พระไตรปิฎกเล่มที่ ๓ ภาษาบาลี อักษรไทย
 พระวินัยปิฎกเล่มที่ ๓ วินย. ภิกฺขุนีวิภงฺโค

                         จีวรวคฺคสฺส ทุติยสิกฺขาปทํ
     [๑๔๒]   เตน  สมเยน  พุทฺโธ  ภควา  สาวตฺถิยํ  วิหรติ เชตวเน
อนาถปิณฺฑิกสฺส   อาราเม   ฯ   เตน   โข   ปน  สมเยน  ถุลฺลนนฺทา
ภิกฺขุนี  พหุสฺสุตา  โหติ  ภาณิกา  วิสารทา  ปฏฺฐา  ธมฺมึ  กถํ  กาตุํ  ฯ
อถโข   ราชา   ปเสนทิ  โกสโล  อุณฺหกาเล  มหคฺฆํ  โขมํ  ปารุปิตฺวา
เยน    ถุลฺลนนฺทา    ภิกฺขุนี    เตนุปสงฺกมิ   อุปสงฺกมิตฺวา   ถุลฺลนนฺทํ
ภิกฺขุนึ  อภิวาเทตฺวา  เอกมนฺตํ  นิสีทิ  ฯ  เอกมนฺตํ  นิสินฺนํ  โข ราชานํ
ปเสนทึ    โกสลํ   ถุลฺลนนฺทา   ภิกฺขุนี   ธมฺมิยา   กถาย   สนฺทสฺเสสิ
สมาทเปสิ  สมุตฺเตเชสิ  สมฺปหํเสสิ  ฯ  อถโข  ราชา  ปเสนทิ  โกสโล
ถุลฺลนนฺทาย  ภิกฺขุนิยา  ธมฺมิยา  กถาย  สนฺทสฺสิโต สมาทปิโต สมุตฺเตชิโต
สมฺปหํสิโต   ถุลฺลนนฺทํ   ภิกฺขุนึ   เอตทโวจ   วเทยฺยาสิ   อยฺเย  เยน
อตฺโถติ  ฯ  สเจ  เม  ตฺวํ  มหาราช  ทาตุกาโมสิ  อิมํ  โขมํ เทหีติ ฯ
อถ   ราชา   ปเสนทิ   โกสโล   ถุลฺลนนฺทาย  ภิกฺขุนิยา  โขมํ  ทตฺวา
อุฏฺฐายาสนา    ถุลฺลนนฺทํ    ภิกฺขุนึ    อภิวาเทตฺวา   ปทกฺขิณํ   กตฺวา
ปกฺกามิ   ฯ   มนุสฺสา   อุชฺฌายนฺติ   ขียนฺติ  วิปาเจนฺติ  มหิจฺฉา  อิมา
ภิกฺขุนิโย อสนฺตุฏฺฐา กถํ หิ นาม ราชานํ โขมํ วิญฺญาเปสฺสนฺตีติ ฯ
     {๑๔๒.๑}   อสฺโสสุํ  โข  ภิกฺขุนิโย  เตสํ  มนุสฺสานํ  อุชฺฌายนฺตานํ
ขียนฺตานํ   วิปาเจนฺตานํ  ฯ  ยา  ตา  ภิกฺขุนิโย  อปฺปิจฺฉา  ฯเปฯ  ตา
อุชฺฌายนฺติ  ขียนฺติ  วิปาเจนฺติ  กถํ  หิ  นาม  อยฺยา  ถุลฺลนนฺทา ราชานํ
โขมํ   วิญฺญาเปสฺสตีติ   ฯเปฯ   สจฺจํ  กิร  ภิกฺขเว  ถุลฺลนนฺทา  ภิกฺขุนี
ราชานํ  โขมํ  วิญฺญาเปตีติ  ๑-  ฯ  สจฺจํ ภควาติ ฯ วิครหิ พุทฺโธ ภควา
กถํ  หิ  นาม  ภิกฺขเว  ถุลฺลนนฺทา  ภิกฺขุนี  ราชานํ  โขมํ  วิญฺญาเปสฺสติ
เนตํ  ภิกฺขเว  อปฺปสนฺนานํ  วา  ปสาทาย  ฯเปฯ  เอวญฺจ  ปน ภิกฺขเว
ภิกฺขุนิโย อิมํ สิกฺขาปทํ อุทฺทิสนฺตุ
     {๑๔๒.๒}   ลหุปาปุรณํ  ๒- ปน ภิกฺขุนิยา เจตาเปนฺติยา อฑฺฒเตยฺย-
กํสปรมํ เจตาเปตพฺพํ ตโต เจ อุตฺตรึ เจตาเปยฺย นิสฺสคฺคิยํ ปาจิตฺติยนฺติ ฯ
     [๑๔๓]   ลหุปาปุรณํ   นาม   ยงฺกิญฺจิ   อุณฺหกาเล   ปาปุรณํ  ฯ
เจตาเปนฺติยาติ   วิญฺญาเปนฺติยา   ฯ  อฑฺฒเตยฺยกํสปรมํ  เจตาเปตพฺพนฺติ
