[1] Uddayhate 1- janapado raṭṭhañcāpi vinassati
ehi naḷinike gaccha taṃ me brāhmaṇamānaya.
[2] Nāhaṃ dukkhakkhamā rāja nāhaṃ addhānakovidā
kathaṃ ahaṃ gamissāmi vanaṃ kuñjarasevitaṃ.
[3] |3.1| Phītaṃ janapadaṃ gantvā hatthinā ca rathena ca
dārusaṅghāṭayānena evaṃ gaccha naḷinike.
|3.2| Hatthī assā rathā 2- pattī gacchevādāya khattiye
taveva vaṇṇarūpena vasaṃ tamānayissasi.
[4] |4.1| Kadaliddhajapaññāṇo ābhujiparivārito
eso padissati rammo isisiṅgassa assamo.
|4.2| Eso aggissa saṅkhāto eso dhūmo padissati
maññe no aggiṃ hāpeti isisiṅgo mahiddhiko.
@Footnote: 1 Sī. Yu. uḍḍayhate . 2 Ma. hatthiassarathe.
[5] |5.1| Tañca disvāna āyantiṃ āmuttamaṇikuṇḍalaṃ
isisiṅgo pāvisi bhīto assamaṃ paṇṇachādanaṃ.
|5.2| Assamassa ca sā dvāre geṇḍukenassa kīḷati
vidaṃsayantī aṅgāni guyhaṃ pakāsitāni ca.
|5.3| Tañca disvāna kīḷantiṃ paṇṇasālagato jaṭī
assamā nikkhamitvāna idaṃ vacanamabravi.
[6] Ambho ko nāma so rukkho yassa tevaṃ gataṃ phalaṃ
dūrepi khittaṃ pacceti na taṃ ohāya gacchati.
[7] Assamassa mama brahme samīpe gandhamādane
bahavo 1- tādisā rukkhā yassa tevaṃ gataṃ phalaṃ
dūrepi khittaṃ pacceti na maṃ ohāya gacchati.
[8] Etu bhavaṃ assamimaṃ adetu
pajjañca bhakkhañca paṭiccha dammi
idamāsanaṃ atra bhavaṃ nisīdatu
ito bhavaṃ mūlaphalāni bhuñjatu 2-.
[9] Kinte idaṃ ūrūnamantarasmiṃ
supicchitaṃ kaṇharivappakāsati
akkhāhi me pucchito etamatthaṃ
kose nu te uttamaṅgaṃ paviṭṭhaṃ.
[10] |10.1| Ahaṃ vane mūlaphalesanaṃ caraṃ
@Footnote: 1 Sī. pabbate . 2 Sī. khādatu.
Asādayiṃ acchaṃ sughorarūpaṃ
so maṃ patitvā sahasajjhappatto
panujja maṃ abbuhi uttamaṅgaṃ.
|10.2| Svāyaṃ vaṇo khajjati kaṇḍuvāyati
sabbañca kālaṃ na labhāmi sātaṃ
paho bhavaṃ kaṇḍumimaṃ vinetuṃ
kurutaṃ bhavaṃ yācito brāhmaṇatthaṃ.
[11] Gambhīrarūpo te vaṇo salohito
apūtiko pannagandho 1- mahā ca
karomi te kiñci kasāyayogaṃ
yathā bhavaṃ paramasukhī bhaveyya.
[12] Na mantayogā na kasāyayogā
na osadhā brahmacāri kamanti
ghaṭṭe mudukena aṅgena 2- vinehi kaṇḍuṃ 3-
yathā ahaṃ paramasukhī bhaveyyaṃ.
[13] Ito nu bhoto katamena assamo
kacci bhavaṃ abhiramasi araññe
kacci nu te mūlaphalaṃ pahūtaṃ
kacci bhavantaṃ na vihiṃsanti vāḷā.
@Footnote: 1 Sī. pakkagandho. Ma. vaṇagandho . 2 Sī. yaṃ te mudu tena . 3 Yu. kaṇḍūkaṃ.
[14] |14.1| Ito ujuṃ uttarāyaṃ disāyaṃ
khemā nadī himavantā pabhāti
tassā tīre assamo mayha rammo
aho bhavaṃ assamaṃ mayha passe.
|14.2| Ambā ca sālā tilakā 1- ca jambuyo
uddālakā pāṭaliyo ca phullā
samantato kiṃpurisābhigītaṃ
aho bhavaṃ assamaṃ mayha passe.
|14.3| Tālā ca mūlā ca phalā ca mettha
vaṇṇena gandhena upetarūpaṃ
taṃ bhūmibhāgehi upetarūpaṃ
aho bhavaṃ assamaṃ mayha passe.
|14.4| Phalā ca mūlā ca pahūtamettha
vaṇṇena gandhena rasenupetā
āyanti ca luddakā taṃ padesaṃ
mā me tato mūlaphalaṃ ahāsuṃ.
[15] Pitā mama mūlaphalesanaṃ gato
idāni āgacchati sāyakāle
ubhova gacchāmase assamantaṃ
@Footnote: 1 tiṇḍukātipi.
Yāva pitā mūlaphalato etu.
[16] Aññe bahū isayo sādhurūpā
rājīsayo anumagge vasanti
teyeva pucchesi mamassamantaṃ
te taṃ nayissanti mamaṃ sakāse.
[17] |17.1| Na te kaṭṭhāni bhinnāni na te udakamābhataṃ
aggipi te na hāpito kinnu mandova jhāyasi.
|17.2| Bhinnāni kaṭṭhāni huto ca aggi
tapanīpi te samitā brahmacārī
pīṭhañca mayhaṃ udakañca hoti
ramasi tuvaṃ brahmabhūto puratthā.
|17.3| Abhinnakaṭṭhosi anābhatodako
ahāsitaggīsi asiddhabhojano
na me tuvaṃ ālapasi mamajja
naṭṭhaṃ nu kiṃ cetasikañca dukkhaṃ.
