บาลีพระไตรปิฎกเล่มที่ ๒ - พระวินัยปิฎกเล่มที่ ๒

                        โกสิยวคฺคสฺส ปฐมสิกฺขาปทํ
     [๗๔]   เตน  สมเยน  พุทฺโธ  ภควา  อาฬวิยํ  วิหรติ  อคฺคาฬเว
เจติเย   ฯ   เตน  โข  ปน  สมเยน  ฉพฺพคฺคิยา  ภิกฺขู  โกสิยการเก
อุปสงฺกมิตฺวา   เอวํ   วเทนฺติ   ^๑-   พหู  อาวุโส  โกสการเก  ปจถ
อมฺหากํปิ   ทสฺสถ   มยํปิ   อิจฺฉาม   โกสิยมิสฺสกํ   สนฺถตํ  กาตุนฺติ  ฯ
เต    อุชฺฌายนฺติ    ขียนฺติ    วิปาเจนฺติ    กถํ   หิ   นาม   สมณา
สกฺยปุตฺติยา    อเมฺห   อุปสงฺกมิตฺวา   เอวํ   วกฺขนฺติ   พหู   อาวุโส
โกสการเก   ปจถ   อมฺหากํปิ   ทสฺสถ   มยํปิ   อิจฺฉาม   โกสิยมิสฺสกํ
สนฺถตํ   กาตุนฺติ   อมฺหากํปิ   อลาภา   อมฺหากํปิ   ทุลฺลทฺธํ   เย  มยํ
อาชีวสฺส   เหตุ   ปุตฺตทารสฺส   การณา  พหู  ขุทฺทเก  ปาเณ  สงฺฆาตํ
อาปาเทมาติ ฯ
     {๗๔.๑}   อสฺโสสุํ   โข   ภิกฺขู   เตสํ  อุชฺฌายนฺตานํ  ขียนฺตานํ
วิปาเจนฺตานํ   ฯ   เย   เต  ภิกฺขู  อปฺปิจฺฉา  ฯเปฯ  เต  อุชฺฌายนฺติ
ขียนฺติ   วิปาเจนฺติ   กถํ   หิ   นาม   ฉพฺพคฺคิยา  ภิกฺขู  โกสิยการเก
อุปสงฺกมิตฺวา    เอวํ    วกฺขนฺติ   พหู   อาวุโส   โกสการเก   ปจถ
อมฺหากํปิ   ทสฺสถ   มยํปิ   อิจฺฉาม   โกสิยมิสฺสกํ   สนฺถตํ  กาตุนฺติ  ฯ
อถโข  เต  ภิกฺขู  ภควโต  เอตมตฺถํ  อาโรเจสุํ  ฯ  สจฺจํ  กิร  ตุเมฺห
ภิกฺขเว   โกสิยการเก   อุปสงฺกมิตฺวา   เอวํ   วเทถ   พหู   อาวุโส
โกสการเก   ปจถ   อมฺหากํปิ   ทสฺสถ   มยํปิ   อิจฺฉาม   โกสิยมิสฺสกํ
@เชิงอรรถ: ^๑ ม. วทนฺติ ฯ
สนฺถตํ   กาตุนฺติ  ฯ  สจฺจํ  ภควาติ  ฯ  วิครหิ  พุทฺโธ  ภควา  กถํ  หิ
นาม   ตุเมฺห   โมฆปุริสา   โกสิยการเก   อุปสงฺกมิตฺวา  เอวํ  วกฺขถ
พหู   อาวุโส   โกสการเก   ปจถ   อมฺหากํปิ   ทสฺสถ  มยํปิ  อิจฺฉาม
โกสิยมิสฺสกํ   สนฺถตํ   กาตุนฺติ   เนตํ   โมฆปุริสา   อปฺปสนฺนานํ   วา
ปสาทาย   ปสนฺนานํ   วา  ภิยฺโยภาวาย  ฯเปฯ  เอวญฺจ  ปน  ภิกฺขเว
อิมํ สิกฺขาปทํ อุทฺทิเสยฺยาถ
     {๗๔.๒}   โย  ปน  ภิกฺขุ  โกสิยมิสฺสกํ สนฺถตํ การาเปยฺย นิสฺสคฺคิยํ
ปาจิตฺติยนฺติ ฯ
     [๗๕]   โย  ปนาติ  โย  ยาทิโส  ฯเปฯ  ภิกฺขูติ ฯเปฯ อยํ อิมสฺมึ
