[178] Tam kim mannatha bhikkhave apinu tumhehi dittham va
sutam va ayam puriso panatipatam pahaya panatipata pativirato
hoti 1- tamenam rajano gahetva panatipataveramanihetu hananti
va bandhanti va pabbajenti va yathapaccayam va karontiti. No hetam
bhante.
{178.1} Sadhu bhikkhave mayapi kho etam bhikkhave neva dittham na
sutam ayam puriso panatipatam pahaya panatipata pativirato hoti 1-
tamenam rajano gahetva panatipataveramanihetu hananti va bandhanti
va pabbajenti va yathapaccayam va karontiti apicakhvassa 2- tadeva 3-
@Footnote: 1 Ma. pativiratoti . 2 Ma. Yu. apicakhvassa . 3 Ma. Yu. tameva.
Papakammam pavedeti 1- ayam puriso itthim va purisam va jivita voropetiti 2-
tamenam rajano gahetva panatipatahetu hananti va bandhanti
va pabbajenti va yathapaccayam va karonti apinu tumhehi evarupam
dittham va sutam vati ditthanca no bhante sutanca suyyissati cati.
{178.2} Tam kim mannatha bhikkhave apinu tumhehi dittham va sutam va ayam
puriso adinnadanam pahaya adinnadana pativirato hoti tamenam
rajano gahetva adinnadanaveramanihetu hananti va bandhanti va
pabbajenti va yathapaccayam va karontiti. No hetam bhante.
{178.3} Sadhu bhikkhave mayapi kho etam bhikkhave neva dittham na sutam
ayam puriso adinnadanam pahaya adinnadana pativirato hoti tamenam rajano
gahetva adinnadanaveramanihetu hananti va bandhanti va pabbajenti
va yathapaccayam va karontiti apicakhvassa tadeva papakammam pavedeti
ayam puriso gama va aranna va adinnam theyyasankhatam adiyati 3-
tamenam rajano gahetva adinnadanahetu hananti va bandhanti va
pabbajenti va yathapaccayam va karonti apinu tumhehi evarupam
dittham va sutam vati ditthanca no bhante sutanca suyyissati
cati . tam kim mannatha bhikkhave apinu tumhehi dittham va sutam va
ayam puriso kamesu micchacaram pahaya kamesu micchacara pativirato
hoti tamenam rajano gahetva kamesu micchacaraveramanihetu hananti
va bandhanti va pabbajenti va yathapaccayam va karontiti . no
@Footnote: 1 Ma. Yu. pavedenti . 2 Ma. Yu. voropesiti . 3 Ma. Yu. adiyiti.
Hetam bhante.
{178.4} Sadhu bhikkhave mayapi kho etam bhikkhave neva dittham
na sutam ayam puriso kamesu micchacaram pahaya kamesu micchacara
pativirato hoti tamenam rajano gahetva kamesu micchacaraveramanihetu
hananti va bandhanti va pabbajenti va yathapaccayam va karontiti
apicakhvassa tadeva papakammam pavedeti ayam puriso paritthisu parakumarisu
carittam apajjati 1- tamenam rajano gahetva kamesu micchacarahetu
hananti va bandhanti va pabbajenti va yathapaccayam va karonti
apinu tumhehi evarupam dittham va sutam vati ditthanca no bhante
sutanca suyyissati cati.
{178.5} Tam kim mannatha bhikkhave apinu tumhehi dittham va sutam va
ayam puriso musavadam pahaya musavada pativirato hoti tamenam rajano
gahetva musavadaveramanihetu hananti va bandhanti va pabbajenti
va yathapaccayam va karontiti . no hetam
bhante.