[18] |18.1| Idhāgamā jaṭilo brahmacārī
sudassaneyyo sutanū vineti
nevātidīgho na panātirasso
sukaṇhakaṇhacchadanehi bhoto.
|18.2| Amassujāto apurāṇavaṇṇī
ādhārarūpañca panassa kaṇṭhe
dve yamā 1- gaṇḍā ure sujātā 2-
suvaṇṇatiṇḍusannibhā 3- pabhassarā.
|18.3| Mukhañca tassa bhusadassaneyyaṃ
kaṇṇesu lambanti ca kuñcitaggā
te jotare carato māṇavassa
suttañca yaṃ saṃyamānaṃ jaṭānaṃ
|18.4| aññā ca tassa saṃyamāni catasso
nīlā pītā lohitakā ca setā
tā saṃsare carato māṇavassa
tiriṭisaṅghāriva pāvusamhi.
|18.5| Na mekhalaṃ muñjamayaṃ dhāreti
na santhare no pana pabbajassa
tā jotare jaṅghanantare 4- vilaggā
sateritā 5- vijjurivantalikkhe.
|18.6| Akhilakāni ca avaṇṭakāni
heṭṭhā nabhyā kaṭisamohitāni
aghaṭṭitā niccakīḷaṃ karonti
hantāta kiṃ rukkhaphalāni tāni.
@Footnote: 1 Sī. dvepassa. Yu. dvāssa. 2 Ma. uresu jātā . 3 Ma. suvaṇṇatindukanibhā.
@Yu. sovaṇṇapiṇḍūpanibhā . 4 Ma. jaghanantare . 5 Ma. sateratā.
|18.7| Jaṭā ca tassa bhusadassaneyyā
parosataṃ vellitaggā sugandhā
dvedhāsiro sādhuvibhattarūpo
aho nukho mayha tathā jaṭāssu.
|18.8| Yadā ca so pakirati tā jaṭāyo
vaṇṇena gandhena upetarūpā
nīluppalaṃ vātasameritaṃva
tatheva saṃvāyati 1- panassamo ayaṃ.
|18.9| Paṅko ca tassa bhusadassaneyyo
netādiso yādiso mayha kāyo 2-
so vāyati erito mālutena
vanaṃ yathā aggagimhe suphullaṃ.
|18.10| Nihanti so rukkhaphalaṃ paṭhabyā
sucittarūpaṃ ruciraṃ dassaneyyaṃ
khittañca tassa punareti hatthaṃ
hantāta kiṃ rukkhaphalaṃ nukho taṃ.
|18.11| Dantā ca tassa bhusadassaneyyā
suddhā samā saṅkhavarūpapannā
mano pasādenti vivariyamānā
na hi 3- nūna so sākamakhādi tehi.
@Footnote: 1 Ma. saṃvāti . 2 Ma. mayhaṃ kāye . 3 Sī. Yu. sabbattha na ha....
|18.12| Akakkasaṃ aggaḷitaṃ muhuṃ muduṃ
ujuṃ anuddhataṃ acapalamassa bhāsitaṃ
rudaṃ manuññaṃ karavīkasussaraṃ
hadayaṅgamaṃ rañjayateva me mano.
|18.13| Bindussaro nātivissaṭṭhavākyo 1-
na nūna sajjhāyamatippayutto
icchāmi kho 2- taṃ punadeva daṭṭhuṃ
mittañhi 3- me māṇavāhu 4- puratthā.
|18.14| Susandhi sabbattha vimaṭṭhimaṃ vaṇaṃ
puthu sujātaṃ kharapattasannibhaṃ
teneva maṃ uttariyāna māṇavo
vivariya ūraṃ jaghanena pīḷayi.
|18.15| Tapanti ābhanti virocare ca
sateritā 5- vijjurivantalikkhe
bāhā mudū añjanalomasadisā
vicitravaṭṭaṅgulikassa sobhare.
|18.16| Akakkasaṅgo na ca dīghalomo
nakhassa dīghā api lohitaggā
mudūhi bāhāhi palissajanto
kalyāṇarūpo ramayaṃ upaṭṭhahi.
@Footnote: 1 Ma. nātivisaḷavākyo . 2 Ma. bho . 3 Ma. mitto hi . 4 Ma. māṇavohu.
@5 Ma. sateratā.
|18.17| Dumassa tūlūpanibhā pabhassarā
suvaṇṇakambūtalavaṭṭasucchavī
hatthā mudū tehi maṃ saṃphusitvā
ito gato tena maṃ dahanti tāta.
|18.18| Na nūna so khārividhaṃ ahāsi
na nūna so kaṭṭhāni sayaṃ abhañji
na nūna so hanti dume kuṭhāriyā
napissa hatthesu khilāni atthi.
|18.19| Acchova kho tassa vaṇaṃ akāsi
so maṃ bravī sukhitaṃ maṃ karohi
tāhaṃ kariṃ tena mamāpi 1- sokhyaṃ
so ca bravī sukhitosmīti brahme.
|18.20| Ayañca te māluvapaṇṇasanthatā
vikiṇṇarūpāva mayā ca tena ca
kilantarūpā udake ramitvā
punappunaṃ paṇṇakuṭiṃ vajāma.
|18.21| Na majja mantā paṭibhanti tāta
na aggihuttaṃ napi yañña tatra 2-
na cāpi te mūlaphalāni bhuñje
@Footnote: 1 Ma. mamāsi . 2 Sī. yaññatantraṃ. Ma. yaññatantaṃ.
Yāva na passāmi taṃ brahmacāriṃ.
|18.22| Addhā pajānāsi tuvaṃpi tāta
yassaṃ disāyaṃ 1- vasate brahmacārī
taṃ maṃ disaṃ pāpaya tāta khippaṃ
mā te ahaṃ amarimassamamhi.
|18.23| Vicitraphullañhi 2- vanaṃ sutaṃ mayā
dijābhighuṭṭhaṃ dijasaṅghasevitaṃ
taṃ maṃ vanaṃ pāpaya tāta khippaṃ
purā te pāṇaṃ vijahāmi assame.
