺชํ   นํ   ผุเสยฺย  ยาวชีวํ  มจฺฉมํสํ  น  ขาเทยฺยุํ  โย
มจฺฉมํสํ   ขาเทยฺย   วชฺชํ   นํ   ผุเสยฺยาติ   อิมานิ   สมโณ  โคตโม
@เชิงอรรถ: ๑ ยุ. ม. โปตฺถเกสุ อยํ ปาโฐ น โหติ ฯ
นานุชานาติ เต มยํ อิเมหิ ปญฺจหิ วตฺถูหิ สมาทาย วตฺตามาติ ฯ
     [๕๙๕]   ตตฺถ  เย  เต  มนุสฺสา  อสฺสทฺธา  อปฺปสนฺนา ทุพฺพุทฺธิโน
เต   เอวมาหํสุ   อิเม  โข  สมณา  สกฺยปุตฺติยา  ธูตา  สลฺเลขวุตฺติโน
สมโณ   ปน   โคตโม   พาหุลฺลิโก  พาหุลฺลาย  เจเตตีติ  ฯ  เย  ปน
เต   มนุสฺสา   สทฺธา   ปสนฺนา   ปณฺฑิตา  พุทฺธิมนฺโต  เต  อุชฺฌายนฺติ
ขียนฺติ   วิปาเจนฺติ   กถํ   หิ   นาม  เทวทตฺโต  ภควโต  สงฺฆเภทาย
ปรกฺกมิสฺสติ   จกฺกเภทายาติ   ฯ   อสฺโสสุํ  โข  ภิกฺขู  เตสํ  มนุสฺสานํ
อุชฺฌายนฺตานํ   ขียนฺตานํ   วิปาเจนฺตานํ   ฯ  เย  เต  ภิกฺขู  อปฺปิจฺฉา
ฯเปฯ   เต   อุชฺฌายนฺติ  ขียนฺติ  วิปาเจนฺติ  กถํ  หิ  นาม  เทวทตฺโต
สงฺฆเภทาย ปรกฺกมิสฺสติ จกฺกเภทายาติ ฯ
     {๕๙๕.๑}   อถโข  เต  ภิกฺขู ภควโต เอตมตฺถํ อาโรเจสุํ ฯ อถโข
ภควา   เอตสฺมึ  นิทาเน  เอตสฺมึ  ปกรเณ  ภิกฺขุสงฺฆํ  สนฺนิปาตาเปตฺวา
เทวทตฺตํ   ปฏิปุจฺฉิ   สจฺจํ   กิร  ตฺวํ  เทวทตฺต  สงฺฆเภทาย  ปรกฺกมสิ
จกฺกเภทายาติ  ฯ  สจฺจํ  ภควาติ  ฯ  วิครหิ  พุทฺโธ  ภควา  อนนุจฺฉวิกํ
โมฆปุริส  ฯเปฯ  กถํ  หิ  นาม  ตฺวํ  โมฆปุริส  สงฺฆเภทาย ปรกฺกมิสฺสสิ
จกฺกเภทาย   เนตํ   โมฆปุริส   อปฺปสนฺนานํ   วา   ปสาทาย   ฯเปฯ
เอวญฺจ ปน ภิกฺขเว อิมํ สิกฺขาปทํ อุทฺทิเสยฺยาถ
     {๕๙๕.๒}   โย    ปน   ภิกฺขุ   สมคฺคสฺส   สงฺฆสฺส   เภทาย
ปรกฺกเมยฺย    เภทนสํวตฺตนิกํ    วา    อธิกรณํ    สมาทาย   ปคฺคยฺห
ติฏฺเฐยฺย   โส   ภิกฺขุ   ภิกฺขูหิ   เอวมสฺส   วจนีโย   มา   อายสฺมา
สมคฺคสฺส      สงฺฆสฺส      เภทาย      ปรกฺกมิ      เภทนสํวตฺตนิกํ
วา   อธิกรณํ   สมาทาย   ปคฺคยฺห   อฏฺฐาสิ   สเมตายสฺมา   สงฺเฆน
สมคฺโค   หิ   สงฺโฆ   สมฺโมทมาโน   อวิวทมาโน   เอกุทฺเทโส  ผาสุ
วิหรตีติ  ฯ  เอวญฺจ  โส  ภิกฺขุ  ภิกฺขูหิ  วุจฺจมาโน  ตเถว  ปคฺคเณฺหยฺย
โส   ภิกฺขุ   ภิกฺขูหิ   ยาวตติยํ  สมนุภาสิตพฺโพ  ตสฺส  ปฏินิสฺสคฺคาย  ฯ
ยาวตติยญฺเจ    สมนุภาสิยมาโน   ตํ   ปฏินิสฺสชฺเชยฺย   อิจฺเจตํ   กุสลํ
โน เจ ปฏินิสฺสชฺเชยฺย สงฺฆาทิเสโสติ ฯ
     [๕๙๖]   โย  ปนาติ  โย  ยาทิโส  ฯเปฯ ภิกฺขูติ ฯเปฯ อยํ อิมสฺมึ
อตฺเถ   อธิปฺเปโต   ภิกฺขูติ   ฯ  สมคฺโค  นาม  สงฺโฆ  สมานสํวาสโก
สมานสีมาย  ฐิโต  ฯ  เภทาย  ปรกฺกเมยฺยาติ  กถํ  อิเม  นานา  อสฺสุ
วินา  อสฺสุ  วคฺคา  อสฺสูติ  ปกฺขํ  ปริเยสติ  คณํ พนฺธติ ฯ เภทนสํวตฺตนิกํ
วา   อธิกรณนฺติ   อฏฺฐารสเภทกรวตฺถูนิ   ฯ   สมาทายาติ  อาทาย  ฯ
ปคฺคยฺหาติ ทีเปยฺย ฯ ติฏฺเฐยฺยาติ นปฺปฏินิสฺสชฺเชยฺย ฯ
     [๕๙๗]   โส   ภิกฺขูติ  โย  โส  สงฺฆเภทโก  ภิกฺขุ  ฯ  ภิกฺขูหีติ
อญฺเญหิ   ภิกฺขูหิ   ฯ   เย  ปสฺสนฺติ  เย  สุณนฺติ  เตหิ  วตฺตพฺโพ  มา
อายสฺมา   สมคฺคสฺส   สงฺฆสฺส   เภทาย   ปรกฺกมิ  เภทนสํวตฺตนิกํ  วา
อธิกรณํ   สมาทาย   ปคฺคยฺห   อฏฺฐาสิ  สเมตายสฺมา  สงฺเฆน  สมคฺโค
หิ   สงฺโฆ   สมฺโมทมาโน  อวิวทมาโน  เอกุทฺเทโส  ผาสุ  วิหรตีติ  ฯ
ทุติยมฺปิ   วตฺตพฺโพ   ตติยมฺปิ  วตฺตพฺโพ  ฯ  สเจ  ปฏินิสฺสชฺชติ  อิจฺเจตํ
กุสลํ   โน   เจ   ปฏินิสฺสชฺชติ   อาปตฺติ   ทุกฺกฏสฺส   ฯ   สุตฺวา  น
วทนฺติ   อาปตฺติ   ทุกฺกฏสฺส   ฯ   โส   ภิกฺขุ  สงฺฆมชฺฌํปิ  อากฑฺฒิตฺวา
วตฺตพฺโพ   มา   อายสฺมา  สมคฺคสฺส  สงฺฆสฺส  เภทาย  ปรกฺกมิ  เภทน
สํวตฺตนิกํ   วา   อธิกรณํ   สมาทาย   ปคฺคยฺห   อฏฺฐาสิ  สเมตายสฺมา
สงฺเฆน  สมคฺโค  หิ  สงฺโฆ  สมฺโมทมาโน  อวิวทมาโน เอกุทฺเทโส ผาสุ
วิหรตีติ  ฯ  ทุติยมฺปิ  วตฺตพฺโพ  ตติยมฺปิ  วตฺตพฺโพ  ฯ  สเจ ปฏินิสฺสชฺชติ
อิจฺเจตํ กุสลํ โน เจ ปฏินิสฺสชฺชติ อาปตฺติ ทุกฺกฏสฺส ฯ
     [๕๙๘]   โส   ภิกฺขุ   สมนุภาสิตพฺโพ  ฯ  เอวญฺจ  ปน  ภิกฺขเว
สมนุภาสิตพฺโพ ฯ พฺยตฺเตน ภิกฺขุนา ปฏิพเลน สงฺโฆ ญาเปตพฺโพ
     {๕๙๘.๑}   สุณาตุ   เม  ภนฺเต  สงฺโฆ  อยํ  อิตฺถนฺนาโม  ภิกฺขุ
สมคฺคสฺส  สงฺฆสฺส  เภทาย  ปรกฺกมติ  ฯ  โส  ตํ วตฺถุํ นปฺปฏินิสฺสชฺชติ ฯ
ยทิ    สงฺฆสฺส   ปตฺตกลฺลํ   สงฺโฆ   อิตฺถนฺนามํ   ภิกฺขุํ   สมนุภาเสยฺย
ตสฺส วตฺถุสฺส ปฏินิสฺสคฺคาย ฯ เอสา ญตฺติ ฯ
     {๕๙๘.๒}   สุณาตุ  เม ภนฺเต สงฺโฆ อยํ อิตฺถนฺนาโม ภิกฺขุ สมคฺคสฺส
สงฺฆสฺส  เภทาย  ปรกฺกมติ  ฯ  โส  ตํ  วตฺถุํ  นปฺปฏินิสฺสชฺชติ  ฯ สงฺโฆ
อิตฺถนฺนามํ    ภิกฺขุํ    สมนุภาสติ   ตสฺส   วตฺถุสฺส   ปฏินิสฺสคฺคาย   ฯ
ยสฺสายสฺมโต    ขมติ    อิตฺถนฺนามสฺส    ภิกฺขุโน   สมนุภาสนา   ตสฺส
วตฺถุสฺส ปฏินิสฺสคฺคาย โส ตุณฺหสฺส ยสฺส นกฺขมติ โส ภาเสยฺย ฯ
     {๕๙๘.๓}   ทุติยมฺปิ เอตมตฺถํ วทามิ ฯเปฯ ตติยมฺปิ เอตมตฺถํ วทามิ ฯ
สุณาตุ   เม  ภนฺเต  สงฺโฆ  อยํ  อิตฺถนฺนาโม  ภิกฺขุ  สมคฺคสฺส  สงฺฆสฺส
เภทาย   ปรกฺกมติ   ฯ   โส   ตํ   วตฺถุํ   นปฺปฏินิสฺสชฺชติ  ฯ  สงฺโฆ
อิตฺถนฺนามํ    ภิกฺขุํ    สมนุภาสติ   ตสฺส   วตฺถุสฺส   ปฏินิสฺสคฺคาย   ฯ
ยสฺสายสฺมโต    ขมติ    อิตฺถนฺนามสฺส    ภิกฺขุโน   สมนุภาสนา   ตสฺส
วตฺถุสฺส ปฏินิสฺสคฺคาย โส ตุณฺหสฺส ยสฺส นกฺขมติ โส ภาเสยฺย ฯ
     {๕๙๘.๔}   สมนุภฏฺโฐ  สงฺเฆน  อิตฺถนฺนาโม  ภิกฺขุ  ตสฺส  วตฺถุสฺส
ปฏินิสฺสคฺคาย ฯ ขมติ สงฺฆสฺส ตสฺมา ตุณฺหี ฯ เอวเมตํ ธารยามีติ ฯ
     [๕๙๙]   ญตฺติยา    ทุกฺกฏํ    ทฺวีหิ   กมฺมวาจาหิ   ถุลฺลจฺจยา
กมฺมวาจาปริโยสาเน อาปตฺติ สงฺฆาทิเสสสฺส ฯ สงฺฆาทิเสสํ อชฺฌาปชฺชนฺตสฺส
ญตฺติยา   ทุกฺกฏํ   ทฺวีหิ   กมฺมวาจาหิ   ถุลฺลจฺจยา   ปฏิปฺปสฺสมฺภนฺติ  ฯ
สงฺฆาทิเสโสติ ฯเปฯ เตนปิ วุจฺจติ สงฺฆาทิเสโสติ ฯ
     [๖๐๐]   ธมฺมกมฺเม    ธมฺมกมฺมสญฺญี   นปฺปฏินิสฺสชฺชติ   อาปตฺติ
สงฺฆาทิเสสสฺส    ฯ   ธมฺมกมฺเม   เวมติโก   นปฺปฏินิสฺสชฺชติ   อาปตฺติ
