บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ |
ThaiVersion PaliThai PaliRoman |
TIPITAKA Volume 25 : PALI ROMAN Sutta Pitaka Vol 17 : Sutta. Khu. khuddakapāṭho-dhammapadagāthā-udānaṃ-itivuttakaṃ-suttanipāto
[175] 7 Evamme sutaṃ . Ekaṃ samayaṃ bhagavā kosalesu addhāna- maggapaṭipanno hoti āyasmatā nāgasamālena pacchāsamaṇena . Addasā kho āyasmā nāgasamālo antarāmagge dvidhāpathaṃ disvāna bhagavantaṃ etadavoca ayaṃ bhante bhagavā pantho iminā gacchāmāti . evaṃ vutte bhagavā āyasmantaṃ nāgasamālaṃ etadavoca ayaṃ nāgasamāla pantho iminā gacchāmāti. {175.1} Dutiyampi kho āyasmā nāgasamālo bhagavantaṃ etadavoca ayaṃ bhante bhagavā pantho iminā gacchāmāti . dutiyampi kho bhagavā āyasmantaṃ nāgasamālaṃ etadavoca ayaṃ nāgasamāla pantho iminā gacchāmāti . tatiyampi kho āyasmā nāgasamālo bhagavantaṃ etadavoca ayaṃ bhante bhagavā pantho iminā gacchāmāti . tatiyampi kho bhagavā āyasmantaṃ nāgasamālaṃ etadavoca ayaṃ nāgasamāla pantho iminā @Footnote: 1 Ma. pabandhati. Gacchāmāti . atha kho āyasmā nāgasamālo bhagavato pattacīvaraṃ tattheva chamāyaṃ nikkhipitvā pakkāmi idaṃ bhante bhagavā pattacīvaranti . atha kho āyasmato nāgasamālassa tena panthena gacchantassa antarāmagge corā nikkhamitvā hatthehi vā pādehi vā ākoṭesuṃ pattañca bhindiṃsu saṅghāṭiñca vipphālesuṃ . atha kho āyasmā nāgasamālo bhinnena pattena vipphālitāya saṅghāṭiyā yena bhagavā tenupasaṅkami upasaṅkamitvā bhagavantaṃ abhivādetvā ekamantaṃ nisīdi . ekamantaṃ nisinno kho āyasmā nāgasamālo etadavoca idha mayhaṃ bhante tena panthena gacchantassa antarāmagge corā nikkhamitvā hatthehi ca pādehi ca ākoṭesuṃ pattañca bhindiṃsu saṃghāṭiñca vipphālesunti . atha kho bhagavā etamatthaṃ viditvā tāyaṃ velāyaṃ imaṃ udānaṃ udānesi saddhiṃ caramekato vasaṃ misso aññajanena vedagū viditvā pajahāti pāpakaṃ koñco khīrapakova ninnaganti. Sattamaṃ. [176] 8 Evamme sutaṃ . ekaṃ samayaṃ bhagavā sāvatthiyaṃ viharati pubbārāme migāramātu pāsāde . tena kho pana samayena visākhāya migāramātuyā nattā kālakatā hoti piyā manāpā . Atha kho visākhā migāramātā allavatthā allakesā divādivassa yena bhagavā tenupasaṅkami upasaṅkamitvā bhagavantaṃ abhivādetvā ekamantaṃ nisīdi . ekamantaṃ nisinnaṃ kho visākhaṃ migāramātaraṃ bhagavā Etadavoca handa kuto nu tvaṃ visākhe āgacchasi allavatthā allakesā idhupasaṅkantā divādivassāti . nattā me bhante piyā manāpā kālakatā tenāhaṃ allavatthā allakesā idhupasaṅkantā divādivassāti . iccheyyāsi tvaṃ visākhe yāvatikā sāvatthiyā manussā tāvatike putte ca nattāro cāti . iccheyyāhaṃ bhante bhagavā yāvatikā sāvatthiyā manussā tāvatike putte ca nattāro cāti. {176.1} Kīva bahukā pana visākhe sāvatthiyā manussā devasikaṃ kālaṃ karontīti . dasapi bhante sāvatthiyā manussā devasikaṃ kālaṃ karonti navapi bhante sāvatthiyā manussā devasikaṃ kālaṃ karonti aṭṭhapi bhante sāvatthiyā manussā devasikaṃ kālaṃ karonti sattapi bhante sāvatthiyā manussā devasikaṃ kālaṃ karonti chapi bhante sāvatthiyā manussā devasikaṃ kālaṃ karonti pañcapi bhante sāvatthiyā manussā devasikaṃ kālaṃ karonti cattāropi bhante sāvatthiyā manussā devasikaṃ kālaṃ karonti tayopi bhante sāvatthiyā manussā devasikaṃ kālaṃ karonti dvepi bhante sāvatthiyā