[19] |19.1| Imasmāhaṃ jotirase vanamhi
gandhabbadevaccharasaṅghasevite
isīnamāvāse sanantanamhi
netādisaṃ aratiṃ pāpuṇetha.
|19.2| Bhavanti mittāni atho na honti
ñātīsu mittesu karonti pemaṃ
ayañca jammo kissa divā 3- niviṭṭho
yo neva jānāti kutomhi āgato.
|19.3| Saṃvāsena hi mittāni sandhiyanti punappunaṃ
sveva mitto 4- asaṅgantu asaṃvāsena jīrati.
@Footnote: 1 Ma. disaṃ. 2 Sī.Yu. vicitarapupphaṃ . 3 Sī. rivā. Ma. vā . 4 Yu. sā ca metti.
|19.4| Sace tuvaṃ dakkhasi brahmacāriṃ
sace tuvaṃ sallape 1- brahmacārinā
sampannasassaṃva mahodakena
tapoguṇaṃ khippamimaṃ pahassasi.
|19.5| Punapi ce dakkhasi brahmacāriṃ
punapi ce sallape 2- brahmacārinā
sampannasassaṃva mahodakena
usmāgataṃ khippamimaṃ pahassasi.
|19.6| Bhūtāni hetāni caranti tāta
virūparūpena manussaloke
na tāni sevetha naro sapañño
āsajjanaṃ 3- nassati brahmacārīti.
Naḷinikājātakaṃ paṭhamaṃ.
--------------
Ummādantījātakaṃ
[20] |20.1| Nivesanaṃ kassa nudaṃ sunanda
pākārena paṇḍumayena guttaṃ
kā dissati aggisikhāva dūre
vehāyasaṃ 4- pabbataggeva acci.
@Footnote: 1-2 Yu. sallapi . 3 Ma. āsajja naṃ . 4 Sī. Yu. vehāsayaṃ.
|20.2| Dhītā nvāyaṃ kassa sunanda hoti
suṇisā nvāyaṃ kassa athopi bhariyā
akkhāhi me khippamidheva puṭṭho
avāvatā yadi vā atthi bhattā.
[21] |21.1| Ahaṃ hi jānāmi janinda etaṃ
matyā ca petyā ca athopi assā
taveva so puriso bhūmipāla
rattindivaṃ appamatto tavatthe.
|21.2| Iddho ca phīto ca suvaḍḍhito ca
amacco ca te aññataro janinda
tadseva sā bhariyā abhipārakassa
ummādantīti nāmadheyyena rāja.
[22] Ambho ambho nāmamidaṃ imissā
matyā ca petyā ca kataṃ susādhu
tathāhi mayhaṃ avalokayantī
ummattakaṃ ummādantī akāsi.
[23] |23.1| Yā puṇṇamāse migamandalocanā
upāvisī puṇḍarīkattacaṅgī
dve puṇṇamāyo tadahū amaññiṃ
disvāna pārāvaṭarattavāsiniṃ.
|23.2| Aḷārapamhehi subhehi vaggubhi
palobhayantī maṃ yadā udikkhati
vijamhamānā 1- harateva me mano
jātā vane kiṃpurisīva pabbate.
|23.3| Tadā hi brahatī sāmā āmuttamaṇikuṇḍalā
ekaccavasanā nārī migī bhantāvudikkhati.
|23.4| Kadāssu maṃ tambanakhā sulomā
bāhāmudū candanasāralittā
vaṭṭaṅgulī sannatadhīrakuttiyā
nārī upaññissati sīsato subhā.
|23.5| Kadāssu maṃ kāñcanajāluracchadā
dhītā tirīṭissa vilākamajjhā 2-
mudūhi bāhāhi palissajissati
brahāvane jātadumaṃva māluvā.
|23.6| Kadāssu maṃ 3- lākhārasarattasucchavī
bindutthanī puṇḍarīkattacaṅgī
mukhaṃ mukhena upanāmayissati
soṇḍova soṇḍassa surāya thālaṃ.
|23.7| Yadāddasaṃ taṃ tiṭṭhantiṃ sabbagattaṃ 4- manoramaṃ
@Footnote: 1 Ma. vijmbhamānā. 2 Ma. vilaggamajjhā . 3 Ma. ayaṃ pāṭho natthi . 4 Ma. sabbabhaddaṃ.
Tato sakassa cittassa nāvabodhāmi kañci naṃ.
|23.8| Ummādantī mayā diṭṭhā 1- āmuttamaṇikuṇḍalā
na suppāmi divārattiṃ sahassaṃva parājito.
|23.9| Sakko ce 2- me varaṃ dajjā so ca labbhetha me varo
ekarattaṃ dvirattaṃ vā bhaveyya 3- abhipārako
ummādantyā ramitvāna sīvirājā tato siyā 4-.
[24] Bhūtāni me bhūtapatī namassato
āgamma yakkho idametadabravi
rañño mano ummādantyā niviṭṭho
dadāmi te taṃ paricārayassu.
[25] Puññā ca dhaṃse 5- amaro na camhi
jano ca me pāpamidañca jaññā
bhuso ca tyassa manaso vighāto
datvā piyaṃ ummādantiṃ adiṭṭhā 6-.
[26] Janinda nāññatra tayā mayā vā
sabbāpi kammassa katassa jaññā
yante mayā ummādantī padinnā
bhusehi rājā vanathaṃ sajāhi.
[27] |27.1| Yo pāpakaṃ kamma karaṃ manusso
@Footnote: 1 Ma. ummādantimahaṃ diṭṭhā . 2 Sī. Yu. ca . 3 Ma. bhaveyyaṃ . 4 Ma. siyaṃ.
@5 Ma. Yu. puññā vidhaṃse. 6 Ma. adaṭṭhā. ito paraṃ īdisameva.
So maññati māyidaṃ 1- maññiṃsu aññe
passanti bhūtāni karontametaṃ
yuttā ca ye honti narā paṭhabyā.
|27.2| Añño nu te koci naro paṭhabyā
saddheyya 2- lokasmi na me piyāti
bhuso ca tyassa manaso vighāto
datvā piyaṃ ummādantiṃ adiṭṭhā.
[28] Addhā piyā mayha janinda esā
na sā mamaṃ appiyā bhūmipāla
gaccheva tvaṃ ummādantiṃ bhaddante 3-
sīhova selassa guhaṃ upeti.