{178.6} Sadhu bhikkhave mayapi kho etam bhikkhave neva dittham na
sutam ayam puriso musavadam pahaya musavada pativirato hoti tamenam
rajano gahetva musavadaveramanihetu hananti va bandhanti va
pabbajenti va yathapaccayam va karontiti apicakhvassa tadeva papakammam
pavedeti ayam puriso gahapatissa va gahapatiputtassa va musavadena
attham bhanjati 2- tamenam rajano gahetva musavadahetu hananti va
bandhanti va pabbajenti va yathapaccayam va karonti apinu tumhehi
evarupam dittham va sutam vati ditthanca no bhante sutanca suyyissati
@Footnote: 1 Po. apajjatiti. Ma. Yu. apajjiti. aparampi idisameva.
@2 Po. Yu. bhanjiti. Ma. pabhanjiti. ito param evam natabbam.
Cati.
{178.7} Tam kim mannatha bhikkhave apinu tumhehi dittham va sutam va
ayam puriso suramerayamajjapamadatthanam pahaya suramerayamajjapamadatthana
pativirato hoti tamenam rajano gahetva suramerayamajjapama-
datthanaveramanihetu hananti va bandhanti va pabbajenti va
yathapaccayam va karontiti. No hetam bhante.
{178.8} Sadhu bhikkhave mayapi kho etam bhikkhave neva dittham na sutam
ayam puriso suramerayamajjapamadatthanam pahaya suramerayamajjapamadatthana
pativirato hoti tamenam rajano gahetva suramerayamajjapamadatthanaveramanihetu
hananti va bandhanti va pabbajenti va yathapaccayam va karontiti apicakhvassa
tadeva papakammam pavedeti ayam puriso suramerayamajjapamadatthanam anuyutto
itthim va purisam va jivita voropeti 1- ayam puriso suramerayamajja-
pamadatthanam anuyutto gama va aranna va adinnam theyyasankhatam
adiyati 2- ayam puriso suramerayamajjapamadatthanam anuyutto paritthisu
parakumarisu carittam apajjati ayam puriso suramerayamajjapamadatthanam
anuyutto gahapatissa va gahapatiputtassa va musavadena attham bhanjati
tamenam rajano gahetva suramerayamajjapamadatthanahetu hananti va
bandhanti va pabbajenti va yathapaccayam va karonti apinu tumhehi
evarupam dittham va sutam vati ditthanca no bhante sutanca suyyissati
cati.
@Footnote: 1 Ma. Yu. voropesi . 2 Ma. Yu. adiyi.
[179] Athakho anathapindiko gahapati pancamattehi upasakasatehi
parivuto yena bhagava tenupasankami upasankamitva bhagavantam abhivadetva
ekamantam nisidi . athakho bhagava ayasmantam sariputtam amantesi
yankanci sariputta janeyyatha gihim odatavasanam pancasu sikkhapadesu
samvutakammantam catunnanca abhicetasikanam ditthadhammasukhaviharanam
nikamalabhim akicchalabhim akasiralabhim so akankhamano attanava attanam
byakareyya khinanirayomhi khinatiracchanayoni khinapittivisayo
khinapayaduggativinipato sotapannohamasmi avinipatadhammo niyato
sambodhiparayanoti.
{179.1} Katamesu pancasu sikkhapadesu samvutakammanto hoti idha
sariputta ariyasavako panatipata pativirato hoti adinnadana
pativirato hoti kamesu micchacara pativirato hoti musavada
pativirato hoti suramerayamajjapamadatthana pativirato hoti . imesu
pancasu sikkhapadesu samvutakammanto hoti.
{179.2} Katamesam catunnam abhicetasikanam ditthadhammasukhaviharanam
nikamalabhi hoti akicchalabhi akasiralabhi . idha sariputta ariyasavako
buddhe aveccappasadena samannagato hoti itipi so bhagava araham
sammasambuddho vijjacaranasampanno sugato lokavidu anuttaro
purisadammasarathi sattha devamanussanam buddho bhagavati ayamassa pathamo
abhicetasiko ditthadhammasukhaviharo adhigato hoti avisuddhassa
cittassa visuddhiya apariyodatassa cittassa pariyodapanaya.