manussā devasikaṃ kālaṃ karonti ekopi bhante sāvatthiyā manusso devasikaṃ kālaṃ karoti avivittā bhante sāvatthiyā manussehi kālaṃ karontehīti. {176.2} Taṃ kiṃ maññasi visākhe api nu tvaṃ kadāci karahaci allavatthā vā bhaveyyāsi allakesā vāti . no hetaṃ bhante alaṃ me bhante tāva bahukehi puttehi ca nattārehi cāti. {176.3} Yesaṃ kho visākhe sataṃ piyāni sataṃ tesaṃ dukkhāni yesaṃ navuti piyāni navuti tesaṃ dukkhāni yesaṃ asīti piyāni asīti tesaṃ dukkhāni yesaṃ sattati piyāni sattati tesaṃ dukkhāni yesaṃ saṭṭhī piyāni saṭṭhī tesaṃ dukkhāni yesaṃ paññāsaṃ piyāni paññāsaṃ tesaṃ dukkhāni yesaṃ cattāḷīsaṃ piyāni cattāḷīsaṃ tesaṃ dukkhāni yesaṃ tiṃsaṃ piyāni tiṃsaṃ tesaṃ dukkhāni yesaṃ vīsaṃ piyāni vīsaṃ tesaṃ dukkhāni yesaṃ dasa piyāni dasa tesaṃ dukkhāni yesaṃ nava piyāni nava tesaṃ dukkhāni yesaṃ aṭṭha piyāni aṭṭha tesaṃ dukkhāni yesaṃ satta piyāni satta tesaṃ dukkhāni yesaṃ cha piyāni cha tesaṃ dukkhāni yesaṃ pañca piyāni pañca tesaṃ dukkhāni yesaṃ cattāri piyāni cattāri tesaṃ dukkhāni yesaṃ tīṇi piyāni tīṇi tesaṃ dukkhāni yesaṃ dve piyāni dve tesaṃ dukkhāni yesaṃ ekaṃ piyaṃ ekaṃ tesaṃ dukkhaṃ yesaṃ natthi piyaṃ natthi tesaṃ dukkhaṃ asokā te virajā anupāyāsāti vadāmīti. {176.4} Atha kho bhagavā etamatthaṃ viditvā tāyaṃ velāyaṃ imaṃ udānaṃ udānesi yekeci sokā paridevitā vā dukkhā ca [1]- lokasmiṃ anekarūpā piyaṃ paṭicca bhavanti ete piye asante na bhavanti ete tasmā hi te sukhino vītasokā @Footnote: 1 Po. te. Yesaṃ piyaṃ natthi kuhiñci loke tasmā asokaṃ virajaṃ patthayāno piyaṃ na kayirātha kuhiñci loketi. Aṭṭhamaṃ. [177] 9 Evamme sutaṃ . ekaṃ samayaṃ bhagavā rājagahe viharati veḷuvane kalandakanivāpe . atha kho āyasmā dabbo mallaputto yena bhagavā tenupasaṅkami upasaṅkamitvā bhagavantaṃ abhivādetvā ekamantaṃ nisīdi . ekamantaṃ nisinno kho āyasmā dabbo mallaputto bhagavantaṃ etadavoca parinibbānakālo medāni sugatāti . Yassadāni tvaṃ dabba kālaṃ maññasīti . atha kho āyasmā dabbo mallaputto uṭṭhāyāsanā bhagavantaṃ abhivādetvā padakkhiṇaṃ katvā vehāsaṃ abbhuggantvā ākāse antalikkhe pallaṅkena nisīdi tejodhātuṃ samāpajjitvā vuṭṭhahitvā parinibbāyi. {177.1} Atha kho āyasmato dabbassa mallaputtassa vehāsaṃ abbhuggantvā ākāse antalikkhe pallaṅkena nisīditvā tejodhātuṃ samāpajjitvā vuṭṭhahitvā parinibbutassa sarīrassa jhāyamānassa ḍayhamānassa neva chārikā paññāyati na masi 1- . seyyathāpi nāma sappissa vā telassa vā jhāyamānassa ḍayhamānassa neva chārikā paññāyati na masi evameva āyasmato dabbassa mallaputtassa vehāsaṃ abbhuggantvā ākāse antalikkhe pallaṅkena nisīditvā tejodhātuṃ samāpajjitvā vuṭṭhahitvā parinibbutassa sarīrassa jhāyamānassa ḍayhamānassa neva @Footnote: 1 Po. na passi. Chārikā paññāyittha na masīti . atha kho bhagavā etamatthaṃ viditvā tāyaṃ velāyaṃ imaṃ udānaṃ udānesi abhedi kāyo nirodhi saññā vedanāpītidahaṃsu 1- sabbā vūpasamiṃsu saṅkhārā viññāṇaṃatthamāgamāti. Navamaṃ. [178] 10 Evamme sutaṃ . ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme . tatra kho bhagavā bhikkhū āmantesi bhikkhavoti . bhadanteti te bhikkhū bhagavato paccassosuṃ . Bhagavā etadavoca dabbassa bhikkhave mallaputtassa vehāsaṃ abbhuggantvā ākāse antalikkhe pallaṅkena nisīditvā tejodhātuṃ samāpajjitvā vuṭṭhahitvā parinibbutassa sarīrassa jhāyamānassa ḍayhamānassa neva chārikā paññāyittha na masi seyyathāpi nāma sappissa vā jhāyamānassa ḍayhamānassa neva chārikā paññāyati na masi evameva bhikkhave dabbassa mallaputtassa vehāsaṃ abbhuggantvā ākāse antalikkhe pallaṅkena nisīditvā tejodhātuṃ samāpajjitvā parinibbutassa sarīrassa jhāyamānassa ḍayhamānassa neva chārikā paññāyittha na masīti . atha kho bhagavā etamatthaṃ viditvā tāyaṃ velāyaṃ imaṃ udānaṃ udānesi ayoghanahatasseva jalato jātavedassa 2- anupubbūpasantassa yathā na ñāyate gati @Footnote: 1 vaṇṇanāyaṃ vedanāsītibhaviṃsu . 2 Ma. jātavedaso. Evaṃ sammāvimuttānaṃ kāmabandhoghatārinaṃ paññāpetuṃ gati natthi pattānaṃ acalaṃ sukhanti. Dasamaṃ. Pāṭaligāmiyavaggo aṭṭhamo. Tassuddānaṃ nibbānā caturo vuttā cundo pāṭaligāmiyā dvidhāpatho visākhā ca dabbena ca saha te dasāti. Vaggamidaṃ paṭhamaṃ varabodhi vaggamidaṃ dutiyo muccalindo nandakavaggavaro tatiyo meghiyavaggavaro catuttho pañcamavaggavaranti soṇo chaṭṭhamavaggavaranti jaccandho sattamavaggavaranti ca cūḷo pāṭaligāmiyavaraṭṭhamavaggo. Asītianūnakasuttavaraṃ 1- vaggamidaṭṭhamaṃ suvibhattaṃ dassitaṃ cakkhumatā vimalena saddhā 2- hi taṃ udānantidamāhūti. Udānaṃ samattaṃ. @Footnote: 1 Ma. asītimanūnakasuttavaraṃ . 2 Ma. addhā. Suttantapiṭake khuddakanikāyassa itivuttakaṃ ------- namo tassa bhagavato arahato sammāsambuddhassa. Ekanipātassa paṭhamavaggo [179] /khu.iti./ 1 Vuttaṃ hetaṃ bhagavā vuttamarahatāti me sutaṃ ekadhammaṃ bhikkhave pajahatha ahaṃ vo pāṭibhogo anāgāmitāya katamaṃ ekadhammaṃ lobhaṃ bhikkhave ekadhammaṃ pajahatha ahaṃ vo pāṭibhogo anāgāmitāyāti . etamatthaṃ bhagavā avoca . tatthetaṃ iti vuccati yena lobhena luddhāse sattā gacchanti duggatiṃ taṃ lobhaṃ sammadaññāya pajahanti vipassino pahāya na punāyanti imaṃ lokaṃ kudācananti. Ayampi attho vutto bhagavatā iti me sutanti. Paṭhamaṃ. [180] 2 Vuttaṃ hetaṃ bhagavatā vuttamarahatāti me sutaṃ ekadhammaṃ bhikkhave pajahatha ahaṃ vo pāṭibhogo anāgāmitāya katamaṃ ekadhammaṃ dosaṃ bhikkhave ekadhammaṃ pajahatha ahaṃ vo Pāṭibhogo anāgāmitāyāti . etamatthaṃ bhagavā avoca . Tatthetaṃ iti vuccati yena dosena duṭṭhāse sattā gacchanti duggatiṃ taṃ dosaṃ sammadaññāya pajahanti vipassino pahāya na punāyanti imaṃ lokaṃ kudācananti. Ayampi attho vutto bhagavatā iti me sutanti. Dutiyaṃ.The Pali Tipitaka in Roman Character Volume 25 page 222-230. https://84000.org/tipitaka/read/roman_item.php?book=25&item=175&items=6 Classified by [Item Number] :- http://84000.org/tipitaka/read/roman_item.php?book=25&item=175&items=6&mode=bracket Compare with The Pali Tipitaka in Thai Character :- https://84000.org/tipitaka/read/pali_item.php?book=25&item=175&items=6 Compare with The Royal Version of Thai Tipitaka :- https://84000.org/tipitaka/read/byitem.php?book=25&item=175&items=6 Study Atthakatha :- https://84000.org/tipitaka/attha/attha.php?b=25&i=175 Contents of The Tipitaka Volume 25 https://84000.org/tipitaka/read/?index_25 https://84000.org/tipitaka/english/?index_25
|
บันทึก ๑๔ พฤศจิกายน พ.ศ. ๒๕๖๐. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน. หากพบข้อผิดพลาด กรุณาแจ้งได้ที่ [email protected]