[29] Na pīḷitā attadukkhena dhīrā
sukhapphalaṃ kamma pariccajanti
sammohitā vāpi sukhena mattā
na pāpakammañca samācaranti.
[30] Tuvañhi mātā ca pitā ca mayhaṃ
bhattā patī posako devatā ca
dāso ahaṃ tuyha saputtadāro
yathāsukhaṃ sīvi 4- karohi kāmaṃ.
[31] Yo issaromhīti karoti pāpaṃ
@Footnote: 1 Ma. māyida . 2 Sī. Ma. saddaheyya. ito paraṃ īdisameva . 3 Ma. bhadante.
@4 Ma. sāmi.
Katvā ca so nuttapate 1- paresaṃ
na tena so jīvati dīghamāyuṃ 2-
devāpi pāpena samekkhare naṃ.
[32] Aññātakaṃ sāmikehi padinnaṃ
dhamme ṭhitā ye paṭicchanti dānaṃ
paṭicchakā dāyakā cāpi tattha
sukhapphalaññeva karonti kammaṃ.
[33] Añño nu te koci naro paṭhabyā
saddheyya lokasmi na me piyāti
bhuso ca tyassa manaso vighāto
datvā piyaṃ ummādantiṃ adiṭṭhā.
[34] Addhā piyā mayha janinda esā
na sā mamaṃ appiyā bhūmipāla
yante mayā ummādantī padinnā
bhusehi rājā vanathaṃ sajāhi.
[35] Yo attadukkhena parassa dukkhaṃ
sukhena vā attasukhaṃ dahati 3-
yathevidaṃ mayha tathā paresaṃ
yo evaṃ pajānāti sa vedi dhammaṃ.
[36] Añño nu te koci paro paṭhabyā
@Footnote: 1 nuttasatetipi . 2 Ma. dīghamāyu . 3 Ma. dahāti.
Saddheyya lokasmi na me piyāti
bhuso ca tyassa manaso vighāto
datvā piyaṃ ummādantiṃ adiṭṭhā.
[37] Janinda jānāsi piyā mamesā
na sā mamaṃ appiyā bhūmipāla
piyena te dammi piyaṃ janinda
piyadāyino deva piyaṃ labhanti.
[38] So nūnāhaṃ vadhissāmi attānaṃ kāmahetukaṃ
na hi dhammaṃ adhammena ahaṃ vadhitumussahe.
[39] Sace tuvaṃ mayha satiṃ janinda
na kāmayāsi naravīra seṭṭha
cajāmi naṃ sabbajanassa majjhe 1-
mayā pamuttaṃ tato avhayesi naṃ.
[40] Adūsiyañce abhipāraka tuvaṃ
cajāsi katte ahitāya tyassa
mahā ca te upavādopi assa
na cāpi tyassa nagaramhi pakkho.
[41] |41.1| Ahaṃ sahissaṃ upavādametaṃ
nindaṃ pasaṃsaṃ garahañca sabbaṃ
mametamāgacchatu bhūmipāla
@Footnote: 1 Yu. sibbayā.
Yathāsukhaṃ sīvi 1- karohi kāmaṃ.
|41.2| Yo neva nindaṃ na punappasaṃsaṃ 2-
ādiyati garahaṃ nopi pūjaṃ
sirī ca lakkhī ca apeti tamhā
āpo suvuṭṭhīva yathā thalamhā.
|41.3| Yaṅkiñci dukkhañca sukhañca etto
dhammātisārañca manovighātaṃ
urasā ahaṃ paṭicchissāmi 3- sabbaṃ
paṭhavī yathā thāvarānaṃ tasānaṃ.
[42] Dhammātisārañca manovighātaṃ
dukkhañca nicchāmi ahaṃ paresaṃ
ekopimaṃ tārayissāmi 4- bhāraṃ
dhamme ṭhito kiñci ahāpayanto.
[43] Saggūpagaṃ puññakammaṃ janinda
mā me tuvaṃ antarāyaṃ akāsi
dadāmi te ummādantiṃ pasanno
rājāva yaññe dhanaṃ brāhmaṇānaṃ.
[44] Addhā tuvaṃ katte hitosi mayhaṃ
sakhā mamaṃ ummādantī tuvañca
nindeyyu devā pitaro ca sabbe
@Footnote: 1 Yu. sibba . 2 Ma. panappasaṃsaṃ . 3 Ma. paccuttarissāmi. Yu. paccupadissāmi.
@4 Ma. hārayissāmi.
Pāpañca passaṃ abhisamparāyaṃ.
[45] Na hetaṃ dhammaṃ 1- sīvirāja vajjuṃ
sanegamā jānapadā ca sabbe
yante mayā ummādantī padinnā
bhusehi rājā vanathaṃ sajāhi.
[46] Addhā tuvaṃ katte hitosi mayhaṃ
sakhā mamaṃ ummādantī tuvañca
satañca dhammāni sukittitāni
samuddavelāva duraccayāni.
[47] Āhuneyyo mesi hitānukampī
dhātā vidhātā casi kāmapālo
tayī hutā rāja mahapphalā hi 2-
kāmena me ummādantiṃ paṭiccha.
[48] Addhā hi sabbaṃ abhipāraka tuvaṃ
dhammaṃ acārī mama kattuputta
añño nu te ko idha sotthikattā
dvipado naro aruṇe jīvaloke.
[49] Tvaṃ nu seṭṭho tvamanuttarosi
tvaṃ dhammagū dhammavidū sumedho
so dhammagutto cirameva jīva
@Footnote: 1 Ma. na hetadhammaṃ . 2 Yu. mahapphalā hi me.
Dhammañca me desaya dhammapāla.
