[867] Savatthinidanam . tena kho pana samayena chabbaggiya bhikkhu
vethitasisassa dhammam desenti .pe.
{867.1} Na vethitasisassa agilanassa dhammam desessamiti
sikkha karaniya.
Vethitasiso nama kesantam na dassapetva vethito hoti .
Na vethitasisassa agilanassa dhammo desetabbo . yo anadariyam
paticca vethitasisassa agilanassa dhammam deseti apatti dukkatassa.
Anapatti asancicca asatiya ajanantassa gilanassa
kesantam vivarapetva deseti apadasu ummattakassa
adikammikassati.
[868] Savatthinidanam . tena kho pana samayena chabbaggiya
bhikkhu ogunthitasisassa dhammam desenti .pe.
{868.1} Na ogunthitasisassa agilanassa dhammam desessamiti
sikkha karaniya.
Ogunthitasiso nama sasisam paruto vuccati . na ogunthitasisassa
agilanassa dhammo desetabbo . yo anadariyam paticca ogunthitasisassa
agilanassa dhammam deseti apatti dukkatassa.
Anapatti asancicca asatiya ajanantassa gilanassa sisam
vivarapetva deseti apadasu ummattakassa adikammikassati.
[869] Savatthinidanam . tena kho pana samayena chabbaggiya
Bhikkhu chamayam nisiditva asane nisinnassa dhammam desenti .pe.
{869.1} Na chamayam 1- nisiditva asane nisinnassa agilanassa dhammam
desessamiti sikkha karaniya.
Na chamayam nisiditva asane nisinnassa agilanassa dhammo
desetabbo . yo anadariyam paticca chamayam nisiditva asane
nisinassa agilanassa dhammam deseti apatti dukkatassa.
Anapatti asancicca asatiya ajanantassa gilanassa
apadasu ummattakassa adikammikassati.
[870] Savatthinidanam . tena kho pana samayena chabbaggiya
bhikkhu nice asane nisiditva ucce asane nisinnassa dhammam
desenti . ye te bhikkhu appiccha .pe. te ujjhayanti
khiyanti vipacenti katham hi nama chabbaggiya bhikkhu nice asane
nisiditva ucce asane nisinnassa dhammam desessantiti .pe.
Saccam kira tumhe bhikkhave nice asane nisiditva ucce asane
nisinnassa dhammam desethati . saccam bhagavati . vigarahi buddho
bhagava katham hi nama tumhe moghapurisa nice asane nisiditva
ucce asane nisinnassa dhammam desessatha netam moghapurisa
appasannanam va pasadaya pasannanam va bhiyyobhavaya .pe.
Vigarahitva dhammim katham katva bhikkhu amantesi.
@Footnote: 1 Yu. chamaya.
[871] Bhutapubbam bhikkhave baranasiyam annatarassa chavakassa 1-
pajapati gabbhini ahosi . athakho bhikkhave sa chavaki 2- tam chavakam
etadavoca gabbhinimhi ayyaputta icchami ambam khaditunti . natthi
ambo 3- akalo ambassati . sace na labhissami marissamiti .
Tena kho pana samayena ranno ambo dhuvaphalo hoti . athakho
bhikkhave so chavako yena so ambo tenupasankami upasankamitva
tam ambam abhiruhitva nilino acchi . athakho bhikkhave raja purohitena
brahmanena saddhim yena so ambo tenupasankami upasankamitva
ucce asane nisiditva mantam pariyapunati.
{871.1} Athakho bhikkhave tassa chavakassa etadahosi yava
adhammiko ayam raja yatra hi nama ucce asane nisiditva mantam
pariyapunissati ayanca brahmano adhammiko yatra hi nama
nice asane nisiditva ucce asane nisinnassa mantam vacessati
ahancamhi adhammiko yoham itthiya karana ranno ambam avaharami
sabbamidam ca 4- parigatanti 5-. Tattheva paripati.
Ubho attham na jananti ubho dhammam na passare
yo cayam mantam vaceti yo cadhammena dhiyati.
Salinam odano bhutto sucimamsupasecano
tasma dhamme na vattami dhammo ariyebhi vannito.
@Footnote: 1 Ma. Yu. chapakassa . 2 Ma. Yu. chapaki. evamuparipi . 3 Ma. Yu. ambam.
@4 Ma. Yu. carimam . 5 Ma. Yu. katanti.
Dhiratthu tam dhanalabham yasalabhanca brahmana
ya vutti vinipatena adhammacaranena va.