{179.3} Puna caparam sariputta ariyasavako dhamme aveccappasadena samannagato
Hoti svakkhato bhagavata dhammo sanditthiko akaliko ehipassiko
opanayiko paccattam veditabbo vinnuhiti ayamassa dutiyo abhicetasiko
ditthadhammasukhaviharo adhigato hoti avisuddhassa cittassa visuddhiya
apariyodatassa cittassa pariyodapanaya.
{179.4} Puna caparam sariputta ariyasavako sanghe aveccappasadena
samannagato hoti supatipanno bhagavato savakasangho ujupatipanno bhagavato
savakasangho nayapatipanno bhagavato savakasangho samicipatipanno bhagavato
savakasangho yadidam cattari purisayugani attha purisapuggala esa bhagavato
savakasangho ahuneyyo pahuneyyo dakkhineyyo anjalikaraniyo anuttaram
punnakkhettam lokassati ayamassa tatiyo abhicetasiko ditthadhammasukhaviharo
adhigato hoti avisuddhassa cittassa visuddhiya apariyodatassa cittassa
pariyodapanaya.
{179.5} Puna caparam sariputta ariyasavako ariyakantehi silehi
samannagato hoti akhandehi acchiddehi asabalehi akammasehi bhujissehi
vinnupasatthehi samadhisamvattanikehi ayamassa catuttho abhicetasiko
ditthadhammasukhaviharo adhigato hoti avisuddhassa cittassa visuddhiya
apariyodatassa cittassa pariyodapanaya . imesam catunnam abhicetasikanam
ditthadhammasukhaviharanam nikamalabhi hoti akicchalabhi akasiralabhi . Yankanci
sariputta janeyyatha gihim odatavasanam imesu pancasu sikkhapadesu
samvutakammantam imesanca catunnam abhicetasikanam ditthadhammasukhaviharanam
@Footnote: 1 Ma. Yu. etthantare aparamatthehiti atthi.
Nikamalabhim akicchalabhim akasiralabhim so akankhamano attanava attanam
byakareyya khinanirayomhi khinatiracchanayoni khinapittivisayo 1- khinapaya-
duggativinipato sotapannohamasmi avinipatadhammo niyato sambodhiparayanoti.
Nirayesu bhayam disva papani parivajjaye
ariyadhammam samadaya pandito parivajjaye
na himse panabhutani vijjamane parakkame
musa ca na bhane janam adinnam na paramase
sehi 2- darehi santuttho paradaranca narame 3-
merayam varunim jantu na pive cittamohanim
anussareyya sambuddham dhammam canuvitakkaye 4-
abyapajjham hitam cittam devalokaya bhavaye
upatthite deyyadhamme punnatthassa jigimsato 5-
santesu pathamam dinna vipula hoti dakkhina.
Santo have pavakkhami sariputta sunohi me
iti kanhasu setasu rohinisu carisu va
kammasasu sarupasu gosu parevatasu 6- va
yasukasuci etasu danto jayati pungavo
dhoreyho balasampanno kalyanajavanikkamo
@Footnote: 1 Ma. khinapetti ... . 2 Po. sakehi . 3 Ma. Yu. arame.
@4 Po. dhammam anuvi .... Ma. dhammancanu .... 5 Ma. jigisato.
@6 Yu. parapatasu.
Tameva bhare yunjanti nassa vannam parikkhare
evameva manussesu yasmimkasminci jatiye
khattiye brahmane vesse sudde candalapukkuse
yasukasuci 1- etasu danto jayati subbato
dhammattho silasampanno saccavadi hirimano
pahinajatimarano brahmacariyassa kevali
pannabharo visamyutto katakicco anasavo
paragu sabbadhammanam anupadaya nibbuto
tasminca viraje khette vipula hoti dakkhina.
Bala ca avijananta dummedha assutavino
bahiddha denti 2- danani na hi sante upasare.