สงฺฆาทิเสสสฺส     ฯ    ธมฺมกมฺเม    อธมฺมกมฺมสญฺญี    นปฺปฏินิสฺสชฺชติ
อาปตฺติ    สงฺฆาทิเสสสฺส    ฯ   อธมฺมกมฺเม   ธมฺมกมฺมสญฺญี   อาปตฺติ
ทุกฺกฏสฺส  ฯ  อธมฺมกมฺเม  เวมติโก  อาปตฺติ  ทุกฺกฏสฺส  ฯ  อธมฺมกมฺเม
อธมฺมกมฺมสญฺญี อาปตฺติ ทุกฺกฏสฺส ฯ
     [๖๐๑]   อนาปตฺติ  อสมนุภาสนฺตสฺส ปฏินิสฺสชฺชนฺตสฺส อุมฺมตฺตกสฺส ๑-
อาทิกมฺมิกสฺสาติ ฯ
                          ทสมสงฺฆาทิเสสํ นิฏฺฐิตํ ฯ
                                --------------
@เชิงอรรถ: ๑ อิโต ปรํ ยุโรปิยโปตฺถเกเยว ขิตฺตจิตฺตสฺส เวทนฏฺฏสฺสาติ ทิสฺสติ ฯ
                            เอกาทสมสงฺฆาทิเสสํ
     [๖๐๒]   เตน  สมเยน  พุทฺโธ  ภควา  ราชคเห  วิหรติ เวฬุวเน
กลนฺทกนิวาเป   ฯ   เตน   โข  ปน  สมเยน  เทวทตฺโต  สงฺฆเภทาย
ปรกฺกมติ   จกฺกเภทาย   ฯ   ภิกฺขู   เอวมาหํสุ  อธมฺมวาที  เทวทตฺโต
อวินยวาที  เทวทตฺโต  กถํ  หิ  นาม  เทวทตฺโต สงฺฆเภทาย ปรกฺกมิสฺสติ
จกฺกเภทายาติ  ฯ  เอวํ  วุตฺเต  โกกาลิโก  กฏโมรกติสฺสโก ขณฺฑเทวิยา
ปุตฺโต  สมุทฺททตฺโต  เต  ภิกฺขู  เอตทโวจุํ  มา อายสฺมนฺโต เอวํ อวจุตฺถ
ธมฺมวาที   เทวทตฺโต   วินยวาที   เทวทตฺโต   อมฺหากญฺจ   เทวทตฺโต
ฉนฺทญฺจ   รุจิญฺจ   อาทาย  โวหรติ  ชานาติ  โน  ภาสติ  อมฺหากมฺเปตํ
ขมตีติ  ฯ  เย  เต ภิกฺขู อปฺปิจฺฉา ฯเปฯ เต อุชฺฌายนฺติ ขียนฺติ วิปาเจนฺติ
กถํ  หิ  นาม  ภิกฺขู  เทวทตฺตสฺส  สงฺฆเภทาย  ปรกฺกมนฺตสฺส  อนุวตฺตกา
ภวิสฺสนฺติ   วคฺควาทกาติ   ฯ   อถโข   เต   ภิกฺขู  ภควโต  เอตมตฺถํ
อาโรเจสุํ  ฯ  อถโข  ภควา  เอตสฺมึ  นิทาเน เอตสฺมึ ปกรเณ ภิกฺขุสงฺฆํ
สนฺนิปาตาเปตฺวา  ภิกฺขู  ปฏิปุจฺฉิ  สจฺจํ  กิร  ภิกฺขเว  ภิกฺขู  เทวทตฺตสฺส
สงฺฆเภทาย    ปรกฺกมนฺตสฺส    อนุวตฺตกา    วคฺควาทกาติ   ฯ   สจฺจํ
ภควาติ    ฯ   วิครหิ   พุทฺโธ   ภควา   อนนุจฺฉวิกํ   ภิกฺขเว   เตสํ
โมฆปุริสานํ   ฯเปฯ  กถํ  หิ  นาม  เต  ภิกฺขเว โมฆปุริสา เทวทตฺตสฺส
สงฺฆเภทาย     ปรกฺกมนฺตสฺส    อนุวตฺตกา    ภวิสฺสนฺติ    วคฺควาทกา
เนตํ    ภิกฺขเว    อปฺปสนฺนานํ    วา    ปสาทาย   ฯเปฯ   เอวญฺจ
ปน ภิกฺขเว อิมํ สิกฺขาปทํ อุทฺทิเสยฺยาถ
     {๖๐๒.๑}   ตสฺเสว  โข  ปน  ภิกฺขุสฺส  ภิกฺขู  โหนฺติ  อนุวตฺตกา
วคฺควาทกา เอโก วา เทฺว วา ตโย วา เต เอวํ วเทยฺยุํ มา อายสฺมนฺโต
เอตํ  ภิกฺขุํ  กิญฺจิ  อวจุตฺถ  ธมฺมวาที  เจโส  ภิกฺขุ วินยวาที เจโส ภิกฺขุ
อมฺหากญฺเจโส   ภิกฺขุ   ฉนฺทญฺจ  รุจิญฺจ  อาทาย  โวหรติ  ชานาติ  โน
ภาสติ   อมฺหากมฺเปตํ  ขมตีติ  ฯ  เต  ภิกฺขู  ภิกฺขูหิ  เอวมสฺสุ  วจนียา
มา  อายสฺมนฺโต  เอวํ  อวจุตฺถ  น  เจโส  ภิกฺขุ  ธมฺมวาที  น  เจโส
ภิกฺขุ     วินยวาที    มา    อายสฺมนฺตานมฺปิ    สงฺฆเภโท    รุจฺจิตฺถ
สเมตายสฺมนฺตานํ  สงฺเฆน  สมคฺโค  หิ  สงฺโฆ  สมฺโมทมาโน อวิวทมาโน
เอกุทฺเทโส   ผาสุ  วิหรตีติ  ฯ  เอวญฺจ  เต  ภิกฺขู  ภิกฺขูหิ  วุจฺจมานา
ตเถว   ปคฺคเณฺหยฺยุํ   เต   ภิกฺขู   ภิกฺขูหิ   ยาวตติยํ   สมนุภาสิตพฺพา
ตสฺส  ปฏินิสฺสคฺคาย  ฯ  ยาวตติยญฺเจ  สมนุภาสิยมานา  ตํ ปฏินิสฺสชฺเชยฺยุํ
อิจฺเจตํ กุสลํ โน เจ ปฏินิสฺสชฺเชยฺยุํ สงฺฆาทิเสโสติ ฯ
     [๖๐๓]   ตสฺเสว   โข  ปนาติ  ตสฺส  สงฺฆเภทกสฺส  ภิกฺขุโน  ฯ
ภิกฺขู   โหนฺตีติ   อญฺเญ   ภิกฺขู   โหนฺติ   ฯ   อนุวตฺตกาติ   ยํทิฏฺฐิโก
โหติ  ยํขนฺติโก  ยํรุจิโก  เตปิ  ตํทิฏฺฐิกา  โหนฺติ  ตํขนฺติกา  ตํรุจิกา  ฯ
วคฺควาทกาติ   ตสฺส   วณฺณาย   ปกฺขาย  ฐิตา  โหนฺติ  ฯ  เอโก  วา
เทฺว   วา  ตโย  วาติ  เอโก  วา  โหติ  เทฺว  วา  ตโย  วา  เต
เอวํ   วเทยฺยุํ  มา  อายสฺมนฺโต  เอตํ  ภิกฺขุํ  กิญฺจิ  อวจุตฺถ  ธมฺมวาที
เจโส   ภิกฺขุ   วินยวาที   เจโส  ภิกฺขุ  อมฺหากญฺเจโส  ภิกฺขุ  ฉนฺทญฺจ
รุจิญฺจ อาทาย โวหรติ ชานาติ โน ภาสติ อมฺหากมฺเปตํ ขมตีติ ฯ
     [๖๐๔]   เต  ภิกฺขูติ  เย  เต  อนุวตฺตกา ภิกฺขู ฯ ภิกฺขูหีติ อญฺเญหิ
ภิกฺขูหิ  ฯ  เย  ปสฺสนฺติ  เย  สุณนฺติ  เตหิ  วตฺตพฺพา  มา  อายสฺมนฺโต
เอวํ  อวจุตฺถ  น  เจโส  ภิกฺขุ  ธมฺมวาที  น  เจโส ภิกฺขุ วินยวาที มา
อายสฺมนฺตานมฺปิ    สงฺฆเภโท    รุจฺจิตฺถ    สเมตายสฺมนฺตานํ   สงฺเฆน
สมคฺโค   หิ   สงฺโฆ   สมฺโมทมาโน   อวิวทมาโน   เอกุทฺเทโส  ผาสุ
วิหรตีติ    ฯ    ทุติยมฺปิ   วตฺตพฺพา   ตติยมฺปิ   วตฺตพฺพา   ฯ   สเจ
ปฏินิสฺสชฺชนฺติ    อิจฺเจตํ    กุสลํ   โน   เจ   ปฏินิสฺสชฺชนฺติ   อาปตฺติ
ทุกฺกฏสฺส   ฯ   สุตฺวา   น   วทนฺติ  อาปตฺติ  ทุกฺกฏสฺส  ฯ  เต  ภิกฺขู
สงฺฆมชฺฌํปิ     อากฑฺฒิตฺวา    วตฺตพฺพา    มา    อายสฺมนฺโต    เอวํ
อวจุตฺถ   น   เจโส  ภิกฺขุ  ธมฺมวาที  น  เจโส  ภิกฺขุ  วินยวาที  มา
อายสฺมนฺตานมฺปิ    สงฺฆเภโท    รุจฺจิตฺถ    สเมตายสฺมนฺตานํ   สงฺเฆน
สมคฺโค   หิ   สงฺโฆ   สมฺโมทมาโน   อวิวทมาโน   เอกุทฺเทโส  ผาสุ
วิหรตีติ  ฯ  ทุติยมฺปิ  วตฺตพฺพา  ตติยมฺปิ  วตฺตพฺพา  ฯ สเจ ปฏินิสฺสชฺชนฺติ
อิจฺเจตํ กุสลํ โน เจ ปฏินิสฺสชฺชนฺติ อาปตฺติ ทุกฺกฏสฺส ฯ
     [๖๐๕]   เต   ภิกฺขู   ภิกฺขูหิ   สมนุภาสิตพฺพา  ฯ  เอวญฺจ  ปน
ภิกฺขเว   สมนุภาสิตพฺพา   ฯ   พฺยตฺเตน   ภิกฺขุนา   ปฏิพเลน   สงฺโฆ
ญาเปตพฺโพ
     {๖๐๕.๑}   สุณาตุ  เม  ภนฺเต  สงฺโฆ  อิตฺถนฺนาโม จ อิตฺถนฺนาโม
จ   ภิกฺขู  อิตฺถนฺนามสฺส  ภิกฺขุโน  สงฺฆเภทาย  ปรกฺกมนฺตสฺส  อนุวตฺตกา
วคฺควาทกา  ฯ  เต  ตํ  วตฺถุํ  นปฺปฏินิสฺสชฺชนฺติ  ฯ ยทิ สงฺฆสฺส ปตฺตกลฺลํ
สงฺโฆ    อิตฺถนฺนามญฺจ    อิตฺถนฺนามญฺจ    ภิกฺขู   สมนุภาเสยฺย   ตสฺส
วตฺถุสฺส ปฏินิสฺสคฺคาย ฯ เอสา ญตฺติ ฯ
     {๖๐๕.๒}   สุณาตุ  เม  ภนฺเต สงฺโฆ อิตฺถนฺนาโม จ อิตฺถนฺนาโม จ
ภิกฺขู   อิตฺถนฺนามสฺส   ภิกฺขุโน   สงฺฆเภทาย   ปรกฺกมนฺตสฺส  อนุวตฺตกา
วคฺควาทกา  ฯ  เต  ตํ  วตฺถุํ  นปฺปฏินิสฺสชฺชนฺติ  ฯ  สงฺโฆ อิตฺถนฺนามญฺจ