ทสกหาปณคฺฆนกํ   เจตาเปตพฺพํ   ฯ   ตโต  เจ  อุตฺตรึ  เจตาเปยฺยาติ
ตทุตฺตรึ   วิญฺญาเปติ   ปโยเค   ทุกฺกฏํ   ปฏิลาเภน   นิสฺสคฺคิยํ   โหติ
@เชิงอรรถ: ๑ ม. ยุ. วิญฺญาเปสีติ ฯ ๒ ม. ยุ. ลหุปาวุรณํ ฯ
นิสฺสชฺชิตพฺพํ  สงฺฆสฺส  วา  คณสฺส  วา  เอกภิกฺขุนิยา  วา ฯ เอวญฺจ ปน
ภิกฺขเว   นิสฺสชฺชิตพฺพํ   อิทํ  เม  อยฺเย  ลหุปาปุรณํ  อติเรกอฑฺฒเตยฺย-
กํสปรมํ   เจตาปิตํ   นิสฺสคฺคิยํ   อิมาหํ   สงฺฆสฺส  นิสฺสชฺชามีติ  ฯเปฯ
ทเทยฺยาติ ฯเปฯ ทเทยฺยุนฺติ ฯเปฯ อยฺยาย ทมฺมีติ ฯ
     [๑๔๔]   อติเรกอฑฺฒเตยฺยกํเส  อติเรกสญฺญา  เจตาเปติ  นิสฺสคฺคิยํ
ปาจิตฺติยํ ฯ อติเรกอฑฺฒเตยฺยกํเส เวมติกา เจตาเปติ นิสฺสคฺคิยํ ปาจิตฺติยํ ฯ
อติเรกอฑฺฒเตยฺยกํเส   อูนกสญฺญา   เจตาเปติ   นิสฺสคฺคิยํ  ปาจิตฺติยํ  ฯ
อูนกอฑฺฒเตยฺยกํเส      อติเรกสญฺญา     อาปตฺติ     ทุกฺกฏสฺส     ฯ
อูนกอฑฺฒเตยฺยกํเส   เวมติกา  อาปตฺติ  ทุกฺกฏสฺส  ฯ  อูนกอฑฺฒเตยฺยกํเส
อูนกสญฺญา อนาปตฺติ ฯ
     [๑๔๕]   อนาปตฺติ  อฑฺฒเตยฺยกํสปรมํ  เจตาเปติ  อูนกอฑฺฒเตยฺย-
กํสปรมํ  เจตาเปติ  ญาตกานํ  ปวาริตานํ  อญฺญสฺสตฺถาย  อตฺตโน ธเนน
มหคฺฆํ เจตาเปตุกามสฺส อปฺปคฺฆํ เจตาเปติ อุมฺมตฺติกาย อาทิกมฺมิกายาติ ฯ

             เนื้อความพระไตรปิฎกฉบับภาษาบาลี อักษรไทย เล่มที่ ๓ หน้าที่ ๙๑-๙๓.
https://84000.org/tipitaka/read/pali_read.php?B=3&A=1813&w=&modeTY=2
             อ่านเทียบพระไตรปิฎกฉบับภาษาบาลี อักษรโรมัน :-
https://84000.org/tipitaka/read/roman_read.php?B=3&A=1813&modeTY=2
             อ่านเทียบพระไตรปิฎกภาษาไทยฉบับหลวง :-
https://84000.org/tipitaka/read/byitem.php?book=3&item=142&items=4
             อ่านเทียบพระไตรปิฎกฉบับมหาจุฬาฯ :-
https://84000.org/tipitaka/pitaka_item/m_siri.php?B=3&siri=27
             ศึกษาอรรถกถานี้ได้ที่ :-
https://84000.org/tipitaka/attha/attha.php?b=3&i=142
             อ่านอรรถกถาภาษาบาลีอักษรไทย :-
https://84000.org/tipitaka/atthapali/read_th.php?B=2&A=11203
             The Pali Atthakatha in Roman :-
https://84000.org/tipitaka/atthapali/read_rm.php?B=2&A=11203
             สารบัญพระไตรปิฎกเล่มที่ ๓
https://84000.org/tipitaka/read/?index_3
https://84000.org/tipitaka/english/?index_3