Ye ca sante upasanti sappanne dhirasammate
saddha ca nesam sugate mulajata patitthita
devalokanca te yanti kule va idha jayare
anupubbena nibbanam adhigacchanti panditati.
[180] Ekam samayam bhagava kosalesu carikam carati mahata bhikkhusanghena
saddhim addasa kho bhagava addhanamaggapatipanno annatarasmim
padese mahantam salavanam disvana magga okkamma yena tam salavanam
tenupasankami upasankamitva tam salavanam ajjhogahetva annatarasmim
padese sitam patvakasi . athakho ayasamto anandassa etadahosi
@Footnote: 1 Po. Yu. kasu ca . 2 Po. Ma. dadanti.
Ko nu kho hetu ko paccayo bhagavato sitassa patukammaya na
akaranena tathagata sitam patukarontiti . athakho ayasma anando
bhagavantam etadavoca ko nu kho bhante hetu ko paccayo bhagavato
sitassa patukammaya na akaranena tathagata sitam patukarontiti.
{180.1} Bhutapubbam ananda imasmim padese nagaram ahosi iddhanceva
phitanca bahujanam akinnamanussam tam kho panananda nagaram kassapo bhagava
araham sammasambuddho upanissaya viharati 1- kassapassa kho panananda
bhagavato arahato sammasambuddhassa bhavesi nama upasako ahosi
silesu aparipurakari bhavesina kho ananda upasakena pancamattani
upasakasatani patidesitani samadapitani ahesum silesu aparipurakarino
athakho ananda bhavesissa upasakassa etadahosi aham kho imesam
pancannam upasakasatanam bahupakaro pubbangamo samadapeta
ahancamhi silesu aparipurakari imanipi panca upasakasatani silesu
aparipurakarino iccetam samasamam natthi kinci atirekam handaham
atirekayati.
{180.2} Athakho ananda bhavesi 2- upasako yena tani panca
upasakasatani tenupasankami upasankamitva tani panca upasakasatani
etadavoca ajjatagge mam ayasmanto silesu paripurakarim dharethati.
Athakho ananda tesam pancannam upasakasatanam etadahosi
ayyo kho bhavesi amhakam bahupakaro pubbangamo samadapeta
@Footnote: 1 Ma. Yu. vihasi . 2 Ma. Yu. gavesi.
Ayyo hi nama bhavesi 1- silesu paripurakari bhavissati kimangam
pana mayanti . athakho ananda tani panca upasakasatani yena
bhavesi upasako tenupasankamimsu upasankamitva bhavesim upasakam
etadavocum ajjatagge ayyo bhavesi imanipi panca upasakasatani
silesu paripurakarino dharetuti . athakho ananda bhavesissa
upasakassa etadahosi aham kho imesam pancannam upasakasatanam
bahupakaro pubbangamo samadapeta ahancamhi silesu paripurakari
imanipi 2- panca upasakasatani silesu paripurakarino iccetam samasamam
natthi kinci atirekam handaham atirekayati.
{180.3} Athakho ananda bhavesi upasako yena tani panca
upasakasatani tenupasankami upasankamitva tani panca upasakasatani
etadavoca ajjatagge mam ayasmanto brahmacarim dharetha aracarim viratam
methuna gamadhammati . athakho ananda tesam pancannam upasakasatanam
etadahosi ayyo kho bhavesi amhakam bahupakaro pubbangamo samadapeta
ayyo hi nama bhavesi brahmacari bhavissati aracari virato methuna
gamadhamma kimangam pana mayanti . athakho ananda tani panca
upasakasatani yena bhavesi upasako tenupasankamimsu upasankamitva
bhavesim upasakam etadavocum ajjatagge ayyo bhavesi imanipi
@Footnote: 1 Ma. Yu. gavesi. sabbattha idisameva . 2 Yu. imani ca.