อิตฺถนฺนามญฺจ   ภิกฺขู   สมนุภาสติ   ตสฺส   วตฺถุสฺส   ปฏินิสฺสคฺคาย   ฯ
ยสฺสายสฺมโต    ขมติ   อิตฺถนฺนามสฺส   จ   อิตฺถนฺนามสฺส   จ   ภิกฺขูนํ
สมนุภาสนา    ตสฺส    วตฺถุสฺส   ปฏินิสฺสคฺคาย   โส   ตุณฺหสฺส   ยสฺส
นกฺขมติ โส ภาเสยฺย ฯ
     {๖๐๕.๓}   ทุติยมฺปิ เอตมตฺถํ วทามิ ฯเปฯ ตติยมฺปิ เอตมตฺถํ วทามิ ฯ
สุณาตุ   เม   ภนฺเต   สงฺโฆ   อิตฺถนฺนาโม  จ  อิตฺถนฺนาโม  จ  ภิกฺขู
อิตฺถนฺนามสฺส   ภิกฺขุโน   สงฺฆเภทาย   ปรกฺกมนฺตสฺส   อนุวตฺตกา  วคฺค
วาทกา   ฯ   เต  ตํ  วตฺถุํ  นปฺปฏินิสฺสชฺชนฺติ  ฯ  สงฺโฆ  อิตฺถนฺนามญฺจ
อิตฺถนฺนามญฺจ   ภิกฺขู   สมนุภาสติ   ตสฺส   วตฺถุสฺส   ปฏินิสฺสคฺคาย   ฯ
ยสฺสายสฺมโต    ขมติ   อิตฺถนฺนามสฺส   จ   อิตฺถนฺนามสฺส   จ   ภิกฺขูนํ
สมนุภาสนา    ตสฺส    วตฺถุสฺส   ปฏินิสฺสคฺคาย   โส   ตุณฺหสฺส   ยสฺส
นกฺขมติ โส ภาเสยฺย ฯ
     {๖๐๕.๔}   สมนุภฏฺฐา  สงฺเฆน  อิตฺถนฺนาโม จ อิตฺถนฺนาโม จ ภิกฺขู
ตสฺส  วตฺถุสฺส  ปฏินิสฺสคฺคาย  ฯ  ขมติ  สงฺฆสฺส  ตสฺมา ตุณฺหี ฯ เอวเมตํ
ธารยามีติ ฯ
     [๖๐๖]   ญตฺติยา    ทุกฺกฏํ    ทฺวีหิ   กมฺมวาจาหิ   ถุลฺลจฺจยา
กมฺมวาจาปริโยสาเน    อาปตฺติ    สงฺฆาทิเสสสฺส    ฯ    สงฺฆาทิเสสํ
อชฺฌาปชฺชนฺตานํ    ญตฺติยา    ทุกฺกฏํ   ทฺวีหิ   กมฺมวาจาหิ   ถุลฺลจฺจยา
ปฏิปฺปสฺสมฺภนฺติ   ฯ   เทฺว   ตโย   เอกโต   สมนุภาสิตพฺพา   ตทุตฺตริ
น สมนุภาสิตพฺพา ฯ สงฺฆาทิเสโสติ ฯเปฯ เตนปิ วุจฺจติ สงฺฆาทิเสโสติ ฯ
     [๖๐๗]   ธมฺมกมฺเม   ธมฺมกมฺมสญฺญี   นปฺปฏินิสฺสชฺชนฺติ   อาปตฺติ
สงฺฆาทิเสสสฺส   ฯ   ธมฺมกมฺเม   เวมติกา   นปฺปฏินิสฺสชฺชนฺติ   อาปตฺติ
สงฺฆาทิเสสสฺส    ฯ    ธมฺมกมฺเม    อธมฺมกมฺมสญฺญี    นปฺปฏินิสฺสชฺชนฺติ
อาปตฺติ    สงฺฆาทิเสสสฺส    ฯ   อธมฺมกมฺเม   ธมฺมกมฺมสญฺญี   อาปตฺติ
ทุกฺกฏสฺส  ฯ  อธมฺมกมฺเม  เวมติกา  อาปตฺติ  ทุกฺกฏสฺส  ฯ  อธมฺมกมฺเม
อธมฺมกมฺมสญฺญี อาปตฺติ ทุกฺกฏสฺส ฯ
     [๖๐๘]   อนาปตฺติ  อสมนุภาสนฺตานํ  ปฏินิสฺสชฺชนฺตานํ  อุมฺมตฺตกานํ
ขิตฺตจิตฺตานํ เวทนฏฺฏานํ อาทิกมฺมิกานนฺติ ฯ
                      เอกาทสมสงฺฆาทิเสสํ นิฏฺฐิตํ ฯ
                                -------------
                            ทฺวาทสมสงฺฆาทิเสสํ
     [๖๐๙]   เตน สมเยน พุทฺโธ ภควา โกสมฺพิยํ วิหรติ โฆสิตาราเม ฯ
เตน  โข  ปน  สมเยน  อายสฺมา  ฉนฺโน  อนาจารํ  อาจรติ  ฯ  ภิกฺขู
เอวมาหํสุ  มา  อาวุโส  ฉนฺน  เอวรูปํ  อกาสิ เนตํ กปฺปตีติ ฯ โส เอวํ
วเทสิ  กึ  นุ  โข  นาม  ตุเมฺห  อาวุโส มํ วตฺตพฺพํ มญฺญถ อหํ โข นาม
ตุเมฺห   วเทยฺยํ  อมฺหากํ  พุทฺโธ  อมฺหากํ  ธมฺโม  อมฺหากํ  อยฺยปุตฺเตน
ธมฺโม  อภิสมิโต  เสยฺยถาปิ  นาม มหาวาโต วายนฺโต ติณกฏฺฐปณฺณสฏํ ๑-
เอกโต   อุสฺสาเทยฺย   ๒-   เสยฺยถาปิ   วา   ปน  นที  ปพฺพเตยฺยา
สงฺขเสวาลปณกํ   เอกโต   อุสฺสาเทยฺย   เอวเมว  ตุเมฺห  นานานามา
นานาโคตฺตา  นานาชจฺจา  นานากุลา  ปพฺพชิตา  เอกโต  อุสฺสาทิตา ๓-
กึ  นุ  โข  นาม  ตุเมฺห  อาวุโส  มํ  วตฺตพฺพํ  มญฺญถ  อหํ  โข  นาม
ตุเมฺห   วเทยฺยํ  อมฺหากํ  พุทฺโธ  อมฺหากํ  ธมฺโม  อมฺหากํ  อยฺยปุตฺเตน
ธมฺโม   อภิสมิโตติ   ฯ   เย  เต  ภิกฺขู  อปฺปิจฺฉา  สนฺตุฏฺฐา  ลชฺชิโน
กุกฺกุจฺจกา   สิกฺขากามา   เต   อุชฺฌายนฺติ   ขียนฺติ   วิปาเจนฺติ   กถํ
หิ   นาม   อายสฺมา   ฉนฺโน   ภิกฺขูหิ   สหธมฺมิกํ  วุจฺจมาโน  อตฺตานํ
อวจนียํ    กริสฺสตีติ    ฯ   อถโข   เต   ภิกฺขู   ภควโต   เอตมตฺถํ
อาโรเจสุํ   ฯ   อถโข   ภควา   เอตสฺมึ   นิทาเน  เอตสฺมึ  ปกรเณ
@เชิงอรรถ: ๑ ยุ. ม. ติณกฏฺฐปณฺณกสฏํ ฯ ๒ อุสฺสาเรยฺย ฯ ๓ ยุ. ม. อุสฺสาริตา ฯ
ภิกฺขุสงฺฆํ   สนฺนิปาตาเปตฺวา   อายสฺมนฺตํ   ฉนฺนํ   ปฏิปุจฺฉิ   สจฺจํ  กิร
ตฺวํ   ฉนฺน  ภิกฺขูหิ  สหธมฺมิกํ  วุจฺจมาโน  อตฺตานํ  อวจนียํ  กโรสีติ  ฯ
สจฺจํ   ภควาติ  ฯ  วิครหิ  พุทฺโธ  ภควา  อนนุจฺฉวิกํ  โมฆปุริส  ฯเปฯ
อกรณียํ   กถํ   หิ   นาม  ตฺวํ  โมฆปุริส  ภิกฺขูหิ  สหธมฺมิกํ  วุจฺจมาโน
อตฺตานํ   อวจนียํ  กริสฺสสิ  เนตํ  โมฆปุริส  อปฺปสนฺนานํ  วา  ปสาทาย
ฯเปฯ เอวญฺจ ปน ภิกฺขเว อิมํ สิกฺขาปทํ อุทฺทิเสยฺยาถ
     {๖๐๙.๑}   ภิกฺขุ  ปเนว  ทุพฺพจชาติโก  โหติ  อุทฺเทสปริยาปนฺเนสุ
สิกฺขาปเทสุ   ภิกฺขูหิ   สหธมฺมิกํ   วุจฺจมาโน   อตฺตานํ  อวจนียํ  กโรติ
มา   มํ   อายสฺมนฺโต   กิญฺจิ   อวจุตฺถ   กลฺยาณํ   วา   ปาปกํ  วา
อหมฺปายสฺมนฺเต    น   กิญฺจิ   วกฺขามิ   กลฺยาณํ   วา   ปาปกํ   วา
วิรมถายสฺมนฺโต   มม   วจนายาติ   ฯ   โส   ภิกฺขุ  ภิกฺขูหิ  เอวมสฺส
วจนีโย   มา  อายสฺมา  อตฺตานํ  อวจนียํ  อกาสิ  วจนียเมว  อายสฺมา
อตฺตานํ    กโรตุ    อายสฺมาปิ    ภิกฺขู   วเทตุ   สหธมฺเมน   ภิกฺขูปิ
อายสฺมนฺตํ   วกฺขนฺติ   สหธมฺเมน   เอวํ   สํวฑฺฒา   หิ  ตสฺส  ภควโต
ปริสา     ยทิทํ     อญฺญมญฺญวจเนน     อญฺญมญฺญวุฏฺฐาปเนนาติ     ฯ
เอวญฺจ   โส   ภิกฺขุ   ภิกฺขูหิ   วุจฺจมาโน   ตเถว   ปคฺคเณฺหยฺย  โส
ภิกฺขุ    ภิกฺขูหิ    ยาวตติยํ    สมนุภาสิตพฺโพ    ตสฺส    ปฏินิสฺสคฺคาย
ยาวตติยญฺเจ     สมนุภาสิยมาโน     ตํ     ปฏินิสฺสชฺเชยฺย    อิจฺเจตํ
กุสลํ โน เจ ปฏินิสฺสชฺเชยฺย สงฺฆาทิเสโสติ ฯ
     [๖๑๐]   ภิกฺขุ   ปเนว   ทุพฺพจชาติโก   โหตีติ   ทุพฺพโจ  โหติ
โทวจสฺสกรเณหิ    ธมฺเมหิ    สมนฺนาคโต    อกฺขโม   อปฺปทกฺขิณคฺคาหี
อนุสาสนึ   ฯ  อุทฺเทสปริยาปนฺเนสุ  สิกฺขาปเทสูติ  ปาติโมกฺขปริยาปนฺเนสุ
สิกฺขาปเทสุ   ฯ   ภิกฺขูหีติ   อญฺเญหิ   ภิกฺขูหิ   ฯ  สหธมฺมิกํ  นาม  ยํ
ภควตา  ปญฺญตฺตํ  สิกฺขาปทํ  เอตํ  สหธมฺมิกํ  นาม  ฯ  เตน  วุจฺจมาโน
อตฺตานํ  อวจนียํ  กโรติ  มา  มํ  อายสฺมนฺโต  กิญฺจิ อวจุตฺถ กลฺยาณํ วา
ปาปกํ  วา  อหมฺปายสฺมนฺเต  น  กิญฺจิ  วกฺขามิ  กลฺยาณํ  วา ปาปกํ วา
วิรมถายสฺมนฺโต มม วจนายาติ ฯ