[50] |50.1| Tadiṅgha abhipāraka suṇohi vacanaṃ mama
dhammante desayissāmi sataṃ āsevitaṃ ahaṃ.
|50.2| Sādhu dhammarucī rājā sādhu paññāṇavā naro
sādhu mittānamaddubbho pāpassākaraṇaṃ sukhaṃ.
|50.3| Akkodhanassa vijite ṭhitadhammassa rājino
sukhaṃ manussā āsetha sītacchāyāya saṅghare.
|50.4| Na cāhametaṃ abhirocayāmi
kammaṃ asamekkhakataṃ asādhu
yevāpi ñatvāna sayaṃ karonti
upamā imā mayha tuvaṃ suṇohi.
|50.5| Gavañce taramānānaṃ jimhaṃ gacchati puṅgavo
sabbā tā jimhaṃ gacchanti nette jimhaṃ gate sati.
|50.6| Evameva manussesu yo hoti seṭṭhasammato
so ce adhammaṃ carati pageva itarā pajā
sabbaṃ raṭṭhaṃ dukkhaṃ seti rājā ce hoti adhammiko.
|50.7| Gavañce taramānānaṃ ujuṃ gacchati puṅgavo
sabbā tā ujuṃ gacchanti nette ujuṃ gate sati.
|50.8| Evameva manussesu yo hoti seṭṭhasammato
so cepi 1- dhammaṃ carati pageva itarā pajā
@Footnote: 1 Ma. sace.
Sabbaṃ raṭṭhaṃ sukhaṃ seti rājā ce hoti dhammiko.
|50.9| Na cāpāhaṃ adhammena amarattamabhipatthaye
imaṃ vā paṭhaviṃ sabbaṃ vijetuṃ abhipāraka.
|50.10| Yañhi kiñci manussesu ratanaṃ idha vijjati
gāvo dāso hiraññañca vatthiyaṃ haricandanaṃ.
|50.11| Assitthiyo ca ratanaṃ maṇikañca
yañcāpime candasuriyā abhipālayanti
na tassa hetu visamaṃ careyya
majjhe sivīnaṃ usabhosmi jāto.
|50.12| Netā hitā 1- uggato raṭṭhapālo
dhammaṃ sivīnaṃ apacāyamāno
so dhammamevānuvicintayanto
tasmā sake cittavase na vatto.
[51] |51.1| Addhā tuvaṃ mahārāja niccaṃ abyasanaṃ sivaṃ
karissasi ciraṃ rajjaṃ paññā hi tava tādisī.
|51.2| Etante anumodāma yaṃ dhammaṃ nappamajjasi
dhammaṃ pamajja khattiyo raṭṭhā 2- cavati issaro.
|51.3| Dhammañcara 3- mahārāja mātāpitūsu khattiya
idha dhammaṃ caritvāna rāja saggaṃ gamissasi.
|51.4| Dhammañcara mahārāja puttadāresu khattiya
@Footnote: 1 Yu. pitā . 2 Sī. ṭhānā . 3 Ma. sabbattha dhammaṃ care....
Idha dhammaṃ caritvāna rāja saggaṃ gamissasi.
|51.5| Dhammañcara mahārāja mittāmaccesu khattiya
idha dhammaṃ caritvāna rāja saggaṃ gamissasi.
|51.6| Dhammañcara mahārāja vāhanesu balesu ca
idha dhammaṃ caritvāna rāja saggaṃ gamissasi.
|51.7| Dhammañcara mahārāja gāmesu nigamesu ca
idha dhammaṃ caritvāna rāja saggaṃ gamissasi.
|51.8| Dhammañcara mahārāja raṭṭhesu janapadesu ca
idha dhammaṃ caritvāna rāja saggaṃ gamissasi.
|51.9| Dhammañcara mahārāja samaṇe brāhmaṇesu ca
idha dhammaṃ caritvāna rāja saggaṃ gamissasi.
|51.10| Dhammañcara mahārāja migapakkhīsu khattiya
idha dhammaṃ caritvāna rāja saggaṃ gamissasi.
|51.11| Dhammañcara mahārāja dhammo ciṇṇo sukhāvaho
idha dhammaṃ caritvāna rāja saggaṃ gamissasi.
|51.12| Dhammañcara mahārāja indā devā sabrahmakā
suciṇṇena divaṃ pattā mā dhammaṃ rāja pāmadoti.
Ummādantījātakaṃ dutiyaṃ.
---------
3 Mahābodhijātakaṃ
[52] Kinnu daṇḍaṃ kimājinaṃ kiṃ chattaṃ kiṃ upāhanaṃ
kiṃ aṅkusañca pattañca saṅghāṭiñcāpi brāhmaṇa
taramānarūpo gaṇhāsi kinnu patthayase disaṃ.
[53] |53.1| Dvādasetāni vassāni vasitāni tavantike
nābhijānāmi soṇena piṅgalenābhikūjitaṃ.
|53.2| Svāyaṃ dittova nadati sukkadāṭhaṃ vidaṃsayaṃ
tava sutvā sabhariyassa vītasaddhassa maṃ pati.
[54] Ahu esa kato doso yathā bhāsasi brāhmaṇa
esa bhiyyo pasīdāmi vasa brāhmaṇa mā gamā.
[55] |55.1| Sabbaseto pure āsi tatopi sabalo ahu
sabbalohitakodāni kālo pakkamituṃ mama.
|55.2| Abbhantaraṃ pure āsi tato majjhe tato bahi
purā niddhamanā hoti sayameva vajāmahaṃ.
|55.3| Vītasaddhaṃ na seveyya udapānaṃvanodakaṃ
sacepi naṃ anukhaṇe vārikaddamagandhikaṃ.
|55.4| Pasannameva seveyya appasannaṃ vivajjaye
pasannaṃ payirupāseyya rahadaṃvudakatthiko.
|55.5| Bhaje bhajantaṃ purisaṃ abhajantaṃ na bhajjaye
asappurisadhammo so yo bhajantaṃ na bhajjati.
|55.6| Yo bhajantaṃ na bhajati sevamānaṃ na sevati
save manussapāpiṭṭho migo sākhassito yathā.
|55.7| Accābhikkhaṇasaṃsaggā asamo saraṇena ca
etena mittā jīranti akāle yācanāya ca.
|55.8| Tasmā nābhikkhaṇaṃ gacche na ca gacche cirāciraṃ
kālena yācaṃ yāceyya evaṃ mittā na jirare 1-.
|55.9| Aticiraṃ nivāsena piyo bhavati appiyo
āmanta kho taṃ gacchāma purā te homa appiyā.