Panca upasakasatani brahmacarino dharetu aracarino virate 1-
methuna gamadhammati . athakho ananda bhavesissa upasakassa etadahosi
aham kho imesam pancannam upasakasatanam bahupakaro pubbangamo
samadapeta ahancamhi silesu paripurakari imanipi panca upasakasatani
silesu paripurakarino ahancamhi brahmacari aracari virato
methuna gamadhamma imanipi panca upasakasatani brahmacarino
aracarino virata methuna gamadhamma iccetam samasamam natthi
kinci atirekam handaham atirekayati.
{180.4} Athakho ananda bhavesi upasako yena tani panca
upasakasatani tenupasankami upasankamitva tani panca upasakasatani
etadavoca ajjatagge mam ayasmanto ekabhattikam dharetha
rattuparatam viratam vikalabhojanati . athakho ananda tesam pancannam
upasakasatanam etadahosi ayyo kho bhavesi amhakam 2-
bahupakaro pubbangamo samadapeta ayyo hi nama bhavesi
ekabhattiko bhavissati rattuparato virato vikalabhojana kimangam
pana mayanti . athakho ananda tani panca upasakasatani yena
bhavesi upasako tenupasankamimsu upasankamitva bhavesim upasakam
etadavocum ajjatagge ayyo bhavesi imanipi panca upasakasatani
ekabhattike dharetu rattuparate virate vikalabhojanati . athakho
ananda bhavesissa upasakassa etadahosi aham kho imesam
@Footnote: 1 Po. ma virata . 2 Ma. ayam saddo natthi.
Pancannam upasakasatanam bahupakaro pubbangamo samadapeta
ahancamhi silesu paripurakari imanipi panca upasakasatani silesu
paripurakarino ahancamhi brahmacari aracari virato methuna
gamadhamma imanipi panca upasakasatani brahmacarino aracarino
virata methuna gamadhamma ahancamhi ekabhattiko rattuparato
virato vikalabhojana imanipi panca upasakasatani ekabhattika
rattuparata virata vikalabhojana iccetam samasamam natthi kinci
atirekam handaham atirekayati.
{180.5} Athakho ananda bhavesi upasako yena kassapo bhagava
araham sammasambuddho tenupasankami upasankamitva kassapam bhagavantam
arahantam sammasambuddham etadavoca labheyyaham bhante bhagavato santike
pabbajjam labheyyam upasampadanti . alattha kho ananda bhavesi upasako
kassapassa bhagavato arahato sammasambuddhassa santike pabbajjam alattha
upasampadam acirupasampanno kho panananda bhavesi bhikkhu eko vupakattho
appamatto atapi pahitatto viharanto nacirasseva yassatthaya
kulaputta sammadeva agarasma anagariyam pabbajanti tadanuttaram
brahmacariyapariyosanam dittheva dhamme sayam abhinna sacchikatva
upasampajja vihasi khina jati vusitam brahmacariyam katam karaniyam naparam
itthattayati abbhannasi annataro ca panananda bhavesi bhikkhu
arahatam ahosi.
{180.6} Athakho ananda tesam pancannam upasakasatanam etadahosi
ayyo kho bhavesi amhakam bahupakaro pubbangamo samadapeta ayyo hi
nama bhavesi kesamassum oharetva kasayani vatthani acchadetva
agarasma anagariyam pabbajissati kimangam pana mayanti . athakho
ananda tani panca upasakasatani yena kassapo bhagava araham
sammasambuddho tenupasankamimsu upasankamitva kassapam bhagavantam
arahantam sammasambuddham etadavocum labheyyama mayam bhante bhagavato
santike pabbajjam labheyyama upasampadanti alabhimsu kho ananda
tani panca upasakasatani kassapassa bhagavato arahato
sammasambuddhassa santike pabbajjam alabhimsu upasampadam
{180.7} athakho ananda bhavesissa bhikkhuno etadahosi aham kho
imassa anuttarassa vimuttisukhassa nikamalabhi [1]- akicchalabhi
akasiralabhi ahovatimanipi panca bhikkhusatani imassa anuttarassa
vimuttisukhassa nikamalabhino assu akicchalabhino akasiralabhinoti
athakho ananda tani panca bhikkhusatani ekeka 2- vupakattha
appamatta atapino pahitatta viharanta nacirasseva
yassatthaya kulaputta sammadeva agarasma anagariyam pabbajanti
tadanuttaram brahmacariyapariyosanam dittheva dhamme sayam
abhinna sacchikatva upasampajja viharimsu khina jati vusitam
brahmacariyam katam karaniyam naparam itthattayati abbhannimsu iti
@Footnote: 1 Ma. hoti . 2 Ma. yu ayam patho natthi.