     [๖๑๑]   โส  ภิกฺขูติ  โย  โส  ทุพฺพจชาติโก  ภิกฺขุ  ฯ  ภิกฺขูหีติ
อญฺเญหิ   ภิกฺขูหิ   ฯ   เย  ปสฺสนฺติ  เย  สุณนฺติ  เตหิ  วตฺตพฺโพ  มา
อายสฺมา   อตฺตานํ   อวจนียํ   อกาสิ   วจนียเมว   อายสฺมา  อตฺตานํ
กโรตุ    อายสฺมาปิ   ภิกฺขู   วเทตุ   สหธมฺเมน   ภิกฺขูปิ   อายสฺมนฺตํ
วกฺขนฺติ   สหธมฺเมน   เอวํ   สํวฑฺฒา  หิ  ตสฺส  ภควโต  ปริสา  ยทิทํ
อญฺญมญฺญวจเนน    อญฺญมญฺญวุฏฺฐาปเนนาติ    ฯ    ทุติยมฺปิ    วตฺตพฺโพ
ตติยมฺปิ   วตฺตพฺโพ   ฯ   สเจ   ปฏินิสฺสชฺชติ  อิจฺเจตํ  กุสลํ  โน  เจ
ปฏินิสฺสชฺชติ   อาปตฺติ   ทุกฺกฏสฺส   ฯ   สุตฺวา   น   วทนฺติ   อาปตฺติ
ทุกฺกฏสฺส   ฯ   โส   ภิกฺขุ   สงฺฆมชฺฌํปิ   อากฑฺฒิตฺวา   วตฺตพฺโพ  มา
อายสฺมา   อตฺตานํ   อวจนียํ   อกาสิ   วจนียเมว   อายสฺมา  อตฺตานํ
กโรตุ    อายสฺมาปิ   ภิกฺขู   วเทตุ   สหธมฺเมน   ภิกฺขูปิ   อายสฺมนฺตํ
วกฺขนฺติ   สหธมฺเมน   เอวํ   สํวฑฺฒา  หิ  ตสฺส  ภควโต  ปริสา  ยทิทํ
อญฺญมญฺญวจเนน    อญฺญมญฺญวุฏฺฐาปเนนาติ    ฯ    ทุติยมฺปิ    วตฺตพฺโพ
ตติยมฺปิ   วตฺตพฺโพ   ฯ   สเจ   ปฏินิสฺสชฺชติ  อิจฺเจตํ  กุสลํ  โน  เจ
ปฏินิสฺสชฺชติ อาปตฺติ ทุกฺกฏสฺส ฯ
     [๖๑๒]   โส   ภิกฺขุ   สมนุภาสิตพฺโพ  ฯ  เอวญฺจ  ปน  ภิกฺขเว
สมนุภาสิตพฺโพ ฯ พฺยตฺเตน ภิกฺขุนา พฏิพเลน สงฺโฆ ญาเปตพฺโพ
     {๖๑๒.๑}   สุณาตุ  เม  ภนฺเต  สงฺโฆ อยํ อิตฺถนฺนาโม ภิกฺขุ ภิกฺขูหิ
สหธมฺมิกํ วุจฺจมาโน อตฺตานํ อวจนียํ กโรติ ฯ โส ตํ วตฺถุํ นปฺปฏินิสฺสชฺชติ ฯ
ยทิ   สงฺฆสฺส   ปตฺตกลฺลํ  สงฺโฆ  อิตฺถนฺนามํ  ภิกฺขุํ  สมนุภาเสยฺย  ตสฺส
วตฺถุสฺส ปฏินิสฺสคฺคาย ฯ เอสา ญตฺติ ฯ
     {๖๑๒.๒}   สุณาตุ  เม  ภนฺเต  สงฺโฆ อยํ อิตฺถนฺนาโม ภิกฺขุ ภิกฺขูหิ
สหธมฺมิกํ วุจฺจมาโน อตฺตานํ อวจนียํ กโรติ ฯ โส ตํ วตฺถุํ นปฺปฏินิสฺสชฺชติ ฯ
สงฺโฆ   อิตฺถนฺนามํ   ภิกฺขุํ  สมนุภาสติ  ตสฺส  วตฺถุสฺส  ปฏินิสฺสคฺคาย  ฯ
ยสฺสายสฺมโต   ขมติ  อิตฺถนฺนามสฺส  ภิกฺขุโน  สมนุภาสนา  ตสฺส  วตฺถุสฺส
ปฏินิสฺสคฺคาย โส ตุณฺหสฺส ยสฺส นกฺขมติ โส ภาเสยฺย ฯ
     {๖๑๒.๓}   ทุติยมฺปิ เอตมตฺถํ วทามิ ฯเปฯ ตติยมฺปิ เอตมตฺถํ วทามิ ฯ
สุณาตุ   เม   ภนฺเต  สงฺโฆ  อยํ  อิตฺถนฺนาโม  ภิกฺขุ  ภิกฺขูหิ  สหธมฺมิกํ
วุจฺจมาโน  อตฺตานํ  อวจนียํ กโรติ ฯ โส ตํ วตฺถุํ นปฺปฏินิสฺสชฺชติ ฯ สงฺโฆ
อิตฺถนฺนามํ  ภิกฺขุํ  สมนุภาสติ  ตสฺส  วตฺถุสฺส ปฏินิสฺสคฺคาย ฯ ยสฺมายสฺมโต
ขมติ   อิตฺถนฺนามสฺส  ภิกฺขุโน  สมนุภาสนา  ตสฺส  วตฺถุสฺส  ปฏินิสฺสคฺคาย
โส ตุณฺหสฺส ยสฺส นกฺขมติ โส ภาเสยฺย ฯ
     {๖๑๒.๔}   สมนุภฏฺโฐ  สงฺเฆน  อิตฺถนฺนาโม  ภิกฺขุ  ตสฺส  วตฺถุสฺส
ปฏินิสฺสคฺคาย ฯ ขมติ สงฺฆสฺส ตสฺมา ตุณฺหี ฯ เอวเมตํ ธารยามีติ ฯ
     [๖๑๓]   ญตฺติยา    ทุกฺกฏํ    ทฺวีหิ   กมฺมวาจาหิ   ถุลฺลจฺจยา
กมฺมวาจาปริโยสาเน อาปตฺติ สงฺฆาทิเสสสฺส ฯ สงฺฆาทิเสสํ อชฺฌาปชฺชนฺตสฺส
ญตฺติยา   ทุกฺกฏํ   ทฺวีหิ   กมฺมวาจาหิ   ถุลฺลจฺจยา   ปฏิปฺปสฺสมฺภนฺติ  ฯ
สงฺฆาทิเสโสติ ฯเปฯ เตนปิ วุจฺจติ สงฺฆาทิเสโสติ ฯ
     [๖๑๔]   ธมฺมกมฺเม    ธมฺมกมฺมสญฺญี   นปฺปฏินิสฺสชฺชติ   อาปตฺติ
สงฺฆาทิเสสสฺส    ฯ   ธมฺมกมฺเม   เวมติโก   นปฺปฏินิสฺสชฺชติ   อาปตฺติ
สงฺฆาทิเสสสฺส     ฯ    ธมฺมกมฺเม    อธมฺมกมฺมสญฺญี    นปฺปฏินิสฺสชฺชติ
อาปตฺติ    สงฺฆาทิเสสสฺส    ฯ   อธมฺมกมฺเม   ธมฺมกมฺมสญฺญี   อาปตฺติ
ทุกฺกฏสฺส  ฯ  อธมฺมกมฺเม  เวมติโก  อาปตฺติ  ทุกฺกฏสฺส  ฯ  อธมฺมกมฺเม
อธมฺมกมฺมสญฺญี อาปตฺติ ทุกฺกฏสฺส ฯ
     [๖๑๕]   อนาปตฺติ  อสมนุภาสนฺตสฺส  ปฏินิสฺสชฺชนฺตสฺส  อุมฺมตฺตกสฺส
อาทิกมฺมิกสฺสาติ ฯ
                        ทฺวาทสมสงฺฆาทิเสสํ นิฏฺฐิตํ ฯ
                                 ----------
                             เตรสมสงฺฆาทิเสสํ
     [๖๑๖]   เตน  สมเยน  พุทฺโธ  ภควา  สาวตฺถิยํ  วิหรติ เชตวเน
อนาถปิณฺฑิกสฺส   อาราเม  ฯ  เตน  โข  ปน  สมเยน  อสฺสชิปุนพฺพสุกา
นาม  กิฏาคิริสฺมึ  อาวาสิกา  โหนฺติ  อลชฺชิโน  ปาปภิกฺขู  ฯ เต เอวรูปํ
อนาจารํ   อาจรนฺติ   มาลาวจฺฉํ   โรเปนฺติปิ   โรปาเปนฺติปิ  สิญฺจนฺติปิ
สิญฺจาเปนฺติปิ    โอจินนฺติปิ   โอจินาเปนฺติปิ   คนฺเถนฺติปิ   คนฺถาเปนฺติปิ
เอกโตวณฺฏิกมาลํ   กโรนฺติปิ   การาเปนฺติปิ   อุภโตวณฺฏิกมาลํ  กโรนฺติปิ
การาเปนฺติปิ    มญฺชริกํ   กโรนฺติปิ   การาเปนฺติปิ   วิธุติกํ   กโรนฺติปิ
การาเปนฺติปิ  วฏํสกํ กโรนฺติปิ การาเปนฺติปิ อาเวฬํ กโรนฺติปิ การาเปนฺติปิ
อุรจฺฉทํ กโรนฺติปิ การาเปนฺติปิ ฯ
     {๖๑๖.๑}   เต  กุลิตฺถีนํ กุลธีตานํ กุลกุมาริกานํ กุลสุณฺหานํ กุลทาสีนํ
เอกโตวณฺฏิกมาลํ    หรนฺติปิ    หราเปนฺติปิ   อุภโตวณฺฏิกมาลํ   หรนฺติปิ
หราเปนฺติปิ  มญฺชาริกํ  หรนฺติปิ  หราเปนฺติปิ  วิธุติกํ  หรนฺติปิ หราเปนฺติปิ
วฏํสกํ   หรนฺติปิ   หราเปนฺติปิ   อาเวฬํ  หรนฺติปิ  หราเปนฺติปิ  อุรจฺฉทํ
หรนฺติปิ  หราเปนฺติปิ  ฯ  เต  กุลิตฺถีหิ  กุลธีตาหิ  กุลกุมารีหิ  กุลสุณฺหาหิ
กุลทาสีหิ  สทฺธึ  เอกภาชเนปิ  ภุญฺชนฺติ  เอกถาลเกปิ  ปิวนฺติ เอกาสเนปิ
นิสีทนฺติ  เอกมญฺเจปิ  ตุวฏฺเฏนฺติ  เอกตฺถรณาปิ  ตุวฏฺเฏนฺติ เอกปาวุรณาปิ
ตุวฏฺเฏนฺติ    เอกตฺถรณปาวุรณาปิ    ตุวฏฺเฏนฺติ    วิกาเลปิ    ภุญฺชนฺติ
มชฺชํปิ    ปิวนฺติ   มาลาคนฺธวิเลปนํปิ   ธาเรนฺติ   นจฺจนฺติปิ   คายนฺติปิ
วาเทนฺติปิ   ลาเสนฺติปิ   นจฺจนฺติยาปิ   นจฺจนฺติ   นจฺจนฺติยาปิ   คายนฺติ
นจฺจนฺติยาปิ   วาเทนฺติ   นจฺจนฺติยาปิ   ลาเสนฺติ   คายนฺติยาปิ  นจฺจนฺติ
คายนฺติยาปิ   คายนฺติ   คายนฺติยาปิ   วาเทนฺติ   คายนฺติยาปิ  ลาเสนฺติ
วาเทนฺติยาปิ   นจฺจนฺติ   วาเทนฺติยาปิ  คายนฺติ  วาเทนฺติยาปิ  วาเทนฺติ
วาเทนฺติยาปิ   ลาเสนฺติ   ลาเสนฺติยาปิ  นจฺจนฺติ  ลาเสนฺติยาปิ  คายนฺติ
ลาเสนฺติยาปิ   วาเทนฺติ   ลาเสนฺติยาปิ   ลาเสนฺติ   อฏฺฐปเทปิ  กีฬนฺติ
