[470] Kathañca bhikkhave parivāso dātabbo . āpattipariyantaṃ
jānāti rattipariyantaṃ jānāti āpattipariyantaṃ sarati rattipariyantaṃ
sarati āpattipariyante nibbematiko rattipariyante nibbematiko
parivāso dātabbo . āpattipariyantaṃ na jānāti rattipariyantaṃ
jānāti āpattipariyantaṃ na sarati rattipariyantaṃ sarati āpattipariyante
vematiko rattipariyante nibbematiko parivāso dātabbo .
Āpattipariyantaṃ ekaccaṃ jānāti ekaccaṃ na jānāti rattipariyantaṃ
jānāti āpattipariyantaṃ ekaccaṃ sarati ekaccaṃ na sarati rattipariyantaṃ
sarati āpattipariyante ekacce vematiko ekacce nibbematiko
rattipariyante nibbematiko parivāso dātabbo . evaṃ kho bhikkhave
parivāso dātabbo.
Parivāso niṭṭhito.
[471] Tena kho pana samayena aññataro bhikkhu parivasanto
vibbhami . so puna paccāgantvā bhikkhū upasampadaṃ yāci . te
Bhikkhū bhagavato etamatthaṃ ārocesuṃ.
[472] Idha pana bhikkhave bhikkhu parivasanto vibbhamati .
Vibbhantakassa bhikkhave parivāso na rūhati . so ce puna upasampajjati
tassa tadeva purimaṃ parivāsadānaṃ . yo parivāso dinno
sudinno. Yo parivuttho suparivuttho. Avaseso parivasitabbo.
[473] Idha pana bhikkhave bhikkhu parivasanto sāmaṇero hoti.
Sāmaṇerassa bhikkhave parivāso na rūhati . so ce puna upasampajjati
tassa tadeva purimaṃ parivāsadānaṃ . yo parivāso dinno
sudinno. Yo parivuttho suparivuttho. Avaseso parivasitabbo.
[474] Idha pana bhikkhave bhikkhu parivasanto ummattako
hoti . ummattakassa bhikkhave parivāso na rūhati . so ce
puna anummattako hoti tassa tadeva purimaṃ parivāsadānaṃ . yo
parivāso dinno sudinno . yo parivuttho suparivuttho .
Avaseso parivasitabbo.
[475] Idha pana bhikkhave bhikkhu parivasanto khittacitto
hoti . khittacittassa bhikkhave parivāso na rūhati . so ce
puna akhittacitto hoti tassa tadeva purimaṃ parivāsadānaṃ . yo
parivāso dinno sudinno . yo parivuttho suparivuttho .
Avaseso parivasitabbo.
[476] Idha pana bhikkhave bhikkhu parivasanto vedanaṭṭo 1- hoti.
@Footnote: 1 Ma. vedanāṭṭo. ito paraṃ sabbattha eseva nayo.
Vedanaṭṭassa bhikkhave parivāso na rūhati . so ce puna avedanaṭṭo
hoti tassa tadeva purimaṃ parivāsadānaṃ . yo parivāso dinno
sudinno. Yo parivuttho suparivuttho. Avaseso parivasitabbo.
[477] Idha pana bhikkhave bhikkhu parivasanto āpattiyā adassane
ukkhipiyati . ukkhittakassa bhikkhave parivāso na rūhati . so
ce puna osāriyati tassa tadeva purimaṃ parivāsadānaṃ . yo
parivāso dinno sudinno . yo parivuttho suparivuttho .
Avaseso parivasitabbo.
[478] Idha pana bhikkhave bhikkhu parivasanto āpattiyā appaṭikamme
ukkhipiyati . ukkhittakassa bhikkhave parivāso na rūhati .
So ce puna osāriyati tassa tadeva purimaṃ parivāsadānaṃ .
Yo parivāso dinno sudinno . yo parivuttho suparivuttho .
Avaseso parivasitabbo.
[479] Idha pana bhikkhave bhikkhu parivasanto pāpikāya diṭṭhiyā
appaṭinissagge ukkhipiyati . ukkhittakassa bhikkhave parivāso na
rūhati . so ce puna osāriyati tassa tadeva purimaṃ parivāsadānaṃ.
Yo parivāso dinno sudinno . yo parivuttho suparivuttho .
Avaseso parivasitabbo.
[480] Idha pana bhikkhave bhikkhu mūlāya paṭikassanāraho vibbhamati.
Vibbhantakassa bhikkhave mūlāya paṭikassanā na rūhati . so ce
Puna upasampajjati tassa tadeva purimaṃ parivāsadānaṃ . yo
parivāso dinno sudinno . yo parivuttho suparivuttho .
So bhikkhu mūlāya paṭikassitabbo.
The Pali Tipitaka in Roman Character Volume 6 page 249-252.
https://84000.org/tipitaka/read/roman_item.php?book=6&item=470&items=11
Classified by [Item Number] :-
http://84000.org/tipitaka/read/roman_item.php?book=6&item=470&items=11&mode=bracket
Compare with The Pali Tipitaka in Thai Character :-
https://84000.org/tipitaka/read/pali_item.php?book=6&item=470&items=11
Compare with The Royal Version of Thai Tipitaka :-
https://84000.org/tipitaka/read/byitem.php?book=6&item=470&items=11
Study Atthakatha :-
https://84000.org/tipitaka/attha/attha.php?b=6&i=470
Contents of The Tipitaka Volume 6
https://84000.org/tipitaka/read/?index_6
https://84000.org/tipitaka/english/?index_6
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