Kho ananda tani panca bhikkhusatani bhavesipamukhani uttaruttarim 1-
panitapanitam vayamamana anuttaram vimuttim sacchakamsu . tasma tiha
ananda evam sikkhitabbam uttaruttarim 1- panitapanitam vayamamana
anuttaram vimuttim sacchikarissamati evam hi vo ananda sikkhitabbanti.
Upasakavaggo tatiyo.
Tassuddanam
sarajjam visarado nirayam evam candalapancamam
piti vanijja rajano gihi ceva bhavesinati.
--------------
Arannavaggo catuttho
[181] Pancime bhikkhave arannaka 3- katame panca mandatta
momuhatta arannako hoti papiccho icchapakato arannako
hoti ummada cittakkhepa arannako hoti vannitam buddhehi
buddhasavakehiti arannako hoti appicchatanneva nissaya
santutthinneva nissaya sallekhanneva nissaya pavivekanneva nissaya
idamatthitanneva nissaya arannako hoti ime kho bhikkhave panca
arannaka . imesam kho bhikkhave pancannam arannakanam yvayam arannako
appicchatanneva nissaya santutthinneva nissaya sallekhanneva nissaya
pavivekanneva nissaya idamatthitanneva nissaya arannako hoti
@Footnote: 1 Po. Ma. uttaruttari . 2 Ma. arannika. sabbattha idisameva.
Ayam imesam pancannam arannakanam aggo ca settho ca mokkho ca
uttamo ca pavaro ca seyyathapi bhikkhave gava khiram khiramha dadhi
dadhimha navanitam navanitamha sappi sappimha sappimando
sappimando 1- tattha aggamakkhayati evameva kho bhikkhave imesam
pancannam arannakanam yvayam arannako appicchatanneva
nissaya santutthinneva nissaya sallekhanneva nissaya
pavivekanneva nissaya idamatthitanneva nissaya arannako
hoti ayam imesam pancannam arannakanam aggo ca settho ca
mokkho ca uttamo ca pavaro cati.
[182] Pancime bhikkhave pamsukulika .pe.
[183] Pancime bhikkhave rukkhamulika .pe.
[184] Pancime bhikkhave sosanika .pe.
[185] Pancime bhikkhave abbhokasika .pe.
The Pali Tipitaka in Roman Character Volume 22 page 232-246.
https://84000.org/tipitaka/read/roman_item.php?book=22&item=178&items=8
Classified by [Item Number] :-
http://84000.org/tipitaka/read/roman_item.php?book=22&item=178&items=8&mode=bracket
Compare with The Pali Tipitaka in Thai Character :-
https://84000.org/tipitaka/read/pali_item.php?book=22&item=178&items=8
Compare with The Royal Version of Thai Tipitaka :-
https://84000.org/tipitaka/read/byitem.php?book=22&item=178&items=8
Study Atthakatha :-
https://84000.org/tipitaka/attha/attha.php?b=22&i=178
Contents of The Tipitaka Volume 22
https://84000.org/tipitaka/read/?index_22
https://84000.org/tipitaka/english/?index_22
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
