บาลีพระไตรปิฎกเล่มที่ ๓๔ - พระอภิธรรมปิฎกเล่มที่ ๑

     [๙๖๒]   กตเม  ธมฺมา  กิเลสา  ทส  กิเลสวตฺถูนิ  โลโภ  โทโส
โมโห   มาโน   ทิฏฺฐิ   วิจิกิจฺฉา   ถีนํ   อุทฺธจฺจํ   อหิริกํ  อโนตฺตปฺปํ
โลโภ   อฏฺฐสุ   โลภสหคเตสุ   จิตฺตุปฺปาเทสุ   อุปฺปชฺชติ  โทโส  ทฺวีสุ
โทมนสฺสสหคเตสุ    จิตฺตุปฺปาเทสุ    อุปฺปชฺชติ    โมโห   สพฺพากุสเลสุ
อุปฺปชฺชติ    มาโน   จตูสุ   ทิฏฺฐิคตวิปฺปยุตฺตโลภสหคเตสุ   จิตฺตุปฺปาเทสุ
อุปฺปชฺชติ      ทิฏฺฐิ     จตูสุ     ทิฏฺฐิคตสมฺปยุตฺเตสุ     จิตฺตุปฺปาเทสุ
อุปฺปชฺชติ    วิจิกิจฺฉา    วิจิกิจฺฉาสหคเตสุ    จิตฺตุปฺปาเทสุ    อุปฺปชฺชติ
ถีนํ    สสงฺขาริเกสุ    อกุสเลสุ    อุปฺปชฺชติ    อุทฺธจฺจญฺจ   อหิริกญฺจ
อโนตฺตปฺปญฺจ   สพฺพากุสเลสุ   อุปฺปชฺชนฺติ   อิเม   ธมฺมา   กิเลสา  ฯ
กตเม   ธมฺมา   โนกิเลสา   ฐเปตฺวา  กิเลเส  อวเสสํ  อกุสลํ  จตูสุ
ภูมีสุ    กุสลํ    จตูสุ    ภูมีสุ   วิปาโก   ตีสุ   ภูมีสุ   กิริยาพฺยากตํ
รูปญฺจ นิพฺพานญฺจ อิเม ธมฺมา โนกิเลสา ฯ
     [๙๖๓]   กตเม   ธมฺมา   สงฺกิเลสิกา  ตีสุ  ภูมีสุ  กุสลํ  อกุสลํ
ตีสุ    ภูมีสุ    วิปาโก    ตีสุ   ภูมีสุ   กิริยาพฺยากตํ   สพฺพญฺจ   รูปํ
อิเม   ธมฺมา   สงฺกิเลสิกา  ฯ  กตเม  ธมฺมา  อสงฺกิเลสิกา  จตฺตาโร
มคฺคา   อปริยาปนฺนา   จตฺตาริ   จ   สามญฺญผลานิ   นิพฺพานญฺจ  อิเม
ธมฺมา อสงฺกิเลสิกา ฯ
     [๙๖๔]   กตเม   ธมฺมา   สงฺกิลิฏฺฐา  ทฺวาทส  อกุสลจิตฺตุปฺปาทา
อิเม   ธมฺมา   สงฺกิลิฏฺฐา   ฯ   กตเม   ธมฺมา   อสงฺกิลิฏฺฐา   จตูสุ
ภูมีสุ    กุสลํ    จตูสุ    ภูมีสุ   วิปาโก   ตีสุ   ภูมีสุ   กิริยาพฺยากตํ
รูปญฺจ นิพฺพานญฺจ อิเม ธมฺมา อสงฺกิลิฏฺฐา ฯ
     [๙๖๕]   กตเม  ธมฺมา  กิเลสสมฺปยุตฺตา  ทฺวาทส อกุสลจิตฺตุปฺปาทา
อิเม   ธมฺมา   กิเลสสมฺปยุตฺตา   ฯ   กตเม   ธมฺมา  กิเลสวิปฺปยุตฺตา
จตูสุ     ภูมีสุ     กุสลํ    จตูสุ    ภูมีสุ    วิปาโก    ตีสุ    ภูมีสุ
กิริยาพฺยากตํ รูปญฺจ นิพฺพานญฺจ อิเม ธมฺมา กิเลสวิปฺปยุตฺตา ฯ
     [๙๖๖]   กตเม   ธมฺมา  กิเลสาเจวสงฺกิเลสิกาจ  เตว  กิเลสา
กิเลสาเจวสงฺกิเลสิกาจ   ฯ   กตเม  ธมฺมา  สงฺกิเลสิกาเจวโนจกิเลสา
ฐเปตฺวา  กิเลเส  อวเสสํ  อกุสลํ  ตีสุ  ภูมีสุ กุสลํ ตีสุ ภูมีสุ วิปาโก ตีสุ