อตฺเถ   อธิปฺเปโต   ภิกฺขูติ   ฯ   สนฺถตํ  นาม  สนฺถริตฺวา  กตํ  โหติ
อวายิมํ   ฯ   การาเปยฺยาติ   เอเกนปิ   โกสิยํสุนา  มิสฺสิตฺวา  กโรติ
วา   การาเปติ   วา   ปโยเค   ทุกฺกฏํ   ปฏิลาเภน  นิสฺสคฺคิยํ  โหติ
นิสฺสชฺชิตพฺพํ   สงฺฆสฺส   วา   คณสฺส   วา  ปุคฺคลสฺส  วา  ฯ  เอวญฺจ
ปน   ภิกฺขเว   นิสฺสชฺชิตพฺพํ   ฯเปฯ   อิทํ   เม   ภนฺเต  โกสิยมิสฺสกํ
สนฺถตํ   การาปิตํ   นิสฺสคฺคิยํ   อิมาหํ   สงฺฆสฺส   นิสฺสชฺชามีติ   ฯเปฯ
ทเทยฺยาติ ฯเปฯ ทเทยฺยุนฺติ ฯเปฯ อายสฺมโต ทมฺมีติ ฯ
     [๗๖]   อตฺตนา   วิปฺปกตํ   อตฺตนา   ปริโยสาเปติ   นิสฺสคฺคิยํ
ปาจิตฺติยํ    ฯ   อตฺตนา   วิปฺปกตํ   ปเรหิ   ปริโยสาเปติ   นิสฺสคฺคิยํ
ปาจิตฺติยํ    ฯ   ปเรหิ   วิปฺปกตํ   อตฺตนา   ปริโยสาเปติ   นิสฺสคฺคิยํ
ปาจิตฺติยํ    ฯ    ปเรหิ   วิปฺปกตํ   ปเรหิ   ปริโยสาเปติ   นิสฺสคฺคิยํ
ปาจิตฺติยํ   ฯ   อญฺญสฺสตฺถาย   กโรติ   วา   การาเปติ  วา  อาปตฺติ
ทุกฺกฏสฺส    ฯ    อญฺเญน    กตํ    ปฏิลภิตฺวา    ปริภุญฺชติ   อาปตฺติ
ทุกฺกฏสฺส ฯ
     [๗๗]   อนาปตฺติ   วิตานํ   วา   ภุมฺมตฺถรณํ   วา  สาณิปาการํ
วา ภิสึ วา พิมฺโพหนํ วา กโรติ อุมฺมตฺตกสฺส อาทิกมฺมิกสฺสาติ ฯ
                           ปฐมสิกฺขาปทํ นิฏฺฐิตํ ฯ
                                   -------

เนื้อความพระไตรปิฎกฉบับภาษาบาลี อักษรไทย เล่มที่ ๒ หน้าที่ ๖๓-๖๕. https://84000.org/tipitaka/read/pali_read.php?B=2&A=1092&w=&modeTY=2 อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=2&A=1092&modeTY=2 อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=2&item=74&items=4 อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=2&siri=11 ศึกษาอรรถกถานี้ได้ที่ :- https://84000.org/tipitaka/attha/attha.php?b=2&i=74 อ่านอรรถกถาภาษาบาลีอักษรไทย :- https://84000.org/tipitaka/atthapali/read_th.php?B=2&A=4566 The Pali Atthakatha in Roman :- https://84000.org/tipitaka/atthapali/read_rm.php?B=2&A=4566 สารบัญพระไตรปิฎกเล่มที่ ๒ https://84000.org/tipitaka/read/?index_2 https://84000.org/tipitaka/english/?index_2