ทสปเทปิ   กีฬนฺติ   อากาเสปิ  กีฬนฺติ  ปริหารปเถปิ  กีฬนฺติ  สนฺติกายปิ
กีฬนฺติ   ขลิกายปิ  กีฬนฺติ  ฆฏิกายปิ  ๑-  กีฬนฺติ  สลากหตฺเถนปิ  กีฬนฺติ
อกฺเขนปิ  กีฬนฺติ  ปงฺกจีเรนปิ  ๒-  กีฬนฺติ วงฺกเกนปิ กีฬนฺติ โมกฺขจิกายปิ
กีฬนฺติ   จิงฺคุลเกนปิ   กีฬนฺติ   ปตฺตาฬฺหเกนปิ  กีฬนฺติ  รถเกนปิ  กีฬนฺติ
ธนุเกนปิ  กีฬนฺติ  อกฺขริกายปิ  กีฬนฺติ  มเนสิกายปิ  กีฬนฺติ  ยถาวชฺเชนปิ
กีฬนฺติ  หตฺถิสฺมิมฺปิ  สิกฺขนฺติ  อสฺสสฺมิมฺปิ  สิกฺขนฺติ รถสฺมิมฺปิ สิกฺขนฺติ
ธนุสฺมิมฺปิ   สิกฺขนฺติ   ถรุสฺมิมฺปิ   สิกฺขนฺติ   หตฺถิสฺสปิ   ปุรโต  ธาวนฺติ
อสฺสสฺสปิ  ปุรโต  ธาวนฺติ  รถสฺสปิ  ปุรโต  ธาวนฺติ ธาวนฺติปิ อาธาวนฺติปิ
อุสฺเสเฬฺหนฺติปิ   อปฺโผเฏนฺติปิ   ๓-   นิพฺพุชฺฌนฺติปิ   มุฏฺฐีหิปิ  ยุชฺฌนฺติ
รงฺคมชฺเฌปิ  สงฺฆาฏึ  ปตฺถริตฺวา  นจฺจนฺตึ  ๔- เอวํ วเทนฺติ ๕- อิธ ภคินิ
นจฺจสฺสูติ นลาฏิกํปิ เทนฺติ วิวิธมฺปิ อนาจารํ อาจรนฺติ ฯ
     [๖๑๗]   เตน  โข  ปน  สมเยน อญฺญตโร ภิกฺขุ กาสีสุ วสฺสํ วุตฺโถ
@เชิงอรรถ: ๑ ยุ. ม. รา. ฆฏิเกนปิ ฯ ๒ ยุ. ม. ปงฺคจีเรนปิ ฯ
@๓ ยุ. อปฺโปเฐนฺติปิ ฯ ๔ ยุ. นจฺจกึ ฯ ๕ ยุ. ม. รา. วทนฺติ ฯ
สาวตฺถึ   คจฺฉนฺโต   ภควนฺตํ   ทสฺสนาย   เยน   กิฏาคิริ  ตทวสริ  ฯ
อถโข   โส   ภิกฺขุ  ปุพฺพณฺหสมยํ  นิวาเสตฺวา  ปตฺตจีวรมาทาย  กิฏาคิรึ
ปิณฺฑาย   ปาวิสิ   ปาสาทิเกน   อภิกฺกนฺเตน   ปฏิกฺกนฺเตน  อาโลกิเตน
วิโลกิเตน   สมฺมิญฺชิเตน  ปสาริเตน  โอกฺขิตฺตจกฺขุ  อิริยาปถสมฺปนฺโน  ฯ
มนุสฺสา   ตํ   ภิกฺขุํ   ปสฺสิตฺวา   เอวมาหํสุ   กฺวายํ   อพลพโล   วิย
มนฺทมนฺโท    วิย    ภากุฏิกภากุฏิโก    วิย   โก   อิมสฺส   อุปคตสฺส
ปิณฺฑกํปิ    ทสฺสติ    อมฺหากํ   ปน   อยฺยา   อสฺสชิปุนพฺพสุกา   สณฺหา
สขิลา   สุขสมฺภาสา   มิหิตปุพฺพงฺคมา   เอหิสฺวาคตวาทิโน   อพฺภากุฏิกา
อุตฺตานมุขา ปุพฺพภาสิโน เตสํ โข นาม ปิณฺโฑ ทาตพฺโพติ ฯ
     {๖๑๗.๑}   อทฺทสา  โข  อญฺญตโร  อุปาสโก  ตํ  ภิกฺขุํ กิฏาคิริสฺมึ
ปิณฺฑาย  จรนฺตํ  ทิสฺวาน  เยน  โส  ภิกฺขุ  เตนุปสงฺกมิ  อุปสงฺกมิตฺวา ตํ
ภิกฺขุํ   อภิวาเทตฺวา   เอตทโวจ   อปิ  ภนฺเต  ปิณฺโฑ  ลพฺภตีติ  ฯ  น
โข   อาวุโส   ปิณฺโฑ  ลพฺภตีติ  ฯ  เอหิ  ภนฺเต  ฆรํ  คมิสฺสามาติ  ฯ
อถโข   โส   อุปาสโก  ตํ  ภิกฺขุํ  ฆรํ  เนตฺวา  โภเชตฺวา  เอตทโวจ
กหํ  ภนฺเต  อยฺโย  คมิสฺสตีติ  ฯ  สาวตฺถึ  โข  อหํ  อาวุโส  คมิสฺสามิ
ภควนฺตํ   ทสฺสนายาติ  ฯ  เตนหิ  ภนฺเต  มม  วจเนน  ภควโต  ปาเท
สิรสา   วนฺท   เอวญฺจ   วเทหิ   ทุฏฺโฐ  ภนฺเต  กิฏาคิริสฺมึ  อาวาโส
อสฺสชิปุนพฺพสุกา   นาม   กิฏาคิริสฺมึ   อาวาสิกา   อลชฺชิโน   ปาปภิกฺขู
เต   เอวรูปํ  อนาจารํ  อาจรนฺติ  มาลาวจฺฉํ  โรเปนฺติปิ  โรปาเปนฺติปิ
สิญฺจนฺติปิ    สิญฺจาเปนฺติปิ    โอจินนฺติปิ    โอจินาเปนฺติปิ    คนฺเถนฺติปิ
คนฺถาเปนฺติปิ       เอกโตวณฺฏิกมาลํ      กโรนฺติปิ      การาเปนฺติปิ
อุภโตวณฺฏิกมาลํ   กโรนฺติปิ   การาเปนฺติปิ   ฯเปฯ   วิวิธมฺปิ  อนาจารํ
อาจรนฺติ   เยปิ   เต  ภนฺเต  มนุสฺสา  ปุพฺเพ  สทฺธา  อเหสุํ  ปสนฺนา
เตปิ   เอตรหิ   อสฺสทฺธา   อปฺปสนฺนา   ยานิปิ  ตานิ  สงฺฆสฺส  ปุพฺเพ
ทานปถานิ   ตานิปิ   เอตรหิ   อุปจฺฉินฺนานิ   ริญฺจนฺติ   เปสลา   ภิกฺขู
นิวสนฺติ   ปาปภิกฺขู   สาธุ   ภนฺเต   ภควา   กิฏาคิรึ  ภิกฺขู  ปหิเณยฺย
ยถายํ   กิฏาคิริสฺมึ   อาวาโส   สณฺฐเหยฺยาติ   ฯ   เอวมาวุโสติ  โข
โส   ภิกฺขุ   ตสฺส   อุปาสกสฺส   ปฏิสฺสุตฺวา  ๑-  เยน  สาวตฺถี  เตน
ปกฺกามิ    อนุปุพฺเพน    เยน    สาวตฺถี    เชตวนํ    อนาถปิณฺฑิกสฺส
อาราโม    เยน    ภควา    เตนุปสงฺกมิ    อุปสงฺกมิตฺวา    ภควนฺตํ
อภิวาเทตฺวา เอกมนฺตํ นิสีทิ ฯ
     [๖๑๘]   อาจิณฺณํ   โข  ปเนตํ  พุทฺธานํ  ภควนฺตานํ  อาคนฺตุเกหิ
ภิกฺขูหิ   สทฺธึ   ปฏิสมฺโมทิตุํ   ฯ   อถโข  ภควา  ตํ  ภิกฺขุํ  เอตทโวจ
กจฺจิ   ภิกฺขุ   ขมนียํ   กจฺจิ   ยาปนียํ   กจฺจิ   อปฺปกิลมเถน  อทฺธานํ
อาคโต   กุโต   จ  ตฺวํ  ภิกฺขุ  อาคจฺฉสีติ  ฯ  ขมนียํ  ภควา  ยาปนียํ
ภควา   อปฺปกิลมเถน   จาหํ   ภนฺเต  อทฺธานํ  อาคโต  อิธาหํ  ภนฺเต
กาสีสุ   วสฺสํ   วุตฺโถ   สาวตฺถึ  อาคจฺฉนฺโต  ภควนฺตํ  ทสฺสนาย  เยน
กิฏาคิริ    ตทวสรึ    อถขฺวาหํ    ภนฺเต    ปุพฺพณฺหสมยํ   นิวาเสตฺวา
ปตฺตจีวรมาทาย   กิฏาคิรึ   ปิณฺฑาย   ปาวิสึ   อทฺทสา  โข  มํ  ภนฺเต
@เชิงอรรถ: ๑ อิโต ปรํ ยุโรปิยโปตฺถเก อุฏฺฐายาสนาติ ทิสฺสติ ฯ
อญฺญตโร   อุปาสโก   กิฏาคิริสฺมึ   ปิณฺฑาย   จรนฺตํ   ทิสฺวาน  เยนาหํ
เตนุปสงฺกมิ   อุปสงฺกมิตฺวา   มํ   อภิวาเทตฺวา  เอตทโวจ  อปิ  ภนฺเต
ปิณฺโฑ   ลพฺภตีติ   น   โข   อาวุโส   ปิณฺโฑ   ลพฺภตีติ  เอหิ  ภนฺเต
ฆรํ   คมิสฺสามาติ   อถโข   ภนฺเต   โส   อุปาสโก  มํ  ฆรํ  เนตฺวา
โภเชตฺวา   เอตทโวจ   กหํ   ภนฺเต   อยฺโย  คมิสฺสตีติ  สาวตฺถึ  โข
อหํ   อาวุโส   คมิสฺสามิ   ภควนฺตํ   ทสฺสนายาติ   เตนหิ  ภนฺเต  มม
วจเนน   ภควโต  ปาเท  สิรสา  วนฺท  เอวญฺจ  วเทหิ  ทุฏฺโฐ  ภนฺเต
กิฏาคิริสฺมึ   อาวาโส   อสฺสชิปุนพฺพสุกา   นาม   กิฏาคิริสฺมึ  อาวาสิกา
อลชฺชิโน   ปาปภิกฺขู   เต   เอวรูปํ   อนาจารํ   อาจรนฺติ  มาลาวจฺฉํ
โรเปนฺติปิ   โรปาเปนฺติปิ   สึญฺจนฺติปิ   สิญฺจาเปนฺติปิ   ฯเปฯ   วิวิธมฺปิ
อนาจารํ   อาจรนฺติ  เยปิ  เต  ภนฺเต  มนุสฺสา  ปุพฺเพ  สทฺธา  อเหสุํ
ปสนฺนา   เตปิ   เอตรหิ   อสฺสทฺธา  อปฺปสนฺนา  ยานิปิ  ตานิ  สงฺฆสฺส
ปุพฺเพ   ทานปถานิ   ตานิปิ   เอตรหิ   อุปจฺฉินฺนานิ   ริญฺจนฺติ  เปสลา
ภิกฺขู    นิวสนฺติ   ปาปภิกฺขู   สาธุ   ภนฺเต   ภควา   กิฏาคิรึ   ภิกฺขู
ปหิเณยฺย   ยถายํ   กิฏาคิริสฺมึ   อาวาโส   สณฺฐเหยฺยาติ   ตโต   อหํ
ภควา อาคจฺฉามีติ ฯ
     [๖๑๙]   อถโข  ภควา  เอตสฺมึ  นิทาเน เอตสฺมึ ปกรเณ ภิกฺขุสงฺฆํ