[56] Evaṃ ce yācamānānaṃ añjaliṃ nāvabujjhasi
paricārikānaṃ sattānaṃ 2- vacanaṃ na karosi no
evantaṃ abhiyācāma puna kayirāsi pariyāyaṃ.
[57] Evañce no viharataṃ antarāyo na hessati
tuyha vāpi 3- mahārāja mayha vā 4- raṭṭhavaḍḍhana
appeva nāma passema ahorattānamaccaye.
[58] |58.1| Udīraṇā ce saṅgatyā bhāvāyamanuvattati.
Akāmā akaraṇīyaṃ vā karaṇīyaṃ vāpi krubbati 5-
akāmakaraṇīyasmiṃ kavidha pāpena limpati 6-.
|58.2| So ce attho ca dhammo ca kalyāṇo na ca pāpako
bhoto ce vacanaṃ saccaṃ suhato vānaro mayā.
|58.3| Attano ce hi vādassa aparādhaṃ vijāniya 7-
@Footnote: 1 Ma. jīyare . 2 Ma. paricārakānaṃ sataṃ . 3 Sī. tumhañcāpi. Yu. tuyhañcāpi.
@4 Sī. amhaṃ vā. Yu. mayhañca . 5 Ma. kubbati . 6 Ma. lippati. ito paraṃ
@īdisameva. 7 Ma. vijāniyā.
Na maṃ tvaṃ garaheyyāsi bhoto vādo hi tādiso.
[59] |59.1| Issaro sabbalokassa sace kappeti jīvitaṃ
iddhiṃ byasanabhāvañca kammaṃ kalyāṇapāpakaṃ
niddesakārī puriso issaro tena limpati.
|59.2| So ce attho ca dhammo ca kalyāṇo na ca pāpako
bhoto ce vacanaṃ saccaṃ suhato vānaro mayā.
Attano ce hi vādassa aparādhaṃ vijāniya 1-
na maṃ tvaṃ garaheyyāsi bhoto vādo hi tādiso.
[60] |60.1| Sace pubbekatahetu sukhadukkhaṃ nigacchati
porāṇakaṃ kataṃ pāpaṃ tameso muñcate iṇaṃ
porāṇakaiṇamokkho kvidha pāpena limpati.
|60.2| So ce attho ca dhammo ca kalyāṇo na ca pāpako
bhoto ce vacanaṃ saccaṃ suhato vānaro mayā.
|60.3| Attano ce hi vādassa aparādhaṃ vijāniya
na maṃ tvaṃ garaheyyāsi bhoto vādo hi tādiso.
[61] |61.1| Catunnaṃyevupādāya rūpaṃ sambhoti pāṇinaṃ
yato ca rūpaṃ sambhoti tatthevānupagacchati.
|61.2| Idheva jīvati jīvo pecca pecca vinassati
ucchijjati ayaṃ loko ye bālā ye ca paṇḍitā
ucchijjamāne lokasmiṃ kvidha pāpena limpati.
@Footnote: 1 Ma. vijāniyā. ito paraṃ īdisameva.
|61.3| So ce attho ca dhammo ca kalyāṇo na ca pāpako
bhoto ce vacanaṃ saccaṃ suhato vānaro mayā.
|61.4| Attano ce hi vādassa aparādhaṃ vijāniya
na maṃ tvaṃ garaheyyāsi bhoto vādo hi tādiso.
[62] Āhu khattavidhā 1- loke bālā paṇḍitamānino
mātaraṃ pitaraṃ haññe atho jeṭṭhaṃpi bhātaraṃ
haneyya puttadāre ca attho ce tādiso siyā.
[63] |63.1| Yassa rukkhassa chāyāya nisīdeyya sayeyya vā
na tassa sākhaṃ bhañjeyya mittadubbho 2- hi pāpako.
|63.2| Atha atthe samuppanne samūlamapi abbhuhe
attho me sambalenāpi suhato vānaro mayā.
|63.3| So ce attho ca dhammo ca kalyāṇo na ca pāpako
bhoto ce vacanaṃ saccaṃ suhato vānaro mayā.
|63.4| Attano ce hi vādassa aparādhaṃ vijāniya
na maṃ tvaṃ garaheyyāsi bhoto vādo hi tādiso.
[64] |64.1| Ahetuvādo puriso yo ca issarakuttiko
pubbekatī ca ucchedī yo ca khattavidho 3- naro.
|64.2| Ete asappurisā loke bālā paṇḍitamānino
kareyya tādiso pāpaṃ atho aññampi kāraye
@Footnote: 1 Ma. khattavidā . 2 Yu. mittadūbhī . 3 Ma. khattavido.
Asappurisasaṃsaggo dukkhanto 1- kaṭukudrayo.
[65] |65.1| Urabbharūpena bakāsu 2- pubbe
asaṅkito ajayūthaṃ upeti
hantvā uraṇiṃ ajiyaṃ 3- ajañca
hantvā sayitvā 4- yenakāmaṃ paleti.
|65.2| Tathāvidheke samaṇabrāhmaṇāse
chadanaṃ katvā vañcayanti manusse
anāsakā thaṇḍilaseyyakā ca
rajojallaṃ ukkuṭikappadhānaṃ
pariyāyabhattañca apānakattā
pāpācārā arahanto vadānā.
|65.3| Ete asappurisā loke bālā paṇḍitamānino
kareyya tādiso pāpaṃ atho aññampi kāraye
asappurisasaṃsaggo dukkhanto kaṭukudrayo.
|65.4| Yamāhu natthi vīriyanti hetuñca apavadanti 5- ye
parakāraṃ attakārañca ye tucchaṃ samavaṇṇayuṃ.
|65.5| Ete asappurisā loke bālā paṇḍitamānino
kareyya tādiso pāpaṃ atho aññampi kāraye
asappurisasaṃsaggo dukkhanto kaṭukudrayo.
|65.6| Sace hi vīriyaṃ nāssa kammaṃ kalyāṇapāpakaṃ
@Footnote: 1 Sī. dukkaṭo. ito paraṃ īdisameva . 2 Ma. vakassu. Yu. vakāsu . 3 Ma.