ภูมีสุ  กิริยาพฺยากตํ  สพฺพญฺจ รูปํ อิเม ธมฺมา สงฺกิเลสิกาเจวโนจกิเลสา ฯ
อสงฺกิเลสิกา    ธมฺมา    น    วตฺตพฺพา   กิเลสาเจวสงฺกิเลสิกาจาติปิ
สงฺกิเลสิกาเจวโนจกิเลสาติปิ ฯ
     [๙๖๗]   กตเม   ธมฺมา   กิเลสาเจวสงฺกิลิฏฺฐาจ  เตว  กิเลสา
กิเลสาเจวสงฺกิลิฏฺฐาจ   ฯ   กตเม   ธมฺมา   สงฺกิลิฏฺฐาเจวโนจกิเลสา
ฐเปตฺวา  กิเลเส  อวเสสํ อกุสลํ อิเม ธมฺมา สงฺกิลิฏฺฐาเจวโนจกิเลสา ฯ
อสงฺกิลิฏฺฐา     ธมฺมา    น    วตฺตพฺพา    กิเลสาเจวสงฺกิลิฏฺฐาจาติปิ
สงฺกิลิฏฺฐาเจวโนจกิเลสาติปิ ฯ
     [๙๖๘]   กตเม    ธมฺมา   กิเลสาเจวกิเลสสมฺปยุตฺตาจ   ยตฺถ
เทฺว   ตโย   กิเลสา  เอกโต  อุปฺปชฺชนฺติ  อิเม  ธมฺมา  กิเลสาเจว-
กิเลสสมฺปยุตฺตาจ   ฯ   กตเม   ธมฺมา  กิเลสสมฺปยุตฺตาเจวโนจกิเลสา
ฐเปตฺวา   กิเลเส   อวเสสํ  อกุสลํ  อิเม  ธมฺมา  กิเลสสมฺปยุตฺตเจว-
โนจกิเลสา   ฯ   กิเลสวิปฺปยุตฺตา  ธมฺมา  น  วตฺตพฺพา  กิเลสาเจว-
กิเลสสมฺปยุตฺตาจาติปิ กิเลสสมฺปยุตฺตาเจวโนจกิเลสาติปิ ฯ
     [๙๖๙]   กตเม  ธมฺมา  กิเลสวิปฺปยุตฺตา  สงฺกิเลสิกา  ตีสุ  ภูมีสุ
กุสลํ    ตีสุ    ภูมีสุ   วิปาโก   ตีสุ   ภูมีสุ   กิริยาพฺยากตํ   สพฺพญฺจ
รูปํ   อิเม   ธมฺมา   กิเลสวิปฺปยุตฺตา   สงฺกิเลสิกา  ฯ  กตเม  ธมฺมา
กิเลสวิปฺปยุตฺตา   อสงฺกิเลสิกา  จตฺตาโร  มคฺคา  อปริยาปนฺนา  จตฺตาริ
จ    สามญฺญผลานิ    นิพฺพานญฺจ    อิเม    ธมฺมา    กิเลสวิปฺปยุตฺตา
อสงฺกิเลสิกา  ฯ  กิเลสสมฺปยุตฺตา  ธมฺมา  น  วตฺตพฺพา  กิเลสวิปฺปยุตฺตา
สงฺกิเลสิกาติปิ กิเลสวิปฺปยุตฺตา อสงฺกิเลสิกาติปิ ฯ
                                        --------------

เนื้อความพระไตรปิฎกฉบับภาษาบาลี อักษรไทย เล่มที่ ๓๔ หน้าที่ ๓๗๒-๓๗๔. https://84000.org/tipitaka/read/pali_read.php?B=34&A=7444&w=&modeTY=2 อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=34&A=7444&modeTY=2 อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=34&item=962&items=8 อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=34&siri=76 ศึกษาอรรถกถานี้ได้ที่ :- https://84000.org/tipitaka/attha/attha.php?b=34&i=962 สารบัญพระไตรปิฎกเล่มที่ ๓๔ https://84000.org/tipitaka/read/?index_34 https://84000.org/tipitaka/english/?index_34