สนฺนิปาตาเปตฺวา   ภิกฺขู   ปฏิปุจฺฉิ  สจฺจํ  กิร  ภิกฺขเว  อสฺสชิปุนพฺพสุกา
นาม    กิฏาคิริสฺมึ   อาวาสิกา   อลชฺชิโน   ปาปภิกฺขู   เต   เอวรูปํ
อนาจารํ อาจรนฺติ
     {๖๑๙.๑}   มาลาวจฺฉํ    โรเปนฺติปิ   โรปาเปนฺติปิ   สิญฺจนฺติปิ
สิญฺจาเปนฺติปิ    โอจินนฺติปิ   โอจินาเปนฺติปิ   คนฺเถนฺติปิ   คนฺถาเปนฺติปิ
เอกโตวณฺฏิกมาลํ   กโรนฺติปิ   การาเปนฺติปิ   อุภโตวณฺฏิกมาลํ  กโรนฺติปิ
การาเปนฺติปิ    มญฺชริกํ   กโรนฺติปิ   การาเปนฺติปิ   วิธุติกํ   กโรนฺติปิ
การาเปนฺติปิ    วฏํสกํ   กโรนฺติปิ   การาเปนฺติปิ   อาเวฬํ   กโรนฺติปิ
การาเปนฺติปิ  อุรจฺฉทํ  กโรนฺติปิ  การาเปนฺติปิ  ฯเปฯ  วิวิธมฺปิ อนาจารํ
อาจรนฺติ  เยปิ  เต ๑- มนุสฺสา ปุพฺเพ สทฺธา อเหสุํ ปสนฺนา เตปิ เอตรหิ
อสฺสทฺธา   อปฺปสนฺนา  ยานิปิ  ตานิ  สงฺฆสฺส  ปุพฺเพ  ทานปถานิ  ตานิปิ
เอตรหิ   อุปจฺฉินฺนานิ   ริญฺจนฺติ  เปสลา  ภิกฺขู  นิวสนฺติ  ปาปภิกฺขูติ  ฯ
สจฺจํ ภควาติ ฯ
     {๖๑๙.๒}   วิครหิ   พุทฺโธ   ภควา   อนนุจฺฉวิกํ  ภิกฺขเว  เตสํ
โมฆปุริสานํ   ฯเปฯ   กถํ  หิ  นาม  เต  ภิกฺขเว  โมฆปุริสา  เอวรูปํ
อนาจารํ    อาจริสฺสนฺติ    มาลาวจฺฉํ   โรเปสฺสนฺติปิ   โรปาเปสฺสนฺติปิ
สิญฺจิสฺสนฺติปิ     สิญฺจาเปสฺสนฺติปิ     โอจินิสฺสนฺติปิ     โอจินาเปสฺสนฺติปิ
คนฺถิสฺสนฺติปิ      คนฺถาเปสฺสนฺติปิ      เอกโตวณฺฏิกมาลํ     กริสฺสนฺติปิ
การาเปสฺสนฺติปิ   อุภโตวณฺฏิกมาลํ   กริสฺสนฺติปิ  การาเปสฺสนฺติปิ  มญฺชริกํ
กริสฺสนฺติปิ   การาเปสฺสนฺติปิ  วิธุติกํ  กริสฺสนฺติปิ  การาเปสฺสนฺติปิ  วฏํสกํ
กริสฺสนฺติปิ    การาเปสฺสนฺติปิ    อาเวฬํ   กริสฺสนฺติปิ   การาเปสฺสนฺติปิ
อุรจฺฉทํ  กริสฺสนฺติปิ  การาเปสฺสนฺติปิ  เต  กุลิตฺถีนํ  กุลธีตานํ  กุลกุมารีนํ
กุลสุณฺหานํ    กุลทาสีนํ   เอกโตวณฺฏิกมาลํ   หริสฺสนฺติปิ   หราเปสฺสนฺติปิ
อุภโตวณฺฏิกมาลํ    หริสฺสนฺติปิ    หราเปสฺสนฺติปิ    มญฺชริกํ   หริสฺสนฺติปิ
@เชิงอรรถ: ๑ อิโต ปรํ ยุ. ม. รา. โปตฺถเกสุ ภิกฺขเวติ ปาโฐ ปญฺญายติ ฯ
หราเปสฺสนฺติปิ   วิธุติกํ   หริสฺสนฺติปิ   หราเปสฺสนฺติปิ  วฏํสกํ  หริสฺสนฺติปิ
หราเปสฺสนฺติปิ   อาเวฬํ  หริสฺสนฺติปิ  หราเปสฺสนฺติปิ  อุรจฺฉทํ  หริสฺสนฺติปิ
หราเปสฺสนฺติปิ
     {๖๑๙.๓}   เต   กุลิตฺถีหิ   กุลธีตาหิ   กุลกุมารีหิ   กุลสุณฺหาหิ
กุลทาสีหิ   สทฺธึ   เอกภาชเนปิ   ภุญฺชิสฺสนฺติ   เอกถาลเกปิ   ปิวิสฺสนฺติ
เอกาสเนปิ    นิสีทิสฺสนฺติ    เอกมญฺเจปิ   ตุวฏฺเฏสฺสนฺติ   เอกตฺถรณาปิ
ตุวฏฺเฏสฺสนฺติ     เอกปาวุรณาปิ    ตุวฏฺเฏสฺสนฺติ    เอกตฺถรณปาวุรณาปิ
ตุวฏฺเฏสฺสนฺติ
     {๖๑๙.๔}   วิกาเลปิ  ภุญฺชิสฺสนฺติ มชฺชํปิ ปิวิสฺสนฺติ มาลาคนฺธวิเลปนํปิ
ธาเรสฺสนฺติ    นจฺจิสฺสนฺติปิ   คายิสฺสนฺติปิ   วาเทสฺสนฺติปิ   ลาเสสฺสนฺติปิ
นจฺจนฺติยาปิ     นจฺจิสฺสนฺติ    นจฺจนฺติยาปิ    คายิสฺสนฺติ    นจฺจนฺติยาปิ
วาเทสฺสนฺติ    นจฺจนฺติยาปิ    ลาเสสฺสนฺติ    คายนฺติยาปิ    นจฺจิสฺสนฺติ
คายนฺติยาปิ    คายิสฺสนฺติ    คายนฺติยาปิ    วาเทสฺสนฺติ    คายนฺติยาปิ
ลาเสสฺสนฺติ    วาเทนฺติยาปิ    นจฺจิสฺสนฺติ    วาเทนฺติยาปิ   คายิสฺสนฺติ
วาเทนฺติยาปิ   วาเทสฺสนฺติ   วาเทนฺติยาปิ   ลาเสสฺสนฺติ   ลาเสนฺติยาปิ
นจฺจิสฺสนฺติ    ลาเสนฺติยาปิ    คายิสฺสนฺติ    ลาเสนฺติยาปิ   วาเทสฺสนฺติ
ลาเสนฺติยาปิ ลาเสสฺสนฺติ
     {๖๑๙.๕}   อฏฺฐปเทปิ  กีฬิสฺสนฺติ  ทสปเทปิ  กีฬิสฺสนฺติ  อากาเสปิ
กีฬิสฺสนฺติ      ปริหารปเถปิ     กีฬิสฺสนฺติ     สนฺติกายปิ     กีฬิสฺสนฺติ
ขลิกายปิ   กีฬิสฺสนฺติ   ฆฏิกายปิ   กีฬิสฺสนฺติ   สลากหตฺเถนปิ   กีฬิสฺสนฺติ
อกฺเขนปิ    กีฬิสฺสนฺติ   ปงฺกจีเรนปิ   กีฬิสฺสนฺติ   วงฺกเกนปิ   กีฬิสฺสนฺติ
โมกฺขจิกายปิ    กีฬิสฺสนฺติ    จิงฺคุลเกนปิ    กีฬิสฺสนฺติ    ปตฺตาฬฺหเกนปิ
กีฬิสฺสนฺติ    รถเกนปิ    กีฬิสฺสนฺติ   ธนุเกนปิ   กีฬิสฺสนฺติ   อกฺขริกายปิ
กีฬิสฺสนฺติ มเนสิกายปิ กีฬิสฺสนฺติ ยถาวชฺเชนปิ กีฬิสฺสนฺติ
     {๖๑๙.๖}   หตฺถิสฺมิมฺปิ    สิกฺขิสฺสนฺติ    อสฺสสฺมิมฺปิ   สิกฺขิสฺสนฺติ
รถสฺมิมฺปิ  สิกฺขิสฺสนฺติ  ธนุสฺมิมฺปิ  สิกฺขิสฺสนฺติ ถรุสฺมิมฺปิ สิกฺขิสฺสนฺติ
หตฺถิสฺสปิ   ปุรโต   ธาวิสฺสนฺติ   อสฺสสฺสปิ   ปุรโต  ธาวิสฺสนฺติ  รถสฺสปิ
ปุรโต    ธาวิสฺสนฺติ    ธาวิสฺสนฺติปิ   อาธาวิสฺสนฺติปิ   อุสฺเสเฬฺหสฺสนฺติปิ
อปฺโผเฏสฺสนฺติปิ     ๑-     นิพฺพุชฺฌิสฺสนฺติปิ     มุฏฺฐีหิปิ    ยุชฺฌิสฺสนฺติ
รงฺคมชฺเฌปิ   สงฺฆาฏึ   ปตฺถริตฺวา   นจฺจนฺตึ  เอวํ  วกฺขนฺติ  อิธ  ภคินิ
นจฺจสฺสูติ   นลาฏิกํปิ   ทสฺสนฺติ   วิวิธมฺปิ   อนาจารํ  อาจริสฺสนฺติ  เนตํ
ภิกฺขเว อปฺปสนฺนานํ วา ปสาทาย ฯเปฯ อญฺญถตฺตายาติ ฯ
     [๖๒๐]   อถโข   ภควา  อสฺสชิปุนพฺพสุเก  ภิกฺขู  อเนกปริยาเยน
วิครหิตฺวา   ธมฺมึ  กถํ  กตฺวา  สาริปุตฺตโมคฺคลฺลาเน  อามนฺเตสิ  คจฺฉถ
ตุเมฺห  สาริปุตฺตา  กิฏาคิรึ  คนฺตฺวา  อสฺสชิปุนพฺพสุกานํ ภิกฺขูนํ กิฏาคิริสฺมา
ปพฺพาชนียกมฺมํ กโรถ ตุมฺหากํ เอเต สทฺธิวิหาริกาติ ฯ
     {๖๒๐.๑}   กถํ  มยํ  ภนฺเต  อสฺสชิปุนพฺพสุกานํ  ภิกฺขูนํ กิฏาคิริสฺมา
ปพฺพาชนียกมฺมํ  กโรม  จณฺฑา เต ภิกฺขู ผรุสาติ ฯ เตนหิ ตุเมฺห สาริปุตฺตา
พหุเกหิ  ภิกฺขูหิ  สทฺธึ  คจฺฉถาติ ฯ เอวํ ภนฺเตติ โข สาริปุตฺตโมคฺคลฺลานา
ภควโต ปจฺจสฺโสสุํ ฯ
     [๖๒๑]   เอวญฺจ  ปน  ภิกฺขเว  กาตพฺพํ  ฯ  ปฐมํ อสฺสชิปุนพฺพสุกา
ภิกฺขู    โจเทตพฺพา    โจเทตฺวา   สาเรตพฺพา   สาเรตฺวา   อาปตฺติ
@เชิงอรรถ: ๑ ยุ. อปฺโปฐิสฺสนฺติ ฯ
โรเปตพฺพา   อาปตฺตึ   โรเปตฺวา  พฺยตฺเตน  ภิกฺขุนา  ปฏิพเลน  สงฺโฆ
ญาเปตพฺโพ
     {๖๒๑.๑}   สุณาตุ  เม  ภนฺเต  สงฺโฆ  อิเม อสฺสชิปุนพฺพสุกา ภิกฺขู
กุลทูสกา  ปาปสมาจารา  ฯ  อิเมสํ  ปาปกา  สมาจารา  ทิสฺสนฺติ  เจว