@ajikaṃ . 4 Ma. utrāsayitvā . 5 Ma. ahetuñca pavadanti.
Na bhare vaḍḍhakiṃ rājā napi yantāni kāraye.
|65.7| Yasmā ca vīriyaṃ atthi kammaṃ kalyāṇapāpakaṃ
tasmā yantāni kāreti rājā bharati vaḍḍhakiṃ.
|65.8| Yadi vassasataṃ devo na vasse na himaṃ pate
ucchijjeyya ayaṃ loko vinasseyya ayaṃ pajā.
|65.9| Yasmā ca vassatī devo himañcānuphusīyati 1-
tasmā sassāni paccanti raṭṭhañca pālayate ciraṃ.
|65.10| Gavañce taramānānaṃ jimhaṃ gacchati puṅgavo
sabbā tā jimhaṃ gacchanti nette jimhaṃ gate sati.
|65.11| Evameva manussesu yo hoti seṭṭhasammato
so ce adhammaṃ carati pageva itarā pajā
sabbaṃ raṭṭhaṃ dukkhaṃ seti rājā ce hoti adhammiko.
|65.12| Gavañce taramānānaṃ ujuṃ gacchati puṅgavo
sabbā tā 2- ujuṃ gacchanti 3- nette ujuṃ gate sati.
|65.13| Evameva manussesu yo hoti seṭṭhasammato
so cepi dhammaṃ carati pageva itarā pajā
sabbaṃ raṭṭhaṃ sukhaṃ seti rājā ce hoti dhammiko.
|65.14| Mahārukkhassa phalino āmaṃ chindati yo phalaṃ
rasañcassa na jānāti bījañcassa vinassati.
@Footnote: 1 Ma. himañcānuphusāyati . 2 Ma. gāvī . 3 Ma. yanti.
|65.15| Mahārukkhūpamaṃ raṭṭhaṃ adhammena yo pasāsati
rasañcassa na jānāti raṭṭhañcassa vinassati.
|65.16| Mahārukkhassa phalino pakkaṃ chindati yo phalaṃ
rasañcassa vijānāti bījañcassa na nassati.
|65.17| Mahārukkhūpamaṃ raṭṭhaṃ dhammena yo pasāsati
rasañcassa vijānāti raṭṭhañcassa na nassati.
|65.18| Yo ca rājā janapadaṃ adhammena pasāsati
sabbosadhībhi so rājā viruddho hoti khattiyo.
|65.19| Tatheva negame hiṃsaṃ ye yuttā kayavikkaye
ojadānabalīkāre sa kosena virujjhati.
|65.20| Pahāravarakhettaññū saṅgāme katanissame
ussite hiṃsayaṃ rājā sa balena virujjhati.
|65.21| Tatheva isayo hiṃsaṃ saṃyame brahmacāriye 1-
adhammacārī khattiyo so saggena virujjhati.
|65.22| Yo ca rājā adhammaṭṭho bhariyaṃ hanti adūsakaṃ 2-
luddaṃ pasavate ṭhānaṃ 3- puttehi ca virujjhati
|65.23| dhammaṃ care jānapade negamesu 4- balesu ca
isayo ca na hiṃseyya puttadāre samañcare.
|65.24| Sa tādiso bhūmipati raṭṭhapālo akodhano
@Footnote: 1 Sī. brahmacārino. Ma. saññate brahmacāriyo . 2 Ma. adūsikaṃ . 3 Sī. pāpaṃ.
@4 Sī. nigamesu.
Sāmante 1- sampakampeti indova asurādhipoti.
Mahābodhijātakaṃ tatiyaṃ.
-----------
Tassuddānaṃ.
Saniḷīnikamavhayano paṭhamo
dutiyo pana saummadantīvaro
tatiyo pana bodhisirīvhayano
kathitā pana tīṇi jinena subhā.
Paññāsanipātaṃ niṭṭhitaṃ.
--------
@Footnote: 1 Ma. sapatte.
Saṭṭhinipātaṃ
1 soṇakajātakaṃ
[66] |66.1| Kassa sutvā sataṃ dammi sahassaṃ diṭṭhasoṇakaṃ 1-
ko me soṇakamakkhāti sahāyaṃ paṃsukīḷitaṃ.
|66.2| Atha bravi māṇavako daharo pañcacūḷako
mayhaṃ sutvā sataṃ dehi sahassaṃ diṭṭhasoṇakaṃ 2-
ahaṃ te 3- soṇakamakkhissaṃ sahāyaṃ paṃsukīḷitaṃ.
[67] Katarasmiṃ so janapade raṭṭhesu nigamesu ca
kattha soṇakamaddakkhi 4- taṃ me akkhāhi pucchito.
[68] |68.1| Taveva deva vijite tavevuyyānabhūmiyā
ujuvaṃsā mahāsālā nīlobhāsā manoramā.
|68.2| Tiṭṭhanti meghasamānā rammā aññoññanissitā
tesaṃ mūlasmi soṇako jhāyati anupādino
upādānesu lokesu ḍayhamānesu nibbuto.
[69] |69.1| Tato ca rājā pāyāsi senāya caturaṅgiyā
kārāpetvā samaṃ maggaṃ agamā yena soṇako.
|69.2| Uyyānabhūmiṃ gantvāna vicaranto brahāvane
@Footnote: 1-2 Sī. Yu. daṭṭhu-. 3 Sī. Yu. ayaṃ pāṭho natthi . 4 Sī. Yu. kattha te soṇako
@diṭṭho.
Āsīnaṃ soṇakaṃ dakkhi ḍayhamānesu nibbutaṃ.
[70] Kapaṇo vatāyaṃ 1- bhikkhu muṇḍo saṅghāṭipāruto
amātiko apitiko rukkhamūlasmi jhāyati.
[71] |71.1| Imaṃ vākyaṃ nisāmetvā soṇako etadabravi
na rāja kapaṇo hoti dhammaṃ kāyena phassayaṃ.
|71.2| Yodha 2- dhammaṃ niraṅkatvā adhammaṃ anuvattati
sa rāja kapaṇo hoti pāpo pāpaparāyano.