Paribbaja mahabrahme pacantannepi panino.
Ma tam adhammo acarito asma kumbhamivabhidati.
[872] Tadapi me bhikkhave amanapa nice asane nisiditva
ucce asane nisinnassa mantam vacetum kimangam pana etarahi na
amanapa bhavissati nice asane nisiditva ucce asane nisinnassa
dhammam desetum netam bhikkhave appasannanam va pasadaya pasannanam
va bhiyyobhavaya .pe. evanca pana bhikkhave imam sikkhapadam
uddiseyyatha
{872.1} na nice asane nisiditva ucce asane nisinnassa
agilanassa dhammam desessamiti sikkha karaniya.
Na nice asane nisiditva ucce asane nisinnassa agilanassa
dhammo desetabbo . yo anadariyam paticca nice asane nisiditva
ucce asane nisinnassa agilanassa dhammam deseti apatti
dukkatassa.
Anapatti asancicca asatiya ajanantassa gilanassa
apadasu ummattakassa adikammikassati.
[873] Savatthinidanam . tena kho pana samayena chabbaggiya
bhikkhu thita nisinnassa dhammam desenti .pe.
{873.1} Na thito nisinnassa agilanassa dhammam desessamiti
sikkha karaniya.
Na thitena nisinnassa agilanassa dhammo desetabbo . yo
anadariyam paticca thito nisinnassa agilanassa dhammam deseti apatti
dukkatassa.
Anapatti asancicca asatiya ajanantassa gilanassa
apadasu ummattakassa adikammikassati.
[874] Savatthinidanam . tena kho pana samayena chabbaggiya
bhikkhu pacchato gacchanta purato gacchantassa dhammam desenti .pe.
{874.1} Na pacchato gacchanto purato gacchantassa agilanassa dhammam
desessamiti sikkha karaniya.
Na pacchato gacchantena purato gacchantassa agilanassa dhammo
desetabbo . yo anadariyam paticca pacchato gacchanto purato
gacchantassa agilanassa dhammam deseti apatti dukkatassa.
Anapatti asancicca asatiya ajanantassa gilanassa
apadasu ummattakassa adikammikassati.
[875] Savatthinidanam . tena kho pana samayena chabbaggiya
bhikkhu uppathena gacchanta pathena gacchantassa dhammam desenti .pe.
{875.1} Na uppathena gacchanto pathena gacchantassa agilanassa dhammam
desessamiti sikkha karaniya.
Na uppathena gacchantena pathena gacchantassa agilanassa dhammo
desetabbo . yo anadariyam paticca uppathena gacchanto pathena
Gacchantassa agilanassa dhammam deseti apatti dukkatassa .
Anapatti asancicca asatiya ajanantassa gilanassa
apadasu ummattakassa adikammikassati.
Tayo pakinnaka 1-
[876] Savatthinidanam . tena kho pana samayena chabbaggiya
bhikkhu thita uccarampi passavampi karonti .pe.
{876.1} Na thito agilano uccaram va passavam va karissamiti
sikkha karaniya.
Na thitena agilanena uccaro va passavo va katabbo.
Yo anadariyam paticca thito agilano uccaram va passavam va karoti
apatti dukkatassa.
Anapatti asancicca asatiya ajanantassa gilanassa
apadasu ummattakassa adikammikassati.
[877] Savatthinidanam . tena kho pana samayena chabbaggiya
bhikkhu harite uccarampi passavampi khelampi karonti .pe.
{877.1} Na harite agilano uccaram va passavam va khelam va
karissamiti sikkha karaniya.
Na harite agilanena uccaro va passavo va khelo va
katabbo . yo anadariyam paticca harite agilano uccaram va
passavam va khelam va karoti apatti dukkatassa.
@Footnote: 1 Ma. idam pathadvayam natthi.
Anapatti asancicca asatiya ajanantassa gilanassa
appaharite kato haritam ottharati apadasu ummattakassa
adikammikassati.
[878] Tena samayena buddho bhagava savatthiyam viharati jetavane
anathapindikassa arame . tena kho pana samayena chabbaggiya
bhikkhu udake uccarampi passavampi khelampi karonti . manussa
ujjhayanti khiyanti vipacenti katham hi nama samana sakyaputtiya
udake uccarampi passavampi khelampi karissanti seyyathapi gihi
kamabhoginoti . assosum kho bhikkhu tesam manussanam ujjhayantanam
khiyantanam vipacentanam . ye te bhikkhu appiccha .pe. te
ujjhayanti khiyanti vipacenti katham hi nama chabbaggiya bhikkhu
udake uccarampi passavampi khelampi karissantiti .pe. saccam
kira tumhe bhikkhave udake uccarampi passavampi khelampi karothati.