สุยฺยนฺติ  จ  กุลานิ  จ  อิเมหิ  ทุฏฺฐานิ  ทิสฺสนฺติ  เจว  สุยฺยนฺติ  จ  ฯ
ยทิ   สงฺฆสฺส   ปตฺตกลฺลํ  สงฺโฆ  อสฺสชิปุนพฺพสุกานํ  ภิกฺขูนํ  กิฏาคิริสฺมา
ปพฺพาชนียกมฺมํ   กเรยฺย   นาสฺสชิปุนพฺพสุเกหิ   ๑-   ภิกฺขูหิ  กิฏาคิริสฺมึ
วตฺถพฺพนฺติ ฯ เอสา ญตฺติ ฯ
     {๖๒๑.๒}   สุณาตุ เม ภนฺเต สงฺโฆ อิเม อสฺสชิปุนพฺพสุกา ภิกฺขู กุลทูสกา
ปาปสมาจารา  ฯ  อิเมสํ  ปาปกา  สมาจารา  ทิสฺสนฺติ  เจว สุยฺยนฺติ จ
กุลานิ จ อิเมหิ ทุฏฺฐานิ ทิสฺสนฺติ เจว สุยฺยนฺติ จ ฯ สงฺโฆ อสฺสชิปุนพฺพสุกานํ
ภิกฺขูนํ   กิฏาคิริสฺมา   ปพฺพาชนียกมฺมํ  กโรติ  นาสฺสชิปุนพฺพสุเกหิ  ภิกฺขูหิ
กิฏาคิริสฺมึ    วตฺถพฺพนฺติ   ฯ   ยสฺสายสฺมโต   ขมติ   อสฺสชิปุนพฺพสุกานํ
ภิกฺขูนํ    กิฏาคิริสฺมา    ปพฺพาชนียกมฺมสฺส    กรณํ   นาสฺสชิปุนพฺพสุเกหิ
ภิกฺขูหิ   กิฏาคิริสฺมึ   วตฺถพฺพนฺติ   โส   ตุณฺหสฺส   ยสฺส   นกฺขมติ  โส
ภาเสยฺย ฯ
     {๖๒๑.๓}   ทุติยมฺปิ  เอตมตฺถํ  วทามิ  ฯเปฯ  ตติยมฺปิ  เอตมตฺถํ
วทามิ ฯ สุณาตุ เม ภนฺเต สงฺโฆ ฯเปฯ โส ภาเสยฺย ฯ
     {๖๒๑.๔}   กตํ   สงฺเฆน  อสฺสชิปุนพฺพสุกานํ  ภิกฺขูนํ  กิฏาคิริสฺมา
ปพฺพาชนียกมฺมํ       นาสฺสชิปุนพฺพสุเกหิ       ภิกฺขูหิ       กิฏาคิริสฺมึ
วตฺถพฺพนฺติ ฯ ขมติ สงฺฆสฺส ตสฺมา ตุณฺหี ฯ เอวเมตํ ธารยามีติ ฯ
@เชิงอรรถ: ๑ เยภุยฺเยน ปทจฺเฉโท กโต ฯ
     [๖๒๒]   อถโข   สาริปุตฺตโมคฺคลฺลานปฺปมุโข  ภิกฺขุสงฺโฆ  กิฏาคิรึ
คนฺตฺวา    อสฺสชิปุนพฺพสุกานํ    ภิกฺขูนํ    กิฏาคิริสฺมา    ปพฺพาชนียกมฺมํ
อกาสิ   นาสฺสชิปุนพฺพสุเกหิ   ภิกฺขูหิ   กิฏาคิริสฺมึ   วตฺถพฺพนฺติ   ฯ  เต
สงฺเฆน   ปพฺพาชนียกมฺมกตา   น   สมฺมา  วตฺตนฺติ  น  โลมํ  ปาเตนฺติ
น   เนตฺถารํ   วตฺตนฺติ   น   ภิกฺขู  ขมาเปนฺติ  อกฺโกสนฺติ  ปริภาสนฺติ
ฉนฺทคามิตา   โทสคามิตา  โมหคามิตา  ภยคามิตา  ปาเปนฺติ  ปกฺกมนฺติปิ
วิพฺภมนฺติปิ  ฯ  เย  เต  ภิกฺขู  อปฺปิจฺฉา  ฯเปฯ  เต  อุชฺฌายนฺติ ขียนฺติ
วิปาเจนฺติ   กถํ  หิ  นาม  อสฺสชิปุนพฺพสุกา  ภิกฺขู  สงฺเฆน  ปพฺพาชนีย-
กมฺมกตา   น  สมฺมา  วตฺติสฺสนฺติ  น  โลมํ  ปาเตสฺสนฺติ  น  เนตฺถารํ
วตฺติสฺสนฺติ    น    ภิกฺขู   ขมาเปสฺสนฺติ   อกฺโกสิสฺสนฺติ   ปริภาสิสฺสนฺติ
ฉนฺทคามิตา    โทสคามิตา    โมหคามิตา    ภยคามิตา    ปาเปสฺสนฺติ
ปกฺกมิสฺสนฺติปิ วิพฺภมิสฺสนฺติปีติ ฯ
     [๖๒๓]   อถโข  เต  ภิกฺขู  ภควโต  เอตมตฺถํ อาโรเจสุํ ฯ อถโข
ภควา   เอตสฺมึ  นิทาเน  เอตสฺมึ  ปกรเณ  ภิกฺขุสงฺฆํ  สนฺนิปาตาเปตฺวา
ภิกฺขู     ปฏิปุจฺฉิ    สจฺจํ    กิร    ภิกฺขเว   อสฺสชิปุนพฺพสุกา   ภิกฺขู
สงฺเฆน     ปพฺพาชนียกมฺมกตา     น     สมฺมา    วตฺตนฺติ    ฯเปฯ
วิพฺภมนฺติปีติ   ฯ   สจฺจํ  ภควาติ  ฯ  วิครหิ  พุทฺโธ  ภควา  อนนุจฺฉวิกํ
ภิกฺขเว   เตสํ   โมฆปุริสานํ   ฯเปฯ   กถํ   หิ   นาม  เต  ภิกฺขเว
โมฆปุริสา    สงฺเฆน    ปพฺพาชนียกมฺมกตา    น   สมฺมา   วตฺติสฺสนฺติ
ฯเปฯ   วิพฺภมิสฺสนฺติปิ   เนตํ   ภิกฺขเว   อปฺปสนฺนานํ   วา   ปสาทาย
ฯเปฯ เอวญฺจ ปน ภิกฺขเว อิมํ สิกฺขาปทํ อุทฺทิเสยฺยาถ
     {๖๒๓.๑}   ภิกฺขุ  ปเนว  อญฺญตรํ  คามํ  วา  นิคมํ วา อุปนิสฺสาย
วิหรติ   กุลทูสโก   ปาปสมาจาโร   ฯ  ตสฺส  โข  ปาปกา  สมาจารา
ทิสฺสนฺติ  เจว  สุยฺยนฺติ  จ  กุลานิ  จ เตน ทุฏฺฐานิ ทิสฺสนฺติ เจว สุยฺยนฺติ
จ   ฯ  โส  ภิกฺขุ  ภิกฺขูหิ  เอวมสฺส  วจนีโย  อายสฺมา  โข  กุลทูสโก
ปาปสมาจาโร   อายสฺมโต   โข   ปาปกา   สมาจารา  ทิสฺสนฺติ  เจว
สุยฺยนฺติ   จ   กุลานิ   จายสฺมตา   ทุฏฺฐานิ   ทิสฺสนฺติ   เจว  สุยฺยนฺติ
จ   ปกฺกมตายสฺมา   อิมมฺหา   อาวาสา   อลนฺเต  อิธ  วาเสนาติ  ฯ
เอวญฺจ   โส   ภิกฺขุ   ภิกฺขูหิ   วุจฺจมาโน   เต  ภิกฺขู  เอวํ  วเทยฺย
ฉนฺทคามิโน   จ   ภิกฺขู   โทสคามิโน  จ  ภิกฺขู  โมหคามิโน  จ  ภิกฺขู
ภยคามิโน   จ   ภิกฺขู   ตาทิสิกาย   อาปตฺติยา   เอกจฺจํ  ปพฺพาเชนฺติ
เอกจฺจํ   น   ปพฺพาเชนฺตีติ   ฯ  โส  ภิกฺขุ  ภิกฺขูหิ  เอวมสฺส  วจนีโย
มา   อายสฺมา   เอวํ   อวจ  น  จ  ภิกฺขู  ฉนฺทคามิโน  น  จ  ภิกฺขู
โทสคามิโน   น   จ   ภิกฺขู   โมหคามิโน   น   จ  ภิกฺขู  ภยคามิโน
อายสฺมา   โข   กุลทูสโก   ปาปสมาจาโร   อายสฺมโต   โข  ปาปกา
สมาจารา   ทิสฺสนฺติ   เจว   สุยฺยนฺติ   จ  กุลานิ  จายสฺมตา  ทุฏฺฐานิ
ทิสฺสนฺติ    เจว    สุยฺยนฺติ   จ   ปกฺกมตายสฺมา   อิมมฺหา   อาวาสา
อลนฺเต   อิธ   วาเสนาติ   ฯ  เอวญฺจ  โส  ภิกฺขุ  ภิกฺขูหิ  วุจฺจมาโน
ตเถว   ปคฺคเณฺหยฺย   โส   ภิกฺขุ   ภิกฺขูหิ   ยาวตติยํ   สมนุภาสิตพฺโพ
ตสฺส  ปฏินิสฺสคฺคาย  ฯ  ยาวตติยญฺเจ  สมนุภาสิยมาโน  ตํ ปฏินิสฺสชฺเชยฺย
อิจฺเจตํ กุสลํ โน เจ ปฏินิสฺสชฺเชยฺย สงฺฆาทิเสโสติ ฯ
     [๖๒๔]   ภิกฺขุ  ปเนว  อญฺญตรํ คามํ วา นิคมํ วาติ คาโมปิ นิคโมปิ
นครํปิ  คาโม  เจว  นิคโม  จ  ฯ  อุปนิสฺสาย  วิหรตีติ  ตตฺถ ปฏิพทฺธา
โหนฺติ        จีวรปิณฺฑปาตเสนาสนคิลานปจฺจยเภสชฺชปริกฺขารา       ฯ
กุลํ    นาม    จตฺตาริ    กุลานิ   ขตฺติยกุลํ   พฺราหฺมณกุลํ   เวสฺสกุลํ
สุทฺทกุลํ  ฯ  กุลทูสโกติ  กุลานิ  ทูเสติ  ปุปฺเผน  วา  ผเลน วา จุณฺเณน
วา  มตฺติกาย  วา  ทนฺตกฏฺเฐน  วา  เวฬุนา  ๑-  วา  เวชฺชิกาย วา
ชงฺฆเปสนิเกน  วา  ฯ  ปาปสมาจาโรติ  มาลาวจฺฉํ โรเปติปิ โรปาเปติปิ
สิญฺจติปิ สิญฺจาเปติปิ โอจินาติปิ โอจินาเปติปิ คนฺเถติปิ คนฺถาเปติปิ ฯ
     [๖๒๕]   ทิสฺสนฺติ  เจว  สุยฺยนฺติ  จาติ  เย  สมฺมุขา  เต ปสฺสนฺติ
เย   ติโรกฺขา   เต   สุณนฺติ   ฯ  กุลานิ  จ  เตน  ทุฏฺฐานีติ  ปุพฺเพ
สทฺธา    หุตฺวา   ตํ   อาคมฺม   อสฺสทฺธา   โหนฺติ   ปสนฺนา   หุตฺวา
อปฺปสนฺนา   โหนฺติ   ฯ   ทิสฺสนฺติ   เจว  สุยฺยนฺติ  จาติ  เย  สมฺมุขา
เต ปสฺสนฺติ เย ติโรกฺขา เต สุณนฺติ ฯ
     [๖๒๖]   โส   ภิกฺขูติ   โย   โส  กุลทูสโก  ภิกฺขุ  ฯ  ภิกฺขูหีติ