[72] Arindamoti me nāmaṃ kāsirājāti maṃ vidū
kacci bhoto sukhaseyyā idha pattassa soṇaka.
[73] |73.1| Sadāpi bhadramadhanassa anāgārassa bhikkhuno
na tesaṃ koṭṭhe openti na kumbhe na kaḷopiyā
pariniṭṭhitamesānā tena yāpenti subbatā.
|73.2| Dutiyampi bhadramadhanassa anāgārassa bhikkhuno
anavajjapiṇḍo bhottabbo na ca kocūparodhati.
|73.3| Tatiyampi bhadramadhanassa anāgārassa bhikkhuno
nibbuto piṇḍo bhottabbo na ca kocūparodhati.
|73.4| Catutthampi bhadramadhanassa anāgārassa bhikkhuno
muttassa raṭṭhe carato saṅgo yassa na vijjati.
|73.5| Pañcamampi bhadramadhanassa anāgārassa bhikkhuno
nagaramhi ḍayhamānamhi nāssa kiñci aḍayhatha.
@Footnote: 1 Ma. vatayaṃ . 2 Ma. yo ca.
|73.6| Chaṭṭhampi bhadramadhanassa anāgārassa bhikkhuno
raṭṭhe vilumpamānamhi nāssa kañci ahāratha 1-.
|73.7| Sattamampi bhadramadhanassa anāgārassa bhikkhuno
corehi rakkhitaṃ maggaṃ ye caññe paripanthikā
pattacīvaramādāya sotthiṃ gacchati subbato.
|73.8| Aṭṭhamampi bhadramadhanassa anāgārassa bhikkhuno
yaṃ yaṃ disaṃ pakkamati anapekkhova gacchati.
[74] |74.1| Bahūpi bhadrā etesaṃ 2- yo tvaṃ bhikkhu pasaṃsasi
ahañca giddho kāmesu kathaṃ kāhāmi soṇaka.
|74.2| Piyā me mānusā kāmā atho dibyāpi me piyā
atha kena nu vaṇṇena ubho loke labhāmase.
[75] |75.1| Kāme 3- giddhā kāmaratā kāmesu adhimucchitā
narā pāpāni katvāna upapajjanti duggatiṃ.
|75.2| Ye ca kāme pahantvāna 4- nikkhantā akutobhayā
ekodibhāvādhigatā na te gacchanti duggatiṃ.
|75.3| Upamante karissāmi taṃ suṇohi arindama
upamāya midhekacce 5- atthaṃ jānanti paṇḍitā.
|75.4| Gaṅgāya kuṇapaṃ divā vuyhamānaṃ mahaṇṇave
vāyaso samacintesi appapañño acetaso.
@Footnote: 1 Ma. ahīratha . 2 Sī. bahūni samaṇabhadrāni. Yu. bahūpi bhadrakā ete.
@3 Sī. Yu. kāmesu . 4 Sī. Yu. pahatvāna . 5 Sī. Yu. pidhekacce.
|75.5| Yānañca vatidaṃ laddhaṃ bhakkho cāyaṃ anappako
tattha rattiṃ tattha divā tattheva nirato mano.
|75.6| Khādaṃ nāgassa maṃsāni pivaṃ bhāgīrasodakaṃ
sampassaṃ vanacetyāni na palettha vihaṅgamo.
|75.7| Tañca otaraṇī gaṅgā pamattaṃ kuṇape rataṃ
samuddaṃ ajjhagāhāsi agatī yattha pakkhinaṃ.
|75.8| So ca bhakkhaparikkhīṇo udapatvā 1- vihaṅgamo
na pacchato na purato nuttaraṃ nopi dakkhiṇaṃ.
|75.9| Dīpaṃ so najjhagā gañchi agatī yattha pakkhinaṃ
so ca tattheva pāpattha yathā dubbalako tathā.
|75.10| Tañca sāmuddikā macchā kumbhīlā makarā susū
pasayhakārā khādiṃsu phandamānaṃ vipakkhikaṃ 2-.
|75.11| Evameva tuvaṃ rāja ye caññe kāmabhogino
giddhā ce na vamissanti kākapaññāya 3- te vidū.
|75.12| Esā te upamā rāja atthasandassanī katā
tvañca paññāyase tena yadi kāhasi vā na vā.
[76] Ekavācaṃpi dvivācaṃ bhaṇeyya anukampako
tatuttariṃ na bhāseyya dāso vayyassa 4- santike.
[77] Idaṃ vatvāna pakkāmi soṇako amitabuddhimā
vehāse antalikkhasmiṃ anusāsitvāna khattiyaṃ.
@Footnote: 1 Sī. uppatitvā. Yu. udāpatvā . 2 Ma. vipakkhakaṃ. Sī. Yu. vipakkhinaṃ.
@3 kākapaññāva . 4 Sī. dāso ayyassa . Yu. dāso ayirassa.
[78] |78.1| Ko nume rājakattāro sūtā veyyattimāgatā 1-
rajjaṃ niyyādayissāmi nāhaṃ rajjena matthiko.
|78.2| Ajjeva pabbajissāmi ko jaññā maraṇaṃ suve
nāhaṃ kākova dummedho kāmānaṃ vasamanvagā 2-.
[79] Atthi te daharo putto dīghāvu raṭṭhavaḍḍhano
taṃ rajje abhisiñcassu so no rājā bhavissati.
The Pali Tipitaka in Roman Character Volume 28 page 1-35.
https://84000.org/tipitaka/read/roman_item.php?book=28&item=1&items=79&mode=bracket
Classified by content :-
https://84000.org/tipitaka/read/roman_item.php?book=28&item=1&items=79
Compare with The Pali Tipitaka in Thai Character :-
https://84000.org/tipitaka/read/pali_item.php?book=28&item=1&items=79&mode=bracket
Compare with The Royal Version of Thai Tipitaka :-
https://84000.org/tipitaka/read/byitem.php?book=28&item=1&items=79&mode=bracket
Study Atthakatha :-
https://84000.org/tipitaka/attha/attha.php?b=28&i=1
Contents of The Tipitaka Volume 28
https://84000.org/tipitaka/read/?index_28
https://84000.org/tipitaka/english/?index_28
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