Saccam bhagavati . vigarahi buddho bhagava katham hi nama tumhe
moghapurisa udake uccarampi passavampi khelampi karissatha netam
moghapurisa appasannanam va pasadaya pasannanam va bhiyyobhavaya
.pe. Evanca pana bhikkhave imam sikkhapadam uddiseyyatha
{878.1} na udake uccaram va passavam va khelam va karissamiti
sikkha karaniya.
{878.2} Evancidam bhagavata bhikkhunam sikkhapadam pannattam hoti.
[879] Tena kho pana samayena gilana bhikkhu udake uccarampi
Passavampi khelampi katum kukkuccayanti . bhagavato etamattham
arocesum . athakho bhagava etasmim nidane etasmim pakarane
dhammim katham katva bhikkhu amantesi anujanami bhikkhave gilanena
bhikkhuna udake uccarampi passavampi khelampi katum evanca
pana bhikkhave imam sikkhapadam uddiseyyatha
{879.1} na udake agilano uccaram va passavam va khelam va
karissamiti sikkha karaniya.
Na udake agilanena uccaro va passavo va khelo va
katabbo . yo anadariyam paticca udake agilano uccaram va
passavam va khelam va karoti apatti dukkatassa.
Anapatti asancicca asatiya ajanantassa gilanassa thale
kato udakam ottharati apadasu ummattakassa adikammikassati.
Padukavaggo sattamo.
---------
Uddittha kho ayasmanto sekhiya dhamma . tatthayasmante
pucchami kaccittha parisuddha dutiyampi pucchami kaccittha parisuddha
tatiyampi pucchami kaccittha parisuddha parisuddhetthayasmanto
tasma tunhi. Evametam dharayamiti.
[1]-
Sekhiyakandam nitthitam.
-------
@Footnote: 1 Ma. sekhiya nitthita.
Adhikaranasamatha dhamma
[880] Ime kho panayasmanto satta adhikaranasamatha dhamma
uddesam agacchanti . uppannuppannanam adhikarananam samathaya vupasamaya
sammukhavinayo databbo sativinayo databbo amulhavinayo databbo
patinnaya karetabbam yebhuyyasika tassa papiyasika tinavattharakoti.
Uddittha kho ayasmanto satta adhikaranasamatha dhamma .
Tatthayasmante pucchami kaccittha parisuddha dutiyampi pucchami
kaccittha parisuddha tatiyampi pucchami kaccittha parisuddha
parisuddhetthayasmanto tasma tunhi. Evametam dharayamiti.
Adhikaranasamatha dhamma 1- nitthita.
----------
[881] Uddittham kho ayasmanto nidanam uddittha cattaro
parajika dhamma uddittha terasa sanghadisesa dhamma uddittha
dve aniyata dhamma uddittha timsa nissaggiya pacittiya dhamma
uddittha dvenavuti pacittiya dhamma uddittha cattaro
patidesaniya dhamma uddittha sekhiya dhamma uddittha satta
adhikaranasamatha dhamma . ettakam tassa bhagavato suttagatam
suttapariyapannam anvaddhamasam uddesam agacchati . tattha sabbeheva
samaggehi sammodamanehi avivadamanehi sikkhitabbanti.
Mahavibhango nitthito.
--------
@Footnote: 1 Ma. ayam patho natthi.
The Pali Tipitaka in Roman Character Volume 2 page 563-571.
https://84000.org/tipitaka/read/roman_item.php?book=2&item=867&items=15
Classified by [Item Number] :-
http://84000.org/tipitaka/read/roman_item.php?book=2&item=867&items=15&mode=bracket
Compare with The Pali Tipitaka in Thai Character :-
https://84000.org/tipitaka/read/pali_item.php?book=2&item=867&items=15
Compare with The Royal Version of Thai Tipitaka :-
https://84000.org/tipitaka/read/byitem.php?book=2&item=867&items=15
Study Atthakatha :-
https://84000.org/tipitaka/attha/attha.php?b=2&i=867
Contents of The Tipitaka Volume 2
https://84000.org/tipitaka/read/?index_2
https://84000.org/tipitaka/english/?index_2
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