อญฺเญหิ   ภิกฺขูหิ   ฯ   เย   ปสฺสนฺติ   เย   สุณนฺติ   เตหิ  วตฺตพฺโพ
อายสฺมา   โข   กุลทูสโก   ปาปสมาจาโร   อายสฺมโต   โข  ปาปกา
สมาจารา   ทิสฺสนฺติ   เจว   สุยฺยนฺติ   จ  กุลานิ  จายสฺมตา  ทุฏฺฐานิ
@เชิงอรรถ: ๑ ยุ. ม. เวฬุยา ฯ
ทิสฺสนฺติ    เจว    สุยฺยนฺติ   จ   ปกฺกมตายสฺมา   อิมมฺหา   อาวาสา
อลนฺเต   อิธ   วาเสนาติ   ฯ  เอวญฺจ  โส  ภิกฺขุ  ภิกฺขูหิ  วุจฺจมาโน
เต   ภิกฺขู   เอวํ   วเทยฺย   ฉนฺทคามิโน   จ  ภิกฺขู  โทสคามิโน  จ
ภิกฺขู    โมหคามิโน   จ   ภิกฺขู   ภยคามิโน   จ   ภิกฺขู   ตาทิสิกาย
อาปตฺติยา เอกจฺจํ ปพฺพาเชนฺติ เอกจฺจํ น ปพฺพาเชนฺตีติ ฯ
     [๖๒๗]   โส   ภิกฺขูติ   โย   โส  กมฺมกโต  ภิกฺขุ  ฯ  ภิกฺขูหีติ
อญฺเญหิ   ภิกฺขูหิ   ฯ   เย   ปสฺสนฺติ   เย   สุณนฺติ   เตหิ  วตฺตพฺโพ
มา   อายสฺมา   เอวํ   อวจ  น  จ  ภิกฺขู  ฉนฺทคามิโน  น  จ  ภิกฺขู
โทสคามิโน   น   จ   ภิกฺขู   โมหคามิโน   น   จ  ภิกฺขู  ภยคามิโน
อายสฺมา   โข   กุลทูสโก   ปาปสมาจาโร   อายสฺมโต   โข  ปาปกา
สมาจารา   ทิสฺสนฺติ   เจว   สุยฺยนฺติ   จ  กุลานิ  จายสฺมตา  ทุฏฺฐานิ
ทิสฺสนฺติ    เจว    สุยฺยนฺติ   จ   ปกฺกมตายสฺมา   อิมมฺหา   อาวาสา
อลนฺเต อิธ วาเสนาติ ฯ ทุติยมฺปิ วตฺตพฺโพ ตติยมฺปิ วตฺตพฺโพ ฯ
     {๖๒๗.๑}   สเจ  ปฏินิสฺสชฺชติ  อิจฺเจตํ  กุสลํ  โน เจ ปฏินิสฺสชฺชติ
อาปตฺติ  ทุกฺกฏสฺส  ฯ  สุตฺวา  น  วทนฺติ  อาปตฺติ  ทุกฺกฏสฺส ฯ โส ภิกฺขุ
สงฺฆมชฺฌํปิ   อากฑฺฒิตฺวา   วตฺตพฺโพ   มา   อายสฺมา   เอวํ  อวจ  น
จ   ภิกฺขู   ฉนฺทคามิโน   น   จ   ภิกฺขู   โทสคามิโน   น  จ  ภิกฺขู
โมหคามิโน   น   จ   ภิกฺขู   ภยคามิโน   อายสฺมา   โข   กุลทูสโก
ปาปสมาจาโร   อายสฺมโต   โข   ปาปกา   สมาจารา  ทิสฺสนฺติ  เจว
สุยฺยนฺติ   จ   กุลานิ   จายสฺมตา  ทุฏฺฐานิ  ทิสฺสนฺติ  เจว  สุยฺยนฺติ  จ
ปกฺกมตายสฺมา  อิมมฺหา  อาวาสา  อลนฺเต  อิธ  วาเสนาติ  ฯ  ทุติยมฺปิ
วตฺตพฺโพ   ตติยมฺปิ   วตฺตพฺโพ   ฯ   สเจ  ปฏินิสฺสชฺชติ  อิจฺเจตํ  กุสลํ
โน เจ ปฏินิสฺสชฺชติ อาปตฺติ ทุกฺกฏสฺส ฯ
     [๖๒๘]   โส   ภิกฺขุ   สมนุภาสิตพฺโพ  ฯ  เอวญฺจ  ปน  ภิกฺขเว
สมนุภาสิตพฺโพ   ฯ   พฺยตฺเตน   ภิกฺขุนา  ปฏิพเลน  สงฺโฆ  ญาเปตพฺโพ
สุณาตุ  เม  ภนฺเต สงฺโฆ อยํ อิตฺถนฺนาโม ภิกฺขุ สงฺเฆน ปพฺพาชนียกมฺมกโต
ภิกฺขู   ฉนฺทคามิตา   โทสคามิตา   โมหคามิตา  ภยคามิตา  ปาเปติ  ฯ
โส   ตํ   วตฺถุํ   นปฺปฏินิสฺสชฺชติ   ฯ   ยทิ  สงฺฆสฺส  ปตฺตกลฺลํ  สงฺโฆ
อิตฺถนฺนามํ   ภิกฺขุํ   สมนุภาเสยฺย   ตสฺส   วตฺถุสฺส   ปฏินิสฺสคฺคาย   ฯ
เอสา   ญตฺติ   ฯ  สุณาตุ  เม  ภนฺเต  สงฺโฆ  อยํ  อิตฺถนฺนาโม  ภิกฺขุ
สงฺเฆน  ปพฺพาชนียกมฺมกโต  ภิกฺขู  ฉนฺทคามิตา  โทสคามิตา  โมหคามิตา
ภยคามิตา   ปาเปติ   ฯ   โส   ตํ   วตฺถุํ  นปฺปฏินิสฺสชฺชติ  ฯ  สงฺโฆ
อิตฺถนฺนามํ    ภิกฺขุํ    สมนุภาสติ   ตสฺส   วตฺถุสฺส   ปฏินิสฺสคฺคาย   ฯ
ยสฺสายสฺมโต    ขมติ    อิตฺถนฺนามสฺส    ภิกฺขุโน   สมนุภาสนา   ตสฺส
วตฺถุสฺส   ปฏินิสฺสคฺคาย  โส  ตุณฺหสฺส  ยสฺส  นกฺขมติ  โส  ภาเสยฺย  ฯ
ทุติยมฺปิ   เอตมตฺถํ   วทามิ   ฯเปฯ   ตติยมฺปิ   เอตมตฺถํ   วทามิ  ฯ
สุณาตุ   เม   ภนฺเต   สงฺโฆ   ฯเปฯ   โส  ภาเสยฺย  ฯ  สมนุภฏฺโฐ
สงฺเฆน   อิตฺถนฺนาโม   ภิกฺขุ   ตสฺส   วตฺถุสฺส  ปฏินิสฺสคฺคาย  ฯ  ขมติ
สงฺฆสฺส ตสฺมา ตุณฺหี ฯ เอวเมตํ ธารยามีติ ฯ
     [๖๒๙]   ญตฺติยา    ทุกฺกฏํ    ทฺวีหิ   กมฺมวาจาหิ   ถุลฺลจฺจยา
กมฺมวาจาปริโยสาเน    อาปตฺติ    สงฺฆาทิเสสสฺส    ฯ    สงฺฆาทิเสสํ
อชฺฌาปชฺชนฺตสฺส    ญตฺติยา    ทุกฺกฏํ   ทฺวีหิ   กมฺมวาจาหิ   ถุลฺลจฺจยา
ปฏิปฺปสฺสมฺภนฺติ   ฯ   สงฺฆาทิเสโสติ   สงฺโฆ   ว   ตสฺสา   อาปตฺติยา
ปริวาสํ   เทติ  มูลาย  ปฏิกสฺสติ  มานตฺตํ  เทติ  อพฺเภติ  น  สมฺพหุลา
น  เอกปุคฺคโล  เตน  วุจฺจติ  สงฺฆาทิเสโสติ  ฯ ตสฺเสว อาปตฺตินิกายสฺส
นามกมฺมํ อธิวจนํ เตนปิ วุจฺจติ สงฺฆาทิเสโสติ ฯ
     [๖๓๐]   ธมฺมกมฺเม    ธมฺมกมฺมสญฺญี   นปฺปฏินิสฺสชฺชติ   อาปตฺติ
สงฺฆาทิเสสสฺส    ฯ   ธมฺมกมฺเม   เวมติโก   นปฺปฏินิสฺสชฺชติ   อาปตฺติ
สงฺฆาทิเสสสฺส     ฯ    ธมฺมกมฺเม    อธมฺมกมฺมสญฺญี    นปฺปฏินิสฺสชฺชติ
อาปตฺติ    สงฺฆาทิเสสสฺส    ฯ   อธมฺมกมฺเม   ธมฺมกมฺมสญฺญี   อาปตฺติ
ทุกฺกฏสฺส  ฯ  อธมฺมกมฺเม  เวมติโก  อาปตฺติ  ทุกฺกฏสฺส  ฯ  อธมฺมกมฺเม
อธมฺมกมฺมสญฺญี อาปตฺติ ทุกฺกฏสฺส ฯ
     [๖๓๑]   อนาปตฺติ  อสมนุภาสนฺตสฺส  ปฏินิสฺสชฺชนฺตสฺส  อุมฺมตฺตกสฺส
ขิตฺตจิตฺตสฺส ๑- เวทนฏฺฏสฺส ๒- อาทิกมฺมิกสฺสาติ ฯ
                         เตรสมสงฺฆาทิเสสํ นิฏฺฐิตํ ฯ
                                ----------------


             เนื้อความพระไตรปิฎกฉบับภาษาบาลีอักษรไทย เล่มที่ ๑ หน้าที่ ๓๘๒-๔๒๙.
http://84000.org/tipitaka/read/pali_item_s.php?book=1&item=559&items=73&modeTY=2
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
http://84000.org/tipitaka/read/pali_item_s.php?book=1&item=559&items=73&modeTY=2&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
http://84000.org/tipitaka/read/roman_item_s.php?book=1&item=557&items=73&modeTY=2
             อ่านเทียบพระไตรปิฎกภาษาไทยฉบับหลวง :-
http://84000.org/tipitaka/read/byitem_s.php?book=1&item=557&items=73&modeTY=2
             ศึกษาอรรถกถานี้ได้ที่ :-
http://84000.org/tipitaka/attha/attha.php?b=1&i=557
             The Pali Atthakatha in Thai :-
http://84000.org/tipitaka/atthapali/read_th.php?B=2&A=1609
             The Pali Atthakatha in Roman :-
http://84000.org/tipitaka/atthapali/read_rm.php?B=2&A=1609
             สารบัญพระไตรปิฎกเล่มที่ ๑
http://84000.org/tipitaka/read/?index_1